LET's LOVE AGAIN
By Ziki nu
Chapter-11
Kar tluanin school ah hun ka hmang a, Riny pawh zan khat a thang hnuah a rawn let ve leh mai bawk a, a damloh vanga a lo chawlh deuh reng tawh vang khan a inthlahrung ve deuh a, nilo se chuan a patea neihchhun a nih vang tal pawhin a awm deuh chu ka ring.
Rintea nen kan la inhmu leh ta miah lo va, phone ah pawh kan inbiak zawmlo, a number chu ka save ve tak na in status a nei ngai lova, Rinfeli status ah erawh a zai lai leh piano a hmet lai te ka hmuh leh zauh thin.
A thiam leh nuam tih ber Music a lo la tuipui reng tih ka hria chu ka lo awm ve em em ringawt a, Pathianin talent a pek ni ngeia ka hriat avangin a talent te hi tipung zel se la, hlawhtlingin Pathian hretu ni reng se ka duh thin.
Min biak loh vangin biak hmasak chu ka duh bik lo a, mahse min haw lo tih ka hriatna vang ringawt pawh chuan ka be lek lek thin, ka ngai a, biak ka châk bawk a, insum a har hle thin zawng a ni e.
Zirtawp ni tlaiah ka nu a lo thlen dawn avangin ka haw hma a, kan khaw sumo counter hi ka in luahna chhak deuh lawk anih avangin a hla lem lo ka tih tawh kha, ka u ka biak khan lo kalpui chu a tum viau a, mahse nizan hmasa atangin kan kohhranah camping an nei a, thalai hruaitu a nih vangin han zinbo leh rih chu a rem teuh si lo a, sumo ah a rawn kal phah anih hi.
Dar 3 pelh hretah an lo thleng a, kan han inhmu chu kan phul ve hlut mai, thuamhnaw a keng tam lemlo bawka in lamah kan haw thuai a, a chauh loh thu sawi mah se a hmelah a chau hle tih a lang reng tho.
Ka nu hian a nulat lai atangin sciatica natna a nei tawh a, hna rum deuh leh hahthlak deuh pawh thawk thei a ni tawh lo, nu taima ngang anih avangin kan phallo chungte hi huanah a lo lut leh daih thin a, kan hau deuh reng zel.
Inchhung kan luh rual chuan thutthlengah a thu nghal hnawk a, a bungurate chu dahfel sawk sawkin thingpui ka lumsak nghal a, thingtlang nu tih takah a vun rawng pawh khawpui nuho ai chuan a thim fe zawk a, mahse ka mitah erawh a hmeltha ber tho.
Thingpui in pah chuan a insawiselna neuh neuhte chu kan sawi dun a, a khawsik reh hleitheilo bakah a kawng chu a hma zawng aiin a na zual a ni âwm a, kawng na chung chunga thui fe mai sumo a a rawn chuang chu ka khawngaih viau a, ka u te lam ka dem dawn dawn mai.
"Karhnih khat vel han awm hahdam vang vang ila damleh mai tur ka ni maw le, Aizawl rawn pana han in entir vel a buaithlak tehlul nen" a ti niah niah reng a, ka bulah lehzel a inthlahrung chu ka duh lo.
"In entir vat a tha alawm, tunah phei chuan i kawng na ringawt a ni lo va, khawsik reh theilo te phei chu a hlauhthawnawm viau asin" ka tih chuan min lo en vang vang a, a mitmeng dul riak ah chuan a chauh zia a hriat reng mai.
"Tui ka lum tawh a, I duh chuan a inbual nghal theih asin" ka ti leh var a, a inthlakna tur te chu laksakin ka inbual tir hmasa a, eirawng pawh ka bawl uluk viau a ni.
U Mazari te pawh zan lamah an rawn leng thla a, Jacoba a ninhlei lutuka duh ang pawhin a titi theih meuh loh.
Ka nu chuan an khawsak dan leh U Dintei zirna chungchangte chu a zawt ve luam a, Aizawla khawsak harsatzia te sawiin an tui dun khawp mai.
Kan in chungte haw hnu lawkah keini pawh kan mu nghal a, a chau hle aniang reilo te ah ka nu chu a thaw nghal sak sak a, mahni chauha awm kha chu awlsam viau angin lang mah se nu te nena han mut dun leh takah chuan ka ngai tawh hle tihte ka hre chhuak a, lungleng hmanin ka khawsa lutuk lo bawk nen ka awm ve naw naw kha a ni mai a, ka nu chu kuahin ka mut hnaih sawt sawt a, a awm ve hian thla a muang hliah hliah mai a ni.
Zinga min lo kaihthawh chuan ni a lo sa leh uar tawh a, dar 7 a lo pel thui tawh mai.
Chaw ei pawh a lo peih leh diam tawh a, inrinni anih vangin ka hmanhmawh lemlo bawk nen muangchangin ka che a, kar thar law law ah in entir kan rilruk tho avangin vawiin chu hahdam nan hmang ila ka ti a ni.
Ka nu pawh a motor chuanna lamah a insawh chau ve deuh bawk nen awm mai mai turin ka ti a, chawhnu lamah chawhmeh lei tura ka chhuak zawk tih loh chu keipawh inah ka awm chawt a ni ber.
Zanriah ei khama phone ka en chuan Rintea message a lo awm vàng a, ka hawng rang kher asin.
'A lo len theih em?'
Tih te mai zawng a ni naa, a message tawi te ina min tih hlim zia chu aw..
'Aw theih e... Ka nu a lo zin a' tiin ka chhang a, a seen rang viau na in min reply lawk lo.
Minute 5 dawn ka nghah hnu ah "A zahthlak ang" tih zawng hi a rawn thawn leh a, kan inzui lai khan ka nu nen hian vawi 1 chu zanah chiang vak lovin an inhmu ve tawh a, chubak chu an la in hmu leh lo vang vang a, han zahna vak tur a awm pawhin ka hrelo.
"A zahthlak loh, I thu thu a ni mai" ka ti a, leng tura sawm chu ka la hreh ve tum hrang a, lo len te chu a duh a thu a ni ang chu ka ti ve tlat.
Phone ka khawihsan reng chuan nuamlo a tih hlauin ka be seuh seuh reng a, TV tal nei ila chuan khawhar te pawh a zia ve deuh tur ania, la ngaihtuah vat chu a ngai dawnin ka hria.
Ka nu chuan ka thawhna chanchin leh ka khawsak dan phung te chu min zawt deuh reng a, nufaa kan titi dun lohna a rei ve ta bawk nen a bulah chuan ka duh duh ka sawi a, a ni'n uluk deuhin min lo ngaithla a, a nuam ka tiin hnuk a ti ulh deuh lek lek thin hial a ni.
Dar 7 velah kawngkhar chu an rawn kik dat dat a, Rintea hmel rawn lang nghal zat chu ka lo nuih nghal var var bawk.
Amah maiin a ni dawn emaw ka tih laiin thian pakhat a rawn hruai a, ka hmuh hnu chu ang ka ti deuh naa tunge anih ka sawi mai thei tawh lo.
"E... In va fel ve, lo leng rawh u" tiin ka nu pawhin a lo be nghal luam a, ka han inhmelhriattir chuan ka nu chuan min en phawk deuh a, Rintea nena kan chungchang ka hrilh ve vek avangin kan inthen tawh hnua a rawn leng leh chu mak a ti deuh pawh a ni mai thei.
Rei vak lo hnuah ka nu chuan mu turin pindan lam min pansan daih a, thutthleng pakhatah kan pathum chuan kan thu tlar dal a, tawng hmasa nih chu kan hreh vek emaw tih mai tur a ni.
"I thianpa hi ka hmuh hnu ang ka ti deuh a" tiin ka zawt deuh phawng a, "Hmu tawh ang, I bialpa nen kan dawrah capo in rawn lei kha" a thianpa zawk chuan a lo ti khauh a, a sawi takah chuan a ni dawn tak e.
"A bialpa a ni lo" ka bul ami in a lo tih chuan ka en vat a, chiang deuhin ka mitah tak min lo en ve run bawk a, thinrim hmel a pu lo na in a lawm hmel vak lohin ka hria.
"A bialpa a ni lo maw" a thianpa lah chuan a lo ti nawn leh kher a, ka chhan hun a nghak aniang chu ngawi rengin keimah zawk min en ve tlat.
"Ni lo e.. Ka thianpa a nih kha" ka ti a, an hmuh loh lamah ka nui ru pat pat mai.
"Richarda anih hi, I duh chuan Châta I ti dawn nia" Rintea chuan a lo ti leh a, "Châta han intih leh ngawt zel hi chu a mawi lo ve e tiraw Sawmi" Richarda'n a lo ti nang nang lai chuan ka lo nui ve hak hak a, thian a rawn hruai chu a tha phian in ka hria, boruak pawh a zangkhai deuh zawk alawm
Thingpui te lumin kan titi nak nak reng a, Châta pawh chu USA ah a lo awm ve reng tawh thin a, music school atanga inchhar an ni nghe nghe.
Rintea aiin Mizoram ah a rawn let hma zawk a,dawr pawh lian deuh a lo siam der tawh anih kha.
An haw dawn chuan kawngpui thlengin ka zui chhuak leh a, Richarda chu nichin deuh atang tawha a phone a rik sek reng avangin a tlan chhuak nghal a, kan pahnih chauha kan han din ren rawn takah chuan ka lai ru leh riau tawh.
"I nu khan min la hria a ni maw?" nui suka a tih chuan ka lo nui ve sen sen a, "Hria e.. Ka sawi nasa thin alawm" ka ti chu ka inthiamlo leh deuh a, mahse ka sawi zo vek tawh si a, kan inkar chu sawi chhuak hauhlo mah ila kan hre dun ve ve a, chu chu ka inthiam chawpna a ni deuh ber.
"I hman hunah kan chhuak dun dawn nia" a lo ti teh daih a, chhan nachang hre lovin ka lo en ha ringawt chu ka chhipsam rawn tuai zauhin "Hmun pakhatah hruai che ka duh a" a ti leh a, a awmdan nelawm leh a hmel hmuh nuam lutuk vang ringawt pawh chuan ka hnar phal teuhlo mai.
Kan in mangtha hnu pawh chuan kal mai lovin step ah chuan ka thu khawmuang leh rih a, Rintea nena kan inkar chu ngaihtuah tham fe a la ni tho in ka hria.
A laka ka rilru chu a la ngai reng a, mahse ka lakah eng rilru nge a put tih ka hriat ve miau loh avangin ngaihdan ka nei thiam lo.
Hmun pakhat min hruai na tur a tih chu khawi hmun nge rin ngaihna ka hre lo a, atan eng emaw, Tu emaw tak nia ka la inhriat ve na hi a tak tak ni se ka ti.
"Hello"
Mipa aw thum deuh ri ah chuan ka ding chhuak nghal hluai a, ka leh hawi rualin Nunpuia nen kan in hmachhawn nghal siah bawk.
"I va phu nasa ve" tia min nuih vur vur pahin ka thutna step ah bawk chuan a thu ve nghal a, "Thawm te neih hmasak ve tur che alawm" ti hlakin ka la ding reng a, "I ngai nghal ringawt a ni maw?" ti leh supin a kekawr ipte atang chuan cigarette a phawrh zui nghal zat a, hepa hi ka rin a ang lo tulh tulh in ka hria, meizia a zu thin tih pawh ka hre reng reng lo.
"Cigarette te chu I la zu zui a?" ti leh nghatin a bulah chuan ka thu thla ve leh a, si hlarh hlarh chungin zat loh hmel deuh hian a nui hul hak a, a ngawih tak reng vang chuan keipawhin sawi tur ka hre bik lo a, rei ang reng deuh chu kan thu ngawi dun ran mai.
"Khapa kha i theihnghilh theih miahloh chu a ni em?" a tih takah chuan ka melh vat a, hmalam en in a cigarette ken lai chu a la zu khu hlat hlat reng a, ka chhan mai loh vang chu anih ka ring, min rawn melh ve zawkin tawi te hian min nuih a, "Anih kha" ka ti sap chu "Imm" tih zawngin min chhang a, a awm dan chu aw...
"Min lo en thla em ni a?" ka tih chuan a lu thingin "Khu laiah khuan ka kal lawk a, a tlan liam tur i thlir vung vung lai kha ka hnu hman" tia a nuih leh vang chuan keipawh ka nui ve sak a, "Kan tluk loh val chu belh chian a chakawm hle mai" a ti leh erawh ka melh no vak lo.
"Khatiang zawnga inbiak kha chu ka duh tawhlo ania" ka ti deuh nghat a, ka thutak hle tih chu ka hmelah pawh a hriat theih ang.
"Duh ber kan changlo ve ve a ni lawm ni?" a lo tih leh chuan "Sawi tawh suh" ka ti vin deuh hlar tawh a, duh zawng tih vel han sawi pui atan chuan a ni hi chu ka duh vaklo a ni.
"U Mazari te chanchin kha i hre tawh em?" a lo ti leh daih a, chhang lo va ka melh deuh ha lai chuan "Inneih te kha an sawi ri tawh a, palai an tir tepin ka ring" a lo ti leh a, U Mazari khan sawi ve zawk tho mah se chuti rum ruma an tih chu ka lo ring miahlo.
"An hmanhmawh ve tawh a ni maw?" ka tih chuan lo nui sukin "Hmanhmawh rual chu an ni ve tawh alawm" a lo ti a, keipawh ka nui ve hak.
"Thil pakhat zawh duh che ka nei a" a tih leh chuan "Min zawt rawh" ka lo ti ve mai a, a sawi hreh deuh nge a ngawi leh vung vung phawt a, rei ngial ka ngaihchan hnuah "Rintea nen khan in inzui leh tawh tihna nge?" zawi deuh sup hian a ti a, ka en phawk ngang mai.
"A hming i hria maw?" ka ti chu lo nuiin "Mizoram hi a zim alawm" a lo ti mai a, "Min chhang la" a tih leh vang chuan keipawh ka ngawi rei leh khawp mai.
In zui leh han tih tur chu kan ni hauhlo, nel takin, thian angin kan awm a ni rih mai a, beiseina chhete la nei ve bawk mah ila a rilru ka hriat ve miau loh avangin inringtawk taka han sawi chu ka thei lo.
Chhan tuma ka âng zuau hman tihah U Mazari te kawngkhar chu a rawn in hawng thut a, thil tisual hauhlo mah ila ka lungphu a rang hman viau leh nghal.
"Nangni pahnih chu tun ang hunah eng nge in tih a?" phawk ang reng taka min en tawn zak zak chung hian U Mazari chuan a ti a, min ngaihdan a diklo vek ang tih hlauin ka thutna atang chuan ka tho nghal vat a, "Khu laiah khuan a kal lawk a, kan ti ti zawk mai mai" ka ti liam puat a, stepa chhuk thla chung chuan "Anih aw Nunpui" ka ti a, ka hawi let tawh hauhlo bawk.
U Mazari chu mangtha in ka kal tlang nghal a, ka lo thut reipui lutuk chu ka inchhir leh hnuhnawh viau a ni.
Inchhung ka luh rualin kawngkhar chu ka kalh tha nghal rawk rawk a, mu turin ka insiam zui sawk sawk bawk.
Khuma ka mut ve meuh chuan ka nu chu a lo thaw leh sak sak tawh a, a kawngah nghet deuha kuahin ka mu a, ka muhil hma viau in ka hria.
..
Thawhtan ni ah ka nu chu clinic a hruai ka rilruk avangin school lamah pawh leave ka la a, tukthuan ei khamah insiam zung zungin kan chhuak nghal a, appointment te laa rei fe kan nghah hnuah thil ei turin kan chhuahsan leh ta rih a, Aizawl lamah a lo zin khât deuh tawh bawk nen ka nu chu kawng engkima ka kaih hruai a ngai a, mi thenkhat tan chuan thingtlang nu mawl mai ni mah se kan pahniha kan la chhuak dun thei ringawtte chu vannei ka inti a, ka theih ang anga ka hmangaihna leh ngaihsakna lantir chu ka tum ve em em ringawt mai a ni.
Chawhnu lam ah kan lut ve thei chauh a, ka nu chu a sciatica vanga hna thawk thei anih tawh loh thu leh rit chawi tawh miahlo tur te in doctor chuan a chah a, a khawsik ser ser reng pawh chu damdawite a chawh nual a, a la reh theilo anih chuan kar thar lama check up leh turin min ti bawk.
"Tun kar chhung chu i awm hahdam leh rih hrim hrim anga, I khawsik a ziaawm tak leh kar thar lamah I haw chauh dawn nia" ka ti a, a ni chuan tun kara haw leh nghal mai duh mah se khua ah chuan tih tur neuh neuh a tam a, hna duh mi a lo ni vei bawk nen chintawk hre lek lova hna a lo thawh leh chiam ka hlauh vangin ka phal lo a, ka u te pawh bia in helama awm rih chu a that thute pawh an lo sawi ve a, school ka kal chhunga in a lo nghak tur ringawt pawh chu a lawmawm.
Zan lamah chuan amah chauha chhuahsan ka hreh avangin ka inkhawm lo a, Rintea nen in be zawm lemlo mah ila awm nawm lohna tur thil ka tawng lo bawk nen rilru hahna pawh ka nei rih lem lo a, ka ngaihven leh ngaihtuah ber chu ka nu a ni rih deuh ber.
Zanriah ei khama phone ka en chuan Rinfeli hnen atangin message a lo awm leh tawh a, min lo be ve leh thut chu mak ka tih rualin a message ka han hawng chiah chu mak ka ti leh zual.
'Ka sawi tawh kha... Rintea hi lo tibuai tawh suh, a lo biak che pawhin be duh lo hmak la, bul tan that tir ve tawh rawh' a rawn ti a, a thil rawn sawite chu a ngaihna ka hre lo kher mai.
'Eng nge awmzia?' tia ka chhang chu a lo seen vat a, rei lo te ah a phone call a rawn lut nghal zat bawk.
Ka nu in a hriat ve ka duh loh avangin bathlar thlang lamah ka chhuahsan a, ka chhan lai chuan thawm ri tak tak ka hria a, a kalsawn aniang rei lo te ah thawm chu rehin "Hello" a rawn ti a, sawi tur a vang duh kher mai.
"Eng nge ni?" ka tih chuan thawk la hap ri ka hria a, "Thian kan nia, a hma pawhin tha deuhin ka hrilh tawh che kha, ka thiannu ni mah la Rintea hi ka unaupa a ni miau a, a tana tha tur chu ka duh ve alawm" a rawn ti nghal bawrh bawrh a, a sawi awmzia chu ka la man thei chuanglo.
"A hmaa i sawi pawh kha ka hrethiam lo a, tuna I thil sawi pawh hi ka hrethiam chuanglo" ka lo tih chuan hahthlak tih hmel zet hian a hui pap a, "Nangpawhin hmalam i pan tawh a, hetianga a rawn lan leh tak avanga lo pak leh huam hi thil nih dan tur pawh a ni lo, hmalam i pansan tawh ta sa sa, a ni pawh hi thlah zalen ve tawh rawh" a rawn tih leh chuan ka hre thiam ta ruai ruai a, mahse chutiang thil a han sawi ngawt chhan chu a ngaihna ka la hre chuanglo.
"Hmalam pan maw?" Ka tih chuan "Aw ni e... Lalnunpuia nena in chanchinte kha ka thiante hnen atangin ka hre ve vek a, Rinsangzuala pawh ka hrilh vek mawle.. Tunah hmangaih tawh lo mah la i lo hmangaih ve thin vang tal pawh khan ngaihtuah chiang la, thlah ve tawh rawh, a rawn biak che pawhin lo hnar tlat la, a tibuai rei lo tawp ang che" a rawn ti leh hlak hlak a, chutiang ngaihdan a han nei ringawt chu mak ka la ti tho mai.
"Nunpuia te chu... " ka ti dek dek chu "Tawk tawh rawh se, inhuat kher hi ka duhlo a, ka sawi kha hriattham i lo tum dawn nia" ti lehin phone chu a dah nghal hmak a, ka ka hau ringawt tawh mai.
Rintea nena kan inkar chu engpawh lo ni se la, Rinfeli'n Nunpuia nena kan chanchin a lo hriat dan mawlh chu a ni ngaihtuahna tibuai Tu zawk chu, ka laka a lungawiloh danah a tha lam zawng chuan min hre dawn hauhlo tih a chiang reng a, Ngaihzawng dang nei chuanga a unaupa bia angah min ngai ni berin ka hria. Hetiang vel thuarthamah hian buai ka duhlo viau asin mawle...
Cont....
NOTE: Sawi pawh a zahthlakin inthlahrun a na duh kher mai...
Mental illness vangin ka dah hun tur ah pawh ka han dah theilo a, mimalah buaina neuh neuh ka neih bawk avangin story han buaipui vak pawh a harsa a,min hre thiam hram hram rawh u aw..
Pathian zarah dah ve zel chu ka la tum a, readers te ai mah hian ziaktute hian regular theih kan duh a, dawhthei taka min lo ngaktute in fakawmin min lo support zel tur in ka sawm bawk che u aw..
(Hemi chapter pawh hi ka buaipui rei khawp mai, a boring deuh anih pawhin min hrethiam rawh u aw
)