AMOS - 9

[Vtei Jahau]

Amos - 9






If you love her






Amos-a chuan rang zetin min rawn pan a, a jacket chu phelh in min rawn sin tir nghal a, min kuah nghal hlu hlu bawk a, a awm nghêng chuan ka hlauh em vangin ka ṭap leh hawm hawm a, min duat tak a ka sam a a lo chul hliau hliau phei chuan ka thla chu a muang tak zet a, ka ṭap nasa zual sauh bawk.






"Shhhhhh, a ṭha vek tawh e, engkim a ṭha tawh i bulah ka awm tawh e" a ti a, nghet zet chuan min kuah leh a, ka thla chu a muang tawh takzet a ni, ka ṭap ka ban tawh hnu chuan Amos-a chuan damdawiin lamah min hruai zui nghal a, ka chauh em avangin a car-ah chuan damdawiin kan thlen hma chuan ka lo muhil sek a, mah se ka ṭhang harh leh zawk zawk zêl a, hlauhna nanem lo chuan min fiam hlup hlup mai bawk.






Nurse te chuan Remsanga min hnekna lai vêl te chu vurin min deh tîr a, damdawiin khumah chuan ka mu deuh ran a, Amos-a pawh ka bulah chuan a ṭhu ve bawk a, kan chhungte hrilh lo tur a ka tih vangin a lungawi chiah lo a ni, mah se thil pawi em pawh a thleng hman lo a, kan chhungte tih hlauhthawn ka duh loh vang zawk a ni.






"Amos, engvângin nge Remsanga khan a nun tichhe tu ka ni a tih" tiin ka rilru a awm reng Remsanga'n min sual a tum lai a a thusawi chu ka zawt a, a ngawih deuh vung vung hnuah, "Kha mi zan kut ka tawrh zan kha I la hria em?" a ti a, ka lo bu deuh nghat, "Khata kut min thlak tu te kha Remsanga ṭhiante an ni, a tirah phei chuan kut kha an ni chuan min thlak nasa vak ngam lo a, mah se a hnu a Remsanga a rawn thlen ve hnu khân khatiang khawp a na khan min sawi sa ta a ni" a ti a, ka meng phawk hle, "Chu chu tûnah chauh min hrilh a maw, kum thum liam ta ah khan I hre daih tawh tiraw" ka ti a, ka aw ki chu a ring lek lek, "Remsanga kha I duh em em tih ka hria a, i rilru tih nat ka duh lo a lawm" a tih chuan ka rilru chu a ti na zawk daih, ka rilru nat a hlauh vangin engmah min lo hrilh duh lo a, a mah sawisa tu kha hre miah lo a mah vangin Amos-a hmaah ngei ka ṭap bawk a.








"A nih chuan engtinnge Remsanga nun tichhe tu chu ka nih tak daih theih?" tiin Amos-a chu ka zawt leh a, "I ni hleinem, mawhpuh tur a zawng mai mai a nih kha, Delhi ka kal hnu khân Police ten finfiahna ṭha tak an hmu chhuak a, Remsanga kha an man ta a, chuan kum 3 chhûng jail a a tan hnuin Court lam aṭangin a tanna hmun sawn tûrin an rawn ti a, mah se an hruai mek laiin a tlân chhuak ta a, chuvanga nia i bulah ka awm reng, ka vên reng nachhan che chu" a ti leh a, a nih chuan Remsanga hi awm lo ta se, lo tlanchhuak lo ta se ka bulah a awm dâwn lo tihna em ni ang.








Police te chu damdawiin ah ka statement la tûrin an rawn kal a, Remsanga chu an hmu zui lo a nih hmel, "Kawng a ka kal lai khan zui tu nei ang in ka in hre tawh a, mah se hnunglam ka hawi pawh khan tumah ka hmu lo a, a hnuah Amos-a nen kan in biak laiin ka hnunglam aṭangin ka phone a rawn la thut a, ka hawi lêt nghal vat a, mah se ka ṭhian hlui a ni a, a tirah phei chuan hlauhna engmah ka nei lo, mah se a chet dan kha a mak tulh tulh a, ka hnuah kawngthlangah khan min hnuk liam ta a ni" tiin ṭha tak leh fiah fel fai tak chuan Police ten thil thlen dan min zawh chuan ka chhang a, Amos-a chuan ka darah a lo vuan vang vang bawk.





"Engvângin nge min rawn hrilh vat loh a, Bawihte, i ṭha em, engthil chiah nge I chungah thleng" tiin khaw thim dâwnah kanu leh pa te chu an rawn tlân lut a, kapa pawh chu a thinrim hmel kher mai, "Nu ka ṭha a lawm" tiin kanu mangang in min rawn kuahna chu ka la sawn vat a, dik tak chuan hrilh ka duh lo, mah se Doctor ten zanin heta riak tur a min tih vanga hrilh ve chauh kan ni, chhuanlam tur kan hriat loh vangin, "Amos, pawnah lo kal lawk teh" kapa hmelah chuan engkim a hria a ni tih hrilh chawp ka ngai lo, Amos-a pawh chuan kapa chu a zui chhuak ve vat a, kanu chuan 'Ngatinge i hmai hi I chunga thil thleng dik tak hi min hrilh teh" a ti nghal a.







Zêp reng a theih dawn loh tih hriain keipawh chuan zêp nei lo in kanu chu ka hrilh ve ta a, kanu chu a ṭap nghal zawih zawih, "Nu engtin mah ka awm hleinem, ṭap tawh suh" tiin hnem ve bawk mah ila awmzia a awm lo, "Awi Bawihte i mangang ngawt ang tiraw, Amos-a te lo thleng har phei se chuan engtinnge I awm ang" a ti a, a ṭap leh a, han sawi tur pawh ka hre tawh lo, a rilruah eng nge a ngaihtuah ka hre lo a, mah se nu ten a fate an hmangaihna a ni, nu ka nih ve hma chu ka hriatthiam pawh ka ring lo.







"Nute, lungngai suh an man ṭêp tawh e, nichin deuh lawk khan khaw pawn lamah mi car a rûk in a tlanchhuak an hmu a nih chu' Amosa chuan a rawn ti a, kapa chu a rawn lut tawh lo, ka mitmei chuan Amos-a chu ka zawt vat a, a ni pawn a lo hrethiam a ni ang, "Police ho nen khân an in bia a " a ti a, kanu bulah chuan, "Nute zanin chu ka lo riah pui ang" a tih zawm leh a, "Aaa Amos i buai lutuk ang" kanu in a tih lai mek chuan Amos-a chuan, "Buai love, hei buaipui ngai vak pawh a ni lo a, nangmah ni kha lo hahdam zawk rawh u" a ti tlat a, engmah ka sawi ve lo, kanu nen chuan an in hnial ti tih a, an sir aṭang chuan ka lo nui tawp a, ṭhian dun in hnial te pawh an nih duh hmel.







"Nu Amos-a'n a huam te chuan ngaihtuah awm ka nih loh hi min hawsan rawh u" a hnu fe ah chuan ka ti ve ta a, kapa a rawn lêt hnuah rilru nuam vak lo chuan kanu leh pa te chuan min haw san a, Amos-a nen chuan Cabin ah chuan kan awm a, sawi tur avâng khawp mai, "I mut a chhuak tawh êm?" rei fe ngawi reng a kan ṭhut dun hnu chuan a rawn ti a, "Chhuak thei lo" ka lo ti ve vat, "Hla ka play sak ang che aw" tiin a phone chu phawrh mai a tum a, ka lo hnial vat, "Aih play suh, ka muhil thei lo zawk" ka ti a, a ni pawh chu bu nghat nghat in a thil tih tum a ṭhulh ve leh mai a.







Chutih lai chuan Zuala'n min lo call a, kan in a lo len a tum a chutah chuan kan chanchin a lo hre ve a lo ni, "Tûnah chuan in kan an phal ka ring tawh lo, i duh chuan naktukah i lo kal mai dawn nia" ka ti a, kan in biak laklawh lai chuan Amos-a chu ka en zawk a, min lo melh reng tih ka hmuh rual chuan reng zetin ka hawisawn lehnghal a, a lo nui suk tih ka hria, "Aw, awle min lo ngaihtuah su" ka ti a kan in biakna ka ti tawp ta nghal, "I bialpa kha em ni?" Amos-a chuan zawhna a rawn nei lehnghal zât a, "Min rawn kan a tum a" ka lo ti daih thung.






"A ngai lo i ti em ni?" kan in biak dan hre ve reng si chuan ngeiawm lek lek a nui chungin min zâwt leh kher a, "Aw" tih chauh in ka lo chhang, "Delhi ka awm chhung khan ka theihnghilh ngai miah lo che" ka kut hum vang vang chung chuan a ti a, ka lo nui sak "Ka theihnghilh bik lo che" ka lo ti ve vat a, "Hrilh chak deuh che hrilh ngam miah loh che ka nei a" a ti a, a mitah tak chuan en in chhan nachang ka hre lo, "Mah se tûnah chuan hria pawh ni la awmzia a awm ka ring tawh lo" a ti a, za lo zet chuan a nui a, "Sawi hrim hrim rawh, eng thil nge" hre chak tak anga lan ka hreh viau na in ka hre chak em em si a, "Thil ho te maw le" a ti leh a.








"Ho te chu engnge" ka lo ti ve leh zêl a, "Ka hmangaih che" zawi sup chuan a ti a, a mitah tak ka en kar a, sawi ve tûr ka hre lo, "Ka hmangaih che, ka ṭhianṭha ber I ni a, chutiang tak chuan ka hmangaih che in ka ngaihsak reng ang che" a rawn ti leh a, ka lo ngaihdan nen a a in an loh em vang chuan awmze nei lo zet chuan ka nui chhuak hawk a, "Hman a Amos-a ka hriat ṭhin ngei kha I la ni, i la danglam miah lo" tiin ka va kuah a, a ni pawn min lo kuah lêt ve vat, pawn lama ka lan dan ah chuan hlim mah ila ka thinlung erawh a rum vawng vawng thung, "Zuala nen chuan hlim deuh in awm ang che u, duhsakna ka hlan a che u" a ti leh a, ka samah chuan a chul hliau hliau a, ka mittui ka dang seng leh ta lo.



~~~~~~~~~~~~~~~~~~~~~~~~~~~~~~





Ka harh chuan ka mutna khum bawh a lo muhil ve an awm tih ka hria a, Amos-a chu ka en vat a, mah se a mah a ni lo, min hnungchhawn in mu mah se Amos-a a ni lo tih chiang takin ka hria a ni, "Zual" tiin ka sawi dat a, a lo harh vat, "Amos-a'n a hna vanga haw hmat a ngaih thu min hrilh a" a ti a, sana ka en a dar 9 a lo ri reng tawh, "Amos-a chu a lo kal leh dâwn em?" tiin khum aṭanga chuan thawh ka tum nghal a, mah se min lo dang vat, "A hman veleh a rawn kal lehnghal dâwn a lawm" a ti a, puan chu min sin ṭhat tîr mawlh mawlh a, "Ngatinge in la in ngaihzawn loh a" ka thei eitur min kheh sak mawlh mawlh pah chuan a ti a, chhan mai nachang pawh ka hre lo, ka en vang vang ringawt.






"A en dan che kha mipa ve tho tan chuan hriat loh theih a ni lo" a ti leh a, "I hrethiam lo a nih kha" ka ti ta ngawt a, "A tih hlim loh che chuan engtik lai pawn i tân ka awm a nia" nui suk chung chuan a ti leh a, Zuala chu ka en reng a, a ni erawh in min en ve duh hauh lo thung, "Ngatinge kei ang ve mai mai hi min duh tlat aaaa, midang ka duh tih I hre vek aaaa" ka ti a, ka vin lek lek, ka khawngaih em a ni, min ti thinrim lek lek bawk, "Ka hre bik lo, ka aaaa a niang" nui chung chuan a lo ti leh mai a.






Thil ang eng eng emaw sawiin kan nui dûn reng a, chutih lai chuan kanu leh Amos-a chu an rawn in zui lut hlawl a, ka lo nuih var var "I ṭha tawh maw" Amos-a chu khumah a rawn ṭhu a, ka pang te a rawn dek a, "Ka khua a sik looo" ka lo ti vat a, Zuala chu ka va en a, nui sâng chuan min lo en dun reng a, eng thu nge tukin ah Amos-a bula a sawi ka hre lo, mah se ka bula Amos-a awm dân erawh a danglam tih ka hmu thei.








"Ka lu a hai lutuk" Doctor in chhuah min phal sak tawh a, in thlâk tur a ka ding chu ka lu a rawn hai thut a, Amos-a chu ka bawh deuh rawk rawk, "Ka mu reng duh lo ka tia, min mut tîr char char vang vek a nih hi" ka din ṭhat leh hnu chuan ka ti nâng nang a, min nuih nasa takzet, Amos-a car chuan Amos-a nen kan haw a, Kanu leh Zuala an rawn in phur ve bawk, "Zuala kha I bialpa a ni lo tiraw" a rawn ti a, ka en phawk hle, "Nichin a i bula ka rawn ṭhut te khan engtin mah a awm lo a" a rawn tih zawm leh, "Ka ṭhianṭha ber I niaaaa" ka lo ti ngawt a, a hmui ti pawrh turh in a lo bu nghat nghat a, "A bialnu chu a hauh lo khawp mai" nuih zât hmel feee chuan a ti leh, "Lallawmkim khatiang lam i sawi leh dawn chuan ka chhuk ang" tum hmak chuan ka ti a, min rawn melh deuh zuk zuk chung hian "I thinrimna a ho em mai" a rawn ti a, "I hmel a i chapo hmel kha Delhi aṭanga i zuk neih a ni ang tiraw, kha hmel kha ka haw tawp" ka lo ti leh daih a, za zet chuan a nui a, kei erawh ka la tum hmak thung, "A awm ang lo em a lawm, tûnah pawh en la, nang ka bulah i chuang a, a bulah inu, keimah hi I bialpa zawk ka ni nge a mah zawk" a ti leh a, ka mood dik vak lo nen a ṭawng dan vel chu ka haw hlur tawh a, chhan pawh ka chhang peih lo.





~~~~~~~~~~~~~~~~~~~~~~~~~~~~~~





"Bawihte, Amos-a te an lo leng a nia" ti a kanu min ko thawm ka hriat chuan rang lutuk in ka pindan aṭangin ka chhuak nghal a, mah se ka thil va hmuh vang chuan ka phûrna zawng zawng a bo nghal vek, "In lo leng a ni maw" tiin Amos-a leh hmeichhe pakhat lo ṭhu reng chu nui lui sang chung hian ka pan a, "Nia hei ka ṭhiannu Sentei a nih hi" tiin a bula ṭhu chu a kawk a, "Thingpui ka'n lum ange lo ṭhu lawk rawh u" tiin choka lam chu ka pan vat a, ka rilru a nuam lo nghal em em ringawt, tunge henu hi ni ang, ka bulah Amos-a meuh in a rawn hruai a nih chuan a tana mi pawimawh lo tak chu a nih ka ring chiah lo a ni.





"Lo ṭhu ve rih laaa" Thingpui so nghak a ka din reng lai chuan Amos-a chuan a ṭhutna hmun aṭang chuan min rawn ko a, hreh ru deuh chuan ka pan ve leh bawk a, "Delhi ka awm lai aṭanga ka ṭhiannu tawh a nih hi" a tih leh takah chuan ṭhenawm nula thusawi kha ka hre chhuak zawk, "Eeee awww, i chanchin te chu ka hre nasa a lawm" ti ve ringawt in Seni chu ka chibai nghal a, Amos-a meng phawk hmêl pawh chu ka hmu lo der hmak.






"Nia nangpawh Amos-a hian a sawi nasa thei lutuk che a lawm, kan in hmuh fo tawh hmel si a" nui sâng chuan a ti ve a, ka thi a phu nghal dup dup, "In neih in tum em ni?" ka ti ngawt a, ka thin phu nasa lutuk chu a hreawm thei hial ka dawm nghal ran a, "Eng a?" Amos-a hmel ah chuan engnge a ngaihtuah hriat a har takzet, thingpui so a hun tawh vang chuan engmah sawi lem lo chuan ka thawhsan ta daih a, "Eng
thil nge I lo hriat a" Amos-a ka hnunglam aṭanga a rawn ṭawng chuan min lo zui tih ka hre chiah a, "Oooo engvak nge hria se min tih a, nui chung chuan ka ti leh a, "Thu ni lo lo lah hi an sawi hlawm a" a ti hluk a, thingpui ka thlitna tur no chu a rawn la chhuak nghal a, a bulah chuan a dah bawk.






"In nei rawh u, in in hmeh em saw" tiin Seni ṭhut na lam chu ka hawi phei zauh a, "Ṭawng phawng phawng suh" a ti leh hluk a, a ngaihdan a nih tawh hmel loh hmel hleeeee, "Kanu in hmun dangah awm turin min tia" tiin dawt ka sawi a, a lam hawiin a mitah tak en tum in ka dâk vah a, a ni pawn min lo en ve nghal run, "Engvang chuan?" a ngaihna hriat loh hmel takin a ti a, "Ka tan Mizoram hi a him lo niin a hria a" ka tih leh chuan, "A him loh na chhan tur ka hre lo, i kiangah ka awm reng dâwn a lawm" tiin a aw ki a rawn san a, mah se a ṭawngsual a in ti a ni mah na, "Zuala pawh" a ti leh sup a, min venhim a tum a ni tih hriat ringawt pawh ka tan chuan a hlu tawh takzet a ni, mah se he ṭhian anga min venhim a tumna hi ka duh tawk ve tawh tlat si lo a, ka in thiar fihlim vat loh chuan ka mualpho takngial dawn in ka hria a ni.







"Ka hria a lawm" ti ringawt chuan ka chhang leh a......





"Lo leng leh ziah rawh o" tiin Seni chu ka thlah a, mah se ka mihring sualna erawh chuan vawi khat mah hmuh leh a duh tawh lo thung, ka hmangaih thinlung leh taksa neitu la ni mai tur a ni a, ni eeee ka hua a ni, ka lawmpui thei lo.






Zanah chuan Zuala a lo leng ve leh thung a, Amos-a erawh a reh hmak thung, Delhi aṭangin Amos-a a rawn luhkhung ka ti mai, Amos-a te inah a thlen chilh tawp a ni awm e, kanu sawi danah chuan.







"Amos-a nen engnge in in kar a ṭha tawh êm?" Varanda-ah Zuala nen chuan kan ṭhu a, Amos-a nen kan in kârah bawk a lût leh a, "Engmah a awm lo" tih zawngin ka chhang a, "Kan in ngaizawng emaw a tia" a ti a, Hospital a ka awm laia thil thleng vel kha ka hrechhuak leh chiah, "Takin, Hospital kan awm lai khan a bulah eng eng emaw sawi i nei em ni?" ka ti a, ka melh chiang hle, "Min ti hlau dawn a lawm leee" min en ve kar chung chuan nui chungin a ti a, "Min nuih tlawn lo khan a bul a i thu sawi zawng zawng min hrilh teh" ka ti leh a, "Kan in ngaihzawn thu ka sawi a, kan in neih ṭêp tawh thu nen" a ti a, ka awih lo lutuk chuan a kut zungṭang ah ka sik vak ringawt a, "A na a na" ti chul in a kut chu a phih thla a, "Lawmzual thudik sawi rawh" ka ti leh, "In in hmeh thu ka sawi" a rawn ti heu a, beidawng zet chuan ka thaw hak, kan in ngaihzawn thu sawi miah lo mah ila kan in ngaizawng lo ka ti duh miah lo kha a nia.






"I vân aaa tak" ka ti leh hluai ṭhin a, a ni pawh a lo nui tawp tawh.





"In in ngaihzawn dâwn chuan loh chuan keimah min chhang laaa" naupang chhia zet chuan a ti leh a, ka chhang lo, ngainat awm lo deuh deuh a ka awm pawh hian engah mah an ngai lo a, "Zual, Ram dangah kal ka tum a" zawi te chuan ka ti a, "Amos-a theihnghilh tur in em ni?" nui chunga a tih chuan ka lo nui ve sak ringawt, "I theihnghilh pawn keichu min theihnghilh ve suh ooo" a ti a, ka kal tûr chu a phur ber emaw tih mai turin a awm, "Amos-a hrilh suh ang che" ka ti leh a, "Dawn teuh lo, ka ṭang hma ka hai dawn" a ti leh a, a nui deuh vur vur bawk a, tih ngaihna tak pawh hre lo chuan ka lo nuih pui ve ta ngawt.



~~~~~~~~~~~~~~~~~~~~~~~~~~~~~~






"Amos-a chu ka rin ang a vân ni lo veee" kanu chu Amos-a te in aṭangin a lo haw chiah a, a hriat tum loh tak a hria tih hriat zet in a hmel chu a danglam bawk, "Eng thil nge?" tiin kanu chu ka lo en vat a, "An in a nula thleng khan a fa a pai a nih chu" kanu in a tih rual chuan ka ding khawng nghal awt a, ka lungphu te chu an chawl dup ni mai hian ka hria, kanu chuan min ngaihsak lem lo in a sawi zawm mawlh mawlh a, "Nu" ka ṭah chhuak lutuk in sum duh bawk si aw chu a lawi rut a, kanu chuan min rawn en ha a.





"Nu tih ngaihna ka hre lo, ka aaa mai dawn in ka hria" ka rilru put hmang zawng zawng ka hrilh vek hnuah kanu kuah chung chuan, ka ṭap zawih zawih ringawt, "Nu hmun dangah ka awm duh khawngaih takin kapa min biak sak lo, a nih loh chuan ka aaa thei mai dawn in ka hria, hetiang a ka awm reng chuan ka nun leh midang nun ka la tih chhiat sak vek mai ang" ka ti a, ka ṭap bang thei lo kanu pawh chuan min khawngaih hle a ni ang, engmah a sawi thei lo a, a nui lova a ṭap bawk hek lo.







Kan nufa chuan rei thawkhat tak kan in kuah a, ka ṭap nasa lutuk chuan min ti chau vek thei hial a ni, kanu chuan min hnemna tur ṭawngkam a nei lo a ni maithei, engmah a la sawi chuang lo a, min en chungin a khat tawk in a mittui a hru leh zauh ringawt ṭhin, "Bawihi" a rawn ti leh a, ka chhang thei lo.






~~~~~~~~~~~~~~~~~~~~~~~~~~~~~~





"Keipaw'n ka hmangaih lutuk che i hria tiraw" ka thei ei tura vel mawlh mawlh lai chuan ka lo ti a, "Teh thut chuan" nui huk chungin a ti a, engmah a sawi belh lo, "Engpawh ti ila min dem lovang tiraw" ka ti leh a, a thil tih lai tawp meuh in min en a, "Zomuanawm" a hmelah chuan engnge lang ka chhiar thiam lo, "Ka sawi awmzia chu ka hma hunah hian ka duh thlang ila, chu ka duh thlanna avang chuan min dem lovang tiraw" ka ti leh a, "A dik a ka hriat leh hriat loh a ni mai" tiin a nui leh a.









"Kapi leh pu te bulah Champhaiah awm ka tum a" ka ti leh a.




Chhunzawm zel tur.





Readers duhawm tak tak te, ka mimal harsatna avanga ka story rei tak ka dah loh vangin in mi hriatthiamna ka rawn ngen e, khawngaihin min lo chhiar chhunzawm sak leh ṭheuh tûrin ka rawn ngen a che u .