Looking Back To Where We First Met chapter-6

[Demovie Cruz]

Kapa thusawi chu ngawireng hian kanlo ngaithla tawp a, kanu pawh kan hma zawnah chiah thu in kapa thilsawite chu pawmpui tih hriat zetin alo bu ve leh nghut thin a.




Remruata kava mitsir zeuh chuan hnuai lam alo bih run a, kapa thusawite chu ngaithla awm pawn a awmlo.




"In inkar ah induhna tello in inzawmna kan siam tir che u tih kan hria, in tana a harsat turzia te nen. Mahse vawikhat tal han tum chhin ve ula, hun te hmang dunin thil hlimawm tak tak te ti dun ve thin ula, chuchuan inneihna puitling a siam thei tih hre reng rawh u." a ti leh charh charh a, kapa hian thu a sawi duah ngai lemlo a, tawngkam thiam tak ani lo bawk nen a thiam ang tawk a min zilh ve na chu zahawm ka ti a, inthlahrunna tamtak min siam bawk.






Rei vaklo min hauh leh hnu chuan a duhtawk ve ta hram a, Remruata nen chuan an sumdawnna lam chu an sawi zui ta zawk a.





Kanu pawn alo zawm ve leh zauh thin a, kei erawh inrawlh ve tumna ka nei lemlo thung. Chutia lo thut ngawih ve kur chu ka hne tawh em a vangin ka chhohsan hmasa ta a.




Room-a a rawn luhlai te chu ka manghriat ruai chauh tawh a, a thawm a reh rual chuan ka muhil zui chu ani lehnghal mai.





Zing ah pawh chuan ka tho hma ve hle a, inhnuai lama ka chhuk thla kanu'n min hmuhchuan minlo chiau au vat a. Kan nula in thingpui minlo siam chu kan pahnihin kan in dun a, eirawngbawl nan ala hma deuh nen kawtzawl lama a pangpar te chu kan en dun mai mai a.





"Rinte, ipa chu kalo sawipui chhin a, i eizawnna tur lam kha chu i duh lam tak i kalpui thei ang." a tih chuan kalo lawm hle, kapa hi a khirh ve a keiin ka be râwn ngam vak bawk silo, chuvanga kanu pawh min sawipui tura ngen ka ni reng a. Ani'n Remruata sumdawnna lam min sawihmuh ta se ka hnial ngam dawn der silo a.





"Nu, ka lawm e aw." kanu en chu en in ka ti sap a, kanu pawn minlo nuih var var in, vawiin lama duh lo in thlangfel turin min ti a. Ka tuina lam ka Chiang bawk a, khalamah chuan buaina tur a awm lemlo.





"Hawh i lut tawh teh ang, ipa'n minlo zawng leh tawh ang." a ti a, amah lah chu a nui zui tet tet lehnghal a. A dar ah chuan va kuah in kan inzui lut ta a.





Kapa pawh chanchinbu chhiar in alo thu leh vang tawh a, thingpui no alo dawn ran bawk. Kanu nena kan inkuah lut chu minlo en reng a, a bulah chuan kanva thu thla ve a, kan titi chu lo ngaithla ve in alo nui ve suk thin a.




"Bawihi, inpa hi ala tho lo emni?" kapa in a rawn ti a, sana ka en zauh chuan dar 7 chauh ala ni bawk si. Hrethiam lo zetin ala thawh loh thu chu ka sawi a, a thaw zui hak lehnghal nen buaina an nei em tih chu ka zawt vat a.





"Buaina em em nilo e, nizan lamah kan hnathawk thenkhat ten buaina anlo tawk deuh a, chung vel va buaipui tur chuan nizan lam khan ka ti a, thawh alo hai lehpek anih hi." ati a.





Kapa hian sawrkar lamah hna nghet chu a nei tho a, mahse ti hian Remruata nen sumdawnna hrang hrang an buaipui dun reng tho. Kanu erawh chuan in lam alo enkawl ve thung a, an khawsak pawh a harsa lo viau.





"Ava zialo ve aw, Remruata chu ka han kaitho ange." tiin Remruata kaitho tur chuan ka chhohsan a. Room a ka luhchuan alo la muttui hmel khawp mai.






Remruata nen hian kan inneih hlim atang kanla mudun lo hrim hrim a, edra sofa lian zet kan hun ah chuan amu mai zel, kan mutdan tur kan sawidun laia kan inhnial nasat zia te chu ngaihtuah letin keimah chuan ka nui ka nui mai.





Pan hnai in a darah chuan kava sawi dat dat a, a rawn rum tiah tiah ringawt. A ai na zawk a ka sawi chuan a mit chu a rawn meng ta diar diar a, kei min hmu chu a awihlo deuh nge khap fawk fawk in min en reng ringawt.




"Va intifai la, ilo chhukthla vat dawnnia." ti sap in a puan sin lai chu ka thlehfel sak zui nghal a, ngawirengin bathroom lam chu a pan ve mai bawk a.




Nghak tawh chuanglo in ka chhuahsan a, ka chhukthlak hma chuan Zothansanga room chu kava melh phei leh zawk a, thaw hak in ka inher san a. Pehhel hram hram ka mamawh takzet ani, anihloh chuan insum theilo a ka pan mai ka hlau.





"Pa, alo chhukthla vat dawn anih chu." ti phei lang lang in choka lamah chuan ka lut ta zawk a. Tihtur ka nei chuanglo a an eirawngbawl chu ka pui ve ta vel mai mai a.





Kanu pawh chu alo phei veleh thuai a, anlo in bawl zo thawkhat tawh bawk nen salad te chu kanlo siam ve a, kan pali chuan kan inkawm hovin, kan hlim tlang ve khawp mai.





"URintei hi chu I hmeltha sia, uRemruata aia tha hi chu a phu mawle." Amuani chuan kan titi kar laklah chuan a rawn ti ta khawlh mai a! Rang lutuk hian Es-i chuan a lu ah tak a tuk sak lawl a, Amuani lahchuan, "A ni tak tak a lawm, URintei hi lian vaklo mahse a pian te hi a nalh si. uRemruata pawh a chhe vak chuang biklo nain a phu lo deuh a lawm." tiin keichu min fak nasa mai a, kanu awm ve kur nen nuih te lam lam chu a za zawk.





Estheri zawk chuan mawl atih hmel lutuk, kei leh kanu erawh chuan kanlo nuihpui mai mai thung a. Amuani hi chu Estheri ai pawh hian ala naupang in ala a veleh chhawng a, kanu pawh hian hriatthhiamna chen tamtak anei.






kanu pawh chuan "A dik alawm, Rintei hi chu a hmel te hi mipa tana tawrh har chi, a sexy e' an tih ang tur chi hi ania. Kan Remruata te ang palian satliah lo deuh hi chu a phu a lawm." alo ti ve leh mai bawk a, an pathum chuan min fak zui chiam lehnghala, awmngaihna pawh minti hrelo zawk thei hial alawm.






Midang pawh chu anlo thochhuak ve ta sap sap a, Liandingpuii leh Zothansanga rawn inzui thla chu kalo melh uluk deuh aniang Amuani chuan min biakna pawh chu kalo hrelo a, min rawn nghawk zauh chuan alam Chu ka hawi rang hle. ka bengbulah chuan zawite hian "UZothana nen hian in inhmeh fe zawk." a rawn ti sar sar a, ka tui inlai tak alo ni bawk nen ka hak zui bawrh bawrh mai.





Ka hnungah chuan a rawn chum dat dat a, amah lah chu a nui vur vur nen ka ngei reuh tak tak ani.




"Ti awmang lo viau suh" ka zia deuh hnu chuan ka ti hluk a, engahmah lah chuan a ngai zui chuang hlei lo a.




Chaw kan ei laite chuan a ruk in ka melh zauh zauh reng a, kapa te biakna chu tawngka pawha chhang lo hian a buk pui nghut thin a, kapa pawn rei a be zui chuanglo.




"Rinte, vawiin lamah lo inbuaipui fel tum la, dawr luahtur lam kalo buaipui dawnnia" kapa chuan tiin keichu min rawn melh a, lawm zeta kanu kava melh chuan minlo nuih ve sang a. "Ka lawm e, Pa" te chu kan ti mawi ve a.





Kan eikham hnu te chuan ka tihfel pui ta vek a, ka phur lutuk chu kanu hovin min nuih min nuih hlawm a, pasal ka neih hnu a hetianga phurna leh thathona ka neihna hmasa ber ani hial ta ve ang.





Kapa leh Remruata chu an dawr lam enfiah Turin an chhuak hma a, Liandingpuii pawh class kal turin inchei zetin a chhuak ve tawh bawk. Zothansanga erawh ala reh khawp mai, kal a tumlo emaw a insiam mek anih ka ring.





Keipawh chu room lamah ka chho zui ve nghal a, ka tihtur hmabak chu hre rengin room vel chu ka tifai ta nghal a. Ka zawh hnu chuan ka inbual hmasa leh te te a.





Ka inthlak mek lai chuan ka phone chu alo ri ve chhen a, va pan hnai in alo call tu chu ka en a Abby anih vang chuan ka chhang ta nghal.




Ka tawng hma hma chuan lehlam ami chu a rawn te leh chul tawh a, phone chu ka dah hla hlek a. "Iva reh rei thei ve, pasal neih chu alo nuam phian zawk nge?." tiin amah lah chu anui zui kar kar lehnghala.




"I sawi duh chu sawi vat teh, tihtur kala ngah ania." ka ti ta ngawt a, tianga ka tih mai loh chuan a sawi tum sawi lovin a sawikual leh duah anga, minti khawtlai leh vek animai.




"I buai hmel sia sawi pawh a inthlahrunawm tawh zawk e a" ati a, vei a nei lo lutuk hi chu a awhawm zawk in ka hre tawh.




''Tak tak in, vawiin lamah min bazar pui tura rawn sawm che ka tum a. Tihtur dang i neih chuan a ngai chuanglo." a inthlahrung ve deuh a ka hriat vang chuan nuam ka tilo hle a. Pasal ka neih tak hnu hian ka inkawm khat ta deuh a, chhuahpuiah pawh min sawm ngawng ngawng ngai tawhlo bawk.




Ka pasal chhungte mitmei min venpui ve tih ka hailo a, chutiang akara min sawmna lehna hmasa bera ka chhuahpui theilo tur erawh nuam ka tilo ani. Ka tana a inpek tehlul nen.




"Abby vawiin chu ka dawr thar tur vel buaipui ve ka ngai sia, nidangah kan ti mai dawn ami?" râwn deuh a ka tihchuan a pawiloh thu leh dawr ka hawng thar tur a phurzia te chu a rawn sawi veleh luam a.





Inthlak pah chuan kan inbe ta reng a, kan dah hnu chuan ka tihtur chu ka tihzawm ve leh nghal a. Dawr cheina tur te leh a rawng tur te chu ka enkuala, ka duhdan simple leh changkang zet vang chuan thlan pawh ka thlang rei angreng hle a, darkar tam fe ka buaipui hnu in ka duhthusam ang tak chuan ka chhuah thei ta hram a.





Ka duhthusam ang taka ka peihfel hnu chuan mawi ka ti ve ngang mai a, keimah leh keimah te chu ka inchhuang em em mai ani.





Kapa'n ka dawr luah tur thlalak minlo thawn ah chuan ka ngaihruatna in kan rem chhin vela, ka lung chu a dum ve hliah hliah mai.





Chawl lo a buaipui reng ka ni bawk nen chawhnu lam darkhat velah chuan ka inpeih fel ta vek a. Ka pum a ri rawk rawk reng nen thil ei phawt chu ka tum a, inhnuai lamah ka chhukthla a.





Step tawp ber ka rah lai chuan thawm ri nek nek chu ka hre ta a, kanu te an awm bawk silo a, tunge nge maw an nih dawn ni, an thawm a tang chuan an tlem hmel loh viau bawk.





An mahni hmuh theihna turah chuan ka kal hnai hlek a, an lang chiang ta viau bawk. Mipa rual hi anlo awm khup a, hmeichhe pahnih anlo awm ve bawk. Zothansanga awm ve danah ama thiante an nih hmel.




Ngaihven tawh lemlo in choka lamah chuan ka pheisan a, choka lam atang pawn an thawm chu la ring tak ani.




Amuani zawk chuan eitur hi alo siam mek a, ka lut min hmuhrual chuan ka riltam em tih minlo zawt vat a. "Keimahin ka siam mai ang. Inleng kan nei ami an thawm ava tha ve." ka ti satliah a.




"UZothana thiante an nih saw. An chhelo hlawm bawk sia, ka che lâi vek mawle" tiin a nui deuh kur kur a.




Ala naupang a, star nei rual lek ala ni bawk nen sawi hreh lah a nei bawk silo a, minti hlim thei viau mai.




"An lo kalna a rei tawh ami? Khawnge Esther-i pawh hi a awm a" ka tih chuan a lu chu a thing deuh nak a, "Tahsawn a awmve, i hrelo ami UZothana te nen hian an inkawm ve thin alawm." a tihchuan mak kalo ti hle a, an inbiak lai ngai awm pawh ka hre ngai silo a.




"Engtin nge an inkawm daih thei a" hriat belh ka chak bawk nen kava thut hnaih ta sauh a.




"College thleng khan an kal ho thin a. Alo awmna pawh hi ala rei hleihnem" atia, a ngawi zui daih te chuan minti hrechak zual sauh bawk.




"Zothana lo hruai luh tihna ami?" ti zawngin ka kar a, a hmel a tang chuan sawi chu a hreh hmel deuh.




"Ni ang chu animai, sawi chhuak miah lo la ka hrilh ve ang che" ati ta a, a thilsiam lai chu chhin in, gas te chu a sîm hmasa leh te te phawt a.




Ka bul chiah chair-ah chuan a rawn thu thla ve in, Zothansanga te awmna lam chu ava melh leh zawk a, ka bengbulah chuan a rawn kun hnai leh hret a.




"Es-i te hi an khawsak a harsa ve a, chuan apa hi a pahrawn ani bawk a, anu hi hrisel lo deuh ania apa lah anu aia naupang fe ani bawk nen anu hi a khamkhawp lo aniang Es-i hi a beisei thin a. Es-i lah mi tawngtam vaklo, ngawi reng thin ani bawk nen a zuam sauh sauh mai sia. Bakah apa hlawh hi an rin ber ani ve a, anu enkawlna tur nen han chhuahsan thei an ni bik silo a, anu damlohna hmang chuan a vo a." a tia, a sawi leh tur chu kalo ngaichang ran a.





"Chuan anu damdawi ina a awmlai khan a pawngsual a" a rawn ti chhuak hak a, a mitmengah pawh chuan Es-i a khawngaih zia pawh ka hmuhsak thei.




Keipawh chuan "Avan pawi" tih bak sawitur ka hre biklo. Esi hmel chu ka mitthlaah a rawn lang a, mi inthlahrung lutuk chi, kan sir a lo nui ve sen sen ang kha ani bawk si, a tuarna zual dawn tih ka chiang.





Midang anlo phei tak a vang chuan kan sawi zui ta lo. Keipawh chuan ka eitur chu ka siam chhunzawm ve leh mai.




"Hei hi emni kan mothar chu." rawn ti phei lawng lawng ri kan hriat rual chuan kan bul chu alo thleng chawpchilh nghal a, alamah chuan ka inher a, mipa lian deuh ngo lampang hi ania. A hmel chu a ngainat awm phian lehnghal.




"Lalamuan, iva rei ve riltam in ka thi lo chauh tawh ania." amah bawk chuan ati chhunzawm lehnghala, a nui pah sang bawk.




"I hneawm ve chiang e, ka duh duh hunah ka siam zo ang" Amuani pawh chuan nel tih hriat tak hian alo chhang ve bawk a.



"Min nin thu hi sawi ziah suh, min ning lo tih hi ka chiang. Hei kan mothar chu tumaw a hming?" tiin keichu min rawn melh a, tawi te hian kalo nuih ve ringawt.



"URintei anih hi" tiin min han fak zui leh chiam a, ka awm ve reng laia min fak nasa lutuk chu kalo zak ru chem chem. Chupa lahchuan min zir chiang niawm hrim hian min melh chik a, min en chiang thei bawk si ka awm chu a nuam viau lo.




"Helamah hian alaw ilo awm daih, Zosangin a zawn leh ruai tawh che kha. Hei hi emni uRemruata nupui chu" kei min hmuhrual chuan atih chhunzawm ve lehnghal zat a, dawhkana kan thei chhawp chu a ban nghal zat bawk.




"Ni e. Rinsangpuii ka nia, Rinte tiin min ko thei ang." tiin tha deuh chuan kalo chhang tha ve mai a, min be zui ve luam in an pahnih chuan min pheisan a. Amuani pawn an eitur chawi chung in a zui ve nghal bawk.




Keipawh chu room lama in châwi chho lo in choka ah chuan ka ei chilh ta law law a.




Chutia ngawirenga kalo ei mial mial laichuan khuhkharh thawm chu ka hria a, ka hawichhuak chuan choka luhna bang nghenga mipa minlo thlir reng tu chu ka va hmu a, en zui chuanglo in ka thil ei lai chu ka ei chhunzawm leh a.





Chupa lah chu ka bulah ala rawn thu thla deuh deuh lehnghala, a rimtui hman rim nam chêk chêk chuan ka hnar chu a verh zar mai. Ka bulah chuan ngawireng hian alo thu ve a, ka thil ei chu min melh reng ringawt.





"Thianpa, mamawh i nei emni." tiin ka zawt ta tawp a, tawngkaa min chhang lo in a lu chu min thin khum nghut ringawt.




"I ei ve duh em?" ala thut ve reng vang chuan kati leh ta nge nge a, "Duhlo e, nangmah khan ei teuh rawh" a tawpah chuan a tawngchhuak ve ta hram a lawm.




Chhang zui tawh chuanglo in ka eizawm leh mai a, min en reng bawk si nen nuam chu ka ti ta chiahlo a, ka thil ei lai pawh chu ka dah phah ta ngawt.




"pu Remruata nupui chu I hmeltha hle mai" ka inring hmanlo alam chu ka hawi nghal dawrh, a thusawi nena inremlo zetin minlo nuih vur vur a, minti hrilhhai hle lehnghal.




"Tak takin ka fiamthu anih kha, Rinzuala ka nia" atih leh takah chuan zalo zetin kalo then ve sak a " Keichu Rinte tiin min ko dawnnia" kalo ti ve a, enge maw a hriatni min nuih leh suk suk thin a, a nuih zawnga a biangsum khuar kak thin chuan ka mit chu ala angreng hle lehnghal.




"Minla hria em?" tia min zawh chuan amah chu ka enchiang leh deuh a, kala hmuh ngai awm pawh ka hrelo. "Hre chiahlo" nuamlo ti ru deuh chuan kalo ti a, min nuih leh suk tawh. Enge maw a hriat reuh ni!




"Nang chu kala hria che asin" a ti leh a, ka chhang tawhlo ka plate hman ho chu ka sil mial mial a.



Chutihlai chuan Zothansanga chu a rawn lut ve hlawl a, keini pahnih inhnaih deuh taka kan lo awm min hmu chu a ding ta chawt a.




"Hetah enge tih?" ti nghut in Rinzuala zawk chu a melh run a, lawm lohna nei ang mai hian a hmel te chu a rum em em lehnghala.




"Kan mothar kalo kawm lawk anih hi" Rinzualan pangngai taka atih hnu pawn ala chesawn chuanglo.




"Rawn phei rawh." ti nghut in a inhera, a kal zui nal nal bawk. Rinzuala nen chuan hrethiam lo zet hian kan melh reng ringawt.



"Anih Rinte, ka pheisan ang che aw." Rinzuala chuan tiin Zothansanga chu a zui ve leh nghal a.



Keipawh chuan ka sil zawh tawh avangin room lamah ka chho zui ve nghal bawk.




Ka hna khawhlai bawk chu ka ennawn tha leh a, thawk leh khatah kan room kawngkhar chu a rawn in chum ri ta bur a. Ka phu nasa lutuk chu ka thil inlai pawh ka thlauh baw zui nghal.



Khum khuhna var zeta chuan ka thil tihbuak chu a lang chiang viau mai.



Room kawngkhar bawk chu a rawn ri zui leh dawt a, thin phu dep dep a hmanhmawh zeta kava hawng chu ka mihring hmuh avang chuan mak ti zet hian ka melh ta reng ringawt.



Chupa chu rawn lutin bangah chuan min rek bet ta chawt a.