MY KRYPTONITE CHAPTER - 10

[Luna Pachuau]

MY KRYPTONITE
CHAPTER-10
BY
Christy pachuau




Ka phone chu a rawn ri a, ka en chu Rinfela a ni. Ka hnuaia thawk ani...
"Hello..."


"Sir...case thar a awm a, damdawi tawlh ruk chungchang a ni e. I tello chuan kan tifel theih ka ring lo" a rawn ti a, ka thaw hak. Heng hna te hian min hmet chau zo takngial dawn a ni. Ka let vat tur thu sawiin kan inbiakna chu kan titawp a. Ka kal hma chuan kha Luna te in kha ka en leh vang vang a, an rethei lo tih a hriat...amah pawh kha nurse a ni nghe nghe a ni lawm ni??? Ngaihtuah zui duh lo chuan ka tlan chhuak a, engkim ka la zawt chhuak vek tho ang.


Hmani a kan inhmuh a min melh dan leh a awmdan atang khan min hre ve tih ka hria a ni. Engkim hi hriat chhuah vek ka duh. Nun dang hmang tha leh ang mai ka ni, engkim ka ngaihtuah chawp angai a. Nitin deuh thaw tih mai tur hian hmelhriat thar ka nei a. Ka tan chuan mi thar vek an ni, mahse annia tan chuan hriat tawh hnu, an lo kawm ve thin ka ni tlat lawi si. Achang chuan hrehawm ka ti thin.


Ni khua ka lo hriat leh tak hnu khan ka nu leh ka u hmeichhia chauh ka hre thei tawh a, ka pa leh ka chhung dangte pawh ka hre tawh lo. Police officer ka ni tih ka inhre bawk a, abak engmah ka hre thei tawh lo. Doctor te puihna in theihtawp ka chhuah a, mahse awmzia a awm thei lo, a tawpah keimah bawk ani chau leh ta ni.


Ka nu hi ka nu tak ni lo in ka nu hrawn a ni a, mahse ka nu tak ang chiahin ka en thung. Ka thisen zawm ka pa ai pawn ka pawh a, ka nel zawk a ni. Ka nu pawh hian a fapa tak tak angin min en a, ka tan chuan ka engkim a ni. A thu lo a awm pawh ka hlau hle thin. Ka nu tak tak zawk hian ka tetlai in min uire san a, ka pa in ka u hmeichhia nen min enkawl sei lian a. Mahse MLA te alo nih tak hnu hian min buaipui leh enkawlna hun a nei ta lo a. Kan innel lo chho ta tulh tulh a ni. Chu chu ka u min hrilh dan ani. Thlahtu te atangin chhungkaw rethei tak kan ni ngai lo.


Ka u hi chuan pasal neiin fate a nei duah tawh a, mahse ani nen hi chuan kan la inpawh reng tho. An in a ka riah chang lah a tam. Ka pa hmel ka hmuh hian hrehawm tihna ka nei a, keini aia sum a thlan vang pawh hian ka nel hleithei tlat lo.




Case kan chinfel hnu chuan in lam panin ka inkhalh haw a, ka lu na bur chu a hrehawm hle a ni. Kar leh hi ka in check up hun a ni a, a ngai te te bak an sawi leh chuan ka ring hran lo. Ka chhungril hi a chau a ni....
Ka u sawi dan chuan kham ah ka tlan liam a, thla thum zet nikhaw hrelo in ka awm a, chuan ka hriatna tam tak ka hlauh bawk a ni. Mahse ka tlan liam ni a thil thleng takngial pawh ka ngaihtuah chhuak thei lo.




In ka thlen chuan ka nu ka hmu nghal zat. Zan dar 8 a ri dawn tawh a, a lo awmna atang chuan min lo nghak tih ka hre nghal zat. Min hmu chu min rawn pan nghal chawt a, table a tui chu ka in nghal khawlh khawlh. In paih thawl ka ngai a ni, tunah hian ka chau takzet a ni.
"Bawiha...ilo va haw har ve a. I ril te a tam em?" Alo tinghal zung zung.


"Tam lo...dinner ka ei tawh a. Mu tawh rawh ka nu. Keipawh ka intifai ang a, ka mu ang" ka ti a, kan inmangtha fel hnu chuan ka room lamah ka chhohsan a. Eng sawi set set lo chuan shower hnuaiah ka ding nghal vang vang. Ka mitthla ah khan hmeichhia Luna bak kha a awm thei lo. Ka biak ngei chu angai dawn ani. Power a nei hial zawk em ni???!!!




Ka notification chu kan check leh phawt a, Rinfela message vang chuan ka nui suk. Luna chanchin a ni, khami ni a min kalsan hnu khan a kalna bul dawr velah ka vak kual chiam a, a tawpah dawr Pakhat ah pitar hian a hming alo hre hloh a. Rinfela ka chhuizui tir nghal a, hun a duh rei lo khawp mai.
A phone number chu ka save nghal a, call ka tum zet na chu ka thulh leh ta zawk. Zan a ka call chuan ka tihlau mai mai ang tih a hlauhawm zawkin ka hria.
"Luna..." A thlalak chu en in ka tisup. Mawi ka ti thar riau bawk. Google ah chuan a hming awmzia chu ka en a, 'thla' tihna ani, ka nui ta suk. A mizia nen pawh a inhmeh hmel mai.




Zing lamah chuan tho hma in ka walk a, ka tih thin dan ziah anih vangin thawh pawh ka harsat tawh lo. Coma a ka awm atang khan nun dan pangngai takin ka awm hleih thei lo a. Ka buai leh thut thin vang khan awmpui deuh chawt pawh ka ngai fo. Chutiang hunah chuan ka nu bak ka hmu ngai lo. Damdawi in a ka awm chhung pawh khan ka pa chu vawi 1 chauh alo kal...chu pawh ka harh ni. Abak chu kan in video call char char thung. A zin chhuak reng a, hna a ngah bawk si. Ka tan hun a nei ngang lo a ni.




Ka haw leh hnu chuan intifaiin ka form ka ha a, vawiin chu ka tlai deuh avangin breakfast pawh ka ei hman ta lo. Mahse ka nu chuan ka tiffin pai tur chu min siamsak ta tho. Lunai kha hrechhuak thutin ka nu lam ka pan leh a, ka nu pawh hian a hre hrim hrim ang.
"Ka nu...henu hi i hria em?" Tiin Luna thlak ka neih chu ka hmuh a, a rawn enchiang chu a hmel a pangngai ta hauh lo. Hlauhna mitmeng a ni. Thil tisual te hi ka dawp ve nasa thawkhat tawh, he mitmeng hi chu ka hrechiang mah mah a ni.


"Dawt ka duh lo" ka tisup, eng emaw dik lo chu a awm ani


"Engmah a nilo bawiha. Keipawn tunge anih ka hre bik miah lo. Dar a tlai tawh, kal tawh rawh" a ti zung zung a. Chiang takin dawt a sawi tih ka hria. Zawt zui duh ta lo chuan ka kalsan ta zawk. Thudik a sawi dawn chuangin ka hrelo. Kha Luna kha ka zawk mai ang.




Kan office lama ka hna te ka zawh fel hnu chuan in ah haw hmasa lo in gym ah ka kal hmasa a. Eng vang teh hrep nge ka hrelo kha Luna chauh kha ka rilru ah a awm. Ka rilru ah hian zawhna tam tak a awm a, chuvang pawh a ni mahna. Accident ka tawh hnu khan kum khat chhung ngawt chu hna thawk thei lo in ka awm a. Mahse ka hna ka chawlhsan duh loh vangin theihtawp ka chhuah a, Retreat te neiin ka hna ngai kha zawm leh ka tum ruh em em bawk. Ka pa puihna hi ka ngen ngai lo nachung khan ka hna ka zawm leh theihnan min pui tura ka ngen pawh kha ka la hrechiang mah mah. Ka tih leh ngai tawh loh tur a ni.




Zan dar 6 velah in ka thleng a, ka pa leh ka nutei pawh an lo awm vang tawh. Ka nutei hi ka nu nau a nia, cosmetic dawr a nei a, bula senior kan tih ang kha a ni.
"Wow... brandon in a awm dun theuh theuh kan va inhmu khat ve tiraw?" Alo ti a, ni thau lam, sang tha ve tawk tak a ni. A lu pawh a zo vah vah khawp mai.


"Tunlai chu kan buai lutuk a" ka tilet ve a, ka nutei pawh hi kan unau tan hian a inhuam bawk a, ani pawh hiam rilru chhe em em ka lakah a put ka hre ngai lo.


"I nau pawh naktukah alo haw ang" ka nu chuan a ti a. Ni e...ka nu leh pa inkarah fapa a awm tih ka theihghilh hman thelh alawm le. Nau mipa ka nei a, kan innel lo tih dawn chuan a ni chiah chuang lo. Kan inbe tam vak lo mai chauh a ni. Goa ah college a kal a, a awm tirh khan min rawn be fo a, hrehawm a tih thu pawh a sawi ve vek zel. Mahse kan inbiak lohna pawh ka rei leh tawh.


"Ka nu...chaw ka ei lo ang aw, chhuahna tur ka nei a" tiin ka room lamah ka chho a, ka nu chuan min rawn la au zui tang tang tho. Kum 37 na ka hmang tan ve mek a, nupui nei tur pawn min tur reng tawh bawk. Mahse chutiang buaipui erawh ka la tum chuang lo. Neih tur chu an tam, mahse inneih dawn phei chuan thinlung in a duhthlah ngei chauh neih ka tum. Turna vang emaw hmanhmawh vang emaw a neih ka tum hauh lo.


Mipa ka nihna angin hmeichhe duh zawng pawh kan nei ve bawk a, kan lo beisei ang nge ka nei ang chu ka ti hauh lo, mahse a tha ber hi beisei phawt a tha mai. Nula ho lam leh nung ho lutuk hi ka duhzawng an ni lo a. Dinhmun ah chuan ka buai lo khawp mai. Mizia pawh hi kan sawi tam tawhin ka hria, mize ti hrek hruk nei lo se, kawi ngher ang chi hi awm ve a nia. Kei chuan ka duh chhun chu ka fate tan nu tha ni thei tur a ni. Inneih boruak te hi chu a ral vat dawn, a tawpa pawimawh ta ber thin chu nu an nih hun chauh hi a ni. Chawlhni zinga ka fate thawhlawm semtu atan a tlak ani ka duh ni.




Ka inthlak fel hnu chuan ka inkhalh chhuak leh a, kha Luna te in lam kha ka pan vut. Min lo biak duh pawh ka ring chuang lo na chu ka zawhna chhanna hmuh ngei chu ka tum ruh hle thung. A phone number chu ka call a, rei a ring lo. Hmeichhe aw duhawm zet chu ka hre nghal zat.
"Hello..."


"In ah i awm em?" Ka titeh tlawng a, he hmeichhia hian ka sawi tur a tibo vek maiin ka hria, ka zam ve hrep a maw ni!!!


"Ohhh...tunge i nih a?" A rawn ti ta reng a, ka nui suk. Ka number pawh a neilo anih hmel.


"Brandon Zothankima..." Ka tih takah chuan a reh ta vang vang...."Ila awm em?" Ka ti a, min chhang chuang lo. Mahse call chu a titawp chuang bawk silo.


"I mawl ami? Min chhang ta che" ka ti ta hrawk. Ka dawhtheihna hian a tlin dawn lo.


"Engtin nge ka number i neih?" A rawn ti ta a, ka thaw hak.


"Min hrelo der nge min hrelo tak tak zawk?" Ka ti a, ka motor khalh lai chu an inkawt ah ka tiding nghal zat bawk. Kan inhlat lo hle mai.


"Enge i duh?"


"Thudik..." Ka ti ta sup, zanin hian thudik min hrilh lo anih chuan eng chena thui nge ka kal duh dawn tih chu a ngaihtuah phak bak a ni ngei ang.


"In inkawt ah ka awm, lo chhuak rawh" zawi sup chuan ka ti a. Tihlauh erawh ka tum hauh lo, thudik hriat k tum mai chauh ani.


"A teuh lo...engvangin nge ilo kal ringawt???? Haw rawh..." A rawn tituarh a, ka nui suk. A kawlh ve hmel reuh zek a.


"I damlo te bulah khatiang khan i au lo nge ka beisei..." Ka ti a, amah hmu lo chuan ka let hauh lo ang.


"Lo buai suh..haw rawh" a rawn ti leh a, ka motor horn chu ka hmet ri nghal tuarh tuarh.
"I lo chhuak dawn nge, ka chhunzawm dawn" ka ti a, call chu a off zui daih bawk. Alo chhuak khawp ang. Horn chu ka hmet zel a, rei a rial lo, an gate chu rawn hawngin amah ngei chu a rawn chhuak a, ka tukverh bulah chuan a rawn ding nghal zat. Glass down in amah chu chiang zetin ka en a, a hlauthawng hmel te, a vung nung sarh te, a hmui chhah tap te, a hnar ngul bawng silo a te em em te. Engkim chu ka hmuchiang takzet.


"I â ami??? Tah hian i duh duh danin i awm thei lo a nia" a kut ka hmai zawna rawn ber kharh kharh pah hian a ti a, ka harh nghal zawk. Henu hian power a nei tak tak anih ngei dawn hi.


"Heta inbiak nge hmun danga inbiak i duh" tiin ka zawt a, a rawn meng nghal kuau mai. Hmuhnawm tizetin ka lo thlir reng thung, a lung nih loh hmel khawp mai, a nuihzatthlak lek lek alawm maw le....


"Ka be peih lo che, ka hre ngai lo bawk che. Haw rawh" tia kal mai a tum chu horn ka hmet ta vak a, a rawn phei rang leh lutuk chu ka nui ta suk. A nuihzatthlak lutuk...


"Min hria tih ka hria alawm, kan lo inngaizawng ve tawh thin tih pawh ka hria" ka tih chuan zawhna mitmeng hian min melh nghal a, kawngkhar chu hawngin ka chhuak nghal vut. Inhma tawn ran chuan kan ding a, ani chuan min en ngar mai.


"Keimah ah hian nagmah ka hmuh che khan zawhna tam tak alo awm a. Tinge...engvang nge...nangmah chauh ka ngaihtuah che??? Power i nei zawk em ni? Ka bialnu i nih thin si chuan tinge min hrelo ang a i awm tlat. Ka hriatna ma hloh avang hian min duh tawh lo tihna em ni?" Tiin ka zawt a, a mittui chu a rawn tla ringawt bawk. Henu awmzia hi ka hre tawh hrep lo e ahhh!!! Min hrelo anga awm siin a mittui a tla reng bawk si. Ka lo tina viau thin emaw tih hial tur a ni


"A dik em? Ka hriatna ka hloh vang hian min hmusit tihna em ni?" Tia ka zawh leh chuan a lu a rawn thing nghal vak vak, a inhnih feih feih bawk. Tihngaihna hrelo zet chuan ka en reng tawp.


"Aih...nilo...chutiangin ka ngai ngai lo. Min ring rawh" tap tiau hian a ti a, ngawi rengin ka lo en reng thung. A thin zawn chu a phut dat dat reng a, a na lek lek bawk. Ka awmdan vang chuan ka hrilhhai lek lek zawk. Hetiang hian ka awm ngai lo.


"Kan awmdun hi a rem lo, min ring rawh. Hnaih che hi ka duh alawm mahse ka thei lo. I nat leh hi ka phal tawh lo" a tih chuan ka thaw ta hak. Engmah a sawi awmzia hi ka hrelo. Envmah ka ngaihtuah chhuak thei tawh bawk silo.


"Enge i sawi awmzia?? Chiang deuhin sawi ta reng che" ka ti ta hrawk, ani lah chu a rawn tap uar sauh ni maiin ka hria.


"Ka thei lo alawm, khawngaih in lo kal tawh suh. Haw rawh... inhre ngai lo angin awm ang" tia kal mai a tum chuan a banah man bet in ka Bolero ah chuan ka nam bet a, ka awmdan hi keipawh ka inhre thiam tawh lo.


"Ka thei hrep hleihnem...nangmah ka hmuh apiang che hian ka thil hloh tawh hmu let leh ang maiin ka inngai a. Engkim ka hre duh ani" ka ti a, a rawn tal phat phat nangin ka hnai zual sauh. A taksa sa chuan ka rin loh lam lutuk ah min hruai lut a, ka thisen lo lum ve phat bawk. Ka â tak tak tawh pawh a ni mahna. Ka in control hram hram angai a ni. Chuti anih loh chuan he hmeichhia hian min hlauh belh mai ang.
Engvanga chutiang care teh chai nge ka nih pawh ka hre hrep lo e ahhh!!!!


"Nih chuan tinge i chhungte i zawh mai loh?? Kei chuan engmah sawi lo tur leh nangnah hnaih lo tur che hian ka intiam tawh. I chhungte zawh tur pawh an awm reng. I duh leh i fapa pawh zawt rawh" a rawn ti chu ka hrilhhai lutuk. Engtin nge fapa ka nei tih a hriat hrep ni??? Fapa ka nei toh hi ka nu lam leh ka pa lama ka chhungte lo chu hria an tam lo khawp ang.


Luna chu sawi sual inti zet hian a rawn meng kawk a, a hmui q hup nghal chawih.
"Engtin nge fapa ka nei tih i hriat? Ka hmeichhia i nih thin chuan i hre reng ang che. Luna...engkim sawi teh, he hriatna vai riai hian min hmet chau tawh anih hi!!!" Ka tizawi sup a, amah pawh ka thlah nghal vat bawk. Rang lutuk hian a rawn che phat a, min hlat nghal vut.


"Aw..ni e...ka inkawp thin alawm, mahse i rawn harh atang kha chuan kan inkar ka titawp daih tawh. Engmah hrelo angin awm rawh. Min. Hrelo pawh hi a tha... Min hrechhuak ngai miah suh" a ti a, an in lamah chuan a let nghal zat. Amah chu ka en reng a, dan pawh ka tum lo. Engmah a sawi dawn lo tih ka chiang lutuk.