BEISEINA (chapter-7) by Mara_Djm

[Mara_Djm]

Fur kan lut tan e ti loh chuan ni ala sa vur a, ruah pawh zing lamah leh zan tlai lam takah chauh reilote tan a sur thin. Kan school tual zawlah chuan house theuhin kan intlar a, kan Higher zirtirtu te leh Vice principal chu teachers' cabin building hnuaiah an thu tlar ve thap bawk. A hawn nan vice principal-in thusawina tlêmte a neih zawh chuan kan sport teacher-in item kan neih dan tur a sawi veleh bawk. Intlansiakna kan neih hmasa dawn.



James pawh rin ang ngeiin leader anga a che vel chu a hmuhnawm takzet! Mipa intlansiakna ah tel tur pahnih, intlansiakna tur lamah a kal pui lai chuan lo hawi letin, ka ding reng min lo hmuh chuan a mit ko lo san ak in, amah zui tur chuan a banin min hui zeuh a. Ka thiante lam ka va en chuan an house theuhah an lo buai ve map bawk nen James lam chu ka kal ta zawk a.



"Eng nge ni ta" a bul ka thlen chuan ka zawt a.



"Leader chuan a Assistant a mamawh Alawm" nui sukin alo ti. 'hmm' tiin lu ka bu ringawt.




Pahnihna kan la ve. Hmeichhia hun ani chuan kan house lam pan tur chuan ka inher a, James pawh kan house atanga pahnihna la tu nen ka hnung lamah an lo kal ve bawk. "i ti tha lutuk ania" James in ati chuan chu pa chuan lawmthu a hrilh sup.



Hmeichhia ah pathumna kan la. Kan ti chhe miah loh. Mahse pakhatna la tu red house ani erawhin lung a tihdam chiah loh. Jane-ngaituah maksak-i chu lo tlanin ka hmaah tak inti thei zetin alo au nghek pek alawm.



Item dang pawh kan ti chhunzawm mawlh mawlh a, kan house pawh kan che chhe loh. Blue house aiin kan che tha zawk ka lawm rualin, Yellow house te nen kan intluk thei thin lutuk chuan lung ala dum loh. Chu chu tu dang nih lovin ka thian duhtak Hlu-khirhnu vang.



Jane angin min lo au khum ve nghek loh mahse êl sen deuh a,"Duh-hawtnu, i thluak kha nidangah khek la, i kâ kha in house tihphur nan han hmang teh le" alo ti tak chu ani! Ka hming neih tharte nen thleng chuan.



Tunah chuan volleyball.


Ka mit ka la sawn thei loh. Ka bula kan house hmeichhiate angin au ve nghek tur ka nih mahse ka kâ reng ka âng thei loh. Che chang lek loh leh mit la sawn thei lova min siamtu chu tudang anih loh, amah James-a. A khelh ve thin ti chu ka hria, ka lo hmuh ve tawh zeuh zeuh thin bawk. Mahse hetianga chiang hian ka la en ngai loh.



Rilru pe tih hriat zet hian a chal a ti chuar tap a, a meng tak run bawk. A khelhpui te chu lehlama kan house khelhpui te ang loh takin a au khum ve loh mahse a tawng erawh hriat fiah theih khawpin a nghet tha. A sang tha ve bawk a, leh lamin an lo ben khum chu alo dang thei zia. Ka bula hmeichhiate mit ala takzet tih lah a hming an lam ngun dan atangin a hriat. Ka thaw hliai! Vana arsi lak tum ang ani.



First half an zawh chuan kan house mipa ho chu tui in turin keini hmeichhiate din khawmna lamah an lo phei a, an lo thlen chuan James chu 'kha tui aw' tia bottle an pek chu, "midang pe hmasa ula" ti supin ka lamah alo phei a, tui ka ken mi chu min lo dil ani chu! Tui pek tum tu nu chuan min lo melh ram hle ti ka mitsirin ka hmuh reng. "Kha" tiin ka pe ve mai bawk. 'ai, i hnawl sak tâ nu saw'n min melh hlum dawn' tia pek loh a thei ngawt si lo hek.




Tui a inzawh chuan ka bulah hnai zet hian alo ding run nghal a, amah ka en chuan hah hmel pawh a pu loh, a fit ve hle ani ang. A hmai inrem fuh takah erawh thlan a luang ve zawih zawih.




"Ka lai ve thei tho ania" chutia ka en reng lai chuan alo ti zawi rui.


"Takzet?"


"Umm"


"Nih le ka'n en chiang lehzual ang che" ka taksa pumpui a lamah ka inher pui nghal hmia.


"Eng nge i hriat a?"


"ka ti lai dawn che....engvangin maw i lai ang?"


"Min en avangin"


"Hmeichhia zawng zawngin an en thin che"


"Hei chu a danglam" Min la en miah loh bawk.


"Engtin chiah in maw?"


A kâ a âng zauh chu a lu a thing zawk ringawt.


"Sawi la" Lu a thing leh. Hmalam a la melh run bawk.


"Hmm engkim ka bulah i sawi tur thu i sawi emaw ka tia" khaw atang nge hetia be tur hian huaisenna ka neih ka hre loh.


"Zahngaihna i tlachham" a ti hluk.


"i lai hmel ka la hmuh ngai loh"


"Hmuh turin min peh hel nasa lutuk thin ani kha" a thusawi chu ka hriat sual loh nan,"Engmaw i sawi a?" tiin ka zawt ngat. A sawi zawi lutuk alawm.


"i hmuh loh vang khan ka lai ngai loh tihna ani lo" alo ti hmuk. Mahse a thinrim loh ti a beng sen tawn tawnah a chiang. Ai, tunah tak hian a lai! Ka nui chhuak hak!


"Umm ka ring che" ka ti chuan min lo en ve ta nge nge in alo nuih vur vur. Referee an lo hâm chuan tui in vatin mipa ho hui zeuhin an kal hrang ta nghal a.



James chu an score apiang hian lo hawiin min lo nui suk thin a, kei erawh alo hawi loh lai zawng zawng pawh khan a lak atangin mit ka la sawn ei loh.







Pakhatna kan nih ti an puan lai pawh chuan, midang an zuan sup sup leh au chiam lai chuan amahah tho ka mit a tawp châwt thin a. Chutah Beiseina tul loh zet tinung tur tawk lekin engtiklai pawhin min lo en let tur nghah a ngai loh. Thliar kar, a lei leh tui(beach ang khan) intawk tura duan ang mai hian kan mit a intawk chat thin.



————



Ka alarm a rik hmain ka harh tawh! Inrin ni a ni tlat. Ka piancham ai mah chuan phone thar ka neih tur chuan min tiphur.



Ka insiam zawh hnu inhnuaia ka chhuk chu ka Nu leh Pa an lo tho fel diam tawh. Ka nu'n min lo hmuh chuan,"Thingpui in hmasa phawt ula, in kal chhuak dawn nia. In ril a tam lutuk ang" alo ti chuan lawmthu ka hrilh nghal vat. Nu te hmangaihna hi aw!



————



"Thalai leh an 'MC-ah' ve ziah na hi" tia ka Pa lu thing nghut chu ka nuih ringawt. Kan pahnih chuan MC building chhungah kan inzui lut a, ka kal duhna lamah ka hui zui bawk.



Mobile an zawrhnaah kan va luh chuan,"Lo leng rawh u" tiin a nghaktu chian min lo chhawn thuai a. Phone ka duh ang ka sawi hnu chuan a inmil ber tur chu alo phawrh chhhuak a, ka thlek vang vang hnu chuan ka lung a awi ta, "Hei hi aw" ka ti chuan man te kan pe fel a, dawr atang kan chhuak nghal bawk. Phone ka neih ve ta!




"He building-a restaurant awmah ei nghal mai ila" ka en chho chuan a banreka sana atang mit la sawnin min lo en a," i tlai tawh sia" ka ti chuan " tlem han tlai belh chu pawi loh turah ngai ang. A hun taka thleng thin ka ni tho a" tiin alo nui suk.





Kan kal mek lai chuan,"Bawihte, lawk!" ka Pa ka va en chuan lo nghak rih turin min lo mitmei zeuhin min ko dinna bul lawkah elevator nghak niawm taka ding run tu, taksa lian tak leh sang tak lamah chuan a kal phei hlawk hlawk. A bul ava thlen chuan a phun sup a, chu Pa hrawl ve em em chu a taksa che khawpin a thaw hrawi!



Ka pa chu thaw hakin a ding mar vut a, a kut chu a ipte ah a zen lut a, mit meng tak run hian chu pa chu enin a phun chhuak leh sup. Eng thil nge.....ni ta?!!!!



Chu pa lian zet chu elevator lam ala melh ngur avangin a hmel ka hmuh thei loh mahse ka pa kâ chet reng dan atangin a chhang ve zel ani ang. An inbiak dan atang chuan an khuhkhan hle bawk. Chutah elevator alo in hawng a, chu pa chu pen lut a tum a, ka pa in a banah alo man bet hmia! Eng emaw a sawi zui leh a, leh lamin alo chhanna a ngaithla a ni ang, a ngawi dat a, mahse a bêk pawng tulh tulh atang saw'n lehlamin alo chhan danah a lungawi loh.



Ngaituah hmasa loh chuan an lamah ka va pan hlak hlak a, chu pa lian-a hnung atang ke kâr li awm ti ah dingin,"Pa" ka ti sup bawk. Chuti rual chuan ka hma ami pa chu a taksa a khawng at! Mahse alo hawi loh. Ai, ka pa in a biak lai zawng khan vawikhat pawh ala en ei loh.



Ka Pa zawkin min lo en a, inthiam loh zetin,"Tipalh bawihte. Ka hmelhriat ka hmuh a, ka lo be reih deuh ani" alo ti a, ka lam pana alo pen tur chu, "Ka theih ang" aw thum dup,ril ruih-a zawi taka lo tawngchhuak tu avang chuan ka pa chu a ding dat a, chutah thaw halh a, phun hlukin "Bawihte,ka hmelhriat pa hi hmelhriat ve ta che"




Pa lian-a,a hming hre hek loh, chuti chuan ka rilru in a ko ve tawp chu muangchâng hian alo inher a, a sir lam atang chuan hnar ngul sâng vâ a neih a, a khabe ruh a kual tha takzet tih ka hmuh thei. Inherh zo a, hma min lo chhawn hnu chuan ka meng bial kâwk hman mahse ka insiam tha nghal vat. Awi, a hmel a pâ takzet! Hmeltha em em tih tur ani loh mahse a hmaitlang fang chu a inrem dik em em, a hmel a lang rum em em bawk a, a naupang zawk zawk tawh loh tih a mit sir chuar a hmel awmdan atangin a hriat theih. Huhang a neih na hle a, thutak run hian min lo en ve run bawk.




Mahse mak ka ti chu keimaha eng emaw hian ka vawikhat hmuhna ani loh tia min hrilhtu chu ani. Chuan ka ngaituahna mai mai nge ani ka hre loh mahse a mitah chuan lungngaihna ang deuh alo lang hman zâwkin ka hria. Mahse a rei loh lutuk,a hmel a tak run leh hman.



"U Nikolas-a nih hi" ka pa in alo ti hnuah chauh ka mit ka la sawn ve bawk. A hming chu a mawi reuh! Ka hming sawi tum a, kâ ka âng zeuh hman chauh,"I seilian ve ngei....mahse i mitmeng ala danglam loh" alo ti thum dut a, hun rei tawh tak atan inhre ang maiin min en run bawk.



Ka Pa chu a aw lo thian vatin,"Haw teh u, thil ei ang u" tiin kan pahnih chuan min hui zeuh a, Pa lian lam ka va en leh chuan min lo nuih suk!




Upa deuhin ka mit an la lova ka vannei, chuti nih loh se a zuna uaih a na ve ngawt ang!




*Ka story ilo chhiar avangin ka lawm e*