We Belong Together BY Becca Lnz (Completed)

[Rebec Nunziri]

Chapter-13



Grace Lalthazuali POV



Comment leh click hi a chhe thei khawp mai, comment 20 pawh a tling ngailo, ka chhiar ve vek zel sia, buai nen chuan type hi peih awm loh ve deuh a nia, tawi te a comment pawh in peih loh chuan chapter khat type phei chu a peih awm loh tur zia min hriatthiam pui ka ring... zanin pawh dah loh ka tum zet nangin tlai tawh tak maiah ka rawh dah leh hram aw, a tawp note min chhiar sak hram turin ka ngen bawk a che u..




"Phei ve nghal ila, kha chawhmeh te lei chawp a la ngai dawn bawk sia, kan pahnih in kan va lei dun dawn a nia" ka tih chuan min chhang lovin a nui suk ringawt, "Enge, phei chu i duh lo a mi?" ka tih leh chuan "Kan phei dawn alawm, chumi hma chuan eng emaw min hrilh tur i nei lo maw?" ka tih chuan ka melh deuh haw a, "Ka neih awm la hrelo, phei vat zawk ang, kan rei chuan an ngaihdan te a lo nilo a nge" tia kalsawn mai ka tum chu ka kawng ah rawn vuan in a hmaah chuan min din tir leh a.




"Duati, i theihnghilh tih sawi hauh suh, court chhung a kan luh hma khan enge ka sawi?" a ti hmuk a, ka hrethiam chiah a, a va han naupang chhia tak, a sawi mai mai emaw tia, a lo la hre reng chu niin "Khatiang a naupang chhia emai, naupang pawh kan nih tawh loh hi, bakah sawi kher ngai lovin ka rilru put hmang hi i hrechiang tawh tho a nilawm ni?" ka ti a, a ngaihdam a nih loh hmel kher mai, "Chutiang mai mai ka duh lo, i ka a i sawi lai ngei hriat ka duh, vawitam tak ka hmangaih thu che ka sawi tawh a, i sawi lai hriat ka chak takzet a nia" ka nui hak hak a.




"Awle, i duh dan a nih te chuan ka hmangah che, ka hmangaih lutuk che" ka ti sep a, a mitmeng chu a de nghal sawr sawr, "I duh thu ngei a kha thil i sawi hun kha ka nghah na a rei tawh a sin, tunah chuan ka hre ta e, ka hmangaih lutuk che" tiin ka hmui ah chuan dam dap in a rawn fawp vang vang a, ka lo chhang let ve vat, chutia kan awm tak reng hnuah chuan thawk dan pawh a dik lo chho tan, hetiang hian kan lo awm fo tawh a, a awm ve reng mai, mahse kan kal thui tak tak hma chuan Mike-a chu a in la hrang ta daih a.




"Mike" hrethiam lo zet a ka tih chuan "Duati, ka hmangaih che, ka hmangaih che avang hian a hma ang khan i chungah ka che thei tawh lo, i hrethiam tiraw, hun kal tawh ah kha chuan Pathian duh loh zawngin kan lo khawsa fo tawh a ni mahna, tun atang erawh Pathian duh dan chauh in kan nung tawh tur a ni" a tih chuan ka lawm lutuk avangin ka biang ah mittui a tla hial, "Sh.. ka vel tap ringawt che a nimaw?" tih pahin min rawn kuah a, ka lo kuah let ve vat.




"Ka lawm lutuk a ni, hetiang hian i in thlak danglam ang tih ka ring pha ngailo" ka rilru diktak chu ka sawi ta tawp a, "Keipawh hian hetiang ang hian ka in thlak danglam ka ring ngai biklo, nangmah vang bawk a ni, kan harsat na tawh zawng zawng te ka chan dawn che emaw ka tih lai khan Pathian ah bak tin na nghah na tur tak tak ka lo neih loh zia ka hria a, a vawikhat nan tak meuh meuh thinlung takin Pathian hnenah ka tawngtai a sin" a ti sup a.




Chu aia thil ropui chu kan tan a awm leh chuang dawn em ni, tuar na phen malsawm na a awm an tih thin chu a tak ngei a tawng tu kan lo ni ta, midang aia vanduai bik angah kan in ngai a, kei ngei pawh hian Pathian ka fem hman hial, mahse kan tan nun tha zawk min lo buatsaih sak reng vang a lo ni a, a chang chuan a remruat dan hi kan hrethiam lo fo thin reng, tunah erawh kan tawrh na te kha a thlawn mai mai lo tih min hmuh chiang tir ta.




"Ka lawm e, hetiang tak hian i in thlak danglam ang tih rin harsa ka ti, Pathian hi a va han tha tak em" ka ti vawng vawng a, "Ni e, khawvel ah thil ti thei ber emaw kan in tih lai hian keini aia thil ti thei zawk Pathian a awm tih hi kan theihnghilh fo thin, tunah erawh engkim ka hre fiah ve ta, khawvel ah vanduai bik angah in ngai tawh ngai suh ang che, nun thar ka neih theih nan a ka tan Pathian in a rawn tirh i ni tih hi ka thinlung chhungril tak hian ka hria, ka tan hian i hmu takzet bawk" tiin ka chal ah chuan a rawn fawp leh vang vang a.




"Duati thil pakhat sawi pui leh che ka duh a" a tih chuan ka in la hrang a, "In neih vat ka duh a ni, i chhungte lam pawh in kan in kar a thil thleng tawh te an hre vek a, keichuan a rang lama in neih ka duh, enge i ngaihdan i la in peih lo a nih pawh in ka nghak ang che" ka ngawi vang vang a, neih chu ka duh ngei alawm, mahse a chhungte ngaihdan tur ka ngaihtuah pui lo thei silo a, an fapa nen hian lo in nei in fa lo nei thei talo ila, an mo atan hian min pawm reng duh angem?...




"Enge i ngaihtuah?" a rawn tih thut chuan ka ngaihtuah na atangin ka harh chhuak zawk a, "A.. engmah a nilo" ka ti sep a, ka khabe ah chuan rawn dawn kang in kan mit chu a in tawng chat, "Duati kan in hrechiang viau tawh a, dawt i sawi thiam loh zia pawh hrechiang ber tu ka ni" a tih chuan ka thaw ta hak a, "Ih... i chhungte hian kan in neih an remti dawn em ni, fa ka pai thei tawh lo maithei tih an hriat phei chuan kan in neih an rem tih ka ringlo" ka aw chu a khur deuh titih.




"Engmah buai na tur a awm lo, ka pa ka be vek tawh a, min hnial a hnek in in nei vat vat turin min duh zawk, mo neih an chak tawh hle tih i hriat kha, chuan fa chu nei theilo mahila enge pawh kan in hmangaih na a pawimawh ber tih ka sawi tawh che kha, fa kan lo nei talo a nih pawh in fa kan la thei a nilawm ni, kan ril a rah nilo mahse kan thinlung takin kan hmangaih thei em em ang" a ti a.




"Ka lawm e" ka ti sep, ka mittui a tling pam bawk, "Kei deuh ka lawm, chuan i chhan na ka nghak mek a nia" a ti leh sup a, nui hak chungin "Aw.. ka nei ang che" ka ti ta a, chutah lawm tih hriat zet hian a nui chhuak hawk a, "Ka lawm e, i tan pasal tha leh in nghah na tlak ka ni ang tih ka tiam a che" tiin min pawm nawlh in min vir pui chiam a nih chu, "A tawk ka lu a hai a nia" ka tih takah chuan dim zetin chhuat ah chuan min nghat thla leh a.




"I u hnenah chuan kan pahnih in kan sawi thei mailo em ni, nangmah chauh a i sawi chuan a phal lovang tih ka hlau a nia" a hmaa Mike Lalruattluanga kha a ni talo emaw ka ti hial, "Rem a ti em em ang, ka lo sawi pui dawn alawm, bakah nangpawh a biak chhiat ngai loh che hi, enge i hlauhthawn vak a" ka ti a, chaw eikham hnu khan Asangi te inah kan thut leh fe hnuah kan haw kha a nia, ka u chu in lamah a tlang nghal a, keiin Mike-a ka thlah kawi leh te te phawt thung.




"Awle, phal lo pawh nise ka nupui chu i ni tho ang, lut tawh rawh kle, ka lo en liam ang che" a tih chuan ka nui a, "Nangmah zawk kha kal hmasa rawh ka lo en liam ang che, i haw na tur a la hla zawk alawm" ka ti a, "Mipa ka nih hi, ka bialnu i ni a, him taka inchhung i luh thleng ka en liam dawn che alawm, chu chu mipa diktak tih dan tur pawh a ni" hm.. a in la zei leh tan dawn a nih hi, "Awle, a nih ka va lut ange, ka u biak ka la ngai sia, fimkhur rawh aw, in i thlen veleh min rawn be dawn a nia" ka ti a.




Inchhung ka luh hnu chuan ka u thut na bulah ka va thu ve vat, "Mike-a chu a haw ta em ni?" a lo ti nghal vat, "Aw.. a tlai tawh sia, a lo lut kawi talo mai a nihkha" ka ti a, ka thu rem sauh sauh a, sawi dan tur ber pawh ka hrelo, ka che deuh sek a, ka u lah chuan tv a en tui hmel bawk si, ka ka chu kan ang leh zuai zuai thin a, mahse sawi tan dan tur ka hre lo bawk nen kan chip leh rih thin a, darkar chanve vel a liam tawh, ka awmdan chu a lai laklawh kual vel vek a ni.




Ka rilru a buai em em lai chuan ka phone a rawn ri a, Mike-a hnen atangin a nih chuan ka kalsawn vat, bathroom ah lut in call chu ka chhang a, "Ka thleng chiah aw, chuan i u hnenah chuan I sawi tawh em?" a rawn ti nghal thawr a, "Ka la sawi lo sawi dan tur mai ka hrelo a" ka tih chuan "Ka rin dan sa a nia, khavang kha alawm kan pahnih in sawi dun ang ka tih na chhan, tunah ka lo let leh anga, I u hnenah chuan kan pahnih in kan sawi dun dawn nia" a rawn ti ta mai.




"A ngailo reng reng, ka sawi dawn reng alawm mawle, ka sawi dawn lo pawh ka tih loh kha, I mak tut tut thin lutuk, zanin ah ka sawi dawn ka tihkha" ka ti hlak a, "I sawi lovang tih ka hlau alawm, nangmah vang hian hlauh te hi ka nei tam ta lutuk a, engpawh chu nise lo sawi ngei ngei rawh, karleh lamah ka chhungte an rawn kal leh dawn a, ka pa in in unau a chaw ei ah sawn tur cheu in min ti bawk a nia, lo in ring ula" a rawn ti leh zung zung a.




"Chutiang te chu a hma khan sawi ta che, a.. ka zak, ka u pawn a duh lovang" ka lo ti nghal vat a, "I u chu keiman ka be mai ang" a ti leh, Huiss.. eng ang pawn hnial mahila. a ti lui dawn tho tho, "A hun te lo thleng phawt se, bathroom ah ka awm bawk sia, ka u in min lo ko tep tawh ang, ka dah phawt dawn a nia" ka ti ta tawp a, "Sawi ngei ngei rawh aw, karleh lamah palak rawn tirh nghal ka tum a nia" a thusawi chu hniam a hnek in ka nuih a ti za zawk, nui hak hak chungin phone chu ka dah a.




"U thil sawi pui duh che ka nei a" bathroom atanga ka chhuah rual rual chuan ka ti nghal tawl a, hetia ka sawi pawp mai loh chuan ka sawi thei dawn tlat lo, "Awle enge i sawi duh chu?" tiin tv chu a off a, zam ru tak chung chuan a sir ah ka va thu thla a, "Ih.. Mike-an in neih a duh thu a sawi a" ka ti sep a, ka u chuan engmah a sawi lo, a lungawi vak lo pawh a ni maithei, "U.. i rem tih loh chuan ka neilo ang, i thu ka ngai pawimawh ber" ka ti leh vat a.




"Mate rem tih loh na ka neilo, mahse pasal i han nei mai tur hi mak ka ti zawk a ni, ka tan chuan ka. au neihchhun tak meuh meuh i ni a, ka mitah chuan nula nilo in naupang ang mai I la ni si a, a mak em a ni" tiin a nui a, "U.." ka ti sap, "Thisen ah in zawmna neilo mah ila ka tan chuan i hlut dan hi a danglam phah chuanglo, kei heti mai hi ka ni si a, i tan pawh phur rit mai ka ni, tun atang chuan hahdam takin ka awm thei tawh ang, mipa rintlak tak nangmah hmangaih em em tu che i tawng hi ka lawmpui che in i phu ka ti takzet, keima lam atang chuan rem tih loh na tur a awm lo, chutih rual erawh in Mike-a chu a fal a biak ka duh thung ang" a ti ta sep a.




"U ka tan phur rit i ni ngailo, khatiang zawng khan engmah sawi tawh suh aw, i tan ka hlut ang chiah in ka tan pawh i hlu" tiin ka kuah a, ka u chu a tap tih ka hria, keipawh ka bang bik chuang lo, an sawi di thin thisen a in zawm ngei ngei te pawh an in hmangaih theih loh laiin thisen a in zawmna neilo phei chu in hmangaih theih na dan a awm lo an ti thin, mahse chuthil chu a diklo tih kan unau hian kan hrechiang hle.



Lalnuntluangi POV (Grace-i U)



Matei muhil lai chu ka en reng a, naupang te emaw ka tih laiin pasal a nei ve dawn der chu a ni sia, mumang a ang rum rum alawm, fahrah in a an rawn dah khan thil hre rual ka ni ve tawh a, a ni hi chuan a nausen lai atanga awm angah a in ngai a, mahse chutiang chu a ni hauho, fahrah in a a rawn awm khan kum 4 a ni tawh a, mahse a rawn awm atanga reilote hnuah a thluak ah khawsik pui lut in a damlo tak vak kha a nia, a hriat na a hloh phah nghe nghe.




Fahrah in ah khan a nu in a rawn dah a, a kalsan dawn khan a tap nasa hle nghe nghe, loh theih loh na avanga rawn dah a ni bawk, a len hnuah a rawn lak leh tur thu a sawi thlap a, mahse kum 18 a tlin hnu
thleng khan a nu chu a rawn lang leh ta miah lo, a chanchin lah ka tan hriat ngaih na a awm silo, Mizoram a sumdawng hausa zet fanu a ni tih zawng ka hria, a hming tak ngial pawh ka hrelo, tunah chuan nula puitling a lo ni ve ta bawk a, engtik ni ah emaw chuan ka hrilh ngei a la ngai ang.




Matei hnathawk tura a chhuah hnuah Mike-a chu ka call a, biak ka duh thu ka sawi chuan a rawn kal nghal tur thu in min chhang, a ni hian ka nau hi a hmangaih tak tak niin ka hria, chutih rual erawh in ka nau hi rilru na taka a awm ka hlauh na erawh a reh theilo thung, keilah hrisel loh na in min thlak buak reng a, rei ka dam tawh dawn lo tih ka hai lo bawk, lung lam ṭhalo ka ni a, ka pumpui a cancer mek bawk, chu erawh ka mai hnenah ka zep tlat thung, kei leh doctor tih lovin tuman an hrelo.




"Ka nau khan in neih in duh thu chu min lo hrilh tawh a, chuvang a nia ka nau tello va biak che ka duh chhan" Mike-a nen chuan in hmachhawn in kan thu ran a, "Ni e, i nau hi neih ka duhtak zet a ni" a tih chuan ka nui a, "In in hmangaih tak tak in ka hre bawk a, ka nau hi huaisen tak angin lang mahse tih nat awlsam em em mai a ni a, a naupan lai atang tawh in harsat na a tawk nasaa tawh bawk nen na taka a awm hi ka hlau ber a ni" ka ti a.




"Ka tiam a che, a bula ka awm chhung chuan a nun ah hlim na chauh thlen tir ka tum ang, mihring ka ni a, a hmin reng thei dawn lo tih ka hria mahse ka theihtawp ka chhuah ang" a thinlung takin a sawi tih ka hriatpui thei, "Ka nau chungchang ah hian hriat loh tam tak i nei a, ka nau ngei pawh hian a la hrelo, chuthil hrilh ka duh vang che chuan a nia ka koh che" ka tih chuan min en run a, ka thaw chhuak ham ham.




Matei fahrah in a a rawn awm dan chanchin te chu ka hrilh a, mak a tih hmel hle, mahse engmah min zawt lo, "Ka ring tawk che a, chuvang chu a nia ka hrilh che, ka nau hian i lakah rin na a nghat dawn a, hethil hi a hriat chhuah hunah chuan a rilru na hnem turin a bulah i awm tlat dawn a nia, keichuan engmah ka ti thei dawn silo" ka ti tham chhal a, "Enge i sawi awmzia, Tluangi i nau nen kan in neih hunah pawh kan bulah i awm dawn alawm, Duati tan i hlu em em a, keipawh hian ka farnu ang chiah in ka en bawk che" a ti a.




"Ka hria alawm, mahse hun tam ka nei tawh lo a ni" thinlung rum vawng vawng chung chuan ka ti a, "Enge i sawi awmzia? a ti haw, "Ka natna chu i hriat tawh kha, mahse a kimchang in i la hriat ka ring lo, keihi pumpui cancer ka ni" ka thusawi chuan a thawng tih hriat zetin min en tlawk tlawk a, "Doctor leh keimah bak in kan la hrelo, ka nau phei chuan hrelo se ka duh" ka ti leh sap a, chutah thaw chhuak hawk chungin hmai a tuai puat a.




"Engtin nilo, enkawl na I dawn vat a ngai a nihchu, lungngai suh ka theihtawp ka chhuah ang, doctor tha ber ber ka lo zawng dawn nia" lu ka thing a, "Awmzia a awm tawh lo, ka pumpui cancer hian ka taksa dang pawn a khawih nual tawh a, a chang chuan ka pum na lutuk hi ka thi mai dawn emaw ka ti hial thin, ka nau ka ngaihtuah avangin tih lan a rem silo" ka ti a, a ngaihtuah na chu a buai hmel hle.




"Duati hnenah chuan i sawi ngei a ngai zawk a nihchu, hetiang thil lian tham hi a lakah i zep theilo ang" a tih chuan "Nilo, a hre tur a nilp, khawngaihin min zep sak ang che, ka rin tawk vang che leh ka kalsan hunah pawh lo thlamuan la ka duh vanga hrilh che ka ni, ka natna hi a hria a nih chuan a keh chhe vek mai ang, chuthil chu hmuh ka duh lo, keimah vanga a na lai hmel hmuh ka duh lo, keichu a ni tel in ka hun tawp lam ka hnaih tial tial a, ka nau erawh in hmin a chhiar sen loh dawng se ka duh" ka ti leh nghal zung zung a.


Zawmna



"Ka awm loh hnuah pawh a tan awm reng turin ka duh che, fahrah in atanga sei lian a nih avang hian in rin tawk loh na tam tak a nei a, chuchu nangpawh hian i hriat hmaih bik in ka ringlo, midang aia hniam bik ni a a in ngaih na te hi a diklo tih hmuh tir ngei tur che in ka duh che a ni, doctor in a rei ber ah thlaruk bak dam na chance ka neih tawh loh thu a sawi a, thih hi ka hreh lo, mahse ka nau kalsan hi ka hreh takzet a ni" a tawp lam chu a zuih ral ti tih a, ka thusawi zawng zawng kha ka thinlung taka sawi ka ni.




"Ka natna ka hriat chhuah tirh khan keimah lam ai mahin Matei hi ka ngaihtuah na a nasa zawk, a ni chuan dam lam ka pan zel turah a ngai a, a hlim hmel ka hmuh khan ka natna hrilh a na taka siam leh ka duh tawh loh vangin ka zep a ni a, ka thih thleng pawh in ka natna hi hre chhuak lo turin ka duh, a ni chuan hmalam hun tamtak a la nei a, a hmalam hunah chuan hlim na chauh in lo hmuak se ka duh, a tan thil ropui tih sak thei lo mahila ka thih hnu thleng pawh in ka hmangaih na a dai ngai lovang" ka ti leh sep sep a.




Mike-a chuan ngawi rengin min lo ngaithla a, a melh ngai melh reng mahse ka thusawi chu uluk takin a ngaithla tih erawh ka hria, aa tur ah kha chuan ka hlauthawng deuh a, Matei hi a fiam kual mai mai anga na takin a kalsan leh mai ang tih kha ka thil hlauh ber a ni, mahse ka hrechiang telh telh a, a rintlak zia leh ka nau a hmangaih na a mitmeng ah ka hmuh theih avangin ka thih hunah pawh a kutah ka nau hi ngaih ngam takin ka dah thei ngei ang.




"Ka thusawi kha min ngaih pawimawh sak hram ka beisei, ka nau hian a la mamawh dawn chauh che, i hrethiam tiraw, ka awm loh hunah pawh a tan lo awm tlat a, a lungngaih na leh a mangan naah te lo hnem thin tur che in ka ngen che a ni, a chhan chu a tah huna a mittui hruk sak turin a bulah ka awm tawh dawn silo a" hnuk ulh teuh chung chuan ka ti leh a, "Tluangi ka theihtawp ka chhuah ang tih ka tiam a che, lungngai suh, i nau hi eng dinhmun ah pawh ding se a a bulah ka ding tlat ang" a aw ah chuan a ti mai mai loh zia chiang takin ka hre thei, ka thla a muang huai mai.




"Ka lawm e, ka ti khaw tlai rei ta si che a, Matei'n a hmu lo che a nih chuan mak a ti lutuk ange, i duh chuan va kal tawh rawh, chuan ka thusawi te kha ka nau henna hrilh lo tur che in ka ngen leh a che" ka ti nawn leh sap a, "Min ring rawh, i duh ang ngei in ka ka atang hian vawin a i thusawi zawng zawng te hi a chhuan ngai lovang" tiin a ding chhuak a, kawngka thleng chuan ka va thlah a, "Doctor ka lo zawng ang, enkawl na tha tak tak i dawng a nih chuan i natna pawh hian dam lam a pan maithei a sin" nui sak in lu ka bu nghal a, awmzia a awm tawh dawn chuanglo tih erawh ka hre chiang hle thung.



Mike Lalruattluanga POV




Duati u thusawi te chuan min ti zawi ve hnawk thei, ka hriat sual emaw ka la ti zawk hial, ka thisen zawm pui pawh nilo natna ka hriat vangin hetiang tak hian min deng na ang tih ka ring ngailo, Tluangi hi Nautei u a nih vangin ka zah a, ka ngaina ve em em bawk, ka hmeichhe hmangaih tuam hlawm tu a nih vangin ka tan pawh hian a pawimawh em em a, ka farnu ang chiah in ka en ka tih pawh kha ka sawi mai mai lo bawk, a hrisel lo tih chu tupawn kan hria a, mahse khatiang natna rapthlak tak kha a nei ang tih tuman kan ring pha hauh lo.




Engtinge khatiang natna a nei tih hre reng chung khan hlim hmel pu sang chunga mi a la biak theih zawk pawh ka hrelo, ka hriat chhuah thar tak chu Duati te unau in hmangaih na hi mihring sawifiah thiam phak bak in a chak a ni tih hi, Hotel lam ka pan lai pawh chuan Tluangi thu min hrilh ringawt chu ka ngaihtuah ngut ngut a, ka thaw chhuak leh hawk thin, hmeichhe chak tak chu a va ni chiang em, amah chuan in a natna kha a hria a, a na rawn chhuah chang a a nat tur zia ngaihtuah phei chuan engtinge midang mit hmuh ah na tuar lo ang mai a a awm theih zawk ni.




Ka office chhung a ka luh rual chuan Duati lehkha lo ti fel mawlh mawlh chu ka hmu nghal a, a ni pawh lainat na in ka khat, ngawi rengin ka en reng a, ka awm ve tih a la hre hauh lo, a rawn in her a, min hmuh thut chuan a phu zawk mai, "I lo luh kai ka hre miah lova, ngatinge thawm nei miah lova i rawn luh a?" A ti sap a, ka chhang lo, ngawi rengin ka en ngawih ngawih a, "I rawn kal tlai bawk sia, thawh i hai zawk nge?" A lehkha kem siam rem pah chuan a tih zawm leh a, ka la chhang chuang lo, ka dawhkan ah chuan lehkha chu dah in min rawn pan hnai a.




Ka hmaah chuan rawn ding in chik zetin min en chung hian "Thil diklo thleng a wm em ni, tinge i hmel a va diklo ve, i chauh hmel lutuk a nia, i damlo zawk nge?" Tiin dingdihhlip ak ak chung chuan ka chal a rawn dek a, a kut chu lo dawn hnan in ka taksa si chet chuan pawt hnai in ka kuah nghal vang vang a, "I awmdan a va mak ve, thol thalo thleng a awm a ni?" Ka hnungah rawn beng ve thek thek pah chuan a ti leh a, "Engmah a awmlo ka ngai che a, chuzawng chu" ti sup in a nghawng ah chuan hmai ka phum tha sauh sauh a.




Chutah nui hak chung chuan "Min ti hlauthawng alawm, thil thalo thleng a awm emaw ka ti hman a, nizan i mu ṭhalo a mi?" A tih leh chuan ka pawt hrang deuh hlek a, "Ka ngaih vang che in ka mu theilo mawle, vawin chu min duat viau a ngai ang" nui lui suk chunga ka tih chuan a ner nang a, "I va han over tak, kei ai kum 10 dawn in i upa, panchang rual pawh i ni tawh lo" tiin a nui leh hak hak a, he a nui hmel mawi tak hi engtik ah emaw chuan lungngaih na nasa takin a rawn thlak dawn si a.




"I awmdan hi a mak riau, tinge thil diklo a awm em ni, i rawn thlen atangin I la tawng vak miah lo a nia" file check tur keng reng chung chuan ka hmaah a rawn ding a, "Ka tha, engmah diklo a awm lo, nizan ka mu thalo bawk nen ka chau ve deuh mai mai a nih hi" ka tih chuan chiang takin min en a, "I rilru a hah hmel em a chuvang mawle, taka ka u chuan hmuh che a duh thu a sawi a, in in hmuh hunah i ngaihdan loh deuh a thil a sawi a nih pawn i hrethiam hram hram dawn nia a, min ngaihtuah vang a ni dawn a, a ngaihdan lo anga i awm chuan kan in neih a phal dawn miah lo a nia" fiamthu deuh chuan a rawn ti leh a.




Kan in hmu tawh tih sawi lan chi ni hek lo le ka bu nghut ringawt a, "Duati vawin chu i duh chuan i haw hma dawn nia aw, chhuah na tur pawimawh ka la nei a, Arina'n a thlah ang che" chawhnu lam dar 3 a rik chuan ka ti a, "A ngai kher lo, bus emaw taxi pawn ka haw thei alawm" a tih chuan ka nui a, "Buai na tur a awm lo, thlah tur che chuan ka lo ti ang" ka tih leh chuan min hnial tawh bik lo.




Duati kal hnu chuan ka pa thianpa chu ka call nghal a, a lo la vat, "Pa Hmun doctor tha tak hmelhriat i nei em?" ka va ti nghal tawp, "Eng doctor nge i hmuh duh, that loh na i nei em ni?" a rawn ti vat a, "Nilo e, ka hmelhriat pakhat hi pumpui cancer a ni a, a stage a sang tawh bawk nen enkawl na tha tak dawng se ka duh, khawngaih in min lo ngaituah sak thei angem?" ka ti leh vat a, "A va zialo ve mawle, karleh lamah hian Dr. Hriatpuia a lo let tawh dawn a, a ni hi a thiam khawp a sin, in in hmuh theih nan hma ka lo la dawn a nia" a tih takah chuan lawmthu ka sawi nghal sup a.




Hna atang chuan keipawh chu ka haw hma a, in ka thlen hnu reilote ah ka pa nen kan in bia a, karleh lamah an lo kal tawh dawn bawk nen a rang lama hmalak vat ka duh, Duati u hetiang a ni si a, a taksa chak that deuh lai a in neih na hman ka duh vang a ni pakhat, "Ka pa, karleh ah palai tirh ka duh a ni" ka tih chuan a rawn nui deuh hawk hawk a, "I va hmanhmawh ve mawle, Grace-i khan a bual a zo tawh che chu a nihkha" a tih chuan ka nui suk a.




Tluangi bulah khan tuma hnenah a natna chungchang ka hrilh loh tur thu ka in tiam tawh a, min rin ngam avanga min hrilh a nih na ang takin ka mi rin ber ka pa hnenah pawh hrilh ka tum lo, chutih rual erawh in sawi chhuah loh theih loh hun a la awm ngei in ka ring, Tluangi dam theih nan ka theihtawp ka chhuah bawk ang, mihring lam atang chuan tih theih tlem te bak kan neilo tih ka hrechiang a, Pathian hnenah a dan leh theih na turin ka dil sak fo bawk ang tiin ka in tiam a.

Cont....

Hla ka zir dawn a, ban ah chapter thar ka type ang aw, a tlai ta viau dawn a nihchuan zawm tur tal in ka lo dah ang...

[Rebec Nunziri]

Chapter-14



Grace Lalthazuali POV



Vawin tlai lamah ka u nen Mike-a te in ah chaw kan ei dawn a, a hma khan keichuan ka ei tawh bawk nen ka huphurh ru hle, Pa Tluanga leh Nghaktei chu hmuh hreh na em em ka neilo, Nu Hlutei ber hi ka hmu hreh, a fapa bialnu atan pawh min duh loh laia a mo tur atan phei chuan min duh dawn lo lutuk tih ka chiang miau, keimah chiah in kal dawn ila chu a zia deuh tur a nia, mahse ka u a rawn kal tel ve dawn a, Nu Hlutei'n min hmuh hniam zia a hriat chuan a rilru a na dawn lutuk tlat.




"In hman tawh chuan ka rawn lam ang cheu aw, ka lo chhuak dawn chiah" Mike-a chuan phone in min rawn bia a, "A.. keimah ni pawn kan rawn kal thei reng alawm" ka ti sap, kal ka phur hlawl lo, ka aw ah chuan ka lo ti lang deuh aniang "Kan in a rawn kal chu i hreh viau em ni?" a rawn ti sup a, "Chutiang lam pawh a nilo" ti ve mahila ka hreh zia chu a hriat hnuah hauh chuang lovang, "Ka hrethiam che alawm, Duati a hma ang khan thil a thleng tawh lovang, ka nu hnenah pawh chiang takin ka hrilh tawh" a dawn ti leh.




"A nih chuan lo thleng vat la, i chhungte in nghah tir reng chu a nuamlo, an zahawm" ka tih takah chuan call chu kan ti tawp a, "U Mike-a a lo kal mek a, a lo thlen hunah kan kal nghal mai dawn nia aw" pindan atanga chhuah pah chuan ka ti a, "Awle, thlen hma kha a pawilo, keini ai upa an ni si a, in nghah tir reng chu a ṭhalo alawm" a lo ti ve mai a, choka lamah kal in tui ka va in leh a, Mike-a lo thlen hun chu kan lo nghak a.




"A hnungah hian ka u nen kan thu mai ang aw" motor chhung a kan luh dawn chuan ka ti a, "Awle" ti sup in kan luh na turin kawngkhar chu min hawn sak thlap a, kawng lak ah chuan kan titi bawrh bawrh a, an in compound chhung a kan luh takah chuan ka zam na bawk chu a rawn thar leh a, Mike-a chuan chuchu hrethiam in ka kut ah a rawn vuan a, "Engkim a tha vek ang" ti sup chungin an in lam chu min pan pui a.




Ka kal hmasak ang tho in Nghaktei chuan kawngka min lo hawn sak a, a nui sang bawk, "In lo thlen hun kan lo nghak reng tawh cheu a, Grace i dam maw, heihi a mi i u chu, chibai le keihi Nghaktei ka nia, Mike-a nau hi" tiin ka u chu a in hmelhriat tir nghal zung zung a, a ni hi zawng a nelawm in a fel ve chiang alawm, ka u pawh chuan a hming a lo hrilh ve vat a, "Kei aiin i upa daih sia, U Tluang tiin ka ko mai ang che aw" a ti leh mawlh mawlh a, pawn ah chuan kan la ding reng bawk.




"Bawihi pawn lamah nilo in chhung ah in in kawm zawk dawn nia aw" a u in a tih takah chuan rang zetin a awm sawn a, "Kha in lo thleng thei maw, Grace-i hi nen hi chuan kan in hmu tawh a, a u i nih ka ring, keihi Mike-a pa Tluanga ka ni a, Pa Tluanga tiin min ko dawn a nia, a ni hi Mike-a nu Hlutei a ni" Pa Tluanga chuan a lo ti a, ka u pawh chuan a in hmelhriat tir ve a, Nu Hlutei chu a hma ang bawk in a thu ngawi leh ngar tawh a, keichu chiang zetin min en ran bawk.




Pa Tluanga chuan ka u chu a be mawlh mawlh a, a changin Mike-a leh Nghaktei chuan an lo tui hnih ve zeuh zel bawk, ka u hi naupang te a thil harsa tak tak lo paltlang ve tawh a ni bawk nen a kum phu loh hian a puitling a, Pa Tluanga nen pawh an titi dun thei viau, kei erawh hetiang lamah hian ka u ka chhin ve hauh lo thung a, puitling lam phei hi chu han biak lum lam dan vak ka hrelo, min biak a ka chhang tih loh chu biak hmasak dan tur vak ka hrelo.




"Bawiha lah hi a hmanhmawh mai si a, naktuk zan lamah hian palai rawn tirh rum rum mai a duh si a, a rang tut tut in ti em lovang chu maw?" Pa Tluanga'n ka u rawn pah deuh a a tih chuan "Tilo e, keini lam chu kan lo in ring tawh viau a nia, in hriat tawh tho chu ka ring a, keini unau chuan chhungte sawi tur hi kan nei lem lova, kan pahnih tawp hi kan ni mai a, mahse nu leh pa ang chiah a kan en Nu Mapuii te hian an fanu te ang chiah in min en bawk a, an ni thuthluk na chu kan ngaih pawimawh ve a ngai a" ka u chuan a ti va sap sap a.




"Tunlai nula tlangval ho hi chu in neih te hi an hmanhmawh lutuk a, in hriatchian tak tak hmaa in neih te hi an duh a, in nei hlen hi an vang a sin, Mike-a leh Grace-i te pawh an in zui na a la reilo tih chu kan hriat vek tawh hnu a nia, duh ai chuan in hmanhmawh deuh mah mah a ni" Nu Hlutei chuan a lo ti ve nghat nghat a, "Hlui lo ngawi rawh, kan fate hian enge an paltlang tawh chu kan hre vek, an in zui na a rei tawh emaw reilo pawh ni rawh se, an in hmangaih phawt chuan a tawk, fa hial an pai tawh a, tluang takin pai theilo mahse Grace-i hi kan thlah thlam dawn reng reng lo" Pa Tluanga chuan a lo ti nghut a.




A aw ah pawh chuan an nu thusawi dan chuan a ti lawm chiah lo tih a lang chiang ngang bawk, ka u pawh chu a ngawi reng a, ngaihdan chu a neih thiam tho chu ka ring, "Ni e, ka nu lo lungngai suh, i fapa hian enge a tih a hrechiang alawm, Grace-i hi hmangaih tak tak lo ila chuan nupui a neih ka duh hauh lovang, in nei hlen lo tih mai mai, an in hmangaih tawn loh vanga in nei hlen lo an ni tihna a nimai, Grace-i nen chuan kan in hmangaih na hi a chak viau a nia" Mike-a pawh chuan pangngai ang taka lang si khauh ru zet chuan a lo ti ve a.




Nu Hlutei chu a ngawi ta hmak a, Pa Tluanga chuan titi dang chu a rawn bawrh leh ta daih a, kan boruak rit ru deuh tak pawh chu a reh leh ta deuh, chaw kan ei lai pawh chuan kan unau a kan hriat nuam lo tur zawngin Nu Hlutei chu a tawng ta miah lova ka thaw huai mai, chaw kan ei kham chuan kan thu khawm leh te te phawt a, Mike-an ka u chu a fal a biak a duh thu a sawi vangin in hnung lamah chuan an kal a.




Pa Tluanga pawh chu a pum nawm loh thu sawi in bathroom ah a lut a, Nu Hlutei leh Nghaktei te nen chauh chuan kan awm tawh, Nghaktei a awm ve vang chuan ka zam em em bik lo, "Mami ka damdawi room ah khan ka dah a, min va lak lawk mai teh, chaw ei kham a ei tur a ni bawk sia" tiin Nu Hlutei chuan Nghaktei chu a tir a, Nghaktei pawh chu a kalsawn ve vat, Nu Hlutei nen chiah a kan awm takah erawh ka tang leh tung tawh mai.




"Ka fapa nen hian lo in nei ta pawh ni ila ka mo atan ka pawm ngai dawn lo che tih chi i hria ang chu tiraw?" a ti nghat a, ka chhang lo, "Ka fapa hi then tur in ka hrilh chiang viau tawh che khan ka hria a, sum chu I lo duh ve ngat ngat hle mai" a tih leh erawh chuan "Min ngaihdan hi a diklo a ni, Mike-a hi sum vanga kalsan lo ka nilo, ka kalsan loh chhan chu ka hmangaih vang zawk a ni" ka ti ve ta sep a, ka thusawi chu rin loh hmel hle mahse dawt ka sawi miau lo.




"Chiang takin ka sawi tawh kha, nangni ang hmeichhia hi chuan min bum mai mai lovang, engvanga ka fapa hi kalsan duh miah lo nge i nih, pawisa I duh chuan ka pe ang che ka ti a nilawm ni?" A ti leh fak a, midangin a tawng an hre pha ang tih hlau ni awm tak chuan a tawng zawi hle thung, "I fapa hi sum vangin kalsan theilo ni ila pawisa min pe dawn tih I sawi rual khan ka kalsan daih tawh ang Nu Hlute, ka kalsan thei loh na chhan zawk chu ka hmangaih vang a ni" ka ti leh sap a.




"I huaisen hle mai, a tha alawm, ka fapa chu pasal ah i nei ngei ang, mahse ka mo chu i ni ngai lovang, nang ang hmeichhia engmah nilo hi ka mo atan i tling lo" a tih leh chuan ka ngawi reng a, ka rilru erawh thlak ka tum lo, Mike-a khan chiang chiang takin min hrilh tawh, Hriazuali nen an in be fo a, Nu Hlutei'n min ngainat loh em em chhan pawh hi Hriatzuali'n ka chungchang eng eng emaw dawt hmangin a lo sawi a nih ka ring, engpawh nise a mo atan min pawm lo pawh a ni mahna ka bei anga a fapa hi hmangaih na diktak in ka hmangaih tih a hriat hunah erawh a mo atan min la pawm ve ngei ngei in ka ring.




"Nang ang fa pawh nei thei tawh lo mathei lehnghal, i dinhmun i hriatchian em em hnuah pawh ka fapa hi neih I la tum a nia, fa i hrin sak theilo a nih chuan tun ang reng hian i lakah that a chhuah dawn lo tih pawh i hriatthiam ve tho ka ring" tiin a nui a, hna chhan mai ngaih na pawh ka hrelo, a sawi chu thil thleng thei a ni miau, "Nu i damdawi chu ka hmu lo, khawiah nge i dah a?" Nghaktei pindan atanga rawn chhuak in a ti lang lang takah chuan Nu Hlutei chu a tho chhuak vat a.




"Grace thil diklo a thleng a mi, tinge i hmai te chu a va dang ve" ka bula rawn thut thlak pah in Nghaktei chuan a rawn ti a, "Chutiang engmah a awm lo, ka mut a chhuak deuh a, chuvang aniang" ka ti mai a, min la en chik ngang mai, "Thudik tak i sawi maw, ka nu khan tawngkam a nei leh tawh em ni?" a ni pawh hi a u ang chiah a bum harsa a nih hi, ka nui a, "Engmah chutiang a sawi lo, ka mut a chhuak tawh tak tak alawm" ka ti leh mai a.




"Tunah dar 7 pawh a la ri lo a, i mut a va chhuak hma ve, aa.. ka dil chhut lutuk thin a, min hrethiam dawn nia" tiin thil dang chu min awi pui leh daih a, nuam pawh ka ti tawh lo, Nu Hlutei sawi ang tak tak khan Mike-a hi fa hrin sak theilo ta ila keihi kin hmangaih reng thei angem, ka bulah a awm reng duh angem, chuthil ngaihtuah chuan ka rilru a buai ru khawp mai, Nghaktei min biak na te chu chhan na chang ka hrelo leh thin a, ka ngaihtuah na ka kawm nasat vang a ni pakhat.




"U in va rawn let har ve, Nghaktei hi a mut a chhuak tawh lutuk a" Mike-a leh ka u an rawn rual chuan Nghaktei'n a lo ti vat a, Pa Tluanga te nupa pawh sitting room lamah an rawn lut chiah bawk, "Ka thlah haw tawh ang cheu, vawin lamah kan buai deuh bawk nen I chau a nihkha" Mike-a chuan a ti sup a, ka lo hnial lo chiang a sin, "Pa Tluang kan va haw ange, remchang ah kan in lamah te pawh in rawn la leng ve dawn ania" ka u chuan Pa Tluanga te nupa bulah chuan a ti a.



Zawmna



"I chhungte chu an fel khawp mai" kan in lam kan pan lai chuan Mike-a hnenah ka u chuan a ti a, "Ka nau kha kan chhungkua ah chuan tawng duh ber a nia, ka pa nen hi chuan kan tawng tlem khawp mai, ka nu tawngkam kha i hriatthiam hram ka beisei" Mike-a chuan a ti sup a, "A ho lutuk, ka hrethiam lutuk alawm" ka u chuan a ti a, keichu ngawi rengin ka thu a, Nu Hlutei thusawi kha ka rilru ah a awm reng bawk.




"I nau hi kan be kawi lawk ange aw" Ka u chhuah hnu chuan a ti sup a, Mike-a chu motor hnunglam ah a rawn lut a, "I awmdan a diklo riau, ka hriat loh hlan in ka nu in i tan hriat nuam lo a sawi em ni?" a tih chuan ka nui a, "Chutiang engmah a awm lo, mahse Mike" zawh chi a ni em tih ka ngaihtuah leh phawt a, "Sawi duh i neih chuan sawi tawh, ka lakah engmah zel neilo la ka duh, rilru buaina emaw i neih pawh in kan pahnih in kan paltlang mai dawn alawm" a ti a.




"Nau hi lo pai ta lo ila nang hian min kalsan mai angem, fa i awt ve ngei awm sia, mahse ka pe theilo maithei che sia" ka tih chuan "Duati ka hmangaih che ka tih kha i thinlung takin i ring em?" ka bu zeuh a, "A nih chuan hlauhthawn na tur engmah i neilo, fa i nei thei emaw nei thillo pawh nila ka hmangaih na che hi a dai mai mai lovang, nangmah i nih chhung chu ka hmangaih reng ang che, ni e fa chu ka awt ngei alawm, Pathian in rem a tih chuan min la pe em em ang ka tihkha, ka hmangaih na che hi i ring tak tak a nih chuan engmah hlauhthawn tur i neilo" a ti leh sup a.




Tlem chuan ka ngaih a ngam ta deuh, "Awle, ka tihpalh khatiang thil ka zawh vang che khan" ka tih chuan a nui suk a, "Khatiang thu i sawi a ngailo, ka hrethiam che alawm, ka hmangaih che a, engmah hlauthawng tawh suh aw, tuman min then hrang ngai lovang tih ka tiam a che" a tih hnuah min rawn kuah vang vang a, ka thla a muang nghal em em mai ni, a thusawi zawng zawng te kha rinhlelh na pakhat mah ka neilo bawk.




Zaninah palai an rawn kal dawn avangin vawin chu hna pawh ka kal lo, Nu Mapuii te nupa in palai chu an lo chhawn dawn a, ka tan an in pek na ah hian ka lawm takzet a ni, palai an lo thlen chuan Asangi nen room ah kan tawm tlat a, chhuah ka zak deuh tlat, rei fe kan awm hnuah Nu Mapuii chuan min rawn ko chhuak a, "Thingpui leh a hmeh rawn sem ula, hei monu tur an hmuh chak thu an sawi bawk a nia, muang lovin rawn che zung zung ula aw" a rawn ti zung zung a, ka va huphurh tak e aw..




Tute nge rawn kal lah saw ka hre der silo a, Mike-a khan a patea a rawn kal tel ve tur thu kha a sawi a, ka la hmuh miau loh avangin tu ber nge pawh ka hrelo, choka lamah chuan lut hmasa in thingpui chu kan thli chhuak zung zung a, "Ka chhuak huphurh e, ka che chhia ang tih te ka hlau" Asangi bulah chuan ka ti sap a, "Keipawh ka lo huphurh ve em em ringawt, keimah vanga rawn kal pawh an ni tawp silo a, engpawh nise i thil ken lai kha vuan nghet hle la nimai" a ti a.




"A ni hi maw kan monu tur chu, a va han hmeltha ve, kan fapa lo hmanhmawh em em chhan pawh kha a hriatthiam nghal theih, Bawihi keihi Mike-a patea ka ni a, nakin lawk ah chuan i patea ka ni ve tawh dawn tihna a nih chu" ti tu chu ka en a, Pa Tluanga nen pawh an in ang deuh reuh alawm, an vaiin pali an rawn kal a, Asangi nen chuan thutthleng pakhat ah kan thu ve ran a, a thusawi lai te chuan Asangi chu ka va sik leh zeuh zel bawk.




"Mike-a lah khan in neih ni ruat fel nghal law law rawh u, ka hmanhmawh a ti chul mai a, in lung nilo em lovang chu maw?" keini lam zai ngai tak chung chuan Mike-a patea chuan a ti a, "E.. lung nih loh na chhan tur a awm reng reng lo, in hmangaih na na na te chu awmdun vat pawh an chak tawh bawk ang chu" Pa Nuna (Asangi pa hming hi ka ti sual nih chuan min hrethiam dawn nia) chuan a lo ti sup a, in neih ni pawh chu an duat fel nghal law law dawn a nih hmel e.




"Dan khat na an tlin tawh lo tih chu kan hre vek tho na chungin in neih na hi chu a ropui hrim hrim a, dan khat na a ni emaw engpawh chu nise ropui thei ang berin kan ti ang chu" an ti leh a, puitling tual titi naa lo awm ve reng chu sawi tur vang duh tak a ni, kei phei chu an lo kal chhan zawng zawng nen ka awmdan a lai chhe zo vek, Asangi lah chuan midang hriat tham lovin ka beng bulah a rawn phun leh ser ser zel bawk si.




"Ni e, kan theihtawp kan chhuah tlang dawn a nia, in neih ni atan chuan thlaleh ni 21 khi tin zawn ila enge in ngaihdan, tunah thla lai hawl kan thleng tawh a, in tin tuah nge a ngai dawn si a" Pa Nuna'n a tih chuan "E.. a lawmawm khawp ang chu, keini lamah chuan sawisel na tur kan neilo, chutih rual erawh in a in nei ber tur a te hian hla an lo ti lutuk ang tih erawh ka hlau ru khawp mai" Mike-a patea'n a tih chu an nui dar dar a, nuih pawh ka nui ngam ve lo, ka zak em em mai ni.




"Grace nangin hla i ti em, Mike-a chuan hla a ti dawn tih ka chiang a, mahse in nieh hi tih mai mai a nilo a, thil tih ngai tam tak a awm bawk si a" a tih leh chuan "Tilo e, in remruat na ang ang kha keichuan ka pawm vek" ka ti sap, Asangi nghal fal lah chuan "Hla i tih em kha aw, enge dawt I sawi kher a?" a rawn ti leh sar sar a, "I ninawm lo ngawi mai mai rawh, midangin an lo hria ange" ka ti sep a, amah chuan a nui deuh kar kar a.




Palai te an haw hnu chuan ka hahdam deuh huai mai, "Kha Mike-a patea pawh a fel hmel kha mawle, Grace-i chu i vannei dawn khawp mai, engpawh chu nise tun atanga kan lo in ruahman ve deuh a ngai dawn a nihkha" Pa Nuna'n a ti a, "Ka kut hi en rawh, i sih pilh a nih hi" tih pahin Asangi chuan ka hmai zawn ah a kut chu a rawn lek a, "Enge i lo nghal viau ni, i chan tawk a nihkha" ti hmak in no ruak chu ka seng nghal a.




Zanin chu Asangi te inah kan riah dawn avangin in lamah kan haw leh kher tawh lova, ka u nen chhuat ah kan mu mai ang kan tih lahin Nu Mapuii te nupa chuan an lo phal lo nasa mai, "Bawihi khum ah hian Tluangi nang mu rawh, an ni hi chu chhuat ah an mi thei" Nu Mapuii chuan a ti a, kan hnial hran lo, sitting room ah chuan mut na kan phah a, mahse kan la muhil mai chuang lo, "Awi.. a mak e, pasal i nei ve mai dawn chu a nia" a ti leh thin a.




"Nangpawn i la nei dawn alawm, enge a mak vak na, kan upa tawh a" ka tih chuan min ngei hmel zetin min en a, "Kan in rual chiah pasal neih dawn avang maia han in lak upat, ka ei thlawt lo" a tih chuan ka nui a, "Tak tak in nupa hlim tak ni ula ka duh, ka thinanu i nih mai bakah ka unaunu ang maiin ka en che a, i hlim loh hi ka hlau a nia, Sir Mike-a nen in in neih hunah a duat loh vaih che chuan min hrilh zel ang che" pangngai zawk chuan a ti a.




"Engtinge i tih vak chuang anga, i boss a ni sia, i hau ngam dawn a mi?" tiin ka lo fiam a, "Tehreng mai, ka boss pawh nise ka thiannu i nia a nupui i ni dawn bawk a, min tlawn viau a ngai ang" a tih chuan kan nui duh leh hak hak a, "Nang enge in chanchin?" a bialpa nen a an chanchin hi ka hre ngai vak lo, ka hun tawn zawng zawng nen zawh na chang ka lo hre ngailo bawk nen, min chhan hma chuan a thaw deuh hak a.




"Kan in then tawh alawm, hrilh che ka tum a, mahse a rem teh teuh thin lo bawk nen ka hrilh lo che a nihkha" a tih chuan mak ka ti hle, an in kawp rem ve viau khan ka hre sia, "Ngatinge?" ka tih chuan nui hak in "Min lo kawp reng alawm, a phone ka khawih sak a, ka man chhuak a, in sawifiah tum nasa viau mahse ka ring thei tawh miau silo a, in then ka duh thu ka sawi a" a ti a, pawi ka tih pui hle, a duh ve hle si a.




"Mipa mawl tak a nihchu, nang ang hmeichhe tha lutuk a chan che chu a nia" ka tih chuan "Dik chiah min chan ropui khawp mai, keichuan min bum tu min duh ve tak tak lo tu ka chan a, a ni thung chuan amah duh em em min chan chu a nia, chan rau rau ah kan in chan ropui hleih e" thawveng chi a ni bawk a, a tuar na hle dawn tih hre mahila a ti lang duh hauh lo, kei ni ta ila amah ang hian ka awm theih pawh ka ring lo, hei tak hi Asangi nun a ka awh ruk em em a ni bawk.


...


Nui deuh put put chungin laptop chu ka khawih mawlh mawlh a, Mike-a a thut na a tum bur a thu reng chu ka melh leh zeuh zel bawk, in neih ni kha hla a tih thu a sawi reng a, eng ang pawn lungawi lo mahse tih ngaih na vak a awm tawh silo, ka chungah a la lungawi lo daih zui a, ka duh thu a ka ruat pawh ni tawp silo, a lungawi loh tih hre reng mahila ka haider tlat a, ka thlem phut hmel zet chuan min rawn en eh thin tih pawh ka hriat hmaih lo.




"Lalthazuali ka lungawi lo tih hi hrelo nge i hrelo der zawk?" a rawn tih hmuk chuan ka en vat a, a la tum lian hle, "I mak, tih ngaih na vak a awm tawh chuang hleinem mawle, hrim hrim in in buatsaih nan pawh hun a duh ve dawn a, hrethiam ve ta che, naupang chhia ang mai khan tum bur bur tawh suh, puitling tawh si, zah te pawh zak ve ta che, khatiang a i awm lai kha midangin an hmuh te i hlau lo a mi?" ka ti leh erh a.




A mipa zawk si hi thlem a ngai reng mai, ka hrechiang ve thawkhat tawh bawk a, thlem ai chuan hetiang hian ti let zek ila a lungawi hma zawk tih ka hre ve kar, "A hla mah mah alawm, enge in buatsaih vak ngai, thlakhat dawn lai in buatsaih a ngaih na ka hrelo" a ti leh hmuk, mite lah hi hnial dan a hre rapthlak mai si a, "I tawngthei, in neih hi i ngaih ang ngawt a awlsam a ni hleinem, mipa ka hriat tawh ah chuan i la phun peih ber" in siam chhe vak pah chuan ka ti leh kher a.




"Khatiang pawh khan min en suh, dawt ka sawi miau hleinem, Mike Lalruattluanga ni tawh lovin Mike Lalphunchhiara ni tawh zawk la i in hmeh daih zawk ang" ka ti leh chiah chu a thut na atangin a ding chhuak rang a sin aw, "In neih pawh chu i va hmanhmawh lo bik ve, min neih i peih vak lo tihna a ni em?" heihamm.. Hepa hi a, eng ngaihdan nge maw a neih leh tawh hi, "I ninawm, in neih duh lo ila i sawm na pawh ka hnar ang chu, palian pui si, rilru te lutuk mai" ka ti leh a.




Hetiang reng a nih chuan kan in neih hnuah pawh kan in hnial nasa thei ngawt in ka ring, a chang chuan a hmaa Mike-a kha ka ngai vawng vawng zel, ka thusawi ang apiang kha ho te pawh nise min ngaihthlak sak a, sawi buai pawh a nei ngailo, tunah min ngaihthlak sak duh tawh lo tihna i lovin min hnial hi a ching tan a, a tawp ah phei chuan tu emaw zawk zawk kan thinrim ziah, a mizia in thlak danglam ta lutuk hi mak tih chang ka nei fo mai.




"Khatiang khan min en suh, i file eng ang pawn hmanhmawh mahla in neih ni an riat fel vek tawh, tih ngaihna a awm tawh chuang lo, chuvang chuan in hnial reng lo ang" tha tak chuan ka ti leh a, engmah a sawi tawh biklo, a la lungawi chiah lo tih erawh a hmel ah ka hmuh hmaih lo bawk, chhin thil ei a hun dawn thleng chuan kan la in be miah lo, ka thiltih lai chu ka khawih tui em em lehnghal, ka ril chu tam tawh viau mahse tih zawh law law ka duh tlat.




"Duati thil ei tawh ila, i ril a la tam lo a mi?" engtik laiin nge ka dawhkan hmaah a rawn din pawh ka hrelo, "Eitur min lo chah kep mai rawh, heihi kan ti zo lawk ang" tiin laptop bawk chu ka en chhunzawm leh a, "I la lungawi lo a mi, ka tihpalh a nihkha, khatiang thil kha ka sawi tawh lovang, in neih vat vat ka duh vang a nia" a rawn ti leh sup a, ka lungawi lo turah a lo ngai a ni ngei ang, "Ka lungawi lo reng reng lo, ka thil khawih lai hi a laklawh lutuk a, nakinah ka tih chhunzawm mai ang, eitur i la chah chuang lo bawk a, vawin chu pawn lamah ei ve tawh ang aw" nui suk in ka kut ah a rawn kai a, office atang chuan min chhuah pui nghal.

cont...

Zanin chu ka type zawh vek hnuah ka phone hi ka thlauh palh hlauh mai a, ka type sa a bo mai bakah ka phone screen hi a keh nasa deuh a, type that leh nen ka phone a muang sual bawk sia, duh angin ka type rang theilo a ni e, a tawi phah deuh bawk

[Rebec Nunziri]

Chapter-15



Grace Lalthazuali POV



Thil kan kal ei zawh chuan hotel lamah kan let lehnghal a, hnathawk te hian kan in ngaizawng tih chu an hre vek tawh, mahse kan in nei dawn tih erawh kan la sawi lang lo thung, nizan ah palai an rawn kal fel chauh a, karleh hi Mike-a pa birthday a ni bawk nen hotel ah lawm an rel a, chuta puan chhuah chauh chu kan tum a ni, kei tak pawh hian midang hriat a sawi lan vat hi ka duh lem lo bawk a, engtin tak nge min sawi leh dawn ka hre bawk silo.




"Duati engtik ah nge mo kawr en i tih deuh?" Mike-a chuan a rawn ti sup a, "Ka hre biklo, hun kan la nei tam tho sia, ka la hmanhmawh vak lo" ka tih chuan "I duhzawng tak i hmu nghal lo maithei a, en hma kha a pawi na a awm lo, ka lo kal ve dawn bawk a, i duhzawng tak kan thlang dawn nia" a ti leh a, changkang lutuk pawh tih hran ka tum lo, bakah hawh man a to bawk si, nalh lam ai mahin a tlawm lam en ka duh zawk.




"Design han duh em em pawh ka nei hran lova, simple deuh a nimai" ka tih chuan "Pawisa ah chuan buai lo la, ka awm a, engkim ka ti fel vek ang" ka ngaihtuah na hria ni awm tak hian a rawn ti a, "Pawisa lam pawh a nilo, dan khat na pawh a ni dawn chuang lova, chuvang zawk chu alawm" ka thusawi chu a awih hmel reh chiam lo na in engmah min zawh belh chuang lo.




Mike-an mo kawr en hma a pawilo a ti bawk a, a tuk lamah chuan mo kawr en tur chuan kan kal a, Asangi a rawn kal ve bawk, dawr chhung a kan luh chuan min lo duhsak khawp mai, a thawk a te an fel bawk a, min en kual pui zung zung a, a hmun han thlen takah chuan ka mit la deuh deuh pawh an awm nuk mai, hawh man ka zawh chuan a to theih em avangin tlem a tlawm deuh ho chu min en pui turin ka ti ta zawk a.




"Mike, Enteh heihi a nalh i ti em, ka ha va chhin ang aw" tiin kawr pakhat chu ka khai a, a en vang vang hnuah nalh a ti vak lo nge, "Khakha nalh i ti takzet amaw?" A rawn ti sup a, "Aw.. a nalh em hi, nalh i ti chiah lo a mi?" Ka tih chuan lu a thing leh lawi a, diktak chuan nalh ka ti bik em em lo, mahse hawh man a tlawm a, mo kawr pawh a ang chiah lo, kawrfual var pangngai tawp a ang ber.




In thlak na room ah ka luh rual chuan Asangi a rawn lut ve nghal vat a, "Tinge hei ber kher hi i thlan a, a nalh i ti tak tak a mi, engtin mah a in chei bawk silo a, kalh ka van ti chiah lo tak" a rawn ti nghal bawrh bawrh a, in neih naa hak atan chuan nalh a tilo ngang a nia nge, an em leh thin a a ner nang nang mai, a awm ve reng mai, kei thil nalh hrelo lutuk pawh hian nalh ka ti lo a nia, ka sa i tawh ang khan hawh man a tlawm vang chauh a thlang ka ni.




"Tawng ring suh, Mike-an a lo hria ange aw, hawh man a tlawm alawm, a dang te kha chu a to hlawm em kha, mo kawr hawh man atan khatiang zat in sen te chu a uiawm alawm, in sen na tur a la tam dawn bawk si" ka ti sep a, "Aw... Pasal hausa tak i nei dawn alawm le, amah pawh in sen a in huam em kha, a... Grace a dang thlang teh, heichu ka tuipui hlawl lo che, kan pi leh pu te hunlai a in neih naa an hak thin a ang" a ti leh thlawt a.




"In nei em pawh kan la nih loh hi mawle, enga mah hmaa a sum hmanpui nghal ka duh hleinem, kan unau tan a in seng nasa tawh si" ka tih chuan dik a ti ve tho aniang "A nihchuan khawi ha rawh, ka lo pui ang che" a ti ve ta nge nge a, ka hak zawh chuan darthlalang ah ka in en a, ka tawk chiah, han hak takah chuan a nalh lo em em hran biklo, ka hnunglam te chu ka en a, a dik thlap e, hak pawh a nuam viau bawk.




Trial room atanga kan chhuah chuan Mike-a hmaah ka va ding tharh a, "I in hmeh lutuk mahse kha ai kha chuan saw saw i in hmeh zawk ang" tiin kan luh tirh atanga ka mit la em em tu kawr chu a kawk a, "Saw chu hawh man a to alawm, heihi a tha tho a" ka tih chuan rawn tho chhuak in ka hmazawn ah tak chuan a rawn ding a, "Duati buai na tur a awm lo ka tihkha, i nalh tih ber thlang tawp mai rawh" tiin ka sam chu a rawn tuai thur zeuh a.




"Ka duh lo, pawisa te chu ka nei ve alawm, ka tlin tawk ang hi hawh ila ka duh zawk" ka ti ve tlat a, luhlul min tih hmel zetin min en run mai, "Ka pi, i pasal hual thusawi hi awih zawk rawh, nupui pasal kan neih ni hi kan damchhung zawng a kan ni ropui ber te zing a mi a ni a, duhthusam ngei kawr han hak te hi a hlu a nia" dawr nghaktu fel deuh chuan a lo ti a, "Grace pawm mai rawh" Asangi lah chuan a lo ti ru ve sar sar bawk a.




"A tha alawm" ka ti ta tawp, dawr nghaktu thusawi pawh kha a dik ve reng mai, phur takin kawr chu min rawn laksak a, chei na awm ve deuh mual mahse nasa lutuk erawh a nilo, a fual dan leh puk dan pawh nalh ka tih zawng tak a ni bawk, trial room ah bawk chuan ka lut leh a, ka hak zawh hnua darthlalang a ka in en chuan nalh ka in ti ve hle, ka kawng fel rat bawk chu a kang chiang hle bawk.




"Awi i in hmeh lutuk, Sir Mike-an a hmuh hunah che chuan a mit a tla hial maithei a ni" nui hak chungin Asangi chuan a ti a, ka in en nawn leh a, hetiang em em hian mo kawr in hmeh in tih hi ka neih tawh pawh ka ring lo, "Chhuak vat ang, Sir Mike-an a hmu chak tawh lutuk ang che" Asangi bawk chuan a rawn ti leh a, nichin kha chuan ka zam loh tehreng nen tunah ka zam leh em em a, ka chhuah hma chuan kan thaw chhuak ham ham phawt a.




Trial room atang chuan ka chhuak a, Mike-an min hmuh rual chuan min en char char a, engmah a sawi bawk silo nen min ti confi lo zo vek, "In hmeh min ti em?" Ka tih sup chuan nui suk chung hian " I in hmeh lutuk, kha ngei kha kan in neih ni ah chuan i ha dawn a nia" a tih takah chuan ka nui ta var var a, ka in thlak leh hnuah hawh man chu a chanve kan pe lawk a, kan in neih ni a hnaih hunah kan lam chauh dawn a ni.




Mo kawr kan en zawh hnu chuan restaurant lamah kan chawl leh a, ril a tam tawh bawk nen eitur pawh kan chah tam khawp mai, "Sir" Asangi chuan a ti a, "Asang, i thiannu pasal nimai tur ka ni bawk a, khatiang khan min ko lo la nuam ka tih zawk ka ring" Mike-a chuan a lo ti vat, "Awle, a nih Mike in neih ni kha hla I ti viau em?" a ti tha ve mai a, "Zep loh chuan ti e, ka duh dan tak phei chuan naktuk a in neih nghal rum rum mai a nia ka duh" Mike-an a lo tih uang chuan Asangi chu a nui vak vak a.




"Grace-i hian pasal min neih khalh ka ring ngailo ania, tunah lah pasal tur ka zawn ve mek laiin a ni chuan pasal a nei tawh dawn bik a, i thiante ah chhelo deuh an awm chuan min tihpui ve rawh aw" Asangi thusawi vang chuan Mike-a chu a nuih a zat hmel khawp mai, "Tehreng mai, kan zawng ang" an in nel ve tawh khawp mai, Mike-a mizia in thlak danglam nasat lutuk hi a chang chuan mak ka la ti lek lek thin, kan in hriat tirh nen kha chuan a mizia chu in ang tawh lo tak a ni.




"Oh.. nangni chu enge hetah te in tih ve a?" ti tu aw chu Hriatzuali a ni, ka hmuh loh na a rei ve tawh khawp mai, kan dawhkan sir ah chuan a rawn ding a, a chhelo leh pek hle, "Kan ril a tam a, in hnawh puar turin kan kal a nih hi" Mike-an chhan a tum loh hmel em avang chuan ka lo ti a, "A nih chu, keini thian ho pawh thil eitur tho in kan lo kal a, Mike, an ni hi i la hria em, ka thiante, Shillong a ka zir pui thin te kha an nia, min hmu tura i rawn kal thin lai pawh khan in in hmuh ve fo kha" tawngkam mei nei tak a hman ka ring reng a ni.




Mike-a chuan a en thuak in a chhang lem hlei lova, a thiante chu ka en kual a, min lo en ve reng mai, "Mike-a chu Hriatzuali nen in in then tih kan hriat khan mak kan ti a sin aw, in in zui lai kha chuan Shillong ah pawh a mah hmu turin i rawn kal vang vang thin kha a nia" Hriatzuali thiannu chuan a ti a, "Em.. khatiang te chu hun kal vek tawh a nihkha, heihi Grace-i a nih hi, Mike-a bialnu thar, Mike-a hotel ah hian a thawk a, chuta tanga in hria chu" Hriatzuali bawk chuan a ti leh zung zung a.




A thian pahnih te chuan min en thuak a, min la ngaih nep hmel em em zui, engah mah ka ngai lem hlei lova, "Hotel a thawk maw, Mike i hmeichhe duhzawng I lo thlak tawh a nimaw, mahse an sawi fo thin jba hmangaih hmasa ber hi chu theihnghilh an har an tih thin kha mawle" Hriazuali thiannu bawk chuan tiin an nui har har hlawm a, an thusawi te hi ka engah mah a thawk lo tih hria se zawng an sawi lang awm tawp silo a.




"In thiannu thusawi kha a dik, hun kal tawh a ni a, sawi chhuah fo a tul lo, chuan hmangaih hmasa ber i ti maw khah, i sawi dik e, hei ka hmeichhe hmangaih hmasa ber a tawp na ber ni turin Grace-i ka tawng a, ka damchhung zawng chuan ka theihnghilh thei tawh ngai lovang tih ka chiang" Mike-a chuan a ti a, an thian ho nui lai pawh chu a tawp chawt, Hriatzuali phei chu a rilru a nat hmel lutuk, ka khawngaih dawn viau na in an bul tan hmasak a ni tlat.




"I sawi awmzia chu kan thiannu hi khatih hun chhung zawng khan i lo hmangaih ngai miah lo tihna maw?" la tawng ve miah lo chuan lungawi loh hmel zetin a rawn ti hlak a, "A dik alawm, hun kal tawh a ni a, hmangaih na emaw ka tihkha hmangaih na a lo nilo tih Duati hian min hmuh fiah tir a ni, duhna leh hmangaih na hi chu a in ang lo teh a nia" Mike-a chuan a lo ti leh mai a, an ngawi ta thap a, kalsawn erawh an la tum loh hmel.




"Mihring te hi kan in thlak danglam nasa thei hle tih an sawi ka lo hre ve fo tawh a, Mike nanghi chu a hnung tawlh zawngin i kal a nih hi mawle" tih keichu min rawn en leh a, an pawi sawi pawh ka nilo a hetianga ngeiawm tak tak a min ti dawn a nih chuan in sum buai ka tum hauh lo, "I sawi dik e, mihring te hi kan in thlak danglam nasa thei khawp mai, kei ngei pawh ka nun dan thalo tak tak te ka thlak danglam a, a chhan pawh Duati vang bawk hi" tiin Mike-a chuan min rawn en a.




"Oh.. in hmelhriat tir na pawh ka lo la neilo a, keihi Mike-a bialnu ka nia, Hriatzuali nen hi chuan kan in hmu fo tawh a, nangni hi chu ka hmuh vawikhat na cheu a ni, engpawh chu nise thlaleh lamah hian Mike-a nen kan nei dawn a, in hman rem chan chuan in lo kal ve ngei ngei dawn nia" ka ti ve kher a, Mike-a chu a lo nui ri suk, "Engmaw in neih a?" Hriazuali chu a au deuh that a, customer dang te chuan kan lam an rawn hawi nghal thup.




"Aw.. thlaleh hian kan in nei dawn alawm, vawin ah mo kawr pawh kan en fel tawh a, Hriatzual i lo kal ve ngei ka phut a nia" ka ti leh a, Hriatzuali chu a thinrim hmel ngang mai, engmah pawh sawi tawh lovin restaurant atang chuan an in zui chhuak ta dial a, an chawl ve dawn emaw tih lai a "Awi.. i ti tha lutuk a nia aw, ka lo ngei tawp a" Asangi chuan a lo ti vat a, ka nui ringawt, eitur a rawn thleng a, kan ei nghal mawlh mawlh.




In thleng chuan Mike-an min thlah a, zanah rawn len a tum tho avangin a rawn lut kawi lo thung, in chhung ka luh fel rual chuan ka u chu ka hmu nghal zat a, a awmdan avang chuan ka pan hnai nghal vat bawk, "U.. na i nei a mi, tinge khatianga i awm a, i thlan a chhuak nasa bawk si, i pum a na nge?" a pum a dawn ngawt ngawt avang chuan a pum na turah ka ngai ringawt, "Ka pum a nuam lo deuh mai mai mawle, ka tha tawh e" harsa tih hmel zet chuan a rawn ti chhuak a.




A hmel landan chauh hmel lutuk chuan ka rilru a ti nuam thei lo, "Damdawi inah kal mai ang, i that loh hmel lutuk" ka tih leh chuan min lo hnial vat a, "A ngailo ka tha tak tak, damdawi ka ei tawh alawm, Mate ka va mu hahchawl lawm ange aw, rawng lo bawl mai la" a tih chuan ka lo aw vat a, pindan lamah chuan kan in zui phei a, a la kal ngil hleithei lo, ka u khum a mut fel hnuah ka in thlak a, rawngbawl turin ka chhuak lehnghal.


Zawmna



Chaw eitur a ka u koh ka tum chu a muthilh tui em avangin ka kaitho duh leh ta lova, chaw pawh ka lo en san ringawt, chaw ka ei khan hnuah tv ka en mai mai a, kan unau chauh a khawsa kan ni bawk a, kan in hi tihfai em em a ngai hran lo, kan tifai ngailo tihna ni lovin, engpawh chu nise Mike-a pawh chu a va dawn kang har ve mawle, ka u a mu daih bawk nen mahni chauh a awm chu aa khawhar thlak riau, a hma te kha chuan keimah chauh a awm nuam ka ti ber thin kha a nia.




"A rawn len hman dawn loh te chuan min rawn hrilh ev tak tur a nia aw, ka lo nghak ve char char a" tiin ka phun nang nang tawh, tunah dar 8:30 a ri tawh a nia, a lo kal pawh ka ring chiah tawh lo, ka u ngaih en turin room ah ka va lut leh thin a, nichin kha chuan a harh a, chaw a la ei peih loh thu a sawi kha a nia, ka va en leh chuan a lo muhil leh daih tawh, ka u awmdan hian ka ngaih a ti ṭhalo hle, na a neih leh neih loh ka zawh lah in a that thu in min chhang bawk si.




Ka phone a rik chuan ka en vat a, Mike-a a lo ni, phur zetin ka chhang a, nichin kha chuan ka lungawi lo viau a nia, min rawn call tih ka hmuh rual rual in ka linga i loh na te kha a reh nghal vek, "Duati i mu tawh em?" A tih chuan "La mu lo, in van rawn kal har em em, i lo kal dawn lo zawk nge?" Ka lo ti vat a, "Ka rawn kal mek kao thleng har tawh lovang" a tih takah chuan vall chu kan hmet tawp a, a lo thlen hun chu ka lo chang ran.




Mike-a chu a sawi ang tak tak in a rawn thleng har lo, "I u a mu tawh em ni?" Thutthleng a a thut thlak rual chuan a ti a, "Aw.. tlai a in ka thlen tirh atang khan a nawm loh hmel lutuk a, a pum a lo dawn vang vang sia, a mu hahdam, a rawn la tho chhuak lo hrim hrim a, ka ngaih a tha lo khawp mai" ka ti sep a, Mike-a mit ah chuan ka hriatthiam si loh eng emaw hi ka hmu zawk a, mahse a reilo, ka hmu sual a nih ka ring mah zawk.




"Lo thu rawh aw, nakin ah thingpui kan lum dawn nia, ka u chu ka va ngaihven leh lawk ange" tiin ka ding chiah tih chuan ka u chu a rawn chhuak ta zawk a, "Mike i rawn thlen na a rei tawh em, ka lo muhil daih a" tlai lama a chauh hmel lutuk pawh kha hmuh tur a awm tawh lo, "Ka lo thleng deuh chiah, I tha maw, Duati'n i nuam sam vak lo tih min hrilh a" tiin Mike-a chuan ka u chu chiang zetin a en a, ka u chu a lo nui mai.




Zanin hi ka u leh Mike-a awmdan hi a danglam riau in ka hria, ka lakah zep an nei a ang, engmah chu ka sawi lem hlei lova, "U chaw i la ei silo a, chawei ka lo siam ang che aw, i ril a tam tawh ang" ka tih chuan "Aw.. min lo siam mai la, bathroom ah ka va lut lawk ange" tiin ka u chu a kalsawn nghal a, "Tikhan lo thu rawh, thingpui ka rawn pe ang che" tiin keipawh ka kalsawn a, thingpui ka chhuan lai chuan ka u chaw ei tur ka siam sak a, "Chaw i ei zawh ah thingpui i in duh ka ring a, ka lum kep che a nia aw" ka u rawn chhuah rual chuan ka ti a.




Zanin chu Mike-a pawh zan dang zawng aiin a leng rei a, pawi ka tilo khawp mai, kan in neih na tur vel te chu kan sawi a, "Kan dinhmun chu i hrechiang a, mahse kan theihtawp kan chhuah dawn a nia, ka nau hian ropui thei ang ber a pasal nei turin ka duh a ni" ka u chuan a ti a, "Ni e,, kan theihtawp kan chhuah tlang dawn a nia, chutih rual erawh in in neih ni hi in ruat tlai mah mah a ni" a sawi zawh rual chuan rum zetin ka ve melh a, a hrelo der hmak zui.




Ka u lah chu a nuih a zat hmel em em lehnghal a, "In buatsaih na hun te kan mamawh dawn si a, lo nghak tang tang mai rawh, a hun chu a lo thleng ve vat mai dawn alawm" tha deuh chuan a ti leh a, Mike-a haw hnuah ka u nen pawh mut zai kan rel a, "Taka u heihi ka mo kawr tur a nih hi aw, nalh i ti em?" tiin vawin lama mo kawr ka hak na thlalak chu ka hmuh a, in ka thlen rual khan en tir nghal ka tum nangin a dem teh teuh bawk silo a.




"A nalh kha, mahse keichuan in neih naah hi chuan hetiang mo kawr ai hian puan bih hi nalh ka ti a, bih rawn ka tihna a nilo a nia, i duh ang tak kawr ha la i in hmeh ber dawn" a tih chuna ka ngaihtuah a, a nalh dawn riau in ka hria, Thanthani mizo model kan neih that ber zing a mi pawh khan an in neih naah puan a bih tak kha, ka hmuh tirh a mawi ka tih zia kha, "U i sawi takah chuan puan ka bih leh zawk si dawn mawni ka ti deuh" ka ti a.




"Ka sawi vang mai mai kha a ni ange, puan bih rawh ka tihna che a nilo a nia, mo kawr i hak duh zawk pawn a pawi lo" a ti leh sap a, "Aih chuvang pawh a nilo mawi ka ti hrim hrim alawm, ngaihtuah chhuah na chang ka lo hrelo zawk a, kha a hmaa ka hmuh tawh che kha Thanthani te in neih naah pawh puan a bih kha, khakha keichuan mawi ka ti, duh leh kawr chu mo kawr ang deuh in kan thui tir ve anga" ka ti zung zung s.




"Mahse mo kawr in hauh vek tawh si a, a buaithlak mai mai loh maw?" a tih leh chuan "Buaithlak loh e, mo kawr te chu shooting naah pawh ka ha thei reng alawm" ka tih leh takah chuan "A tha alawm, mahse Mike-a pawh sawi pui ve hrim hrim la" a ti ta a, ka ngaihtuah a, a nalh dawn riau in ka hria, bakah dan khat naa in nei kan ni dawn lova, kan mizo thuam ang te ka in bel chhuak a nih chuan a zahawm dawn riau in ka hre bawk.




A tuk lamah chuan Asangi nen hotel lam pan in kan in phur chhuak leh a, Mike-an min rawn lam tum thin mahse ka hnial ziah thung, kan awmna a in hlat tham ve deuh avang hian rawn kal a buaithlak ka ti Asangi nen kan kal rual din reng thei tho a, haw lamah erawh min thlah ziah thung, Asangi bulah chuan nizan lama ka u nen kan in biak na te chu ka hrilh ve a, min lo phur pui khawp mai, kawr design dan tur lamah pawh amah hi ka ring deuh tawp.




Mike-a lo thlen hnuah ka duhdan te chu ka lo sawi leh a, a ni pawn min lo pawm pui thlap, naktip mai hi Pa Tluanga birthday a nih tawh avangin kan in ei tur thu kan puan hun tur pawh a hnai tawh khawp mai, "Duati eitur ka chah tawh a, vawin chu office ah hian ei mai ang aw" ka hnial hran lo, ka chhuak peih lo hrim hrim bawk, nimin kan chhuak ni leng ve bawk nen vawin chu ka muthlu deuh reng mai.

...


Pa Tluanga birthday a ni bawk a vawin chu chawhma lam chauh hna kan thawk hlawm a, zanah hotel ah a lawm na kan hmang dawn ka tih tawh kha, hnathawk ho te pawin an rawn kim viau ka ring, Asangi bengvar a zar ah kei leh ka u pawn thawmhnaw hak tur nalh deuh mai kan neih phah a, Mike-a khan min leisak a tum na in Asangi'n online hmangin min lo chah sak diam tawh a, nimin piah tlai lamah a rawn thleng tawh.




Online hmang a thil chah hi ka ti ve vak ngailo, a chhan pawh chah sual ka hlauh vang a ni, mahse kan thawmhawn tur erawh kan tawk chiah a, a sexy em em bawk silo a, a man a tlawm ang hu in a nalh reuh tak tak a ni, kan in siam zawh meuh chuan dar 7 a ri tawh, Asangi te in la ah kan va phei a, an ni pawh an lo in peih vek tawh bawk, zaninah kan in neih tur thu kan puan dawn vang nge mawni ka zam riau lehnghal.




"Mike-a a rawn thleng tep ang aw" ka ti sap a, Pa Nuna'n a motor a keng dawn a, an chhungkua in an kal rual anga keini unau chu Mike-a rual in kan kal thung ang, Mike-a a rawn thleng a, a chhelo leh pek hle, ka lo en reng mai chuan min rawn nuih suk a, ka pasal tur a ni tih ka ringhlel rum rum dawn alawm mawle, "Khatin en vak vak suh, nangmah ni chauh in awm lo a nia" Asangi chuan ka beng bul ah a rawn ti sa sa a.




"I ninawm" tiin ka lo nghawk salh a, a nui ru tet tet, "A hma hran tawh lo bawk a, kan kal nghal mai dawn em ni?" Pa Nuna'n a tih takah chuan pawn lamah kan in zui chhuak dial a, "Mate Mike-a nen khan kal rual ula, keichu Nu Mapuii te rual hian ka rawn kal dawn a nia" motor a kan luh dawn chuan ka u in a rawn ti a, "Kan rual in lo kal ve zawk la" ka tih sep chuan "Hmmm.. Mike-a nen chiah khan sawi dun tur te pawh in nei ang, bakah a ril tak chuan i chak em kha" Henu zet zawt hi chu aw...




Mike-a nen chuan ka u te hnungah kan tlan a, "I phur tawh em?" A rawn tih sup chuan "Ka hrelo, ka zam" ka ti sap a, ka kut ah chuan a rawn vuan a, "Engmah zam na chhan tur a awm lo a nia, i bulah ka awm tlat dawn a, kan in neih tur thu an hriat hunah chuan min lawmpui em em vek ang tih pawh ka hria, lungngai lo la, engkim a tha vek dawn" tiin ka kut chu a fawp zeuh a.




Hotel chhung ah chuan kan lut a, Pa Tluanga te nupa awmna lam chu kan pan nghal, "In lo thleng ta maw, kan lo nghakhlel viau tawh cheu a sin, in rawn kal na lamah harsat na te in neilo maw?" Pa Tluanga chuan polite takin a lo ti zung zung a, Pa Nuna te nupa nen pawh an in hmu ve tawh bawk a, an in nel ve viau bawk, ka present ken lai chu Pa Tluanga ka pek pahin "Happy Birthday" ka ti sap a.




"I va ti lawmawm ve mawle aw, hetiang te rawn ken kher a ngailo a sin" tiin a nui a, thil tha tak ka pe theilo, mahse a lawm thiam khawp mai, i Mapuii te nupa pawh chuan present an pe ve bawk a, Nu Hlutei chu ngawi rengin a lo ding thung, a mizia ka hrechiang tawh bawk a, ngaih khat ah ka ngai tawh, ka lakah tha viau lo mahse ka chhungril tak hian a rilru a chhiat loh zia a hre tlat a, nakin ah chuan a mo atan min la pawm ve ngeiin ka ring tlat bawk.




"Pa Tluang Happy Birthday" tih pahin Hriatzuali chu kan bulah a rawn ding a, "Henu ve ziah la hi, a rawn lang ve hman ziah a, ninawm lutuk" Asangi chuan a rawn ti hlak, a tawng chu an hre pha ang tih ka hlau bawk nen ka mitmei in ka lo khap vat a, Hriatzuali hi chu ka tan a hnawksak zia a hrechiang a, a mimal takin in hre pawh em em lo mahse a lo ngei ve em em ringawt a, Asangi hi chuan ka thlavang hauh hi a pe na ve bawk em a, keimah vang hian in hauh pui pawh a nei nual tawh reng a ni..




"I lo kal thei a nimaw" Pa Tluanga chuan a ti sup a, lawm hmel pawh a pu lova lawm loh hmel pawh a pu chuang lo, "I birthday ah te chuan ka lo kal lovin, ka pa khan a rawn biak che ka ring a, ka nu nen an zin lai a ni bawk nen keimah chiah ka rawn kal thei a, heihi i tan ka rawn ken a nih hi" tiin present box nalh zet mai chu a pe a, "I va han fel thin tak, i nu leh pa ai i rawn awh chu a nia, nanghi chu i kum phu lovin i puitling a" Nu Hlutei chuan a lo ti duah a.




"Kan mi sawm te chu an rawn kal min rawn viau in ka hria, kan tan tawh mai dawn em ni?" Mike-a chuan a ti vat a, "Ni e, kan kalsawn phawt ange, namin ah kan la in kawm tha dawn a nia, Grace lo in ring rawh aw, dawhsan ah khian ka han chho ange, Hlui lo kal la" Pa Tluanga chuan a ti a, Pa Nuna'n te nupa leh ka u te pawh thutna awl ah chuan an va thu a, keini erawh kan la ding reng thung, chutiang bawk in kan bulah Hriatzuali pawh a la ding ve reng bawk.




"Nupa hlim tak in nih theih i ring chu a nianga" a rawn tih takah chuan al lam chu ka hawi vat a, "Min hrethiam la, i sawi nawn leh thei angem?" Ka tih sap chuan "Mike-a nen hian hlim taka in awm theih i in ring em ni, hah.. ka awm chhung chuan in hlim ngai lovang, ka hrilh tawh che kha, Mike-a hi keima ta chauh a ni" ka nui sak a, "A va hahthlak thin ve, Mike-a hian a duh ve lo che tih hi mi zawng zawng in kan hriat laiin tinge nang ber hian i haider tlat le aw" ka ti hap a.




Hahthlak tih hmel fe chuan ka en nur nang a, a huat tawk a tlin hmel hle, Asangi lah chu a lo la nui ri hak zui a, "Nang i rawn lan hma hian Mike-a nen hian rei tak chhung kan lo in hre tawh, min theihnghilh tak tak i ring em ni, taka Nu Hlutei thu min hrilh i hre duh em?" Tiin a nui a, chutah min rawn awm hnaih deuh pah hian "A sawidan chuan maw, nang leh Mike-a te hi in in then leh vat tur thu a sawi, nau i pai thei tawh lo maithei bawk nen Mike-a hian nanghi a thlan reng che i ring em ni?" A rawn ti zawi sup a.




Ka chhang lo, chutih rual erawh in hlauhthawn na pakhat mah ka nei, Hriatzuali chuan nui sangin min en a, a thusawi kha sawi fuh a in tih hmel hle bawk, "Enteh thiannu, mi pasal tur hel kual reng lo hian tlangval zawng zawk ta che, nge nia mipa te hian i mize tenawm lutuk hi an hriat avangin an hnaih duh lo zawk che, a landan ah hi chuan mipa i hmuh zawh loh hmel khawp mai, bialnu nei kher I kher ngat ngat dan ah hian, pawn lamah chuan maw fel ang deuh in lang mahla i mose diktak hte tu tan chuan i iai awm ve thlawt" Asangi chuan a rawn ti ta siah siah mai le.

Cont....

comment a that lem loh avangin chapter thar a awm dawn lo aw, mi pakhat in vawi 10 chuang te comment mahse mi 30 pawn comment min pe lo, ka chhinchhiah ve thlap thin sia, comment a that viau chuan naktuk zanah chapter hnih dah kan tum anga, a that loh chuan ka awl ang aw...

[Rebec Nunziri]

Chapter-16



Grace Lalthazuali POV



"Nangnu khan engtin maw min tih a?" Hriatzuali chuan chang fak in a ti a, Asangi lah chuan an hlauh loh hmel nasa mai sia, "I rilru a chhia tih chu i hmel atang pawh hian a hriat theih a, mahse i beng leh zel a ṭhalo tih erawh ka lo hre lova" a ti duh lek, an in hnial thui ang tih hlau in "Asang duhtawk rawh" ka lo ti sap a, "A ho, a hma tan hmasak alawm" tiin min chhang duh lek chauh lehnghal, buaina thui zawk a thleng ang tih ka hlau ru viau.




"Midang buaina a in rawlh hi a mawi viau lo tih i hria ang chu maw?" Hriatzuali chuan a rawn ti leh a, "Hriat te chu hria e, nang ai mahin chuchi na hrechiang zawk ang chu, mahse khathu kha sawi ngam tur i ni em tih erawh ka chiang chiah lo, a chhan chu maw nangpawh mi in ngaizawng tha hle hle lai in kar ah thlak zep phet i tum tlat sia" Asangi bawk, buai na thui zawk a chhuak ang tih hlau viau e tilo chuan Hriatzuali a chhan na chuan ka nuih a ti za viau thung.




"Hmeli tunge ka nih i hria em?" Hriazuali bawk, Pa Tluanga te din na lam ka han melh zeuh a, an la buai deuh avangin an tan thei mailo a nih hmel, Hriatzuali tawng rin tak em avang chuan kan bul hnai a awm te chu an rawn hawi leh zeuh zeuh zel a, "Tunge i nih maw, Hriazuali mawle, chutiang lo deuh a chhan na i duh chuan Mike-a bialnu hlui leh ka thiante in kar ah tlak zeh phet tum" a ti leh sak a.




"I va zaktheilo ve, khatiang a min tawng khum tur khan engah nge i in ngaih a, keihi.." Hriatzuali'n a tih lai mek chuan "Sh... tawng ring vak suh, midang hian mak an ti lutuk ang che, nang phei chu i pa mi hriat rawn a hlawh si a, a fanu mawl tak avang hian a hming that na zawng zawng chhe vek ta se engtiang takin nge a thinrim ang?" Asangi'n dam dap chuan a ti leh a, a tawngkam chu ngeiawm viau mahse a nui sang a, Hriatzuali tan chuan a huat awm leh zual ngawt ta ve ang.




Hriatzuali tawng leh a tum lai mek chuan "Grace, in rawn thleng tawh tih ka hre miah lova, oh.. U Hriazuali chu i rawn kal thei a nimaw?" Nghaktei chuan a ti a, "Nia, Pa Tluanga birthday ah te ka rawn kal loh chuan" Hriazuali chuan a lo ti vat, nichin a a thinrim hmel tak kha bo in a nui sang mai, lemchan a va han hnehsawh mai mai tak aw, Nghaktei'n a hma khan a sawi tawh, Hriatzuali hi chu rilru chhe viau mahse mi hneh theih na riau a nei a tih tak kha mawle.




Hetiang hmeichhia hi an hlauhawm ka ti ve takzet, ka fel chu ka ti hauh lova mahse hetiang hmeichhia ka nilo erawh ka lawm takzet thung, Nu Hlutei nen pawh an in be fo a, ka lakah Nu Hlutei pawn hel a chhuah tlat chhan hi Hriatzuali'n eng eng emaw a lo sawi thin tih ka hailo, tunah pawh Nghaktei lakah te chuan hmeichhe tha tak angin a lang leh tawh hi, Nghaktei erawh chu mi sual a nilo bawk a, a mizia hre chiang viau mahse polite takin a ve tlat.




"Nia.. i rawn kal a, kan kim sawt alawm, lo haw hma bik lo la aw, kan in hmuh loh na a rei ve tawh sia, nakin ah kan in be dawn nia, chuan Grace heihi i thiannu kha tiraw?" tiin Asangi chu a en a, "Aw.. a nih hi, hmani khan in in hmuh ve zuai tawh kha" ka lo ti vat a, "Nia, i hming pawh ka la hria, Asangi tiraw, ka hming i hriat tawh loh takin Nghaktei aw" a ti leh zung zung a, "Ka hria alawm, i va nalh ve, i kawr hak chu i in hmeh tawp" Asangi pawn a lo ti ve vat a.




Hriatzuali ka en chuan rum zetin min lo en reng, "Khi ka pa in min ko a nihkhi ka han kal phawt ang aw, nakin ah kan la in kawm dawn nia, chuan Grace lo in ring la aw, i rawn chhoh dawn hunah fimkhur deuh khan ko kal la, i tluk chuan nangmah i zak ber dawn a nia" tiin nui hak hak chung chuan a kalsawn a, Hriatzuali pawh chu a kalsawn ve nghal, ka thaw deuh huai mai, a awm ve reng kha chuan Asangi nen an in hnial leh lovang tih pawh a hriat loh.




"Nghaktei kha a fel hmel tawp, a hmeltha bawk sia, a vun lah kha a la nalh em em zui a" Asangi chuan a ti sap a, "A fel lutuk, nakin ah in in hrechiang zel anga, in in kawm ngeih ngawt ang, ka hmuh hmasak ber atangin keipawn ka ngaina nghal alawm" ka lo ti vat, "Nia.. hmel ah a nu chhun mahse a mizia ah kha chuan a pa a chhung hlauh chu a vannei khawp mai" ka lo nghawk sawk a, kan bul hnaiah midang an awm tih a theihnghilh emaw ni.




"Awi.. ka nin zia hi aw, keichu ka ning" ka tih chuan "Enge i lo nin leh tak a?" Asangi chuan a ti a, "Ka zam, ka tlu ang tih ka hlau tak tak, pheikhawk sang ka lo bun kher hi ka in chhir, pheikhawk hniam tal te lo bun ila, ka tlu tak tak ang tih ka hlau, ka zak dawn lutuk" ka tih chuan min nuih a, "Lo nui suh, ni mah zam naklai a" ka tih leh hlak chuan "I ho lutuk, zam lo la, mahni in ring tawk takin le, mipui lam te hi chu min en liam mai mai rawh, Mike-a ah chauh i rilru pe la" ka thaw hak a.




Pa Tluanga chuan thu a sawi tan a, kan thian dun pawh dun reng thu awm lo, kan chhungte thut naah chuan kan va thu ve a, a thusawi te chu a tha hlawm takzet, a tawngkam tin mai ah chuan a nupui a dah ropui thiam em em a, hriat hmaih theih miah loh chu a fate a chhuan zia mawlh chu a ni, an chhungkua a an ding lai chu an hmuhnawm hle, an hmeltha hlawm si a, kei mai nilo hall chhung a awm zawng zawng hian an chhungkua chu kan en thup, nakin lawk ah chuan an ni khi ka chhungte tiin ka la sawi ve ngei dawn chu a ni sia.




"Ka sawi tam ta bawk a, thil pakhat chiah ka sawi tawh a, zanin hian thil ropui tak puan tur a awm a" Pa Tluanga'n a tih lai chuan Asangi chu ka nghet takin ka vuan a, "Ka fapa hian nupui a nei dawn a ni" a tih leh rual chuan an phun deuh sup sup hlawm a, thenkhat chuan keimah ngei ka nih an ring in ka hria, "Hriazuali nen an in nei tak tak dawn aniang a" kan sir a thu in a tih chuan Asangi chuan a va melh zeuh a, kan thut hnaih bik avangin kan hre pha chang chang chauh, kan chhungte chuan an hriat ve ka ringlo.




"A nilo ang, Grace-i nen an in zui nasat em kha" pakhat in a lo tih chuan "Grace-i nen in zui nasa mahse Sir Mike-a hian a duh tak tak awm lo emai a, bakah Hriazuali a tha fe zawk" pakhat lah chuan a ti leh a, an bul hnai mai ah kan thu tih an hrelo nge mawni, "Chutiang ringawt a nilo, Hriatzuali nen te chuan an in then na a rei tawh emai, bakah Grace-i hi tha ka ti fe zawk, mimal takin in hre pawh vak lo mahila keichuan a fel hmel ka ti" nichin a mi khan a ti leh a.




"Mite hi kan lan ang ngawt an nilo, fek hmel tih mai mai, a chhungril tak tuman an hre hleinem, a rawn thawh na a la rei loh nen Sir Mike-a a chhai ngam nghal a nia, keichuan hmeichhe tha a nih ka ringlo bur, ka ei thlawt lo, a awmdan vel te hi a in duh hmel ropui si" Asangi chu hawi let in chhan a tum rual chuan ka lo dang vat a, ka mitmei in in sum turin ka hrilh bawk, "Khatiang khan sawi ringawt suh, i hriatchian bik tawh loh kha" a thiannu chuan a lo ti leh a.




"Kan fapa nupui tur hmeichhe fel leh hmeltha em em mai chu helai hmunah hian a awm ve bawk a, thenkhat chuan in hre tawh maithei bawk, kan fapa nupui tur nakin lawk a kan mo nimai tur chu hmelhriat tir cheu ka duh a ini, Grace helam ah hian lo chho ta che" Pa Tluanga'n a rawn tih takah chuan thawk la ru ham hma chungin ka tho chhuak a, "Zam reng reng suh, engmah zam na chhan tur a awm lo a nia" tiin Asangi chuan min lo fuih zeuh zeuh a.




Dawh san lam chu ka pan a, Mike-a ka melh fuh rual chuan mitmeng de sat sat chungin min lo en ve reng tih ka hmuh rual in ka nuih a, step a ka chhoh lai chuan a ban min rawn pe a, mipui te chu an lo au dur dur hlawm mai, "Kan fapa hi mipa fel leh tha famkim a nilo a, mahse hetiang takah hmeichhe hmeltha leh fel nupui a a nei tur hi kan lawm takzet a ni, thlaleh 21 hian Pathian leh kohhran hmaah thutiam an chhan dawn a, helai hmun a rawn kal zawng zawng te in zavai in min rawn fel pui theuh turin kan sawm nghal cheu a ni" Pa Tluanga chuan a ti leh dap dap a, mipui lam thawm pawh chu a tha ham ham viau.




Ka u te thut na lam ka en chuan mittui tling pam chungin min lo en ve reng a, keipawh ka hnuk a ulh dawn dawn mai, mipui lam chu ka melh kual leh a, nichin a ka chanchin mawi lo tak a sawi nu ka melh fuh rual chuan a mitmeng chu a tim deuh dai a, engtin vak tih ka tum lem lo, a bul lawk ah ka thu tih erawh ka thawh rual khan a hriat ka ring, Mike-a chuan thu tlem te a sawi leh hnuah dawh san atang chuan kan chhuk hlawm a.




Pa Tluanga te nupa leh Nu Mapuii te nupa chu an in kawm a, Nu Hlutei pawn min ngaina lo viau mahse Nu Mapuii nen zanin chu an in be thei ve viau mai, ka lawm takzet bawk, ka sawi tawh kha, hmeichhe rilru chhia a ni dawn lova, a tir atangin ka chanchin a hriat dan a fuh chiah loh vanga ka lakah pawh hel chhuah tlat a ni, a mo ka nih hunah chuan a lakah that ka chhuah anga, a fapa hi hmangaih na diktak in ka hmangaih tih a hriat hunah chuan min la pawm ve ngei ang tih hi ka ring tlat a ni.




Mike-a chu a thianten an rawn koh hran avangin a kalsawn a, "Asang pawn ah chhuak ve lawk ila, a lum bawk sia, kan lut leh vat dawn a nia" Asangi bulah chuan ka ti sep a, "Aw.. keipawh ka chhuak chak, helai chu a uap churh bawk sia" a mo tih ve takah chuan hall atang chuan kan chhuak a, hotel pawn atanga chhuak chung lo chuan balcony lamah kan kal a, boruak thaw heuh heuh kan dawn takah chuan thawk a veng hawk thei alawm.




"A nawm zia hi, reilote awm leh ila kan lut dawn nia, nang phei chu bo vang vang chi i nilo" a ti sap a, ka lo pawm thlap, nichin pawh khan min lawmpui tu an awm ve neuh neuh a, bakah Pa Tluanga te nupa in an hmelhriat tha zual te pawh min hmelhriat tir duh ve maithei a ni, "A mak ka la ti tawp theilo" a rawn tih hluai chuan "Engmaw mak i tih?" ka lo tih chuan "Mike-a nen in in nei mai tur hi mawle, in in tawn dan zawng zawng nen" a tih chuan ka nui a.




Keipawh hian mak ka la ti tawp theilo, khatiang khawp khan kan buan ve a nia, kan in tawn dan lah hriat reng tlak a nilo, mahse ka theihnghilh phal chuang lo, khatih hunlai kha chuan Mike-a hi ka mipa hmangaih a ni dawn tih ka ngaihtuah pha hauh lo, engtinge chutiang ngaihdan te ka neih theih tehlul ang ni, a chhan chu a tan chuan hmeichhe in zuar satliah ang kha ka ni miau a, engah mah min ngaih chhunzawm ka ring miau lo alawm.




"A mak vung vung thin, enge i lo ngaihtuah leh tawh a, biak pawh i hriat theih reng reng lo" lungawi lo zet a Asangi'n a rawn tih takah chuan ka ngaihtuah na atang ka harh chhuak zawk, "Tihpalh, enge i sawi?" ka tih chuan a tun deuh hmak a, a thinrim tak tak lo tih erawh ka hrechiang, "Enge i lo ngaihtuah reng reng a, titi lai lai in i ngawi leh vung vung zel a, midang chu ni phei se chuan i â emaw an ti zawk hial ang chu" a ti leh hlak chuan ka nui a.




"Mike-a nen kan in tawn dan vel ka lo ngaihtuah a, mak ka ti alawm, khatih hunlai kha chuan hetiang hi kan thlen ka ring miah lo a nia, a mak em a sin" ka tih chuan "Nia tiraw, Khuanu ruat dik tak in nih ka ringhlel lo ve, a tirah kha chuan ka hlauthawng deuh a, in in tawn dan zawng zawng nen Mike-a hian a hmang tangkai mai mai ang che tih ka hlau lutuk, i bulah sawi ngai lo mahila, mahse a mitmeng ah hian a hmangaih zia che ka hmuh sak hnu atang kha chuan hlauhthawn na ka nei tawh lo" a ti ve a.




"Midang hian kan in tawn dan leh tun hun kan thlen dan te hi hre tase chuan an awih kher in ka ring lo, flim a ang lek lek hial alawm, vanduai ber emaw ka in tih lai khan Pathian hian ka tan thil tha zawk a lo ruat a ni reng a, Mike-a ka tawng hi ka vannei takzet a ni, mipa tha leh in nghah na tlak a nih zia a ni tel in ka hmuh belh zual deuh deuh a, tu mipa in nge pawisa vanga mutpui duh tu hmeichhia hi nupui atan duh ang ni?" ka ti a.




"I thil tih chhan kha ngaihtuah ta che, ni e, ka zep lo I thiltih kha chu a ṭhalo ngei alawm, mahse U Tluangi tan a i tih a nia, tunah dam taka i bulah a awm leh theih chhan pawh hi a nia, i rintu chhungril thianghlim tak ka hmuh sak theih ang che hian Mike-a pawh hian a hmuh hmaih bik lo tihna a nih hi" a tih chuan ka nui a, "Nangpawh mipa tha tak i la tawng ve em em ang, kei aiin i fel a, i rilru a tha bawk si, mipa tha tak i phu a ni" ka tih chuan "I sawi dik chiah" uang zetin a lo ti a, kan han nui leh vak vak phawt a.




Kan hnunglam a thawm a awm chuan kan hawi let vat a, mahse tumah hmuh tur an awm lo, "Kan lut dawn hnai mai dawn mi niang, kan awm rei tawh emai" ka ti sep a, "Nia lut ang, Mike-an a lo zawng vak ang che" kan han nui leh rih, hall lam pan a kan kal lai te chuan fiamthu thawh in kan nui leh vak vak thin a, kalkawng pawh kan en lo, Asangi bula ka awm tawh hi chuan ka rilru hah na te hi a dam sawng sawng zel, fiamthu a duh bawk sia, pum na urh in ka nuih phah ziah.




"Awi.. a na lutuk" tih leh Asangi chu a tlu nghal tawp a, ka kai tho vat, a mawng a sawh na deuh aniang a ner nang nang a, "Tinge min rawn su tu kha, kalkawng em ve ta che" tiin a hmaa mipa ding chu rum zetin a en a, Mike-a leh mipa pakhat hi kan hmaah an lo ding reng chu niin, engtinge kan hmuh miah loh theih zawk ni, an pahnih chuan an nuih a la zat hmel em em zui a, "Enge nuihzat thlak awm a?" Asangi chuan a ti leh that a, a thinrim hmel ngang mai.




"Ka tihpalh i in sawh na em?" Mike-a bula mipa chuan nuih in sum deuh chuan a lo ti leh a, "Chutiang te in zawh chu a nia mi, min en hian na ka ti tih i hmu thiam mai lo a mi?" Asangi lah chuan pawr zetin a lo ti let zek a, "Ka thiam loh a ni e, min ngaidam rawh" chupa bawk chuan a ti leh a, "Mut kian deuh pahnih I nei a, engtinge min sut theih zawk a, ka mawng la chu a la na em em zui, a duk vaih chuan i chak lo ang" ka thiannu thinchhe em em chuan a ti leh a.




"Thiannu kei ni lovin nangmah zawk in min rawn su a nihkha" Mike-a thianpa a nih ka ring ringawt, "La ti zui, I va zaklo tak, nangman a nihkha min rawn su, min su lo nila chuan chhuat ah ka mawng sawh dawt in ka tlu lovang" uar zetin Asangi chuan a ti leh a, "I te em a chuvang a nihkha" chupa pawh chu hnial a va han hrat ve tak e aw, Asangi chuan a ngei hmel ngang mai, chhang lovin rum zetin a melh ram ram a, Mike-a thianpa lah chu zan duh bik lovin Asangi chu nuihza in sum zet chuan a melh let ve ran bawk a.




"Duati a ni hi ka thian tha em em mai Malsawmhlua a nih hi, Mizoram ah a awm tam vak lova, vawin ah Mizoram ah a rawn haw chiah, hmuh che a duh a hmuh tur i awm mai silo nen kan rawn zawng che a nih hi" Mike-a chuan a lo ti sup a, "Chibai le, Malsawm tiin min ko mai dawn nia" tiin a kut chu ka chibai theih turin a rawn dah a, ka lo vuan vat, "Grace Lalthazuali ka nia, Grace tiin min ko thin, chuan heihi ka thiannu Asangi a nih hi" ka lo ti ve sep a.




"Chibai le, nichin a thil thleng vang khan ngaihdam ka dil nawn leh e" tiin ka thiannu chu a chibai ve leh a, Asangi chu a la lungawi chiah lo a niang ngawi rengin a chibai a, "Lut ila" Mike-a chuan a rawn ti leh sup, "I mawng chu a na viau a mi?" mipa pahnih te chu kan hnung ah an kal a, Asangi lah chu a kal ngil hleithei lo, "La na deuh e, ka sawh chiang em alawm, ka mawng hi a sa hut hut mai" a rawn tih sep chuan ka nuih a za hle.




Hall chhung a kan luh rual chuan kan chhungten min lo ko vat a, "In lo va chhuak a nimaw, Grace heihi ka thiantha em em mai Rama a nih hi" Pa Tluanga chuan a lo ti vat a, "In hmeltha hle mai, Tluanga chu mo hmeltha tak i nei dawn bawk si a i thik awm rum rum alawm mawle" a lo ti a, ka lai lek lek mai, keimah hian hmeltha ka in ti lem lova, chuvang pawh aniang ka hmelthat tu midangin an sawi hian ka zak tlat zel.




Dar 10 a pelh hnuah chuan an haw darh ta sang sang hlawm a, keini chu a hnuhnung lamah haw zai kan rel ta chauh thung a, "Pa ka lo haw har lovang, Duati hi ka va thlah haw leh phawt ange" Mike-a chuan a ti a, Pa Tluanga te nen chuan kan in mangtha hnuah motor ah kan lut a, "Naktuk ah kan in neih huna i kawr hak tur te chu kan en lehnghal dawn em ni, I u leh Asangi te pawh an rawn tel anga, Nghaktei pawh a rawn kal tel ve duh ka ring" Mike-a chuan a ti a




"Nia.. a remchang viau ang, thil dang buaipui tur a la tam bawk sia, a hmasa lamah lo tih kha a pawilo, bakah ka u te pawn an kawr hak tur an thui tir ve duh nghal ka ring" ka tih chuan "Ka lo lam dawn cheu a nia, hma lutuk a chhuah pawh a ngailo, chuan nangpawh hna lam chu ngaihtuah vak lo la, pasal ni mai tur i ni sia, buai a na dawn si a, ka hrethiam che a nia" a tih chuan ka nui hak a.



Lalhriatzuali POV (Ti ve zuai ang)



Pa Tluanga'n Grace-i a koh chhuah lai chu rilru na leh thinrim takin ka lo en ngawt ngawt a, saw hmeichhia saw ka haw takzet a ni, engtinge ka dinhmun tur min chhuh sak ngam zawk, a la hre dawn khawp alawm, hlim taka a nui lai te sa ka hmu khan hliah hliah, mipui in lawmpui nan an kut an beng leh an au ri dur dur te chu ka beng ah chuan thil ri bengchheng tak a ni, nilo hetiang mai chuan ka tlawm dawn hlek lo, tinge ka nih tih hi in la hre dawn khawp alawm.




Mike lo nghak rawh, ka ta i la ni dawn khawp, saw hmeichhia sawn a phu lo che, kum tamtak chhung ka lo duh tawh che a, nilo ka hmangaih zawk che, thol ho te ka tih sual avangin kan in kar i ti tawp a, ka tan hian a fair bik lo, ngawi liam mai mai turah min ngai ange, a teuh lo mai, ka neih theih hma che chu ka beidawng dawn lo, Grace Lalthazual nangpawh kha lo in ring ang che, tuna i dinhmun ah khan i awm reng lo tawp ang.




Nu Hlutei nen kan in melh fuh rual chuan pawn lamah chhuak lawk turin ka mitmei a, a lo hrethiam khawp mai, "Nu Hlute engtinge kan tih tak ang, tunah chuan Grace-i saw in monu a ni dawn tih mi zawng zawng in an hre vek tawh a nia" ka tih chuan "Ka hrethiam tawh bik lo, Hriatzual hmeichhe fel tak i ni a, ka fapa lak atang hi chuan in thiar fihlim tawh mai rawh, ka fapa hian Grace-i hi a hmangaih takzet tih hi ka hria a ni" a tih chuan ka kut chu nghet takin ka hum a.




"Nu Hlute enge maw i sawi le, Grace-i nihna diktak ka hrilh chian tawh che kha, khami chung khan i monu atan i pawm duh dawn amaw?" tiin za lo zet chuan ka nui a, "Eng ang mi pawh nise ka fapa in a hmangaih phawt chuan tih theih ka neilo a ni, a tir ah kha chuan theihtawp in an in mar pawh chat ka tum ve alawm, chuta tang a ka thil hriatchian tak em em chu ka fapa zawk hian Grace-i hi a kalsan mai mai dawn lo tih hi a ni" a ti leh.




He pitar pawh hian enge maw a hriat ni, engvanga Grace-i lam chu tang em em nge an nih hlawm le, "Nu Hlute, han ngaihtuah chiang leh teh, Mike-a nen khati khawp khan kan in zui nasa a, Grace-i te chu hmani lawk a a hriat mai mai chauh a nih hi, i fapa hian a hmangaih tak tak chu i ring amaw?" a rilru hneh tum tak chuan ka ti leh a, "Hriatzual nang ai he khawvel ah hian ka lo awm hmasa tawh a, hmangaih na hi awlsam tak pawn a piang chhuak thei tih hi ka hrechiang a sin" a ti sap a.




Ka meng kual ralh, "Ka fapa nen hian in in zui ve tawh thin pawh a ni mahna, tunah chuan hmalam i pan ve a hun tawh a ni, nu ka ni a, ka fapa hlim na hi ka ngaih pawimawh a ngai ve tho a, a hlimna ber chu Grace-i bula a awm hi a ni tih ka hailo bawk, chuvang chuan nangpawh beidawng la, nangmah hmangaih em em tu mipa tha tak i la tawng em em ang, chutih hunah chuan hlim na tam tak in a rawn um zui ngei bawk ang che" a tih chuan ka thinrim na tih lan loh tum chuan ka thaw ru ham ham a.




"I fapa hi ka hmangaih tih i hriat kha, engtinge mipa dang bulah chuan ka hlim theih ang?" khawngaih thla la zet chuan ka ti leh a, "Hriatzual ka hria alawm, i rilru tur chu ka hriatthiam pui che, mahse ka fapa hian a hmangaih silo che a ni, a na i ti ang tih ka hria, mahse chuchu thudik a ni miau si a, engpawh chu nise nangmah hmangaih lo tu mipa bulah chuan hlimna tak tak i nei dawn chuang lo, ka thusawi chu i hriatthiam hram ka beisei" tiin a kalsawn a.




A kal liam hnuah chuan thinrim zetin ka au that a, engtinge ka tih tak ang, ka hmanraw tangkai ber lah chu engah mah a hman tak bawk siloh, mahse ka la beidawng mai mai lovang, Lalhriatzuali ka nih hi, Mike-a ka neih theih na a nih phawt chuan engpawh ka ti hreh lo, ka neih hma chu ka beidawng lovang ka tih tawh kha, hall chhung ah chuan lut mai lovin Mike-a office ah chuan ka lut a, tumah hmuh tur an awm lo bawk nen thil pawimawh hmuh tur a awm takin tiin ka check a, mahse engmah hmuh tur a awmlo.




Hall lama kal leh mai lo chuan balcony lam ka pan a, hmeichhe tawng ri ka hriat chuan ka tawp chawt, kal hnai deuh in an tawng ru chu ka ngaithla reng a, an thusawi ka hriat chuan mak ka ti ve hle, chutih rual in ka lawm viau thung, ngaihdan thar ka neih phah tlat, hah.. in neih maw, a thleng ngai lovang, kalsawn ka tum lai chuan pot in hung pakhat chu ka su palh a, min hmu ang tih hlau zetin ka biru nghal.




An ni thian dun pawh chu hall lam pan in an kal a, ka nui sak, "Grace lo ngai reng tawh, Mike-a hi ka ta tur chauh a ni, nang hian i nei ngai lovang, keimah chiah hi Mike-a nupui tur chu ka ni" tiin pawn lamah chuan ka chhuak a, in ka thlen hnuah room ah lut tlang in ka zo dah that chu la chhuak in ka in a, ka nui leh thin, ka thil tih tum ang eng ang pawi lian tham nge a thlen theih tih lam ka ngaihtuah lo, ka duh ka neih theih na a nih dawn phawt chuan engmah tih hreh ka neilo ka tih tawh kha.




No 6 vel ka in hnu chuan ka kai tawh hle, ka chhungte tumah an awm lo bawk a venthawn tur ka neilo, lu hai chhap chung chuan ka ding a, ka album dah that chu la chhuak in ka keu a, Mike-a nen kan thlalak dun te a ni, ka nui leh thin a, kan nun hlui te chu ka chhui kir a, a hmaa Mike-a kha ka ngai takzet a ni, engvangin nge min ngaihdan ve theih mai loh le, min duh a nih te chuan min ngaidam tur a ni dawn lawm ni, mihung te chuan tih sual kan nei thei vek a, thil ho te vangin kan in kar a pawt chat duh a nia.

...


Grace-i te in kawt ah chuan ka ding a, ka nui sak bawk, tawi khawmuang lovin an kawngka chu ka kik a, a u khan a rawn hawng a, min hmuh chuan mak a tih hmel hle, inchhung ah chuan kan in zui lut a, "Nangmah chauh in em ni i awm? Grace-i khawiah nge?" ka tih chuan "Aw.. Grace-i chu in neih naa a kawr hak tur thui tir turin an kal a, ka nuam sam lo nen ka kal ve peih ta lo a nih hi" tiin tha tak chuan min lo chhang a, hah... ka tan hun tha tak a ni.

Cont....

Comment a that chuan chapter hnih kan dah dawn ka ti kha a nia, a tha vak lo tih chu kan hre tlang in ka ring, rawn dah mih ka tum zawk a, ka rawn dah hram mai mai, comment hi min pek sak ve teh u....

[Rebec Nunziri]

Chapter-17



Grace Lalthazuali POV




"Ka ke hi a na ut ut mai" Asangi'n a tih sup chuan ka thaw hak, Mike-an kan in lamah min thlah mek, keipawh ka chau lutuk, kan kal kual nasa em em pawh a nilo mahse bazar ah hi chuan mihring hi kan tan thei lutuk a, a chauh thlak ve hrim hrim, kan in kawt ah chuan motor a ti ding a, "Lo lut ve la, ka u pawn a hmu duh ang che" Mike-a bulah chuan ka ti a, "Nia, a la hma tho bawk a, ka lo kut kawi ang" a tih takah chuan motor atang kan in zui chhuak hlawm a.




Asangi pawh an in lamah haw tlang lovin kan inah a rawn lut kawi phawt dawn a ni, kawngka chu ka kik a, mahse ka u chuan min rawn hawn miah lo, "Tinge le, a muhil a niang a" ka tih sep chuan "Khawi maw chhunglam ah a in kalh em ni?" Mike-a chuan a ti a, ka u amah chauh a a awm chuan kawngka a kalh ngei ngei tih ka hrechiang, "Aw.. a in kalh sia, mahse kawngka kik ri a hriat chuan a rawn hawng vat thin sia, a muhil tui viau a mawni le?" ka ti leh.




"Duati lo kalsawn lawk teh" tiin Mike-a chu ka din naah a rawn ding a, kawngka chu a sawi deuh nawk nawk a, rei pawh a sawi hma chuan kawngka chhunglam atang chuan a rawn ri khep a, a in hnawh nghal, in chhung ah chuan kan lut a, ka u chu hmuh tur a lo awm miah lo, ka rin ang chiah khan room ah a muhil a nih ka ring, "Lo thu rawh u, ka u chu ka va en fiah lawk ange aw" tiin pindan lamah chuan ka lut a, ka u khum a lo mu ka hmuh chuan ka thaw deuh huai mai.




"U" tiin ka va sawi a, mahse a harh theilo, ka chhungril ah chuan hlauh na a rawn awm nghal a, ka u hi harh vang tak a ni a, ka koh vawikhat naah hian koh nawn ngai lovin a harh nghal mai zel, chuvang a hlauthawng nghal em em pawh ka ni reng a ni, "U, harh teh" ka tih nawn leh pawh chuana harh theilo, "U I tha em?" tih pah in ka sawi a, a zawi ngiai a, engmah a hrelo tih a chiang ngang bawk.




"Mike, Asang lo lut teh u, ka u hi a harh theilo a nia" tiin ka au a, an rawn lang ve nghal, "Ngatinge a?" Asangi chuan a rawn ti vat a, "Ka hrelo, ka u hi a harh thei miah lo" hlauthawng zet chuan ka lo ti bah nawk nawk, "Duati hahdam rawh, khawi ka lo en chiang ang" tiin ka u sir ah chuan a rawn kun hniam a, "Damdawi inah kan kal pui vat a ngai dawn a nihhi, Duati hlauthawng lo la, a tha em em ang, a chau deuh mai mai a ni ang" tiin Mike-a chuan ka u chu a pawm nawlh a.




"Lo va kal rawh u, kawngka chu ka rawn kalh mai ang, kan in ah ka va phei anga, ka nu nen kan rawn kal dawn nia" Asangi'n a tih na pawh chu ka chhan awm ka hrelo, damdawi in kan thlen chuan doctor ten ka u chu an lo en fiah vat a, emergency room a an luh pui hnu chuan pawn lamah kan lo nghak reng, kei phei chu ka rilru hah nen ka thu mai mai theilo, "Duati, thu hahdam rawh, i rilru ti hah lo la, engkim a tha vek dawn alawm" Mike-an a tih pawh chuan ka theilo.




Nu Mapuii te an rawn thleng a, "Tluangi chu enge a an?" ka bul a rawn thlen hma hma chuan a ti zui nghal vat a, "Doctor ten an en fiah mek, a dinhmun chiang takin kan la hre theilo a ni" Mike-a chuan pangngai takin a lo ti a, kei erawh tawng ngaih na pawh ka hrelo, ka â chhuih nimai hian ka hria, "A rei tawh emai, ka u chungah hian eng thil thalo mah a thleng lovang tiraw, ngatinge khatiang khan a awm thut le, zing a ka chhuah san dawn pawh khan a la tha viau si a" ka ti sep a.




"Duati engkim a tha em em ang, i bulah kan awm vek a nia, ka chhungte pawh an rawn thleng har tawh lovang" Mike-an a ti a, engtik laiin nge a chhungte a lo biak pawh ka hrelo, ka thaw leh hawlh thin a, Mike-a sawi angin Pa Tluanga te nupa pawh an rawn thleng har lo, "Grace engkim a tha leh em em ang, lungngai lo la" Pa Tluanga chuna a ti a, ka chhang lo, ka hlauthawng bawk nen tawng pawh ka tawng hleithei tlat lo.




"Ni e, hlauthawng reng reng suh, I u chuan eng em a ti lo ang, doctor ten an theihtawp an chhuah alawm" Nu Hlutei pawh chuan a lo ti sap a, doctor a rawn chhuak zui nghal, "Kan fanu chu enge a an?" Nu Mapuii chuan a lo ti vat a, doctor hmel chu chik zetin ka lo en a, a hmel chu a zuai ruih hian ka hria, "Sawi tlang tawp mai ila a dinhmun a tha vak lo, thu thin thawng tak a hriat vangin a taksa leh rilru in a tuar a, a natna chu kan hriat sa vek kha, chuan a natna dang hian a taksa a try darh nasa tawh lutuk a, kan tan pawh tih theih a vang hle a ni, min hrethiam dawn nia" A tih chuan mak ka ti hle.




Kei ang bawk in Nu Mapuii te pawn mak an ti tih ka hmu thei, "Lawk in doctor enge i sawi awmzia, eng a natna dang nge i tih?" Nu Mapuii'n a lo ti vat a, "Oh.. Tluangi hian a la hrilh lo cheu a nimaw, pumpui cancer a ni a, a stage pawh a sang tawh, tunah chuan a pumpui mai nilo, a taksa hming hrang hrang ah a darh tawh a ni" ka awm riai riai a, ka tlu tur chu tha chak zet hian min lo chelh tih ka hria, ka hai muai muai a, ka tlu em lo, ka bul hnai a mi te min biak na pawh chu ka hre vek bawk, chhang turin chak na ka neilo.




"Grace tui hi in rawh aw" Asangi chuan a rawn ti a, thuthlung ah Mike-an min thut tir hnuah tui chu ka in a, "Ka thu hriat kha ka hre diklo a ni tiraw, min chhang teh u, ka hresual mai mai a ni tiraw?" ka ti sap, ka aw chu a chhuak cha cha chauh a ni, "Duati" Mike-an a tih chuan "Ka hresual mai mai a ni, ka u hi a cancer reng reng lo, hah.. keihi ka â tawh a nih hi, engtinge maw, chutiang thil te chu a nih theih reng reng ang ni, ka u te chu a damtha lutuk alawm" tiin ka nui hak a.




"Mike ka u hnenah chuan min hruai teh, ka hmu duh, min tih hlauhthawn zia hi ka hrilh duh" ka ti a, ka ngaihtuah na chu a á ruai a, enge ka tih a enge ka sawi pawh ka hrechiang lo, midang chu ka en kual a, Asangi chuan mittui tling pam in min lo en a, Nu Mapuii lah chu a tap bawk a, "Tinge khatianga in awm a, Nu Mapuii ka u te chu a tha reng alawm, hlauthawng tawh suh, min tih hlauhthawn man ah kan hai hrep dawn a nia" ka ti leh a.




"Duati i u chu cabin a an dah hunah i hmu dawn nia aw, chumi hma chu pawn lamah kan vak harh dawn em ni?" Mike-an a tih sup chuan "Ka u chu a rang lama hmuh ka duh sia, nakin ah kan chhuak zawk dawn a nia, bakah kalsan tawp chu ka duh lo" ka tih chuan "Keini kan awm alawm, Mama nen hian lo va chhuak harh rawh u, I u chu ngaihtuah duh reng reng suh" Pa Tluanga'n a tih takah chuan midang ka en kual a, lainat hmel taka min en na chu ka duh lo.




Mike-a chuna ka ban ah rawn vuan in pawn lam chu min pan pui a, midang awm tam vak loh na laiah chuan min kalpui a, "Duati, I u natna" a tih lai mek chuan "Ka u in eng natna mah a neilo, ka hria alawm, doctor khan a hrechiang lo mai mai a nihkha, ka u hi chu hrisel lo viau mahse hetiang natna hi a neih ka ring lo, tin hnai a in sawisel na a neih ngai tawh loh zia nangpawn i hriat chian em kha, chuvang chuan ka u natna tih vel chu engmah sawi tawh suh" ka lo ti vat a.




"Thudik ngei a nia lawm, Duati hetiang thu sawi ngai hi a har takzet, mahse i pawm thiam a ngai a ni, Tluangi hian pumpui cancer a nei a ni, doctor tha tak ka hmuh sak tawh a, a nin a enkawl hunah chuan a dam vat mai ang" Mike-a chu chiang zetin ka en a, "I sawi awmzia chu ka u natna hi i hre lawk tawh tihna em ni?" ka ti a, chutah hnuai lam en in "Duati i laka ka zep vangin ka tihpalh, tunah chuan i hriat a hun tawh a ni" a rawn tih leh chuan ka lungawi lo a, ka rilru a na bawk.




"Engvangin nge i zep a, tinge min hrilh vat loh?" au khum vak ka chak mahse ka thei silo, "Ka tihpalh I u khan hrelo tura a duh vang che a ni, mahse tunah chuan i hriat a hun tawh a ni" a tih nawn leh rual chuan ka ding a, "Mike, ka u hi ka tan a hlut zia i hria a nilawm ni, hetiang thil lian tham hi engvangin nge min hrilh vat loh, tinge ka lakah i zep a, mawh.. Ngatinge ka lakah i zep ka tih chu, ngawi reng lovin min chhang ta che" ka ti leh that a, tlem in ka aw pawh a ring ta deuh.




"Duati i u khan i laka zep turin min duh a ni, a thusawi ka hnial theilo, chuan hriatthiam tur rawh aw, i lakah ka zep avangin ka tihpalh, mahse ka sawi chhuak thei miau lo a ni" a tih leh chuan ka thaw hak a, "Tinge ka u chuan engmah min hrilh loh, ngatinge ka lak atang a zep, a nau angin min pawm ve miah lo zawk nge?" tah chhuah hawk pah chuan ka ti a, ka rilru hah leh ka thin zawn na lutuk avang chuan ka thaw tha theilo.




"I u hian a hmangaih lutuk che, hetianga i awm lai a hmin duh loh vang hian a hrilh lo che a ni, Duati chak taka i awm a ngai a nia aw, nangma tan leh I u tan, I u hian hetianga i awm lai hmel a hmu a nih chuan hreawm a ti dawn lutuk, i chhungril natna tur chu ka hriatthiam pui kher lovang che, mahse i u tan I tih a ngai a ni, i bulah ka ding tlat bawk ang" a ti leh sup sup a, ka tap chu ka la bang chuang lo, engvangin nge hetiang natna rapthlak hi ka u chungah a thlen bik?...




Ka zia deuh tak hnu chuan damdawi in chhung ah kan lut leh a, ka u chu cabin ah an lo dah diam tawh, a la harh lo thung, ka u hmel chu ka en vang vang a, cancer natna nei hmel pawh a pu lo, nilo a hmai chu a dang vek a, diktak chuan mihring damlai pawh a ang lo hial zawk, "Ngatinge hetiang hi Tluangi chungah a thlen le aw, a va han pawi tak em, hmeichhe pawisawi lo leh midangte ngaituah em em mi a ni a, thung natna rapthlak hi a phu lo a sin" Nu Mapuii'n a tih lai te chuan ka u ngawt chu ka en a.




Pa Nuna pawn a rawn thleng har tawh lo, Nu Mapuii nen chuan cabin atang an chhuk a, an lo let leh har lo, Pa Tluanga te nupa pawh an la awm ve reng bawk, "Grace lungngai reng reng suh aw, keini kan awm a, kan theihtawp kan chhuah anga Tluangi pawh a tha leh vat mai ang" Pa Nuna chuan ka dar a rawn chelh pah in a ti a, an nupa hi awm lo se engtinge kan unau hian kan awm ang ka hrethiam lo hial zawk, kan tan chuan an hlu lutuk takzet a ni.




Ka u rawn meng siar siar ka hmuh takah chuan ka lo hnaih nghal vat a, "I I tha tiraw, i harh chiang em?" ka ti sawk sawk a, "Tui i in duh a mi?" ngawi reng a min en chua ka ti a, rilru nat hmel zet chuan min en reng a, "Na lai i nei a mi, Asang doctor min va koh sak mai teh" ka tih leh rual chuan "A ngailo ka tha, ka nau hi biak ka duh, khawngaihin min lo va chhuah san thei angem?, hun rei a nilo ang" ka u chuan midang hnenah a ti a.




An chhuah vek tak hnuah chuan ",U ngatinge khatiang thu lian tham te ka lakah i zep a, tinge min hrilh vat loh?" mittui tling pam chuan ka ti a, khatianga a awm chhan tak erawh a cancer vang ni lovin thu thin thawng a hriat vang zawk tih erawh ka hre kar thung, "Ka tihpalh a ni, ka duh vang reng a nilo, Mate ka hmangaih zia che i hria tiraw?" a rawn tih sup hian lu ka bu a, "Ngatinge keimah vanga i thianghlim na i hralh?" a ti ta mai, ka u thusawi chuan min thawn em avangin chhan mai ngaih na pawh ka lo hrelo.




"U.." sawi tur ka hrelo, "Khatiang thil i tih vang khan ka hlim i ring em ni, kha thil i tih vang khan I u hian hreawm ka tih tur zia i ngaihtuah em, Mike-a nen hian midang ang tho a in hria emaw ka ti cheu a, mahse keimah min chhan nan a lakah i thianghlim na i hralh a lo ni lek si a" tap chunga a tih leh chuan "U ka tihpalh, mahse i dam na ka duh alawm, khatih hunlai khan zai ngei ngei I ngai a, tihtur dang ka hre tawh thlawt lo a ni, ka tihpalh, u min ngaidam rawh aw" tap zawih zawih chungin ka ti a.




"Keimah vangin hreawm takin i lo awm a, keihi i u ni tlak pawh ka nilo" a ti leh, a taksa chu a chau leh tan tawh tih a tawng dan ah pawh ka hria, "U Mike-a nen kan in tawn dan chu a diklo a ni maithei, mahse tunah chuan kan in hmangaih tawh lutuk alawm, chuchu thudik a ni, chuan hetiang thil hi khawi atangin nge i hriat?" ni e, ka u hetiang hian a awm phah a, tunge a nih ka hriat ngei ngei a ngai, "Hriatzuali a lo kal a" a dang a sawi chhunzawm thei tawh lo, pawn lamah chuan chhuak i doctor ko turin midang chu ka hrilh vat a.



Zawmna



"A chau deuh mai mai a ni e, hlauhthawn tur a awm lo, a lo harh chhuak leh vat mai ang" doctor in ka u a en zawh chuan a ti a, ka thaw deuh huai mai, "Nu Mapui ka u hi lo awm pui lawk rawh u aw, kal na tur pawimawh deuh ka nei a" ka tih chuan Nu Mapuii chuan a lo aw vat a, Pa Tluanga te nupa pawh chu an la awm ve reng bawk, ka kalsawn nghal a, Asangi leh Mike-a te chuan min rawn zui nghal, Asangi min koh na pawh chu ka chhang lo, ka kal mawp mawp a, ka thiltih tum hi a ṭhalo maithei mahse tuman min dang thei hauh lovang.




"Duati ding lawk teh, khawiah nge i kal dawn?" Mike-a chuan min rawn pawh din pah chuan a ti a, "Lalhriatzuali te inah ka kal dawn" ka tih chuan, "Maw, enge i tih dawn?" Asangi'n a lo ti vat, ka chhang lo, "Duati Lalhriatzuali te inah chuan enge i tih dawn, thil pawimawh a awm em ni?" a tih sup chuan "A thil tih pawi zia hi ka hmuh tir dawn" ka ti kha fak, ka thinrim lutuk chu ka tha a khur dar dar thei, "Engthil nge Lalhriatzuali chuan a lo tih a?" Asangi'n a ti leh a.




"Ka u hnenah lo kal in engkim a lo hrilh a ni, ka hian khatiang kha hrelo nise chuan hetiang hian a awm hauh lovang" ka tih leh chuan "Enge Lalhriatzuali chu in inah a lo kal amaw, engtinge a ngam zawk, awle, a thiltih man chu a hmuh ngei a ngai a nihchu, keipawh ka lo kal ve ang" Asangi'n a ti a, Mike-a chu ka en leh a, "Lalhriatzuali te inah chuan min hruai dawn nge keimah in ka kal dawn?" ka tih leh hmak chuan a nui a.




"Awle, a tha e, i duh ang ngei chuan i che dawn nia" tiin motor lamah chuan min kalpui a, Lalhriatzuali te in lam kan pan lai te chuan tumah kan tawng lo, Lalhriatzuali ka hmuh hun chuan in sum buai ka tum lo nasa, a mah vangin ka u natna khum ah a mut phah a, rilru na takin a awm a, a taksa chak lo nen tunah a dinhmun a thalo em em a, a natna chu engpawh ni rawh se, ka u rilru a tih nat man chu a hmu dawn chiang khawp alawm, a chhungte awm pawh nise ka in sum chuang lovang.




Lalhriatzuali te doorbell chu ka hmet a, "Lalhriatzuali a awm em?" nu pakhat in a rawn hawn rual chuan Mike-an a ti sup a, "Awm. a room ah a mu hahdam a, lo lut rawh u" a tih hnuah inchhung ah chuan kan in zui lut a, "Mike-a chu i rawn kal loh na a rei tawh si a, i dam maw?" chunu chuan a ti leh a, "Ka dam alawm, Nu Machhing a ni hi ka nupui tur Grace-i. a nih hi, chuan a ni hi a thiannu Asangi" Mike-a chuan a ti sup a, chunu chuan min en a, min biak pawh a tum hmel loh.




Lalhriatzuali nu a ni tih ka hrethiam nghal mai, a hmel awmdan ah hi chuan min ngainat hmel viau loh, pawi ka ti chhete lo, keipawh hian ka ngaina bik hran lo, "A nihchu, nupui i neih tur thu an sawi kha chu ka lo hria a, an tak tak turah ka lo ngai lova, Bawihi nen in in zui nasa hman bawk nen" a tih lai chuan "Nu Machhing khatiang kha chu hun kal tawh a ni a, sawi lan fo hi ka duh dan a nilo, ka nupui tur hriat lai ngat phei chuan" Mike-a bawk chuan a lo ti leh a.




"A nih chuan hetah hian enge rawn tih in tum?" A nu chuan a ti leh hmak a, "Lalhriatzuali hmuh kan duh vangin kan rawn kal a nih hi, min koh sak dawn em ni?" Mike-an a tih leh chuan "In a rawn thlen na a la reilo a, a mu hahdam chiah" kai thawh chu a tum loh hmel hle, chutah room pakhat atang hian pa valai deuh mai hi a rawn chhuak a, a ni pawh hi Hriatzuali pa a ni tih ka hre nghal mai, Hriatzuali hian hmel ah a nu a chhun daih zawk.




"Kha Mike-a te chu in lo kal a nimaw, ngatinge khatia in din reng ni, thu ta che u" dam duam mai hian a rawn ti a, thutthleng ah chuan kan thu thla a, "Enge in rawn kal chhan ni a, i pa te pawh kan rawn la tlawh hman lova" a ti leh sup a, "Hriazuali hmuh kan duh vangin kan rawn kal a" Mike-a bawk chuan a ti leh a, "A nihchu mawle, room lamah a awm a nilawm ni, Bawihi nu han ko ta che, hei an nghal rei lutuk ange" Hriazuali pa chuan a ti a, a ni hi chu a fel hmel khawp mai.




"A chauh thu a sawi kha, kaithawh chi pawh a ni lovang" Hriazuali nu bawk chuan a lo ti leh, ka melh kar a, ka ngei lek lek mai, a fanu hian eng thil pawh nge a tih a hriat hunah engtinge a awm ang, hah... A ni hi chuan a fanu lam a tang tlat tho ka ring, mahni fate dik loh na hmu thei lo nu ang ah ka ngai hmiah, "Helai chen chen hmu turin an rawn kal a, Bawihi te pawh nakin lamah a hahdam thei, han ko rawh" an pa in a tih luih tlat takah chuan lungawi loh hmel zetin in chung lamah chuan a kal a.




"Kha i rawn kalpui te chu ka va hmu ngailo ve" tiin keini chu min rawn en a, "Ka nupui Grace-i a nih hi, chuan a ni hi kan thiannu Asangi" Mike-an a tih chuan "A nihchu mawle, kan rawn haw na a la reilo a, i nupui neih tur thu chauh kan lo hria a, nupui i nei hmeltha dawn hle mai, in in neih hunah chuan rawn kal ve hram kan tum dawn nia, i pa te pawh rawn hmuh ka duh bawk a" a ti leh dap dap a, ka rin ai daih in a pa chu a fel, Lalhriatzuali chuan a chhun lo ve khawp mai.




Lalhriatzuali leh a nu dawn in zui thla ka hmuh chuan ka ding zawk a, Asangi te pawh an rawn ding chhuak ve nghal, "Enge hetah te in rawn tih dawn a?" Nui sang chung a a rawn tih chuan ka thinrim lutuk chu a hmai ah sawn ben pawl mai ka duh ut ut a, a thiltih pawi zia hre map lo leh inthlahrun na nei miah lova hetianga min hmachhawn ngam hi a huai sar ka ti hle bawk.




"Engvangin nge vawin ah khan kan inah i rawn kal?" Peh hel kual vel peih lo chuan ka ti a, "Oh.. in in a ka kal chungchang kha maw i sawi a?" Tiin a nui hak a, "A pawi viau em ni?" A tih leh lai chuan ka thinrim in sum zo ngang lo chuan a hmaah tak ka va ding a, "Ka u hnena i thil sawi vang khan tunah ka u natna khum ah a mu mek tih i hria em?" Ka ti zawi sap a, "Enge i sawi awmzia chu han sawi chiang deuh teh" A pa chuan a lo ti vat a.




"Pa engmah a nilo, Grace-i hian a u dam loh na vel ah min rawn puh mawh a tum mai mai a nih hi, engthil mah ka ti hleinem, in in ah khan ka leng lut satliah ve mai mai a nia" a ti ham ham lai chuan "Lalhriatzual ngawi hmak rawh, engthil nge Tluangi bulah khan i sawi chu kan hria" Mike-an a tih te chuan a thinrim hmel zual sauh, "Engpawh lo sawi ila dawt ka sawi chuang em ni? Thudik chauh ka sawi a, a pawi na ka hrelo" A tih leh chuan ka in sum na zawng zawng te ka hlauh chiang hle.




Lalhriatzuali hmai ah chuan ka tha neih zawng zawng hmang in ka beng pawp a, ka beng na bawk nen a thleng ve sawk mai, a nu chuan a lo dawm bet vat a, "Nangnu kha i va huai sar ve, kan in ngei ah ka fanu kut i thlak ngam amaw?" A nu chuan a lo ti vin that a, "Ka pu ka tihpalh a ni e, in fanu hi vawin lamah khan kan in ah lo kal in ka u hnenah thil tullo tak tak a lo sawi a, ka u natna zawng zawng nen tunah hian damdawi inah a awm mek a, a dinhmun a ṭhalo hle nghe nghe" ka ti hmasa te te a.




A pa chuan engmah a la sawi lo, "In fanu hi a in rawlh loh na turah a in rawlh a ni, ka u nun na hian a tuar a nih ngat chuan ka ngawi liam mai mai dawn lo tih ka hrilh duh cheu, i fanu kut ka thlak avangin min hrethiam dawn nia, mahse amah vanga ka u natna khum ah a mu mek tih hre reng chunga in chhir na pakhat te mah a lan tir lo khan ka in sum theih na min hmaih tir a ni" ka ti leh hmak hmak a.




"Lalhriatzual eng thu nge an sawi hi, engthil chiah nge i tih?" a pa chuan a ti chang fak a, ka rin dan chiah, a fanu mah nise a dik loh naah chuan a tan ka ringlo reng a ni, "Bawihi pa tinge khatiang thu kha kan fanu i zawh daih a, he hmeichhia hian dawt a sawi pawh a ni thei a sin, kan fanu hian engthil pawi mah a tilo tawp ang, he hmeichhia zawk hian dawt in a rawn mawh puh mai mai bak a ni tawh lovang" a nu chuan a lo ti zawt zawt a.




"Lo ngawi rawh, Hriazual min chhang rawh, vawin chuan engthil chiah maw i tih a?" a pa bawk chuan a ti leh a, "Pa eng thil sual mah ka ti hleinem, Grace-i u hnenah hian thudik ka hrilh mai chauh a ni, in hrelo a nihkha, he hmeichhia hian pawisa a duh vangin Mike-a hi a mutpui a, Mike-a pawh hi a bula a zo vek tawh a nih hi" a ti leh zawt zawt a, "Lalhriatzual ngawi hmak rawh" Mike-a chuan thinrim aw sak talh in a ti a.




"Dawt ka sawi em ni, a ni hian pawisa a duh vangin a mutpui che tih ka hriat loh i ring em ni, a thiannu nen an sawi dun lai ngei ka hria alawm, Mike-a harh chhuak teh, a ni hian a duh tak tak lo che, i sum bak a duh lo, keichuan ka hmangaih che, ka hmangaih takzet che a sin, henu ai hian keihi min thlang zawk rawh" Lalhriatzuali chuan a ti leh a, "Ngawi hmak rawh, Duati hi ka hmeichhe hmangaih diktak chu a ni" Mike-a bawk.




A ni hian a hmangaih tak tak lo che, sum vanga mutpui duh tu che hi engtinge kei ai i thlan zawk, hetiang hmeichhe hnuai hnung lutuk" tiin keichu min rawn en a, "Ngawi rawh ka tih tawh che kha, Duati ai hian tha bik turah i in ngai amaw, Lalhriatzual nang nen kan in then chhan diktak kha i theihnghilh in ka ring lo" a tih takah chuan Lalhriatzuali chu a ngawi hmak a.




Kei tak pawh hian an in then chhan hi ka la hrelo, "Vawin a kan konkal chhan ber zawk chu in fanu hian ka u hnenah thil tullo tak tak a lo sawi vang a ni, ka sawi tawh ang khan ka u dinhmun a ṭhalo hle a, a chungah thil pawi zawk a thleng a nih chuan ka ngawi liam mai mai dawn lo, in fanu hian a in rawlh loh na turah a in rawlh avangin hetiang thil hi a thleng tih in hriatthiam hram ka beisei" tiin ka ngawi dat a, Lalhriatzuali ka en chuan thinrim mit sen ram in min lo en let ve kar a.




"Mike-a nen kan in tawn dan chu engpawh ni rawh se, in fanu lo sawi theih hi a awm lova, ka u hnena lo sawi chhan tur pawh a neilo, a ni hrilh kher ngai lovin keimah ngeiin a hun ka tih ah chuan ka sawi mai ang, mahse in fanu hian ka u hnenah engkim a lo sawi thawt thawh avangin ka u chu dinhmun ṭhalo takah a ding a ni a, nangni pawh ka dinhmun ah hian ding ni ta ula in in in a ka chet ang tho hian in chet ve ngei ka ring, tun atang vuan in fanu hi in lo zilh that tawh ka beisei, a in rawlh loh na turah a in rawlh vang hian buai na tamtak a chhuak a, hetiang thil hi a thlen tawh lo ka beisei" ka ti leh hmak a.




"Nang hmeichhe zaktheilo lutuk, kan fanu zilh tura min ti tur hian eng angah nge i in ngaih a, nang sun duh avanga mipa mutpui duh tu hmeichhia hian" a nu chuan a rawn ti ta piap piap a, "Lalchhingpui lo ngawi rawh, kan fanu hian a in rawlh loh na turah a in rawlh a, Grace-i thusawi hi a dik chiah, a buai na lo tura a lo in hnuh luh ve avang buan Grace-i u in a tuar mek a nih hi, in thiamlo hle tur kan ni zawk" a pa chuan a fanu chunga lawm loh hmel takin a ti hmuk a.




"Pa enge ka tih dik lo, a ni hian Mike-a min laksak a sin" Hriatzuali chuan a lo ti leh vat a, "Hriatzual thil hriat fuh lo i nei niin ka hria, Mike-a hi laksak tur che in i ta a ni ngai reng reng hleinem, I ta engmah ka laksak lo che tihna a nih chu" ka tih leh chuan "Nang hi rawn lang lo ni ka chuan Mike-a nen hian hlim takin kan awm dun ngei ang, chuan hetiang thil hi ka tih a ngai lo bawk ang, nang ang hmeichhe tenawm lutuk, sum vanga mipa mutpui tu hneichhia mai mai hian min tluk i in ring em ni?" A pa aw fiam ṭhawt vang chuan a tawng mai chu a tawi nghal chawt a.




"Lalhriatzual kan in then chhan kha enge tih i hrechiang a nilawm ni, khatianga Duati ṭawngkhum ngam tur i ni em, mipa ka ni a, sawi chhuah tul ka tih loh avangin tuma hnenah ka sawi chhuak ngailo, mahse a tawk tawh e, Nu Machhing ka nupui tur hi i ngainep in hmeichhe khawlo zet ah i ngai tiraw, i fanu hi eng chiah nge a nih i hre duh em?" Tiin Mike-a chuan Hriatzuali ni chu a en ta ran mai, "Mike engthu nge saw i tum?" Hriazuali chuan hlauhthawn hmel takin a lo ti nghal vat a.




"I hrechiang a nilawm ni, sawi chhuah a hun tawh a ni ange, min dem suh ang che, sawi chhuak lo theilo a min siam tu chu nangmah i ni, ka nupui hual hi i tawngkam chhe lutuk hmang a i an khum reng ai chuan sawi chhuah a tha zawk, Pa Lawm in fanu nen kan in the chhan diktak chu kan in kawp reng laia mipa dang a hmuh ruk thin vang a ni" Mike-a chuan a ti ta mai, a thusawi in min thawng lutuk chu ka meng kawk a, chutiang bawk in Hriatzuali nu leh pa pawh, Hriatzuali erawh a kun reng a.




"Enge i sawi awmzia chu, han sawi chiang deuh teh" Hriatzuali pa in a tih leh takah chuan "In fanu hian ka tan a rinawm zo lo ka tihna a nih chu" Mike-a bawk in a ti leh, "Mike hriat sual i nei aniang, kan fanu hian a duh zia che i hriatchian kha" Hriazuali nu chuan a lo ti leh vat a, "Ka mit ngeiin mipa dang nen khum a an awmdun lai ka hmuh hnuah ka hriat sual i ring em ni?" Mike-a lah chuan a lo ti leh hmak si, Lalhriatzuali chu kun chungin a tap khur dar dar a.




"Lalhriatzual Mike-a thusawi hi a dik em?" A pa chuan a ti ṭhawt a, "Pa.." a ti tham chhel a, thu dang a sawi lo, a fanu awmdan atang chuan dawt a sawi lo tih a hrethiam a i mahna "Hetiang fanu hi ka nei che hi ka zak takzet, nang hian min ti zak takzet a ni, tenawm lutuk, hmeichhe dang chungchang mawi lo taka sawi ngam tur pawh i ni em ni?" A ti leh hrawk a, a pa rilru nat hmel lutuk leh zak hmel chuan hreawm min tih tir ve ringawt, "Kano va chhuak ange, buaina kan rawn siam ta hrep si a, min hrethiam dawn nia" tiin Mike-a chuan min maiin in atang chuan min chhuan pui a, Asangi'n min rawn zui ve vat bawk.

Cont....

Comment kha aw... nizan zawm tura ka dah click tawh te kha chuan click nawn a ngai tawh lo bawk e...

[Rebec Nunziri]

Chapter-18



Mike Lalruattluanga POV



Kan let leh lam chuan hmeichhe pahnih te chu an ngawi reng a, an ngaihtuah awm ang tur chu ka hrethiam, sawi zai vak ka tum hran rih lo, a hin ber lo bawk, Duati phei chu a u natna a hre hlim chauh a ni si a thu dang lo sawi pui vak na chi a nilo tih ka hria, a u natna a hriat na khan a deng na hle dawn tih ka hailo, chuti chung chuan Lalhriatzuali hmaah zam hauh lovin a la ding thei zawk a, ka rin ai daih in ka hmangaih hi a chak a ni.




Damdawi in kan thleng a, Tluangi pawh a lo harh tawh, engmah a sawi lo thung, a nau chu a en ngawt ngawt a, rilru na taka a awm chhan hi keimah vang a ni tih ka hai lo, hreawm ka ti hle bawk, a natna zawng zawng nen kei hian a natna ah chi ka phul sak a ni ringawt, ka nu te pawh an lo la awm reng a, Nu Mapuii phei chu a mit a sen ram tawh, Duati te unau hi a fa ang chiah in a en tih ka hria a, nu tha tak leh hmangaih na ngah tak a ni chiang a lawm, a pasal pawh hi a bang chuang lo.




"Nu Mapuii ka pa te nen in lamah kan va let anga, ka rawn kal leh dawn nia, thil pawimawh tak sawi pui tur ka nei a" ka tih chuan "Ni e, in awm rei tawh alawm, kan lawm lutuk a nia, helai thleng thleng in lo kal a" Pa Nuna zawk chuan a lo ti sup a, Duati chu ka va melh zeuh a, a u bulah chuan in thlahrun hmel takin a thu ka hmuh te sawn hreawm ka ti, keimah zawk hi a ni in thlahrung tur chu, ka pa te nen chuan room atangin kan chhuak a.




Tunah chuan engmah zep buai ka tum lo, engkim a lan chhuah a hun tak meuh tawh a ni e, Lalhriatzuali hi ka duh aiin a kal thui ta mah mah, hmeichhia a ni a, a zahawm na pawh ho te a chhe thei a ni tih ka chiang, rei tak chhung ka hmeichhe kawp a lo nih tawh avangin ka en liam mai thin, mahse tunah chuan ka duhtawk ta viau e, a laka ka that na te hetiang hian min rul let a nih chuan engvangin nge thudik engkim ka sawi chhuah mai lovang ni.




In kan thleng a, ka pa te bulah chuan biak ka duh thu ka sawi a, library room ah kan lut ta diak, "Ka pa, rei tak chhung he thil hi ka lo zep tawh a, mahse sawi chhuah a hun tawh a niange, Lalhriatzuali nen kan in zui nasat thin zia chu in hriat vek kha, ka nu nang i mo atan i awh em em hmeichhia a ni tih ka hailo, i ngaina hle a, ka thusawi tur pawh hi awih har i ti maithei, ka thu hrilh tur vang chei hian Duati then tura min ti a nih pawn ka then ngai dawn lo tih ka sawi hmasa duh" ka ti hmasa te te a.




"Bawiha min ti hlauthawng a nia, enge i sawi duh chu han sawi tlang law law teh" ka nu in a lo tih chuan "Awle, Duati nen hian midang te anga in tawng kan nilo, tun a ka sawi chhuak lo a nih chu an hriat chhuah hun in la nei dawn tho tho tih ka hriat vanga sawi ka ni bawk, Duati hian a u zai na tur pawisa a mamawh em em a, a thianghlim na chu min hlan ta a ni, pawisa vangin a thianghlim na min hlan tih na a nihchu" ka ti sup a.




Ka nu te chu an ngawi reng, ka nu hmel ah phei chuan mak tih na ka hmu chiang kle, ka pa erawh in mak a tih vak hmel loh, "Heihi hriat hmaih lo ula ka duh, ka hnenah a thianghlim na sum hmangin thleng mahse a u zai na tur atan a tih a ni a, a tan a ti a nilo tih hi, kan in tawn dan kha a ṭhalo tih chu ka hria a, mahse ka in chhir hauh lo, a chhan chu ka hmeichhe hmangaih ber ka tawn phah miau a" tiin ka nui suk a.




"Bawiha, chutiang hmeichhia te chu an tha dawn em ni, ka sawi kha i la hre reng em?" ka nu in a rawn tih chuan "Ka nu ka thusawi kha nangpawn i hria em, duhthlan tur a neih loh vang a ni, a u kha khatih hunlai khan zai a nih vat loh chuan rei a dam dawn lo, chuchu a hre chiang a, hreh em em chungin khatiang thil kha a tih phah ta a nihkha, keini chu mi vannei zing a chhiar tel theih kan ni a, a chhan chu pawisa kan neih loh vang hian vawikhat mah zan mut theih loh kan la neilo, mahse khatiang kha Duati te unau chu an ni ve miau lo a ni" ka tih leh takah chuan ka nu pawh chu a ngawi a.




"He thil hi rei tak ka lo zep tawh a, ka zep reng thei tawh lo, ka nu Hriatzuali nen kan in then tirh khan mak i ti viau a tiraw, ka chungah i thinrim nghe nghe a nihkha, mahse enge kan in then chhan tak erawh i hre hauh lovang" ka tih chuan "Hriatzuali khan min hrilh alawm, mipa dang nen an in be lai i hmu a, khavang khan a nilawm ni i then?" ka nui hawk a, chutiang chuan maw ka nu hnenah a lo sawi a, Lalhriatzuali mai mai chu, hei vang chiah a nih hi ka nu pawh hian a lam a lo tan em em thin ni.




"Mipa dang nen an awmdun lai chu ka hmu ngei mahse an in be satliah mai ni lovin khum a an chetla lai ngei ka phawk vang zawk a ni" ka tih chuan ka nu chu a meng phawk hle, ka pa pawh chuan mak a tih ve hmel ta deuh, "Engmaw chutiang chu a thleng amaw, nilo Bawiha i hresual a nilo maw, chutiang thil chu Hriatzuali'n a tih ka ring theilo" ka nu chuan a rawn ti chhuak sep a, a aw ah pawh chuan mak a tih zia chu a thup thei biklo.




"Ka nu ka mit ngeiin ka hmu a, ka hmuh sual i ring em ni?" ka tih chuan "A va mak ve, Hriatzuali'n dawt min lo hrilh char char tihna maw, a va ngam zawk ve, a thusawi te ka awih vangin i lakah pawh ka thinrim phah hle a, thil ti sual tu zawk a ni tih chiang taka in hre chungin engtinge dawt var min la hrilh ngam zawk a, ka rin ang a lo nilo tawp mai" a ti ta fak a, a thinrim hmel hle bawk.




"Awle, engkim chiang takin i sawi ta bawk a, Hriatzuali nih na diktak i hre chhuak a, in in then hma hlauh chu a tha zawk a nihchu, Grace-i pawh keichuan dem na ka neilo e, a dinhmun a khirh ve em bawk a ni, Bawiha i nupui tur a ni a, i dawn thiam viau a ngai dawn a nia, hmeichhia chu ho te a rilru na hma em em an ni tih theihnghilh ngai suh ang che" ka pa chuan a rawn ti sup a, ka lo bu nghut nghut.




"Keipawh i pa ngaihdan kha ka ngaihdan chiah a ni, a tir ah khan Grace-i kha hmeichhe lep chiah tak ni turah ka lo ngai a, a lo chhuanawm khawp mai, Hriatzuali'n nang nen in in kawp hma pawh in mipa hausa tak tak mi pa thleng a a ngaihzawn thin thu a sawi vanga duh lo em em ka ni a, min lo bum nasa khawp mai" tiin ti zeuh chuan ka nu chu a nui a, Lalhriatzuali nihna diktak a hre chiah chu mak a la ti ngang a ni e, a awm ve reng mai, mi hmaah chuan hmeichhe fel ber angin awm a hnehsawh lutuk tlat.




"Chumai chu a la ni hleinem, Tluangi hnenah Duati nen kan in tawn dan engkim lo hrilh tu pawh Lalhriatzuali bawk a ni, a ni khan Tluangi natna pawh hi a hriat hmaih hauh lo, chumai pawh ni lovin thil theng thei engkim a hre sa vek in Tluangi hnenah khatiang thu kha sawi a ni bawk" ka nu chu a chek tlak tlak a, "Hriatzuali chu a lo va han hlauhawm ve le" a ti ngawih ngawih bawk.




"Engtinge hetiang hmeichhia hi an awm theih zawk ni, tual a that hreh hauh lo tihna a nia, ka rap tawh zawk e, engtinge fel hmel deuh khan ka bulah a awm theih zawk ni, khatiang hmeichhe hlauhawm lutuk bum khan ka lo awm reng chu a nia, a thusawi te kha a tak tak emaw ka tih avangin Grace-i pawh tawngkam na tak tak in ka lo ṭawngkhum kha a ni sia, engtiang takin nge a rilru ka lo tih nat sak ang" ka nu chuan a ti leh vawng vanwg a.




"Hlui hun liam tawh a ni a, kan monu tur pawh kan hriat chian kha, engtiang pawh in a chungah lo awm tawh mahla a hriat reng sak lo tawp ang che, tunah chuan i hrechiang tawh tiraw, kan fapa hian duhthlan na sual a siam loh zia hi, hmeichhe fel tak mo ah kan nei dawn a ni a, lawm hle tur kan ni" ka pa in a tih chuan ka nu pawn a pawm hmel viau, ka thaw deuh huai mai, tunah chuan Grace-i nen kan in kar hi tuman an ti chhe thei hauh lovang, Lalhriatzuali ngei pawn.



Lalhriatzuali POV



"I va zah pui awm em em ve, vawin khan kei i pa hi zak takin min siam tih i hria em?" Mike-a te chhuah hnu chuan ka pa in a ti a, kei erawh thinrim zetin ka thu ngawi kar, "Bawihi pa, khami te thusawi kha engtinge i awih theih zawk, kan fanu hi ka hrechiang khatiang kha a tilo tawp ang, kan fanu pawisawi lo leh nun nem tak hian engthil sual mah a tih ka hrelo" ka nu in a lo ti vat a, "Lo ngawi rawh, nangmah vang a nih hi, i fate hi a lo tan hlur zel a, tunah chuan kan zilh that tawk loh zia a lo lang mek a nih hi" ka pa in a tih leh chuan ka thaw hak a.




"Pa enge tih sual ka neih a, dawt ka sawi hleinem, bakah Grace-i u khan thudik hriat a phu alawm, thudik ka hrilh mai chauh a ni, enge tih sual ka neih vak?" ka tih rual chuan ka pa chu thinrim hmel lutuk in a rawn ding chhuak nghal, "Nang hian i thil tih sual pawh i hrelo amaw, mi hrang in kar a thil thleng lo sawi chhuah theih na dan I nei em?" ka pa in a tih chuan thinrim ve phat in "Mi hrang in kar ni lovin ka mipa hmangaih a ni ka pa, Mike-a ka hmangaih zia chu i hrechiang a nilawm ni?" ka ti ve ta that a.




"I aw ki kha san hlek suh, zah na chang hrelo lutuk, Mike-a hi hmangaih nila mipa dang lakah i phatsan dawn em ni, eng ang hmeichhia nge maw i nih le, zah na chang hrelo i thil tih sual avangin tun hun hi i thleng tih hria la, Mike-a leh a nupui hual in kar ah buai na siam tum tawh suh ang che" ka pa bawk chuan a ti leh a, "Teuh lo mai, Mike-a hi ka ta tur chauh a ni ka ta tur, hmeichhe dang lakah ka chan hauh lovang" ka ti leh that a.




Ka pa che deuh phut chu ka nu in a lo dang vat, "Pa.. i fanu ka ni a, min hriatthiam zawk ka ring a sin, ni e thil ka ti sual ngei alawm, ka in chhir lutuk bawk, Mike-a hnenah pawh vawitam tak ngaihdam ka dil tawh, hun rei tak chhung kan lo in zui tawh a, engvangin nge ka thil tih sual chhete chu min ngaihdam ve mai theih lovang ni, Grace-i kha a rawn lang a, a ni fahrah lamah khan Mike-a hi chuan ka tum reng reng lo, ka neih theih hma chu ka beidawng lovang" ka biang a ti nghal sawk.




"Hmeichhe zah pui awm lutuk, nang ang hmeichhia fanu a ka nei che hi ka awih theilo hial zawk, Mike-a laka i chet dan kha thil tih sual chhete i ti amaw, khawvel ah hian in phatsan na hi ngaihdam har ber te zing a mi a ni, ngaihdam na awm mahse in tin leh chu thil theih loh tluk a ni bawk, i chan tawk chiah i hmu tih hria la, Mike-a te in kar ah chuan in rawlh tum tawh suh ang che, a nih lova thol dang tih leh i tum a nih chuan keimah ngei hian hrem na ka pe ang che, chhoh pui rawh, a hmel pawh hi ka hmu peih lo ve" ka nu en pah chuan a ti hluk a.




Ka room lamah chuan ka tlan chho a, room ka luh fel rual chuan ka nu in min rawn zui lut nghal "Bawihte engvangin nge khatiang thil kha i tih a, thil tha a nilo tih i hria em, nangmah vangin hmeichhe pakhat pawisawi lo chu natna khum ah a mu mek a sin" a tih sep chuan ka ner sawk a, engah mah ka ngailo, a duh chuan thi se ka tan engmah a ni hleinem, a nau thil tih sual man a hmu ah ka ngai.




"Nu enge tih sual ka neih vak, engmah tih sual ka nei hleinem, a nau khan ka mipa hmangaih min laksak a, a chan tawm chiah a hmu a nihkha" ka tih zawh rual chuan ka nu chu a ding vut a, "Ka fanu i nia, engkim ah i lam ka tang thin, mahse tun a i thiltih hi chu a mah mah tawh, i lam ka tang ziah a, ka tang tawh lovang, ka fanu i ni a, thil sual i tih hi ka en liam mai mai theilo che, Grace-i thusawi kha a tir ah chuan ka awih sak lova mahse i awmdan atang hian engkim chu ka hrethiam vek tawh" a ti ta hmak a.




"Kei i fanu ai hian kha hmeichhia hnuai hnung lutuk fahrah lehnghal lam kha i tang zawk amaw, ka nu i fanu ka nilawm ni, ka lam tang a ka thil duh ka neih theih nan a min ṭanpui tur zawk i nilawm ni?" Ka tih that chuan "A dik i nu ka ni, i nu ka nih vang reng hian a ni i thil sual ti tur ka phih theih loh che,, nangpawh beidawng rawh, i pa thusawi kha hre reng la, a pawi thui tak tak hma hian i thiltih tum engkim ban san ang che, a nih loh chuan kei ngei pawh hian ka fanu i ni tih hi ka theihnghilh ang" ti hmak in a chhuak a.




Tinge min hriatthiam duh miah hlawm loh, ka duh ka neih na tura ka thil tih hi enge a sual viau na, hah... A tha e, lam tang tumah ka mamawh lo, keimah chauh pawh in engkim ka ti thei, ka thiltih tum hi tuman min dang chuang lovang, 'Mike lo nghak rawh, ka ta i la ni tho tho ang, ka beidawng dawn reng reng lo, ka ta ka pasal tur chauh i ni, lo nghak rawh, ka ta i nih hunah chuan kan pahnih chauh in hlim takin kan awm dun ang' ka ti sap a.




A tuk lamah chuan Nu Hlutei ka bia a, in hmuh ka duh thu ka sawi chuan a lo rem ti hlauh, ka nui sak a, ka la beidawng dawn lo ka tih tawh kha, Mike-a leh Grace-i te in tawn dan engkim a hriat hunah chuan a monu atan a pawm tawh hauh lovang, Grace-i chanchin a hriat dan zawng zawng nen pawm mai a har viau tawh ang, Nu Hlutei hi ka hmin ngei ngei a ngai, a ni hi ka hmanraw pawimawh ber a ni tlat.




In atang ka chhuah dawn chuan "Lalhriatzual khawi a kal nge i tum?" Ka pa in sitting room atang chuan a rawn ti hmuk a, "Ka chhuak lawk dawn" ka ti a, "I chhuak dawn tih ka hria, khawi a kal nge i tum?" A tih leh chuan thaw hak in "Ka thiante nen kan chhuak dawn, lungngai suh, engthil mah tih ka tum lo" tiin a tawng leh hma chuan ka chhuak ta daih a, in la strict lutuk, nula ka ni tawh a, min control tum eng ang mahse a thei chuang lovang.




Nu Hlutei nen kan in hmuh na tur ka thlen chuan a lo awm vang tawh mai, nui sangin ka pan hnai a, nidang angin a hmel hmuh a nuam teh chiam lo, mahse chuchu ka ngai pawimawh ber lo, "Enge min hmuh duh chhan chu sawi nghal mai la, ka hmanhmawh deuh a" ka thut thlak rual chuan a ti a, "Chumi hma chuan coffee kan in dawn mi niang, kan chah ange" tiin waiter chu ka lo a, coffee no hnih chu ka chah nghal.




"Nu Hlute ka thu hrilh tur che hi mak i ti viau a nih pawh in ka dem lo che, keipawh hian ka hriat tirh chuan mak ka ti lutuk, awih harsa ka ti zawk hial, mahse i bula ka sawi lo a nih chuan ka in thiam thei dawn silo a, hre ve ngei la ka duh, Mike-a leh Grace-i te in tawn dan a nia, pangngai taka in tawng emaw ka ti a, mahse..." Tiin an in tawn dan vel chu ka sawi a, a u vangin a thianghlim na a hralh tih erawh ka sawi lang duh hauh lo thung.




Ka sawi zo a, Nu Hlutei ka en chuan mak ti hmel a pu lo, a awmdan chu keimah zawk hian mak ka ti hial, "Nu Hlute" ka ti a, "Aw.. ka ngaithla alawm, sawi belh duh dang I la nei em?" Pangngai takin a ti leh, "Ih.. englo, mak i ti miah lo em ni?" Ka tih chuan "Ka hriat sa vek I sawi a, mak tih vak na tur a awm rawh em ni?" A tih leh lek phei chuan keimah zawk hian mak ka ti zual, engkim a lo hre sa vek amaw!..




"Engkim i hre vek tawh chungin Grace-i chu i monu atan i la pawm thei amaw?" Ka ti sap a, "Aw.. hriat kim loh i nei in ka hria, Grace-in khatiang thil a tih chhan kha a u vang a ni, i la hriat loh takin" tiin a nui a, "A thianghlim na sum in a hralh tho a, hetiang hmeichhia hi i fapa nupui atan i pawm thei tak meuh ang maw?" Ka ti nawn leh, "Aw.. ka fapa nen an in hmangaih zia leh, Grace-i hian a hmangaih te tan engmah tih hreh a neih loh zia ka hmuh sak zawk a sin, ka chhuang takzet bawk" a tih leh phei chuan ka in hum ruh tung tawh.




"Mahse.. Grace-i te chu fahrah mai mai a nia, nu leh pa pawh a neilo a nia, chumai nilo a ni hian i tu tur pawh a hrin sak theilo maithei che tih i hria a nilawm ni?" Ka tih leh hram chuan "Hriatzual mi pahnih an in hmangaih a, chutah chuan dinhmun dang a ni emaw chhungte a nei emaw fa pawh nei theilo pawh nise a pawi na a awm dawn em ni, a pawimawh ber chu hmangaih na a ni tho tho, ka fate hi hmangaih na diktak in an in hmangaih tih ka hria a, chuchu a tawk ka ti" a ti leh a.




"Tinge hetiang em em hian Grace-i hi i tan tak a, a hma te kha chuan keihi i monu turin min duh thin em em a, i fapa nen kan in neih ngei theih nan theihtawp i chhuah kha a nia, Grace-i kei aiin i monu atan i duh zawk amaw, i fapa ka hmangaih zia chu nangpawh hian i hrechiang a nilawm ni, rei tak chhung kan lo in ngaizawng ve tawh a, ka lak atanga a in la hrang ta daih pawh hi ka tan hriatthiam a har sa nen hetiang hian nang leh zel i awm leh a, engtinge ka awm ve tak ang?" In la khawngaih thlak zet chuan ka ti a.




"Hriatzual enge hriatthiam loh tur awm, ka fapa nen in in then chhan chu a lakah i rinawm zawh loh vang a nilawm ni?" Nu Hlutei a rawn ti kha ta fak a, ka meng nghal kawk, engkim a hre vek tawh amaw, "Nu Hlute" ka tih sep chuan "Min bum reng theih i in ring em ni, dawt tamtak min lo hrilh tawh a, a tawk tawh em em e, i thiltih avanga in chhir a hnek in hetiang hian i la che ngam a nia, hmeichhe hlauhawm tak zawng i ni e" a ti ta hmak hmak a, hetiang hian Nu Hlutei la laka a awm ka la hre ngailo bawk nen mak ka ti hle.




"Nu Hlute thil hriat sual i nei a nih ka ring, chutiang..." Ka tih mek lai chuan "Thil hriat sual engmah ka neilo, nang zawk hian dawt min hrilh thin, i nihna diktak hi ka hre vek tawh, nanghi hmeichhe hlauhawm tak i ni, ka mo i lo ni hman ang tih te ka hlau zawk e, Tluangi chunga thil thleng tur hre sa reng in Mama te in kar pawh i sawi tih ka hria, ka fapa phatsan chungin engtinge in thiam loh na nei miah lovin ka lakah i la awm ngam zawk ni, zaktheilo lutuk, vawikhat mah min rawn be tawh suh ang che" tiin a kalsawn a, thinrim in hum ruh tum a en liam bak tih theih ka neilo.




A tha e, tunah ka mamawh hrep lo che u, keimah in engkim ka ti vek mai ang, kei aiin Grace-i mo atan i duh zawk thu i sawi tiraw, hah.. tunge i mo chu kan la hria mah chu, Grace-i hi i moni nih tur ai chuan thih pawh ka duh zawk, restaurant atang chuan ka chhuak a, in lam pawh pan lovin ka thiante chu ka bia a, in hmuh ka duh thu ka sawi hnuah ka kalsawn nghal.



Mike Lalruattluanga POV




Damdawi in lamah ka kal a, Tluangi chu a lo muhil a, Nu Mapuii te nupa pawh ka thlen hnuah reilote ah in lamah an haw a, Duati nen a u chu kan awmpui a, "Nizan lamah te enge in an?" Ka tih sup chuan "Eng kan ang lo, a harh tha peih lutuk lova, vawin pawh zingkar ah khan a rawn harh a, a lum a na vak a, doctor ten damdawi a an Chiu hnuah a la harh leh lo" thaw hap ching chuan a ti a, a u a hmangaih em em a ni a, engtiang takin nge a rilru a hah ang ka hriatthiam pui phak lo.




"Vawinah I u tan doctor ka biak hi a lo thleng dawn a, lungngai reng reng suh aw, I u tan engkim kan ti ang, a dam leh em em ang, a dam theih nan theihtawp kan chhuah dawn a nia, i bulah ka awm tlat tih theihnghilh lo la" chubak a han hnem ngaih na vak pawh ka hrelo, "Ni e, a dam leh ngei ngei a ngai, ka in nghah na ber a ni a, min enkawl vangin hahdam tak pawn a awm ve hman lo, nuamsa taka a nun hman tir ve ka la ba a ni" a ti sep a.




Ngawi reng a kan thut dun hnuah "Nimin a i thil sawi kha" a rawn ti ta sep a, "Engkim kha thudik vek a ni, mipa ka ni a, Hriatzuali kha rei tak chhung ka lo kawp ve tawh a nih vangin tih mualpho kher a ngai a ka hriat loh vangin tu hnenah mah kan in then chhan ka sawi ngailo, mahse a ti mah mah tawh a ni, tikhan a tha, a nihna diktak kha a nu leh pa te pawn hriat ve an phu alawm" ka ti mai a.




"A mak ka ti e, pangngai taka in then turah cheu ka ngai a, tunah lah a la ti buai reng che sia, nang hian beisei na i lo la siam sak thin pawh a ni maithei bawk a" a tih chuan ka lungawi lem lo hle, "Duati eng beisei na mah ka pe ngailo tih chu i hriat chian kha, hmeichhe zaktheilo tak a ni a, khatianga a che ngam pawh kha thil mak a ni hleinem" ka ti hmuk, "Aw.. a nihchu, dar engzah nge?" A rawn Ti ta daih a.

Cont....


Ka thla hlawh ka la a, ka taksa hi a sil na thum a, story type tui pawh a har, tawi mahse min hrethiam hram hram mai dawn nia u aw..