Looking Back To Where We First Met chapter-7

[Demovie Cruz]

Hamhaih lutuk in Zothansanga che vel chu ka melh tawp a, ka hmui a hupna a kut chu ka vuan ran bawk.



Engmah pawh sawi tumlo hian min melh ngur ringawt a, mahse a hméla lungawilohna chu ka hmu thei. Engvanga hetia rawn awm ngawt nge anih lah ka hre derlo.



A awmdan chu zawh chak viau mahila ka hmui a hup miau vangin ka hmui pawh ka ti che thei tawk chauh ani si.


Harhchhuak thut ang mai hian ka tál ta phat a, ka hmui a hupna chu ala thla ve mai bawk a mahse ka káwngah chuan a rawn kuah zui hmiah. A kut alak thlak rual chuan ka thaw ta káwk a, inlakhran tumin a âwmah chuan ka nem zui ngat ngat a chet pawh a che sawn eihlo.



"Zothansang, min thlah la chhuak rawh" kati khur deuh dawt a, ka thusawi ve chu a ngaipawimawh hmel loh hle a, zalo zetin lo min then khum suk duh chauh.



"Tinge hetia i awm? Midangin an hria ang, chhuak vat rawh" ngaipawimawh duh biklo in ka ti zui leh a, a chetsawn hrut takah chuan a chhuak ve mai dawn maw ti a ka thawk huai lai chuan ka nghawng chu a rawn lum ta hak a.



Zothansanga chuan a hmui lum thar thar chuan ka nghawngah a rawn fawp anih chu! Phawk zet hian ka ding khawng reng a, inlahrang tur pawn ka che theilo.



Dim te hian ka nghawng chu a fawp kual a, a hmui in a tawhna a piang chu a mur chem chem a, ka mit chu chhingin kalo dawh mawl tawp ringawt.



Ka káwngah chuan rawn kuah in a âwm si chat chuan min kuah hnai a, a kut hnih chuan nghet lutuk hian min kuah zui hmiah bawk. "Zothan" ka aw chhuak láwi rat vang chuan ka insehruh teuh mai.



"Tihian awmlo ang, a tha lo" tihchu ka sawi ve ngei a mahse a lak atanga awm hran chu ka tum biklo. Ka zep lo keipawn Zothansanga hi ka thlahlel ve takzet, a kuahna thlamuanthlak tak te hi ka ngai a, a hmui deh nuam zetina min tawhna tang te hian a ka inlahrang phal biklo.



He hun hi a nilawmni ka nghakhlelh em em thin kha. Inngaihtuah buai tawhlo in ka kuah let ve ta a, chutihrual chuan a thaw hawk ri ka hrezawm nghal a, nghet lutuk in kan inkuah zui vang vang.



Chutiang chuan engtia rei nge kan awm pawh ka hrelo, pawnlama hmeichhe tawng lar lar ri chuan kan suangtuahna a tang chuan min Kai harh ta zawk a, rang lutuk hian ka inlahrang zui nghal.



Zothansanga pawh chuan min chelh zui tung tawhlo in min thlah ve ta mai bawk a. Mahse a mitmeng thunei lutuk chuan min melh zui reng thung.



"Zothan i awm em?" pawnlama mi chuan tiin kan room kawngkhar chu a rawn kik zui zat. Hlauthawng deuha Zothansanga lam ka hawi chuan hlauthawng hmel pawh a pu ve lo, mitmeng nung sar in minlo melh chu niin lai angreng deuh chuan kalo nuih tawp.



"Va chhuak vat rawh, midangin an hriat hma in" ka ti a, a tawp nan ti niawm hrim in chal ah chuan a rawn fawp zui vang vang phawt a, inlahrang in min chhuahsan ta a.



A chhuahrual chuan pawnlama hmeichhe nui ar ar thawm chu ka hre nghal a, Zothansanga tawng thawm erawh ka hre velo thung. Muangchanga khum panin ka let thla tawp a, ka mitthlaah chuan nichin lawka thilthleng chu a rawn lang zui a, ka inrin hma in ka nui chhuak hawk anih chu!



Mahse ka kut zunglaia min phuartu ka hmuhrual erawh chuan ka nui tawp riai riai thung. Kan inneih zungbun chu ka tuai ka tuai a, "Tinge nang zawk hi inih zawkloh" tih bak ka sawi theilo. Ka mittui tla hru tur takngial pawn ka che peihlo.



Intiharh lui in tihtur chu ka zawng ta ngawt a, kan thawmhnaw te chu thliar hrangin ka thlep tha ta vek a. A zawn a zawng ka ni bawk a chetna tur ka hria in ka duhai ai chuan ka buai a ka zawh meuh chuan ka thlan ta hluam mai. Mahse ka rilru kal bing lutuk tur a ti zia a, ka thawveng ta hawk thung.



Ka thlan nasa deuh nen inbual phawt chu ka tuma, ka mamawh vel ka lakkhawm laiin Abby chuan min rawn call a, kava chhang leh ta phawt.



"Mate, Biakdiki damdawiin ah a awm an tia, va tlawh pahin thawmhnaw en ka duha, lo insiam ve rawh" tiin ka tawng ve hma hauh chuan a dah zui a, ka phone chu ka ner khum nawng ringawt. Henu hian tihtur hi a nei ve thlawt lo em mawni.



Biakdiki pawh chu a eng na nge ni reng reng ni, college kan chhuah hnu hian kan inbe zui ta meuhlo a, University kal zawm lo in an veng school-ah a thawk zui tih min rawn hrilh ve bak kha chu a chanchin ka hre zui tawhlo.



Tunah chawhnu lam dar 1 ani tawh a, chhuah nan chuan a hma vak tawhlo ti mahila Abigaili ber a insiam leh tawh awm sia peihlo deuhin kava inbual hmasa a, ka zawh rualin hmanhmawh deuh tak chuan ka insiam zui nghal.




Ka insiam zawh rualin ka car chahbi chu kala a, inhnuai ah ka chhukthla zui nghal. Zothansanga thiante pawh anlo la awm ve reng chu niin, enge maw an hriatni ka chhukthla lai chu min han melh deuh thap hlawm a, tawite in ka nuih ta ngawt a, biak phei chu minlo be hlawm chuanglo a keipawn be duh biklo in ka chhuak tlang nghal.



Abby te veng lampan chuan ka inkhalh thla a, a sawi ang ngeiin an inkawtah chuan minlo nghak a. A phone bih a alo kun ngur chu ka fiam chak deuh tlat a, a hma chiaha kava din hrawk rual chuan a petek zui nghal nawk a, a rawn hawichhuak leh hmel chu dur tha tak ani.



Kei min hmuhrual chuan a meng rum zual sauh lehnghala, a mit a hnawih nasa si a landan chu a rapawm lek lek hial zawk.



Tlawn deuh titiha kalo nuih chu a der pawn min nuih let eihlo a, kawngpui rah chim tum ang hrima na zeta per in min rawn pan. Chutah na lutuk in car kawngkhar chu a rawn pawt hawng rawp a, a rawn thut luh sawk rual chuan a aia na mah in an khar zui leh anih kha!




Keimah vanga ka car duatlai in a tuar chu pawi ti zet in kalo melh tawp. A va han tihchi loh thin tak.




"Thinrim suh mate, ka fiam mai mai che lawm" dam deuh taka ka tih chuan rum em em hian min han melh leh a, "Ka hre vek, min sut i chak ve hrim hrim. 'I lei thar ni pawn vawikhat tal kala su ang che: min tih te kha kala theihnghilh lo nasa" a thusawi tawp lam vang chuan kei kalo nui hawk thung. Khami ni a ka fiamna pawh kha tun thleng hian ala hua a, kan inhnial deuh chang hian a sawi chhuak ve ziah bawk.




Chhang tawh lo in kan damdawiin kalna tur hming chu ka zawt ta daih a, "Civil ah ania, mahse thawmhnaw en hmasa phawt ang, anihloh chuan kan rei leh awmsia kan en hmanlo ang tih a hlauawm." tha tak chuan ati ve leh mai a, a duh ang tak chuan bazar lamah kan kual a.




A tlai ve deuh tawh vangin rei tak kan vak kual tawhlo a, vawiin chu a zia a dang deuh nge a duhkhirh vak lo a, a nalh atih deuh chu a la hmiah hmiah tawp. Kan bazar dun tawh a nuam kala tih tum ber ani hial ang.



Keipawh chu dawr nghah ka ngai tawh dawn sia tiin ka in lei duhthawh ve a, ka inkhai bawr tun chu min en in a nui leh thin a, enge maw a ngaihtuah leh tawh ni.



Car-ah chuan kan thil lei ho chu kan dah lut a, civil hospital lampanin kan in khalh chho lehnghal.


Reiloah kan thlenga car chu park tha in Biakdiki awmna ward lampan chuan kan chho nghal a.


Biakdik'n kan hmel a han hmu thut chu a hamhaih hmel deuh a, kan sawi lawk hmasa silo a, mak ati viau pawh chu a awm tho.



A nu niawm tak Biakdiki lo awmpui tu chuan minlo be nghal sawk sawk a, thutna min kawhhmuh ah chuan thu thla in kan thei leisak te chu kan pe a.


Anlo lawm thiam khawp mai a, "lei kalo rilruk lai tak ania, hei in thiannu hian a ei chak thu a sawi ve reng a, inlo keng hlauh chu a lawmawm tak tak ani." Tiin a then chu a vel a, kan vai chuan kan ei ho a.


A nu chuan rei pawh min thutpui ta lo a, "in awmlai in ka thiannu te kava tlawh ve lawk ange. Tukin zing khan canteen-ah kan in hmu hlawl a, minlo beisei viau ang.Tikhan mambawihi chu lo awm pui rih mai ru aw" Nu Masangin chuan ati a, Abby zawk chuan chhangin Biakdiki chu lo ngaihtuah lo tur in a chah ve mawlh mawlh a.



A nu'n min chhuahsan hnu chuan keichu ka ngawi ta reng a, Abby leh Biakdiki chu an in be mawlh mawlh reng a, a khat tawk in keiin kalo zawm ve bawk. Abby chuan Biakdiki chu a bialpa chanchin a zawt ta khawlh a.



A bánah chuan kava nghawk sak zauh a, a nipawh Biakdiki hmel awmdan a hmuh chuan a zawt chu a inchhir hmel hle a.


Biakdiki lah chu a ngawi zui hmak bawk si, "Tunah chuan ka sawi chak rihlo. Ni dangah kala hrilh vek ang che u" rei fe a ngawih hnu chuan a rawn ti chhuak a, keini pawn kan sawipui zui tawh biklo



Kan boruak uap zet tihreh tum in Abby chuan kan college kallai chu a sawichhuak a, Biakdiki sawi nuam tih tak ni tur ani a tawng ve leh ta bawrh bawrh a, Abby chu a thaw huai te'n ka hria.



An in sawi phur telh telh a, a tawpah ka chetdan thin te an sawi chhuaka an pahnih chuan za lutuk in min nuih tlawr tlawr mai a, "Rintei hi chu a bawn ve hrim hrim, engtin nge traffic police chhelo atih vang mai khan a in man tir tawp theih le" Biakdiki chuan a rawn ti a min nuih dun leh.



Kei erawh ka thuthmunah chuan kalo zak ngat ngat a, an sawizui zel hlau in thildang lo sawipui chu ka tum ve thin a, an ni pahnih lah chu thu ngaiah bawk an tawp leh thin. A tawpah chuan tihngaihna hre tawhlo in kalo nuih liam pui ta tawp.



"Kha chu ala zia a lawm Vankulhkawngka-a hnawl Nana a tactic mawlh kha" Abby lahchu a sawi nuam tih ber mai an sawichhuak ta bawk a, a sawi tawp leh hleithei tawhlo. Kan haw dawn thleng chuan anla sawi a, Biakdiki nu lo let pawn alo nuihpui ve hawk hawk mai a kan hlimpui tlang ta phian zawk.




Kan haw lamah chuan Vankulhkawngka-a chanchin bawk chu sawiin min chhaih reng a, Vankulhkawngka-a berkhera min chhaih chu keiin kalo haw nasa bawk si anilah chuan min chhaih uar sauh sauh bawk si.




"Vankulha nena in nih lai kha chuan inva bawn dun thin tak, hla te kha in phuah dun nualin ka hria. Ee.. music video te pawh in siam ve tak kha" ti lehin a nui zui hak hak a, keipawh Vankulhkawngka-a nena kan khawsak dan ka ngaihtuah chang chuan ka nui tawp zel. Ani nen khan sulhnu tamtak kan nei a, chung kan sulhnu te chu a thianghlim em em lawi si.




"I duh ve deuh ber in ka hria." atih chuan kalo nui ve ringawt a, "Tun thlengin" ka tihchuan a awihloh hmel hle.
"Dawt sawi hi i inthlahrung miahlo nge" minti ta zék a.




An in kan thlen tak avangin ka chhang tawhlo. A nu a call a reilo ah an nula rawn chhuak in a thil lei chu a rawn khaipui a, "Zanah kan inbe dawnnia" a ti a an inlam panin a phei ve nghal.




Keipawh chu ka inkhalh chhuak ve leh a, in ka thlen lai chuan khua a thim thet thet tawh. Garage ah chuan kapa car pawh alo in hung ran tawh a, ka thleng tlai ber anih hmel.



Remruata chu ka call ta a, rei pawh a ring hma in alo chhang thuai a "Lo chhuak lawh teh, ka thil lei hi minlo khai pui rawh" ka tihchuan lehlam thawm chu a ri rawk rawk a, min chhanglo in a dah zui lehnghal mai a.



Mahse reilo ah kawngkhar chu a rawn in hawnga Remruata ngei chu sleeveless nen a rawn chhuak teu mai.



Makti deuh taka kalo en chu min melh ve zawk a, car chhunga ka thil leiho a hmuh rual erawh chuan awihloh hmel fé in min melh. "Enge" ka tih hlak rual chuan lu thing nghut in ka thil lei ho chu a khaichhuaka. A lak kimloh chu keiin kalo khai ve thung.



Inchhunga kan inzui lut chu nuamlo kati ve deuh, ka nulat lai pawn ti em em hian kala in lei tam ngailo a sin le. Nuamlo ti deuhin kanu lo phei chu kalo melh a, "Kalo háwn in ilo awm lo a, kan khua iti har hman alawm. Kha i duh ang thalin i in lei maw?" tiin min nuih sang a.



"Lei animai, kan thiannu damlo kan pahin Abby nen kan chhuak mawle. Midang anlo haw vek tawh em ni?" tiin kan zawt khawmawi ve a, inchung lampana Remruata kal chu ka zui ve nghal.




Kan room a kan luh hma chiah chuan Zothansanga a room a tanga lo chhuak chiah nen chuan kan in tawk a, Remruata chu a lut tlang a Zothansanga chuan a u thil khai lai chu a melh a ka thil khailai nen chuan, chutah pa zet hian a kiai zui suk a, Lai deuhin kalo nui ve tawp.




A la kal mai bik loh vang chuan ka thil khailai chu ka lek zauh a, ka luhsan ta nghal a. Kawngkhar chu nem phui in ka thinphu rang lutuk chu ka dawm a, thawk kala zui kawk bawk.



Tinge hepa kianga ka awm hian ka lung hi Phu rang em em zel nge maw anih le.



Ka hawilet rual chuan Remruata makti deuha minlo en reng chu ka hmu zui a, za vaklo in ka nuih ta ngawt.



"Karthar lamah hian kan cousin kual leh thian thenkhat te nen resort lamah kan kal dawna, i duh chuan i thian dangte i sawm ve dawnnia" a tih chuan ka inrin hma in kalo nui a, hriatthhiam loh hmel zetin minlo melh haw a, ka hriatah tun kha tha taka min biak vawikhatna.




"Ka duh zat zat aw" ka tih chuan a lu alo bu nghut a, a piangthar nge a sumdawnna lamah a tluang deuh zawk ni zanin a mood chu a dang riau mai.





Ka inthlak chu Remruata pawn minlo nghak ve ran a, ka zawhrual chuan kan chhukthla dun a



Kan chaw ei lai chuan kapa nen dawr chungchang chu kan sawi dun a, thawmhnaw bakah tlereuh lam buaipui tel ka tum a, a hlawk dan a zirin cosmetic lam thleng a khawih ka tum bawk.





Kanu leh paten minlo phur pui phian a, kapa inah khan la awm ila chuan tunah hian lehkha kala zir reng awmsia pasal neih ka inchhir loh ber tum ani hial ang chu!



Zothansanga kava melh chuan minlo en reng tawh a, pa ka tih thin dan deuh in minlo nuih a kalo lai ringawt.



"Mo tha kan chhawr ve tawh dawn a keichu ka phur tawh" Liandingpuii ani, chhang duhlo in ka thil eilai chu ka eizawm mawlh mawlh a.



"Miten 'in mo hi ava hman ve' an tih changte hian kalo huatpui thei lutuk che a, mite lah hian an hriat ang ang hi an sawichhuak ngawt zel bawk sia." midang tana tawngkam pangngai tak, ka tana ngeiawm em em si a tawngchhuah hi a thiam ka ti.



Tunah pawh kanu te chuan a tawngkam chu hrethiam ve heklo "Mite lah hi an tawngduh ve bawk ani. Vawikhat pawh an ina la chuangkai ngailo ten mo sual, mo hman lutuk hi an han ti thla ve ngawt thin a, tiang ho hi mo thalo zawk chu" kanu chuan ati zui bawrh bawrh a, kapa pawn alo thlawp hle.



"Mo hmeltha hi an pasal nau te hian an thik deuh tlat thin lehnghal" Zothansanga chuan a rawn ti ve khauh a, rang zetin alam chu ka hawi a ani chiah hian Liandingpuii tawngkam kha a hrethiam ni in a lang.



Liandingpuii pawh chu a tum zui hmuk a, kei erawh ka nuih aza deuh tlat a, Zothansanga rawn tawng ve pawh a mak tawh nen ka thlavang a rawn hauh chu a mak lehzual!




Ei zawm tawh lo in ka kham zui daih a Zothansanga pawh a kham zui ve nghal bawk.



ka kut sil lai chu minlo nghak a, nuihza insum deuha ka melh chho chu minlo melh chhuk ve run a, a mitko san ak in a kiai zui suk a.