SELFISH LOVE by Amy Cck (Completed)

[Amy]

A CHUNG A BOX 1234> KHI PAGE NEXT NA


CHAPTER - 1 by Amy Cck



" Mambawih I nau chu va ko nawn leh teh! A va rawn chhuak har ve. I ko tih a hre lo a niang a! " Chaw ei ka siam zo a, ei tur in ka nu leh pa in an rawn kil tawh a. Chair a ka thu thla tur chiah chu ka pa in a rawn tih avang chuan ka ding zui leh nghal a. Mama ko tur chuan room lamah ka phei zui zat.



Mama room kawngka chu ka kik a, min chhan mai loh avang chuan kawngka chu ka hawng a. Ka thil hmuh avang chuan ner sak in khum lam chu ka pan vat a, puan a in khuh a lo la hnar suk suk chu a puan sin lai ka pawh hlip sak nghal hmak.



" Heii.... Ti nge i lo mut nawn leh a? Lalmam chaw ei kan siam vek tawh a nia. Tho tehh. " A sirah chuan ding in ka ti a. Rum tuah tuah in a in let thawk a, ka ner sak.



" Chaw ka ei peih lo. Ka la mu duh! " Men pawh meng hlei thei lo chuan a rawn ti leh a. Puan a pawt tha leh sauh sauh chu pawh hlih sak leh in a ban sei thlurh ah chuan ka pawt nghal tawng tawng a.



" Ka pa rawn kaihthawh kher i duh zawk a mi? Tho rawh, I eih peih loh chuan lo kil hming tha hrim hrim rawh. " Ka ti zui vak a. Ka nau zawk mah nise kei aiin a lian daih zawk bawk nen a ban a ka pawhna lamah kei mah zawk hi ka hah vek thei.



A tawp a tawpah chuan a rawn thu chhuak a, tum bur chung in a room atang chuan kan in zui chhuak a. Tho phang mit meng phak chap in dawhkan chu a va kil ve hnu hnu a. Kei pawh chu ka thu thla ve nghal zat.



" Nizanah i pa Zothana te nen kan in bia a. " Chaw kan ei mawlh mawlh lai chuan ka pa in a rawn ti a, ka en ve nghal vat.



" An bul a awm tir tur che in min tia. Ka lo pawm ta mai a nih kha! " Ka pa in a rawn tih chuan ka antui hawp lai ka hak nghal thawt.



" Pa, midanginah ka awm duh hlei nem! Kei mah in in ka luah hrang mai ang ka tih tawh kha. Midang in a awm te chu ka duh lo. Bakah nuam ka ti lo sa! " Ka tih chuan Lalmaman min lo nuih char char leh nghal. ka ngei zia chu.



" Midang in a ni hlei nem, bakah an mahni zawk kha an rawn in hawng em a. Hmeichhia mahni chauh a in luah chu i ngaihtuah awm a lawm! " Ka nu in a rawn ti zui zat a.



" Naa.... Mahse lehkha zir emaw vel vang a awm ka ni dawn lo a. Hna ka zu thawk dawn a nia. In thla hrun a na dawn lutuk, ka hre lawk sa vek. Bakah mahni a in luah chu ka hlau chuang lo a. " Ka la ti hram.



" I awm char char dawn pawh kan tih loh chu. I zu thleng ve rih a nga. Boruak awm dan a zir in in hrang te chu i la luah ve ang chu. " Ka pa bawk chuan a rawn ti leh a. Ka chaw ei a tawp hmak mai.



" Nia pa a ngaihtuah awm ka ti kei pawn. Nula senior pawh ni tawh mah la hmeichhia tho a lawm i nih! " Lalmaman a rawn tih chuan a hnungah ka beng thum nghal awk mai. Na a ti bawk a niang a eu zui ngawih ngawih a. Ka nu in min hau zui zat.



" Kha tiang khan kut in thlak thin teh suh u! Nula leh tlangval in ni tawh a. A mawi lo thei e mai. " Ka nu chuan a rawn ti zui hlak.



" Senior min ti ziah a nih kha. " Ngei lutuk a Laltlanhlua melh in ka ti zui ve hmak.



" I ni miau sia lawm. Kum 28 i ni tawh a nia. Ngaihzawng chu sawi lo, mipa thian tak ngial pawh i la nei lo a nia. " Nui ruh ruh chungin Lalmaman a la rawn ti hram chu melh nghek in ka tho zui hmak.


" Nula senior tih tauh hrat! " Tui dehna a kut ka sil lai chuan Laltlanhlua bawk chuan min ti leh a. Thinrim lutuk a in her in choka ka chhuah san rual in a samah ka kek nghek ringawt a. Min fiam tih hre tho mah i la senior min tih hi chuan ka thin a rim tlat zel a, Lalmama lah hian ka thinrim dawn tih hre reng hian min ti lui kher zel bawk a.



" I u in kha tia fiam a hua tih i hriat reng kha, Ti lui kher zel suh. " Ka nu in a ti ri pawh chu ka hria a, ka room ah ka lut zui hmak a. School kal tur in ka in siam chhun zawm nghal a.




Kei hi Hmangaihzuali niin Farkawnah kan awm a. Kan khua primary school ah ka pa hi head niin, a hrisel loh em avang in a ai ka kal ta ngat ngat a. A hma pawn Aizawlah lehkha zir in hostelah ka awm reng tawh a. Tunah in luah hran ka tum a min ngaihtuah leh viau bawk si, ka hrethiam nei nuai lo.



Hmanni lawk khan college pakhatah ai kal tur an mamawh tih ka hre ve a, ka tlin ring vak lo in ka va be ve chhin mai mai a. An lo rem ti ta hloh mai a. Mama hi BA a chhuak hlim ve hlawl a,' ka zir zawm peih tawh lo ' a ti mauh mai si a. Hetah a awm dawn tho chuan ka pa ai kal se kan ti kha a nia. Ka chhungte pawn min rem tih pui vek a. Mahse tunah ka pa in a rilru sawh sawn in , in luah hran ka tum kha pa Zothana te inah awm tur in min ti leh tlat si a. Ka lo phur ve tawh tawh nen ka phur lo leh zo vek.



" U... U Tetei a lo kal tawh a nia. " Maman a rawn tih chuan ka chhuak zui nghal vat a. Tetei hi kan khuaah chuan ka kawm ve ber a nia. Tunah hian school ah kan thawk dun bawk a. Nuam chu kan ti ve viau bawk.



" Ka hman e! Kal ang Te... Chuan Tlanhlu, nang tlangvalah thleng kha i dawr kal hma in lo sil ang che. " Ka nau melh ralh chuan ka ti zui nghal a. A tum bur chu ka nui zui hak.




" Mama chu i u thin i ti rim leh tawh a ni maw? A ko duat lo che e mai! " Tetein a rawn ti zui zat a. Kan in atang kan in zui chhuak nghal a. Mama laka ka lawm loh hi chuan a hming kher hian ka ko a, a nin a lo haw ve leh ting tang thin bawk nen, unau pahnih chiah kan nia kan la in ngam em em zui bawk si hi kan in sual lek lek zel.




" Tak a, in luah tur chu i hmu ta em! Engtik nge i chhuk dawn? " School lam pan a kan kal lai chuan Tein a rawn ti a. Ka thaw hak.




" In luah kha ka pa in a rilru a thlak leh a. Mi inah ka zu awm a ngaih hmel! " Tum bar chuan ka ti a. Tei pawh chuan min melh haw.



" Tu te inah? Nang man i duh reng reng a mi? A va in thlahrun awm duh awm ve. Engtia in chhungte nge ni reng reng a? " A rawn ti nghal char char a. A ni pawh min phur pui vak bik lo tih ka hria miin a awm chu.



" Pa Zothana te inah maw le. Ka hmuh lohna lah chu a rei tawh sia. College kal tur a Aizawl a ka pa nen kan chhuk khan vawi khat chu a office ah kan va tlawh a. Kha bak kha ka la hmu lo. Ka pu leh pa Zothana pa hi unau an nia. A awm zia berah chuan ka pa leh pa Zothana hi cousin an ni tihna a nih chu. Mahse kan in hre lo bawk nen ka phur lo teh a nia. " Ka ti zui bai bai.




" Ka van khawngaih reuh che! Ka peih loh pui bawk che si. " A rawn ti let ve mai a.



" Kei tak hi a nia peih lo aw. Tun ang kum tawhah mi in a zu awm chu a nuam hian ka ring lo. " Ka ti zui hram. Lalmaman senior min tih hi haw thin viau mah i la han ngaihtuah chian chuan ka naupang che zawk zawk tawh bik lo tlat a.




School kan thleng a, nidang ang bawk in class kan la a, ni leng hun chu a ral ve mai a. Haw lamah kan dawrah ka peng kawi a. Ka nu leh Mama an lo awm a. Wholesale dawr lian ve pangai tak kan nei bawk a. Mama heta a awm chin hi dawr lamah hian ka dah chawt a. Nakinah ka awm loh hunah chuan ka nu leh pa in dawr hi chu buaipui se school lamah Mama hi kal thung se tih kha kan rel dan erawh a ni. Unau pahnih chauh kan nia, kan chhang a la khat em em zui bawk a. In hal lo chi hi kan ni lo. Kei kum 28 ka nih tawh lai in ka nau erawh 22 na a hmang ve mek a nia.

*

*

" Thlah chu i ngai lo tak tak ang maw? " Ka pa chuan ka in siam zo ka chhuak chu a lo ti vat a. Nui sak in lu ka thing vat. Vawiinah Aizawlah ka chhuk dawn tawh a. Kal dawn hnaiah meuh chuan min ngaihtuah lutuk hi nuih an ti za zawk.



" An in tak ngial pawh i hre lo a nia! Aizawl i thlen dawnah phone ngei ngei rawh aw. I pa Zothanan lam tur che a rawn tir dawn a tih kha! " Ka nu in a rawn ti leh vat a. Lu ka bu nghat nghat.



" In mak e, naupang pawh ka ni tawh lo hi. " Ka ti zui niah niah .



" Chu chiah. Nula senior hlauh nei lo a nih tawh hi. Bakah a vawi khat Aizawl kalna tur pawh a ni lo a. College kal in a zu awm ve hrep tawh a. A bo bik lo ang! " Lalmama chuan a rawn ti a. Ka bag in ka vaw nghal thlawrh.



" Kal ang! I kut thlak a na thei si. Sumo in a tlan san ang che! " Ka bag chu la in a ti zui zat a. Kan in zui chhuak a. Kan in hnial hian kut ka thawh hmasa ziah a mahse ka nau zawk a nih vang nge, mipa a nih vang nge, kei aia a lena tawh zawk vang ka hre lo, kut hi chu min thlak let ngai miah lo thung a. Sumo dinna thleng maman min thlah a, midang ka chuan pui tur te pawh an lo awm ve nual tawh a.



" I zu thlen ve leh nang mah lo lam tur te chu call vat ang che aw. " Kan tlan chhuah dawn chuan Mama pawh chuan thu tak zet in a rawn ti ve a, ka nuih a za reuh lutuk tlat.



" Ka hriaa... Nang pawn I sawi kha, ka zu bo bik lo ang! " Nui hak hak in ka ti let a. A then ve suk mai. Kan in vai liam a. Motor thui tak ka chuan lohna rei tawh bawk nen rei lo te atang ka rui nghal ringawt a. Kal dawn a ka nu in damdawi ei tur a min tih ka ei lo kha ka in chhir leh hnu hnawh viau mai.



Kan khaw mi te vek an ni bawk a, an ti ti barh barh a. Kei erawh tukverh bulah thu in mit ka chhing hmiah a. Tawng pawh ka tawng peih ve meuh lo. Rin ai tak chuan kan tluang phian a. Aizawl kan thlen chuan khua pawh a la thim bik lo. Sumo atang chhuk in ka bungrua vel kan hlang thla a, tlai a nih vang nge mihring an tam phian leh nghal. Kawng sirah ding in min lo lam tu tur chu call tum in ka phone ka hmet zui nghal malh malh a.



Ka lo ding kawnglai lutuk nge ka hnung lam atang hian min rawn su deuh chawrh a, ka phone ka hum nghet viau a maw ka tih kha ka thlauh zui bawk. Chhar tum a ka kut chiah tih in ka bul a kal tu emaw ber chuan a rawn chhir a, sir lam a kawrte ah chuan a chhir lut zui nghal daih chu pawi ti lutuk in ka rak zui that.



" Ka phone! " Tih leh kawr lam chu ka pan hnai a, a lo la in ping dang vek zui a. Ka phone chu ka hmu ngei a mahse ka kut ka zen lut mai thei lo leh nghal. Kawr tui tawp lutuk a a in chiah reng chuan a chhe mai ang tih ka hlau viau leh nghal.



" Min lo hrethiam lawk! " Rawn ti tu avang chuan ka hawi chhuak zawk a. Mipa pakhat hian min lo be reng ni in.



" Ka lo pui ang che! " A rawn ti chuan ka melh haw a. A hnu chuan ka phone min chhar sak a tum thu a sawi a, ka kal sawn ta hram.



" Brandon... Kawng sir ah khan lo ding rawh aw! " Ka phone min lak sak tu pa chuan a rawn ti a, a bul a naupang ding chu ka lamah a rawn tawlh hnai hrat a. A ni pawh chuan a chhar thei mai bik lo. Kei aiin a kut a lian in a hrawl zawk miau a. Ka kut pawh a leng lo a nia, a ni kut te chu a leng bik awm lo ka rilru chuan ka ti mawlh mawlh a.



A beidawng ve nge a rawn ding thurh a. A kal sawn mai dawn emaw ka tih laiin a hawi kual thuak thuak a. Kawngpui sir a hmawlh chu a va la a, rem lo zet in ka phone chu a hawlh sawn hret hret a, kan piah fe a step sir in ping dang lo thleng chuan a hawlh a, a lak thei ta hram. Mahse a huh vek bakah kawr uih rim a nam bawk nen lak chu a phur awm lo tak zet.



Min puitu pa pawh chuan kut lawng a han khawi chu a hreh ve ngang a nia, a scarve la chhuak in ten hmel tawk in a rawn khai chhuak a. Mipa naupang nen khan ka en haw ringawt.



" A chhungah tui a lut hman a ni mai thei. A nung thei lo a nih hi! ' a hruk fai hnu chuan a ti a. Hru fai tawh mahse a rim chu a la ui tih ka hre thei.



" A nung thei lo maw? Engtin nge ka tih tak ang." Ka ti hap. Min lo hruai tur ka phone lo chuan kei mah in pa Zothana te in ka hre lo a sin.



" Dawrah siam tir a ngaih ka ring. A tlai tawh sia kan rual in i lo tel ve duh em. Kan thlah nghal ang che. Ka fapa vangin i phone kan ti chhe si a. I siam man pawh ka chawi vek dawn a nia! " A rawn tih chuan a ngaihna hre lo zet in ka melh haw.



" Nangmah su tu che kha! " Ka mak ti hmel a hmuh chuan a rawn ti leh sup a. Ka hrethiam chiah. Ka thin chu a rawn rim nghal tun a mahse kha tiang khan min pui ve bawk nen ka ti lang ngam chiah bawk si lo chu ka in seh ruh nghek ringawt.



" Andrew ka nia. Chuan hei ka fapa Brandon a nih hi. " Front glass atanga min rawn melh in a ti sup a. Kei erawh ka phone ka melh ngawt ngawt thung. Pa Zothana te veng lam pan chuan ka kal tir ve ngei a. Mahse an in tak ka hre bawk si lo.



" In Veng chu kan thleng a, khawi lamah nge ka tlan dawn? " A rawn tih chuan ka hawi dawr. Front glass atang min lo en bawk nen chhan mai ngaihna pawh ka hre bik lo.



" Eng lo... Kan chhungte inah ka thleng dawn a. An in tak hi ka la hre lo a. Ka...ka phone ah hian an no chu a awm maw le...! " Ka ti nawi nak ringawt.



" A van pawi leh zel em. A in thlahrun awm khawp mai zawk in! " Andrew chuan a rawn ti a. Ka hmui ka pet sawi zeuh ringawt. Kei mah ber pawh kha mi tlem na lai deuh a lo din tur a nia. Ka mawl lutuk vang vek.



" Tu te nge i chhungte chu? Ka hre ve mai thei a sin! A nih loh pawn mi kan zawt kual a nga, kei mahni vang in i buai phah sia puih che chu kan ba in ka hria! " Rei fe kan ngawih hnu chuan a rawn ti a.



" Aa.... Pa Zothana te an nia. A hming pum kha ka theihnghilh, a mah chu lawyer a nia. I hriat mi a ni em? " ka ti ha chu a rawn hawi phei vut a. Mak ti hmel a pu deuh bawk.



" I sawi chu Pu Zothantluanga kha a mi? " A rawn tih chuan ka ngaihtuah vang vang a. A hming pum tak pawh ka lo hre lo chu mawl ka in ti nawn awn awn viau mai. Mahse a hnu chuan pa Zothana nu hming ka sawi leh a, a sawi ngei chu a lo ni bawk nen ka lawm zia chu sawi ngaihna pawh ka hre lo hial.



" Engtin nge pa Zothana chu i hriat a? " Motor a tlan chhuah hnu chuan ka zawt ve ta nge nge.



" Kan chhungte ve tho a nia. Pu Zothana nupui kha ka farnu ve liau liau a nia! " A rawn ti ve mai a. Lu ka lo nu nghat thung.



" Nang ve engtin nge in in chhun a? " A rawn ti let nghal a. Ka sawi ve mai a. Kan ti ti ve thei ta phian a, a fapa erawh kha chu kan hriat loh hlan in a lo muhil daih a. A fel ve reuh khawp mai.



" Kan thleng e! " Motor ti ding dawt in a rawn ti a, ka hawi chhuak ve vat. In lian leh nalh zet kawtah kan lo ding vang tawh a. Mahni a han luh tawp lah chu ka hreh em em mai leh nghal.



" Lo kal la. Ka va thlah ang che! " A rawn tih chuan ka hawi a heu mai. A mah zawk chu a chhuak hmasa a, motor hnung lam a ka bag vel a lak chhuah rual in ka chuak ve a. Motor ka chhuah san takah chuan ruah a lo sur seng seng tih ka hre chiah leh nghal. Ka bul a rawn ding chu ka lo nuih sak a, vanduai ro roah ka vannei let ling viau in ka hria.



" Pu Andrew ka lawm lutuk aw, awm lo la chuan.. "


" Awm lo i la chuan hma deuhah i thleng tawh ngei ang. Kei leh ka fapa hi min hrethiam mawlh mawlh zawk dawn nia! " Ka tawng lai pawt chat in a rawn ti zung zung a. Ka nui tawi tak mai.



" Chuan pu tel lo in Andrew tih kha a tawk mai ang. Thian khan ni nghal a ni mai a! I hming min hrilh ve theih chuan? " Gate hawng chuan a ti zui zat a. Kei pawh chu ka nui ta tawp. A hnung a zui in ka hmingte chu ka sawi ve luam a. Kha ri cheng kawngah kan ti ti a, ka hming ka lo la sawi ve miah lo tih ka hre chiah leh nghal.



Doorbell kan hmet a, rei lo teah nula pakhat hian a rawn hawng a, Andrew chu tlangnel takin a lut zui mai a. Nu pakhat han ti i la pitar a ni tawh zawk mah ang chu, chuan pa Zothana nu a nih ngei ka ring, chu chuan min lo chhawn vat a. Andrew chuan a be luam a. Motorah a fapa a kal san avangin a let leh nghal tur thu a sawi nghal zat.



" A lawmawm hle mai Zualtei i rawn thlah thleng chu. Bawihpuia lam tur khan a chhuak ve sia call a hrilh vat a ngai a nih chu! " Andrew thlah pah chuan a ti a. Kei erawh ka dinnaah ding reng in ka hawi kual ruai a. A chhan pawh an in hi a lian in a changkang lutuk a. Ka rin phak bak lam daih a ni.



" Zualte i chau em? I rawn phone mai si lo a kan lo mang ang hman a lawm. I pa te kan han bia a i rawn chhuk an ti bawk sia Bawihpuia lam tur che in kan rawn tir chhuak ve ngawt a. In in tawk lo vel chiah chiah a niang. I room turah lo han in ti fai la, Bawihpuia kan lo phone a nge! " A rawn ti zui vat a. An nula bulah chuan ka bungrua min khai pui a room min kawh hmuh tur in a ti zawm zat a. Kan vawi khat in hmuhna a nia kei erawh ka ngawi chawi ve viau mai. Nge ni a tawng tur a awm lo vang zawk pawh ka hre lo.



A hmel en in a upa ve thaw khat tih a hriat a. Mahse a che chu a la zangin a la hrisel that hmel viau. Ka pa min hrilh dan chuan inah hian pa Zothana nu , pa Zothana leh a fapa chiah an cheng a ni awm a. Kum kal ta lawk khan pa Zothana pa in a boral san a, chu mi tum chuan ka pa pawn a zu thlah liam ve nghe nghe bawk a.



Roomah kan luh hnu in an nula kha chuan min chhuah san nghal mai a. Ka motor ruih la reh fel lo nen ka la ni deuh nghulh leh nghal a. Inbual fai i la ka harh deuh ka ring avangin ka thawmhnaw pawh dan fel hmasa lo in bathroom lam ka pan nghal a. Ka rin phak bak in engkim hi a tha mah mah emaw tih tur a nih.



Tui lum a ka in phuh ser ser hnu chuan ka harh hawk in ka hria. Towel a in tuam in ka lu pawh towel in ka tuam a. Bathroom atang ka chhuak chu ruah pawn lamah ruah a lo sur tak tawh viau leh nghal. Chhun lam kha a lum uap churh ka ti reng a ni.



Ka bag a ka phone chu ka la chhuak a, Andrew sawi dan takah a chhungah tui a lut a nih ka ring. Ka pa te biak a ka thlen tluan thu hrilh ka ngai a , tih vak ngaihna a awm lo chu khum sir dawhkan a dah in ka in thlak san a. Ka thawmhnaw pawh la dah chhuak lo chuan ka inthlak zawh ve leh in hnuai lam a chhuk tur in room ka chhuah san a.



Sawi vak ngai lo in an nei nung thaw khat tih a hriat a, he ta awm pawh a in thlahrun awm rum rum ka rilru chuan ka ti mawlh mawlh a. In hnuai ka thlen rual deuh thaw in pa Zothana nu khan min lo chhawn leh vat a.



" Pi... Ka phone tuiah ka ti tla palh a, a nung thei si lo a. Ka pa te biak ka duh sia, englo... Phone hman lawk tur a awm em? " In thlahrung dak chuan ka ti a. A phone min pek takah chuan ka pa no pawh a lo neih ve ngei avangin ka han be ve thei hram a. Ka pi erawh a kal dawn zui nghal mai a.



Ka pa nen kan in bia chu min biak tlang thei loh thu ve a lo sawi nghal luam a. Ka thlen tluan thu sawi a ka biak takah chuan a hahdam hmel ta viau, a aw atang pawn ka hre thei.



Ka pa nen kan in biak mawlh mawlh lai chuan doorbell a rawn ri a. Nula khan a hawn sak ring in ka nghak deuh a. Mahse a rawn chhuah mai loh avang chuan ruah sur ri vel nen a hre lo a nih ring in ka pa nen kan in biakna ka ti tawp a, kawngka lam chu ka pan zui ve mai a. Dawh thei lo tih hriat zet in doorbell lah chu a ri nawn sek leh nghal.



" I va rawn hawng har em em ve! " Khawngka ka pawh hawn rual a rawn ti vin hrawk tu avang chuan ka la phu chiam zui leh nghal. Pawn lamah chuan huh hnuang in mipa... ti la tlangval sang tha zet hi a lo ding run a. A hmel lan dan chang tha zet leh a mit meng rum zet atang chuan a thinrim hmel hluah hluah leh nghal.



" I beng chu a tha lo ngei a nih dawn hi! " Rawn ti leh nghut in kawngka chu a rawn nem zau rawk a. Thli chu a rawn thaw lut nasa viau leh nghal. Huh hnuang chung chuan a rawn pen lut zui pawk pawk a. A mizia mak lutuk vang chuan ka en zui haw ringawt.



A kal na hnu apiangah chu a taksa huh thli chu a dir zawih zawih a. A kut leh lam in a helmet a keng bawk nen mipa thinchhe ve tak chu a niang. A la upat hmel loh teh reng nen. Mama nen an in rual vel lek zawk ang chu.



" Thinchhe lutuk! " Ti hlak in kawngka chu ka khar a, ka in her chiah chu kha pa khan min lo melh ngur a nih chu. A kal sawn daih tawh a maw tih lai in.



" Eng thu maw I sawi a? " A rawn ti bung hmuk. Ka tawng kha a lo hre hman a nih ka ring. A beng a tha hle mai.



" Engmah ka sawi lo! " Ti liam puat in kal sawn mai ka tum a, ka ban rek a rawn vuan chawt tu avang chuan ka ding leh chawt.


" Enge maw I hriat leh? " Ka ti ve that. Lo zaidam vak bik loh sa nen ka aw chu a fiak tha mah mah bawk.



" Thinchhia min tih thu i sawi chiang viau in ka hria! " A rawn tih rual in a then suk a. A nui na in min ngaihnepna ka hmu zawk in ka hria.



" I hriat reng chuan ti nge min zawh leh kher? " Ka ti ve ngat. Ka chhan letna avang chuan a mit meng chu a rawn rum zual sauh leh nghal. Ka ban rek chu ka hmer nget em em mai leh nghal.



Tawng a tum leh lai tak chuan a pi khan rawn ko in kan lam a rawn pan avang chuan ka kut chu a thlah ve hram. A mit meng erawh chu a la dur tha khup khup viau leh nghal.



" Bawihpui i rawn thleng ve hram a. Ti nge... Ruah I rawn do haw a ni maw? " Kan bul a rawn thlen rual in a pi chuan a ti zung zung a. A nih chuan hepa hi pa Zothana fapa tihna a nia. Chu pawh nise a thinchhia in a ngeiawmna a bo chuang hauh lo.



" A nih hi! Tu emaw vang in ruah leh thlipuiin min nuai hrep bawk! " A ti hmuk a ka ner sak. A rawn haw hma atangin lungawi lohna a neih vang mai a kha tia rawn chet a, in chhung a rawn vin hluk hluk te kha a tul viau a maw ni. Kan in chu niin ka nau chu ni aw ka beng thle lawl tawh ang.




" I huh nasa lutuk, hei chhuatah pawh i thawmhnaw huh a far thlurh thlur mai. Han in thlak vat rawh i damlo a nge! " A pi chuan a ti zui barh barh a. A tupa lah chuan min melh rum tha viau thung a.



" Bawihpui! " A tig leh takah chuan a kal sawn ve hram. In chung step a a bawp sei zet a a pen chho chu ka en zui ve reng ringawt.



" A ni kha i pa Zothana fapa chu a nih kha! In lo in hmelhriat tawh em? " Rawn ti ri avang chuan ka hawi sawn nghal vat.



" Maw... Aw.. A... Ka tih awm zia chu ka hre ve chiah. " Ka ti bah nak . Dik tak chuan eng in hmelhriat tirna mah kan lo nei reng reng lo. In hmelhriat chu sawi loh a hming tak ngial pawh ka hre lo.



Ruah han hnu rei lo teah pa Zothana a rawn haw a. Ka hmuh lohna rei tawh bawk nen he in a mi a tu a mah hi nel pawh ka nei lo. Pa Zothana ka hmuh takah chuan a fapa nen khan in chhun tak an ni. A hmel, an mit meng, an engkim a ni mai. Pafa an ni tih hi hai rual a ni lo.



Zanriah kan ei dawn chuan ka pi in an nula hnenah a tupa kha han ko tur in a ti a. Pa Zothana pawh a rawn chhuak ve tawh. Min be tlangnel in ka pa te chanchin min zawt a. Ka chhang ve zel a. A fapa lah chu a hmungun an ko ngai bawk si lo nen a hming pawh ka la hre lo.



Dawhkan kan kil hnu rei lo teah pa Zothana fapa pawh chu chokaah a rawn lut a. Jumper dum leh joker pants nen , a mah a sang tha in sang satliah kan tih ang chi ni lo khan a pian hi a in phut nalh viau bawk a. Mama sang ka ti tawh viau a nia, pa Zothana fapa hi a la sang zawk a. Chutah sangthlawn ang chi kha a nu lo bawk nen a lang lian leh zual.




" Hei hi ka fapa Zorinpuia a nih hi. In lo in hriat tawh tho chu ka ring a. Bawihpui hei hi i pa Ruata fanu Zualtei a nih hi. " Chair a a thut thla rual chuan pa Zothana a ti churh churh a. Ti kha chuan a hming chu ka hre ve ta hram a lawm. Zorinpuia chuan min rawn melh zawk a , a ner sak pawh chu ka hmu chiang ngang mai. Hepa nen hian kan in mil dawn lo tih ka ring thiam sa.



" Tak a nau kha i la nei in ka hria a. Eng rual nge a nih ve tawh? " Pa Zothanan a rawn tih leh chuan ka hma a mipa luhlul hmel zet ka melhna atang chuan ka hawi sawn ta hram.



" Oo.... A lian ve tawh. Nikum khan college a chhuak ve chiah a. " Ka ti ta vat.



" Zir zawm te a tum tawh lo a mi? " Ka pi chuan a rawn ti ve vat a.


" A man a peih tawh chiah lo a. " Ka ti let vat a. Kan unau hi school kan luh hma mai bakah mizo school atanga tan kan nih avang in , Kg tih vel kan kal ve lem lo a. School kan luh tir atang un pawl 1 kan ni nghal tawp a. Thiam thei tih a sawi lua tur chu ni lo mah i la fail miah lo in kan kal chho a. Kum 21 kan niin college kan chhuak thei a, kan vannei phian. Kei erawh ka pa duh ang in MA te zawm chho in ka kal chho zel a. M . Ed pawh Diet ah ka zir chhuak ve thlap. Mahse ka mimal ro khawlhna avang in kan khuaah ka haw chho a.



Aizawl a chhuk leh lam hi ka ngaihtuah duh tawh lo a. Maman college a kal pawn ka pa in in unau in zu awm u la, nang in i phak tawk hna te i zu zawng ve a nga, hetia thingtlang a in khung beh reng, min ti a mahse ka hnial gi thla thak a. A chhan chu mi zawng zawng hian nunhlui theihnghilh theih loh kan neih vek ang hian kei pawn ka nei ve miau a.



Mahse tunah chuan kum fe a ral tawh a, hma lam pan ka in peih ve tawh pawh a ni mahna hetiang a ka awm tak. Ka chhungte chuan mipa ngaihsak lo, i leng tar mai tur a nia hetiang a I awm reng chuan min ti ve thin a. Mahse ka hun kal tawh a mipa ka rawn fuh loh vang khan mipa hi in nghahna tlak leh rin ngam ka nei tawh lo ni ber in ka hria. Pa Zothana rawn tawng vang chuan ka ngaihtuahna atang ka harh chhuak zawk.




" Zirna lamah in tluang chu in vannei khawp mai. Tak a, i college thawhna turah khan Bawihpuia pawh hi a kal ve tak a sin. Class in tan leh hunah chuan 5th semester a ni ve dawn a. " A rawn tih chuan Zorinpuia chu ka melh vat a. A ni erawh a thil ei lai chiah a ngaihtuah a maw tih mai tur a ni.




" Mahse... " Ka ti let chiah tiin ka hma a mipa chu a ding thurh a, a puar thu sawiin a chhuak nghal daih leh nghal. Ka lakah hian a lawm lo zawk a maw ni ka ti hial.



" Engah mah ngai suh a mizia ve hrim hrim a nia. Nang mah lam tur che in a rawn kal a, I lo kal san leh bawk sia. Ruah sur in a rawn nan haw leh bawk nen a lungawi vak lo a nih kha, a reh ve mai ang. Ei teuh rawh aw! " Ka pi chuan a rawn ti vat a. Ka nui lui sak ringawt. A upat tawh tawh nen a rilru chu a naupang chhia leh mai ka ti rilru hram.




Zanriah kan ei zawh in pa Zothanan hna khawih tur a rawn hawn thu sawiin a room lamah a lut a, ka pi in i chau ang han mu hahdam ve rawh min ti bawk nen ka room tur lamah khan ka chho a. Ka room thlen hma in Zorinpuia room kha a awm bawk nen luh kawi a vawiin thil kha hrilhfiah ka tum ut ut a. Mahse ka thulh leh ta zawk. Ka duh vang reng a kal san pawh ka ni lo a. Lungawi lohna a lak thamah ka ngai lo leh ta zawk a.



Phone khawih tur awm bawk si lo nen. Khumah chuan ka mu meng kar a. Kan in ang in TV en mai ang ti dawn I la inhnuai a chhuk a ngai dawn bawk si. Tunah zan dar 7 chiah a la ni bawk nen sana ri chu ngaithla in ka mu meng kar a. Naktukah ka phone siam tir ngei ngei a nga. Ka hna kal sak tur te ka biak a ngai a, bakah phone nei lo ngawt in ka awm thei lo bawk. Huiss...Hna thaw hma hauh in ka buai nghal der chu a nia. Mahse ka rin ang aiin Pa Zothana te an fel hlauh a. Zorinpuia tih loh chu. Mahse a ni pawh ka nau rual lek a nia kan in rem vat beisei phawt mai ang!




i han tan leh bauh bauh ang u aw val senior kan uar bawk a, tun tum chu nula senior lam zawk ti ve tawh ang u aw a ngaihnawm in tih zawng a ni a ngem chu ka hre lo a, rilruah a lang ve thung tlat mai sia

[Abbra Reo Ririni]

CHAPTER - 2 by Amy Cck


Ka pum nuam lo lutuk vang chuan ka harh hlawl a. Khua a var tawh dawn emaw ka ti kha dar 1 a lo ri dawn chiah zawk a. Peih lo tawk a tho in bathroom ah ka lut a. Hei chu ka nih dan a ni ve hrim hrim a. Midang chu awmna hmun an thlak thut emaw in dang a an riah chhuah hian an muhil thei ngai lo a, kei ve chu ka pum lam hian a tuar daih zel.


Bathroom atanga ka chhuak mutthilh leh mai ka tum chu ka mut a chhuak tawh tlat lo. Dar 7 vel khan ka muhil a nia, ka harh lai ve em a. Ruah chu sur buan buan ni si lo hian mut ti nuam tawk in a tla cherh cherh a. Kei erawh ka harh tulh tulh emaw tih mai tur a ni.


Ka muhil thei lo bawk nen ka tui in hal leh ril tam deuh bawk si chu zah pawh dawn lo in inhnuaiah chhuk thlak ka ngaihtuah ta tawp a. Tlaiah khan ka motor chuang rui deuh nen, bakah ka nel vak lo te bul a chaw ka ei vang khan ka puar em em lo hrim hrim a. Tun lawkah ka va in paih ruak leh bawk nen.



Step ka chhuk chu ka reh ruih a. In chu thim vek lo in a eng dul ruih a. Dik tak chuan ka fangkual ve chak viau a. Ka la in thlahrung ve deuh bawk nen hun ka la nei hner hnur turah ngai phawt ang ka ti ta tawp a. Chokaah ka lut a, hawi pawh hawi lem lo in fridge ka hawng a, a chhin lam a bottle chu la in tui vawt chu ka in nghal vat a. Tui ka in zo ka dah leh rual chuan plate a alu kan chuan ka mit a la tlat leh nghal. Ka kut in ka pir zeuh a, ka ril tam a ti zual sawt zui. Chaw tlem ei ka rilruk zui nghal a.


" Oiii.... Lalpa! " Alu chu a plate chawp chuan la chhuak in fridge chu ka khar a, ka in her chiah chu ka rak that. Chu mai ni lo in ka phu nasa bawk nen ka plate ken ka la thauh zui a nih chu.



" Tu... Tunge i nih? " Ka ti chhuak sap. Choka bathroom bul a mihring, thawmhnaw dum vek a in thuam lo ding chu rap zet in ka melh a. Min la chhang miah lo zui chuan ka hlauhna a ti zual sawt. Inah misual an rawn lut ruh a nih ka ring zui nghal a. Ka tha a khur ti tih der leh nghal.



" I in sawi vat lo chuan ka au vak dawn a nia! " Ka tih rual chuan a rawn che hrut a, ka lam pan a a rawn chet hrut rual pa Zothana koh ka tum chu ka hmui a rawn hup zui hmuk a, hlauthawng lutuk in ka tal nghal nawk nawk a, a la chak em em zui leh nghal. Rem lo zet a ka kiu vei lam a a nakah ka nghawk rual chuan thaw hawk in min thlah ta hram a. Tlan chhiat ka tum chu ka banrekah a rawn hmer nghal chawt.



" Min thlah rang rawh! " Tih leh ka kut a vawn lohna lam a a kut phelh ka tum chu min vuan tu avang chuan ka che ka tawp chawt.



" Zorinpui... Nang... Nangmah lek a law? Hmela min tih hlauh hman zia kha i hria em? Min thlah teh! " Ti zui hlak in ka kut chu ka thing a min thlah duh thak lo. Light in on a dim em avang in nichin kha chuan a hmel ka hmuh thei lo a nia. Mahse tunah kan in hnaih chilh tak em avangin ka hre ve chiah.


" I kut thlak a va na ve! " A rawn tih chuan ka ner nang.


" I phu tawk a nih kha, min thlah vat te! Nang mah vang in chhuat ka ti balh phah a nia! " Ka ti leh hmak. A mah vang in ka thin phu a la pangai miah lo bawk. Ka kut chu a thlah a, choka luh dawn a light on na ah chuan pheiin light chu ka ti eng a. Ka alu tih buak ka en chu ka thinrim zual sawt. A hunna plate glass hlang a ni bawk nen ka thlauh keh tel vek a nih chu.


" Nangmah vang vek! " Tih leh Zorinpuia chu melh nghek ka rual a. Mahse a lan dan chu a dik miah lo. A mit meng chu a sen rum a, a damlo te pawh a ang hial.


" Heii.... Ti nge a? I damlo a mi? " Ka tih chuan min chhan mai loh avang in ka pan hnai hret a. A pang deh tum a ka kut ka lek chhuak chu ka banrekah min lo vuan nghal chawt.


" Ka tha! " a ti bul hmuk a. Mahse ka ring lo deuh deuh thung. Ka ban a vawnna kut hi a sa huam miau a. Nichin kha chuan ka hlauhna in min hneh em avang khan ka hre lo a mahse tunah hi chuan a taksa hi a nih tur ang aiin a sa tih ka hre tawh.


" Khawi maw I chal ringawt a lawm ka khawih dawn! " Ti leh hlak in ka kut a vawn beh loh lam chuan rang zet in ka ban a. A sang in a lian tha zeh zuah bawk nen ka ban ka phar vah mai.


" I khua a sik a nih hi. I sa vek leh nghal! " Ti vat in ka kut hnung lam chuan a biang chu ka tawk leh zauh a. A rawn thaw chhuak leh hawlh mai.


" I pa emaw I pi ka va hrilh ang aw! " Tih leh kal sawn ka tum chu ka ban a vawnna lam khan min kuai her in ka darah a chal a rawn nghat dawt a. Kei lah lo nu lian bik vak lo nen ka ding nghet lo chu ka la pai deuh khat khat zui.



" A ngai lo. Ka tha! " Ka dar a a lu nghat reng chung chuan a ti zawi sup a. Tlangval lian ve tawk tak a ni bawk nen kan awm dan chu rem lo tak a ni


" I khawsik hi a sang teh a nia aw! " Ka taksa a ngheng ngur bawk si chu ka ti leh halh ringawt. Ka sawi dik reng bawk. A chal, ka dar a nghahna ringawt pawh hi a sa ham ham miau a. A rawn che hrut a, ka dar a a chal nghat reng chungin ka nghawng lamah a rawn in her deuh tih ka hria.


" Midang tih buai ka duh lo! " Thaw hawk in a rawn ti leh rual chuan ka thawk ka ip vak ringawt. A tawng zawng khan ka nghawng vel a lum tel ve hawk zel miau a. Chuan midang tih buai ka duh lo te chu a tia kei hi midangah min chhiar ve lo zawk nge?


" A nih...Ihh... Eng... Englo! A nih chuan i room ah ka hruai chho ang che! " Ka ti thla ve ngawt. Min chhang lo chuan a lu nge a hmai zawk chuan ka nghawng rawn nawr na zual sauh in a thaw chhuak leh hawk.



" Heii... I muhil a mi? Heti hian kan awm reng thei lo a nia aw! " Ka ti nawn leh hap. Ka ke a kham tawh bakah, a mah hi a rit bawn nen ka tang tung mai. Kum eng emaw chen hnu a mipa ka hnaih hmasak ber a nih vang pawh a ni mai thei.



' Oo... Hmangaihzual kha tiang ngaihtuah suh, i nau ang chiah a nih hi! Mama nen danglamna an awm lo! ' ka rilru chuan a rawn ti zui nghal a. Ni e, ka nau tur chu a nia mahse in hre thar ang chiah kan nia han nau en nghal chu a har talh mai. Thil dang ngaituah buai duh lo chuan ka kut leh lam chuan rem lo zet in a darah ka tawk dat a, a rum nghut duh chauh leh nghal. A muhil zui tak tak a mi hepa hi!


" Zorinpui! " A la chet duh thak loh avang chuan ka ti leh hrak a. Ka aw chu a vin lam mah mah bawk. Ohh... Hman atang in hmeichhe zaidam tak ka ni lo sa hrim hrim miau a. Hei vang hi lawm puitling uai tawh siin Mama nen pawh kan la in hnial reng theih.


" Thinchhe reuh lutuk! " Ti hluk in a ding chhuak ruai ruai a. Melh nghek in ka ner sak. Thinchhia te chu min la ti let zawk a. Tlai a a thinchhiat zia kha a in hre lo a maw ni, zawk za mah hian.


" Vin ngai kher lo khan che vat ta reng che! " Ka sam hui chho hap in ka ti leh hlak chu a rum ri nghut.


" Rei pawh ka nghen loh che kha! " Tum bur a a rawn tih chuan ka melh rawm. Rei lo te chhung mah nise a taksa rihna zawng zawng nen min ngheng a ka hah vek tho. A taksa a sa bawk nen ka thlan ve vek hial in ka hria.


" Rei emaw rei lo pawh nise i rit tho a lawm! " Ka ti ram hmak. Min chhan dan a hre tawh lo nge a ngawi vung vung a. Kei in ka chhuat tih balh chu ka melh reng thung. Zingah plate keh hi an hmuh chuan ka zak ve viau ang.


" Ka damlo a nih hi! " Rei fe kan ngawih hnu chuan a rawn ti bul leh hmuk. Chhuat lam ka melhna atang chuan ka en chho leh vah. Chu chu ka hre lo a maw a ti reng reng a maw ni.


" Chu tak reng. I room ah ka hruai ang che ka tih reng kha. " Ngawi mai ta bik lo chuan ka ti zui hlak.


" In hnial lah chu i hrat reuh fu a, i tet tet nen i thinchhe si. Tu vanga damlo nge ka nih i hria em? Nangmah vang in ruah in min nan a, ka dam loh phah a nih hi! " A rawn ti leh hluk chu chhan tum in ka ang zauh a mahse ka ngawi leh ta zawk.


Ka in thlahrung ve det miau a. Tlai a huh zawr hnuang a kawngka a a lo ding ka mitthla let a, ka thiam loh hul hual ni lo mahse kei mah vang chuan a ni ve tho si a. Te te chu min la ti ve khang lang a hmeichhe dang aia ka tet viau na ka hre lo. Fit 5'3 chu ka ni ve a. Chungte chu mizo hmeichhiaah chuan ka pangai viau chuan ka in hria.


" Aa... Lo kal rawh i room ah ka kai chho ang che. Chuan damdawi i ei dawn nia! " Ka ti ta tawp. Min tih dan lung ni zan lo mah i la hnial buai ka peih tawh lo. Bakah an inah ka awm dawn a kan in ang in ka duh duh sawi ve nghek nghek pawh a mawi ber lo.


A chet mai loh avang chuan a banah chuan ka vuan a. Ka pawh deuh ti tih takah chuan min zui ve hnu hnuin Choka atang chuan kan in kai chhuak a. Step kan chho dawn chuan a mawi hnaiah a banah ka vuan a ni mah tawh zawk.


" Nangmah in i kal thei bawk a, chho mai rawh aw. Ka thil tih buak kha va tih fai te ka ngai! " Tih leh a ban ka vawn chu thlah ka rual a. Ka in her tur chu ka ban rekah bawk a rawn vuan leh tawh. Hepa hi enge a hriat a.


" Ka dam loh hi! Ka ding nghet thei lo. " A rawn tih chuan ngei lutuk a melh in ka ner zui sak. A ban chu ka kaih beisei ni awm zia zang hian a rawn ti che zeuh a, thaw hak in a jumper hak lian zet banah chu ka vuan ta ngawt. Stepah chuan kan in zui chho a. Engvang a in hnuai a lo chhuk ta kher kher nge ka nih ka ti rum rum hial.


A room kawngka ka hawng chu ka meng bial kawk mai. Ka room kha zau ka ti hle a nia, ka room let thawk in a zau a. Khum lian leh nalh zet chu room lai takah a in hung a. Khum lu lam chuan bang a si thung. Khum sir vei lam zawnah chuan a thawmhnaw dahna ni ngei tur a awm a. Dawhkan, sofa thlengin. Chuan lehkhabu tam tak chhuar pakhat mawi zetah chuan a in rem khat vek a. Khum sir ding lamah erawh music instrument chi hrang hrang khawih chak awm tak tak in a in hung dul bawk a. Sir lam a bawm pakhatah chuan ball dah khawmna ka ti mai a awm bawk a. Thiam thil a neih tam hmel hle mai ka rilru chuan ka ti a. Chung zawng zawng chu Room pakhat a awm atan chuan a tam mah mah a. Mahse room chu a lan chep phah chuang miah lo.


" I hawi kual zo tawh em? " Ti ri vang chuan ka harh zawk mai. Ka sir a mipa ding chu ka melh haw a. Min lo melh chhuk ve run a. Nui tawi takin a kawr ban ka vawn chu ka thlah zui hmak.


" Ti khan damdawi ei la, mu lum rawh! " Tih leh in her a chhuah leh mai ka tum chu a ngai bawk in ka banrekah bawk a rawn man leh tawh. Ka zaidamna in a tlin lo tak ngial dawn.


" Enge la ni cheu a! " Thinrim in sum zet chuan ka ti a. Ka in sum nasa bawk a ka tawng chhuak chu ka seh chilh nak mai.


" Damdawi ei tur ka hre lo. Bakah nangmah vang a damlo ka nia ! " A mit ko san uk in a rawn tih chuan ka in seh ruh nasa ngang mai. Hepa hi min fiam kual a tum khang lang a maw ni. Hetiang a in enkawl a in ngaihsak tur hian kan in hre tha viau lo bawk.



" Kha thil kha min sawi khum sek suh. Tunge min lo lam rawh ti che? Ka rawn call hun lo nghak mai ta che. A nih loh pawn ruah sur kha ka do luih tir che a mi? Ruah sur lai khan lo haw chung chung rawh ka ti che em? " Ka ti ta tan tan a. Ka tang lutuk bawk nen ka sawi zo chu ka thaw chhuak zui hak.



" Ti lo ti rawh! Chuvang chuan damdawi ei la mu rawh. A nih loh pawn I pa emaw i pi ka zu ko mai ang! " Ka ti leh a. Tun kha chu a ring em em bik tawh lo. Ka kut a vawn chu zawi muangin a thlah a. Ka thinrim tih a hre ve a ni mahna. Kawngka ka chhuah san tur chu a thu rawn sawi avang chuan ka ding dat.



" Midang chu hrilh kher an ngai lo. Ka damlo tih an hriat chuan an chi ai leh vek mai ang. A bikin ka pa, a rilru tih hah ka duh lo! " A rawn ti zawi ruih a. Kawngka bul ka thleng tawh chu ka hawi let a. Mahse min lo en ve tawh lo. Khum lam chu a pan a, khum chungah chuan thu in khum lu lam chu a ngheng a. Mit a chhing zui hmak leh nghal.



" Hmangaihzual i a tawh! " Ti halh in a lam chu ka pan ta nge nge. A damlo tih hre reng a han chhuah san chu ka hreh ve leh deuh bawk nen. Damdawi ei tum hmel a pu bawk si lo, rilru in sual nuai nuai chung in khum sirah chuan ka ding zui at. Ka awm tih hre lo ang hmak in mit pawh a rawn meng tawh lo.



" Khawnge damdawi box i dah? Nge i roomah i kawl lo zawk? " Ka ti chhuak hap chu thatchhe zetin a mit a rawn meng ruai ruai a. A mit meng chu a dul ve ruih mai. Min chhan mai loh avang chuan mit hmul ka kan zeuh a.


" Saw lai, pawhdawhah sawn! " A tih takah chuan ka pan vat a. A khawsik a sang bawk nen damdawi hian a chhawk zo em ang chu ti rilru in ka pe a. Khum sir a tui bottle chu ka hawn sak zui nghal a. A lo ban ve mai a. A damdawi ei lai chu ka melh ngar a. A kum aiin a lang upa in ka hria. A mah a rua khau vang nge chu ka hre lo.


" Mamawh dang i la nei em? " Bottle lak let pah chuan ka ti leh kher.


" A vawt! Puan sin thuah tur min lo lak! " A tih chuan ka hawi kual a, a thawmhnaw dahna bul a almera a puan in thlep awm teuhna lam chu ka pan a. Pakhat la chhuak in a lo mu tha sauh sauh chu ka va thuah sak a. Zep lo chuan en mai pawh hian a damlo tih a hriat. A mitmeng a chauh hmel viau bawk a. Enge maw pa Zothana te hrilh pawh chu a duh loh viau ni. Rei fe ding chung a ka en reng hnu chuan in hnuai lam a chhuk tum in ka in her a.



" Khaw nge i kal dawn? " In her a kal ka tum chu a rawn ti a, tun tum chu ka banrekah ni lo in ka kutah a rawn vuan e. A muhil tawh emaw tih laiin. Zan in ringawt pawh hian ka kal san hlau ang hrim in min van vuan ngun tawh tak em. In hre tha lutuk a ka tel lo a awm thei lo te pawh a ang a lawm le.



" Ka chhuak tawh dawn! Mamawh i la nei a mi? " Ka ti hap. Ka kut chu a rawn hmet nghet salh a ka melh zawk.



" Ka mutthil hma chu chhuak suh! " A rawn tih chuan a ngaihna hre lo zet in ka en tawp. A chhiah hlawh emaw min ti a nih ka ring rum rum.



" Khawngaihin! " Hnial ka tum lai tak a a rawn tih leh tak avang chuan mit chhing in ka thaw halh a. Lainat na riau ka nei chu duh lo in lu ka thing nak. Ka pa sawi dan chuan a nuin kum pawh a tlin hma in a boral san kha a tia. Ka khawngaih phak chu ni lo mahse ka khawngaih tho mai.



" A tha lawm! Min thlah la, tah hian ka lo ding rih ang! " Ka ti tha ve mai a. Zan in chu ka dawh thei ve khawp mai ka ti ru mawlh mawlh thung.



" Ka vawn loh che chuan i lo kal sawn ang! Khum sirah hian lo thu zawk rawh! " A tih chuan ka ner sak. Mahse mit a chhing zui daih leh nghal. Lungawi lo fahran chuan khum sirah chuan ka thu thla a. Mahni aia naupang kawh kual a ka awm chu ka lawm vak lo bawk nen a khat tawk in ka melh leh rawm thin. Ka kut lah chu vuan satliah pawh a ni lo, a hmer nghet mah mah a ni.



Ka kut pawh sawn ka tum a piang in a harh dawn zel nen, tunah tak chuan naute muhil tih harh hlau a veng ka ang ta ber in ka hria. Sana ka en chu zinglam dar 3 a ri der tawh leh nghal. Engtia rei nge hetia ka thut dawn pawh ka hre tawh nek lo. Ka kawng leh nghawng a na vek in ka hria.


*

*

Thil enge maw ri vangin ka harh zawk a. Ka sir dawhkante a alarm chu ka off nghal hmak. Sana ka en chu dar 6 a lo ri chiah a. Khum sirah ka thu emaw ka tih khan khum lu lam ngheng in ka lo thu awn diai a. Ka kut ka en chu a lo la vuan reng! Hahthlak hian!


Ka kut chu la chhuak zal zal in, a khaw sik a la awm em tih hriat tum in a chalah ka kut ka nghat vang vang a. Nizan a sa huam kha a lo dai dap tawh a, ka thaw ve ham ham. Nizanah ka lo mutthluk lai reng ka hre lo a nia. Room chhuah san in ka roomah ka phei a, ka in thlak a. Ka thawmhnaw pawh ka la dah chhuak lo. Vawiinah ka phone siam tur a ka dah zawhah ka thawmhnaw chu ka sing sa fel mai ang ka ti ta tawp.



Inhnuai a ka chhuk chuan a lo la reh thiap a. Vannei in ti lutuk in chokaah ka tlan lut a. Nizana ka plate tih keh ti fai tur in. Mahse ka tlai chiang a sin. An nula khan a lo ti fai vek tawh. Plate keh pawh kha Dustbin ah a lo awm a. Ka in thlahrung nghal ngawih ngawih.



" Ehee... Zualtei chu i va tho hma ve! I mu tui vak lo nge?" Chokaah ka pi chu rawn lut in a rawn ti a. Ka muttui thu in ka chhang a. Thu dik erawh a tupa vang in nizan chu ka buai viau thung a.


" Hei chu... " Plate keh chu a hmu ve chiah a. An nula chu a melh nghal vat. An nula lah chuan zing a thawh in a lo tla keh nuai a hmu thu a la sawi zui.


" Nizanah.. "


" Nizanah ka ril tam ei tur zawk in ka ti tla keh palh a nih kha pi! " Ka hnung lam a rawn ti ri avang chuan ka hawi dawr mai. Zorinpuia kha a lo ding ve ngur a. Mak ka tih chu damlo hmel emaw pawh a pu lo, a dam that hmel lutuk tlat. A pi chuan a hauh ve deuh ka rin nen engtin mah a ti miah lo. Kan in chu nise Zorinpuia hi Mama zawk nise chuan ka nu a phun char char ang. A ti bua a nih pawn ti fai lo a a kal san vang hrim hrim in a hau ang. Mahse hei chu a tupa duat a nia, a hau phal lo pawh a ni mahna.


Zorinpuia chuan min rawn melh zawk a. Min kal pel in fridge a hawng a tui bottle la chhuak in choka atang chuan a chhuak leh mai a. Ka pi pawh a chhuak zui ve nghal a.



Inchhung a nula awm ve tih takah an nula nen chuan eirawng bawl pah in kan in be luam a. Mahse engvak ka siam ve lo thung.chawhmeh duh zawng leh siam dan bik a awm a tih avang in a mah chuan a ti vek a. Tleirawl te hi a nia, hnam dang a ni nge a chang chuan a mizo tawng a pai leh nak thin chu kan nui leh hak hak thin.



" Oii... Ka pu theitui pek a hun a nih hi! " Ti hliai in fridge a hawng a a siam rak rak chu a buai bawk nen " Khawi ka lo pek sak ve ang che! " Ka ti ta vat. Ei rawng ka bawl pui thei si lo a, hei tal chu ka lo tih pui lo chuan.


" Pa Zothana a mi pek tur! " Ka tih chuan " Pu fapa zawk kha! " A rawn ti daih. Ka kal tawh chu ka ding dat. Khang lang a Pa Zothana a maw tih laiin. Zorinpuia thei tui ka pe vel dawn chu a nia. Ka pek sak ang che ka tih tawh avang chuan phur lo fahran in choka atang ka chhuak a.


Dik tak chuan ka huat vang lam ni lo in, a thu sawi min order thei lutuk hi ka mil vak lo. Kei ai a la naupang zawk bawk nen tlawmah ka la deuh tlat pek a. Room a awmna ni a a sawi chu ka hawng a, hei pawh min thawng leh tur bawk. Gym room a lo ni reng a. A zau tha in a chikim em em bawk a. Bangah chuan darthlalang lian zet an bel a. Hei vang a nih hi a pian pawh a lo that viau a ka ti rilru hial.



Miin man chawi a an kal laiin a ni chuan an inah a nei bik a nia. Fapa duat mai pawh ni lo in an duat uchuak hle tih thei a ni.



" Hei i in tur! " Min lo melh rengtu chu en in ka no ken chu ka lek vah a. Ka sir lam dawhkan a dah turin min mit mei zauh a. Chhuah leh mai ka tum chu " Heiii... " A rawn tih avang chuan ka ding dat.



" Engtin maw min koh kha! " In her in ka ti let ngat a.


" A pawimawh lo. I in sawi zawi ve duh em? Ka sawi awm zia chu i duh chuan i instructor ah ka lo tang ang! " Tih leh rawn din a rual a. Ka ner sak. Ka lam pan a lo kal chu ka melh ngar a. Ni zan vangin lawmthu sawi ka phut deuh a nia. A mit meng atang chuan beisei lo hming tha law law ang.


" Ngai lo mai rawh se! Chuan...heii, tiin min ko tawh suh. Ka nau nen in in rual vel a min U ve mai rawh! " Ka tih chuan a ner sak.


" I nau chu kum 22 i ti a ni lawm ni? Kei chu kuminah 24 ka pum dawn! " A tih chuan ka melh zui rawm.


" Chu chu in tih theihna tlak a nia mi? Nang aiin ka u tho a, min U la a tawk mai. " Ka ti leh ngat. 24 dawn sawm sarih mahse kei aiin a la nau tho.


" Exer chu i la duh lo maw? " Ka in her chu a rawn ti a.



" Ka mamawh lo. Kha tiang tel lo pawn ka chak in ka hrisel tha! " Ka ti hmak thung.


" Tha i neih loh em kha nizan pawn. Nghen mai mai pawh a pai nawk nawk kha tu nge? " A rawn tih chuan ka in her a ka melh nghek. Nui suk suk in a theitui no chu a rawn lek vah a. Thinrim tun in room ka chhuah san zui nghal hmak.


" Laltlanhlua ai pawn a sual thiam zawk a nih kha! " Ka ti hlak a. Chaw ei kan la hman lo bawk nen rem chang ti lutuk in in chu ka fangkual a. Pa Zothana room leh ka pi room leh an nula room kha chu ka hriat avang in luh ka tum bik lo. Room pahnih la awm ka lut chu ropui ka ti tih hian a sawi fiah lo zawk. Pakhat chu lehkha chhiarna room a nih ka ring. Library ang mai a ni. Lehkhabu hlir in a khat a. Ni e, pa Zothana dan hre mi a nia, hei chu a awm reng a ni.



Pakhat chu office a ni tih ka hre mai. Bangah chuan pa Zothana leh a nupui ni ngei tur thlalak lian zet a in tar kulh a. Hmeichhe la naupan hmel tak, hmelfai veng leh fiah kalh mai. An in neih thlalak tih hriat tak in mo kawr nalh zet a hah a. Pa Zothana pawh suit dum nen a in duang zuih a.



Dawhkan a thlalak chuan ka mit a la chat. Chu tah chuan hmeichhe naupang a tel ve tlat miau a. Zorinpuia hi pa Zothana fa neih chhun emaw ka tia. Ngaihtuah buai duh lo in ka chhuak zui nghal a. Inchhung zawlah ka chho chu ka pi pawh a lo awm ve reng a. Pangpar tui a lo pe chu niin.


Min hmuh rual in min lo be siam siam a. An in hian in lian tak a nia mahse kawt zawl a neih vak loh avang hian inchungah pangpar a khawi teuh a ni awm a. A tha phian ka ti thung. Aizawl chu veng lun lai ang chi phei hi chu ram han ruak hi a vang em a, an in pawh hi ti hian kawngpui anah an sa a, gate luh hnuah in a ni nghal mai ang. In hnuai hi garage atan an dah awl a. Garage hnuaiah chhawng nga vel a awm bawk a. Ka pi sawi dan chuan a zau tha bawk a chung pawh chu an la then zel a ni awm a. In luah man ringawtah pawh an la lut hnem viau ang.



In hnuai chhuk pah chuan vawin ka tih tur vel ka sawi thla mawlh mawlh a. Ka zep lo tawng duh ve pangai tak ka ni bawk a, in biak reng takah chuan ka tlang nel hma viau bawk a. Chaw kan ei a, nizan kan chawi ei ai ngawt chuan a nuam ta viau. Ka pi nen kan tawng char char a. Pa Zothanan min zawm zauh zauh a. Zorinpuia erawh a ngawi leh chawt tawh.


Ka hmu fuh ve hrim hrim nge ka va en apiang in min lo melh ve vung vung zel a. Ka en ve leh a hawi sawn ziah bawk a. Tukthuan kan ei zawh in chhuah ka tum avang chuan in siam tur in ka room ah ka chho a. Pa Zothana bazar lam a I kal dawn chuan ka hna kal pah in i kal dawn nia. A ti ve bawk nen ka in siam rang kher mai. In hnuai a ka chhuk leh chu ka rin lo lutuk in Andrew kha a lo thu ve vuah mai.



" Khi a lo chhuk a lawm. Andrew rual in nge ka rual a kal i duh? I duh zawk zawk a ni mai! " Pa Zothanan a tih chuan ka hawi a heu mai.


" Ka rual in kal mai rawh se. Nimin ah Brandon avangin a phone kan ti chhe ta ngawt sia. A lo chhuah hman hlau lutuk in Brandona school thlah zawhah ka rawn tlang nghal a nih hi! " Andrew chuan a rawn ti zung zung a. Pa Zothana pawh a bu nghut mai.


" Zorin.. Engtik nge class in tan dawn? " Zorina inchung lam a pan chu Andrew chuan a lo ti sup a.


" Kar leh ah ! " Chhang tawi tek tawk viau mai. Kan in zui chhuak a. Andrew chu a nelawm viau a. Ka rin dan chuan a kum hi 35 to 40 in kar a nih ka ring ve hmiah a.


" Pa Zothana te hian fanu an nei a mi? " Kan ti ti kar lakah chuan ka zawt a . Min rawn melh zawk in, engtia ka hriat nge min zawt nghal zat. Tukinah an thlalak ka hmuh thu in ka chhang ve mai a.


" Thlalak a a lan tawh ber chuan a nei a ni mai a niang chu! " A rawn tih chuan ka ner nang ringawt. Sawi thui vak a duh lo a nih ka ring a ka zawt tawh bik lo.


" Heii.... Ngati nge hetah? " Ka ti hu. Phone siamnaah kan kal dawn a maw ka tia phone dawrah min hruai daih.


" Ka sawi tawh kha, kan tih chhiat sak che a nia, i duh ber thlang rawh ka present che a ni mai! " A tih chuan ka meng buai nak.


" Aii... A ngai lo in tih luih pawh a ni loh kha. Poisa tlem chawi a siam that theih a thar kher a ngai lo. " Ka ti vat a. A chi loh hrim hrim. A in thlahrun awm zawk lek lek bawk.


" Lungngai suh, vanneih thlak tak in phone dawr ka lo hawng hlauh a. Chuvangin thlang mai la. I thlang lo a nih chuan kei man ka duh ber hi ka pe mai ang che! " A la rawn ti ang deuh deuh a. Rilru buai zetin ka hma a phone ho chu ka melh kual sek mai.



" A tha lawm! " Ti sup in ka kut a ka phone chhia kha a rawn la a. Phone chu min thlan sak ta hmiah a. Ka thlan duh loh vang ni lo in thlan tur ka hre lo. A man tlawm lam en a phal tlat si lo a. Ka phone nen sim vel min thlak kual sak vek a. Vanneih thlak tak in memory card a ka thil pawimawh tam zawk ka dah luh avang in engmah bo a awm lo a, a tih zia tak zet.



Phone dawr atanga kan chhuah chuan a lo chaw hnu ruih tawh. Ni Emily te inah chuan kal kawi nghal ang a ti tlat a. Kei pawn ka hnial bik lo. In lian zet hmaah kan ding a. Motor atang kan chhuak a, building in kawngpui anah chuan damdawi dawr a lo awm a. Chu lam pan chuan kan in zui phei a. Ni Emily chuan dawr chu a lo nghak a. Ka vawi khat hmuhna a ni nang in ka hre ve tlat. Tukin zingah a thlalak ka hmu miau a.



Dawr chu a fanu ko in lo nghak tur in a ti a. Kei ni erawh inchhungah kan in zui lut a. A ni erawh pa Zothana leh Zorinpuia ang lo tak in a tawng barh barh a. Ka pi a chhun a nih ka ring ve hmiah. Kei pawh chu ka in hmel hriat tir a, pa Zothana te inah ka thlen thu te chu kan sawi luam a. Rin ai kan awm rei phian a. Kan haw meuh chuan tlai lam dar 4 a ri der tawh.



Kawtah motor a ti ding a, Nitei te in atanga kan tlan chhuah atang khan kan la in hnial phei char char zui. Nitei leh Andrew hi an in rual vel a. Mahse Andrew hi a hming in ka ko ta bawk sia. Ka lai kual vek. Nitei te inah phei kha chuan a hming pawn ka ko ngam lo. Nitein mak min tih ka hlau tlat.



A tawpah chuan " Nang nen chuan chutiang a in chhung hnai pawh kan ni lo. Bakah thisen zawm ang zawng phei chuan in hlat vang vang tak kan ni bawk a. Thian ang in in en zawk ang! " A tih avang in thu thlukna kan siam thei hram.


Tum loh deuh in Zorinpuia nu nen unau dik tak an ni lo tih thleng in kan sawi chhuah phah kha a nia. " A tlai tawh e mai ka rawn lut tawh lo mai ang. " a tih avang in motor atang chuan ka chhuak a. Chu mi rual chiah chuan kan hmaah Zorinpuia chu a bike nen a rawn ding chawt a.


A thawmhnaw hak vel atang chuan basketball a khel a nih ka ring. Jersey suit var a hak chu a in hmeh em em mai leh nghal, in khel zo tih hriat tak in a thlan huh dap a. A bike nen chuan inhnuai garage ah a tlan lut a. Andrew chuan ban min vai zauh in a tlan let a. Kei pawn Zorina chu nghak lem lo in inah ka luh san a.


Ka pi in min lo chhawn vat a, pa Zothana pawh a haw hma ve a nih ka ring, inah a lo awm ve der tawh a. Thu khaw muang lo in room ah in thlak tur in ka chho a. In chhung ka thlen rual in ka pi in Zorina a be ri ka hre zui zat bawk.

*

*

Vawin atangin school kan lut tan dawn a. Hmanni ah Zorina nen professor a aia ka kal sak tur inah kan va leng a. Pawimawh leh thil chin chang hre tur in. Nau a pai a, a neih a hun hnai tawh vang a ai kal lak duh a lo ni a. Nau a neih hnuah pawh naute a changkan tak tak hma chu ka kal sak reng a ngai dawn a. Tha ka ti viau mai. Zorina te professor a lo ni bawk nen an in ka hriat loh avangin min kal pui tur in ka sawi kha , min hnial lo ve teh khiah a.



Mahse kei chuan mizo subj ka la dawn a. Zorina te class ah erawh ka lut dawn lo hlauh a. Political Science a core miau a. Mahse tha ka ti zawk let ling a. Kan subj lak in ang se in khat a lo awm bawk nen, a buai thlak a ni tawp mai.



Chaw ei laiin ka pi in engtin nge college ka kal dawn min zawt a. Ka hriat bik loh thu leh, taxi a niang ka tih chuan " Taxi chan kawi a buaithlak ang, Bawihpuia nen in kal rual theih chuan kal u la. " Pa Zothanan a lo ti sup a.



" Kei chu thlen hma ka ngai dawn a. Zorina te chu an tan tlai dawn in ka hria! " Ka ti tha ve mai a.



" A nih chuan driver hian a thlah thei tho che a nia! " A rawn ti leh mai a. Chaw kan ei kham chuan in siam tur in ka chho a. Kha leh chen zirtir hna chu ka thawk a mahse khang chu naupang tak tak ho an nia. Tlem chuan a zam awm ve deuh dat mai.



Shower ka nei zo bathroom atanga ka chhuak chuan room chhung chairah Zorinpuia a lo thu ka hmuh rual in ka ding chawt mai. Min en lo in a phone a lo bih ngur a. Towel chauh a ka in tuam a vang chuan bathroom a luh leh mai chu ka rilruk a. Mahse ka tlai hret. A rawn hawi chhuak vut a, ka tang tung mai. Enge ka room ah a rawn tih reng reng ni?



a va han thui leh pek a tir lam hian theih tawp a regu hi ka tum ve a. A chanve ka thlen hian ka hriselna leh mit lam in a tlin loh ziah avangin a muang fan leh deuh a engpawh nise regu theih chuan regu, tlin loh chinah kan in duat leh deuh a nga, inhriat thiamna te kan nei leh deuh turah ngai ang.


Tin, ka story hi a kal pur2 ngai lo tih min chhiar sak thin ho chuan in hriat kha. Mahse a tawp chu kan thleng ve ziah tho a, i hman hmawh lo tlang leh i la.


A tawp nan cover photo a lungawi lo in tam e mai. Hman tur te min kawh hmuh u la, chu mi chu ka duh lutuk ti a han hman ve tur ang hi ka nei lo a hei hi a tha tih in neih chuan cmt a te pawh a dah thei a. Tha kan ti tlang a nih chuan thlak te pawh kan thlak ang chu kei ma thu chuan hman tur ka hre hlol lo , min ngaidam mai teh u

[Abbra Reo Ririni]

CHAPTER - 3 by Amy Cck



" Enge a? " Tawng pawh tawng lo a min melh reng avang chuan ka ti a. Chair a a thut zawk miau a vang chuan ka melh chhuk let ve ta zawk a. Ka tawng a hriat takah chuan mit khap zawk in a hrawk a thian kharh a. A rawn ding chhuak vut chu ka melh chho leh haw lawi si.


" Bathroom ah bathrobe a awm lo a mi? " A rawn ti let sup. A sawi zawi viau a mahse a mah ka en chho ha avangin ka hre tho. Towel nen chiah ka ni tih hre chhuak in ka sam tuamna zawk towel chu rang zet a la thla in ka sin ta ngawt a. Ka sam a dar pel vel a sei chu a hnawk a hnawk in a rawn tla zui. Hahthlak thei a nia.


" Ngati nge hetah i lo awm? " A zawhna chhang lo chuan ka ti let daih. Bathrobe chu a awm a mahse ka mamawh hran lo ka tia ka hah lo kha a nia. Kan inah chuan bathrobe kan hmang ngai hran lo a, hmang tur pawn kan nei lo ti mai ang. Towel a ni deuh tawp a chuvang in a ho ka ti vang in towel chiah ka hmang a.



" I hman tawh leh tawh loh rawn zawh che ka tum! " A ti tha ve mai a. Hepa hi a lai ve ngei a maw ni, min melh tha ngam lo in a hawi kual sek mai. Nge ni a thawm hnaw pangai ka hak lo vang in min en duh lo. Mahse a tha zawk. Kei pawn nuam chu ka ti lo a mahse ka ti lang lo hram zawk a.


" Kan kal rual thei dawn a mi? Dar 10:30 ah assembly tur , in tan chuan a ni chauh in ka hre sia! " Ka ti let ve mai a.


" Ka pa office kal hma a ngai leh thut a! " A tih chuan ka bu nghat. A mah pawn kal hma pawi a tih loh chuan ka hnial bik chuang lo.


" Oo... Lo va chhuak la, ka in thlak a nga kan kal dawn nia! " Ka tih chuan en pawh min en lo in a chhuak zui nghal a. A chhuah rual in ka nui tawp. A chet dan lai kual vel lutuk kha ni ber in ka hria ka nuih chhan.


Ka in thlak zui nghal a. Shirt var pangai leh highways dum ka in bel tawp a. Pheikhawk flat ka in thawlh leh tawp a. Ka hmai pawh langsar ni si lo in ka hnawih ve tho. Ka sam erawh a ro hman loh avang in ka thlah tawp a. Ka bag ka la a ka room kawngka ka hawng chu ka phu nasa lutuk.


" Min ti phu nasa lutuk! Enge hetah i tih? " Ka ti ha. Ka room kawngka bul ban ngheng in a lo ding a, tshirt dum nghawng V ha in, a chungah jeans jacket lukhum nei ang chi kha a ha a. A dar leh lamah chiah a bag chu duh dah zet in a ak a. A kut leh lam in a helmet a khai bawk. A rawn ding tha ve nghal vat a.


" Ka lo nghak che! " A tih chu ka melh haw. Mak ka tih tih pawh ka thup peih lo. In hmuaiah emaw min nghah ka ringah. Ka in siam chhung zawng khan ka room kawngka bulah hian a lo ding char char tihna a nia.



" Kal I la?" Mit min kan uk a a tih chuan sawi sel lo chuan ka kal pel a, ka hnungah min rawn zui ve zel a. Kar 1 vel chiah chiah ka awm ang a nia, ka rin ai chuan a hreawm loh phian a, in chhung hi a reh tih mai loh chu.



Ka pi lah a upa tawh a, thenawm a a thiante inah a len loh leh a thian pitar dang te an lo leng lut a. Pa Zothana office ah a kal daih a. Zorina hi chu ka hre vak lo kan in be tam lo hrim hrim a. Ka hriat ve chu zingah gym room ah exer a la a, chhunah a changin a leng chhuak a. Tlaiah basketball khel tur a a chhuah loh leh inkhel tur in a chhuak ziah thung a. Chaw ei lai hian kan ti ti ve na hun ber a nia. Kei pawh ni leng leng in room ah ka in khung a, flim ka en lo leh story ka chhiar a. Chu chu kan ni leng hun hman dan a nih chu.



Andrew a phone min pek chu ka hmang tangkai fu a. Ka phone kha chu la tha vek mahse ka hmang rei ve tawh a. A hang ve deuh tawh nen vannei ka in ti hle.



" Pi kan kal a nia! " In hnuai kan thlen thlak chuan a ti a. Ka pi pawh chu a rawn hawi vat a.


" Driver chu ka be dawn em? " A rawn ti let daih chu ka hre thiam lo.


" Ka rual in kal mai rawh se! " Zorinpuia chuan a rawn ti a. Ka pi pawh chuan engmah a sawi lem tawh bik lo.



" I pa a thlah hma a ngai I ti a ni lawm ni? " Pawn kan chhuah rual chuan ka ti vat a. A helmet chu min pe in gate ah a chhuak a, in hnuai lam garage a pan zui daih bawk. Rei lo teah a bike chu a rawn khalh chhuak a. Gate hmaah tak chuan a rawn ding chawt a, gate atang chuan ka chhuak zui vat.



" Ka rual a kal leh driver in thlah tir te chu a in ang reng a lawm! " Ti sup in ka helmet ken chu a rawn la a, a khum zui mawlh mawlh chu engmah sawi lo in ka melh nghek ringawt.


" Rawh thu la? " A helmet a khum zawh chuan a rawn ti a. A Helmet full face in hmeh zia lah chu, a lang chhe lo phian leh nghal. A hlei tling ropui sia, thlir vawng vawng tham an ti ang hi a ni mai. Engmah sawi buai lo chuan ka thu a, a tlan chhuak zui nghal vut bawk.



Rei lo teah college kan thleng a. Engmah sawi lem lo chuan office thleng min thlah ve thlap ang lawi a. Ka rin ang chiah in college student hmeichhe ho chuan an ei zui dauh dauh hlawm a. A tawng duh lo lutuk hi kei mi tawng duh pawh hian a bulah chuan sawi tur ka hre lo hial.



" Tlaiah eng tin nge i haw dawn? " A hma a kal zawk ka nih avang chuan ka banrekah min vuan ding in a ti sup a. Ka melh let ha. Chhan ka tum lai tak in hmeichhe pakhat hian a rawn ko ve chiah a. Kan bulah a rawn ding zawm nghal. College student a ni tih a hriat nghal mai bawk a.



" Good morning miss! " Hmeichhia zawk chuan a rawn ti vat a. Ka nui lui sak, engtin nge min hriat ni.


" Morning! " Ka ti let ve mai a. Zorina chu bia in an kal sawn a. A bialnu a nih te pawh ka ring, a banah kuah in nel tak in a be zui siam siam a. Zorinpuia a sang tha bawk a, a hmeichhia zawk chuan a biak pah chuan a melh chho leh ha thin. Kei pawh chu office chhungah ka lut a, professor leh thawk Tu dang chuan min lo lawm thiam ang reng viau a, a hahdam thlak phian.



" Zualte! Principal a lo thleng chiah a, va hmu ve lawk la? " Lecturer pakhat rawn lut chuan a rawn ti a. Bu nghat in ka chhuak zui nghal a. Principal office lam chu ka pan vat a. Kawngka kik in luh ka dil a, min rawn phal sak hnu chuan ka lut nghal vat.



Ohh... Ka sawi hmaih tep, kan Principal hi hmanah kan naupan laiin a nupui nen an chungchang hi a lar vak tawh. Lawmsangzuala, a nupui hming tak chu ka hre chiang tawh lo. Mahse a college a student hmeichhia nen an in ngaihzawn thu leh, an in nei thu te chu ka hre ve ruai hman. Mahse kan naupan lai a nia, a rei ve tawh viau mai.



Eng eng emaw min zawt luam a. Kei pawh chuan tha tak in ka chhang ve zel a. A mah a zahawm in a mi uap a na bawk nen office ka chhuah san chu ka thaw huai thei. Kan office zawkah chuan ka let a. Ai kal la kei mah chiah ka lo ni bik lo, an lo awm ve nual bawk nen in thlahrun pawh a na lo deuh. Nula pakhat Hlimi ai kal ve tho nen chuan kan in kawm thei nghal fu a.


Assembly nei tur in hall lam pan a kan kal chu " Hmangaihzual! " min ti ri ka hriat avang chuan ka ding dat.


" Ti nge? " Hlimi chuan a rawn ti a. Ka hriat sual a nih ring in nui lui sak in lu ka thing ringawt. Ka hming ang nei an nih ka ring leh hnu hnawh a.



" Hei... " Ka dar a rawn vuan a rawn ti leh tu avang chuan kei mah ngei min ko tih ka hre fiah chiah.



" Koh in va hre thei lo ve. Ka hmuh sual emaw ka tia, i lo ni tak tak a! " Rawn ti tu chu ka en haw mai.


" Nang hi hetah enge i tih ve a? " Mak ti lutuk chuan ka ti ha. Lalhruaitluanga MZU ah kan kal ho a. In hmuh lohna a rei tawh nen ka hai lekin leke hial.


" Sir Hruaia te chu kan college ah te chuan a lar a nia aw! " Hlimin a lo ti vat a. Hruaia pawh a nui ve suk suk mai. Kan ti ti zel takah chuan college ah hian a lo thawk ve reng a. Kei ang lo tak in a nghet in a la thawk zui. Assembly Hall kan luh chuan an lo awm teuh tawh a. Lecturer te bulah tlar hma lamah kan thu a. Principal in thu te a sawi a. Function chu kan hmang rei phian mai.



________________________________________________



* ZORINPUIA POV *



Ka pa in pa Ruata fanu a rawn awm dawn a, class in chawl tho a tlaiah lo han lam rawh min tih avang in dar 3 velah in atang ka chhuak a. A hmel tak ngial pawh ka la hmuh loh avang in a phone chuan ka call leh thin a. Mahse switch off a in ti tlat bawk nen Farkawn sumo counter piahah chuan ka nghak ta reng a. Kawng a chep bawk nen traffic in ka bike hung sawn tur in min rawn ti a, khawng chung lam parkingah to an chho in ka han park leh phawt a.



Counter ah bawk chuan let leh in ka nghak risk ve tawp a. Ka pa in kan in a hre lo a tih avang in min call lo chuan a kal ka ring bawk si lo. A tawpah chuan ka beidawng in Counter nghak tu chu ka zawt chiang a. Vawinah Farkawn sumo 2 rawn thleng tur a awm a. Pakhat chu nichin lawk khan a rawn thlen tawh thu leh pakhat chu dar a la rawn thlen loh thu a sawi a. A hmu hnung zawkah a nih ring chuan ka nghal leh a.



Ruah hmi chu a tla seng seng a. A tlai tulh tulh a mihring an tam tulh tulh leh nghal. School naupang leh kawng min kal pel ho lah chuan min en dauh dauh hlawm a. Ka ding rei tawh bawk a, ka dinna bul vel a dawr nghak ho thleng in. A khat tawk in ka phone ka hmet eng sek bawk.


5 : 30 velah sumo pakhat chu a rawn thleng a, mahse nula emaw tha lai lam an chuang miah bawk si lo nen. Tih ngaihna avang kher mai. Ka pa phone ka tum a signal ka nei lo tih ka hre chiah bawk. Ka kal hlat deuh rual in ka phone a rawn ri a, ka pi a nih avang chuan ka la vat a. Ka mi chan ber chu kan inah a awm daih tawh tih a rawn sawi chuan ka lawm lo kher mai. Sumo thleng hmasaah khan a rawn thleng tihna a nia.



Phone ka dah chiah tiin ruah chu a rawn baw zui hawk a. Phun hluk in parking lamah ka tlan chho zui nghal a. Kawng chungah daih ka bike ka hun avang in ka thlen chhoh meuh chuan ka huh hman vek. Ruah han hun pawh nghak lo in a sur a sur in ka in khalh haw a. Ruah lah chu a tak sauh emaw tih tur a ni. In ka thlen meuh chuan khaw dur nen a thin ruih tawh a. Thli a tel deuh bawk nen, kei lah tshirt chiah ka hak avang in, bike ah ka tlan chak bawk nen a vawt ka ti viau tawh.



Doorbell ka hmeh hnu pawh chuan rawn hawn mai tum hmel an awm lo chu thinrim hlur in ka hmet zui char char a. A tawpah chuan an rawn hawng ta hram. Ka rin loh daih in kan nula ni lo in midang in a rawn hawng bawk a. Hmeichhe te lam, ngo ving veng mit meng lian lam mah hi a ni a.



A mah nghak a rei tak ka din laiin in chhung lum a a lo awm der der chu ka thinrim a zual viau bawk. Mahse in thu nun hram in ka pen lut vut a. Kawngka pawt khar pah a a phun hlak chuan ka thin a ti rim zual sawt a. Ka pi lo kal lo phei se chuan kan in ti buai hial in ka ring.


Ka roomah chho in ka in thlak a. Thli thaw nen ruah nen ka ngam vek avang chuan shower ka nei hmasa a. Vawt ka ti tam em avang chuan ka in thuam lum nghal vat a. Zanriah kan kil lai chuan ka pa leh ka pi chuan an be ve reng a. Room a ka chhoh leh hnu chuan ka taksa a na ta thum nen ka mu zui nghal hmak a.


Zanlaiah mang chhia vang in ka thangharh hlawl a, he mumang hi chu ka hne tawh viau. Mang ngun viau mah i la ngaiah ka nei thei der lo leh nghal. Ka nu dam lai hmel tak ngial pawh hmu si lo hian mang lamah lem ka hmu fo thung a. Mahse ka khawih theih lo, ka be thei ngai bawk lo. A mit mengah erawh natna, khawharha na ka hmu sak ve thung thin a, chu thil chuan mahni in thiam lohna min neih tir a.


A chhan chu chu mit meng chu ka pa mit atang a ka hmu ve thin vang in. Ka nu leh pa thenhrang tu ka ni miau a. Ka chhungte chuan nang mah vang a ni lo ti mahse kei mah vang ngei a ni tih hi ka chiang viau thung. Ka nu khan min pai lo se chuan tunah hian ka pa bulah kei ni lo in a mah zawk a awm ngei ang. Ka pa hmelah hlim hmel a lang bawk a nga. Mahse enhkim chu kei mah vang in a chhe vek.



In ngaihtuah harh tum in inhnuaiah ka chhuk a, ka taksa leh hrawk sa huam huam mahse ka taksa erawh chuan vawt a ti miau si a. Tui ka in tur chu ka luak chhuak nghul avang in bathroom ah ka lut a, ka chhuak leh lam ka thil hmuh avang chuan ka ding chawt.



Fridge kawngka a hneichhe lo ding chuan min ti phu ve zawk hial a. Kan inah midang an awm ve tih ka theihnghilh thut chu a in ti zet in lu ka thing ngut a. A kal sawn mai ka rin avang in ka nghak deuh tawp a. Tul lo zet in a in her zawng in min la hmu zui.


Midang a tih harh hlau zet in ka chelh nghal chawt a. Ka pa emaw ka pi an rawn harh chuan la dam tha lo tih an hmu nghal ang. Tlangval uai tawh mah i la na hlek ka neih chuan an mang ang thei lutuk tlat miau a.


Ka hma a hmeichhia min ngaihtuah ve hmel tak a min en tu chu ka melh ngur a. Ka zep lo, an lan dan hi ka nu nen in anna riau an nei. A zawng zawng chuan ni lo in, an hmai tlang leh mit meng hi, ka nu hmel hmaichhanah hmu lo mah i la a hlim thla chu ka hre chiang ve tlat.


Tul map lo in a taksaah hahdamna ka hmu bawk a, ka vawi khat hriatna leh hmuhna mah ni ka hahdam tlat miau. Chu thil chuan a mah hriat chian chakna min pe a, ka khum bula a muthlu chu a thut dan siam rem in khum lu lam ka nghen tir a. A lan dan chu ka thlir zui ta reng ringawt a nih chu. A kut nem leh kut zung tang sin sang karah ka kut rawlh lut in ka nui suk. Ka kut lakah chuan a lang te em bawk a.


A mah ka hriat chian chak na chuan zawi muangin min hneh tial tial a, mahse kan in be khat hle thung a. Chaw ei lai hi kan in hmuh rei ber a ni hial ang.


*
*

Ka hma zawn a hmeichhe ding chu biak mai na chang pawh hre lo in ka melh reng a. Hetiang a hmuh hi ka beisei loh vang pawh a ni mah na. A taksa chu towel senno a tuam in a lu pawh chu a tuam a. Thawmhnaw ha lo hmuh hi ka in rung miah lo kha a ni. Min rawn biak hmasak takah chuan ka ding hluai a . Thawmhnaw ha lo tu zawk ang maiin ka in thiam lo deuh riau zawk leh nghal.



A ni lah chuan engah mah a ngai lo nge pangai tak in min be chhun zawm mawlh mawlh a. Min biak chhung chuan a lam pawh ka hawi tha ngam mang lo zawk. Pawn lamah nghak tur a min tih chuan ka chhuak rang kher mai. Kawngka ka pawh khar rual in thawk ka la zui hawk a. Ka pian a hnu lamah tun bak a ka zam leh tih tur mai hre lo a ka awm hmasak ber a ni ka ti ngam sak.



A room pawnah chuan ka nghak zui ta reng a. Hmun dang a ka lo kal chuan driver a in thlah tir ang tih ka hlau ru tlat. Enge ka ngaihtuah pawh ka hre teh hrep lo. Kan in a a rawn awm ni hmasa ber atang khan a mah vang in ka ngaihtuahna a buai vek ni ber in ka hria. Chhungkhat kan ni ti mah i la ka hriat chakna a bo chuang si lo.


A room atang a rawn chhuak in a hnungah chuan ka zui ve mai a. Nu lian ni si lo in a pian chu a fel at a, a kut ka en chu ka nui suk mai. A chhan chu ka thil tih at thlak zet min ti hre chhuak miau a.


*

*

" Bawiha vawinah kan miss thar nen in rawn in phur tih rawn thleng tlai hle mah i la ka hria tho a nia! " Assembly hall tlar hnung ber a kil a ka thu chu ka thian kawm ve ber Zoremsanga chuan a rawn ti a, ka nui suk ringawt.


Zoremsanga hi kan Principal Lawmsangzuala fapa niin, ka pa leh Pa Lsa hi thian tha tak an ni bawk a. Veng khatah awm lo mah i la kan school kal na lo in ang chho zel nen kan in kawm chho zel a. Kan mizia pawh a in ang in, fa naupang ber a ni bawk a, mi fel tak ti a sawi tur ni lo mahse thian te tan a in pe zo tak a ni thung.



" Sawi tha ve mai la, khawi lam atanga rawn chhuak nawlh nge a nih? " A rawn tih chuan ka hrilh ve mai a. A hriat hnu erawh in a ner leh nasa hle thung. Ka nula phurh chung chang khel tu pawh an tam leh nak nak viau a. A chhan chu kan college ah hi chuan kei leh Zorema hi kan lar ve a. College mai ni lo kan school lo kal ve tawhna hrim hrim ah chuan. A tha zawng leh chhe zawng pawh a niang chu.



College luh tirh phei chuan SU te khan kan ni ve hma a. Mahse term 1 kan nia kan duh tawk viau. Kan thian dun in kan bansan rual leh a. A hnuah pawh min sawm nasa viau a, vote zawn nan min duh mi ber in a lang zawk. Hmeichhe tam tak kei mahni vang a kan pawl vote kha an tam bawk em a. Mahse kan taimakna zawng a ni ta tlat lo a. Student pangai anga kan awm pawh hian mi hriat kan hlawlh mah mah emaw tih mai tur a nia.



" In haw nghal dawn a mi? " Assembly a zo chu Zonuni chuan a rawn ti vat a. Ka bu nghut.


" Zorem? " Zorema en chuan a ti leh sap a. Zoremsanga chuan za lo fahran a nii in a lu a bu ve nghut. A ruk a a hmeichhe duh ruk a nia, Zonuni hmaah hi chuan a zam ve tkat zel.


" EU ah lo tel ve tawh ru. Chhuah kum a nih tawh hi. " Zonuni chuan a ti niah niah a. A pa hi Pastor pension tawh a ni a. Zoremsanga te in kawt lawkah awm an ni ve bawk nen mi hi a thian chei ve viau. Kei pawh hmeichhia ah chuan ka nel pawl tak a ni.


" Ti lo zawk mai ang! " Then suk a ka tih chuan a ner zui nang mai.



" Zorem... " A tih lai chuan.


" Zorina nen kal na tur kan nei a! " Zorema chuan a rawn ti zui zat.


" Zoremsang daw suh! " Zonuni chuan a rawn ti zui hlak. Hnung lam atang mipa pakhat hian a rawn ko a, a phei tur thu in a au let vat a. Rawn ko tu kan hmuh rual in Zorema chu a phun zui hluk.


" Saw pa pawh saw a tel dawn a maw? " Kan thiana chuan a ti hluk.


" Dawn chiang e, nang ang lo tak in ka sawm vawi khat naah a pawm bawk. " Zonuni chuan a sawi zawh rual in lei a chhuah khum zeuh a. A kal zui nghal nal nal.


" Hrep a! " Ti hluk in Zorema chuan a um zui a, a va kuah zui nghal dawr dawr a. Zonuni lah chuan a vin zui nghal tan tan. A chhan chu Zonuni rawn ko tu kha EU a a tel chhan kan hre chiang dun lutuk tlat miau a.



Ka bike khalh chhuak in kawngpuiah chuan ka ding run a. Lecturer te office lam chu ka melh leh zauh thin a. A la haw chu ka ring chiah lo a, ka rual a haw tur in ka nghak a ni pakhat a.



" Zorin ka lo zawk che a, adventure club kan in hmuh dawn kha ! " Ka bulah Tebawihi chu a rawn ding a, a rawn ti zui vat. Ka hman loh thu sawi ka tum uk a, kawngpui a rawn kal te avang chuan ka ngawi leh ta zawk.


" Afternoon miss! " Tebawihi chuan a ti vat a. Miss Hlimi hi kan class ah a rawn lut thin a, a naupang ho hi chu min hre viau. A bulah sir Hruaia leh a ni kha an awm ve bawk a. Kan in hriat tirh a ta tun thleng hian ka la ko lo, ka la mawl biak char char pawh a tih theih ang. Kei aiin a upa a mahse ka 'U ' hreh tlat miau a. Ka pi, ka pa leh a mah ngei pawn ' i U ang a ni mai ' an ti vek a mahse ka U thei tlat lo.



" Afternoon in haw dawn a mi? " Miss Hlimi chuan a rawn ti let vat a.


" Aa... Adventure ho kan in hmu khawm dawn a, member thar ziah luh te an ngai dawn a. " Tebawihi bawk chuan a ti ve a. Kei erawh in ka hma a hmeichhia chu ka en ngur a, ' I haw dawn em? Ka lo nghak che ' han tih chu ka duh chiah bik si lo a.



" Miss, I la haw dawn loh chuan kan kal san mai ang che aw! " Sir Hruaia chuan a ti a. A bul a hmeichhia chu melh in " Kal ang le! " A ti sup a, an in zui phei chu in seh ruh ru nghek in ka en reng ringawt. Engvang a lawm lo nge ka nih ringawt lah chu ka hre der lo.



" Kal ang! " Tebawihin a rawn tih leh chuan phur fahran lo in ka zui a, college ka kal tirh atang in adventure ah hi chuan ka in ziak lut ve a mahse ka active lutuk lo thung. Phur chang chang in Zorema nen kan tel ve a, chu zawng chu a ni mai.



" Zingah miss Zualtei nen khan in rawn in phur an tia, in in hria a mi? " Step a chhuk pah chuan a rawn ti a. Ka kekawr ip zen mah i la ka banah a kut rawlh in min ku ah deuh ti tih tho. Mahse ka hnial bil chuang lo.



" Umm.. " Ti zawng a ka chhang chu min melh chho ha. Tebawihi hi hmeichhe nu hnap mai, leh zak zum kan tih ang chi hi a nia. College miss ni pha ve ngat a ni a, in ngaizawng chu ni lo mah i la kan in zui ngun ve viau. Ni lo... A mah hian min hmuh chuan min zui zel zawk kan ti thei ang chu.



Zorema tum loh deuh a EU lamah a in khawm tak siah chuan memberah ka lo ziah luh kep tawp a. Adventure office a ka thut ve reng vang nge corridor ah student thar ho chu tei kual sek in kawngka an rawn melh leh zauh thin hlawm a. Kan leader pawh in min fiam zuk zuk bawk a. Kum lamah a upa pawl ka ni bawk nen leader nihna chuh ve tur pawn min ti thin a, mahse ka phur na lam a ni lem lo a, a hming a member nih hi ka duh tawk viau.



" Haw hma in thil ei i la, ka ril a tak, engmah pawh ka la ei lo. " Tebawihin a rawn tih avang chuan canteen ah kan lut zui nghal a.



" Ti nge thil ngaihtuah nei i ang! Nichin a tang tawh khan ka awm ve tih pawh i hre lo a ang thin! " Chair a thu thla pah chuan a ti hap a. Engmah a nih loh thu ka hrilh a mahse ka rilruah erawh nichin a gate bul a ka mi hmuh te ngawt kha an awm tlat. Sir Hruaia nen khan an in pawh nghal em em kha a mak ka ti zawk.


Kan thil ei lai a canteen a lo lut ve te avang chuan ka ner sawk. Ramdinpuia te thian za ho chu an rawn ri lut huk a. College kan luh tirh atang in kan la in mil thei lo ti i la ka sawi sual lo ang. 1st leh 2nd sem kan nih lai phei chuan class khatah kan thit thin bawk nen kan in ti buai ve rawp rawp thin a. 3rd semester atang erawh in class hran kan ni ta a, ka in mil vak lo mah i la un biak khat a in hmuh khat chuan kan buai khat deuh. Tun phei chuan kei ni political Sc kan nia, an ni History an ni bawk a, kan building a hrang bawk nen kan in hmu fuh khat turah ka dah hmiah a. Mahse hei kan first day ah kan han in hmu leh hram a.


" Thlalak nalh zet ka nei hi in en ve duh em? " Kan dawgkan piah chiah a thu thla chung chuan a rawn ti leh kher a. Ka in seh ruh nghal tawlh tawlh. An thian ho chuan phone chu en kual in an nui leh huk thin a. Chhungkaw awm thei tak an ni bawk a thian pawh a ngah viau. Lehkha lam tui mi a ni vak loh avang in a ni pawh hi a naupang tawh bik lo. Chuvang in hlau tu pawh a ngah, kei pawh ka naupan bik loh avang in kan in mil lo viau bawk a.



" Tebawih, i en ve duh em? Hetiang em em hian i chhelo tih ka hre miah lo a. " Kan lam hawi a rawn then sawng a a tih chuan dawhkan ka beng ri nghal thuai. Tebawihi erawh a mittui a tling leh pam tawh.


" Ka mood a duh vak lo a nia ngawi la thil kha ei ringawt rawh! " Ka ti chang hrawk.


" Ohh.... A ni lo zawk a thinrim a ni maw. " Ramdinpuia chuan a rawn ti leh kher chu ka ding vut a, an lam ka pan tur chu Tebawihin min lo dang nghal vat.


" Kal zawk ang! " A rawn ti tham chel a. A hmelah a zak tih lah chiang reng. A bag chu a la sawk sawk a. Ka ban a vuan in min kai nghal dawr dawr a.


" He thlalak hi naupang lut thar ho hian hmuhnawm an ti ve ngawt ang! " Ramdinpuian a rawn tih leh rual in Tebawihi min vawnna chu thing thla hnawk in ka pan nghal vut a. A chair thutna chawp chuan ka tlawh thlu nghal thuai a. An rawn pawr zui ve nghal a. Canteen chhungah chuan kan in sual zui nghal a ni mai. A ni lam 5 an nia kei ka mal tan thung. Chawl ve an tam tawh lo bawk nen an rak chul hlawm a. Khawi lam atangin nge Zorema a rawn lan ka gmu hman lo, a rawn tlawh tlu ve leh nghal thuai hlawm a.



" Lo in beih rawn, fair lo deuh ve! " A ti zui hluk chu ka then suk. Ti chuan 2 kan ni ve ta bawk a, duh thal chuan che thei lo mah i la min khawi na thei bik hauh lo. Ramdinpuia chu tlawh thlu in ka hnek zui chawrh chawrh a. Ka hnung lam atang a min rawn khawi tu chu Zoreman a rawn tlawh thlu ve nghal thuai bawk.



" A tawk! Duh tawk ru! " EU leader lo leh adventure lam a mi ho kan thawm hria in an rawn lut nak nak a. Mipa an awm takah chuan min pawt then thei ta hram. A hma kha chu canteen nghak tu te hmeichhia an ni vek bawk nen, a chawl awm ve ho lah junior ho vek an nia min thelh ngam lo ni ber in a lang.



" Enge an ni nen in in hmuh apiang hian insual tur emaw in tih ziah a. Zoremsanga pawh i va thelh dawn a maw tia! " Zonunin Zorema hmai damdawi hnawih sak in a ti zui tan tan a. Tebawihi erawh in ngawi reng in min buaipui thung. Zorema lo kal hma khan kan lo in khawi ve nual nen ka khem ve nual mai.



" A nuam ve a lawm. " Ti zawng in Zoremsangan a chhang chu Zonunin a la run khawp mai.



" Pa Ls an a hriat chuan i hau na leh viau ang che! " A ti zui hlak. College atang kan in khal haw a. Zoremsanga leh Zonuni pawh an in khalh haw a. Tebawihi pawh an hostel thleng ka thlah a.



" Ka tihpalh kei mah vangin in in sual a! " A rawn ti sap chu ka thaw hawk.


" Nangmah vang a nih loh kha. Min tih thinrim kha a tum hrim hrim a, chuvang a nih kha. Chuan lungngai suh enga thlalak mah a kawl lo tih ka hria a nia. " Ka ti let sup.


" Maw! A nih chuan ti nge kut i thawh hmasak kher a. An thil tum i hriat reng te chuan! ' a rawn ti vak.



" Chan a awm a! Lut tawh rawh! Kei pawh ka kal a nge! " Ka ti leh mai a. Ramdinpuia te lo luh hma khan ka thinrim tawh miau a. Ka thinrim bengdaih nan ka ti ringawt a nih kha. Ramdinpuian thlalak a sawi kha chu, 1st sem kan nih kum in college miss thlannaah Tebawihi a che sual palh a. A gown hak a fuh loh avang in a che sual palh a. Chutah chuan thlalak mawi vak lo a awm phah a. Ramdinpuia hi 2nd sem thleng lut a, a bat zui zel vanga kan rual a 1st sem rawn nawn leh a ni bawk a. Tebawihi a lo vo deuh a, chuta tanga in hmelma chho kan ni a. Chuvanga tun thleng a Tebawihi pawh ka bulah tal tam phah a ni ta bawk.



Kan in lam pan in ka in khal haw a. Kan gate bul a motor lo ding avang chuan ka nei zui sawk. Garage ah tlan lut in bike ka hung fel a. Ka helmet phelh in inchungah ka chho a, doorbell ka hmet zui zat. Rei lo teah kawngka chu a rawn in hawng a. Kan nula ni lo in a ni bawk khan a rawn hawng leh tawh. Min hmu chu a melh buai nak.



" Hei... Ngati nge i hmai kha? " A rawn ti ha a. Chhang lo in ka lut zui vut a. Ka room lam pan a ka kal tur chu common room ah sir Hruaia lo thu pawh ka hmu chiang ngang mai. Min hnung chhawn zawng a a thut avangin min hmu ve lo thung. Ka room lam pan in ka pen chho zui nghal pawk pawk a. Ka thaw rawn sak tawlh tawlh chu enge a chhan ka hre lo. Ka room ka luh rual in na zet in kawngka ka khar ri bur a, ka helmet chu khumah ka theh thla hnawk a, balbawm chu ka chhir zui nghek bawk.



Ka kawchhungah hian thinrimna mei pui a rawn alh hluah hluah a, mahse eng ber nge a chhan ka hre lo thung! Ka room chhungah chuan ka vei kual thuak thuak a, kawngka rawn in hawng ri ka hriat chuan ka in her vut a. A ni nen khan kan in melh nghal chiah a. Ka sir lam bal bawm tlawh thluk let rum a hmuh chuan a ner zui sak.



" Nang mah vang a ni! " A ti chhuak sup. A hmel ka hmuh hian ka thinrim chhan ka hre ta chiah! A mah vang hian kei hi tiang hian ka awm tih ka chiang ta viau bawk!

[Abbra Reo Ririni]

CHAPTER - 4 by Amy Cck



* HMANGAIHZUALI POV *



" Ngati nge a? I tha em? " Ka hma Zorinpuia ding ngawi ngul chu ka en a. A hmai chu a khem ve deuh a, chuan a thawmhnaw pawh zing a a hal chhuah ai daih in a bal bawk. Min chhang bawk si lo nen chuan ka ham haih leh zual. Kawngka bulah chuan lak lawh deuh in ka ding ran a, kawngka pawh chu khar lem lo in ka la hawng reng bawk.



" Zorin! " Ka tih leh rual in thaw chhuak hawk in a hmai chu a tuai nghal puat a. Balbawm lah a let bal bawk nen thinrimna eng emaw tak a nei a nih ka ring ve tawp. Oh... Chuan tu te nen emaw an in ti buai a nih ka ring bawk a pem vel vang sawn.



A tawng bik lo nen chuan hrilh hai zet a in her in chhuah leh mai ka tum chu tha chak lutuk hian min pawt let dawr mai. Ka in ring lo lutuk chu ka rak that a. Engtik laiin nge a rawn phei hman pawh ka hre lo. Kan in din hlat ve viau sia. Ohh... Ni leh lo. A tan chuan a bawp sei zet hian pen khat pen se, a ban a rawn phar chhuah chuan min ban pha nghal mai ang.



" Enge maw I hriat le? " Ka ti hlak. Ka banrekah chuan nghet lutuk in min vuan a. A mit meng rum lam mah chuan min melh a. Ka lakah lawm lohna a nei zawk emaw tih hial tur a ni. Mahse a rawn haw chauh bawk sia.



" Min thlah teh! Ngati nge i hmai te kha? In in sual a mi a? " Ka ban thing nak chuan ka ti a. Min thlah phah eih lo. Min thlah tum bawk si lo chu ka thaw chhuak hak.



" Khawi teh! Sawi tur i neih loh chuan tih tur ka nei a nia! " Ti nawn leh in ka kut leh lam chuan ka banrek a vawnna chu ka phelh luih sak a. A thin a ka thin kha chuan ka dar zawk hi a na vek. A chak bawk nen, min thla ve ta ruai ruai a. Chhuah tum a kawngka ka vuan chiah chu rawn che leh thut in a rawn nem khar dawp a. Nasa lutuk a phu chiam in ka in her vat. Kawngka bulah kan ding a, ka in her chu kan in hnaih chilh mah mah leh nghal. A chet dan chuan ka lungphu a ti tha lo tak ngial dawn.



" La chhuak rih suh! " A rawn ti sup a. Ka melh chho haw.



" Engvang in? Tunah rih chuan nangmah a awm i mamawh in ka ring! " Ka ti ta tawp. In her in kawngka hawn ka tum chu ka thei thak lo. Oh... Zorinpuia hian a lo nem bet tlat a lawm!



" I kut la sawn teh! " Ka ti leh rual chuan rawn che hrut in kawngka chu a rawn ngheng zui hmuk a. Ka melh chho rawm chu min lo melh chhuk ve ngur a. A mit ko , a biang ki lai leh a kamsir chu a pem tih chiang tak in ka hmu bawk.



" In hnuaiah nghaktu i neih vang in maw? " A rawn ti hmuk chu melh nghek in ka ner zui nang. Hruaia kha a hmu tihna a nia nga. Hmu lo ang hmak in inchung lamah a pen zui hlawk hlawk sia. A lo hmu a nih chuan an professor a nih ang in biak ve tur a nia. Hruai phei chu an class ah a lut bawk nen.



" A ni mahna! Kal sawn teh! " Tih leh a mah chu nam sawn tum in ka kut chuan a sir zawng in a banah chuan ka nem nghek a, a che dat ringawt a nih chu. Ka lo chak loh zia hi ka hre fiah kuar kuar bawk.



" Zorinpui... " Ka tih leh rual chuan, " A nih chuan ti nge hetah i rawn kal? " A rawn ti thawt a. A aw rawl vin leh ri hrawk vang chuan ka phu zui chiam a. Ka lam hawi a a rawn in her chu ka melh phawk hra.



" Enge i hriat a, i vin vak a? " Ka ti ta ngawt. A mit meng rum leh thim khum vang chuan ka hlau ve lek lek hial. Min hnaih tawh sa nen min rawn hnaih zual zel avang chuan kawngka chu ka ngheng dawt a. He room a ka chho ta kher kher chu ka in chhir nghal chem chem.


Ka pi a leng chhuak a, pa Zothana a awm lo bawk nen hmai khem nuai in a rawn haw a, ka ngaihtha lo in ngaihven tum in ka kal ve mai kha a nia. Bakah Hruaia chu Zorina rawn luh hnu khan a haw ve nghal a. Chuvang a inchung a chho pawh hi ka nia. Mahse ka ti fuh vak lo a nih hmel.



" A tha e! " Tih leh rem lo zet a in her ka rual chu ka darah min kuai her lawp in kawngka chu a rawn beng dawt a, rak leh that in mit ka chhing sawk. Hepa thin chhiat dan em em hi, ka lo theihnghilh hman a ni.


" Enge maw I hriat le? A tha e, he ta ka rawn kal chuan chu ka ngaihtuah deuh che a, hetiang hian... "


" Engvang in nge min ngaihtuah a? Chutiang tur chuan nang leh kei hi kan in hnaih viau em ni? " A rawn tih chuan chhan mai ngaihna ka hre lo lek lek.



" A... A chhan chu ka nau i nia, hmai khem nuai a I rawn haw te chuan ka ngaihven ve bawk ang che chu! " Ka ti ve hap. Ka sawi dik lo hran lo bawk. In a awm chhun ka nia ka ngaihven hi thil mak a ni vak pawn ka hre lo. Zorinpuia rawn nui chhuak hawk chuan min ti hrilh hai let ling zawk.



" Nau maw? Tu in nge I nau kan ni ti a? " Ti leh kal sawn a rual a. A kal sawn takah chuan thawk ka la nghal ham ham. Ka lo in seh ruh nasat zia ka hre ve chiah bawk.



" Kei hian nang hi U ang in ka en ve lo che a nia. Chuvang chuan nang pawn nau ang in min en emaw min chei bawl duh suh! " Min hnung chhawn a pen hla chuan a ti hmuk a. Ka ner sak.



" I chhuak duh a ni lawm ni?" A rawn tih leh rual chuan in seh ruh nggek in ka melh zui nghek a. Mahse min hnung chhawn avangin min hmu ve tawh lo. Hauh hrep chu ka chak et et a mahse kan in a nih loh na avang bawk in in sum ka chuh leh ta zawk a.



" A tha lawm! Ka lo hre reng ang! " Ti hmak in kawngka ka hawng a, ka chhuak zui hmak. Ka room ah pheiin kawngka ka khar ve chawrh a. Mahse kei mah zawk chu ka phu leh chiam thung leh nghal.



" Khang lang chuan. Ka nau ni tur in ka duh bik hi a in ring a maw ni! Thinchhe si, aia upa zahna chang pawh hre lo! " Ka ti zui hlak a. Ka thinrim thar leh hnu hnaw chu kei mah chuan ka ang chhun zawm nghal char char.



Ka thlen atang in pangai tak pawn min la be lo a. Kei mah zawk in that chhuah in ka be lui hram zel a. Dik tak chuan tun thleng hian vawi khat te mah min la ko reng reng lo leh nghal. Chu ti chung a tha te te a ka la be thei hi ka fel zawk ngawt a lawm.



Vawiin hun ka hman nawm nawm nen ka mood a ti chhe vek. College ah pawh hmel hriat tha ka neih vat avang in ka hahdam ve em em a. Hruaian min thlah haw a, a leng zui ta reng a. Kan hun kal tawh eng eng emaw sawiin hlim em em in kan lo ti ti a. Zorinpuia a rawn lang a, a rawn ti chhe vek leh nghal. Ka phone rawn ri avang chuan ka in ngaihtuah ngut ngut chu ka harh chhuak zawk a. Screen ka en chu ka rin loh deuh in Andrew a ni ve teh tlat.



" Vawiin i hna tan ni chu enge a an a? " Call ka lak rual chuan a rawn ti a, ka ner sak.


" A pangai a ni mai! Class pawh kan la la hran lo a. Assembly zawhah kan haw nghal daih a lawm! " Ka ti let ve mai a. Dawt pawh ka sawi chuang lo Assembly zawh khan canteen ah thil kan ei a, kan haw nghal miau a.



" Kar tawp a min chhuah pui tur in rawn sawm che ka tum a. " A rawn tih chuan chhan let ngaihna ka hre lo.



" Chhuan lam siam a min hnawl na tur i zawng a ni maw? " A rawn tih leh chuan mawl lutuk in ka nui heu mai.


" Ni nang, eng ti tur in maw chhuah chu min sawm a? " Ka ti let nghal thuai a.


" Tun a sawi chi a ni lo! Saturday ah ka rawn sawm ang che, tih tur dang lo nei lo la! " A rawn ti zawm daih leh nghal. Ka zawh ngial pawh in a sawi duh thak lo a nih chu. Thu ho lam mai mai sawi in rei fe kan in bia a. A sual thiam ve thei sia vawin college lam zel din in min fiam zui nghek a. Mahse a ni sual dan hi chu a ngeiawm ve lo thung a. Nuih a ti za mah mah zawk zel thung a.


Kan in biak zawh meuh chuan ka zang hawk thei. Ka thinrimna te pawh kha an reh duak nghe nghe a. Thaw chhuak hak in room ka chhuah san a. Zorinpuia room ka kal pelh pawh chuan a la reh duk mai. In hnuaiah ka chhuk a. Chokaah ka lut tlang a. In lian zet pawh ni mahse tih tur hi a vang ve thlawt.


Ka room leh choka hi ka kar tawn chhen a. In chhung lah hi han ti fai tur vak a awm lo. Naupang ti bal tu leh ti hnawk tu awm lo na na na chu kan nula hian a nileng hna a ni bawk a, hneh sawh tak hi a ni. Rawng bawl thleng in ka tih ve a phal lo zawk a, leh lam zawngah chuan ka awl lutuk hi a hreawm zawk. In thla hrunna tur a awm bawk si lo . In pawh lo luah i la hetiang bak hi chuan ka awm lo tawp ang tih tur vel ka ni.


" Bawihpuia chu a va rawn chhuk har ve! " Zanriah kan kil dawn chuan ka pi in a ti a. Ka Zothana pawh a office atang in a rawn chhuak phei tawh a. Ka han ko ang ka ti duh bik thak lo. Dik tak chuan a hmel pawh ka hmu peih lo zawk.



Rei vak lo hnuah chokaah a rawn lut ve hram a. Ka pi in a tupa duat hmel a hmu chu a phul nghal hlut.



" Ngati nge Bawihpui i hmai kha? " A lo ti chul a. Pa Zothana erawh in vawi khat a melh a, eng mah a sawi zui ve lem lo thung.



" Vawinah in in sual a ni maw? " Zorina chair a a thut thlak hnu chuan pa Zothana chuan a ti sup. A awah chuan a lawm nge lawm lo tih hriat ka tum ka hlawh chham thak.


" Umm... " Tih zawng in zu han chhang a. Pa Zothanan a hauh hrep ka ring deuh a. A bak engmah a sawi zawm miah lo chu kei mah chauhan hian mak ka ti a maw ka ti hial zawk. Hetiang a nih vang hi Zorinpuia pawh hi a sual em em ka rilru chuan ka ti mawlh mawlh a. Pa Zothanan min rawn biak chuan ka hawi a hu leh nghal. Pa Zothana chuan vawin lam chan chin te min zawt ve nual a. Kan Principal kha a thianpa a nih thu te a sawi a. Thian ni awm reng pawh an niin ka hria.


Zanriah kan kil zawh chuan thleng seng chu ka tih pui ve vek a. Ka pi leh pa Zothana erawh sitting room ah chanchin thar en in an thu a. Hei chu an zan tin tih dan a ni ve a. Kei erawh thleng seng vel ka tih fel pui zawh in lehkhabu chhiarna room ah lut in naktuk class ka lak na tur a in chhiar zau ka duh avang in ka chhiar tur ka zawng kual a. A hma ang a naupang mai mai an nih dawn loh avang in ka tang ve viau bawk a.


Inchungah ka lehkhabu lak ho chu pawm chho in step tawp ka thleng chu ka tawp chawt. Chu pawh Zorinpuia ka hmuh avang in. A room pawnah ding in thlang lam a tlak dal chu ngheng in , a bengah headphone vuah in a phone a hmet mual mual bawk. Kal tlang ka hreh tkuk zet in ka kal chu a ngai tho leh nghal. Mahse a awm lai a ka phei peih loh avang in, inchung sitting room ka ti ve mai, chu tah chuan ka thu ta daih a. A room a a luh hunah emaw a kal sawn hunah ka room ah chuan ka lut mai ang ka ti ngawt.


*

*

" Zualte Bawihpuia rual in a mi i kal leh dawn? " Ruk thuan kan ei lai chuan ka pi in a rawn ti a, Zorinpuia ka va melh a. Min lo en ve chiah leh nghal.



" Ka hre lo le! " Tih zawng in ka chhang a.


" Ka kal hma dawn lo! " Zorinpuian a rawn tih chuan ka melh nghal rawm. A rual in ka kal peih bik reng reng lo. A thinrim chhan pawh ka hre lo a, ka chungah a lawm lo daih hi ka lawm bik reng reng lo. Nimin khan ngaihven tur khan lo kal lo ma lek tur ka nia.



" Ka rual in i kal mai dawn mi? " Pa Zothanan a rawn ti chuan " Aii... Mahni pawn ka kal thei a lawm. Ka kal hmasak na ber pawh a ni tawh lo a. " Ka ti ve vat a. Lu a but nghut nghut mai.



Tuk thuan kan ei zawh in ka in siam a. Ka chhuak zui nghal bawk. Taxi pawh awl sam tak in ka hmu ve mai a. Zorinpuia ve kha, a rual a kal duh turah min ngai reng reng a maw ni. U angin min en duh loh te chuan a pawi chai lo, kei pawn mi hrang hlak ang in ka en ve thei tho. Pa Zothana leh ka pi an fel em a, chuvang a nel luih hram tum ka nia, pawi pawh ka ti bik chai lo ve.



College la thleng a, rei lo teah class pawh kan tan a. 3rd sem atanga class ka la zo ka chhuak chu office ah thu an lo sawi lai lai a. Mahse enge chu ka hre ve lem lo. Hlim in thil ei tur in chhuah min rawn sawm a. Professor thenkhat chuan canteen a mi an chah mai a, mahse kei ni erawh ei tur a chhuah kan duh ta zawk a.



" Enge office a an sawi kha? " Thil ei tur a ka thut hnu chuan ka ti ve leh ta nge nge.


" A.,.. Niminah kan haw hnu in in ti buai an lo awm a. Principal hnenah an report a! " A rawn tih chuan Zorinpuia ka hre chhuak zawk.



" In ti buai te chu... " Ka tih lai chuan.


" Pol Sc department a mi Zorinpuia leh Zoremsanga, chuan History department a mi Ramdinpuia te thian ho maw le. Nimin kan haw rem deuh hnu khan canteen ah hian buaina an lo siam a ni awm a. Canteen enkawl tu ten principal hnenah report an thlen a. Bungrua pawh an ti chhe nual an tih kha. " A rawn ti leh zung zung chu sawi mai tur la hre lo.



" Zorinpuia te inah i in nghat a ni lawm ni? I hre miah lo a maw? " A rawn ti zawm leh zat chu lu la thing ringawt.


" Kan in be tam lo a! " Ti zawng in ka chhang a.


" Nia, a awm ve tho mai. An suspend rih an tiin ka hria. Zoremsanga phei chu principal fapa a la ni zui a. An ngeng ve hlawm sia, an hahthlak a nia! " A rawn ti leh mai a. A sawi dan atang chuan an vawi khat buaina a nih hmel loh em em mai leh nghal.



Chawhnu class kan la leh nak nak a. Ban a hun chuan Hruaia chuan ka rual in haw ru a tih avang in Hlimi nen chuan a motorah kan chung ve a. Chawhnu lam atang chauh a class a rawn kal avang in a ni pawh chuan thil thleng chu a hre har viau a. Mahse Zorinpuia leh Zoremsanga chu a class an nih avang in chin chang chu a hre zui vat thung.



Hlimi te veng kan thleng hmasa zawk a, Hlimi chhuk hmu chuan ka ti ti leh malh malh a. Rei lo teah kan in kan thleng a. Rawn lut kawi lo in an tlan tlang nghal a. In chhung ka lut chu a lo reh thiap mai. Kan nula hnenah ka pi awmna ka zawt a, a roomah a mut thu in min chhang a. Inchungah in thlak tur in ka chho a. Zorinpuia a awm ka ring deuh a nia mahse a reh thap. Chaw hma atang college ah a awm tawh si lo a. Thla khat chhung an suspend tih pawh la hria. Tun tum chu pa Zothana pawn a hau tawh ngeiin la ring hmiah.

[Abbra Reo Ririni]

CHAPTER - 5 by Amy Cck


* ZORINPUIA POV *


College ka thlen in ka kal tlai bawk a class an la mek a nih ka ring a reh thuap a. 1st period pawh ka nei reng a mahse ka kal lo ta chu a nia. Kan room lam ka pan zui nghal a. Professor in 2nd period class a lo la mawlh mawlh chu luh ka dil ve nghal a. Min luh tir rual in tlar hnung ber ka pan nghal a. Core bik chiah kan ni ta bawk a zir lai chu kan tam hran lutuk tawh lo. Ka thutna piah ka hawi phei chu Zoreman min lo nuih suk a kei pawn ka nuih let suk.



Zonuni erawh bang kilah a thu tum bar a. A suh loh chung ka thian a sawn tlar hnungah a pawt lut leh tih ka hre thiam nghal bawk. Class kan lak mawlh mawlh lai chuan kawngka an rawn kik a mipa khat hian professor in lecture a pek mawlh mawlh lai chuan lehkha them hi a rawn pe a, a chhuak leh nghal a. Professor chuan aw rawn thian khurh khurh in kei leh Zorema hming rawn lam in Principal office a kal nghal tur in min ti a, kan in zui chhuak ve nghal a. A chhan lah chu kan chiang dun viau leh nghal.



" I pa chu a lawm lo khawp ang! " Ka tih chuan a then ve suk mai. " Thian te tan chuan kan tuar mai a niang chu! " A tih chuan ka ner suk a mahse a thlamuan thlak viau thung.


Principal office ah kan lut a, Zorema pa chuan min melh dun ngur a. Kei ni pawh kan ding ngawi ve reng a. Rei lo te ah Ramdinpuia te thian ho kha an rawn lut ve a, kan in melh no lo hlawm a sin. Kan class H. O. D ten theuh an awm ve bawk a. In haw viau e ti lo chuan tu mah in hek hmasa emaw thiam thu sawi kan tum bik lo. Ramdina te pawh in la pa ve tawk tak an ni a mila tawng thei nih an duh bik lo a nia nge.



Principal leh class H. O. D ten sawi ho an tih avangin pawnah kan chhuak leh a , kan luh leh hnu chuan kan vaiin kar 2 chhung min suspend thu leh nimin a kan chair leh dawhkan tih hmel hem te, chuan plate leh thleng kek avangin pawisa kan chawi dawn bawk tih lehkha nen thlap min pe a, kan chhuak zui nghal zat.



A la hma em avang in in lamah haw lo in Zorema te inah kan awm a. Zoremsangan a pa in suspend na lehkha min hawn tir kha a nu a pe a, kan pahnih chuan min hau nghal char char a, min hauh chhung zawng in sofaah thu in kan ngawi hmak a. Nu Ruati pawn tih ngaihna min hre bik lo chu min hau zo a dawr a kal tum in a chhuak zui nghal a.


" Ka buaina a zo ta. Ka pa chu hrilh pawh a ngai hran tawh lo tih i hriat kha! " Zoreman thaw veng zet a a rawn tih chuan ka ner sawk. Ka thianpa hi ka thian mah nise ka thik thin khawp mai. Sual viau mahse zil a ngaihven tur in nu a la nei a. Chu mai ni lo in U mipa pakhat leh hmeichhe 2 phir a nei bawk a. Kei erawh haw pawh ni i la in reh ruih ah ka haw dawn tih la hria a, min hau tu awm dawn lo tih hre mah i la ka phur lo na ti zual tu bawk an ni thung.



Game kan khel a, eng eng emaw kan tih hnu in tlai dar 4 pelh velah ka in khalh haw a. Ka pi in varanda pangpar tui a lo pe a. Kum 80 a hnaih ve tawh a, ka pu in a boral san atang phei kha chuan a nun ram hi a chau ve viau tih ka hria. Ti buai duh lem lo in room ah ka chho a. Ka in thlak a ka in tih fai hnu in room ka chhuah san leh a, ' A ni ' nen khan kan in tawk chiah leh nghal. Eng emaw sawi tum ni awm tak in min melh vang vang a. Lu thing nak in min kal pel zui nghal daih chu a hnungah ka zui thla ve nghal a.



" Zan riah kil zawhah ka office ah lo kal ang che! " Ka pa chuan chaw kan ei laiin a rawn ti a ka bu nghut. Zan in kan chaw ei chu tu vak mah an tawng lo. Kan ei mawp mawp ni ber in ka hria. Tawng ve duah lo mah i la an tawng lo ngaihthlak kha a nuam dang dai ve ka ti rilru mai mai a.



Chaw kan ei kham chuan ka pa office ah ka lut a. Tukverh bulah min hnung chhawn zawng hian a lo ding a. Kum 55 pa ni ve tawh a. Dik tak chuan ka nu a thih khan ka pa hi mipa upa tak a la ni hran lo. A man duh chu nise hmeichhe tha tak pawh a la tawng thei reng a. Ka tet lai pawn a hmeichhia zawk in rawn hel chang an nei thin a mahse a mah hian engah mah a ngai duh ngai lo. Kan chhungte pawh khan an ti ve zauh thin, nupui dang nei leh tur in.


Kei mah vang tal pawh in nei tur in an nawr a. Ka pi, ka pu, ka ni te ho thleng in mahse a chhanna in hria em?



" Nupui chu ka nei reng tawh a lawm. Midang ka mamawh lo. Ka nupui in min kal san hma vang ngawt in midang nei i la a bul a ka kal ve hunah engtin nge ka in sawi fiah ang? A mah hmuh hun ka nghakhlel em em a, in sawifiah ngai leh a mah ka hlat phahna tur eng thil mah tih ka duh lo! " Tiin a chhang hmiah a. Kha mi chin kha chu tu man an ti lui emaw nuipui nei leh tur in an hrilh ngai tawh lo.


" Pa " Ka tih rual chuan


" In Principal in min rawn bia a? " Rawn in her in a ti hmuk. Ka mitah tak chuan min rawn melh a. A hmelah chuan a lawm vak lo tih ka hre thei.



" Class in tan chiah a suspend i ni leh bawk a. I cho chhuah nge Zorema zawk? " A rawn ti hmuk chu ka ner sak.


" Zorema chuan in rawlhna a nei lo! " Ka tih chuan a thaw chhuak hawk.


" Ka neih chhun i ni a, i lakah hian ka in nghat tak zet ti i hria ti raw? " A rawn ti dam dup chu ka bu nghut. Ka pa hian vawi khat mah tawngkam vin in min be ngai lo. Mahse hetiang thil a sawi tawh hi chuan ka in thiam lo tlat thin.



" A tha e! I thil tih chu eng pawh nise thil thleng tawh a ni a, sawi leh ngai in ka hre lo bawk. Rui lo hai lo a kut in thlak in ni bawk a i thiam vek chu ti lo mah i la i tanna lam a sin ngei ka ring. Mahse tun a chin ah kut i thawh hma in thil thleng tur ngai tuah hmasa thin ang che.



I dik a nih pawn college campus chhung a kut in thawh avang hrim hrim khan in dik lo. Chu tah suspend i tawh phah a. Thil hlawk lo tak a ni tih i hriat chuan a tha e. A leh pekah thlen nawn tir tawh suh ang che! " A rawn ti dup dup a, ka chhang lem lo mahse ka mit mengah a thu ka zawm ngei dawn tih a hria nge a nui ta suk a.



" Ka fapa mai ni lo in ka neih chhun, ka dam chhan tak meuh i ni a. Tha tak a enkawl loh che hi ka hlau a nia. Chuan engvang in maw kut hial in thawh a, hmeichhia vang em ni? " A rawn tih chuan ka nui ve suk.



" A tha e, i kal thei ang. Chuan kum khat chiah i nei tawh a, theih tawp chhuah la tha tak a pass ngei tur in ka duh che a nia! " A rawn ti leh mai a. Ka lu ka bu nghut. Class 12 ka pass khan ka ni in medical lamah kal rawh se. Doctor ni se a in hmeh dawn tlat. Min ti a mahse ka pa in ka fapa a ni a ka hnung zui tur a ni a ti thung a. Kei pawn ka pa hi khawvel a ka ngaih san leh zan ber a ni a, a mah ang nih hi ka thil tum ber a nih avang in ka pa duh ang in ka zir zawm a. BA ka chhuah hian Law College lamah zawm ka tum bawk!



" Pa! " Ka in her tawh chu thil hre chhuak thut in ka pa lam chu ka hawi leh a. Min lo en ve chiah bawk.



" Engtin nge ka nu hi i hmangaih ber a ni tih i hriat theih? " Ka tih chuan a chal a rawn ti chuar tup a. Ka zawhna chu mak a ti pawh a ni mahna.



" Ka hre lo! " A rawn tih chuan mak ka ti. Nui suk in bang a thlalak lian zet chu a melh vung vung a.



" Ka hmuh hmasak ber chuan ka hmangaih tih ka hre bik lo. Tanpui duhna leh a mah puih duhna chiah kha ka nei a. Mahse zawi zawi in ka ngaihtuahna chu a in thlak, engtik in nge eng hunah nge ka hre lo. A hlim hmel ka hmuh in ka lo hlim ve tawp a. A lung ngaih leh a mit atang a mittui a chhuah in a mah aiin ka lo na thin.



Mahse ka tel lo a a hlim erawh chuan ka na leh tho bawk a. Hmangaihna kha khawi atang nge a rawn chhuah ka hre lo. I hmangaih tak i la tawng ve a nga, i hrethiam ve mai ang. Ka sawi fiah thiam dan chuan chhung lam atangin a ni ngei hi a ni tiin min rawn hrilh lo mahse, a bul a ka awm chuan midang ka mamawh lo. A bulah chuan ka famkim vek a. A ni hlat ai chuan thil dang zawng zawng kal san ka duh zawk a. Midang mamawh miah lo ang maiin min in ngaih tir a. Ka ta ni lo tur chuan ka phal lo bawk a.



Ka fapa hian chutiang mi chu i tawn ve ngei ka beisei. " A ti leh sup a. Ka pa nih dan ang lo tak in fel fai tak a chhanna min pek theih loh awm chhun ni ber in ka hria. Mahse a sawi erawh ka fiah viau thung a.


*
*
Ni a liam ve zel a. Kei pawh college tan tak tak hma hauh in suspend ka tawk leh ta si a. Zorema pawh college a kal theih tak loh avang in ni leng leng in dawr lamah a nu in a chhawr a ni awm a. Kei erawh ka dan ngaiin inah ka awm leh tawp a. Tlai lamah basketball khel tur in ka chhuak a. Zorema pawh a rawn tel ve zauh zel. Eng eng emaw team a tel tur in min sawi ve nual a, ka pian in a lo zir bakah ka ti thei phian bawk a. Hriat ka hlawh ve viau nghe nghe.



Tlai khat ka in khel ka haw chu in hnuai lehkha chhiatna room ah lut ka hmuh avang chuan ka zui ve hmiah a. Kha mi ni ka room a kan in hauh atang khan min be leh tawh miah lo a. Zingah taxi in college lamah a kal a. Tlaiah sir Hruaia hian a rawn thlah ve ziah a. Dik tak chuan ka rilru put hmang hi kei pawh hian ka duh loh em avang in ka peh hel ve zel a. Unau dik tak ni lo mah i la cousin ang chu kan ni ve miau a. Chuan kei aiin a upa leh nghal. Mahse hmeichhe dang ang lo tak in a mahah hian min pawt bet tlat tu eng emaw a awm tih ka hria a. Chu feeling erawh chu tih lan ka tum bik lo.



Sofa ah chuan ke hlang kang vek in a lo thu awn diai a. Single sofa ah chuan ka thu thla ve thurh a. Min rawn melh zawk a, a lehkhabu chhiar lai chu a bih leh hmak. Minute 15 vel ngawi reng in kan thut hnu chuan " Heii... " Ka ti hmasa ta nge nge. Sawi tur lah chu ka van viau leh nghal. A rawn hawi duh thak loh vang chuan ka ball khen chu ka va theh phei a. A rawn chek hlak a ka nui ta suk.



A ball ken chuan min rawn vawm let nghek a. Ka lo man chat chu a meng ling nghal hlar a. Ka chungah a la lawm lo tih a hriat mai. Chuan kei pawh hian ka feeling hi ka tih reh nan chuan pangai tak a biak a, U ang te pawh a ka en a ngaiin ka hre thar ta bawk a.



" Eng i hriat a? I ninawm lutuk! " Ka ball ka va theh phei leh rual in a rawn ti hlak a. Ball chu hmun dangah a vawm nghal hmak. Thinchhe ve tak chu a ni!



" Ka biak che kha! " Ka tih chuan a ner sak.


" Heii ... Ka nia mi? Hming ka nei ve a, min biak duh chuan ka hming in min ko rawh! " Ti hlak in a ding zui daih a , kal a tum chu a banrekah ka man chat a a rawn hawi nghal vat. Han koh mai a, u mai ka tum chu ka sak talh leh nghal. Sawi chhuah awl sam viau si ka hrawk ah ri chhuah hreh lutuk chu hreawm ka ti zawk hial.



" Hmanni a ka tih dan che avang khan sorry! " Ka ti ta ringawt chu min melh let ngar a. Ka ding chhuak vut chu min melh chho zui ha.



" A tha e, chuan enge a dang? " A rawn ti leh hmak a. Ka kut leh lam chuan ka tukhum chu ka thai nghal thuak.



" Tha tak in tun atang chuan in hma chhawn tawh ang. " Ka ti leh mai a. Ka tawngkam tam lo lutuk ka in huat ber tum a ni hial ang.



" A tha lawm! I sawi zawh chuan min thlah tawh la. " A rawn tih chuan ka vuan bet tih ka hre ve chiah. Ka thlah hnu chuan lehkhabu 2 keng in a chhuak zui nghal daih a nih chu.



" Kha zawng kha maw? " Kei mah chuan ka phun chhuak hluk a. Ban ka phar nghal hluai ringawt.



_______________________________________________


* HMANGAIHZUALI POV *



" Enge a hriat a? " Step a chho in ka ti chhuak hap. Hmanni a pa Zothanan a office a a koh khan a lo hau ve ngei a nih ka ring. Room ka luh rual in ka phone a ri a, ka en chu Tetei a lo nia. Kan in be zui char char a. Kan in biak zawh chuan in hnuaiah ka chhuk a, pa Zothana office bang nen kan in tawk a. Thingpui lum sak tur in dining room ka lut ve nghal zat.


*
*

" Lo kal rawh ka thlah ang che! " Taxi stand lam pan a ka kal chu ka bulah Zorina chu a bike nen a rawn ding dawt a. Ka melh haw mai.


" Enga ti? " Ka ti hu chu a rawn khi suk.



" Kan in rem tawh a ni lawm ni! Taxi chan kual aiin ka va thlah zawk ang che! " A rawn ti leh mai a. Mak ka la ti tho nan a hnungah chuan ka thu ta nge nge a. Tawng miah lo in college kan thleng a. Kar 2 chhung suspend a nih avang in class erawh a ka kal thei lo thung.



Student ho in Zorina an hmu chu an en duh viau a. Thil thleng kha an hre ve fur bawk nen ka khawngaih let ling zawk.


" Tlaiah ka i ban hunah min rawn hrilh la ka rawn lam leh dawn che nia! " A tih chuan hrilhhai zet in ka nui ringawt. Mahse tlai lam chu Hruaia nen kan haw kawng a in an avang in lam ka ngaih pawh ka ring lo. A tlan let chu ka thlir liam a, office lam ka pan ve nghal a.



" I va thleng hma ve! " Hlimin a raw tih chuan ka lo nuih var var a. In rual pui na na na chu kan in kawm ngeih ta phian a. Hruaia pawh a rawn lut a. Hlimi sawi ang tak in Hruaia hi Professor ho zingah a naupang ber a. Tlangval a lo la ni zel nen student hmeichhe hoah pawh a tla na viau a. A mah hi a zaidam in a fel ve bawk nen a awm viau bawk.


" Naktuk enge i tih dawn? " Office chhungah hian sofa swi zet an hung chu ta thu lehkhabu ka lehkhabu ka lo en lawk lai chuan a rawn ti sup a. Ka melh chho ha.



"Engmah ti dawn lo e! " Ka ti ve nghal vat. Nui suk in a rawn thu thla ve nghal a.


" Ka rual in khawiah emaw i lo kal duh a ngem? " A tih chu ka ngawi vang vang a mahse thil ka hre chhuak thut.


" Aa... Naktuk chu ka hman leh dawn lo. Tih tur dang ka nei tih ka hre chhuak. " Nuih tlan ver ver in ka ti ta ngawt. Andrew nen kan chhuak dawn tih ka theihnghilh hman hmawh a.



" Ka tlai deuh a ni maw ? " A tih chuan ka nui tawp. Andrew pawh chuan enge min tih pui a tum pawh ka hre chuang lo mahse ka lo 'aw ' ve tawh sia.



Class kan la leh mawlh mawlh a. Rin ai tak chuan a harsa hran lo a. Nuam ka ti hle zawk in ka hria. Ni te hi a ral zung zung hial in ka hria. Tlaiah kan haw tur chu Hruaia motor la chhuak kan nghah laiin kan hmaah Zorina a bike nen a rawn ding leh hlawl a. A helmet a la thla a. Ka melh haw mai.



" Lo kal la! " A tih chuan min lo hruai leh tur in a rawn kal tih ka hre chiah. Ka phone bawk si lo a, a rawn kal ka ring lo a nia. Hlimi bulah Zorina rual in ka haw mai ang ka ti ta ngawt a.


" Ka rawn call lo che a, i rawn kal ka ring lo a. " Tlan pah chuan ka ti lang lang a.


" Ka no I neih ka ring lo a! " A rawn ti tha ve mai a. Nia... Ka nei lo tak tak bawk a. Mahse sawi ang in haw lam hi chu Hruaia rual pawn a rem viau a, a rawn kal thlawn loh nan ka hnial lo mai zawk a.



" Naktuk chu hna i rawn bang hma dawn nge Brandon a piancham lawm kha an ti sia! " Zanriah kan ei laiin ka pi in pa Zothana en chuan a rawn tia. Pa Zothanan hna khawi zawh lawk tur a nei a tlai lamah a kal tur thu in a chhang a. Ka ngaihtuah a, Andrew khan a fapa birthday vang hian mi i hman em min tih ka ti rilru hial.



Ka room a ka chhoh hnu in Andrew ka call a, a fapa pian cham a kal tur in min lo ti tak tak a. Ka hre ve bawk si lo nen thil pek tur pawh ka lei lo ka tih chuan a rawn nui hawk a. A rawn kal hma tur thu in min chhang a, ka pi rual a kal ka tih chuan a duh thak lo. I lo kal hma a ngai a ti miau leh nghal.


*

Sawi ang tak tak in tuk thuan ei zawkah Andrew chu a rawn thleng a. Ka pi bulah ka kal hma tur thu min sawi sak thlap a. Ka in siam a kan chhuak zui nghal a.



" Ti nge ka kal hma a ngaih bik? " Ka tih chuan a nupui hlui a rawn kal ve dawn a, tih thik na ang a min hman a tum chuan ka duh lo ngang mai. Kal ka duh lo ka ti ngat ngat a. A thian kawm hmeichhe dang ho chu a hriat ve vek avang in min sawm lui char char leh nghal.


A tawpah chuan ka khawngaih ve deuh bawk nen ka rem ti hram. Chu pawh a nupui hluiin a mipa kawp rawn hruai ve a tum tih a sawi vang chauh in! Tlai lamah ka pi leh Zorina pawh an lo kal dawn a ti bawk a. Rem ti zan lo in ka rem ti ta ngawt a nih ber chu!

[Abbra Reo Ririni]

CHAPTER - 6 by Amy Cck



Present tur kan lei kawi leh te te a. Dik tak chuan nuam ka ti lo, a fapa nen pawh kan in nel lem lo a. A mah hi a fel em avang hian ka ngai na a ni ringawt zawk a. An in kan thlen chuan Brandon chuan a pa chu a lo pan vat a. Andrew-a pa leh a pi te ho nen an cheng ho tih pawh ka hre ve vat a. An chhungkua leh pa Zothana te chhungkua chu an in ang phian mai tih ka ngaihtuah daih thung.



" Lo awm lawk ru aw, ei tur lam an ti fel tha em tih ka va ngaihven a nge! " Andrew chuan tiin a kal sawn zui nghal a. Brandon erawh naupang tawng duh vak a ni lo bawk nen phone chu a en melh melh a. Biak dan vak pawh ka thiam lo. An mi sawm te ho pawh an rawn thleng ve nak nak a. Brandona thian te ho pawh chu an rawn ri lut ve nak mai.



Han awm rei takah chuan kei pawh chu min nel ve leh mai a. Kawt zawlah naupang dang nen in fiam tur in chhuah an rawt a. Andrew a la rawn chhuak mai si lo a, ka zui chhuak ve ta tawp a. Bakah puitling lo kal ho hi hriat pawh ka nei hlawm lo a, naupang bul a awm chu nuam ka ti daih zawk.



" Duata! " Rawn ti riah chuan Brandon a infiam lai chu tawp in a hawi chhuak vat a, kei pawh Brandon a ka lo mit mei reng avangin a hawina lam chu ka en ve vat a, hmeichhe pakhat chuan nui sangin Brandon chu a pan vat a. A pawm rual in a nei nghal sang bawk.



" I va melh nasa vung vung ve! " Ti ri avang chuan ka sir lam chu ka en a Andrew pawh a lo ding ve reng tawh.



" Saw saw maw a nu chu! " Tih leh kawt zawl lam hawi ka rual a mahse ka thil hmuh avang chuan ka thin a phu nghal dawt dawt mai. Brandona leh hmeichhe pakhat bulah mipa ka va hmuh chu hun rei tak hnuah pawh ka la hre chiang lutuk tlat miau a.


" A nih saw! A va thawng awm che ve a. Mit khap lek loh a I en! " A rawn tih leh takah chuan harh chhuak zawk in ka nui lui sak. Kan lam pan a lo kal te chu kan lo en reng a. Khawvel hi chu a va zim tak em tih mawlh ka ngaihtuah thung.



" In va rawn thleng hma ve! " Andrew chuan kan hma a an rawn din rual chuan a ti zang vah a. A nupui hlui pawh a ang lo, an in biak danah chuan la in nei reng an nih duh hmel zawk ka lo ti mai mai. An rual a mipa lo kal ve pawh chuan min hmu ve chiah a ni ngei ang , mak ti hmel a pu ve deuh a. Min en reng tih pawh chu ka hria, ka taksa hi a tang tung thei hial bawk.



" Zualte hei hi Brandona nu Zikpuii a nih hi, chuan hei hi Zualtei. " Andrew chuan a rawn ti a nui sangin Brandona nu chuan a fapa a pawm lohna lam chuan min rawn chibai a ka lo ban ve mai bawk.


" Hmuh in nuam hle mai, hei hi ka thianpa Muanpuia a nih hi! Andrew chuan a hre tawh tho a, ka in hmel hriat tir ve hrim hrim ang cheu! " Tih leh a bul a mipa chu nui sang a melh a rual a, thianpa ti mahse a melhna mit meng atang chuan thian aia thuk an ni tih a hriat theih.



" Ka hmu che chu ka lawm hle mai! " Muanpuia chuan rawn tiin a kut a rawn phar chhuak a, chibai ka hreh tluk zet in chibai loh chu a in thlahrun awm bawk si nen chuan ka kut chu ka pe ve hram a. Mahse rang zet in ka la let leh nghal vat tho.



" Lo va lut u la! " Andrew an a tih chuan an in zui lut a. Kei ni erawh kan la ding thung. Tun a ka mi hmuh vang khan ka awm chu a nuam tawh thak lo bawk. A chhan chu Muanpuia kha kei hian ka vawi khat hmuhna a ni tlat lo a. Kei hian ka hre chiang mah mah emaw tih tur zawk a ni. Rammuanpuia ! College kan kal lai atang leh University kan kal thleng a ka mipa zui ve thin kha a ni miau a. Chuan tun thleng a mipa dang ka la hnaih leh loh chhan pawh kha mipa vang nghei kha a ni bawk.



" Leh vung vung a che! " Ka chal a rawn pen pah in Andrew chuan a rawn ti a, ka la phu zawk zui.



" Ka hre thiam lo cheu! Kan in then tawh i tia mahse in in huat hmel bawk si lo a! Min lo thawng ve deuh a nih pawn a mak miah lo a nia aw! " Ka ti chuan a rawn nui hawk. Kei erawh ka ner nang.



" Kan in thenna a rei tawh a lawm. Brandona pian atanga kum khat pawh tling lohah kan in then a. In then avanga in huat a, in hmuh tawh loh tur tihna a ni kher chuang lo a! " A tih leh rual chuan mak ti lutuk in ka melh haw.


" Ni chuang lo a mahse in awm dan kha chu thian te pawh in ang a lawm. Kei chu ka thei ve lo sa! " Ka ti zui zat chu min melh in a ner ve suk mai.



" Zikpuii nen khan in hmangaih vanga in nei kan ni lem lo a. In in rual vel in ka ring a, kan kum pawh a in thlau viau tihna a nih chu. Ka thiante party naah kan in tawng a, chuan engkim mai kha a lo thleng duak a ni ber mai. Ka fa a pai a. Chu tiang a nih takah chuan kan in nei chuk chuk a. Mahse a tu zawk mah kan in hmangaih loh miau avangin Brandona pian hnu rei vak loah kan in tha then a ni deuh tawp mai. " A rawn ti deuh duah a.


An chanchin chu ka hre chiang chak a mahse zawh chian vakna hmun leh hun a nih loh vang in ka zawt duh ta lo thung.



" Eng a pawh chu nise ka bul a I lo awm ve kha ka lawm viau a nia. Nupui hlui te mah nise an kawp pui te nen a hmuh reng a kawp pui neih ve loh chu a nuam miah lo a nia. Vawin erawh ka kiangah i awm a ka lawm tak zet! " Nui suk a a rawn tih leh chuan ka nuih let ve nghal vat a. Mahse kei erawh heta ka lo kal hi ka in chhir ru viau thung. A chhan erawh sawi lan ve ka tum hran lo.



" An lo thleng ve ta hram e! " Ti leh hma lam en a rual a Zorina leh ka pi pawh an lo thleng ve chiah a. Ka pi rawn hruai tel ve a ngaih vang a ni mahna motor a rawn khalh ve ngei a. Pa Zothana erawh a la tlai deuh dawn a nih hmel.


Zikpuii nu leh pa thleng in, kan kim viau leh nghal a. Andrew te chhung leh Zikpuii te chhung hi an rilru a zau ve thaw khat tih a hriat. Mahse kei chu hetiang hi ka ril rem zawng a ni tlat lo thung. An fate in then tawh mahse an tupa vang a in hmu khawm an nih vang pawh a ni mahse in ngeih lo leh mit hmai tha lo an in hmuh miah lo a.



Kei erawh chair pakhat a thu a min melh leh vung vung tu avang sawn ka awm a nuam thei meuh lo. Ka pi sir leh lamah Zorina a thu a, leh lamah kei ka thu a. Pa Zothana pawh a rawn thleng tawh a. Andrew-a pa pu Zualan hun serh a hmang a. Brandona pian cham mai bakah Andrew pi hi a kum 80 na a lo ni tel bawk nen chuvang a ti pui deuh hlek an lo ni bawk a. Hun serh chu zo vat vat se ka tih zia chu pui tak a ni. Ka hawi chhuah lah in Muanpuia ka hma zawnah tak a thu ve ngur bawk nen in be miah lo mah i la a nuam miah lo.



Eng emaw neuh neuh kan tih zawh chuan a tlai chhiat hma in chaw ei an ti a. Catering an tih avangin a awl sam phian a. Naupang nawi ve tak tak leh tar lam an tam avangin zan tlai lutuk a haw kha a rem chiah lo a, chuvang a in ei fel fai a in kawm khawm kha an ti ta zawk a.


Sawi ang tak tak in kan in tih fel fai meuh chuan khua a lo thim fel der a. Present hawn hun kan zawh in boruak thinghlim dawn tum in in chhung zawl lam ka pan a. In chhung chu a ri deuh nuai bawk nen thawk a pik deuh tlat.



" Hetah ka hmuh che hi ka in ring miah lo! " Inchung kawt zawl a ka thu chu sir lam atanga rawn ti sup tu avang chuan ka hawi nghal dawr mai. Ka lam pan a lo kal ka hmuh rual in ka taksa a tang nghal tung leh nghal.



" In hmuh loh chhung a rei tawh hle mai. Kan in hmuh leh dan erawh ka beisei loh lam daih a ni! " Ka thutna sir a rawn dingin Muanpuia chuan a rawn ti leh sup a. Ka kut a ka phone ka ken chu ka hum nghet vak ringawt.



" Kei pawh hmuh che hi ka beisei bik lo! " Ka ti let ve hmak a, a nui suk ri ka hre zui bawk. A lam pawh ka hawi lem lo, hma lam chu ka melh ngar a. Tu vak mah an awm tawh bawk lo nen, nichin kha chuan tleirawl thenkhat kha an awm ve a mahse cake ei tur an tih avang in in hnuaiah an chhuk thla vek a nih ka ring.



" Pu Andrew nen khan eng in zawmna nge in neih? " A rawn tih chuan tur zet in ka melh chho ram a, min en lo in hma lam chu a lo melh ve thung a. Ka thutna atang chuan ding in kal ka tum chu ka bankerah a rawn vuan bet chawt a. Ka pawt zui vak a, mahse a sawt lem lo.


" Enge maw I hriat le? " Ka ti zui hlak a, ka mitah tak chuan min melh ve nghal ngur bawk.



" Ka ngai thin che a sin! Engmah sawi lo a min kal san in biak tak ngial pawh min rawn be zui lo a! " A rawn ti hmuk chu ka ner sak. A zak lo hi ka ti ngawih ngawih bawk.



" Engvang in nge ka biak ang che? " Ka ti kha vak a, ka kut ka thing thla thei bawk si lo chu ka thinrim nghal hlar a. A hmel chu a rawn thu tak ve lutuk tlat mahse ka ngai pawimawh bik thak lo.



" Eng vangin nge ka chungah hian i nun rawn em em a. Chhan engmah sawi lo in min kal san a. Tum thleng in min la haw zui bawk a! Enge ka tih sual, heti fa kau a i huat tur hian? " Ti chhuak hrawk in a thaw chhuak zui nghal hawk a. A awm dan chuan kei mah zawk hi min ti hrilh hai let ling zawk hial.



" Nang hian enge i hriat zawk a? Engmah ka hre lo emaw i ti a nge, nang hian kei min hmangaih ang tak a awm in ka thiannu nen in khawsa dun thin tih kha ka hriat loh hi i ring a mi? " Ka thinrim leh rilru ma bawk si chu ka au ve nghek a. Mahse inchungah hian awm an awm lo bawk a tuman min hriat loh hram ka beisei.



" Engmaw i sawi kha? " A rawn tih chuan ka heh ka pen fan fan a. Hun eng emaw chen ral tawh mahse tun hi kha thil thlen atanga a vawi khat nan ka sawi chhuahna hmasa ber a nia, ka na thar leh vek thei hial.



" Hre lo der duh suh! Chuan ka bul hnaiah hian hmuh leh che ka duh tawh lo a nia. " Ka ti zui hlak a. Ka sawi chu hria ang pawn a awm lo, ka kut chu hmer ngawt ngawt in a ding khawng luah a. Ka tum lo lutuk in ka mittui a rawn luang thla nghal pap.



Ka kut ka thing leh nak a, min thlah ve ta hram chu ka kal pel zui hlak hlak a. In chhung ka luh rual a ka mi hmuh avang chuan ka ding dat. Zorinpuia chu bang nghengin a lo ding reng a nih chu.



" Enge i lo tih a? " Pangai tak in tih tum mah i la ka aw chu a lawi rat tho. Min melh chhuk ngur avang chuan en rei duh lo in ka hawi sawn zui nghal vat bawk.



" Haw ka tum a ! " A rawn ti sup chu ka thaw chhuak hak.


" Ka rual in i haw duh em? " A rawn tih leh chuan lu ka bu nghat a. Rawn ding ngil in ka kutah chuan a rawn vuan a, ka melh nghal haw chu a rawn nui suk a, ka kut chu hmer nghet leh deuh salh in min kal sawn pui a, ka hnial lo chiang viau bawk.



" Ka pi te hi? " Motor bul kan thlen chuan hre chhuak thut in ka ti a. Pa Zothana nen an la awm rih tur thu min hrilh chuan motor chhungah ka thu lut ve ta nge nge a. Haw kawngah chuan ka in be lo a, kan ngawi dun reng a. Ka lung rawn chhe tlat chu ka thup thei lo. A khat tawk in ka mittui chu ka hru leh zeuh thin. Driver seat ah Zorina a thu a min hmuh ka duh bik bawk si lo chu tah chhuah in sum zet in ka thaw chhuak leh halh thin bawk.



Kum tak tak a ral tawh a. Khang hun kal tawh zawng zawng kha ka theihnghilh tawh in hma lam ka pan san daih tawh emaw ka in ti tawh kha a nia. Mahse tunah hian ka lo la theihnghilh loh nasat zia leh khang hun ka tawn vang a ka nunah ka lo in khar khip nasat zia ka hre thar a. Chu chuan min ti na leh zual.



College ka kal lai khan hostelah ka awm thin a, kan college a mi ve tho Apuii pawh hi kan hostel ah chuan a awm ve a. Kan in kawm chho zui a, chuan Muanpuia nen bawk hian college ah kan in tawng a. Kan in zui nasa ve viau nghe nghe. Kan hostel ah pawh min hmu tur in a rawn kal ve ziah a. Apuii nen pawh an in pawh ve hle a. Ka thiannu kha a ni miau a. Bakah hostel a a rawn kal pawn Apuii te nen kan in kawm ho fo a. Mahse ka hnung lam atangin ka bialpa leh ka thian, thian satliah mai pawh ni lo ka best ang hial a ka ngaih khan min lo bum reng a.



Mahse kei mi mawl lutuk khan engmah hre lo an bulah khan ka lo tal kual ve char char a. A kum fe min lo bum bawk a, college kan zo a University pawh kan kal ho leh vek nghe nghe a. Khang hun chhung zawng khan ka airah min lo nuih in min lo hmusit thin ngawt ang tih pawh hi ka la ngaihtuah thei vek. Apuiin Muanpuia fa a pai thu min hrilh lai a ka ham haih leh mak ka ti bawk si kha sawi tur pawh ka hre lo hial a.


Apuiin an lo in kawp ruk char char thu chu min hrilh ta vek a. Chu pawh loh theih loh a a pum chhungah Muanpuia fa a awm takah chuan Muanpuia ka hlat theih nan min hrilh hre hram zawk a. Kha tah khan min hrilh loh se chuan kei mi mawl leh thil chik lo lutuk khan ka la hre chhuak chuang in ka ring lo.



Ka rilru kha a na tak zet a. A kum fe kan in zui tawh a. Hmeichhe dang a melh ngai miah lo te kha ka duhna ti zual tu ka ti thin a. Mahse hmeichhe dang melh ngai lo in ka bul lawkah ka thiannu nen an lo in zui ve tho tih ka hriat khan rin mai pawh kha harsa ka ti. Mahse dawt a ni lo tih ti chiang tur in kan hostelah ngei an pahnih a an awm dun lai ka hmu leh kher a. Tlawm ka in ti leh mawl ka in ti lutuk khan engmah pawh ka sawi ngam lo. Kan khaw lamah ka haw zui ta daih a. Kha ta tang khan kan khuaah ka awm zui ta reng a nih kha.



" Kan thleng e ! " Ti riah chuan ka harh chhuak zawk a. Phawk lutuk in driver seat lam chu ka hawi a. Zorinpuia chuan min lo en ve reng a. Garage ah kan lo tlan lut tawh a. Motor chhung light pawh a lo ti eng reng tawh tih ka hre ve chiah.



" I mittui! " Zorinpuia chuan a rawn ti zawi sup a. Rang zet in ka kut chuan ka biang ka khawih a, ka mittui a lo luang chhuak reng tak tak bawk.



" Ka.. Ih... Eng lo... " Sawi tur ber hre lo chuan ka ti bah niai a. Ka sawi mai tur hre lo chuan mit chhing sawk in ka hmui chu ka pet nghek ringawt.


" Tihpalh! " Tih leh motor kawngka nem hawn ka rual a, ka chhuak zui nghal bawk. Inah ka lut a inchungah chho in ka roomah ka lut tlang nghal a. In sum lek lo in ka mittui chu a rawn chhuak nghal zawih zawih a. Hetiang em em hian ka lo la na thei a nia. Engkim kha ka lo la theihnghilh miah lo. Ka hmai chu ka hup thak a, thawk ka la vang vang a mahse ka thawl phah miah lo thung.



Ka hnung lam atanga taksa lian zet in min rawn kuah chuan ka phu zawk a ka taksa chu a khawng nghal at bawk. " Eng thil nge maw I tih le? " Ti hap in ka tal deuh a mahse min kuah nghet sauh thung.



" Zorinpui.. " Ka tih rual chuan " I tah chhung chiah ka kuah ang che. " A rawn ti zawi ruih a. Thaw chhuak ham ham in a ban sei zet chuan ka hnung lam atang chuan min kuah hlu hlu a. A lum nuam tak zet bawk.



" Ka tap lo! " Ka tih rual chuan a rawn nui suk a, ka thu sawi a awi loh lutuk vang a nui a nih ngei pawh ka ring. Mahse min kuahna chu a thlah phah chuang lo. Ka chhipah a khebe rawn nghat chuan a thaw chhuak suai suai a kei pawh chu ka ngawi ta reng a. Midang awm laiin ka tap duh bik teuh lo mai, chutiang ang a tap tur in naupang pawh ka ni lo.



" Min thlah tawh teh! " Ka tih chuan a che deuh hrut mai.


" Ai! " A tih chuan ner nang in sir zawng chuan ka melh chho a. Min rawn melh chhuk ve ngur bawk.



" Kha tah khan engtia rei nge i lo awm? " Ka ti zawi sap a. A hmui a ti sawi zeuh ringawt chu a nakah ka kiu in ka nghawk nghal sak .



" A rei tawh! " A rawn ti sup chu ka ner leh sak.


" Kan thu sawi kha... " Ka tih lai chuan " A vaiin ka hre vek, a tir atanga a tawp thlengin! " A rawn ti ve hmuk. A kuahna ata chu ka in la hrang a. A lam chu ka hawi a, a ni pawh chu ding pangai in a kut chuan a kekawr ip a zen nghal zat.



" Chuan... " Ka ti leh chu a mit hmul a rawn san zauh a.



" Engmah sawi tur i nei lo a! " Ka ti leh halh. Min nuih zat emaw ka ring deuh a mahse engmah a hmelah hmuh tur a awm lo.


" Enge ka sawi ang? " A rawn ti let hlauh zawk chu ka hahdam huai mai.


" Engmah sawi tur i neih loh chuan a tha e, chhuak tawh rawh ka mu duh tawh! " Ka ti leh hap a. Ka hmel hi tunah tak chuan hmuh a nawm pawh ka ring hran lo. Chuvang chuan mahni a awm ka duh.



" Zawhna pakhat ka nei a? " Ka in her tur chu a rawn tih avang chuan a lam chu ka hawi tha leh a. A hmel chu a thu tak in eng emaw rilru kam tu lian tak a nei ni mai hian ka hria a. ' enge ' tih nan ka dar ka san ak a, a rawn thaw chhuak hawk phawt a.



" Putea nen khan enge in laichinna nge in neih? " A rawn ti sup chu ka melh ha ringawt.


" Thian kan nia, chutiang vel chu a ni mai! " Ka ti sam et chu a zawhna ka chhang lo nge a lawm loh hmel ngang mai.



" Vawinah kha chuan thian chauh in an loh viau kha! " A rawn ti leh chu ka thaw hak.



" Vawin kha chu a nupui hlui vang khan lem tlem kan chang lawk a nih kha! Chu chu enge i tan a pawimawhna? " Ka ti zui nghal zat.


" Kha tiang zawng khan lem chang tawh suh! Midang khan a tak emaw ti se engtin nge i tih ang? " A rawn tih chuan chhan let leh mai ka tum a sawi tur hlawl ka hre lo. Zorinpuia chhuak chu ka en zui ta ngawt a.



Ni e, midang ho khan ngaihdan dik lo nei ta se kei hian in sawi fiah chu ka ngai ve fat ang. Mahse chiang fek fawk in kan inkar kha tumah khan min zawt lo a kan sawi lo bawk a. Buaina lian tham chu a thleng lo tur ah ngai ang.

*

*

Dam chuan ni kan hmang liam ve zel a. Zorinpuia te pawh college an rawn kal ve leh tawh a. Kan in hmuh tirh ngaihtuah chuan kan in ngeih leh ta phian a. Zingah college kan kal rual a, tlaiah pawh kan haw rual ta ziah bawk. Chawhnu lam class a neih loh pawn min lo nghak ziah tho a. Hruaia pawn induh min tih phah ziah leh nghal.



College week kan hnaih chho tan a, Zorina pawh infiamna lam a tui ve a ni mahna practice tur in a chhuak ve thin a. Tlai lamah pawh kan haw rual thei ta chiah lo a. Muanpuian min rawn biak a tum thin a, khaw atangin nge ka no a neih chu ka hre bik lo. Mahse ka be duh ngai lo. Tunah phei chuan Andrew nuipui hlui nen khan an in kawp in ka hria a. Apuii nen khan engtin nge an awm chho pawh ka hre lo, tunah hmeichhe dang nen an nih danah an in then ve te pawh a nih ka ring.


*

" Bawihpuia hi a va rawn haw har ve? " Ka pi chuan a ti leh thin a. Tlaiah khan an team basketball players ho chaw ei khawm an tum avang in chaw pawh kan ei san a. Tunah dar 9 a ri tep a. Engmah chanchin a la rawn nei lo chu ka pi in a ngaihtuah a nih ka ring. Pa Zothana erawh a office lamah hna khawih tur in a lut a. A mu nghal pawh a ni mai thei.



" Pi va mu tawh rawh, kei man ka lo nghak dawn nia! " Ka tih chuan rilru nuam zan lo tih hriat tak in a room lam chu a pan ve mai a. Kei erawh in TV en pah in ka phone in Tei ka text pah char char a. Kawngka lamah thawm a awm avang chuan ka pan nghal vat a. Kawngka ka hawng chu ka au chhuak teuh kher mai.


" Oii... Ngati nge i hmai kha? " Zorinpuia chu en in ka ti nghal chul a. A kut zungpui chuan a kam sir chu a tuai nghal zeuh ringawt a, in chhung a a rawn lut chu ka zui ve nghal a. Hepa hi a in sual leh chiang a lawm ka rilru chuan ka ti zui zat.



" In in sual leh ti raw? Ngati nge hetiang hian i awm ziah a. A hma a ka pi hlauhthawn zia te kha i hmu reng a! " A room a zui lut chuan ka ti nghal tan tan a. Khumah chuan a thu thla hnawk a, a then zui sak. A thisen pawh ka la hmu thei vek a, an in sualna a la rei lo tih pawh a hriat mai.



" Khaw nge lapua vel i dah? " A hmel en chuan ka ti hap. A dahna a rawn sawi chuan la in a bulah chuan ka thu thla a. Ka lam hawi a kuai her in a pem vel chu ka hruk sak a, chu mi pah chuan ka hau zui nghal hlak hlak a. Engmah sawi ve lem lo in a ngawi run a. Naktukah ka pi in a hmuh a nga a khawngaih thlak awm zawk hial.



A pem ka tih fai sak zo ka tho chhuak tur chu min pawt thu leh hnawk in ka in ring hman lo ka hmuiah a rawn fawp thut a. Ka ham haih lutuk chu chet mai ngaihna pawh la hre lo hial zawk. Mahse rei lo teah harh chhuak in nam sawn ka tum a, ka tukhumah rawn vuan in a aia nghet in min vuan leh hmiah a. Min fawhna chu a thlah chhin miah lo leh nghal!