SCHIZOPHRENIA : Saltanna Ata Zalenna

[April Hmar Liverpool]

SCHIZOPHRENIA: Saltanna Ata Zalènna

Story by, Laltanpuia Hmar @Hringnun Guru

Chapter _1

Hriselna thu-ah hian, a naran, a dawrawm deuh chinin chhuanlam tharlam Kan han siama a hnukhawia Kan tang thin te hi mi hian an sawi duh em a!

Mahse Ka tia, Mi fate (an fate) pawh chu eng ropuina faluaa thuam chu nge maw an han nih bik le? An fanu make-up hmachhuantu Lalpawchiangi tih mai Mai ho kha em ni? An fapa-te lah chu thim hlim bak chhia tih angreng, Hmm!

khaw laiah chuan 'ka nei keh chet e' an ti a, zirna in leh biak In chu an chapo induh lak sàn hmun chauh a ni. Tin, Club leh spot chu intawllèna an inhrawt hmun lek zuk ni a!

Mahse, kei chuan khaw lai chu ka finna a nia sin! Ni e, khawlaiah chuan ka vak ka vak a, ka ngaihtuah ka ngaihtuah thin, tichuan finna thu chu ka chhui chhuak thin a ni.

An ni ianga bakchhe lèn tih mai mai zawng ni i khaw love! Tin, Biak In-ah pawha inkhawm lo ka ni bik em ni?

Rannungte chet vel dan chu ka thlir reng thin a, (Tunah hian M.Phil, Zoology degree (4th semester ) ka zir) ka chhut ka chhut Mai thin.

Mahse sawi loh a lúm, mi hri hrâi tha lo leh chawr chhia, vun hang mûk tlat, a hauhuk kaia tih tham mawina engmah lo hi ka ni si a. Ka hetih vang hi a ni reng a, nula lamah erawh engmah ka nih loh ni.

Mahse, ka pa hi Minister/MLA ngat tho a ni ve asin le! Tawi bialtu MLA professor Lalnilawma hi zawng, politics leh sawrkar thila pa a laia pa taima leh zam tha, a khup leh a thala hman theih, chepa nung khai ang vat vat hi a ni ringawt mai.

Mahsela, chhungkaw tan hi chuan 'MLA mawl tak' ka ti dawn nge, 'a chhawih vanga chhungkaw tang hma ngaihtuah reng reng lo' ka ti zawk dawn. A insawi theih leh hmachhuan ber chu 'ram leh hnam tan' tih chauh a ni. Tin, Dikna te, rinawma te, 'mipui tan' tih sahuai thing vuan khawh tlat mi a ni si a.

Mahse, thenkhat thu bawp lawka lak chingte chuan, Minister-te chung thu a rik hleka 'eiruk hlemhlet' tih angreng, 'mahni inhai vura inchhek arbawm' tih thu nawi vel chu an kam sep tui ber pakhat zu tling ve thin tho a. A thi beh loh thu khâk mai pawh a!

Thil siam dang rannungte nun hi chhui zui tlak deuh a nia sin. Vuiin vài hla an zawng an zawng ve lo.

Mihringte dinhmun awta an kur an kur tak pawh hi ka hriat hlei loh! (chu teh!) Rinawm taka koa tla chanvo hlentu mai an nia sin.

Kei a fapa tisa inphut mawi reng reng lo hi mi han en teh u, hemi lova liam, 'eiruk chuti khati' lo ti lo ti lo mai ula, lo hram lo hram lo mai rawh u!

A chiang reng, ka pa hian a eiruk chu sawi loh, 'ram leh hnam tan' avâng hian kan nghei lo chauh zawng anih hi.

Duh tawk ang, ka pa Minister nih Chung thu leh politics chungchang hi zawng ka chu kha loh list-ah hian a Chung sang luah phatu a tling tlat a ni.

A lehlamah ka nu Mary Zonunthari hi kohhran misa dik khawh tlat a ni veleh a.

Mahse, hei pawh, fel leh tha ber nia inchhal thenkhat. Kohhrana 'chumi kha mi' tih tur Chuang awm hlei lo, Pathian em chuk ngam silo kohhran leh a memberte-a tuan ching tlat an awm.

'Zawngin a ngum khak a hmu love' tih chauh kan ni. 'Kohhran chuti khati, inkhawm a chuti a khati' kan ti dur dur reng a. Kohhran i hmuh felhlel rah kha i eiin i in em ni? I puar pui em? I dinchhuah pui meuh maw?

Thenkhat an hming hmer chuan ka sawi lovang, pawl pakhat 'Vanram kai thua hmai uang thei deuh Mai hi an nia' ti talh thung ang. Heng mite pawh hian an thurin chungchang mai mai thu hi buaipui tawk zuk tlin em em reng a!

'Kohhran thurin chuti e khati e! Tiin an ngek vel ruai a, kohhran dang an sáwt ringawt zel a nih chu! Thil tul lo lai let der a ni. A dik ber leh tha ber nia lan tumna hmaikawr tenawm hi alawm 'Pathian thu hmaikawra hmang' kan tih ni.

Sawi tam chiam hian kawng ro a su lo, 'sepui ruah do ngawt lah hian kohhran thurin hmel hmai bal tur kha a veng bik chuang lo' tih thil mai a ni.

Tin, Ka nu leh kan kohhran (Seventh Day Adventist) chungchang a chhuan chhe zawnga a ri ka bengin a hriat hlek hi zawngin ka'n sa ta phat thin a, chuvang pawh chu a ni.

Ka chung thu-ah khan let leh tawh zawk ang.

"Ni e maw le," ka ti a, 'ka pa MLA tlin hlimchhhawn a la ni tho bawk a' tiin ka pa nihna chhuang chuan Saitual-ah ka va he heu ve poh a niang chu.

Mahse, kei chu 'a chaihtu ang nal nal' an tih ang deuh mi danglang bik ka ni ka tih kha, he heu satliah mai mai kha ka tum a ni i khaw lo.

Ka leave letter ziah turah hian chawlh kar hnih dawn ka chawlh tur thu ka ziak dawn a, hei hian thil tha zawk a puakchhuah ngei pawh ka beisei a ni.

An sawi Natna changkang, Schizophrenia-in a man, Anxiety-in thi lo a ruanga a salbeh hnu, hremhmun chhala tawngkhawngna-in a kherh chu ka ni a, chuvang chu a ni, hetia inkhurkhung reng lova inleng harh ve tura kar chhuah ka'n nih tak ni.

A tul a niha va inbunruak mai tur leh, a bai dai baw zawng pawha va indai bawrh bawrh mai tur chuan ka thian tha Mike Zochhuana chu ka va luhkhung poh a niang chu.

Mahse, hetia in tur vak chin hi sim daih Tur. He Hremhmun hri chhia hi, a ti hluarkai thei zawnga chiau khumtu i nih chu Setana nen e'nge dang chuang?

Ni e, Kang làn beiseia zinkawng ka'n zawh takah chuan he chhungril khawvel hi luhkhung a'n ni dawn zet a, mahse 'em a! ka ti leh a, 'ka chin than' hi ka ti Mai thin, hetia'ng hunah hi zawng ka lungdum miah lo list-a country hla ngaithla hian inrunluihah ka tlak tluk tluk zel mai thin a ni.

Mahse le, motor darthlalanga lo lang ram hnim ruih te, thliin a len thing leh maute chu chhâwn ang an kur siau siau a, ral tianga romei indi chial reng te, kawng dunga lirthei insul pel zut zut thinte ka'n hmuh taka ruaiah chuan chu suangtuah natna thuk tak chu a rawn inlan leh si thin a ni.

Hmeichhe lama engmah ni lo hian fiahna erawh tawng lo ka ni bik tawp lo, kha hmeichhia kha a kuta chelhin ral leh lam ka chuan pui asin, Durtlang leitan atanga Aizawl khawpui pe ut mai, khampang khawkrawk awih thla vut mai, chingal fir taka fir zo thlifim tleh vel hiau hiau karah te khan a ni, eng biahthu thlum fahrah a mual mual emaw ni chu ka fah ve tak ni!

Thlifim chuan ka thiani bahsam chu chhawl leng siau siau hian a'n chhem ta mai a. Romei te chuan han thurual zui nghal chatin, ral lehlamah chuan an indi chil chial reng mai a ni. Kei chu 'ka lu a na deuh fuk fuk' tih mai loh chu.

Chutah le, ka thiani chuan a kut ka vawn chu han thlahin ka sam a rawn huih heuh theuh ta a, a mitmeng tle siar mai leh ka mit chu indi chil chial rengin. A det hian kan indet tawn relh relh reng mai a ni.

Chutah le, ka thiani hmui leh ka hmui chu kan han chuktuah ve ta a, a hmui no tak chuan ka hmui hil hiang mai intu ha lo lutuk tur chu a bu ang thlap zu tuam mawi thei tlat si a.

ka thiani'n hlei a chhuah zui zawk tlat erawh tih Mai loh chu!

Hmui ata hmui chuan kham khawp pe lovin a lei chuan ka hmui a rawn dap kual zui ta zel a, ka chhung lam a tuan leh lai tak chuan kei chu ka thlawn hlawl thung. Car chhunga awma Aizawl khawpui chuan vel kan nih avangin kan chuanna Car pawh chu a e'nge maw ti nghin ve lawih lawih thei hial a ni.

"Ngawi teh Mary, a chhung kum kar nen lam zawng," ka ti nguk hrawk a (Ka thian nu hi ka nu hming nen a in an avangin a hming ka sawi chuan ka nu emaw lo ti lo ula). Mary mitmeng chu ruah thimpui haw tur ang hrim hian a dur nghal khup khup a. A hmel te chu a chhe ta vek mai a!

"Mipa i ni em? mi ti tlawng a, "Pa lo ila'ng mi fawp bawk dawn em ni? Ka ti ve thung. Mary chuan hmai thuâr nang hian, "Ka hresual chhiava der che a ni. Ka rin i ang tlat lo," a ti leh a, a hawi tau dawn dawn a. Mi bawh deuh ur reng chu a insiam rem ta a.

Kei chu han insiam rem ve nghal thuai in, chutah Mary bawk chuan, "A pawn lawi lutuk em Mai! khatiang te lek lek. Ho tham siin a! a ti leh hmak hmak a, mi thlek pah nghauh nghauh thin a.

Mahse, Kei chuan, "Hmui chauh hi a tawk ngai e". Ka ti a, Mary chuan, "Dei! Nep sazu! a ti hlak a, kei chu han tim hlekin, "A mawi lo em a," ka han ti a, Mary chu a nui ta nghe nghe a. "A mawi lo em mai a? tiin mi melh ngar ngar a, kei chuan naupang chhia ka ti hle thung. A ni nen hi zawng choak nel tak hian kan innel reng a.

Motor horn ri pâwt pâwt chuan mi thawng harh phawng a, "Chhe sâwn hlawm che u chuan! ka lo chhing lek lek chu niin ka motor chu ka tiding ta a, ka thlen chin ka'n belhchian chuan Tuirial ka lo hnaih tawh hle a.

Hma lama car tawng zet, ding sawi khãwr reng chu mi engemaw zah hian an lo bawr ang laih laih a, ka bul chetah chuan two wheeler hian mi pakhat bungraw phur bawr luih mai hi a rawn ding chik ve nghawr mai bawk!

Kei chuan ka motor glass chu ka han down a, chu pa en chung chuan, "Eng thil nge thleng le? ka han ti a, chu pa chuan ka rilru hmanhmawh chu mi tawmpui ni ngei tur a ni, hma lama mite chu a han au ta leng leng mai a.

Hmaa mite pawh chuan hriatthiam te han dilin Bike leh car a inbah buai deuh thu an rawn thlen ta thuai a. Mahse, inhliam an awm lo, buaina lian tham thleng lo niin an sawi a.

Minute nga dawn min khawmuan tir leh hnu chuan hmaa mite pawh chu an inrem fel thei ta ni ngei tur a ni. Tiam chin pan chuan an tleh chhuak veleh ta hlawm a, kei pawh chuan fimkhur tak chuan tiam chin lam chu ka pan ding veleh ta a ni.

Chhun dar sawm leh dar hnih a pel duai tawh a, Ni chu vanzawlah a sen phut reng a. Seling khua ka lut ta a, ka tum thumna a ni ta.

A ngai ngaiin Presbyterian kohhran biak In ep Evelyn restaurant kawtah bawk chuan ka ding chik leh chhuai a, mite chuan mak tiin min en nghal thap a, kei chuan ngaimawh lo fahranin Motor atang chuan chhuakin ka han hawi khawmuang vel te te a.

Chhak lama restaurant awm chu a lun lat lat hle reng a, tlang mi ni awm tak tak an Kat nuk mai. Chutah, sana chu han bihin restaurant chhungah chuan ka pen lut ta khauh khauh a.

Thutna awl laiah chuan ka thu-in mobile phone chu ka han bih pah vel a, message ka dawng nual a, Aizawl lama ka chhungte chuan min rawn chhuahchhal diat diat a, keimah chauha ka vah chhuah tak avâng chuan min ngaihtuah leh angreng lawi si a ni.

Hetia han inngaimawh der vel hi tul ka tih chiam thil a ni lo na a tun nafam erawh lawmna e'nge maw ni tak hian mi tuam vel ve a ni.

Ka chhungte hnenah chuan min ngaihtuah avanga ka lawm thu ka han hrilh a, zo boruak thiang zawkin mi tham harh tak sawng sawng thu te, ka hlim em em dan chu thil pangngai ni lo hial zawka mawi nia ka hriat thu te ka'n hrilh thuphung ve a.

Chutia mahnia ka thu ta chu tu khaw kha mah chuan 'ngaihven ta'ng e' phei chu min rawn ti lem hlei lo. Mahse, keimah zawk chuan han inbengvarin khualchhawntu ni ngei tur nula te reuh tê, tawng zeih zeih reng chu ka'n hui a, hei te hi chu helaiah ka la hmu tam tlat lo, a nihna takah zawk chuan ka kal hnuhnung ber hnua an mi rawih thar leh a nih ngei chu ka ring zawk a ni.

Restaurant menu chu ka'n en dân dân a. Chaw chakna fahran lah chu ka nei thuai si lo nen. Mahse, he'ng angah chuan beisei han san viau chi ni paw'n a lang lem lova, Aizawl lam Restaurant nen zawng thingtlang leh khawpui hi a ni ringawt mai si a ni.

Mahse, menu-a eitur an neih inziak thla dan dan hnuai berah chuan in chi lam, cold drinks leh thingpui a awm thu a in tarlang lang tel hlauh Mai a. Chutah, a tui ril lam, in chi an kawl ang ang chu ka lam ta zawk a, khualchhawntu chuan uluk deuh hian mi'n thlek ang van van a, "Ka pu, coffee a awm asin," a ti ta reuh a, chu thu chuan thil pawi a thlen lo tawp ni tur a ni, ka then tak vur vur asin ni, "coffee ngei chu ka duh a nge," ka ti ta a.

Khualchhawntu chuan Coffee machine atang chuan coffee chu a'n la a, "ka pu, kha aw," tiin coffee chu mi rawn pe ta nghal a, ka han belchiang a, a rim te chu ka hnimin ka'n ngaithla vel a. Chutah, "Americano hi? Ka han ti awmze nei a, khualchhawntu chuan, "Ka pu, espresso bik chauh Kan kawl tlat mai," a lo ti a.

Coffee chu ka in ta tho va, a thlum dark chocolate kha fak, cinnamon rim fiah lo riai, berries leh almond hmui sepin a pawlh, thlum dang complex tak awm tel avangte chuan medium to medium dark roast hman niin, medium to medium course grind size hman niin a lang a. A thlum dark chocolate kha, thiang kak mai avang chuan pour over brewing method hman ni ngeiin ka ring a ni.

Mahse, ka ngaihdan chuan a phuahchawp thil tih deuh rohin ka hre tlat a, hetiang coffee flavor hi ka tem tam lo viau a ni.

Mary bawk hriatchhuah a ni leh ta pek a. Mary avanga coffee duha ngaina hi ka ni reng a.

Mary coffee mi rawn hlui tur chu kei chuan uluk lutuk hian ka thut hmun atang chuan ka thlek ngawih ngawih a, a bawp sei thlerh thlawrh kechheh chu a dik thlarh thlarh hle a, a tai fek rat mai, a mit de siar siar, a ha var de rual thah chu eng hnuaiah chuan a lang Chiang hle a.

He hmeichhia hi a ni tlukchhiat pui loh rual loh zúnin a zam a, at pui loh rual loh mawina-in a chawi vel chu ni.

Kan puar ak Lawmnakima pui roh chuan Mary chu sava thlawk lai thlir tak hian a lo thlek ve dawk dawk mai pek a. Hetiang thil tenawm hi a thleng khat khawp lehnghal!

Ka inperh tho nghal thuai a, Lawmnakima'n mit mu chhuak dawn dawna Mary a thlir chu 'a ropuiin a lungchhiatthlak em mai! tiin Mary coffee chawi lai chu ka va lan ta daih a ni.

Mahse le, Lawmnakima pui roh chuan 'a duh lo' ka ti dawn nge a mit chu a la sawn thei ta chuang reng reng lo mai a, "Chhe khâwn leh! tiin Lawmnakima chu, "kha! tiin coffee no khat chu ka hnawn tau deuh nghawng nghe nghe a ni.

Engkima lâwmna chang hria Lawmnakima chuan mi'n kiai khum vei suih suih kher leh ta nghal a, e'nge maw mi han tih elna deuh chu a awm chiang a ni.

Lawmnakima mit mua rawpna lo lang leh duhthawhna lo lang kher kha ka ngaina lo chiang em a, kher chhuah saka paih daih ka duh hial a sin.

Tui ti tak chuan coffee chu ka in karh karh a, Mary hian espresso hi a ngaina a, keiin Americano hi ka favourite a ni ve thung.

Mary chu a chiau ta hlut a, "Kima," tiin Lawmnakima chu awmze nei mitmei hian a'n chhaih vel chai pek a. "Iau! kei chuan tiin an han in mitmei ki atang reng chuan kei pui roh hi ka rilru kalhmang an thlir thiam vek niin ka ring a ni.

Ka rilru han pehel te rêng lah chu min la rawn khap khum tak ang hruk hruk a (hei hi schizophrenia natna, delusions hnathawh tel vang). "Vei tak hian! tiin ka thu ta hmak a, ka hmui branded lo zet, hil hîang mai chu ka kheuh ta mawlh mawlh ringawt a.

Mary chuan lu lêi bar hian mi han thlek a, chutah ka nak nemah tak mai chuan a zungchal chuan a rawn kawm vak mai ta lehnghal a! Kei chu ka phu chiam nghe nghe. Chutih pah chuan, "Vel Che hian aw!" a han ti awmze nei deuh nge ni, Lawmnakima lam chu a'n mitsir leh pek thin a. Ka hmu ru khiau tih a hre lo chu a vanneihna a ni.

Kei chuan, "Thian za kan ni tho a, zep tumhrang lovin? tiin Mary zei hawih zia leh tawnhriat mual mual a neih fu ka rin thu chu ka'n chhim thal bekang puah pui ta phawng thung a.

Mary hian aipui leh aite hi a nei deuh reuh lehnghal a, a mawlmang zia chu e, a duh duha mi chin phar kual vel hi a koa tla emaw hi a ti pheng a, a thu a kawi a ngil zawm zat zat mah ni ila thu zuk leh mai mai hi a dan ngai a ni fo mai. Rilru Chiang kuang mi put tir loh hi a ching tlat thin a ni.

Ka thian Lawmnakima chu ka'n kiai khum ve salh salh ta ngawt a, mahse ka kiai zawnga ka hmaia Mary ka ta a nih zia ka'n lantir kha hrethiam zui tak maw?

Aite fun sual ang mai Mary chu a phi leh ta chung mai a, tunlai chaw kaw puar a ei mumal loh thu leh luakchhhuak-in a tham buai reng thu te, chutih ruala a kam a vir em em reng thu te chu a'n phul pui leh hlut ta thin a.

Kei chuan, "Aww, i chak zawng thil chu eiin in mai thin ta la". ka lo tihsan mai mai a, a rilru puthmang ther tê pawh ka hriat loh vang a ni. Mary chuan ngei hmel zeta mi'n melh khai khaiin, "A va'n chawbe loh thlak em! a ti zui ta mai reng a. A tawngkam hman chuan nuih te lam lam chu a tiza zawk hial a!

Lawmnakima ta phéng chuan Mary chu han nuih vên vên chung hian, "Nang hi nau i pai a niang chu!" a ti ta roh a, mi lawmpui hmel tak hian mi la then khum tak ang súng a.

Kei chu ka tim det lawi a, mahse ka tilang lem hlei lo. "Âtthlak lutuk! ka ti sap sap thung a. Ni e, Mary nen hian mipat hmeichhiat chu sawi loh tumkhat kan in kiss kha a ni ve chauh a. Mahse, khami tum a dik a dawk thlu lo thawthanga a khawsa erawh kha zawng mak ka ti deuh hlek a ni.

Ka suangtuahna kal ngat ngat reng ata chu hmeichhe aw teng hnéng zet mai ri chuan mi thawng harh chiang hle a, sana ka han bih a, dar 1:15 a lo hnai tawh a, ka mobile phone chu lo ri zuiin Mike-a a lo ni a. Ka coffee no chu dawnkanah chuan ka dah a. Chutah, Mike-a hnenah chuan seling atanga ka chhuah mek thu ka hrilh nghal a.

Ka coffee in chuan lung dum thlu zan lo mahse, Americano avanga hmun dang han pan leh kher erawh ka tum a ni chuang lo.

Mahsela, coffee, mary mi siam sak flavor chuan ka lung mi len ru hle thung a, chutia coffee taste hran ka tem taka ruaiah chuan e'nge maw ti tak hian ruak ta riaua inhriatna hi ka nei nghe nghe a ni.

Muang reng thei ni ta hek lo i. Khualchhawntu lo la hram zat zat reng hnenah chuan ka in man chu ka han pe a, chu khualchhawntu nula tê reuh pawh chuan la dak zeih zeih reng chung leh mi um e lo fahran chuan pawisa chu ka kut ata a'n phih deuh sawk ta mai a.

'A chuti teh chiam a! tiin lungni lo dawn dawn chungin kan nu te reuh tê-i chu ka en ta reng mai a ni. A ruk tak chuan ka ngei kher mai.

Kal kawngah chuan kan nu tê-i chu ka ngaihtuah zui mai mai a, keia mizia nen zawng mi ngo leh mi dum an sawi hi a ni ringawt mai. Ka zinkawng hman mekah hian Mary min ti hrechhuak tu thil ka tawng ta zut mai a nih hi maw!

Ka kawppui emaw ka thian han ni ngat se zawng kei hi kan nu te reuh tê-i avang ngei chuan ka zak ka zak dawn tih ka hrereng. Chutah, ka nui chhuak ta hawk hawk a.

SCHIZOPHRENIA

Chapter- 2

Keifang dawr kawna a chi puite sports thil zawrhna dawrah ka thianpa Mike zochhuana chuan min lo hmuak a. Saitual khua hi Keifang atang hian hmar lamah a kalkawng a lut phei leh a, Keifang nena inri kham mai erawh an ni a.

"Mike, ilo ning viau tawh em? Ka han ti khawmawi hmasa a, Mike-a chuan, "Ning lah love, hmuam da awrh chauh a la ni ang chu," chu a han ti ve ngial na a, a hmel-ah chuan niu niau (ning ru) hmel a lang deuh tlat a ni. Tin, Aizawl lama ka thian Lawmnakima nen chuan thuhmun lo tak hi an ni bawk a.

Mike-a chu pa te lam, lu zo zar Mai, mi tawng duh tak, mahse tawng duh ka ti ngawt tak na'ng a a thian chu nilo ila 'paurau'(zakthei lo) ka ti zawk ngei ang. Bawp kak ti te, mobile game khelh ngaina deuh, nui hmel pu deuh reng, vantlang titi leh mi thuruk hre thei deuh hi a ni a.

Heng a mi harhvangna then a zar hi chu ka chhawr viau turte ni paw'n ka hria.

"Seling-ah Coffee ka rawn in asin, ti rawh i tleh vat zawk teh ang, hei dar 2 a hnai mai dawn," ka ti a.

Mike-a chuan chawhmeh Bazar awmna lam chu han hawi ha ha in, "Ngawi tawh, chawhmeh ka en lawk dawn, Keifang chawhmehte hi a tui hnai bik a, tikhan motor-ah khan min lo nghak mai rawh, ka rei dawn lo" tiin chawhmeh zawrh en tur chuan mi kalsan daih mai a.

Chutia a kawng kal chu a dak pah zawih zawih reng a. "Keifang Bazar nu ho chawhmeh hi e'nge a an ve reng? Kan veng nu ho zawrh nge lâktlâk ang? A ti vei ham ham a.

Ka thianpa pawh chu Bazar nuhoin an lo chu kha dan atang chuan an hmelhriat hle tawh tih ka hrethiam a.

Chawhnu dar 2 leh minute 15 vel bawrah Saitual khaw chhung chu kan lut ta a. Ka thiana te awmna veng hi veng hulum lai a ni a, Aizawl ang em chuan thawm riva leh lirthei insul pel thahnem lo mahse ama tawka thawm nei ve reng hi a ni a.

Ka bungrua han dah hnawk vel pah chuan, "Thawm leh riva bengchheng hi ka ti meuh lo a tin ni". ka han ti a. Mike-a pa Pu Thiamsanga chuan, "Ee! Hetah, kan hnenah i duh chen chen i khawsa ang. Nunphung han thlak te, awm hmun han sawn te hi a tha ngai a nia. Lungngai reng reng suh. Pathian zarah i dam chho ve leh mai dawn alawm," min ti a.

Mike-a nen chuan a roomah kan thu dun ran a, chutia ka thian tha Mike zochhuana kianga hun ka'n hmang ta chu ka lawm hle a, nuam pawh ka ti a, ka chhungril inhnawh teuh pawh chu a kiam hawk ta nghe nghe a ni.

Mike-a room chhung hi a zauin a dar nuam angreng hle a, tukverh-ah chuan ka va dak vang vang a, chutah a khum lian pui maiah chuan ka'n tlu zal leh a, a matress hman hi queen size matress an tih ang hi niin bedsheet rawng chu vutbuak a ni a.

Khum bula dawhkan sakhat nulh mai inhung chunga lehkhabu intiang chu en in ka'n chhiar vel a, chutah, a bula Zoreza LED table lamp inhung chu ka'n hmet engin ka han hmet thim leh thin bawk a.

Mike-a chuan ka khawsa zia chu mi lo thlir reng a, kei chuan banga chhungkaw thlalak intar chu han thlek dan danin certificate intarte chu ka han thlek zel a, trophy tlem a zawng intlar dal chu han la thla-in ka'n dah tha leh thin bawk a.

Tukverh bula gaming station ti ve mai ila lam chu ka pan leh khut a, gaming chair la thar deuh mai-ah chuan thu velin, "Hei, thil thar hmuh tur a awm nual mai," ka han ti a.

Mike-a chuan, "Game khelh ka ngainat zia chu i hria alawm," a lo ti sam mai a.

Dawnkan chungah chuan computer, monitor leh headphone pahnih, watch pakhat nen a awm a. Tin, sound system eng ilo leh wireless speaker nen.

Tin, bang chu gaming theme hrang hrangin a tial buai a, cap mawi tak tak, design dang dang leh quotes mawi leh rilru khawih tak tak a intar nual bawk.

Quote pakhat kutziak chawp tih hriat tak intar awm ve chu uluk zawk hian ka'n bih a, "Ka fapa, hmangaihna hi tawpna hlimawm a ni vek kher lo asin," tih thu hi a ni a. Heng hi ka tlawh hnuhnun ber tum khan ka hmu lo.

Mike-a chuan closet chu han hawngin a kawr hak chu a'n thlak a, "Inbual rawh aw? Mi han ti a.

Kei chuan, "ka hmanhmawh viau lem lo asin? ka lo ti mai a.

Mike-a nu pi Mapuii chu room-ah chuan lo lutin thingpui tui hnai tak min rawn hlui a, chutih pah chuan 'ka nu leh pa an dam em? tih te, min zawt thuphung ve a, a bak erawh min zawt zel lem lo.

Ka thianpa titi mawlh mawlh reng lai chuan ka lu chu a rawn thip leh vawt vawt mai a, hun kal tawh August ni 19 zirtawp ni-ah khan hruai kirin ka awm leh ta a.

Lawmnakima nen chauh ka rooma kan awm dun tum a ni. Kima chuan phur deuh mai hian, "Ma muan, hei han en teh", tiin a phone gallery a bike thlalak chu mi han hmuh a.

Kei chuan lirthei chungchang hi ka hriat tam lem loh avangin ka lo thlek mawl deuh vel mai mai a.

Lawmnakima chuan, "R15 M metallic grey, nalh i ti em? On road price Rs 2,22,478, kar hmasa khan ka book fel diam tawh a, ka lachhuak hnai Mai tawh e," a han ti leh a.

Kei chuan, "Teh thut chuan! He i bike dum tawng lam tawh hi i mawi pui ber asin," ka ti a, ka nui var var reng a. Kima chu uluk zet hian a han kun hniam deuh a, "Ka neih theih chhan mi zawt dawn lo em ni? Intithei ru fu hian a han ti leh a.

"Chu, i sawi takah chuan ka zawt ngam lo che a, khawia pawisa a lak nge i tum a? ka han ti a, Kima chuan thu tak zawk hian, "Zan hmasa lam khan ka nu leh pate tawng kam ka hre thawi deuh vua vua a, ka pa chuan maw cheng nuai 20 dawn a rawn paipawn haw a ni awm e". tiin a han si zui hlawrh hlawrh a.

Kei chuan, "Imm, 'pawisa kan nei lo, ka nu leh pate'n an rem ti lo chuti khati' ti khan i rual awt i rual awt a, chu nuai 20 lai te chuan lei zo vai vai dawn tak a nih chu," ka han ti a.

"Ma muan, ngaithla teh, ka tan thil hriat nuam tak a ni. Chutia ni hnih khat thil thu maia nuai 20 dawn ka pain a han paipawn thei mai bik chu mi hausa leh mi retheite kan danglamna chiah a ni reng a".

Kei chuan, "Aww, sawrkar hna thawk an ni a, mi retheite nena tehkhin chi pawh nilo hian," ka lo ti a. Kima chuan en ngai ena han then deuh sawng sawng reng chung chuan,

"Thenkhat paw'n an eiru ve duk duk fo tho a, e'nge maw keini kan nih a mai avanga," tiin meizial chu a han la kai khu leh vut vut bawk a. "Mahse maw, kei chu ka pa hian a ei theih ang ang hi chu han ei ru mawp mawp zel se nia ka tih ni. A pawi ka ti chai hleinem". tiin Kima chu a nui zui sawng reng zel a.

Kei chu ka ngawi reng a, "A eiru em bik dawn em ni? Ka han ti khawmawi satliah ve a. "Teuh lo! Ei ru tehreng mai! Nang i nia ka hrilh mai mai che. An mahni department sum tlem tlem a zawng hi chu an khawih chingpen fo ta ve ang chu" a han ti leh a, a then zui leh tha a.

"Thenkhat tana pawi deuh ta erawh kan dinhmuna an ding ve ngai lo tur hi a ni haha! Sawi chhan chu a nei chiang a ni.

"Bakah, sawrkar tan theihtawp an chhuah ve a, bonus te hi chu an phu ve thlawt alawm. Chuan nang ve hi, i pa MLA lai a ni vung Mai si a, nang ni tan chuan 'eiru' tih te chu a nep thei viau ta ve ang chu," a han ti zui leh duk duk a.

Kei chuan, "A teuh hnaisai lo! Ka pa hi zawng ram leh mipui tan chauha hna thawk ngang hi a nia, a chhungte hian kan chang ve hman meuh lo. Eiruk te chu sawi loh, kan nghei lo chauh zawk a nih hi," ka han ti ve nang nang thung a.

Kima chuan awih loh hmel zet hian, "Hah! Awih awm loh! a ti hluk a, kei chuan, "Mak deuh a nia sin, pa ber heti a ni chunga thlam changkang tih angreng, In takngial pawh kan sa thei reng reng lo chu a nih hi," ka han ti leh a, Lawmnakima chu ka melh ralh ralh pah a ni.

Lawmnakima chuan a phone chu a'n lekchhuak leh vut a, Mary thlalak chu han hmet chhuak zuiin, "Bro, Mary i nei hi i vanneih ngawt mai". Mi han ti daih a, Lawmnakima hmel ka han en chu ka va'n awih lo kher em!

"Eng maw? Mary i tia mi? ka lo ti a. Kima chuan, "Nei daih la," mi han ti leh tlawng a. Kei chuan, "Ai a! I ti duh, nupui fanau chawm zo hmel pawh ka pu meuh rih em ni?," ka han ti a.

Kima chuan, "Hmm, nupui fanau te chu kan nu leh pate thawhchhuah ringin kan chawm mai a niang chu, mi rethei fa kan ni ve chhe kháw lo. Officer fa kan nia, MLA fapa kan nia, kan chunga leng tumah an awm bik lo". A han ti leh tun tun a. A rui lung puam deuh ni chuan ka ngai a.

Ka ngaihruatna ram ata ka harh ta a, Mike-a titi mawlh mawlh reng chu pakhat tê mah ka lo hre mumal reng reng lo chu niin.

Chutah, Mike-a chuan, "Ma muan, tunlai ngat phei chu politics thli a zawnga a chhe ber chi a ni ngat ang, party mi leh sa inngeih a ram pawh hi kan awm lo. Ti hian a hming chuan kan han inhawr khawm veleh ang lat lat thin na a, a tak takah chuan chem kan chawi za thei meuh lo. A ruk a ral hian Party chhunga khi hi chu a awm a ni.

Kei chuan, "Chu, ngaihthah chi a nih loh chu," ka han ti a. Mike-a chuan, "Sum hian min ti â zo a nih hlawm hi. Mahni hlawkna chu sawi loh, a harsa zawk leh a chhuan chham zawk te reng kan hre chang hek lo.

"A tharum nen lam chem sen kan lek lo chauh zel zawng a ni. Mualpho palh vak mai pawh thil hlauhawm tak a ni". tiin hma lawkah VC/LC inthlan lo awm tur avanga Party inep boruak sa hat reng mai te, sawrkar lai Party chhungah lah intih vui vai hla leh a a ruk a rala innghirngho chungchang te, an khua chauh nilo Tawi bial chhung thingtlang hmun thenkhat, politics thli chhiain a chhem nasat zia chungchang te chu mi hrilh mawlh mawlh reng a.

Ka pa hian March thla lo awm tur khian VC/LC inthlan lo awm tur denchhenin a bial fan a nei dawn a, Saitual atanga hmar lama awm Maite khua a tlawh ang a, Maite atang chuan Tawizo-ah hun a hmang leh ang, chutah Mualphengah.

A bial chhungah hian opposition VC thlan tlin an awm nual a nih chuan a ma mualphona ni dawnin a hre tlat a, a hun a lo thlen chuan chepa nung khai ang vat vata a chet chhuah leh a tul dawn a ni.

Ni e, ka chhang kham thin. Politics thli chhia hi ka ning thin a ni.

Tlai a lo nih chuan zanriah te chu kan han kil ta a, helaiah hi chuan zanriah hi an kil hma khawp a, dar 4 chhoah zanriah Kan kil tan der tawh a ni. Hei hi a chhan chu tihphunga an neih ngheh an chhawm zel vang a ni e.

Pu Thiamsanga-te nupa chuan min dimdawih em em reng a, ei tur tha ber ber min hlui a, taksa leh rilru muanga ka awm nan an phusa nupa ve hle a.

Ka inthlahrung leh hlauh zawk a, an fapa Mike zochhuana nen hian lehkha zirna atanga inhmelhriat kan ni a, kan in an deuhna lai chu kan vun dum uk khak mai leh rulhut kawm pai ang hrima ka cher kawm dun ang khan laite hi a ni awm e.

Zanriah kil lai chuan pi Mapuii leh pu Thiamsanga-te nupa chuan chhim veng tlangval rualkhatte leh an veng tlangvalte buaina thu hla chungchang an sawi dun nual a, an fapa pawh chu chinchang te an han zawt ve bawk a.

Mike-a chuan, "hah! Kha, pa ho nen lam kan inpawng nek chiam lo chauh zawng a nih kha, khatiang reng renga zak thei lo leh nungchang mawi hre lo. An zahpui awm hlawm a nia, a bikin pu Taia fate saw hetiang buaina a chhuah deuha han pawngpawrh an ni ziah," a han ti tan tan a.

Kei chuan eng chungchang nge an sawi ka hre hauh lo. Ngawi reng chuan ka lo ngaithla ve reng a.

Pu Thiamsanga pawh chuan dam deuh hian, "An ni unau saw sawi an hlawh tlat zel, a tu a te mai paw'n 'pu Taia fate' an tih nih tak reng mai chu!" a lo ti ve bauh bauh bawk a.

Pi Mapuii pawh chuan an fapa chu thu tha tha han hrilhin, "Hetiang thilah hi chuan ngawih mai mai tur, rik ve hluai duh loh tur, a ngawi zawkah hian tang hram hram ila a tha ngai," tiin fimkhur tur chuan a chah malh malh reng bawk a.

"Khai! Muana Chaw ei pawh kan ti tui lovang e, kha sa te kha ei bawrh bawrh ta che u, ka kham san ang che u," a ti ta a, a thut hmun atang chuan a tho ta a.

Chaw eikham-ah chuan Verandah-ah zial zuin kan thu dun ran a. "Eng buaina nge chhuak a? ka han ti a. Zanriah kil laia an sawi kha a ni tih a hrethiam mai a.

"Politics bawk maw le. MLA inthlan lai ata inmung kha a ni a, chhim veng bil, a veng pum deuh thaw tih theih sawn opposition Party mi leh sa an ni nawk mai.

"A kohhran ang zawng paw'n chuti tho," tiin meizial chu a dang a'n lakai leh a. Chutah, chhunzawmin,

"MLA inthlan khan hemi bialah an candidate kha tling zo ta hek lo. Chal ki sâ a lakah an tlak a, an veng mi thahnem tham tak, awn lam bik neilo leh Party dang chak vak lo mi leh sa kha an Party-ah an seng lut chiam a, pu Taia saw an candidate pu Lianhluna belhbul ber kha a ni vei ve a, an lo hausa-in sum a lo nei si a, sum pawh kha tam fe chu 'a inseng e' an tih kha.

"Kohhran thlengin a nghawng ta zel a nih saw, LIKK an tih ang kohhran hi an nia. Member an pung hluai a, ti sawn a veng pum deuh thaw sawn an intibing ta deuh hial alawm maw le! Heng chinghne beram vun sin ho hi ka mi ngainat zawng an ni neng love.

"Line up hian an kal ang dên dên hlawm a, An thup hreh ngai der silo nen, buaithlak tak hi an ni ringawt," tiin ka thian chu a han nui hak hak a.

"An veng tlangvalte han suaksual zia mai chu helaia sawia fiah ngawt chi ni paw'n a lang lo. an veng nula te saw kan ngaizawng ngam hleinem.

Kei chuan, "A ni maw! Hetiang pawl ram kalsual pui laklawh tawh leh politics ruihchilh chhe vek vek tawh hi chu buaithlak deuh hi an nia," ka han ti ve a.

"Haha! Nia, Saitual khuaa veng hriat hlawh leh langsar tak an ni chho ta a nih saw! Tin, buaina hi an ngaina riau zel a, a bikin pu Taia lam hnaih saw a invai vung an ni ziah a ni. Chhim vengah phei saw chuan deh loh sakei huai ang mai maw le an nih le!

Kei chuan, "Chu, Chhim veng bil leh pu Taia in tih fo chu a bikin an hnawk thei hle dawn a nih tak chu! ka han ti leh a.

"Buan chak lo deuh turte hi an han hre thei em em khawp a! An chet dan tenawm tak hi kan hai der si lo, zahpuiawm tak an ni". Tiin Mike-a chuan kuhva chu a han buatsaih leh mawlh mawlh a. Ka thiana thu min hrilh te reng chuan hah a chhâwk lo kher mai a. Hahdam beiseia hetia a ni han belbul hi ka ni si a.

Zan a han ni a, ka thiana chuan lenchhuahna tur kan neih thu mi han hrilh deuh thut a, a hmaa engmah sawi lawk a awm loh avang chuan kei chu ka hamhaih dawn dawn a, 'a khawi lam lamah chuan va vak chhuak dawn i maw' tiin ka tha a tho tehchiam lo a ni.

Mahse, ka ngawi mai mai a, ka chimlim peih chiam lo. Ka thiana tih ang ang chuan ka awm vel mai mai rih a niang chu.

A lirthei pawl uk khak, uluk tih hriat taka hnum tle zar maiah chuan kan inphur ta a.

Chutia kan tleh chhuak ta chu zan boruak thiang veng mai te, Aizawl khawpui chhung ang lo taka thawm bengchheng hriat tur awm lo te, thli-in mi han chhem leh hlep hlep thin takah chuan hun kal tawhah bawk hruai kirin ka awm leh ta a ni.

Mary nen vah thawlen tum kan ni a, ka rautaurant chuam Magnolia restaurant-a Mary chhuah vahpui tum chu ka ni a, mahse a ni chuan ka la hmelhriat ngai loh hmun mi hmel hriat tir a tum ve mauh thung.

Mi lian fa ka ni chu ka inti hauh lo. Mahse, vantlang chung chin tah thil hian a ni si a ni ka nihna pholang ni. Mahse le, 'kan inzui tan ata a thu zawk ni zat zat thin ta chu a changtunu sawi restaurant lamah zawk tuan Kan rel poh a niang chu' ka ti ta mai. Thu zawk miau hek le.

Zarkawt kawtthler pheiah chuan mahni chauhin Mary nghak chuan ka ding reng a, Mary chu ka han call a.

Lehlam atang chuan, "Uii! Min lo la nghak char char a mi? a rawn ti a, a aw ti deuh hlawk hlawk atang chuan a buai lai ka va thawng fuh ni ngei tur a ni.

"Aw, i lo lan hma zawng kum sang pawh liam se ka nghak reng mai che a ni'ang chu," ka han ti dam thluam vei a.

Lehlam atang chuan, "Uii! I chhe khâk vel thei ee! Min lo nghak duh lo mai rawh, keimah-in ka lokal mai ang," a rawn ti ta then mai a.

"Hmm! A hmun hma lah chu ka hriatchian lah ni neng lo chuan! Ka han ti a. A ni chuan, "Hmm! Ka hrilh chiang thawk khat viau che khan ka hre sia, nang thil hrilh che hi zawng chil per a uiawm thlawn lek thin chu a ni" a han ti ta zek mai a.

Chutah, kei chuan vui hmui pu hian, "Beisei ang min thlen em ang chu maw? Ka ti ta nuah nuah a. Chutah, Mary chuan, "Ka chiang, i restaurant sawi neu lo tak takte ai khan neu deuh mahse, a hmun hma i han thleng ang a, hmun dang i ngai bik dawn lo.

"Lo va thu thlamuang mai mai la, kan eia kan in tur te kha lo va ngaihtuah vel mai mai rawh. Ka ngainat zawng leh ka duh zawng pawh i hriat kha," thu pe aw zet chuan mi ti pherh leh ta erh mai a.

Kei chu han nui lui hram hramin, "Hah! Ka nghak tho tho dawn che, ka nghah chhuah hma zawng che, bakah mahni chauhin ka peih hleinem a! " ka ti leh nuah nuah a. Mary chu za lo fahran hian a nui hul ta hak a, "chhe vei che hian! Kal nghal nal nal rawh. Thla hi a de leh pek tawh em ni? Ti khan i ti tlat zel mai. Chu loah, mahni chauh ka rawn ni lo maithei," a ti leh a.

Kei chuan, "Hmm, rin dan ka nei nghal mai," ka han ti a, ka Ngawi zui rauh rauh bawk a. Mary chuan, "Ai ai! i hre dawn lo tak hi a ni ringawt! Ka surprise dawn che! tiin awmze nei miah lo chuan a han nui lui chiam chiam leh rih a, kei chuan kawng chhaka Home decoration light de zeuh zeuh reng chu ka en vang vang a. Kumthar hlimchhawn a la ni a, a neitu ten seng hawi an la rilruk lo ni ngei tur a ni.

"Surprise maw? ka ngainat zawng tak a ni! Zawi te hian ka han ti a. Mary chuan, "Tawk! Uang hman paw'n ka khawsa rih lo, ka insiam mek i hriat vek kha," a ti leh a, kei chuan nguk hraih chung chuan, "Ok, i tih ang chuan le, ka kal nghal. Boss berin i tih te chuan a kawi a ngila zawm mai hi ka hna a ni e". tiin phone chu ka dah a, ka bike chu ka ti nung nghal vut vut a, Mary sawi Thul palate restaurant lam pan chuan ka lim chhuak ta nghal a.

Ka ngaihtuahna ram ata chu pa rak bengchheng reng ri chuan mi kai harh ta nge nge a, Mike chuan, "Lawk aw," tiin bike chu chu lai thim tham laiah chuan a han tiding a.

Kawng chhak lamah chuan In lian deuh mai hi a ding vung mai a, kawt kaiah chuan mi engemaw zah hi an lo inbengberek lat lat reng a, a landan chuan hnatlang tur niin an lang.

Chhim lam, an piah mai In hring lian ve tawk tak atang bawk chuan zu rui ni ngei tur mi panga paruk lai an ni. chung mi te chuan hnatlang turte chu au el vel chiam chiam reng a.

"Hah! In tling dawn chuang lo! Saitual hi chu kan lalna ram a ni". tiin an nuih sawh vel a, hnatlang te pawh chuan, "Haha! Ruling zah nachâng hria ula mi fing in ni mai. Tin, Saitual-ah hian chhim veng leh LIKK pawl kalsual ho hi in hnawksak". an lo ti ve piap piap mai bawk a, mak ka lo ti hle.

Chuti khawpa inngam ka ti dawn nge Party hran ve ve ni awm tak, kohhran a zawng nen lam, zu rui chung nen, chutia an han in thethaw chiam chiam ta mai chu hrisel lo hlein ka lo hria a, buaina te riau riau a chhuah palh Mai chu ka lo hlauthawng khawp mai a.

Chutah, chhim lam In ding atang chuan thinur inhmuam teuh aw hian, "A a a! A chutiang tea mi'n tih vei! Saitual-ah hian tunge i pa? A va ti ta awr awr a, chung mite chu an chapo hmelin an inlak vei hmel hi ka lo ti khawp a.

Mike-a chuan, "E, pu Taia fate bawk an ni maw? In han buai deuh ta emaw ka'n ti dawn dawn a, an rui leh deuh tawh a ni maw? tiin an zinga pakhat chu a han bekbawr a, chu pa pawh chuan, "Hmm, a intileihnawng zawk kan ni fo Mai a, dawh chin erawh a âwm mai dawn, . Mahse, keini'n kan khinlet mai zawngin buai chauh a chawk dawn si a," tiin a khap sen am am mai a.

Chutah, chu pa hnenah chuan Mike-a chuan, "Hei, min bialtu MLA pu Hmingtea fapa a mi lai Ma muana," tiin kei chu mi han hmelhriat tir ta a. "E khai! Ka hmu che chu ka va'n lawm em! Chu pa chuan a ti hlut a.

Chutah, Mike chuan, "Tumah hrilh darh chuang suh. Nang a rukin ka han hrilh mai mai che, amah hi a nuamsam lovin a chimlim peih meuh lova, helamah chawlh a rawn la ve anih hi. Khaw maw i kuhva chu lo thai Mai teh ang". tiin kuhva chu an han intheh pah mawlh mawlh a.

Kei pawh chuan chu pa chu ka han chibai ve bawk a, chutah Mike-a nen chuan lirtheiah chuan kan han chuangkai leh ta a.

Chu lai kan din mekna hmun chu kawng kual deuh mai hi a ni a, 'chhim vengah kan lo lawm a che' tih hi kawng kiangah chuan a lo intar kuau mai a.

Chu thu intar ka han hmuh chuan mak deuh hian chhungrilah ka tim nghal er er mai a! "Chhe hiau leh! Mike Zochhuana hian he laiah e'nge mi tih pui a tum le? ka ti rilru nghal mawlh mawlh a.

A hûk hmun an sawi ang mai, zanriah kil ata tawh he chhim veng danglam zia leh an tlangvalte suak sual zia te, an nula te pawh ngaizawn that ngam an nih loh thute min hrilh hrep a nih kha.

"Mike, Mike," ka han ti a, helmet vuah mawlh mawlh pah chuan, "E'nge ni ta? A ti a. "Hei, chhim veng chu tihna em ni? E'nge he laiah daih kan tih dawn reng reng a? ka han ti a.

Chutah, ka lam chu muangchanga rawn lehhawiin, "Ka thian, heng politics thli chhia tleh reng mai kara lo tum tawi ve reng hi zawng hriselna-in a mamawh ber a ni lo em mai a, chuvang chuan chhim veng chauh ni lo, Saitual khaw puma hmeltha ber lawrlak tih ngam Hmingtei rim turin kan kal dawn a ni. I inring em? tih leh tlan chhuah kan rual leh ta nghal a.

SCHIZOPHRENIA

Chapter -3

Thul palate restaurant-ah chuan mahniin ka thu ngawi reng a. Banga intar coffee siam dan hrang hrang intlar that chuan ka mit a la nghal a. Kei hi chuan Americano hi ka hmangaih a ni.

Ka tumkhatna a nih avang chuan nuam ka tiha ka tih loh pawh chu ka thlúk chiam rih lo. Mahse, ka beisei loh deuhin restaurant chu a lun hle thung a.

Tin, Mary hian an eitur kawlte avanga he lai hmun hi ngaina a ni ber hran lova, heng a hmun hma ual au tha leh thengthaw nuam tak a nihnate zawk hi niin mi hrilh kha a ni a.

He laia an sanpiau hi hmun dang aiin a tui bik tih min hrilh a, an tart hi hues tiin a sawi mai a. Tin, an virgin mojito hi a duh em em mai bawk a ni. Mary mi hrilh zel dan chuan an crispy corn hi an restaurant lar chhan ber niin an best seller a ni tih min hrilh bawk a ni.

'Ha hawlh zawng hi zawng le' ka ti rilru mai mai a.

Waitress chu a lokal hnai a, "Sir, eng lam nge ni ang? tiin mi nuih sang a, "I nghak lawk ang hmiang, thian ka nei dawn a, an rawn thleng har lovang," ka ti a. Chu waitress chuan polite deuh hian, "Awle sir," tiin hmun dang mi pan san leh ta a.

Minute sawm dawn ka nghah hnu chuan Mary chu restaurant chhungah chuan a rawn pen lut ta a, a bawp sei thlarh kechheh chu a rawn nalh leh pek hle a, a inthuamna formal tak chu a inhmeh-in chu lai restaurant-ah chuan tu khum rual a nilo.

A hnung-ah chuan Lawmnakima chu a rawn khi lut ve vun vun mai bawk a, kei chu mi hmuh veleh mi rawn awmze nei mitmei nghal zawk zawk vel a.

Kei chu ka thaw hak a, ka thiante chu ka lo hâwi thuai a. Mary chu ka bulah han innghatin kima chuan kan ep zawng chuan thut hmun a rem ve bawk a.

Ka lu chu a na riai riai reng a, ka harhchhuak hlawl mai. Mike-a chuan hma lawka In ding lian pui mai chu han kawkin, "Saw saw Hmingtei te In chu a nia," a han ti a.

In verandah-ah chuan nu pakhat, verandah chhuat lo nawt mektu hi Chiang takin ka va hmu a. Nu tawi lam, dar bawr leih luih, dul lian lek lek hi a ni a, a chevel chu a ti deuh hlawk hlawk thung a.

"Imm, lut ila, chuti taka Saitual khaw chhuanvawr nula chu a hmeltha reng em kan hria ang chu," tiin chu In pan chuan kal mai chu ka han tum a. Mike-a chuan ka kawrah rawn pawt chawtin, "Ni nang, kha tah chuan kan kal dawn lo" a ti a. Chu in ding chu la thlek vang vang rengin a hmel chu a mi tak thar hle nghe nghe.

"Eng maw? E'nge i sawi? Khawiah chuan nge kan kal ang a? Ka ti a. Mike-a chuan a lu han thing na nain, "Ni love, hetah chuan ni lo, veng mawng lamah zawk" a ti ta tlat mai a.

Kei chuan, "Hah! I zam leh si a ni maw? i ngaihzawn vang lek zu nia! Ka han ti a. Ka thusawi avang chuan Mike-a chu a mi tak deuh hlur reng a, uluk lutuk chuan ka lam a rawn hawi a, "Muan, thil âtthlak tak a ni! a ti ringawt a.

Kei chuan, "Ti vat mai teh! Kha tia 'ka zam, ka lai' tih vel kha a chhiat keh thlak Mai Mai em mai," ka ti a. Mike-a chu han inher-in, "Ma muan, kal phawt mai ang. Han hmelhriat tir hmasak che ka tum zet nang a a tul a nih ngai chuan a hun a la thleng zawk ngei ang" tiin lirtheiah chuan a lawn kai leh ta daih mai a.

"Mike, i va han dawih reuh tak! Tu chu nge kan rim chuan ang a? Ka ti ha ha a, "Lo lawn vat mai teh" tiin bike chu a tinung nghal dut dut a.

Ka hmuh dan chuan chhim veng an tih chu a felfai hen mai a, a hmun hmate chu a rem tha hle a, a veng tawn tirh atanga concrete building intlar phei del mai atang te, veng chhunga kalkawng zau leh nuam tak tak awm atang te chuan Saitual khuaa veng zahpuiawm lo ber pawl a nih ka ring a ni.

Kan tlan zel a, veng mawng kemrek deuh, a hmun hma chu awih tlan lek lek a ni ve thung a, thlang maia thlanmual, a then then thingkungin a zarhliah lai chu kan awmna atang chuan a zu hmuh theih a. Kan dinna bul maia Street light eng khung mai kianga In lian vak lo Assam type awm chu kan thlek dun rauh rauh a.

"Hah! Nang hi i lan ang i ni lo reng reng, nula hmeltha lakah zawng i lo hetih vang lek zu nia! tiin lung dam lo deuh chuan chu lai hmun chu ka thlek kual ka thlek kual a. He laia min hruai avang hian han lawm viau chhan tur ka la hmu ve tlat lo a tin ni.

Chu lai hmun chu a reh ang thiap lehnghal a, hmun reh ngaina tan leh kei ang dam sam meuh lo tan erawh thil tha tak a ni lawi maithei.

In ding te chu a chepa ha khat ang that hlawm a, street light eng pui pui chu hnaih tê tê hian a ding thluah a. "A intodelh thu-ah zawng hei a chikim ve viau dawn hi," ka han ti a.

Mike-a chuan Assam type, Ka'n hmaa mi lam chu a han pan ta dãn dãn a, chumi lai tak chuan chhak lama step lo kal thla atang chuan, "Kha vala te u, tute nge in nih a? E'nge he laiah in tih? A rawn ti deuh thut a. Chu aw chu a chiang duh angreng bawk a, ka hriat ve leh chuan ka tim chhawk a, mi ti harh kawkin ka hria.

Aw lo chhuahna lam chu kan hawi dun thawt a, street light eng hnuaiah chuan pa tawngchham leng lung, raw mit pu hmel deuh roh, tarmit vuah, a ban chu a seiin a kak thu mai a, step atanga a rawn chhuk thla te reng chu a rawn bai thla uih uih mai a.

A ke khing hnih chu a insei hleih ni ngei tur a ni.

"E ka pu, hei Hmingtei hi In-ah a awm em le? Mike-a chuan a han ti a. Chuveleh kei chuan, "Ka reh! Mike e'nge awmzia? tiin Mike-a chu ka thlek nghal ha ha a.

"Mike, Hmingtei i tia law? ka han ti leh a, chutih pah chuan kan kalsan tak veng lu lama Hmingtei-te chenna In tia mi hrilh lam kha ka han thlir vat vat bawk a.

Mike-a chuan ka thusawi bara mi khawn lo deuh mai chuan chu putar kan lam rawn pan mek chu a en reng a.

Chu putar awm phéng liai luai chu a rawn thleng thla ta a, chutah min han thlek ang he haw a, rintlak kan ni reng em tih min han chian tum te pawh hi a ang dawn dawn a ni.

Mike-a bawk chuan, "Hei, a thiante kan nia," a han ti leh a, chutah putar tê chu a inher vut a, Assam type In-ah chuan a va lut ta rak rak a. kei chuan Mike-a chu chhuahchhal zet hian ka han en a, ka hmel-ah hrilhhaina ka lantir reng bawk a ni.

Nakin deuhah chuan putar tê kha a rawn chhuak leh a, keini thian hnih chu na zet hian min han melh tawn leh zawk zawk mai a, chutah engmah sawi ta chuang lo chuan a rawn chhukna step-ah bawk khan a bai chho leh ta daih mai a. Pa seh hel ve tak zawng a ni.

Chuveleh Mike chu a insûm zo ta lo ni ngei tur a ni. In hnuai lam pawhthla step chhukthla-ah chuan a pen thla ta khap khap a, chutah chu Assam type inhnuai kawngkhar chu a han chum zui dat dat a. "Lo hawng teh Hmingte, In-ah i awm em? A han ti a.

Kei pawh chu a letlinga khai ang mai ni hek i, Mike-a chu ka zu finthla ve ta poh a.

Kawngkhar chu chhung lam atang hian a rawn inhawng ta tiah tiah a, kawngkhar rawn hawngtu chu hmeichhia niin chu nu hmel ka han hmu chu ka phu teuh kher mai! Lalpa leh! A hmel chu Invul tui chuh tham zetin a tha a. Khaw tê deuh han fuihpawrha han inhmelmak tirna tham zet tur hi a ni.

Chu nu chuan no lo fahran hian, "E'nge? a rawn ti a, Mike-a chuan, "Kan lo leng dawn" a han ti dek dek a. Chu veleh, chu nu sakhmel tha zet chu a sen nghal ta tawn tawn a, "Tute nge in nih a? Ka hre ngai che u a mi? A han ti leh bàwng mai a, Mike-a chuan, "Aw! Min hawn ve mai la, hmelhriat kan nih kher a tul em ni? Han tiin kawngkhar chu a han pawt deuh dawn dawn a.

Chu nu chuan rang deuh mai hian kawngkhar chu a chelh ve nghal at at bawk a, chuveleh kei chuan, "Mike, i let leh zawk Mai ang hmiang? ka lo ti ta vat a. Chutah, chu nu hmeltha-i chuan mi rawn en vat a. 'Ka rei! A hmel han that zia mai chu, a lakah chuan ka tuiral a ni nghal hawt a! En nawn apiang mai chuan a hmelthat chu a zual zel tih loh rual a ni lo.

A changtupa hmel a han hmuh ve takah chuan kan nula rim tur hmel tha-i pawh chuan kawngkhar chu a han hawng zau ve ta a, chuveleh Mike-a chuan, "khati mai tur kha alawm," han tiin a han nuih tlawn ti tih deuh dawn dawn vel a.

In chhung kan han lut ta chu Bed room bang nghenga refrigerator rawng sen tawi tê awm leh a bul banga Vai puan nem Kan tih ang chi puan dum in khai chuan ka mit a la nghal a, chu veleh hun kal tawh bawk hriatchhuahin a awm leh ta a ni.

Tuk khat chu Mary hi tek den ang thutin kan In-ah a rawn pawng lan thut mai a, hetiang hunah a rawn lan ngai loh avângin mak ka lo ti hle a ni.

"Muan, tunlai chu ka vir em em reng mai a ni" a rawn ti nghal ngawt a, saum dil din chuan mi hmachhawn reng a, kei chuan, "A chu lam bawk chu," ka lo ti a.

"Hmm, nang lah hi a chhan leh a vangte hi hriat ve tur. Chaw lah ka ei mumal thei a ni si lo. Chaw ei laia luak chhuak an sawi fo pawh hi a awmzia i hrethiam leh bar tawp nang," han tiin refrigerator lam chu panin a va hawng nghal rawk rawk a.

Pineapple pum khat chu a han lachhuak a, "Ice cream tih angreng ka chak ve tlat si lo a," a han ti zui a, "Zai sa a awm tak kha, tun maia ka phel a nia, a hnuaiah khan aw," ka lo ti vat a.

Mary chuan, "Sawi ta vat che! a ti bak hlar a, kei chuan, "Ka hrilh nghal vat lo che em ni? ka ti ve a. A ni chuan, "Hmm, Chhah thei lutuk!" mi han ti zui ta zek tho a. A zungchal chu mi hmuh deuh siah mai bawk a ni.

Kei chu ka harh hlawl a, ka awmna hmun chu ka han en chiang a, thinga siam thuthleng seiah ka lo thu a. Ka thutna cushion chu thut tham a lawi pawh chu a ni meuh lo, a tuamna rawng hring da fap tawh chu a then lai lai a kaw chuk a.

Ka kiangah chuan uluk fahran hian Mike-a pawh chu a lo thu kun ve ngar ngar bawk a, kan nula rim chu duh loh rai an sawi ang mai kan ep-ah chuan a thu tum bar reng a, a hmelthat teh lul nen chuan le.

Mike-a chuan aw a han thian ta kharh a. Chuveleh kan nula rim chuan, "Thingpui ka lum peih lo aw," a han ti nghal tawng a, "Chhei le! Kan nula rim hmel chu ka han en thin a, a vun var paw heu mai chuan tute emaw anga hnawih pawt chawp a mamawh ve hauh lo, mit mu a buang deuh, mit meng zau lutuk lo niin a chiang thin hle a, a sam chu a thlah deuh a, awm hmun kawr satliah a ha a ni.

Boruak chu a rukin a rit hle mai a, kei chuan inchhung chu ka'n thlek kual rauh rauh a, kawngkhar atanga han luhin chhak lam chu lei rinchhan a ni a, chhuar chu tlachawp taka rem chawp tih hriat deuh hi a ni a, bung bel inrem that erawh a tle nalh hle thung.

Bang rinchhan vek chuan chhuar lian vak lo, a bang plywood chhuak hmasa a bel hi a inhung bawk a, a bulah chiah chuan a thleng fahrah puan hlài duai mai dawhkan hi a inhung leh hlawng bawk a.

chhuat chu lei rinchhana cement a zut hnan niin carpet an phaha pangpar ni awm tak tial rek chu hriat chian a har hle, dawhkan inhunna bul leh kan thutna bul vel chu a chhuat cement chuan a ei riral tawh ni ngei tur a ni.

Kawngkhar atanga han luha thlang lamah chuan bathroom ni awm tak kawngkhar, rangva a khawr hi a awm a, a bulah chuan tui dehna chhetê hi awmin gas thuk a awm bawk a.

Chutah, kan thutna bula fridge bawk chu ka han thlek uluk leh deuh bik a, chu veleh kan nula rim chuan mi rawn melh rú pah chuan, "Engmah ei tur ka neilo! a han ti ta mai pek a! ka zak ta kher mai.

Mike-a chuan, "Hmingte," a han ti dek dek chu nula chuan, "kha tin tuman min ko ngai lo," a ti leh ta hmak mai a, a vun var hai mai chu a sen tawn tawn a, Mahse zak hmel ni lovin lungni lo hmel a ni tlat a ni.

Chutah, kei chuan, "Thian nu, i hmeltha tia an sawi thin hi a dik ngei hi mawle," tiin ngun deuh chuan ka han en a.

Kan nula rimi chuan mi melh rám ram pah chuan, "I hresual chhiava der a nih chu! a han ti a, a hmui chu a chip zui hmiah a. Chutih pah chuan kei chu mi han melh zui leh ngawt ngawt mai a. Mi ngei hmel kher mai.

Mike-a bawk chuan, "E le, zanin chu boruak a thiang nuam teh e" a han ti ngawt a. Kei pawh chuan tawng zai han chhah Mai dan tur vang hlein ka hre ve ta bawk a.

Nula chuan, "Ka meng rei peih lo a nia," a han ti leh a, chutih pah chuan a hawi tau thuai thuai hi a ang khawp Mai a.

'Helaia kan lo kal hi kan tisual takzet a ni' tia haw rawt nghal ut ut mai chu ka duh a. Mike-a chuan, "Hmingte, tunlai i dam tha maw? dam deuh hian a han ti leh hram hram a. Nula chu a tum bar bar reng a, chutah pawn lama lirthei rawn ri vut vut lam chuan a beng a rawng a tibuai ta zawk a ni ngei ang.

Chutah, a inlengte chu min theihnghilh zui ta ni ngei tur a ni, pawn lama tlangval hawklak tawng buah buah te lam chu a va ngaihven ta daih a. Kawngkhar chu va hawngin, "Stephen," a va ti a.

Chutia pawn lama kan nulain min tâp san tak daih rengah chuan kei leh Mike-a pawh chu kan in en kan in en a, chutah haw mai chu thain kan hre ta a.

Pawn lamah chuan mipa bumro deuh deuh, pian dawlhkai pui pui mi pa nga hi a kalkham zawng hian an lo ding thap hlawm a, chutah keini min han hmuh takah chuan an awm hmun chu an han Siam rem ta deuh a.

An zinga pakhat erawh hmel fai veng leh a ba ek ngo zawnga var hleng mai, ruih nei tih hriat taka meng phi reng hi niin an zingah chuan a te ber thung a, mi hi an lo en duh na laileng khawp ah!

Chutah, a dinglama mi ve thung chu an zingah chuan a thangduang ber ve thung a, a lawr deuh bik a, a ban hrawl pui mai leh a dar kum deuh hlun mai atang te chuan insawizawi thang tih a hriat hle a. A hmai chu ar ba chuk ang mai hian a khem nuan mai a. A insawizawi dan erawh thil tha tak a nih ka ring hauh lo. Chu pa pawh chuan uluk lutuk mai chuan min lo melh kuau reng a.

Midang pathum erawh an inbe mawlh mawlh reng a. Hmingtei chu an kiangah chuan a lo ding kawisawi ve viau mai bawk.

Mike-a chuan, "Hmingte, kan haw a nge, zan dangah kan la rawn leng leh ang," a han ti dam thliam a, Hmingtei chu lehlam hawiin a ner nghal nang nang a, chuveleh mipa pa nga te chuan uluk mangkheng hian kan kal tur chu min han melh leh run run hlawm a. Inseh ngam hmel hi an pu teuh leh nghal a.

Mi sawisak rawn hmang an sawi te chu ka hrechhuak dawn dawn a. Khua chu a vawt thar thut a! Chung mite huhang rapthlak zia chu a tenawm zawk hial a ni!

Bike-ah chuan lawn kai vatin In lam pan chuan kan tleh haw ta nghal a ni.

In kan thlen chuan han inla mi tak deuhin thil awmzia ka han zawt tha a, Mike chuan heti hian a sawi ta a.

"Ka ka atanga thil awmzia hrilh hriat vek kher che hi tulin ka hre lo. A tahtawl te te-a ka hrilhfiah che erawh tul dawn nia a lan takah chuan ka la hrilh zel zawk che a niang chu," a han ti a.

Kei chuan, "Hmingtei kha engvanga kha laiah daih Khan khawsa nge a nih? An In han en mai kha chuan chhungkaw pangngai tak niin a lang si a," ka han ti a.

"Ma muan, Hmingtei chungchang hi mi hian an sawi tha duh vak ngai lo a, an chhungkua hi LIKK pawl kal sual ka tih mai kha an ni a. Tin, Hmingtei hi nula ni lovin nuthlawi a nia," a han ti a.

Chuveleh kei chuan, "Wow! Chu, buma ka awm nghal loh! A landanah kha zawng nula man to, a ui liah chin ngat ni turah ka lo ngai ngawt pek a. Chuan tunge a pasal hlui chu? Fa an nei em?" Ka han ti a.

"Fa chu an nei lo. Mak pawh ka ti. Ma muan, Hmingtei chungchang ngaihven zui hi ka duh ngai hauh lo. Tin, thuk taka thil inmung tawh a ni a, hetiang natna-in a kherh beh tak rengah Che chuan thil tha zawk beiseipui che ka ni a, mahse ka thil tih hi ka tidik kher a ngem tih phei zawng ka chiang chuang bik ta hauh lo.

"Pasal chu a nei chiah lo. A tleirawl chhuah hian an inru ve a, a hming chu Rinsiama a ni. LIKK mi leh sa a ni ve lo.

"Mahse, LiKK inkaihhruai dan i hriat hmasak atana ka duh a then a zar chu kalphung bawraw tak nei, an tih lohah chuan u chuak taka inkhuahkhirna kal pui," a han ti a.

"Chu, kohhran kalphung nei maksak tak chhungkua atanga lo chawr chhuak tihna a ni maw? Ka han ti hnuhnawh veleh a. Hmingtei min lo dawnsawn dan kha ka ngaihtuah a.

"Ma muan, sawi dawn chuan a tam lutuk tlat, chhura thawnthu sawi tham zetin a inkhaidiat chho zut mai. Ti teh, mut i tin zawk teh ang. Nangpawh i chau ang," a ti ta zawk a.

"Ni e," tiin keipawh chuan mut ka awn ta zawk a, a dik a dik chuan Hmingtei an tih chu chutia nuthlawi deuh roh a lo nih tak siah chuan a mipa nen chuan kohhran thu hlaa inrem lo niin ka ngai ta a ni.

Tin, kawt kaia mi zingah khan a ngaihzawng, amah rutu chu tel ve ngeiin ka ring bawk a. A dik tak chuan a pa te ber, ngo hling hleng kha ni ngeiin ka ring tlat bawk.

Amaherawh chu, kha laiah daih a khawsak chhan erawh ka hrethiam bik lo a ni. Tin, ka rilru-a han cham zui veng veng tur khawp nungchang nei niin ka hre rih lo bawk a. A hmel erawh hai rual a ni lo, a that dan a nasa hle tih ka chiang.

Han tih em em tur nei lo ta chu a tuk zan chuan a hun ngaiah kan va lang leh ta a. Dan ngai bawkin amah chauhin a lo awm leh a, hemi zan erawh hi chuan In chhung chu rim danglam tak hian a luah a, zu rim a ni, amah Hmingtei pawh chu a meng phelh deuh phât nghe nghe a.

A kawr hak pan leh thehlem takah chuan a hnute bu tha zet mai thla chu fiah angreng tak hian a lang kalh a, a kawr hak bahna lehlam chu a darah chuan a uai thla deuh a. A khawivah lawi lang hai hian awm hmun pawnfen fual a feng a, a kap kalak zawng hian min hmachhawn siah a, a landan chuan mi ti rilru hah ru kher mai.

Kei chu dan ngai bawkin mi han melh leh ngar ngar mai a, a han nui sak hmel chuan eng teh chiamin a theng thawng a luh hran lo tih mi hrilh tel thlap a ni.

Chutih rual chuan mi han ngaih loh melh mitmeng erawh a khum pui mitmeng ta riau hian ka hre tlat a, chutih rual chuan thlemtu ang chauh lah chu niin, chu thlemna chuan mi hip ru tlat thung si a, nep ka inti kher mai.

Chutia ruih nei tih hriat taka a thu kak siah maite chuan nuthlawi hmai khup lo chin, zei leh confi tawk tawh tak, eng hmangaihna thawnthu thlum tehchiamin a lung a len zawh rual tawh loh, nawmna lam chauh uma a ti nuam theitu a piang tana inphal tiin mi hrilh tlat mahse,

Dam chhunga ka nupui nia chhungkua ka din pui atan hmeichhia hi intlar ngat ta se, second khat pawh khaw tlai eih lova ka kawh nghal chat tur erawh ni si a ni. Tiin ka thinlung anchhedawng zet chu a inlamlet ta chu a nia, Ka inten lek lek hial a.

"E'nge in rawn tih leh dawn a? No lo fahran chuan min han ti a, zakthei lo min tih hmel kher mai. Mike-a chu ka han en a, phone a lo bih daih a. Kei chu Ka kutah engkim mi inpapek ni hmiang.

Chutia Sodom leh gomora thinlung te hial ka han put dawn dawn takah chuan ka inngaihtuah harh thei ta hram a.

"Hmingte' tiin ko che ila pawi i ti em? ka han ti a. "Heh! Khawi lam sakhming anchhedawng chuan! A lo ti hlak a. A chek zui karh karh reng a.

"Hmm, Hmingte," chu ka han ti lui ve talh ta tho va, a lo nui liam mai a. Chutah, kei chuan "Imm, in pa leng hi a la rawn haw lo a nia nga," ka han ti khut pek a, Hmingtei chu za lo fahran hian a nui ta a.

"Khawi lama pasal? Hei, min rim niin ka hre si a," a han ti deuh he haw a. Mi han tih el vel chu a chak hle tih ka hmu a ni.

"Pasal nei lai te hi ilo ni reng pek a nge' tih thil a nia," ka han ti leh a. Chutah a nui hul leh hak a, "hah! Chhe sâwn veiin leh! Khawia pasal nge nei se mi tih a? chu ka pasal hlau chuan i lo kal ngam tho bawk si a ni maw? Mi han ti vel nang nang a. Mi tham lo ru hmel chu ka run lek lek mai.

Kan han in lumlam loh em em dan chu pui ve tak hi kan ni a.

Mike-a erawh hnara khawn ang hlauh, a ngawi hmiah a, Mahse a rawn dak chhuak deuh vut thung. chutah, "Muan, ka chhuak lawk dawn, tikhan lo inkawm ru aw," mi han ti a, a chhuak zui ta daih mai lehnghal a.

Kei chuan choka chhuar lam chu ka han en a, "In pui sang Kai man em chu hlawhchhuak ve tawh turah ka'n inngai a," ka han ti a. Chu veleh, Hmingtei chuan dul fahrana mi han khap khum sak chung hian, "I zak miah lo em ni? Mi ti ta bawl bawl mai a. Kei chu za lo zet chuan ka then ta reng ringawt a.

Chumi lai tak chuan le, pawn lam atang chuan mipa te tial thawt ri hi ka hria a, ka thian Mike-a aw ngei a ni. Chumi rual chiah chuan, "Ma muan," mi rawn ti zui leh thawt mai a. A fiah ta deuh thung a.

Chuveleh Hmingtei chu ka en vat a. Thutthleng-ah chuan a rui lutuk nge a tider zawk ni a lo tlu zawi deuh hnuang ta tlat Mai lehnghal a.

"Mike, e'nge ni ta? Tiin pawnah chuan ka chhuak nghal thuai a. Chutah le, pawn ka va chhuak chu kawt kai zim te maiah chuan nizana mi-te khan Mike-a chu an lo din hual khûp mai a, mikea chu sakhi no, sapui rualin an han chhaih vel hi ka chan ber a ni.

Chutah le, ka mit hmuh lai ngei mai chuan a pa sin te ber mai khan Mike-a chu ko chhak behchhan chuan a han rek bet ta chawt chawt mai a.

"Hei! Ka ti vak a, ka tim leh roh si a, "Thian te u, eng ti zai zia? ka ti hnuhnawh leh zawk a, chuveleh chu pa chuan Mike a rehna chu han thlahin ka lam chu an rawn hawi thap a.

"Uai! Hei, a dang a la awm. Tunge i nih a? E hiau! Nizan a mi bawk kha i niang maw? In hmai hi kan hmuh chak zawng a ni tlat lo. He laiah hian engtia rawn inlan leh ngam nge maw in nih le? Tiin a pa sin bera chuan ka lam a rawn pan zui chhar chhar mai a, a dang pali chu lo nui dar darin a pa thangduang bera khan Mike-a chu a han tham tho zui leh nawk mai bawk a.

"Kha ti khan tisuh! ka han ti ve leh vak mai a. Chuveleh, ka lam pana lokal a pa sin bera chuan ka kawr awmah chuan mi han tham zui a, chutah, "Ngawi rawh! Ngawi hmiah rawh hmel bal pa! mi han ti zek mai a. Kei chuan ha chang ka thial ru teuh a. Ka tha chu a khur hlawk hlawk bawk a.

Chutah, ka âwma la tham reng chung chuan, "I thiana nen hian he laiah beisei in nei niin kan hre tlat a ni," Mi han ti leh a. Chutah, a chil chu leia han chhah sawk pah chuan,

"He laia beisei nei ngam tur hian tunge in nih?," mi han ti leh a, ka hmai bul maia mi tawng khum a ni bawk a, a thaw chu zu rim nen a uihin a thing kher lehnghal a.

Chet ve ngam ni chai hek lo, pumrua-ah lah chuan kan inkhan lo nasa mai si a. Chutah, thinrim inhmuam teuh hian,"Lalhmingliani hi in beisei a ni tiraw? Mi han ti leh vak a. Kei chuan a thaw rim ngaithei lo zet chuan,"Beisei dang lêm love" ka ti hul ve ta hak a.

Chutah le, kan mihring thinawrha run tawk lek chu lo niin, pawng sarak chiam chiam chung chuan Kei chu leiah mi han theh bawkvak ta zawt zawt mai a. A pa sin ber ka ti ngawt na'ng a ka khan lo vai vai teh chu a ni e. Mike-a pawh chu a pa dung sang bera khan a samah a lo kek veleh nawk nawk mai bawk a. Mike-a thinrim che ve ngam silo chu a te that that reng a.

Chutia, Kan han rik tak ré rú-ah chuan Thawklehkhatah kawngkhar chu a rawn intheh hawng thuai a! Hmingtei kha a rawn lang zui a.

"Stephen, duhtawk rawh. Misual leh! In pawi an sawi a mi? Ti nge kut in thlak ngawt a? Tiin huat hmel zet hian Mike-a sama kektu chu a en vawng vawng mai a. A mitmeng ling hlar leh chhungrila natna thuk tak chu a hmuhnawm hial zawk a.

Stephen a tih chuan han rum nghutin, "Mi hur nu! Lo ngawi ringawt rawh! A han ti khu khu mai a. Chutih pah chuan, "Hmm, he laiah hian vawi khat mah in hmel rawn lan leh tawh ngai suh ang che u" tiin Mike-a chu a hnungah a han nam leh vak mai a. Mike-a chu a tawlh hma veleh rawk rawk mai a.

Kei chu a mi thangduang paliana vek chuan dim lo baksak hian mi han tham tho veleh zawt mai a, a thangduang bawk a, a fuat ngah ngah zia chu! Pui tak a ni. Ka kang dawt a, mi thamna chu a thlah leh roh si a, leiah bawk chuan rem lo zet hian ka kir veleh nawk nawk mai a.

Chutah, Ka han lehhawi chu, ka thil va hmuh chuan mi thawng dawt mai! Hmingtei hmel chu a la ngai reng a, mahse langsar tak chuan a chhungril natna thuk tak chu hmuh theih a ni ta thung. Chutah, han kun hniamin a tap ni ngei tur a ni. An palian thangduanga khan Hmingtei chu a han pan hnai leh khur khur mai a.

Chu veleh, Mike-a chuan ka banah mi rawn pawt sawk a. Chung palian ramsa koham ho-in min pawh sawm vek hma ngei chuan tiin a biling a balang chuan chu lai hmun ata chu kan insaseng ta thuai thuai a.

Continues.....