Behind the mask Chapter 8

[Catnip Quill]

Behind the mask


Chapter 8


Thlasik boruak hik vùr leh chhum zing chuan kan campus a tuam hlup hlup a.Internship tih nan kar hnih chiahin min dang tawh,a ngai te bawkin buai reng reng in hun kan hmang a.


Phur lo zet in class lam pan chuan ka kal a,tun ang khuaah hi chuan hostel ah mut lum veng veng aia chak ka nei lo,ka phone rawn nghawr dat dat chu ka en a, Andrew message a lo ni


"Morning baby..thawh ka hai chiang khawp mai,i lo buai leh rek rek tawh em?"

Nui var var chung chuan ka reply vat a,Pharmacology class ka neih tur thu leh ka hman veleh ka biak vat tur thu hrilhin ka phone ka dahtha zui vat a,thâwk la vang vangin class lam panin ka kal a.


Delhi ka let leh atang buai reng reng in hun leh ni hi kan la hmang chho char char,ward round kual,seminar leh assignment tawp hleithei lo ti reng rengin hun kan hmang a.


Ritu in "khawl emaw hi min tia" tia a phun hlak hlak thin pawh hi a dik,mut kham sa lei tur te hi awm se ka ngam huai ngawt ang.Nileng in college ah hun kan hmang a, banah library a material lam khawm in hun ka hmang a, hostel ka let leh meuh chuan khua a thim fel leh der tawh.Hun hi rei lote chhung hian a kal duak duak emaw tih mai tur a ni,helai hmun a zirtur a ka kal hmasak ber ni te kha hmanni chauh ni mai hian ka hria.


Zanin chu eng hian nge min mawlh teh hrep ni,ka zirlaiah rilru ka pe thei hauh lo,ka lehkhabu leh ka phone chu ka melh tawn sek a,bang a sana ri leh Ritu a khàt tawk a rawn tawngvai ri bak thawm engmah hriat tur awm lo hian a reh reh tlawk tlawk,thli a thaw vuk vuk reng a,khua lah chu a zan dang zawng ai a vawt lehzual.Andrew inkhawm ban ahun tawh a,min la rawn be miah lo chu ngaihtha lo zet chuan Whatsapp ah ka lut a,a rawn online zui ve chiah.


"Baby i thleng chiah mi?" A online ka hmuh rual rual chuan ka text nghal thuai a.


"Kawngka bul ka thleng chiah" tiin a rawn reply ve zawm zat.


A haw har chhan zawt tur a ka type mek lai chuan a message rawn thlen avang chuan ka thin phu a rang nghal zawih zawih.


"I duh loh leh huat ber turin ka awm" tih message rawn thleng chuan ka chungril ah min hnawh nghal pup pup.






"Engtin nge i awm? Min ti hlauthawng suh" tiin ka reply a,thil tha lo deuh thleng tur ang mai chuan ka hlauthawng lutuk.



"Ka ngaihtuah nasa lutuk hi ka á mai dawn hian ka hria" a rawn ti leh ringawt a.


"Sawi chiang rawh" ka tih chuan a rawn type leh nghal a,a type chhung ringawt te chu rei ka ti ngawih ngawih.


"Zanin hi kan pahnih thawnthu tawp na ni mai rawh se aw,ka nghing vek tawh" a message chu ka en nawn tluk tluk,nilo keimah zawk hi ka nghing vek,ka kut te hi a khur nghal zawih zawih in ka hria.


"Enge a chhan?"

Rang zet in ka reply a. ka thin ah hian hnawhtu awm ang mai hian ka thâw tehi a chham dawn in ka hria, Andrew tinge?ka rilru chu zawhna hlirin a khat.


A chhanna min pek chuan min va ti hrilhhai si em!


Andrew message bawk chu rawn thleng leh in,


"Dawihzep pawh min ti ngawt ang,Mahse kan kawng zawh hi a in ang lo em a ni" .Chem a na tak a vih ang mai hian ka thinlung hi a na lutuk,ka mittui a rawn hnâm zui a.

"Baby engtin nge i tel lo in awm se min tih?,Naktuk tukleh lawk hi Kum 4 kan inzui na tur ani tawh" ka mittui rawn luang chu ka hru a,ka ngaituahna a mumal lo nghal vek.





"Kum 4 chauh hi ka aim ani lo tih i hriat kha,ka nghak ang em tih te ka ngaituah a,mahse ka tih a tul tho tho,Pathian vanga ka chan ngam na hi rem min ruat sakna tur zawk anih ka beisei" a rawn ti leh a.


Ka awih thei lo,Andrew hian min prank anih ka la ring fan! Space pek a mamawh zawk aniang, mahse a ni lo,ka buai vek reply dan tur pawh ka hre lo,ka duh duh ka type kual ani ber ka nghah tur thu te ka sawiin ka hria!

Chaw te ei tha a in enkawl tha tur ten min chah a.

"Kan tan hian khawvel lehlam ah tal hun remchang ala awm ve mahna,Mangtha le"


A message hnuhnung ber chu ka chhiar nawn char char,ani erawh a offline zui daih.Zantin muttui tiin kan in thlah liam thin,mangtha tih tawngkam hman hi a duh ngai lo.

"Ka thih hunah pawh ka ruang chung ah mangtha tiin min thlah ka duh lo,khawvel lehlam ah ka lo la nghak dawn che a,kan in hmu leh vat dawn nia tiin min thlah zawk dawn nia"tia sawi thin tu kha a ni, mahse hei tunah chuan mangtha min ti.

Thliarkar pilril tak a hnutchhiah ang mai ni hian ka inhria,ka bula awm ve chhun ka thian chu he ka mittui chauh hi a ni.Kan inngaihzawn tirh phat atang zantin kan pahnih tan kan tawngtai dun thin a, mahse khang zawng zawng chhanna ah khan ka tel ve lo maw?Pathian in kawng a ruatsakah hian ka tel ve lo maw?


Pathian nung be tu ve ve kan ni a, mahse anni leh keini chu kan inang lo, an ni kohhran rinnaah chuan an mahni mi leh sa ni lo chu eng inlaichinna mah an siam pui a rem lova, chumai nilovin, khawtlang lak atang pawn an hrang vek a ni,mahse Pathian rinchhanin bul kan tan dun a,hetiang hian ka la na dawn ti a min sawipui thin tu te kha ka haw lek lek anih kha! Andrew hi zirna avangin a awmbo char char tho avangin a tirah kha chuan engmah buaina kan nei lo, mahse a zirlai a zawh meuh chuan loh theih lo in a inhman a tul a,ka hlauhthawn ang chiahin engkim hi a thleng ta vek bawk.

Andrew ka dem lo che nia aw,ka dem reng reng lo che,thli na zetin tunah hian min tih kehsawm vek a ni thei, mahse he thli hi engvangin nge ka dem ngawt ang? Keimah hian a lawm a lo luhna tur in tukverh hawng ni.


Ka phone rawn ri bengchheng zet avang chuan ka ngaituahna atang ka harh chhuak ve chiah! Hostel chung zawlah ka lo awm reng,engtia rei nge ka thut pawh ka hre lo,phone ka en chu ka zawhte doctor kha a a lo ni,engvangin nge tun ang tlai tawhah min lo phone ve ngawt ni!


Tumah ka be chak lo, mahse a rawn phone nawn leh tak avang chuan aw lawi ratin ka pickup a.

"Tlai tawh viau mahse damdawi in pek lai kha naktuk zingah lo pe tawh su aw, in zawhte hian zunthlum a nei maithei" a rawn ti sawk sawk,a inthlahrung takzet tih a âw ah pawh a hriat theih.


Naktukah a rang lamin i hruai thei ang em atih chuan Mizoram a ka awm loh thu leh ka chhungte ka lo hrilh tur thu ka hrilh a.

"I tha em?" A rawn ti zui daih,ka âw atang pawn ka tha lo ka tha lo takzet,chu a zawhna pakhat lek chuan ka tah a ti chhuak tlat bawk, a aw dam dap leh ran doctor nih a inhmeh viau,rilru natna pawh mahni a pai thin mihring hian ka thian tha pawh ni miah lo bulah chuan tum loh deuhin ka inbun ruak fai vek,mak tak mai in tap miah lo in ka sawi chhuak parh thei.


"Awmi" a rawn ti chhuak sup a.

"Umm" Tah insum zet chuan ka ti hnawk tuak a.


Hla ka sa nga lo ngaithla rawh aw a tih chuan min hmu thei lem lo mahse ka bu nghut nghut.


Guitar rawn ti ri zui in *mercyme-Even if* hla chu a rawn sa a.


I know the sorrow, and I know the hurt
Would all go away if You'd just say the word
But even if You don't
My hope is You alone


A zaithiam leh thiam loh ka hre lo,mahse ka insum theihna a tichhe vek thung!Ka tap chhuak ta hawk hawk anih chu!


Hepa hian ka rilru natna chu remchangah la in min hnaih nan hman a tum tih ka hria,keipawh hian midang nghenchhan ka neih a ngai tih pawh ka in hre bawk,mahse tunah hi chuan tumah ka be chak lo,na taka ka siam hma min be tawh lo tur in ka hrilh a.A call leh message ka chhan let miah lo chung hian a beidawng duh miah lo.

Andrew harsa ti tak chungin ka thlah che a, engtiang chiahin nge ka tawrh zui i hre âwm si lo a tiraw?


Zantin inbe thin ta chu Andrew ka biak tak miah loh avang chuan Ritu leh Sumbul in achhan min zawt fo kan inthen ka tih awlsam puat ringawt na chuan an ngaih ati tha der lo,inbunruah a tap hawm hawm tur in min duh zawk ani ber mahse na ang a lan hi ka zak ani mah zawk.


Zantin tawngtai leh Bible chhiar a hun hmang ziah thin kha vawi khat mah ka tawngtai zui tawh lo bawk,ka tawngtai chuan Pathian hnenah khian ka vui ang tih ka hlau ani ber.

_It's easy to sing,when there's nothing to bring me down.But what will I say when I'm held to the flame,like I'm right now._

He hla hi ka tana phuah ni mai in ka hria.Chaw ei that loh leh mut that loh nen ka cher belh nasa viau bawk.

Ritu in "i awm ang khan keipawh ka awm tawh,a outcome a tha lo a nia" tiin min hrilh hial anih kha!


Lalawmpuii mi khawlh phei chuan Andrew va biak a,hauh hrep a tum leh ang lawi chu ka khap dai thei hram bawk.



Internship kan tan mek a,chhun lamah chuan rilru a la peng ve teh meuh mahse zan lam hun bawk hi hreawm ka ti thin.

Zan khat ka rilru thawpik lutuk chu whiskey kawl sa kengin hostel atang ka chhuak a,kan hostel atang hla lutuk lo hmun reh deuh thingbuk hnuai ah chuan ka thu sawp hnawk zui a.Thlasik boruak vawt vùr avang chuan ka hmai pawh ati hik vek,mahse ka ngaipawimawh lo tunah chuan ka natna leh khawharna hi theihnghilh ka duh ber.Ka awmdanah tilang miah lo mahila Ritu leh sumbul hian min veng deuh chawt bawk,biak hre miah lo ten ka ngaituahna ka kawm chang a lo tam bawk a tin ni.

Ka phone ka off hmak a,engmah hre lo a awm tawp chu ka duh ber. Ka ngaituahna kawm zuiin a khat tawk in ka whiskey ken chu ka lem zeuh zeuh a, ka mittui rawn tla zung zung chu hruk pawh ka tum lo,mahni a awmna hun ka neih mang loh avang in ka puak keh ani ber.La inzui ni ta ila tun a kan internship neih mek a damlo ka enkawl dan te,ka hun hman dan te ka hrilh awm sia,ka thil tih hote pawh min phur pui a chhuang zet a min fuih kal thin tu kha ka mamawh ani.


A chanchin hriatzui ka duh lo a,engnge a tih zui va ngaihven pawh ka duh lo,a thiante chawp in ka unfollow vek anih kha.Cartoon ang mai a thi thei lo tur a ka lo dah thin kan in hmangaihna kha midang a lo nei anih pawn,Andrew a dang daih ani, a chhan chu ka Andrew chuan min hmangaih a,min kalsan a tum lo chuvang chuan Andrew hi khawvel ah a awm ve tawh lo.Hetiang bak hian ngaituah zui ka duh bawk hek lo.


"Andrew harsa ti takin min thlah ve tho tiraw?"

"I na ve tho ang tiraw,tuna ka awm ang hian?"


tiin ka au chhuak a,ka rui tawh hle aniang ka au chhuak tha hleithei lo,ka âw chu a thãm tiak a.


Whiskey bur chu phe ruaiin ka ban tawk tawk a,ka thil in zet lah chuan ka rilru nat a thawidam chu khawi lamah ka khaw hmuh chauh a ti phe!hei ai hian la ruih ka la ngai, whiskey chu in leh tum a ka tin lai tak chuan ban tha chak zet hian min rawn laksak daih!


Ka hawi chho vat a,mahse ka lo rui tawh bawk nen ka hmu chiang thei miah lo,mihring taksa ruangåm lo lang chuan thawmhnaw dum vei ha in lukhum dum a khum tih chu ka hria,tunge a nih hriat ngei tum chuan ka khap vak vak ringawt! engkim hi ka hmu phe vek tawh,chu mihring ruangåm lian zet chuan ka whiskey ken lai chu min laksak in a in mek tih ka hmuh chuan,



"Hey ka ta a nih kha" ka ti chhuak thawt!


Chu mihring chu rawn kun hniam pah chuan,

"You're quite drunk, aren't you"? Rawn ti tu hmel chu ka hmuchiang ve thei chiah.
Kha tuai sual chapo lutuk kha a ni!



"Amos tuaia maw" Amah kawk vah chung chuan ka nui hak a.


"I sual si,nangmah vang a ka dissertation... á a pawimawh ber lo,i hria em?tunah hian ka dissertation vang ni lovin ka rilru a na" ka tawng chilh vek tawh,thawh kán ka tum chu ka tho thei miah lo ka thu sawp leh nuai a.

Tuaia chu nui suk chung chuan,

"Enge i hming khah"? a rawn ti daih,ka tlu sawp nuai chu mi puih tumna pawh a nei chuang lo.

Ka awm ah ka kut nghat in,

"Kei hi vanlalrinawmi"

"Awmawmi ka nihi"

"Theihngilh tawh suh ang che"


"Khawi rawn la rawh"

tih pah chuan whiskey a ken lai chu ka chhuhsak thut a,a in zo tak tak vek!


"A hmasa ber in Awmawm, tuai ka ni lo,chuchu tunah hian kan finfiah dun dawn mi"? Ngeiawm deuh a mi melh ralh chu mak ti deuh in ka lo ká hau thung!


"Maw? I tuai lo maw?ka thiannu Ritu, Sumbul,Cheba ...á..an tam lutuk, an star lutuk che a tuai i ni tih ka lo hrilh vek tawh a sin" ka kutzungtang chuan amah star tu te chu ka chhiar mawlh mawlh a. Engvanga ruih lai hian tawng duh em em nge kan nih le?


Min melh chhuk run tu lam bawk chu hawi leh in nui var var pah chuan.

"Va zia lo deuh ve " ka ti zawm zat ,ka whiskey in teh hrep chu mood hrang hrang min neihtir ,tunah tak hi chuan ka nuih a za viau thung!

"I thiante'n min star a,chuan nang hian gay ang ah min lo ngai thung a maw"? A hmui ati sawi zauh a,a âw ah chuan nuihza aw ka hre tel bawk.




"Ka thiante hnenah ngaihdam ka dil a ngai" ka ti tham tiak a.


But nghut nghut pah chuan

"Um a ngai anih chu"ti hmuk in,a phone rawn ri ral ral chu a thlek zeuh a.


Pick up mai lo chuan ka hnung a ben thek thek pah hian,

"i tah leh hunah chuan hei aia hmun fal deuh hi zawng tawh la aw"tiin a nui var var a,a phone rawn ri nawn leh mek chhang in a kal zui daih a.


A kal liamna lam chu che chang lo chuan phawk zet in ka en ta reng a! Ka thin rawn phu dawt dawt chu ka dawm vang vang a,engtin emaw tak hian ka awm deuh ruih,ka whiskey in hian ka lungphu leh ka thisen chen in ati lum a ni ngei ang!