MY KRYPTONITE CHAPTER - 9

[Luna Pachuau]

MY KRYPTONITE
CHAPTER-9
BY
Christy pachuau




Zothankima chu ka mittui kar atang chuan ka en ran a, ani pawn keimah chauh min en...keimah chauh. A mitmeng atang chuan min ngen mah zawkin ka hria. Hlauthawng hmel a pu bawk.
A chhungte chuan a lakah enge an tih chu ka hrelo, mahse ama chhungte leh ama in a hlimna a hmuh loh chuan khawiah nge hlimna a hmuh chuan ang???? A aw atang a beidawng tih ka hrethei tlat bawk si.


"Aw tiin min la chhang te chuang lo ami?" Rilru na tih hriat zet hian a thaw hak a, hma lam a melh tlat bawk. Zanin hian hnawl chu ka tum ngei alawm. Mahse ka tui ral a ni, a mitmeng atang a min duhna te hian min ti â zo tawh a ni.


"Bul tan ang..." Ka ti ta sup, Zothankima chu a rawn hawi nghal zawk. Ni e...bul ka tanpui dawn ani. Mite chuan engpawh lo sawi rawh se, an tih thin a nia, an tizel dawn tho. An inthlak thei dawn chuang lo. Kei hi a ni inthlak tur chu...
An thusawi rapthlak leh dawnsawn nuam lo zet te hi dawnsawn thiam dan ka zir angai zawk a ni. Chuti lo chuan hringnun ah hmasawnna a awm thei ngai lo ang. He mipa kut hi ka vuan dawn ani. Ka kum a inthlau tih ka hria, mahse mipa ala upa tal alawm. A tha vek e...


"Eng maw i sawi?" Hrilhhai tih hriat zet hian a rawn ti ta hu a, ka nui suk. Chhang duh tawh lo in, motor kawngkhar chu hawngin ka chhuak ta daih. Ka mittui chu ka hru hil nghal vat. Zothankima chu a rawn chhuak zui ve nghal a, ka awmna a thin ang reng bawk nen, vana thla chu a eng tha kher mai.


"Min um la..." Tiin ka tlan ta nghal vat, rilru tih thawl ka ngai hmasa a ni. Tunah hian Zothankima kut hi inchhir leh nat ring sa renga vawn ka duh lo. Engthawl taka vawn ka duh a ni.
Zothankima chuan min rawn um a, rei lo ah min rawn man nghal chawt. Ka pumna a ban a rawn suih zawm nghal a, hnung lam atang chuan ka hmai bul chet ah a rawn awm a, ka nghawng ah chuan a thaw lum nghal ham ham mai. Ka zam lek lek....


"Naupang chiang lutuk..." A rawn tisup, ka zam chhe leh der tawh. Mahse ka tih tur chu ka hre chiang lutuk...


"Bul chu tan ang, engkim huam in i kut ka vuan ang" ka ti a, Zothankima chuan a lam hawi chuan min kuai her a. Hrilhhai zet hian min en reng. Nuih sukin ka din hnaih a, ka kuah nghal chawt. Ka tan chuan a sang mah mah a ni.


"Mawla...nang nena bul tan ka duh ka tih chu" ka ti a, a taksa nghin dat atang chuan a nui tih ka hre thei. A chhungte ah hlimna a hmuh loh chuan kei hian ka pe ang. Inzawmna chhe tawh siam that lehna pawh ani mahna...


"Min tina miah suh..." Ka tileh a, a kut chu ka sam karah a rawn rawlh lut a, nghet lehzual in min kuah vat. A lum nuam lutuk. Heti tak hian inkuah hi a nuam ang tih ka ring pha lo reng reng. Lum nuam tak a ni.


"Ka venghim zel ang che" a tive vei sup a. Chu tawngkam hote chuan min tihlim ve veng veng mai. Ka kuahna ka thlah a, ani pawn min thlah dul ve zat. Ka darah vuan in amah en thei tur chuan ka kuai deuh a. Ka zamna dah boin amah chu ka en ngar bawk. A hmeltha takzet a ni...tunah chuan ka bialpa chu a ni ta mai si...pheichham ka man emaw tih hial tur a ni.


"Tihnat tur chuan i thianghlim mah mah. Ka tiam a che, ka inkar chu i hre vek. Ka kum thleng in, miten min lo sawi pawh nise...i hmaah ka ding zel ang" a ti a, ka nuih a za lek lek mai. He mipa ka atang hian hetiang hi a chhuak ang tih hi ka la ring phal lo a ni e. A hmel ah chuan a tihtak zia pawh a hriat reng. Chuan kei hian ka ring bawk.


"Chuan...engah mah min tur tur a ni lo" mit ko san auh auh pah hian ka ti a, alo nui suk. A rawn bu zeuh a, a biangsum chu a lang kalh mai. A mawi takzet a ni.


"Chuan...ei tur tui deuh deuh min lei dawn loh chuan ka peih lo" ka tileh chu a rawn nui chhuak ta hak, ka nui ri hriat tawh ah chuan ala mawi ber hial ang le....


"I thau kung kung ang..." A ti a, tawngkam hu chu a thiam lo ve thlawt alawm le aw...mahse hrethiam tawh mai ang. Ka hrechiang tawh thaw khat chuan ka hria e...




Bolero chuan kan inkhalh haw leh a, kan inkawt ka thlen meuh chuan dar 12 a ri dawn tawh. Ka nu ten thil min zawh nasat ka ring tawh ani. Tunah lo mu tawh mahse, zingah tal pawh.
Ka chhuk tur chu sawi tur mai hrelo chuan ka kut chu ka khalh niap niap ringawt.
"I zak ami?" A rawn tih chuan ka zah loh thuin ka lo chhang vat. Mahse a dik reng sia


"Chak deuhin khalh lo la, in i thlen hunah min lo message rawh aw..." Ka ti a, a buk tak nghauh nghauh hnu chuan ka chhuak a, a pil thleng chuan ka en liam.
Ka bialpa neih hmasak ber a ni bawk a, ka zam ve ang chu le. Chu pawh kei aia kum 10 chuanga upa ngat le....ka nui ta tawp. Ka mipa taste chu a mak ta hle mai.




END OF FLASHBACK




Ka bialpa ni tura ka pawm zan kha...ka zam chhiat ve zia kha le. Ka hlauthawng a, achhan pawh kei ai fea upa anih vang ani. Kdrama ah chuan a tlangpuiin an inhuat atang induhna alo piang thin a. Chutiang ang story chu Zothankima nen hian kan nei ve miau ani. A tir kha chuan ka duh ani mai a, ka hmangaih lo. Mahse amah ka hrechiang zel a, ka duhna a zual zel a, a tawpah hmangaihna ah min tluk luh pui ta ani.




Zothankima vang liau liau hian ka pa pawn a hna ngai a chelh leh theih phah a. Ka tan chuan ka engkim ani.
Ani chuan a chhungte ah hlimna a hmu zo lo a, an ina haw ai chuan a bolero chhunga kan pahniha inbiak mai mai kha nuam a tih zawk thu a sawi a, kha thil ka bula a sawi hmasak ber zan kha chuan ka lo na ve veng vengin ka hria. Mipa an nia, an rilru na te an tilang ve em em lo ani mai a. Amah a alo pai reng kha ka khawngaih ani, min tina ve tlat a ni.




"Bawihi tho tawh rawh...vawiin i day dawn nilawm ni?" Ka nu chuan ka parda zar hui khawm pah hian a ti a, ka zimar nghal tual tual(trual). Achang chu ka hna hi ka ning thin, thaw hma te angai a, zan ah kan mu hman meuh lo a, chhungte ka hmu khat a. Kan nun zawng zawng hi mi tan kan sacrifice tawp hi a ni tawp mai. Chauh chang te chu a awm lo thei lo a, mahse hlim tak hian ka tlang ve leh thei zel a, ka lawm a ni. Insawi selna em em ka nei ngai lote hi Pathian malsawmna a ni.




Chaw te ka ei fel phawt a, chumi hnuah inbual in hna kal tur chuan ka insiam a. Ka hmai ah chuan nasa lo tein make up ka hnawh a. Lipstick sen tak hlar chu inhnawih ka tum a, mahse Zothankima bawk ka hre chhuak leh tawh.
"Khami tello kha i tha zawk, chu loah a sen kher lo thil dang hnawih rawh" a tih kha, keimah ah hian a bet reng tlat a ni. Ka theihghilh thei tawh lo. A sen chu hnawih lo in nude rawng chu ka hnawih ta zawk a, ka pa pawh a kal ve dawn tho avangin a rual chuan ka kal ta zawk. Scooty khalh reng pawh hi ka ning.




U Ruby te ho pawh an lo thleng vek tawh a, a hma ve tum ber a ni awm e ahh.....
"Nang ai ka hma ve tlat" a ti ta reng bawk, ka nui ta ringawt. Ani hi chu tlai reng hi a nive a.


"Luna...thla tharah kan kan awmna theuh sawn an tum asin" U Ruby chuan a ti a, ka hawi â chhap mai.


"Enge awmzia...???" Ka tihu mai


"Aw...ward dangah min sawn dawn. Keipawn khawi ah tak min dah ang maw ka tih reng hi" a ti ta hlar a. Ani pawh hi a senior ve tawh a,a bak hlar zel. Mahse sual vang chu a ni hauh lo.


"Mahse lungngai suh...kar thum zen zawn chu kan la awm ho dawn alawm" ka darah bengin a rawn ti a, a tih dan ziah ani.


"Aaaa...min sawn pawh nise...awmdun dil zel tho ang" ka tia a, alo ner nasa mai.


"Ka tello hian i awm theilo anih hi" a ti a, ka nui dun ta hak hak. Kan ward a duty te hi chu kan inngai tlang viau in ka hria. Mi 7 kan awm a, ka ward hi a lian lutuk lo bawk a, a tawk teu teu khawp mai.




Kan hna thawkin kan buaia nghal char char a, awl hun hi kan nei meuh lo ani. Nurse nih hi a hrehawm ka tih ve chhan pakhat chu kan patient awmpui te thil intihre thei lutuk hi a ni. Min tichau zual...damdawi in ah an lo awm rei tawh a, nih loh vek pawn, an luhpui ngun a, damdawi in a kan thil tih dan hre ve nel nual in a kimchang hre tak tak silo hian an thu hi an duh ve tlat zel thin bawk si a. Heihi ka ning ber mai. Inhnial a chhuah chang lah bang lo, mahse kei chu ka insum thei ka ti dawn nge, tumah inhauh pui em chu ka la nei lo a. Mahse thin hi chu a rim ve deuh khawp mai.




Ka thu fel ve thei ta chiah tihah ka phone a rawn ri a, ka han en chu Mpi lo ni reng in...
"Hello..."


"I buai em?" Zawi te hian a rawn ti a, a tih dan lo lutuk anih vang chuan ka nui ringawt. Thawveng deuh ni thin hek...


"Due kan zo chiah..." Ka ti a, eng emaw sawi tum chu a nei chiang alawm. Tun ang hunah min call ngai pawh ka hrelo, nilo...kqn incall ngai mang lo. Message in kan inbe nasa mah zawk.


"Brandona alo kal a nia..." A rawn ti chu ka thin a rawn phu nghal dat dat a, ka ngawng vek a ni mai. Engmah ka ngaihtuah thei tawh lo, engkim a hrechhuak tawh zawk em ni???


"I kawr hawh tumin ka lo kal a, hei in gate bula hi a ding reng. I phone number min dil a, ka pe duh lo a" a ti a, ka nu a awm leh awm loh ka zawt vat. A awm thuin min chhang a, enge tih ber tur pawh ka hre lo e ahhhh !!!! Ka bing mup mup mai.


"Duty ka nei sia..." Ka tizawi sap, tunah hian haw nghal chu ka rilruk a ni, ka zep lo. Zothankima hmuh ka chak a ni.


"I number chu ka pe mai dawn ami?"


"Aih...pe suh. Neih nan hun a mamawh rei chuang lo ang" tiin ka chhang a, a rawn nui ri hak chu phone atang chuan a ring tha lutuk. Nilo...tunah hrih chuan a aw ri chauh ka hria a ni mah zawk. Zothankima hi ka hrechiang, a duh tawh chu eng anga harsa pawh nise neih tumin a bei dawn tih ka chiang lutuk. Chulo bakah ka nat mai ka hlau a, amah hnaih hi ka hlau hrih a ni.


"I ring tawk hle mai...tluang deuhin i zo dawn nia" tiin a off zui a, ngawi reng chuan ka thu reng a. Ka rilru chu a vak kual thui hle a ni. Enge kan inkawt ah chuan a tih ang? Engtin nge min zawn hmuh theih? Nimin lawkah kan inhmu leh chauh ani si a...eng atan nge kan phone number te chu a tih ang le??!! Zawhna hlirin ka khat a ni. Ka mangang a, ka hlim ru deuh bawk si...tunah hi chuan ka awmdan hi a hrehawm lutuk. Ka awm chu ka chum deuh dat dat a, a inhnawh ni berin ka hria. Ka thaw tha thei lo.


"Luna i tha maw?" U Rosy chuan a rawn ti a, aw ka hre leh chiah e. Ka suangtuahna ata ka chhuak tih ka inhre bawk. Ka thu deuh hak hak reng a, ka chau a ni.


"Ka tha...kan mu hahdam lawk ange aw" tiin changing room lam chu ka pan a. Khumna chuan ka mu ta tawp. Hetianga aqm tur hi ka nilo tiin ka inhrilh mawlh mawlh a. Ka nep ka inti hle bawk. Zothankima vang maia hetianga chak lo a ka awm hi ka duh lo. Ka â takzet tawh anih hi!!!!




BRANDON ZOTHANKIMA POV




Bazar a ka hmeichhe hmuh nu in hmaah chuan ka ding ran a. An in atanga hmeichhe rawn chhuak chu ka lo pan hnai nghal vat. A mitmeng atang chuan hlauhna bak ka hmu lo, zep rual lo in min hre tawh ani tih ka hrethei tlat ani. Mahae kei jian engmah ka hrechhuak thei tawh lo.
"Luna te in a ni em?" Tia ka zawh chuan alo bu nghauh nghauh. A hmel atang chuan a upat hmel viau tawh mai. Hmai bial lam deuh a ni a, a hmel tawh a chhe lutuk lo.


"A phone number min pe thei angem?" Ka ti a, min la hlauh hmel fo chuan ka thin a tirim tawh kher mai. Engtin ka khawih dawn pawh ni hlei lo.


"Ka thei lo ang, a pawi khawp mai" tiin a lut leh a. Ani pawh kha ka hre tawh ani tih ka hrethei tlat ani. Man beh mai ka tum a, mahse min hlauh hmel sa tawh nen ka tih hlauh belh ang tih ka hlau ani.


Engmah ka hre chhuak thei tawh bawk silo. Eng emaw hi zawn ka nei a, mahse chu pawh chu ka ngaihtuah chian pauh leh ka bo tulh tulh si. Keimah ah hian kim lo a awm tlat a ni. Kha Luna ma hmuh khan he ka thin zawn hi a phu ve dat dat a, phat rual lohin ka hmelhriat ani tih ka hre ngei bawk ani.