KA HMANGAIHPA ZORAMCHHANA By Abbra Reo Ririni Khiangte (PitarteiSualfingi)

[Abbra Reo Ririni]

InShot_20200325_223826859.jpg (74.33 KiB) Viewed 473029 times

KA HMANGAIHPA ZORAMCHHANA
Ririni Khiangte (Abbra Pitartei)




Arpa in Arla a um kawi zawr zawr a, inhnuai kawmkar ah in um lutin an ri zui phur phur a. Kan veng piah chiah a buh dengkhawl (buh her khawl) pawh chawl miah loin a ri zawn rei tawh bawk e. VC information center ațangin 'khawnvartui a lak theih' tih an rawn puang khawk rum rum bawk a. Thler zau deuh laiah chuan lungkham dang nei miah loin mipa naupang țhenkhat chuan vaivut an dahkhawm a; tuiin an leih chiau a, motor lem kalkawng sialin an ri laih laih bawk.



Khawpui nun in a chimbuai phak loh, motor ri aiia arla dawkdawlak thawm hriat tur tamna khaw chhung ri ve laih laih khawthleng thlir kual tur chuan ka in luah aţang chuan ka kal chhuak a. Network hian awm țhat loh chang a neih leh țhin a, signal man beiseiin phone chu ka lek kang va va bawk.




Ka hnathawhna khua hi Mizoram hmarchhak lam a awm a ni a, khaw tual mi te eizawnna bulpui ber pawh Lo neih te, Fu huan siam leh serthlum huan siam te a la ni tlangpui. Nitin hian Aizawl service sumo pahnih a tlan ve reng a, Mizoram khaw dang ang bawkin kohhran lian ber chu Presbyterian ani a, Synod biakin pahnih leh school a awm, Salvation ARMY in dawt leh in an ni kohhran erawh biakin pakhat ah an la lawi vek thung. UPC leh seventh Adventist kohhran pawh in tlemte an awm ve bawk.




Chutia ka in luah kawmchhak ah tlangban dona mau kuah a ka lo din ngawi veng veng lai chuan, he khua ah hna ka zawm tirh ațang a Helpawl hotu a maw tia ka țih ruk em em mihring chu ka piah kawi ah chuan a lo lang hlawl a. Air-gun ak chungin ka dinna lam pan chuan rawn phei zel a. A kutah chuan ar thi tawh hi a khai tel bawk in ka hria!


A hmel nelawmna pakhatmah neilo chu thlan in a bual huh deuh hluam a, ram țang țhang tih hriat fahranin a vun pawh nisa emna vangin a uk sen khurh a. Hnathawh thuamhnaw, sipai uniform hlui ni awm tak a hak chu a taksa hrawl leh inphut hleitling thlup nen chuan inrem thlup mah se a lang hlauhawm ka ti! A iptepui ah lianpui chu a puar ûl a, min pan ding ngur tak tak tih ka hriat rual chuan ka in luah ah chuan tlan luh ka duh ta dawn dawn a. Mahse, ‘tlanchhe rual ka ni tawh lo’ tih chu inhrilhin ka dinna ngaiah chuan insangmar at in ka ding ve ta tlat a.


Amah pawh chu a rawn hnai tulh tulh a, a hmel rothap zet vang chuan ‘inchunga ka tlan lut daih lo’ kha ka inhaw tak zet tawh. A mit melhna zet mai chu keimah ah fuk tir ngur chungin ka kawmchhak chu a rawn thleng chawpchilh der a.


Ka hmaah tak a rawn din rual chuan nelawm lo zet hian, "La rawh," a ti thum dut a, a ar khai lai ka lama a rawn lek chhuah chu ka melh phawk kawk a. He thil hi engati nge min pek ve ngawt a!


Chiai leh hrilhhai lutuk hian "Ka.. ka duh bawk lo" ka ti chul a, amah chu ka melh chho leh nghek bawk, hetiang ar thi tawh hi enga tan nge ka tih a rin reng reng le? Min pe ve ngawt pawh hi a awmin a ang lo lutuk.


A mitmeng thim khup chuan khap hlek lo a min melh chhuk run chungin ban a rawn lek chhuak leh a, engtik laiin nge ka ban chu hnung lam ah ka lo thuruk hman leh zel pawh ka hhrel. Ar thi tawh min pek a tum ngawt kha ka duh loh lutuk vang a ni tih erawh ka chiang. Hnung lam a ka ban thuhruk chu awlsam tak hian a rawn man hmiah a, ka ban rek a hum rual a ka thisen zam ţek chuai chu a hreve lo tih hriat zetin ar kê pahnih a ţawn kawp chu min hum tir chawt a. Engmah sawi belh tawh lovin min kal pel leh thuak a. A chet dan vanga ka hamhaih chhung chu a rei lo.


A ar min pek rit nulh khai chung chuan ka inher ve nghal a. Zoramchhana ren run lah chu a lo hawi let duh tawh miah lo leh nghal.


"Hey..." tiin ka au zui tuar a. Zu han ding duh map lo a maw le!

"Hetiang ar thi tawh leh nghal hi enga tan nge ka tih ang a, rawn la leh nghal rawh" thinrim țún chungin ka au zui vak vak a. An in pan chhohna peng ah chuan inthaw zo zet in a pen chho thoh a. Ka ar khai lai chu melh hrep in thinrim lutuk hian ka thaw chhuak ta hak a. "Engtin nge ti che se la min tih reng reng le?" ti nui nui in ar taksa la lum thur thur chu ka thing pah vak bawk.




"Engati nge min pek ve ngawt a, mi Ar a ruk a reh hlum chawp a lo nih phei chuan VDP in keimah zawk min hlap hrep mai dawn sin. Aaaaaa.. Zoramchhan misualpa, i ar hi rawn la leh nghal rawh!" tia thinrim fe a ka au nghek chu kawmchhak aţangin u Dtêi chuan min rawn nuih chiam leh nghal.



"Enteh, a mawl zia hi. Hei, Ar thi tawh min pe ringawt a nia" ti halh chungin za lutuk a u Dtêi nui tlawr tlawr lam chu ka han hawi a. Senior nurse, nu Țhapui fapa neih chhun nupui a ni a, ka pazawn te an ni bawk.



Tukverh kam țha pah hian, "i lawm ngawt zawk lo em ni?" zu han ti daih a. Ka hamhaih zawk a lawm maw le. Hetiang ar thi tawh inpek ngawt hi a lawmawmna pawh ka hre ve lo.



"Mi ar a ruk te anih ka ring" ka ti hap a. Ar ke ințawn kawp vu, a letling zawng a ka khai then nawlh nawlh chu ka thlek ka thlek ringawt.




"Mai mai a, chaw hmeh tur a van tehreng nen Ram-ar pa thau lutuk a pe phal che kha lawm hle rawh" a tih chuan ka meng phawk deuh kawk a, "Hei hi ram-ar maw?" a hmuh chian theih loh hlau awm fahran chuan ka lek kang vak bawk.



"Umm, a tui ngawt ang. Puah a ngai ang, hetah lo khai chho la, i u Ngaihsaka kan puah tir dawn nia" a lo ti leh a. Hnial tumna pawh ka nei tawh lo.



An in pan chhohna lungphek step ang reng deuh a dawh chawp ah chuan lungawi lo ru deuh in ka chho ta hnak hnak a, Zoramchhana nen a kan inhmachhawn dan kha a pasal hrilh paha u Dtêii lo nui hawk hawk reng chu inchhung ka luh rual in ka va melh nghal ram ram bawk.



"Kan Pasalțha chuan ramar a lo rawlruk che a ni maw?" U Ngaihsaka pawh in nui hawk hawk in min lo fiam ta reng a. A sawi dan kher kher chu ka runin lungawi lo deuh in inchhungah chuan ka pen lut a.



"Chawhmeh van lai ah lehnghal hetiang sa tui lutuk a rawlruk phal che hi lawm hle rawh, pasalțha zarzo pha a i țang ngawt pawh hi nula dangte'n an thik viau ang che" ka haw lutuk tih a hriat vang nge, ka run tawk lek lek a min fiam dan a hre phian leh nghal. Tih vak ngaihna hre lo chuan ramar rit nulh khawp a lian tham chu tapchhak ah chuan ka theh thla thum dawt a.




"Khai leh! A va kap fuh chat chat ve maw le, mipa mah niila Ramchhana silai kah thiam lutuk leh a tum lai tak a hlah duh miah lo țhin hi mak ka ti tawp thei biklo" Ramar thi tawh lek kang a, thlek kual vut vut pahin u Ngaihsaka chuan a ti hlut a, thaw hakin thuk hma țhutthleng hniam lo awmsa ah chuan ka țhu thla ve a.



"Khawi ah nge a kah fuh a?"



"A hrawk ah tak hian" ti sup in Ramar hmul chu a keu thuak a, a kahna lai lah chu a lo fuh chiang bawk tak reng a. Mihring nise chu a hrawkbawk ah tak a tih theih ang.



"Mihring thawm hria a a hawi chhuah lai takin a kap anih dawn hi, hman ni a Nghalpui kah pawh a chaldar ah tak mupui in a verh siah mai asin" Zoramchhana kut themthiam zia leh kutthlak fuh theih zia chu hahip a sawi mawlh mawlh in Ramar chu chawhtawlh lian pui ah a dah a, tui lum leihin a puah fai nghal a, a hmul zawng zawng a pawh kawn vek hnu ah pawh chu Ramar chu kg1 dawn zu tling a maw le.


"Kha, ti hian hawn thla rawh, i rap chung lian lo tak ah khan rep bawk la" a tih chuan, "Naaa.. ka duh reng reng lo, hetah siam ila, chaw ka rawn ei ang" ka ti thuai a. Mahni lo maha nalh loh hlau vanga ei leh in insum ţang țang lai a Ramar pum khat ngawt kawl te chu ka duh teuh lo.



"Kan mit a uihlit phah si ang e!" U Dtêii'n nui vak paha a lo tih leh chuan rum deuh hian ka va melh leh vak a.



"Anih chuan ka rawh nghal mai dawn asin, zo buh nen buhchiar ila, a tui tham ngawt ang" u Ngaihsaka chuan lo tiin Ramar pa thau zet chu thuk a mei alh hluah hluah chuan a hliau nghal puat puat a, kar lova a thau chu in er fû deuhin mawm deuh hi a rawn far chhuak nghal tluk tluk bawk.


"Țhianpa hi zawng lasi zawl ang mai hian a kut a hmui em em mai a, silai a chelek thiam lutuk chu thu hran, vawi khat te mah a ram chhuak a hlawhchham ngai hauh lo hi a mak ve ngawt mai" u Ngaihsaka chuan a ti lar lar a, ramar chu a sa sahchem in a sat phelh phawk phawk bawk.



"Hman ni lawk paw'n țhian sa-beng a rawn pek tak che kha mawle, a kut hmui a kal tluang rih te pawh a niang" u Dtei paw'n a lo tui hnih ve a.




An nupa chuan nelawmna pakhatmah neilo Zoramchhana chanchin ngawt chu an sawi zawm barh barh a. Ka uksak vak lem lo, ka ngainat lo zawng tak maiin a palian in a sual hmel ropui si! U Ngaihsaka te nupa lah hian min chhaih zuk zuk an ching leh ta nghal a.




"Mawh? Mate" u Dteii'n a rawn ti deuh lauh a, ka hawi chhuak thuai a, Min biakna ka lo hriat loh vang nge chal min tih chuar khum nang a. "Eng maw?" ka phone chu hmet thim in u Dtei chaw chhum siamna lam ah chuan ka phei ve ta a.



Ani lah chuan, "Zoramchhana nen hian innei daih ula" a lo ti pek a nih chu!



"U Dite!" ti hlar in a hnung ah ka beng dawp a. A nui hawk hawk a, ka nuih pawh a za ve lo.



"Min chhaih tawh miah su" lungawilo deuh chuan ka han ti leh ngawt a.


"Kei chuan i bialpa doctor ai khan ka duh pui zawk fe che" uar zet hian a rawn ti vak a. Ka ner nasa ngang mai.



"Hetia min fiam min fiam chuan ka in luah ah a la rawn lut nulh ang tih te a nia ka hlauh ni" ka sawi zawng ringawt pawn ka in zimte chhung a Zoramchhana ding run tur chu ka mitthla chhin a, ka țim sawk leh nghal!




"Rim tur che in ka la hrilh tak tak ang" a tih lai a duh lo zet a lu ka thing vak chu u Ngaihsaka rawn ding chhuak chuan min nuih hawk hawk a.



"Insual nupa thei lutuk, keimah chiah in ka awm leh nghal, a lo kal tak tak ang tih ka hlau a nia" ti hap in alu vel tur u Dtei lak chhuah chu ka khawih pui nghal a.




"Mate, i u Ramchhana chanchin hi hrechiang nila chu hlauh a hnehin i lainat zawk ngawt ang maw le" u Ngaihsaka chuan thutak fe hian a ti sup a, ka en thuai a, a kut chu sil nawk nawk in a lo insehruh țeuh mai.



"A chanchin maw?" Ka tih chuan ngaihtuah tam hmel tak hian "Aw, a lan ang ngawt hi a nilo, thawnthu tam tak pai tu leh kawl tu ani a, aaaa.. nakin ah nangmah ngeiin i la zawt chhuak dawn nia" tiin towel inbang ah a kut chu a hru hul nghal thuak thuak a. Kei hian engtik khawtik ahmah kha mipa lian leh nelawmloh zet kha ka be țawng zo ngai dawn lo tih ka chiang a, u Ngaihsaka thusawi pawh chu ka bengkhawn duh lem hlei lo va.


An fate leng lo haw chuan 'home work kan nei' tiin chhuat lai ah lehkhabu nen an inzam hnawk ve kher mai, an bulah țhu ve a an home work tih lai enpui pahi kan family whatsApp group ah ka lang zauh zauh bawk.


Pa Khawla fu-huan a feh a lo haw chuan Ramar kan lo chhum hluah mai chu mak a rawn ti khawp mai. U Ngaihsaka te nupa in Zoramchhana min rawlruk tih an sawi tel zuk zuk chu ka tihtauh khum bar bar reng a. Nu Țhapui duty chawlh lailawk laiin zanriah kil chu rawt thuai in ka pazawn te chhungkua nen chuan kan ri ta laih laih a.




Nu Țhapui leh ka nu hi hman aţang a lo inhre tawh an nih vangin an khua ah nurse hna ka thawh dawn pawh in an chhungkua hian min buaipui nasa em em a. Ka in luah tur quarter a in mal ding pawh u Ngaihsaka te nupa hian min lo tih fai sak vek a. Nu Țhapui hi hemi khaw damdawi in ah sister kan tih ang khan a nulat lai ațangin a thawk tawh a. A pasal, pa Khawla erawh fu huan zau lutuk enkawl in kum tin kurtai țhahnem fe a hralh chhuak țhin. U Ngaihsaka chiah fa an nei a, ani pawh primary school ah zirtirtu hna thawkin an chhungkua chu thingtlang a khawsa rau rau ah pawh a leikang pawl tak an ni. Fanu an nei lo a, keiin pazawn a nei a ka han fin leh rawk rawk țhin te pawh hi min lo duat thiam em em zel.




Ka night shift dawn avangin zanriah eikham hnu reilote ah haw thlak ka rawt a. An fate pahnih chuan ka phone games an la khelh duh vangin min ui țang țang viau a. Phone chu harsa tak chungin kan in lak sak fel a.

"Kan mit a uihlit lo tur ang ngai ang" ti zuk chung a u Ngaihsaka'n min fiam lehna chu lei chhuah khum vak pahin ka melh nghek a. Pa Khawla meuh pawh thingpui hang no dawm in a lo nui ve hawk hawk bawk.


"Chhe lutuk, min chhaih leh veih chuan i chak lo tawh ngawt ang" ti in ka phone chuan ka'n tin deuh zuau a, current a rawn thim chiah bawk nen u Ngaihsaka chuan nui kur kur chungin inverter on turin min kal san ta a.

"Nu, pa.. ka chhuk ang aw, night ka ngai bawk sia" ti pahin mizo pa leihkapui an dawh duai ah chuan ka chhuak nghal a. Mahse, leihkapui hmawr țhutthleng a mihring ruangam lian pui lo țhu țhim run ka hmu chiah chu tawlh let deuh dat a, thawk ka la zui hak bawk.



'U Ngaihsaka nen kan infiamna kha a lo hria ang em le?' tih chu rilru in ka inzawt nghal a, ka ngaihtuahna pakhat zawk chuan min rawn beng her sawk hial in ka hria, 'lo hre palh pawh nise a pawi vak lo chiang em mai' tih min rawn hrilh zui zat bawk.




"I.. i lo awm reng elo?" ti hak in ka melh țha leh ngat a. Thla lo chhuak chu a eng viau a, chu thla eng no nghul chuan in 500 pawh tling lo khaw-thleng nuam zet chu leilung lang paw vô khawp in a chhun eng phut a; Zoramchhana chu u Ngaihsaka țîngțang hlui tawh tak pawm hlun paha zial zu khu vut vutin a rawn thle deuh bak a. Ka biakna chu min chhang let hlei lovin mit a ti zîm sûn a; a hmai a hmul ţo tam lutuk vang chuan a hmui pawh a hmuh hleih theih loh, a duh tawk a rei muk ruih a min melh vung vung hnu chuan ral lehlam a tlang thim dup lam chu min thlir san leh daih a.




A chet phung vang chuan lungawilo hle mah ila, "Ih, I thil.. Ramar sa kha a tui lutuk a, ka lawm e aw, ka pa te chhung nen kan ei khawm a" ka ti niah niah a, phone flash light ka on pah a, ka biak pa chuan tlang lam thlir vung vung chungin lu a bu leh nghut a. Biak loh nen a inang leh reng tawh! Mit ti che kual ralh pahin Leihkapui ațang chuan ka chhuk thla ve hmak. Vawi khat mah a țawng bawrh bawrh lai leh a nui hawk hawk hmel ka la hmuh ngai lo, ka lawmthu sawina min chhang let miah lo pawh kha mak ka ti hran tawh lo. Țawng a hreh hmêl si, a ri a nuih phei chu a hreh lutuk a lamah nuih rik dan a theihnghilh tawh hial zawk ang.




Kan in leh Pa Khawla te in inkar a lung dawh rem lo zeta ka chhuk thlak lai chuan țîngțang chu a perh ri tlang tlang a, a țawngri leh a nui ri hriattur awm ngai mang lo mah se a zai ri erawh ka hre fo lawi a. A aw a thum tluk zetin a zai laia a a aw pek pawh a thum in a lian a, C Sanga zai ang deuh hian a pui lurh mai a ni. 'Van a duai chuang e' tih hla a sak phei chuan c Sanga aw pa leh lian thum ruih ang chiah in a aw in lung a kuai em em roh bawk.




"Mami, min rawn sawm chho la aw" kawt ka thlen thlak rual in ka nu chuan min rawn au a, *aw* tih paha ka han hawi chhoh leh Leihkapui a Zoramchhana lo țhu chu kan in melh fuh chiang hle a, ka danglam zawk nain, khitiang tlangval senior chut lutuk leh țawng nachang hre bawk silo vang a danglam ang a lan te chu ka duh bik âwzawng lo.




Thla eng chuan a hmai tlang hrawl tham zet chu a lo chhun hlim dûk a, a biang ah hmul a țô khat luk bawk nen movie a misual nunrawng zet hi ka tehkhin rauh rauh țhin. Mit la sawn hmasa a țan duh lo sateh mah ila hna kal tur te ka la nih vangin ka inher ta nge nge a, ka mit sir chuan ka hawi sawn ruala Zoramchhana kiai suk leh țîngțang hrui thlek nghal vut chu ka hmu thawi hram bawk.



"Chhe lutuk" ti hlak in ka ner zui nak a.



Ka in luah te fel at lo thim țhiap ah chuan lut in emergency light ka ti eng nghal a. Ka room ah chuan lut tlang in zanin a ka hak tur thuamhnaw ka khai dak thlap chu la chhuakin khum ah chuan ka mut nghal zan bawk. Current a rawn awm ve leh chiah bawk nen washroom-ah ka lut tlang a, eirawngbawl hma lawkin ka inbual tawh tho a, a pawimawh chin chiah insial fai thuak thuak in ka thuamhnaw chu ka thlak nghal a.


Kei hi Ramhmangaihi ka ni a, kum in khan kum 24 ka pum ve chiah bawk. Ka pa chu sawrkar hospital pakhat a superintendent hna chelh lai mek ani a, Mizorama vengva deuh chin chuan an hriat vek ka ring. Ka nu pawh hmeichhe doctor thiam tak niin unau mipa pahnih leh hmeichhia pahnih kan ni a. Kei hi a tlum ber ka ni nghe nghe. Ka u te chu nupui pasal nei vek tawhin hna zahpuiawm loh tak tak thawk in Aizawl leh Lunglei lam ah an inbengbel tawh a. Ka u chiah te nupa nen tunah hian ka nu leh pa te chu Aizawl ah kan inpui ah an khawsa ho mek a.


Ka pa hian zir san ngawt a, chhawrna tlak awm si loh kan nih ai chuan zahpui awm lo tawk a lehkha kan zir hnu ah kan tuina line a kal turin min duhpui ber a. Keipawn kum17 ka nihin Bengalore-ah nurse ka zir nghal a, ka zir chhuah hnu ah Aizawl a damdawi in pakhat ah kum khat dawn ka thawk hman tih in tun a ka awmna, thingtlang ah hian ka dilna ang in min sawn leh ta a ni.


Ngati nge Aizawl khawpui ațang thingtlang ah teh daih insawn ka dil tih in lo ngaihtuah takin; Sawrkar lamin ka bialpa Doctor Dinpuia an sawnna hmun anih vang a tih theih ang.

Doctor Dinpuia leh ka u chiah mipa hi an inkawm nasa a, kan in hi an țhian ho chet tlat tamna anih vangin kum 15, 16 ka nih chhoh ațang tawh Dinpuia hi ka vei thei em em a. Tleirawl lungmawl ta na nâ nâ chu lo inthup zawh loh țum ka ngah ta deuh a ni ang e, nurse ka zir zawh hnu khan chet la hmasa in a bialnu nitur in min sawm a, ka aw rang teh a sin! A chhelo a, hmeichhe dang paw'n an star thei lutuk.


Kan chhungte ve ve in kan inkawp tih an hre vek a, ka u nen an ințhian țhatna pawn a chhiat phah lo. Mahse, rum tak maiin ka u in 'a hun hma a kan chesual a nih chuan a țhianpa leh a nau te kan ni tih lam ngaihtuah hauh lova kan inzawmna tihchah a duh dawn' tiin tlang takin min hrilh dun a.

Kum 3 ai rei mah kan inzui ve tawh a, mipa leh hmeichhia thisen lum ta ve ve chu a fal a kan awm dun chang te hian kan kal thui lek lek fo a, kei aia upa zawk leh puitling tawh zawk nimahse rilru fim pu thei lova tha pui nen a țan khawh chang nei tut tut țhin mah se, nupui pasal nih hma a chetsual ka duh lohna leh ka nu leh pa, ka u te min fuihna vangin tun thleng hian ka la thianghlim, Dinpuia pawn ngaihdam min dil in țha takin in awm ve leh mai țhin.


Zankhua in damdawi in ah ka awm dawn avangin puan lum zangkhai deuh ka keng chhuak țat țat a.


Țhutkhawmna zim te sofa sei leh single sofa pakhat ve ve inhun ve ranna chu ka thlek kual leh thuak thuak a, kang-mei ti chhuak palh thei kalsan ka nei em tih te chu ka check kual nghal zung zung a.



Bual in a ka brush hman hnu ka rem țhat mawlh mawlh lai takin kawmchhak a țhu mek,mipa aw thum ruih chuan lungkuai em em mai hian C Sanga hla *Van a duai chung e* tih chu a rawn sa ta a.


Zoramchhana nen pui roh a kan inhmuh hmasak ber țum ka ngaihtuah let rual chuan țîm ru sawk in ka ip zui chawi a!


He khuaa hna zawm tur a ka luh lai kha Lo vah hun lai a lo ni a. Lam hla nei tur ho chu ram lamah an lo riak bo vek hi a lo ni a. Hnathawk thei chin awm lo duak chu thingtlang khua ang ah chuan a hriat khawp mai.


Țhenkhat Lo vat zo an rawn haw nguah ngauh laiin a țhente erawh an ram chhan a har deuh nge ni, hmanraw bil te chher hriam turin pum(thirdeng) lam an pan chuah chuah bawk a.


Ka thlen tuk ațangin hna ka zawm nghal a, nu Țhapui hian kawng engkim ah min kaihruai hnehsawh em em a, khawpui damdawi in ang a engkim awm sa anih ve loh avangin mahni veng vat dan ang ang a inpawh chhawp a țul changte a awm a. Current a awm țhat loh bak ah damdawi in lam in khawl leh hmanrua a kawl chikim lo hle bawk.

Ni nga lai ka thawh ve hnu ah zan khat chu nu Țhapui hian call a dawng a. Zanriah kil lai niin ka kham fel chiah lai a ni bawk a; lo vat intipalh damdawi in ah an luh thu leh serious lutuk a nilo nain damdawi in pan hmasa tur in min hrilh a. Keipawh chu chak tak in quarter awi pang rem lo zet ah chuan tlang chhip a damdawi in panin ka tlan chho nghal a.


Duty room pawh chu hnung lam kawngka ațangin ka lut a, kut kawr bun mawlh mawlh paha Emergency room ve deuh roh a ka va chhuak phei chiah erawh ka tîm chawih a, tlan chhiat vawn vawn duhna in ka khat nghal a!


Hnathawh thuamhnaw inbel a plastic chair a palian pui lo țhu rún hmel chu a țíhbaihawm in a rorum em em a! A mitmeng a hriam hraih a, a thîp tak zet bawk. A sam a sei chhup a, a hmel hmuh theih loh khawpin hmul a zuah buk bawk a. Helpawl member an tih ang hi la hmu ve lo mahila khami zan a ka mi hmuhpa nen khan an danglam lo hle ang tih te thleng a ka ngaihtuah zawm laiin damdawi in ti fai tu lo lut chuan min ti harh zawk a.


'Hei, Ramchhana hian a țhiante insual a țhelhna lamah a kut hian chempui a hum a ni awm a, han en sak ta che' a rawn ti ta hlauh a. Chutia a sawi tak ah chuan rang lutuk in a kut chu ka melh nghal a. Ka rei! Pawnchhe thianghlim vak lo tih hriat lutukin a kut chu a lo vet chhah tup a. A hliam tuamna puan chu a chhah viau nain thisen chu a lo dir chhuak tluk tluk tho.


Damdawi in ti fai tu hnenah chuan, 'Ka.. ih.. dettol leh lapua kha min lo lak sak ta che' ti nghal sawk sawk in chu pa lam chu ka pan a. Ani lah chu a lo țhu ngawi ngul roh bawk nen ka bawisawm tur chu ka zam ru kher a nia.



Mahse, ka beisei loh dan lutuk in țhu chunga min lo melh run tu chuan a kut tuam bur chu a rawn lek chhuak a. Damlo dangte angin a țhuthmun sawn tur pawh in ka hrilh ngam țhâi lo! Plastic țhutthleng hniam ah țhu ve in a kut chu ka bawisawm sak nghal zung zung a. A kak thuk in a kutphah hlai hlup chu a lo thler phei duai mai a. 'eng vang a chempui chu hum ringawt nge anih' tih te chu midang nise ka zawh ngam dawn teh lul nen, khami zan erawh chuan a lan dan nelawm loh zet chuan min ti zam a. Duty room pindan chhung te kha a uap in a phui chur anih kha.



Tichuan, hun a liam deuh a. Thlai rah te a lo thar a, khawpui angin duh duh hun ah sa lei tur a awm loh tluk zet in gas pawh avang. Dawr lah awm ve duah mahse frozen food te cup noodles tih vel te zuar erawh an awm lo. Chutiang te a nih laiin a hliam ka buaipui pa, Zoramchhana ngei mai hian a feh haw paha thlai -rah leh an-hnah vel min hawn kep a ching ta zauh zauh a. Rawtuai leh pasawntlung a pawh chang lahin duty a damdawi in ah ka awm lai pawh nise ka karkhat ei khawp tur hi kawngka bulah a lo hnutchhiah ziah țhin. Mai te, maipawl pum lian tak tak te ka kawngkhar hma ah chuan a lo awm nawlh nawlh zel.




U Ngaihsakna leh Zoramchhana hi an inkawm teh tlat bawk a. An mizia a inpersan nasa mai si. Nupui a la nei lo tih leh quarter piah lawk ah an awm tih chu ka hriatna a rei tawh. Farnu hmelțha deuh mai a nei a, PES school ah principal in a awm nghe nghe, Zoramchhana chuan tlangval dangte angin nula a rim ngai pawh in ka hrelo. Khaw chhungah a awm chuan ka pa te leihkapuiah hian țîngțang perh in an zai ruih ruih zel a. U Ngaihsaka hi a țawng bawrh bawrh ang a, pakhat lah in chhang let ta nge ti lem hlei lovin zan an tum tawi ve țhak țhin.



Tala hum chungin ka kal chhuak a. 'Zoramchhana a zai chang hian, a aw lian leh thum ruih ah chuan natna ri hre telin ka inngai tlat zel' tih hi ka sawi tel hram ang.




Kawngka ka kalh lai chuan a zai chu a lo zai zo ve chiah a, ka tham khawp a ring hian thawk a la zui hawk a. Ka inher lai chuan lighter a lo talh țek leh sawk sawk tawh, Zial chu țan nghalin a fawp zui hlut hlut a. A kâ ațang zial khu tam deuh ham chhuak ham ham chungin leihkapui tlak dal thingtuai chu a rawn bawh rún a. Tshirt dum leh jeans kekawr a ha tawp a, meizial khu tup tup kar ah chuan thim ruih in min lo melh zui vung vung a. Kan inbe tam ngailo, kan inbe ngailo hial zawk a tih theih ang. Ka biak changin min chhang let ngai miau lova. Mahse, thingro phur a u Ditei ka zui changin a feh kal tur in thingro chu min fawm khawm sak zung zung țhin. Kut hnathawh a chakin tha a ngah bawk si. Ram lam a chetla tur a duan bik emaw tih tur khawpin amah ngawtin lo țin hnih hmun zau zet a enkawl hem bawk.




Paikawng a thing ka phurh hmasak ber țum chu u Ngaihsaka te nupa leh Zoramchhana te nen kan palia thingphur tura kan chhuak ho țum a ni a. Hmeichhe in lo no deuh chi ka ni lova, ka mizia hi a nu zimzem loh avangin thingtlang a keimah chiah a quarter ka luah pawh hi harsa ka ti ngai lem lo. Mahse, pian tirh a ta thing la phur ngai reng reng lo tan chuan paikawng khat țun a thing thawn sa han phurh zet zawng, a lo zeilo ve theih ngei mai!




Zoramchhana pui roh pawn zeilo min ti ve thlawt aniang chu hnung lam ațang ka paikawng phurh lai chu a lo chawi thla nawlh a. Ka hamhaih lutuk hawi let chu tur deuh khui a min lo melh in, "kawngthlang ah i buk liam hma in phur tawh suh" tih zawng a lo sawi nghut a. U Ngaihsaka te nupa in min nuih dun nghek a. Kei a tlawm-la laklawh lah chuan phurh leh ngial ka han tum a, tuman min chawi duh tawh bawk silo. Zoramchhana chuan ram hrui a sat zung zung a, ka thing phurh te chu țawn khawm vekin a thingput lai te nen chuan a pu tlang ta vek a.



Chhawk ka tum pawh in "kal țha hle hle rawh" tiin min hnial zel a. Khami țum kha a țawng tam ve ber țum a ni hial bawk in ka hria.




Khi deuh suk a lu a thin nghut tak ah chuan mit la lo lekin kan lo thlir reng tih ka hre chhuak thut a. "Ka nu a kal tawh em?" ka han ti ta vak ringawt. Ka hmai chu a lo sa hat hat leh nghal. Ka biak pa chuan lu a thing leh mai a, zial chu tui tih hmel fahran hian a hip lut leh kawk a.




"Aw leh aih tih sawi ngawt pawh i harsat em em mai sia" ka ti zui bai bai a. Ka bia pawh a nilo, biakna reng reng a chhang țha duh lo țhin lutuk chu ka thinrim a ni mah tawh zawk. Chuan, khitiang khawp a mipa nelawm loh si ka vin tan tan ngam tlat pawh hi thil mak tak chu a ni reng reng.



Step rem lo deuh a ka kal chhoh lai chuan ka nu pawn a chhungte hnen ah, 'a kal chhuah' dawn thu a hrilh ri ka hre zawm a.




"Awi! Mamte, thleng chho vat vat rawh, in pa rim tumin kan nuthlawi-i'n a chhoh khalh leh tawh che" leihkapuiah lo chhuak ve paha u Dtêi'n a lo tih chuan ka inhum ruh kher a sin. Zoramchhana lahin thla eng ruih hnuai ah chuan zial si lut ham ham chungin min lo melh ve run bawk nen ka sa vek thei.


"Kekawr tight tawk nen mawng a țhial sawih tir țawlh țawlh kha" a lo ti leh a, ka awm chhung chu a rit mup tawh.


"Aaa... i u Ditei fiamthu kha la thutak duh suh, lo kal rawh. A fanu hritlang khawsik reh thei lo damdawi pek tur a rawn zawt dawn aniang" ka nu chuan a lo ti thuai a. Ka nui lui sak nain ka nuih erawh za lem lo tak a ni.


Inchhung ah pawh ka lut kawi tawh lo, u Ngaihsaka pawh lo chhuak ve in Zoramchhana țîngțang perh peih tawh loh chu a pawm chut a. Kei leh ka nu erawh damdawi in pan in kan inzui chho ta hnak hnak a.


He khua ah ka insawn ve tirh khan u Dtêi hian an khua a ka awm ve hma a thil thleng țhen khat min hrilh ru tawh a! Nuthlawi no suah mai, chhungte duat rawn hian Dinpuia a len chilh ngun viau a ni awm a. Dinpuia pawh an in lam ah a leng phei fo tih te pawh min hrilh a. Dinpuia ka zawh lahin 'ka school kalpui țhin a lawm anih, he mi khua hi an lo ni ve reng a, a fanu a hrisel loh em avangin keipawn an in lamah te tlawhin ka buaipui viau a sin, kan inkar ah engmah a awm lo' a ti thluam a, ngaih tih țha zuiin ka ring ve leh ta kha a nia.

Mahse, chhun ah ka duty loh lai hian nuthlawi Ahmai chu damdawi in vel ah a lo han kal ziah tih ka hre leh zel a. Dawr an kai a, mamawh lei a an dawr ka va pan changte hian mî hi a lo melh rum ve em em ringawt zel.


Ka nu bulah chuan "Ka'n peng kawi lawk" ka ti a, ka rilru nuam lo hmel chu chik deuh hian min en a. Min khap mah se rilru nuamin ka duty thei dawn lo niin a hria a ni mahna, "Aa.. aw, ka lo han chho tlang a nge" tiin min kal san ta a.


Damdawi in thlang lawk a building lian ber hi Doctor quarter a ni a, pawna a car inhung chu melh zeuh in inchhung light inchhi kim lo chu panin tual zawlah chuan ka pen hlawk hlawk a.


Mahse, veranda ka rah hma chiah in chhunglam ațang kawngka chu a rawn innam hawng a. Ahmai chu nui hawr hawr chung a lo chhuak in Dinpuia'n a hnung a rawn dawl bawk.


Chutia an pahnih hlim hmel lutuk ka hmuh dun chiah chu ka sa deuh pup a, rilru na ru zet a ner nakin min hmuh thut vanga Dinpuia hamhaih hmel buai nawk chu ka melh nghal ngar bawk.

"Pui, ka kal aw, i hman chuan i lo leng ngei ngei dawn nia, ka fanu nuamsam lo pawn khawnge 'apa Puia' a ti sek tawh a nia" ti kher pah in Ahmai chuan mawng in țhial sawi țawl țawl chungin min kal pel a. Zan ah Ahmai te in lam ah a leng phei țhin tih pawh ka hre ve ta chiah alawm.


Dinpuia chuan "Lo lut la" ti pahin min pan hnai a, tshirt leh kekawrbul chiah a inbel a. min kuah tum a ban a lek chhuah lai chuan ka lo inveng nghal zat a.

"A va nuam awm deuh ve" ka thinrim lutuk vangin ka khur ti tih ringawt. Ka thikthu chhiat zia a hria, ka u rual daih nen a inngaizawng kan ni a, theih tawp chhuah in ka insiam rem țhin thung.

"Babe" ti hulh paha ka dara rawn kuah a tum leh lai chuan tawlh hnun sanin lu ka thin khum nak a.

"Ka hmanhmawh, ka kal" ti hmak in ka inher nghal daih a. Ka kawchhung lam erawh a rawn sa hut hut a, nuthlawi in a zuam hmel lutuk te, ka hriat ve hauh lova an lo inpawh thuk zia ti chiang tura a fanu in Dinpuia a koh dan a sawi chhuak kher te khan min kher zui nget nget mai! Engtin an lo awm dun lai ka hmu pawh a ni lo. Mahse, ka chhunglam hian thil fello engemaw tak awmin a ring tlat tawh a. Min hnawt tet tet a ni ber.


Damdawi in panna kawng te ka rap chiah tihin kawngka innam khar bur leh in lock ri ka hre zawm a. Bung kung lian zet hnuai ka thleng chho chu min rawn um pha a, ka ban rek ah rawn man chawt in min kuai her nghal lawp bawk.


"I thinrim em ni?" a ti a, a nui hmel ka hmuh leh lek phei chuan ka tawt sa vek tawh.

Țawng chhuah ka tum a, ka thei lo! Ka ban rek a hum chu ka thing ta nghek ringawt.

Ka naupan zawk daih avangin min thlem thiam a, hmeichhe tam tak lo thik fo tawh mah ila thiam tak a min thlem țhin avangin ka ring leh thuai țhin! Mahse, tunah chuan chu ka mizia chu hrechiang in min thlem lungawi leh mai thei inring ru ran in a dai sual lui ah ka ngai deuh tlat tawh.

A awm ah min kuah beh tum paha, "Babe, thinrim ngawt lo teh, a naupanchhiat thlak lutuk"a tih chuan nasa lutuk a tal in ka nam vak a, a mak ti chuan min melh phawk khawp mai.

"Naupanchhiat thlak a?" ti chang fak in ka thaw zui hak a, Dinpuia pawh chu a lo thaw chhuak ve hawk tho.

"I bialnu emaw ka nih ka in ti a, naupangchhia ang in maw min lo hmuh lek a?" ka ti leh ngat a. Dinpuia chuan beidawn thlak tih hmel taka lu thingin sam a tuai chho thuak a.

"I kum chungchang ka sawi lo, ka ţhian in min rawn tlawh a, chu thil i thirimpui ngawt chu a lawm naupangchhia ka tih"

"In innel dan em em hi țhian huang chin inpelh fe tawh in a nia ka rin" ka tih leh lai chuan lungawi loh hmel zetin a lo rum hak a. Keipawh ka lungawi bik reng reng lo.

"Țhian kan ni ka tih fo tawh kha, i u pawh i zawt thei ang. I u te nen school khat chhuak vek a lawm kan nih" a aw a chang ta khawp mai. Hei pawh a ze ngai bawk. Ka u in min chhan dawn mah se ka mimal problem ah kher chuan ka zualko kual ngai dawn lo tih hrechiang ber tu ani.


"A lo nih vel tak chu" ti vak in ka tawlh hnun san hmak a.

"Babe, Țhian hlui bak ani lo.." Dinpuia'n a lo tih leh cheu lai chuan thawk la ham ham pahin amah chu chiang tak hian ka en a. "Ka țhian hlui mipa hi lo pathlawi ta se, chu nen chuan inbiain ka in ah emaw ka hnathawhna lam thleng in i awm loh lai chuh in min rawn kal chilh reng ta se, 'Țhian hlui' tiin i hnenah insawifiah ziah bawk ila min ring bik ang em?" ka ti kher a. Chal a chuar nung a. "I awm loh lai chang ang hrimin nang nen a kan inhlat rualin ka in ah leh hnathawhna ah min rawn pan ziah ta se țhian hlui tih ngawt a insawifiahna chu i awi bik miah lovang" ka insawi thimrim tulh tulh a, a tawp lam phei chu nasa lutuk in ka au khum ta vak a.


If you want to be ORIGINAL,
be ready to be COPIED

[Abbra Reo Ririni]

Chutia a laka ka lungawi lo chu, "Babe, thinrim țhin loh teh, mahni loh mah a chauh ve nak laiin" min la ti zawk zamah.

"Ka thinrim loh i duh chuan ani kha hmu tawh suh, ka hriat loh laia in inhmu ru leh a nih pawh in ka hre leh vek dawn, ka ngenna che hi i pawm thei lo a nih chuan..." tia chawl datin Dinpuia hmel chu ka en ran a, ințhen rawt hma zawk a țan ka duh ngailo. Mahse, rilru nuam lo leh lungphu mumal lo reng reng a awm ai chuan kal hrang law law ila, ka nat dawn pawn na ila, tuar chhuak ila ka duh tawh zawk.

Ka sawi leh tur ngaichang a min melh ve ran tu chu thawk lak khum hapin, "Kan inkarah hmeichhe dang an inrawlh sek dawn ai chuan tawp zawk mai ang" ka ti ta hmak a, ka lungphu dawt dawt erawh in 'i tleirawl chhuah ngaihzawng hi i kal san hlen thei ngailo ang' tih min rawn hrilh zawm zat. Ka chapona thung chuan 'hmeichhe dang nen a rinhleh thei reng mipa kiang ah hun khawh ral tawh lo turin' min lo hrilh ve thung.

Ka duh ang ka sawi zo chu boruak a reh dûk a. Țawngkâ talin 'Ahmai a hmuh tawh dawn loh' tur thu tak ngial pawh a sawi thei lo chuan min ti na zual hle bawk.

"Babe, Ahmai chu thik lul lo teh, nuthlawi leh nghal, school khat chhuak kan ni a, kei lah doctor ka ni vangin mi hran hran ka hmuh a țul fo a, chung ka damlo enkawl te thleng a i thik zel chuan ka tan awm ngaihna a awm dawn hleinem, zanin pawh khan a fanu khawsik a reh theilo vang a min rawn hmu anih kha, thinrim tawh suh, ummm?" ti paha ka darah a kut pahniha a lo man chuan ''insawithiamna leh bawk" ti sap in ka lo phih thlak sak nawk. Damdawi in panna ah chuan ka chho tlang nal nal a, Dinpuia chuan beidawn hmel zetin min thlir zui tih pawh ka hria. A hna leh anihna chu hriatthiampui lo ka ni biklo. Thingtlang ah ngat phei chuan Doctor te hian ngaihlut an hlawh zual a, thlamuanpui tu lah an ngah. Marawh chu Ahmai min chet khum dan te hi 'țhian hlui leh damlohna avanga doctor hmu' vel mai mai ah ka ngai thei tawh lo.


Rilru ah kam tu nei țun chungin zan chu ka tluan ve leh ta mai a, damlo buaipui ngai lutuk an awm lem lo bawk, kawțhalo leh pumna vang a damlo an țha hnem em em thung, thingtlang nun ka hmuhsitna nilovin thingtlang lamah chuan duh angin thianghlimna kan la ngai pawimawh tawk țhin lo va, tunlai hian khawțhalo leh pumna a leng nasa zual a tih theih ang.


Zanrei thleng chu Dinpuia pawh duty room ah a rawn awm ve reng nain biak chakna ka nei miau lo a. Ka rilru damna tur a awm ai chuan insawifiah a la țum țang țang khan biak min ti chak hlawl lo bawk nen zingdar1 vel ah a haw thla ta hnu hnu a nih kha.


Zingkar a ka haw thla chu "Mate, i chau em?" tiin u Ngaihsaka'n min lo dawngsawng thuai a.
VC information center aţangin 'ration khawnvartui a lak theih' tih an au khawk rum rum bawk. Nimin lam ah la lo an tam viau em maw ni dawn ni.

"Chau ve det, ka zuk mu nghek teh ang" tia ka chhan chuan "Thingpui in phawt rawh, chaw ka thlak kep ang che aw" u Ditei zawkin a lo ti thuai a, reilote in ngaihtuah nan hun ka hmang zawk a. "Thlak kep lo mai rawh, mut rei ka duh dawn tlat" ka tih chuan u Ngaihsaka a lo chek hluk a.


"Chaw ei lo mai mai ching țhin lo teh, tuivai sangha rep ngat a sin kan hmeh dawn" ti bul bul chungin kawngkapui ah chuan a dak chhuak a. Thingpui hang inthlit ve pahin ka nuih zui hak hak bawk.

"Lat-lat, school kal hma in khawvartui chu han la ta che, i nau nen in ei tur Wai Wai i lei nghal dawn ania" u Dteii'n a tih chuan an fa u zawk Latlati lehkhazir zo chu phur deuh in khawvartui bur leh ration card kengin a tlan chhuak nghal a.


Kawmchhak hmeichhe naupang chu 'khawnvartui la ang' tiin a au nghal tung bawk. A nau Mateteii hian Ruatruat tih a lam fiah thiam loh vangin "au Latlat" a ti mai țhin a, a nau koh dan chuan kan koh zui ta vek a nih tak ber hi a.


Thingpui hang no dawmin leihkapui ah chuan ka chhuak phei a. Khaw chhhung ep ral lehlam a Tlang lianpui pahnih inkara Ni chhuak tur rawn de sawr sawr chuan khawtlang dung chu a rawn chhun sen deuh ruih a, Sava chiar ri nak nak leh khawvartui la tur a naupang in au thawm te, feh kal tur rual khat a inzui dam dam mai te chu thlir in thingpui sa țha ver vawr chu ka dawt khalh a. Veng khat a Bawng rual bú ul ul thawm leh zingkar ațang a Buh dengkhawl in her ri dut dut te chuan engtin maw tak hian lung a ti leng a, Aizawl ah hetiang thawm hi hriat tur a awm ngailo nachungin ka chhungte ka ngai rawih rawih thei nia.


"I va nguai bir ber ve, i u Ditei fiamthu kha i la thutak deuh em ni?" u Ngaihsaka Leihkapui lo chhuak phei ve chuan a rawn ti a. "Tlaivar ve ta țhak la kei aiin hmel i pe nguai zawk ang" ka lo tih let chuan, *naaah* hluk pahin ka bulah a rawn ding ve a. Nu Țhapuii a hrisel loh vangin fa dang a nei thei tawh lo a, u Ngaihsaka hian a naupan lai ata tawh unau a awt țhin hle a ni awm a, hetia pazawna ah a pa ka han neih hnu hian nau en tak tê in min en zui a. Ka nuța te nen an danglamna awm lo khawp in a nau ka nih zia a lan tir fo zel.

"Saw, kan Pasalțha-a pawh ram chhuak turin a rawn thawh chhuah leh tawh saw" tia a en na lam ka en ve chuan ka țang ru nghal țeuh mai.

Kan mi nelawm loh pa leh a nau Zotei te chu u Ngaihsaka te in pan in an rawn inzui phei a. An unau inkawm ngeih lutuk leh inzui tam țhin lutuk hi a tir ah chuan inngaizawng an ni emaw ka ti hial țhin. Ka hriatchian tak hnu ah erawh mak tihna bawk in ka khat a. Zoramchhana a nelawm loh tehlul nen a nau chu a hawihhawmin biak a nuam em em a. Unau piang hmun anni chu khawvel a thil rin harsa ber pawl a ni.

"U Ngaihsak, i vaihlo kha ka u pai tur hian ka lo zial sak teh ang. Hei, Hotupa hian kan vaihlo lei ve lah kha 'a ru lo' a ti nghut bawk sia, i vaihlo a ru tui thu a sawi sawi a, zial lehkha ka rawn in tum thlap" uZotei chuan rawn ti lang lang a, a zial lehkha ken chu a lek va va bawk.

"I u hi chuan min ngaisang ve hrim hrim a lawm, inchhung ah khan va en teh" nui huk hukin u Ngaihsaka'n a lo ti fiam ve a, u Zotei pawh inchhung lam ah zial thleng la turin a lut tlang nghal a.

U Ngaihsaka'n "Khawi lam ah nge?" a tih chuan ațhianpa pawn tha tak hian "Len deng pahin ka tei chhuak mai mai dawn" a lo ti ve bauh.

"Nikhat tal chu in lamah hian awm ve țhin te. Nge ni a, nangpui hi an sawi ang che hian Lasi i zawl tak tak roh ang a nikhat lek pawh hmu lo in i awm thei tawh lo zawk" u Ngaihsaka'n nui duh miah lova a tih lai chuan Zoramchhana pui chu a khi vei suk a.


"Zan len den i tum em?" a tih leh chuan Zoramchhana pawn "Thim hma a lo let ka tum" a ti sup. A chhang bul thei si.

Ngawi rengin an pahnih bulah chuan ka lo ding a. U Ngaihsaka'n titi khawchang an thiam tehlul nen a țhianpa hmek hmuk hi chu a fiamthu thawh ah pawh nuih nachang hrelo khawp a tak ngul a ni thung.


"Zan rei thleng lo ang che, zanin chu nula rim in ka chhuah harhpui dawn che" u Ngaihsaka'n a tih chuan rum zet in ka melh hrak a. A nui ruh ruh chu ben awk te ania ka duh ni.

"Nia, u Ngaihsak nangin i hruai harh deuh loh chuan engtik khawtikah mah vah te ka nei ve thei lo ang..." Zial thleng chawi chunga uZotei lo chuak mek chuan a rawn ti ve nghal a. Ani hi chu a nelawm in a hmelțha bawk si, biangsum a nei kalh zui a. A u nen an mize inang lo lutuk mawlh mai hi mak ka tiin ka khaikhin fo dawn chu a nih hi.


"Hei, ka nau hi mo a tan induh phawt chuan ka phalna thlap in țhianpa hian nei rawh se" u Ngaihsaka chuan a lo ti pek a, ka ngei lutuk chuan awm leh mawi pawh thlu lova vin chiam mai ka duh rum rum. Zoramchhana te unau hi awm lo se chu ka ti leh hrep ang.

"Ani te chu kan doctor-a sava note a lawm anih le" nui chungin uZotei'n a tih lai chuan tawite in ka lo nui ve a. Khua a mi te hian Dinpuia nen kan inkawp tih an hre fur a. U Zoteii’n min fiam nan a hmang pawh chu thil mak a ni hran lo.

Thutak zawk a u Ngaihsaka’n "Tak tak a, țhianpa, lo haw hma la, leihkapui ngawt chuan lovin thlanmual bula nu Hrilpuii fanu saw kan va rim dawn a nia" a tih lai chuan ka ngaihbel nge pawh ka hrelo, Zoramchhana chuan chiang zetin ka mitah min rawn rawn melh a. A mitmeng tak ngulah chuan han hriatthiam theih tur thil danglam engmah ka hmulo. Mahse, min melh chian em vang erawhin rei melh let ngam lovin ka hawi sawn rang kawp mai.

Phur hmel lutuk in u Zotei paw’n "Jenny maw?" a ti hliai a, "aw, ani saw kan khaw nula ah chuan fel ka tih pawl tak a ni, i u nen pawh an in mil phian ang" u Ngaihsaka bawk chuan a ti let a, Zoramchhana hmel awm dan chu hmu leh chak viau mah ila ka melh ngam tawh der lo.


U Zotei bawk chuan "Keipawn fel ka ti reuh a sin" a ti leh siam siam a "Țhianpa tan ka han fiam vel pawh in zuamawm ni miah lovin a huat bik loh zia a tilang ngam tlat. Bawhzui theih chu bawhzui rum rum tur, heti ringawt chuan kan leng rei dawn tlat" u Ngaihsaka chuan a ti khauh. Min fiam nan tak Zoramchhana a hmang tawh dawn lo a ka hriat tak avangin ka lo hahdam ve em em ringawt.


"Chutia kan khaw nula fel ber in mitmei a lo hmuh ve anih te chuan chhuah a thiang teuh lo" uZotei pawn nui var var in a ti a. An sawipui pa ber lah chu lungpui ang maiin a ngawi ngur roh bawk si.


Jenny chu kei aia u deuh nula fel zet a ni a, chhiat tawk an awm reng rengin chet a ngaih na na nâ ah a che zung zung a. Thlan lai te tui pe ah leh khawhar in riak lut turte mutna tur hmun hnawk thenfai kawngah a zuan zangin a che zung zung zel a. Hmeithai fa a nihna a inbawh beh tir duh lo a, dawrte a siam ve a, mi biang biak a thiam reuh sia, khawharin ah kal ve chang pawn mi lo be tlang nel hmasa tu ah a țang ngei ngei țhin.


"Chu, țhianpa nula rim tur kan neih chu aw" ti pahin u Ngaihsaka chuan Zoramchhana chu a thlek a. Muangchangin Zoramchhana chu ka melh leh da da a. Min lo la melh chiang hle leh nghal.

Reife ngawi deuh ngul a min melh run run hnuah, "a țha alawm" a ti ta sup.

[Abbra Reo Ririni]

Zoramchhana chhanna chuan ka lungphu a nghawr che dawt mai hian ka hria a! A chhan tur erawh ka hrethiam hauh lo thung. Min la melh deuh tlat bawk nen hawi sawn thuai pahin thingpui chu ka dawt khalh a. Ka lungphu lo phu rang nghal dawt dawt vang chuan ka sa pap pap bawk.



A u chhanna vanga hlim hmel takin u Zotei chu a ri zui barh barh a, ral lehlam a Tlang dung chu thlir daih mah ila engmah ka hmu pawh in ka hre lo. Zoramchhana min melhna mitmeng thutak leh muk ruih erawh kha chu ka mitthla ah a cham reng thung.



".... țha lutuk, u Ngaihsak, zanin chu len pui tak tak ang che aw" u Zotei mawlh chuan nula rim nachang hrelo a u in nula rim a duh ve ta chu a phur pui khawp mai.




Ka thawk lak a ran tak em avang leh keimah ah Zoramchhana mit chu a fu reng a ka hriat tlatna chuan awm a ti nuam lo, ka awm dan mak sak tak chu a langsar ta riau in ka hre tlat bawk. Ngawi rengin Leihkapui ațang chuan ka kal hrang ta daih a.



Ka pa te inchhung ah ka luh hma chuan tim deuh hian ka han leh hawi leh hram a, mah se chiang zet a min lo la en run tu mitmeng vang chuan ka hawi let rang khawp mai. 'Â lutuk' in ti rilru hlakin inchhung ah chuan ka lut ta daih a. U Ngaihsaka leh uZoteii te'n phur taka Jenny te in ah leng ngei ngei tur a Zoramchhana a fuihna ri chuan ka kawchhung a țham deuh țúng leh nghal.




Eirawngbawl a u Dtei lo che zung zung chuan min lo hmuh rual in zawhna neih ngah hmel deuh in min lo melh ralh ralh a.



"Eng nge?" ka han ti deuh ngawt a.



"Aaa.. insawi thawl i mamawh hmel em a" za vak lova nui pahin a Alu a chan mek chu a chawl a. Nizan a Dinpuia leh Ahmai te ka han hmun dan kha chiang deuhin ka mitthla ah a lo lang nghal uar bawk.



Thawk la hak pahin thleng silna lam ka pan a, no ka sil lai paw’n ka chezia chu chik deuh in U-i chuan min en tlat tho, "Ih, i.. i sawi ang khan Dinpuia In ah ka han hmu dun a. Uggg.. an lo chhuak tur nen kan intawk a" ti hap in melh hlei lo chuan kut hrukna chu ka ban a. Nizan ang chiah khan ka tha a țang leh vek tawh.


"Chuan?"


Kawchhung ipik zet hian ka han thaw chhuak leh hawk phawt a, nulat tlangval inngaihzawnna kawngah hian tawn hriat ka ngah lo in Dinpuia nen kan inkar a buaina awm neuh neuh ţhin pawh midang bulah ka sawi ngai vak lo. Mahse, tun țum erawh a dan a dang ka ti tak zet. Mahni rem hriatna hmang ngawt a chinfel theih a ni pawh in ka hre lo hial a. Mak takin țum danga hmeichhia ka thik țhin anglo takin Ahmai hi ka thik satliah nilo in an inkar ah thil thleng a awm tawh a rinhlehna lian tak ka nei tlat tawh a. Insawi thawl chu ka mamawh tak zet in ka hria.




"Ka hrethiam lo, an inkar ah thil thleng a awm tawhin i ring em?" ti paha u Ditei ka melh chuan chimawm fe a mit ti kang ak hian min lo nuih a.



"Ka rin tawh leh tawh loh a pawimawh lo, nangmah khan i ringhlel em?" a lo ti ta khauh.



"Aw. aih, aa, ka hrethiam lo" rilru insual buai deuh a ka thawk la halh chu dar ti-kang ak chungin 'rilru siam fel rawh' ti awm ang zia zang in min lo la melh ran zui.



"Diktak chuan ka ringhlel" ban phar hliai a ka ti chhuah phawng chu ka thawl zui hawk.




U Dtei chuan chaw ei dawhkan hnuai a stool chu pawt chhuakin a bulah țhu turin min mitmei zeuh a, zawi deuh a ka zuk țhu thla chu ka sam ah a lo chul pahin "Sawi zawm rawh le,” a ti zui leh nghal a.



"Sawi vak ngaihna ka hrelo, a chang chuan mi sawi vang a ringhlel ni te in ka inngai a, thikthu chhe lutuk lo tur pawh in ka inkhap ve fo. Mahse, hmeichhia ka ni a, an pahnih a ka hmuh dun hian chhungril ațang 'diklo a awm a ni' tih min rin tir tu hi a awm tlat. Ka mit hmuh ah mit ti kham khawp a taksa insi in an awm ngai pawh a nilo. Mahse..." ipik țeuh a ka tih lai mekin, "an inkar ah ințhian țhatna satliah nilo thil thleng a awm i ring tlat thung" u Dtei chuan a lo ti a, rilru tawt deuh chungin lu ka buk khum nghat a. Ka lungphu hian rinhlehna a phut pui tlat tawh.



"I rin theih tawh loh chuan țhen daih mai la.."



"Mahse, ka bialpa hmasa ber leh ka mipa duh hmasak ber a nia" ti let thuaiin thawk ka la leh hliai a.



" I nun a midang țha zawk lo lut tur hi rinna pumhlum i neih theih loh i zui lai vangin i hnawt bo mai mai lo maw?" ka sawi tur ka sawi zawh hma a u Dtei thil lo sawi vang chuan ka ngawi nghal hmak a, a thil sawi awmzia hrethiam lo deuh a ka en ha tak ah chuan nui sen sen in ka hmai bul chet ah a lo awm hnai a.



" Mipa țha zawk i tawn theihna tur hi nangmah leh nangmah hian i dang chat ni hian ka hre țhin" zawi tak sia a tih leh lek phei chuan a thusawi awmzia chu ka hrethiam lo tulh tulh a.




"Dinpuia hi ka tan a țha lo i tihna a mi? Hna țha tak a nei a, chhungkaw hlun leh..." ka sawi zawh hmain a lo inrawlh leh a, "Kawppui a tan chuan i hausakpui tur nilo, i retheihpui ngam thlang ang che. Rinhlehna rilru pu chung reng a kawppui tur nilo, i thinlung zawng zawng a hahdam tak a i rinngam mi chiah pasal a tan neih tum bawk rawh" zaidam deuh a tiin uDtei chuan min thawh san daih a. Ka thaw chhuak hawk ringawt.




Ka thil sawi chhuah dan kha a dawngsawng fuh lo in ka hria. Dinpuia hi a hausak vang a ngaizawng ka nilo a, star neih awmzia ka hriat tirh te ațang star a, amah chiah vei chho țan ka ni. Chutak chu țhen harsa ka tihna chhan pawh a ni chiah reng bawk. A mah ni lo ngaihzawng ang turin mipa dang in ka ngaihtuahna an la luah chhin ngailo bawk.




"Hetah chuan i ei ve lo ang maw?" ka țhut ngawi reng lai chuan a lo ti leh a, harh chhuak thut in ka ding zui ve zat a.





"Aih, ei lo ang, ka zuk mu teh ang"




"Ok ok.. ka thusawi vang khan thinrim suh aw. I duh leh chance pe leh la, i rinhleh angin Ahmai nen pawh an lo awm kher lo mai thei a sin" nui var var hian a ti a.




"Chu chu i ngaihdan a ni tak zet em?" ka tih rual chuan keimah leh keimah chu nep ka inti rilru kher mai. Dinpuia ka lo atchilh zia leh hmeichhia chu kan duh tawhte lakah chuan kan lo tlawm theih zia ka hre thar rawih rawih bawk.




"I hlim a lawm kan duh ber, i tleirawl chhuah ngaihzawng hi i tan engtiang tak a hlu nge a nih ka hriatthiam pui ve tho che. Mahse, rinhleh ngai reng a a awm dawn chuan țhen mah la ka pawi ti lo zawk" ka rilru tur hrethiam tak hian a ti leh a. 'Tun chiah hi ka ngaidam anga, a hnu leh ah chuan ka rilru ti nuam lo thei zawnga a awm leh chuan harsa dawn hle mah se ka țhen tawh tak tak ang,' ti rilru rauh rauh a haw tur a kawngka lam ah ka inher chiah chu, Zoramchhana lo ding run nen kan inhmachhawn ta siah a. Thawk ka hip let kawk hial bawk.



Kawngka pui ah chuan a ban lianpui kuangkuah meuh a dingin hriatthiam harsa zetin min lo en run a. U Dtei nen kan titina kha a lo hre vek ang ngem? tih ka ngaihtuah rual leh lek phei chuan Dinpuia țhen harsa ka ti lutuk chu min nuihzat ru dawn a hriatna ka nei ta tlat bawk a!




Eng a mah hma a vin hrep tum a ka ang ziau chu, a thu lo sawi vangin ka tawp leh chawt a. Kan thusawi kha lo hre ve turin duh lo em a ni.




"Dte, thingpui hang i la nei em?" ti thum sup in a rawn pen lut a, a mitah pawh en ngam tawh lovin rang takin ka kal chhuak nghal nal nal..



'Kan thusawi kha a hriat vek chuan min nuihzat ru ngawt ang' tih ngawt ka ngaihtuah zui a. A mipat pui laka ka tlawm lutuk chu mipa dang tan chuan thil nuihzatthlak tak a ni dawn tih lah ka hrechiang ropui bawk si. Rilru a ipik zual khawp mai.




"Mate, hetah chuan i ei lo ang maw?" U Ngaihsaka'n kawtzawl ka thlen rualin min lo zawt ve leh a.



"Aw.. ka.. ka zuk mu a nge" ti sep in ka nuih lui a, thingpui no dawm chunga Zoramchhana lo chhuak ve chiah chu melh pawh melh duh tawh lovin step tuk chawp rem lo zet ah chuan ka chhuk thla nghal hlawk hlawk.




"Buh kung a țha bawk a, kumin chu buhseng zawh ni ah tal in lo thawk ve ang chu" Zoramchhana'n a ti thum dut ri leh leihkapui chhuat a leihkapui ler lam pan a a ke pen ri te chu ka hre thei vek. Ka kawngka hawng tur chetla vel min hmu vek thei tur te chu ka huphurh ru hlur bawk.




Chawhnu dar 2 pelh ah ka muhil chu ka harh hlawl a, ka rit deuh luk kha ka lo zang hawk tawh, ka lukham bul a ka phone dah lo nghawr dar dar chu ham hak pahin ka ban a. Screen-ah chuan Dinpuia hming a lo lang a.



"Ummm"



"I mutui viau a nih ka ring, call i chhang theilo em mai" nuihza aw lek lek a lo tih chuan ka thaw hak ringawt.




"Kawngka hi lo hawng la, damlo en tur tlansan in ka lo kal ve em em a, hmulo che a let leh ka tum miah lo a nia" a tih leh tak ah chuan phone chu ka ti tawp a. Ka sam hnawk chul mam sawk sawk chunga mut pindan ațang ka chhuak chu ka ding leh chat a.




'Tun țum chiah hi ka ngaidam tawh ang' ti a in hum ruh sauh sauh in kawngka pui chu ka pan a, 'nupui pasal a tan first love te hi tuman an nei thei ngailo' an ti țhin a, Dinpuia nen kan han inngaihzawn chuah khan, mite thusawi zawng zawng a dik vek kherlo ti fiahtu ah țan a, ka first love(ngaihzawng hmasa ber) ngei pasal a neih tum nghet bur kha ka ni. Ka thil tum tih puitlin ka duh luat ah hmeichhe dang ka thik chang pawh in ka thikthu chhe satliah ah ka puh lui zel țhin reng a…




Kawngkhar ka hawng chiah chu a chal zawnah phone lek kangin Dinpuia chu a lo nui sak. Ngawi rengin kawngka chu ka nam zau a, a lo luhna tur a ka tawlh sawn rualin ka biangah lo piai zauh pahin a lo lut ve nghal a.



"I chau em?"



"Aih" kawngkhar pawtphui pahin ka ti let nghat.



Thaw chhuak ham ham pahin hnunglam ațangin min rawn kuah a, ka tal dawn tih hrelawk in nghet zetin a awm ah min hnuk bet nghal hmiah bawk.



"Babe, nuthlawi mai mai chu thik tawh lo teh" ti sup a ka beng hnuai a lo fawh chuan ka ner nang mai.




"Nuthlawi mai mai chu ti kher lo teh" ka tih hlak rual chuan a lo nui lum hawk a. Ahmai nen an inhmuh in ka lawmlo a ni mai thei. Mahse, nuthlawi a nihna ang zawng a sawi zui kher erawh ka țha tih zawng a ni chuang lo.





"I haw viau emaw tia"



"Ka haw zawk che" ka ti chu min kuah nghet zual sauh a.




"Dinpui, ka hi ka ti țhin che a lawm. Ngati nge.. engati nge hmeichhe dang ka thik theih zawng hian i khawsak leh țhin a?" thinrim zet a sawi chhuah ka tum nain ka țah a rawn chhuak ringawt nia..



“Ka lakah lungawilohna i nei ang tih hlau reng rengin ka awm a, mipa phei chu ka be lo tawp! Hmeichhia mah ka kawppui tan ka invawnfihlim theih lai a mipa zawk... chupawh kum ah ah pawh kei aia u zawk hian i theih ve ngai miah lo..." ka sawi zawh rual a rilru nat luat vanga ka mittui lo luang thla lum pap chu duhlo zetin ka hru thuai a. Dinpuia pawh chuan min kuahna thlah thawl in amah en turin min kuai her thuai bawk.



A hmelțha zet a inthiam lohna lo lang ka hmuh theih rual chuan ka kawchhung lo tawt zual sauh in ka hrawk a na ut ut a. Ka țhen dawn lahin ka duh em vangin ka thei ngai bawk silo, a lak ațang hian phut ka nei tlem lutuk, amah chiah ka ngaihsak ang hian min ngaihsak in hmeichhe dang tel ve tawh lo se tih zawng a ni ka phut.




"Min en teh" tiin ka khabe ah a rawn dawm a, a kut lehlam in ka biang huh chu a tuai hul thuak bawk.



Ka mitah tak min en chuang a "Min nei rawh" a tih takah chuan ka melh kawk mai.




"Hetiang boruak kan tawng chung hian ka nei ang che maw?" ka ti a, Dinpuia chuan ka hmuiah a kutzungchal lo nawr si in dam thlup in min en a, "Babe, ka hria... Thingtlang ah chuan thu leng vak a tam țhin, mite thil sawi i hriat hian a tina tam tawk tawh che, mite sawi ang leh i mi rinhleh ang hian ka awm ngailo tih chu min nei la, inkhat ah cheng dun ila, i hrechiang zawm zel mai ang" tia ka biang a lo dawm chuan ka thaw chhuak halh ringawt.




"Khawngaih in... nupa kan nih hunah chuan inkhat ah kan cheng dun ang a, hmeichhe dang ka mamawh loh zia i hre mai ang" dam zet a a lo ti leh chuan atthlak lutuk ka ti dawn nge, mak lutuk tak maiin a rawtna chu a țha dawn a hriatna ka nei teh tlat nia!!





"Kan inneih hnuah ka thik tur in i khawsa ngailo ang tih i chiang em?" ka tih chuan nui var varin mit min siai a.



"Tehreng e! I u nen ka ngam nang che u" uang zet a atih tak ah chuan ka nui chhuak ve ta hak a.



Tlai lamah chuan ka pa te in ah zanriah ka ei chho leh dawn a, chhoh hma in ka inbual sar sar a. Dinpuia thusawi te kha ka ngaihtuah let rauh rauh bawk. Kum tawp ah christmas hmang a kan haw thlak hunah inneih kan duh thu ka chhungte hriattir a, an ni remruatna angin kum thar lamah chuan innei mai tawh ila a ti kha a nia.




Amah chiah ring a, midang thusawi vang a thik tur zawng ngawt țhin lo tur te in min chah a. Nuthlawi leh nghal phei chu kei min phatsan nan a hman ngai loh tur thu a sawi uar hle bawk. *Nuthlawi leh nghal* tih a sawi chang erawh in ka lo tîm chawih zel. Hmeichhia tute mah hian nuthlawi nih hi an thlang hauh silo a.



Ka pa te in pan a ka chhoh mek laiin YMA information center ațangin chhiattawh thu an lo puang a. Zanin ah ka tlaivar ve thei loh paw’n mitthi in ah kal ve ngei chu a ngai ang.




"Pi Ziki chu a upa ve tawh bawk em a ni, na tuar rei lova a kal ta chu lehlam kawng tak chuan a lawmawm mangnge." Pa Khawla'n a ti chuar chuar a. Zoramchhana sangngha hring man ngei mai an chhum han chu hmeh in zanriah chu puar el euh in kan ei a.




"Mate, i duty dawn lo tiraw?"



"Umm, mitthi lu menna ah chuan kal rual ila?" Ka ti a, U Ngaihsaka pawh chuan tlaivar kher tlin loh pawn kal ngei a duh thu a sawi ve luam a.




Ka Thleng sil zo in phone ka en chuan Dinpuia message a lo awm va tawh.



*zanin chu ka lo sawm ang che* tih hi. Ka beisei lo bawk nen ka nui chhuak hak a. A chhan pawh amah chiah doctor awm a ni si a, mitthi lumenna ah hi chuan a kal ve hman ngai meuh lo. Chhun lamah erawh reilote tal a lang ve ziah țhin thung.



*ok, u Ngaihsaka te nen i zui ang u* ka ti let a.



In ațangin a lo chhuah mek thu a sawi chuan nui var var in phone chu ka ak țha a. Nghal zet a u Dtei hrawk thian lui kharh kharh ri ka hriat takah chuan a lam chu ka hawi thuai a.



"In inbe thei ta a mi?"




"Aw, kum tawp a kan haw hunah hian inneih chungchang kan chhungte bulah sawi ang a ti a " ka tih chuan mak tih hmel deuh in mit a ti kang ak a.



"aaa. innei ila, thu leng vak tam țhin lutuk hi a diklo tih i hrethiam mai ang a ti " ka tih tak ah chuan u Dtei chuan rang zet in a mak ti hmel chu a siam țha a. "A sawi dik ang... i damchhung kawppui tur ani a, thu tlukna dik lo i siam lo tur ah ngai ang" a ti ta duah a.




Chaw ei kham thingpui hang kan lo in mek laiin Zoramchhana a lo lut hlawl a, 'mitthi kan neih vawngin Jenny a rim thei dawn lo a ni maw' tih chu ka lo ngaihtuah daih a. Atthlak ka ti leh huhnawh viau.



"Țhianpa, mitthi lu menna ah chuan kan kal ve ang chu tiraw?" a rawn ti lut a.




U Ngaihsaka pawh chuan kal kan tum thu hrilhin lo țhu phawt turin a ti a, kawtzawl a In lam pana Dinpuia lo kal mek ka va hmuh rualin "u Ngaihsak ka zuk insiam ang e, min lo sawm thla ula aw" ka ti nghal a, ka chhuak chu Dinpuia pawn min lo nuih var var a.



Zantir lam a la ni rih bawk a, nu leh pa lam chu mitthi in panin an inzui nak nak a, veng kar a inhlat lem loh vangin mitthi in a zai ri pawh quarter ațang chuan a hriat phak a. Pindan ah ka insiam mawlh mawlh a, Dinpuia erawh țhutkhawmna lamah a țhiante bia in phone a hmang thung. Kawr ban tluan dum ka ha a, ka sam rangkachak rawng sei tak chu thlah hnapin puan dum ka bih leh a. Kawmchhak lama u Ngaihsaka te țhian dun lo inzui thla thawm ka hriat tak ah chuan ka lo huphurh leh hnuhnawh khawp mai.




A chhan pawh a vawi khatna atan Zoramchhana'n ka inchhung a lo hmu ve dawn. A lo len luh hlau reng rengin ka awm țhín a, tunah lah lo dan țûngna chi a ni mang bawk silo.




"Thla chu a eng kher mai" u Ngaihsaka chuan a ti bul bul a, room ațang chuan ka chhuak nghal vat a, an lo luh hmain ka inchhung chu ka lo melh kual chiam chiam a, eng ka hria chu ni maw.




"Zan tir chu nu leh pa lam chan a ni bawk a, Dinpui, zan rei hmain Ramchhana hi nula kan rimpui dawn em ni?" U Ngaihsaka chuan a lo ti lut dut dut a. A hnung a Zoramchhana lo lut ve mek chu tumlo deuh in ka lo melh uluk mai bawk si nen, u Ngaihsaka thil sawi vang chu nge a ner deuh sak a.




"E, kan valsenior berin nula rim a duh chuan kan kal pui rum rum mai ang chu" Dinpuia pawh chuan a lo ti ve hluai a.




Min kal pel a ka țhutkhawmna pindan lian lo tak țhutna ah Zoramchhana a zuk țhut meuh chuan ka inchhung chu ka hmu te rawih rawih mai a. Amah pawh chuan ka inchhung chu a thlek kual thuak a, a pa lianin a rothap bawk nen nu zet a ka inchhung chei chu a lakah chuan Barbie in a ang dawn hian ka hre deuh tlat a, pindan kawngka bula ka ding ngawi reng lakah chuan a mit chu a lo tawp nghal chat bawk.




"I in chu a nawm hi" ti chunga a nui suk chuan mak ka tih em vangin ka kâ hau lo chauh chu a ni. Biak hmasak ngailo in a țawng ve mai bakah ka inchhung a fak ve ngial leh nghal. "Ka lawm e" ka ti let sap a. A mit bul a vun chuar lang a nui suk pahin a bu leh nghut a. Khawvel a ka mipa hmuh tawh a zawng a nelawm loh ber leh țawng mawh ber in ka inchhung a fak ve vang leh, a thusawi a rintlak hmel bik em vang teh pawh a ni tel bawk ang, ka hlim ru veng veng mai a ni.




" Ramchhana chuan tu nula nge rim a duh deuh a?" tia Dinpuia'n a zawh leh laiin an bul lamah chuan ka zuk țhu thla ve thuai a.




"Jenny-i saw, i hria em? Thlanmual bul a nula chhelo deuh saw" u Ngaihsaka'n a tih laia Dinpuia'n "Hmeithai te kha maw?" a ti leh tawl chu ka ip pui chawi a. A tiawmlo thei fek fuk a nia.




"Aw, kan khaw nula ah chuan a fel in kan chhuang teh mai a nia" u Ngaihsaka chuan țha deuh in a ti let mai a. Zoramchhana erawh a ngawi leh ngul tawh.




A hmanhmawh thlak lem loh bawk a u Ngaihsaka leh Dinpuia chu an titi leh luam phawt a, an inhre țha ve tawh a, u Ngaihsaka hi pa titi thiam ani bawk nen tupawh a kawm thei vek zel. An ni pahnih titi kar lak ah Zoramchhana'n a lo telpui ve zauh chang chuan ka lo insangmar țeûh zel a. Barbie in ah beast lianpui țhu run hi ka tehkhin deuh tlat pek. Dinpuia ang lo takin branded thuamhnaw a inbel ve lo a, cotton kekawr dum leh jacket mawl-mang zet a inbel tawp. A snickers bun thar vak tawh lo ka melh zeuh lai chuan a kê chu a chet hrut a, inthiam lo zet a ka hawi chhuak leh a mitmeng hriatthiam harsa zet kan in melh fuh leh siah takah phei chuan, ka inthiam loh lutuk vangin ka țhutna ațang chuan ka kang awk lo chauh. Zoramchhana erawh in a kutphah pahnih a chelh kawp chu melh in a țhu kun ta daih a. Ka hrehawm tih zia chu aw..




Zan dar9 pelh ah ka in luah ațangin kan inzui chhuak a, thla chu a lo eng ngang mai. Dinpuia chuan ka kut a hum a, a khat tawk a ka hawi chhuah chhang a Zoramchhana nen kan mit intawng fuh thei lutuk chuan awm dan tur min tihrelo lek lek zel.




Mak deuh chu Dinpuia bul a ka awm hian min uap ang leh min dip run angin ka hre ngailo. Zoramchhana ka kiang hnai ah erawh ka țang ru ran a, a pa len em vang te pawh a ni ang kan inhnaih deuh chuan a taksa ațang a lumna lo chhuak hian min ur a, aaa.. min uap sa hut hut zel chuan ka nel theih loh phah ti ila a dik ber ang.





Jenny te in panin kan inzui phei a, mipa ho titi na kara Dinpuia țawng kam țhenkhat te vang erawh in ka lo ip leh chai țhin. Retheihna awmzia a hrethiam ve miau lova. U Ngaihsaka lah sawrkar hna thawk ve tho anih vangin Zoramchhana tan sawipui ngaihna awm lo sawrkar hna lam a sawi leh nulh nulh zel a. An kiang a palian pui ngawi reng a kal hian nuam lo a tih palh ka lo hlau ve em em mai a ni.




Tlaivar pui ah Jenny kan va sawm chu zangkhai fe in min lo dawngsawng a, U Ngaihsaka sawi ang tak tak khan Zoramchhana a duh tih chu Zoramachhana hmel a hmuh ruala a biang tai nghal tek ah chuan a chiang khawp mai.




"E, kan Doctor leh nurse te meuh an lo tel ve khup khup a, inva hlauhawm ve" a lo tifiamthu a.



"An țhianpa damloh chang a enkawl tu tur an rawn zawnnpui anih hi" u Ngaihsaka pek chuan a ti mai a. Kan nui ho dar dar a.



Jenny te in ah reilote kan țhut khawmuan hnuin mitthi in pan in kan in zui chhuak leh ta a. Jenny a tel ve ta bawk nen Dinpuia pawn ka kut a hum tlat tawh biklo.



"I tlaivar ve ang em?" Jenny chuan min nel zet hian a rawn ti a. A fel ka tih tawh kha.




"Ka tum ve deuh a" ka tih chuan 'kan tlaivar dawn nia' a ti zui siam siam a. Mitthi lu menna a kal tur țhalai dangte pawn min rawn pel nak nak hlawm.



Nakin deuh ah Jenny vek chuan "Awi, u Ngaihsaka hian a tih tak tak pawh ka ring lo a, u Ramchhana ka hmu tel thut ka lai lutuk kha ka che chhia em?" Ka beng bulah a lo ti sar sar a. Uang zet a nuih pahin "I biang lo sen țan țan kha chu ka hmu chiang mai a" ka han ti chu zak tih hriat lutuk in ka banbul a lo hmer vak a.




"Ka lai chhe zo vek a lawm... chhelo ka tihna a rei tawh sia, kan in ah a lo lan thut kha ka beisei ngamlo hrim hrim"




''Chhelo a?" Zoramchhana leh chhelo tih chu inhmeh lo ka tih lutuk vang nge ni, ka lo țawng ring deuh aniang mipa pathum te chuan mi lo en țhap leh nghal a. Jenny lai pheng chuan ka banbul a sik pilh lo chauh.





"Nangni pahnih kha lerh suh u aw" nui suk in u Ngaihsaka'n a lo ti a. Ka ner khum nang nang chu Zoramchhana bawk in min lo melh chiang leh hle tawh.




"I lo awmna a la rei vak lo a, Ramchhana hi i la hrechiang hman lo a nih hi, amah hi police SI ani țhin a lawm, a hot thei rapthlak" a tih chuan chil ka hak lo chauh! Mak ti fe a Jenny ka en chuan kan Mipa lamin kan thusawi chu an lo hre pha ang tih hlau zet in lu a lo bu a.


Zoramchhana hi POLICE SI maw a nih a?



" mahse...." ka ti hman țawk "Kum5 kum 6 vel kalta ațang khan a ban san daih a lawm, khaw mi te hian 'engati nge a bansan' kan hriatpui lo. A hna kha a tuiin nuam a ti em em a, uniform thuam famkim a inbel hmu phei la chu..." Zoramchhana a duh zia chu thup tum eng ang mah se a hmeichhiatpui leh a nelh tawh lakah chuan a inthup thei bik ngang lo a ni ang e.. ka ban bul a sik leh chawi țhin a. Kei erawh ka thil hriat zawh tak chiah te khan min țhawng em a, ka ngawi zui ngut ngut mai.




Hei vang hi em ni ang u Ngaihsaka'n 'Ramchhana hi i rin ang a nilo a nia, amah hian thawnthu tam tak a pai a sin' a tih leh țhin. Engati nge police SI hna meuh bansan a thingtlang hmun chengkerh lutuk ah kut hnathawk a ei a zawn tak mai le?


If you want to be ORIGINAL,
be ready to be COPIED

[Abbra Reo Ririni]

Thingpui lumna kan thlen rual a mipa thawm kara hmeichhe lo nui thler deuh duai ri ka hriat chuan ka ner sak mai. Ahmai pawh a kal ve a nih dawn chu. Mei an lo chhemna, Dekchi lian zet ah thingpui an lo chhuan khuk vung vungna zawn kan thlen rualin Ahmai chuan "Apa Dinpui in lo kal ve elo?" a lo ti ta chiah a.



Min vengthawng deuh in Dinpuia pawh in "a nih hi, intlaivar dawn em?" a ti let ve bauh. Mak tak maiin Dinpuia leh Ahmai te inbiakna ai chuan tun lawk a Zoramchhana chanchin ka hriat khan ka rilru a luah zawk tlat nia.




'Eng thil in nge hna țha lutuk chu bansan tir ang le’ tih te chu ka ngaihtuah kual a. Kan inhriat hun chhung la reilo viau mah se mihring rilru nghet tlut ani tih ka chiang tawk. Chhan țha tak tello chuan a hna tui em em, police SI meuh dinhmun chu a bansan ka ring lo. Chu chhan țha tak chu engthil nge ni ta ang?



"Luh tak tak hma in zun ram thiar pahin zial zu phawt ang u" u Ngaihsaka'n a lo tih chuan Jenny paw’n zun pui ah min sawm a. Hnial lovin ka zui ve zel. Zunin siam tho mah se tlangval rual khat zialzu in an lo ding khawm tuau a, chu lam chu pan lo in mitthi in thlen hma a huan zawl lam ah chuan kan inzui thla a, kan mipa te paw’n thingpui lumna bulah ding in zial an zu a. Dinpuia leh Ahmai te kha engtin nge an inbiak zui tak lah ka hre der lo




Jenny'n "I zung ve duh lo em ni?" tia min lo zawh chuan "Aih.. ka lo nghak ang che" ka ti thuai a, ka thlang deuh Theihai kung buk zet lam chu a pan thal ta a. Ka naupantet ațang tawh chhuah vahna a zun-ram thiar tawp hi ka thiam ve lo.




Thla a en em avangin kan piah tlang-dung in zar pharh dul chu a lang chiang khawp mai. October thla tawp lam anih tawh vangin khua pawh a vawt țan hle tawh a. Thli thaw heuh heuh in ka sam a lo chhem len hui kiang paha ka hawi kual chuan mit la deuh thil ka hmu a.



Zoramchhana chu tlang lam thlirin kawngsirah lo ding run a, a hmel rorum zet chu thla eng in a chhun hlim deuh duk a, a taksa lian leh hrawl zet lang chiang turin a lo inkuangkuah run bawk nen, khitiang leh lutuk a rammi ang a rothap zet a alan hmaa a hmel chu ka hmu ve chak ta hial mai. Ka ngaihtuahna tehhrep chuh! (?)




Ka enlai reng chuan thawk la hawk pahin a kut kuangkuah hlun chu a phelh vut a, a kekawr ipte a zen zui a. Reilote hnu ah lighter talh țek chhak chhak in Zial a țan a, Van lam chu Zial pak chungin a thlir chho vung vung a. Mak tak maiin ka chhungril ațang chuan he mipa, pumrua ah pawh tumah khin tham loh khawp a lian leh rilru nghet hmel tlet tlut lutuk hi chiang zawk a hriatchian chakna a lo awm ta tlat a. Lungleng hmel taka a zai țhin te, nuih dan thiamlo ang mai a hmel rum ul pu chung a hun a hman ngawt chhante hi engtik ah emaw chuan ka la hrechhuak khawp ang.





"I zung ve lo ang maw?" tia Jenny rawn țawng ri ah chuan rang tak in ka hawi sawn thuai a, nichin mai ațang khan ka awm dan hi a diklo deuh hu tawh.





"Aw, i zo tawh em ni?" ti thuai a ka nuih chuan "Umm, chho ang, luh har chuan țhutna kan chang lo palh ang" a lo ti ve a, a nuih sen sen țhin vang tak hian keipawn ka ngaina zual hle. Thau tia sawi tur nisilo in a khal vei tal a, a mawngbawr vawng lah chu a puan bih chhanah chuan a langchiang nang bawk. Kan chhoh lamah chuan "I chhungte i ngai ve țhin em?" a han ti a, a nui deuh bawk.





"Ngai ve bawk e, inkal pawh hi a harsa sia" ka ti ve niah niah a.




"Doctor Dinpuia nen hian in fakawm ngawt mai, khawpui lamah insawn dil lo a kan khua ah in awm duh hi kan lawm takzet bawk a nia" a ti leh siam siam a, chhan let vak ngaihna hrelo in lu ka lo thing nar nar a. Chhak lam thlir paha ka beng bulah, "A chhiat loh zia khi" a rawn tih sep chuan tu chanchin nge a sawi ka hrechiang lutuk. Jenny chu ka nuih sak ringawt.





Jenny nen kan inzui chho hnak hnak chu a mit sirin min rawn hmu thawi tih hriat takin Zoramchhana pawh chu a lo hawi thla ve a. Jenny chuan ban a han vai zeuh a. Zoramchhana chu a lo nui suk nia mawle! (?) Ka ner ru deuh nang a, a nuih khat tehreng nen Jenny bulah chuan hote te vangin a nui fo dawn in a ang ta riau. Vel lutuk chuan a.





"Kan nula te pahnih chu in inpeih tawh maw?" U Ngaihsaka'n a lo ti thuai a, ka beisei loh deuh a Dinpuia nen an lo ding dun chuan min ti phu deuh awk! A chhan pawh an chhak lawk ah Ahmai a awm ve reng a, ani nen an lo inbiak ka rin vang a ni.




"Kan lut tawh mai dawn mi?" ti paha kawngpui ka pen chho tur chiah chu ka lei rah chu a phut sut, ka kê chheh a buai nawk a, mah se ka petek tur chiah chu ka ban rek ah nghet fahran a lo man tu awmin a taksa chuan ka che lawih tur min lo dang zui hmiah bawk.




Hlauthawng fe a ka hawi chhuak chu hriatthiam harsa fahran a min lo melh chungin Zoramchhana chuan, "i intina em?" tiin min lo zawt thuai a. Min man hman khawp a a lo che chhuak rang chuan min țhawng khawp mai. Hamhaih luatah bah niah hian "Aih.. ih ka țha'' ka ti a, "I kê kha.." hnuai lam bih a a tih leh sup chuan ka inthlek ve thuak a.



"A na lo.. ka țha" ka ti bah leh nawk, chutah lu bu nghut in ka ban rek a humna chu a thlah a, min hlat in a tawl sawn zui mai bawk.





"Babe, i in bilh lo maw?" Ka ban bulah lo man paha Dinpuia'n a rawn tih chuan nui lui var var in ka nat loh thu ka sawi leh a, ka rah sual lai kha ka thlek let chuan khaw ro țan tawh vanga lei chim awlsam lai tak ka lo rap tih ka hre chiah.




"Khit ket țhin che hian, fimkhur tawh rawh aw Nau-i" nui chungin Ngaihsaka'n a lo ti ve bawk. Tawi te a ka nuih chuan,
"Lut ang u" a tih zawm leh zat. Zoramchhana pawh in a zial zuk tawi tawh tak chu si leh kawk in zial bung chu lei phut ah a paih a, rap hlum leh te te in a jacket hak a pawt mar pah bawk. Jenny nen inkhal fal tur a kan ruat lawk sa tawh vang nge ni; Jenny bulah chuan "lut ang u hmiang" a ti a. An pahnih chuan hma an hruai a.




Thingtlang nun hi a chang chuan khawpui lam aiin a hahdam thlak zawk fe hian ka hre țhin. Khawpui ah chuan țhenawm in insi reng a khawsa te pawh kan inhrechiang tawh lo a, țhenawm ah boral an awm pawh in nitin hna țul thawh chawlsan miah lo a sum leh pai umna in kan intlansiak a.



Thingtlang ah erawh chhiattawk awm se, khawtlang in awmni kham in ni khat tal chhiattawkte in lamah mipui kan tel ve țhin. Chhung leh khat, vuang leh va ngahlo tan pawh chu tluk a thlamuanthlak dang chu a awm thei in ka ring lo.





Mitthi in pan a kan inzui phei lai te chuan ka hriat loh karin ka banrek chu ka tuai leh țhin a, ka tlu sual tur a kutlehlam chiah ngawt a hnehsawh lutuk a min man thei kha mak ka ti. Kan hma a Zoramchhana leh Jenny te kal dun chu ka melh leh zeuh zeuh țhin a, Zoramchhana erawh chuan tun lawk a thil thleng kha a hrezui tawh pawh in a lang lo. A bula kal Jenny nen chuan eng emaw sawiin an hlim dun hmel phian, Inchhungah chuan mipui an lo țhahnem ngang mai, nu leh pa țhenkhat pawh țhalaite hmun kian in an lo tho chhuak țan mek a.




"Dr Dinpui, in lo kal ve thei a ni maw?" YMA hruaitu pakhat in a lo tih chuan ka lo inhumruh nghal țeuh.




U Ngaihsaka chu mitmei in ka zai ralh a, mitmei a min zai letna ka hmuh rualin țhalai țhutna hnunglam panin Zoramchhana leh Jenny te nen chuan an inzui nghal a. Zoramchhana a țhu fel in chiang tak a min lo en chuan hawi sawn nghal vat in Dinpuia lo be tu pa in țhutna min khawhhmuh lam ah chuan Dinpuia ka zui phei a, thingtlang a la ni bawk a, mitthi lumen zanah doctor meuh an han lan ve chuan, khawtlang hruaitu lamin an chiauau bik deuh a, hruaitu lam deuh te kiang ah an țhut tir ve mai zel. Dinpuia hian a sawisel ngai lem lo nangin kei erawh chuan langsar lutuk a țan chu ka nuam tih zawng a nilo.




Zan a rei chho tulh tulh a, zaithawm pawh a țha in kan zaitui tlang hle a. Mitthi tu leh fate țap ngai ngai thawm chuan lung a kuaiin ngaihtuahna a vak thui duh hle. Pitar leh putar te hi țhalai leh kum naupang deuh te tan chuan kan chenpui rengte ni mah se an hlutna hmuh loh palh mai a awl a, lungleng ve thei an nih lam reng ngaihtuah pui lova chenpui mawl tawp pawh a awm theih viau in ka ring.



Tunlai khawvel changkanna te hi an tan chuan hriatthiam a harsa tawh dawn a. Phone khawih a an bul lawk ah ngawi reng a kan awm changte hian; kawmhlimtu mamawh deuh in an tu leh fate hi min thlir ru vawng vawng țhin ang.




An han boral chiah hian inchhungah lo țhu ve mai mai leh thunlai khawvel mil a kan inchei chang a min khap rengtu ang a kan ngaih laiin, an hmunruak hnutchhiah lo zau zia kan hrechhuak ve leh chiah țhin ni te in ka hria a, keima tawkah zanin kan mitthi chuan ngaihtuahna min hruai thui sak viau.





Zanrei a YMA lamin arsa sawhchiar an lo sem meuh chuan ka dang ro tawh zia ka hrechhuak a. "Zanin chu zai a nuam reuh hle mai" Dinpuia pawh in a ti ve ngei, arsa sawhchiar plate leh thingpui chu a ban a. A sawi dik chiah. Hla chang sawitu in a sawi thiam bawk nen zailo a titi mai mai kan awm hauh lo.





Sawhchiar leh Thingpui an lo sem tak ah chuan zai chawl lai a nih vangin ring vak lo a titi thawm pawh a awm mam mam. Sawhchiar sa lutuk chu chawk dai pahin ka hawi chhuak a, ka thil va hmuh vang chuan engtin mawni hian ka awm dawt mai. Mit lak sawn leh nghal ka tum ngial a. Mahse, ka thil hmuh chuan min thawngin mak ka tih luat ah ka melh ngat ngat tho.





Zoramchhana chuan a sawhchiar tih daih sa chu Jenny pe in Jenny plate chawi chu a laksak a, lungawi hmel zet in Jenny chuan a nuih var var a. U Ngaihsaka erawh an țhutpui dangte nen an titi a, Zoramchhana leh Jenny te chuan chimbuaitu dang an neilo.




"Babe.." ti sup ri ah chuan ka hawi let thuai a. Dinpuia chuan uluk zet in min lo en reng tawh, ka tih ngaihna hrelo chuan "Ih..." ka han ti deuh ringawt a.




"Tui i tilo em ni?" tiin ka ka plate chawi lai chu a lo melh zeuh bawk.



"Aih... ih, a sa deuh a.. a ei theih tawh" ti sep in engmah ngaihtuah dang neilo ang mai chuan ka ei ve ta mai. Ka mitthla ah erawh Jenny ngaihsak taka Zoramchhana che lai kha a cham reng a. Zanin zet zawng; hepa leh a chanchin hian rinloh lam pui pui in min țhawng a. Tum loh deuh a amah hlir ka lo ngaihtuah leh veng veng țhin pawh hi naktuk lam ah chuan a reh zui ve mai ang chu maw..





Ar sawrchiar kan la ei lai vek chuan Dinpuia phone chu a lo ri a, chhuatah thingpui no leh plate dah thla in phone chu a chhang a. Kan lam a rawn ngaihsak ka ring lem lo bawk nen Zoramchhana te lam chu ka va melh leh da da a. Beisei loh lutuk in kan mit a intawng zui siah a. Atthlak lutuk in hawi sawn ka tum nangin eng nge maw ka hriat tehreng ni, insangmar țeuh chungin ka nuih ta seih a, amah pawh chuan beisei loh fe hian min lo nuih let nia. A nui hmel chuan engtin maw tak hian ka chhungril a fan leh nghal. Jenny paw’n min rawn hmu thuai a, hmui phun in 'kan țhutna chu a langsar sia, hrehawm ka ti em' tiin min lo zawt a, lu ka thin khum nar nar a.




U Ngaihsaka'n Zoramachhana a biak sup laiin Jenny chuan a kutzungpui min lo tih-pir khum va a, ka nuih let tak nangin ka chhungril erawh chu engtin emaw hian a awm tlat. Zoramchhana mipatna kaitho thei khawp a a danglam bik vangin mak ka ti deuh vang teh pawh a ni ang.




"Emergency!" Ka beng bulah lo phun sup an awm chuan ka en thuai a. Ka kiangah Dinpuia a awm ve reng tih chu ka lo mangnghilh thak tawh.





Dinpuia chuan, "Khaw țhenawm lama țhian dun ramvak an inhliam palh a, an lo in phur phei a nih chu" a ti a. A mitmeng chu a thutak hle bawk.





"A va zialo ve, kan let mai a ngai a nih chu" ka ti ve a. Bu nghat in khuangpu bul a khawtlang hruaitu pakhat lo țhu chu a bekbawr sur sur a. Kan din tak ah chuan u Ngaihsaka te pawn min rawn hmu in kan chhuak chu min lo zui ve thuai a.



Dinpuia'n thil awm dan a hrilh thuak thuak hnuah, kan let san hmasak mai tur thu kan hrilh a, an ni pawh chuan zial zu pahin thingpui lumna thleng min thlah phei ve a.



"Keini hi kan tlaivar tlang mai dawn em ni?" U Ngaihsaka chuan a ti a.




"Ka hre nang, in tih dan dan?" tiin Jenny'n a chhang let nghal vat. Zoramchhana erawh a ngawi leh run tawh.




"In huphurh loh chuan tlaivar tlang mai ang u, thlan laih zawh ah kan mu nghek mai dawn nia" tia rorel in keini chu min mangțha a. Eng thil nge maw ka hriat tehreng ni; Zoramchhana tel lo a kan let tur chu a kimlo riau hian ka hre deuh tlat pek a.




Kan kal thui hnu chuan zai an țan leh tawh tih hriat tak in khuang a ri leh dup dup a. Dinpuia paw’n kan hliampui tuar enkawl turte chanchin chu chiang zawk in min hrilh nawn leh a.



Veng lehlam ah daih kal tur kan ni bawk a, thla a eng em em bawk nen Dinpuia nen chuan kut inkai rial hian kan kal dun a.
Thawk la ham ham a thla eng thlir pahin, “tihian kan in date a ni nghal mai alawm" tiin min nuih hak a. Nuih seih a ka melh ralh chuan thutak deuh zawk hian, “Christmas hmang turin kan let thla ang a, ni 31 ka nu Birthday ni ah inneih kan duh thu pawh kan sawi dawn nia" a ti dap dap a, lungawi hmel deuh a min lo en chuan ka lo nuih let a, a kut lehlam a ka hnar lo nul zeuh chungin " a makpa ka nih hun ah Nathan-a nghal țhin lutuk tur erawh ka huphurh" a lo ti leh zet chu ka nuih pui ta hak hak.




Mitthi lumenna ah țhalai zawng zawng deuh thaw an kal diak vangin khawchhung chu a reh hle a, lunglenna ti zual tur tingin Thla lah chu a eng em em mai bawk si. Dinpuia nen chuan zawite te in kan pahnih hmalam hun tur sawi dun in kan kal zel a. A chang leh kan nui dun a, a chang leh a ban bulah ka chum sak leh țawlh țhin.




Ka star a hria tih ka hriat hma, ka u nen an inkawm chang a lai ru taka a an bulah ka tap deuh chawt hunlai te chu a sawi chhuak a. Ka lai bawk si nen ka han hawi tau leh bar bar ringawt zel. "Kan nula rimna ah min zui i tum tlat kha i la hria em?" nui ruh ruh a a lo tih laiin ka lo tum bar a "I sual e mai a" ka ti hlak hlak bawk.




"Mên puai puai chung khan motor hunna ah i ding tlat a" a lo ti leh zet chu "Sawi tawh suh, i ninawm" ti chiam chungin ka nam vak a, ka darah rawn kuah in amah pawh a nui ve hawk hawk tho.




Ka star bawk si, ka u țhianpa a nihna angin a lakah ka pangchang ve tho bawk nen nula an rim dawn te khan rim ka phallo lutuk a, sawi chhuak ngam bawk siloin an nula rimna a kalve ka dil chiam zel.




"Din" ka ti sep chuan min lo en nghal thuai a.



"Zoramchhana hi maw, police officer ani țhin a sin" zawi tak a ka tih chuan mak tih hmel tak a chal tichuarin awi loh hmel nen a inpawlh nuk in min en a.



"Mak i ti ve tho em? "



"Tlangval senior Zoramchhana hi maw?" A ti hluai. Lu ka bu nghat nghat a.




Hmui pet sawi zauh pahin hma lam a en a. "Engemaw tak a nih chu ka ring sa a lawm" a ti chhuak ta sup. Ka thlek nghal ha bawk.




"Kawm chian hian thingtlang tlangval satliah ngawt a nilo tih a hriat theih a. Mahse, police lam erawh ka ngaihtuah chhin ngailo" a ti leh mai a. Kei erawh in ka chik ngailoh vang leh hriatchian tumna nei miah lo a ka en țhin vangin ram hnathawk țhang tak ang bakin ka lo hmu ngai hauh lo.




Damdawi in kan thlen chhoh hnu lawkah khaw dang ațanga an damlo lo phurh te pawh an lo thleng a, a hliam ka han hmu chiang chu tiril a mur nghal ur ur thei, a a kê dinglam ah silaimu a inkap lut tih hriat zetin tuam ve sateh mah se thisen duk zet leh thling chu a lo luangchhuak per pur tho.




Inzaina room lian lo tak ah chuan an pawm lut nghal a, kan hmanraw neih chhun te nen theih tawp chhuah a kan buaipui tak char char ah chuan a ngal a silaimu tang chu kan phawrh chhuak thei ta hram. Kan zawh fel meuh chuan zinglam dar3 a pel vu tawh a, Dinpuia chuan a in ah riak ve mai turin min sawm zuk zuk a, inngaizawng dip tu neilo a zalen helhhawlh a zan hun hman dun chu tum loh zet a thil a kal palh hlau in ka hnial ve tlat a. Tum ru deuh burin ka in lam ah kan inzui thla a, a haw chhoh hma erawh in min fawp duhthawh ngang thung.




Ka khum ah ngei ka mut kai meuh chuan zing dar4 a pel fel hle tawh. Whatsapp ah ka lut a, signal a muan țhin lutuk a phone pawh ka khawih tam loh phah khawp mai.




Kan family group a chats tam vak lo chu ka chhiar thuak thuak a, ka out leh hma in status ka en kual leh rih a. Ka vah te ho thlalak leh video chu ka download a, tihian naktuk ah Latlat-i te unau in an hlimpui leh ngawt ang. WhatsApp atang chuan ka out zet tawh, mah se Jenny status lo dah thar chiah chu ka hmuh thawi hman thuak nen ka lut leh rih a. Zanin a ka awm dan hi a tha lo ti rilru chungin a status chu ka ‘view’ tho.



An hmel a lang lo a, Jenny puan bih lai leh Zoramchhana kê lehlam zawng hi a lang a.



'Zanin chu engati nge maw Zoramchhana ngawt ka buaipui mai le?' ti rilru in phone chu ka hmet thim hmak. Zoramchhana phone number tak ngial pawh ka neilo tih ka hrechhuak zawm zat a. Mit ka chhing a. Mahse, chiangfe hian ka tlu sual tur nghet zet a min man paha min melh run lai kha ka mitthla ah a lo lang leh zawk a. Chumi rual chuan mak lutuk in ka lung zawn a lo sa pup pup bawk.




Meng chhuak hlawl a ka thawk chhuah hawk lai chuan ngaihsak hmel tak a Jenny eitur a tih daih sak lai vel kha ka mitthla let a, ka nui ro ta hlah mai.




Dinpuia hian min duat ve hle țhin emaw ka ti a, mah se Zoramchhana'n Jenny a ngaihsak ang em em khan chuan min ngaihsak ngai pawh in ka hrelo. Aaaa.. Ngeni ang a, kei hian Zoramchhana ang mipa chut lutuk in duat hmel tak a hmeichhia a han sawngbawl kha a inhmeh lo ka tih em vangin ka theihnghilh thei lo zawk pawh ka hrethiam tawh lo.



Ni chu a liam ve zel a, Dinpuia nen kan inkar pawh a pangngai chho zel a. Ka thik tur zawngin a awm tawh ngai lo va, damlo han na zual lutuk an awm lo bawk nen hna lamah pawh kan hahdam ve lai tak a ni.




Buh seng hun a hnaih tawh a, In tin mai chu favah leh buhseng nan a hmanraw mamawh te tuai hriam in an buai leh laih laih tawh a. Ramsa in an Buh a ei hlau a buh veng a ramriak lut lah an țha hnem. Thlasik thei ka tih mai țhin, Khawmhma leh kawl-anthur pawh a tam leh țan tawh a. Inchungah Kawl-anthur an han pho ro tiar a, deng dip leh in thak tui zetin khawmhma ro te nen an bawl a, zingkar ah ni lum ai pahin an ei ngei zel. Duhsak zet a Khawmhma ro min pe tu pawh ka tawng nual a. Aizawl a ka chhungte ka thawn țhen a, an ni lah an lo lawm thiam ve em em țhin.




Zoramchhana pawh ram ah a riak deuh tluk tluk a, khawchhung a awm chhun ah pawh Leihkapui ah ngawt zan tum tawi tawh lovin Jenny te in ah a leng țhin tih ka hre ve zel a. U Ngaihsaka leh u Zotei te’n an phur pui bawk a. Jenny nen chuan an inneih hial te ka ring rum rum tawh.



Jenny pawh a fel in a hma ai in kan inpawh sawt a, ka in ah washing machine in kan insu a, tui a van țan tawh si a, in ah tleuh lovin insuk tleuh turin tuikhur ah kan kal dun leh țhin. A rilru a tluangtlam a, midang chanchin a sawi ngai bawk silo, chutak chu ka ngainat zawng tak a lo ni bawk nen Sunday inkhawm na ah pawh kan inzui deuh chawt tawh.




Zing khat chu, "Anite..." tia min au pahin ka kawngkhar chu a lo inchum ri dat dat a.



"Lalat ka tho tawh" ka ti let a, kawngkapui ka hawn rualin a nu țhui sak ipite pui pian zia ang ipte hi a lo ak reuh a.




"Mitthi an awm em ni?" ti deuh hu a ka zawh chuan lo tlan lut pahin "awm bawk lo" a ti ve raih bawk.




"I mitthi buhfai khawn ipte i ak sia lawm" ka ti leh țalh a. Anni ang rual hi chhaihfiam an nuam a, dik deuh deuh a min hnial let phawng phawng an ching. Chuvang te pawh chu aniang, ‘naupangin i hmelchhia’ an tih chuan ‘i hmelchhe tak tak a ni mai’ te an lo tih fiam thin ni.





"Ihmaw... anu in maw, apa Ramchhana te Behliang va lo ru a ti a. Anitei zuk sawm la, Aniteii'n kan in ah chaw a lo ei dawn a ti a" ka inchhung cheina thil tarmawi țhenkhat khawih kual niap niap pahin a ti reuh a. U Dtei leh mai mai pawh chu aw. Eirawng min lo bawl kep leh ringawt tawh a nih dawn chu..



"Ok, hmai kan phi ve phawt ang a, kan kal dawn nia" ka tih tak ah chuan a chappal phelh in sofa ah a tlan lawn a, ka teddy bear tarmawi chu a infiampui leh chat tawh.




Khua a vawt in khum lum thawh san a harsa ta lutuk hi thawh ka hai phah ta fo mai, u fel lutuk ka neih vang erawh in kawpuar lo in hna ka kal ngai chuang lo. Ka inphihfai zawh chuan ka in chu kalh in Zoramchhana te in panin Lalat-i nen chuan kan inzui phei a. Zoramchhana tak phei chu a riak daih in ka ring. Țullo tawp erawh chu, ka ban rek a hum na kha khami zan a thil thlen dan ngaihtuah let rauh rauh pahin ka lo khawih leh fo ţhin.




Lalati chuan, "Anite, apa Zoramchhana hian sa a kap thei e tiraw?" a ti reuh a. Ka nui chhuak hawk nghe nghe.



"Dik chiah, Apa Zoramchhana zarah sa tui deuh deuh kan ei țhin a" ka han tih ve phei chuan kan Lalati chu a phur sauh a, Zoramchhana ngaisang tih hriat fe mai hian, "Nia.. ihmaw, hman ah pawh khan Satel min lo hawn rawh ka ti a, ka Satel Tutu-a kha apa Zoramchhana min lo hawn hi a lawm. Theichhungsen pawh min lo hawn țeuh tawh" ka kut kai a, zuang leuh leuh pahin a ti leh barh barh a.



"I pa Zoramchhana hi chu i ngaisang ve ngawt mai" ka tih sak ta thlawt.



"A fel em a lawm, ka tet lai pawh in min paw muhil țhin" a lo ti ve ngei bawk.



Zoramchhana te kawmthlang nu thingkhawn bul a lo ding chuan kan kalna tur zawt in min lo be kawi leh rih a. Kan kalna tur te kan inhrilh hnuah kawngpui ațang step in dawh chawp ah chuan kan chhoh san a, hetilai tlang mual khat hlawk hi Zoramchhana te ram vek a ni bawk.



"A nu Zote" Latlat-i'n pawn ațang a auh rualin u Zotei chu nui sang chungin ah a lo chhuak a.



"Kan nula-i tê chuan eng nge ni i duh a?" a lo ti ve thuai a. Lalati'n a ipte ah lai beng thek paha, "Behliang kan lo lo dawn" a tih chuan Zotei chu a nui hak hak mai.


"Lo lut ru, Ramhma, tunlai inbuai em?" a tih zawm a.



"Kan awl lai tak a ni, nangni exam in la zo fel lo deuh tiraw?"



"kar leh hian kan zo ve tawh ang a, nilengin ka mu tluk tluk thei tawh ang" uang zet hian a ti a, a nui zui hak hak bawk.




Veranda ah kan lawn chhoh chuan Lalat-i chu a lo piai hlak a, Lalat-i lah tlangnel zet in inchhungah chuan a tlan lut nghal a. An inchhungah hian ka la lut tam lo khawp mai. Ka luh hmasak ber țum ang bawk in a lo fai leh henhawn viau. Khawpui a in changkang et ut te ang nilo mah se thingtlang ang ah erawh in leh lo nei țha pawl tak an ni a, uZoteii'n inchhung a enkawl hnehsawh bawk a. Bal hmuh tur a awm ngai lo.




Chutia kan inzui lut chu Zoramchhana nu leh pa, kum upa ve tawh lam mah te pawh chuan min lo lawm thiam khawp mai. Damdawi in chanchin te min lo zawt ve luam a, a mawi tawk a rei ka biak khawmuan hnu ah an kawmchar lam a Behliang lo tur chuan kan kal chhuak a, huan an nei rem in phuihnam, behliang leh țawkte kung an nei țha em em a, kan veng ho hian kan lo reng zel.





"Tikhan va lo rawh u, țawkte pawh kha a awm chuan mal tel ru, Lalat-i nu in rawt in tui a tih em kha" u zotei chuan a ti a, a bai chhuan en turin min luh san leh a.




Serthlum kung kur hnup khawp a serthlum rah eng tuar mai te chu thlek kual in an Anţam hmun a duah zet a Anțam chawr hluah mai te chu kal pel pahin ka thlek vawng vawng hlawm mai.




Lalati'n "Anite, a sang hlawm si, mal a harsa tiraw?" Behliang kung kuai hniam țang țang paha a lo tih phawng chuan ka nui lo thei lo. Ve reuh ngei țhin hian.



"Nichiah, kan ei khawp kan mal hman i ring em?" ka ti let a.


"Ka hrelo" ti puat in a ban ve țang țang reuh a.



Chhungkaw dangte paw’n an lawh ve fo avangim ban phak ah chuan lawh tlak a awm tawh manglo. Ka beidawng ta deuh chuan Lalati chu "I bula hmawlh kha min lo pe rawh, ka'n vaw tla ang e" tia ka hrilh chuan mipa nui hawk ri ka hre thut a. Tunge a nih hrilh nawn ka ngai miah lo bawk.




Ka inher let vat a, a riah ka rin lutuk vangin khawchhunga a awm chuan min țhawng hle bawk. Kawmchar chhuahna kawngka biang nghengin Zoramchhana chu a lo ding a, tho phang hlim tih hriat tak in thingpui no khu vat vat a keng a, Cotton kawr bantluan dum leh track kekawr gray rawng a ha a, nuihza hmel pu țeuh chungin min lo thlir sa reng tawh a.




"Nang maw?" hamhaih deuh a ka tih lai chuan inla patling zet a rum hawk pahin a țhu hniam a, thingpui dawt khalh pahin chiang fahranin min lo melh let run bawk.



"Kan In a min hmu chu mak i va ti awm ve?" a lo ti khauh a. Nghet zetin kut ka hum nghal vak a, "I riak emaw ka ti a" nawi nak a tiin Behliang kung chu ka ban san leh nghal.



"Ka rawn zan haw a" Zoramchhana pawh chuan a ti ve mai a. Ngawi rengin ka ban theih ang ang chu ka ban a, ka hnungzang erawh keimah ah mit fuk tir rengtu an awm tih hriat lutuk in a za mem mem reng a, ka insangmar țeuh mai chu ka duh lo tak zet bawk.



Min tizam zual tur tinga a khat tawk a nghal deuh a Zoramchhana lo nui leh țhin chuan mi run hle bawk a. Rang zet a ka hawi let thut chuan thingpui no a a hmui lo hliah a kun hniam deuhin a kiai suk a."Khati khan min lo nuih min lo nuih suh" ka ti hlar lahin lo hawi chhuak a nuih ruh ruh chungin thingpui chu a dawt leh a. Ka melh kha kha mai.



Chutah Zoramchhana chuan "I ban phak em?" a rawn ti kher nia, rum zet a ka han melh chuan a dar pharh hlai zet chu ti kum hlun in mitko a lo ti kang uk a. Kiai suk chung hian, "Nichin khan vuak thlak i tum te khan ka hria" a’n ti zui a, a nghal ta lutuk chu ka ngei bawk nen ka sa ta phat mai. "Hmela" ka tih chhuah chiam rual erawh in ka tawm leh nghal chawi lawi… An kawmchar a awm kan ni tih ka lo theinghilh daih.



Ka ngaihtuahna chu hrethei awmang ziazang in Zoramchhana pui chu a nui chur chur a. Ding mar vutin thingpuino chu sil hmun ah a va dah lut a, kei thung chuan ka lo melh ran ran a, kak deuh țêi țâwi a ding rem chung in a inkuangkuah hlun a, min chhuk melh run bawk nen ka hmu palian zual vek.



"I sual lutuk, min lo mal pui dawn loh chuan inchhung ah lut rawh" ka tih lai chuan a lo nui thum huk ringawt, Lalat-i pawh a lo nui ve hak hak tho.



"Lalat, Țawkte kha lo va mal rawh" thuawi deuh in Țawkte kung awmna lam ah a phei ve mai a. A mizia ang lo tak a nghal fahran a Zoramchhana nui leh suk suk țhin chu ka melh duh tawh bik miah lo.




Behliang kung chu tih tliah hlau deuh in ka kuai kul țang țang a. Chutih lai chuan ka hnung si chet a taksa lum vung vung in min rawn din chilh vang chuan ka ip nghal chawih a. Ka hawi let a, min lo melh thuak a nui suk chungin Zoramchhana chuan Behliang kung chu awlsam deuh in a kuai kur nghal a.




"Inchhung a luh aiin malpui che ka chak ni mai rawh se" tia min chhuk melh chuan ka hmai tîrîl chu zuk za mem mem thei a.



Kan indin hnaih lutuk leh kan in len hleih bawk nen a awm ah chuan ka bet lo chauh a, a lungphu ri dup dup chu ka hre thei hial bawk.



"Ih.. ka..." ka hrawk a ro halh.



"Tikhan mal rawh" Behliang kung chu a kuai kur zual a. A awm tihrawl khauh țha zetin ka hnungzang a rawn si chet bawk nen thisen a lum duh pap pap viau.



"Lo ve mai rawh" ka ti ram hmak nangin a hma angin ka vin chiam taw lo. Zoramchhana chuan min lo nuih leh mai a.



Inthlawp thlap a kan taksa insi reng chu hre lo ang a lan tumin Behliang chu ka mal thla nghal zung zung a. Mahse, ka hnung a mipa lian leh lumna ngah zet dingin min uapna nat zia erawh ka kawchhung sa pup pup si, ka kut hmawr hik vek lawi si chuan a ti chiang ber.



"I lo haw chu Jenny a lawm ngawt ang" ka han ti chu a lo chet hluk a.




"enge, ka sawi dik lo a mi? Eehh, nang hi Jenny i ngaih vang a lo zan haw chuk chuk i ni chiang lutuk" ka zam chhe lutuk tih ziaawm nan amah chu ka fiam lui zel a, "I nghal reuh hi mawle" a lo ti ve hluk.




"I hre chiah a" ti pahin ka thlek chho ha a. A lo meng tur khui thung.




"I hmu chak tawh lutuk a i lo haw hma ah ka ngai tawh tho tho" awki ngeiawm deuh a ka tih lai chuan a lo ner suk a. Ka fiam chak zual sauh mai, mit ko ti kang ak ak pahin "Ka sawi dik tiraw?" Ka tih leh chuan a nui suk nain chiang fahran a min lo melh paha a thu rawn sawi chuan min nghawr dawt a.. Thawk chelh tlat chung hian ka insehruh nghal fan fan bawk.





Zoramchhana vek chuan "Mawh? Jenny nilo in nangmah ka hmuh chak vang a lo haw ni ta ila?" a ti zawi leh ruih a. Chhan let ngaihna pawh ka hrelo.




Zoramchhana lah chuan chechang lek lova ka ding chu min nuih chungin Behliang chu a mal mual mual a. Chutihlai taka ka lungphu phu rang lutuk chu thawk lak thlengin a ti buai zo vek a. Min chhaihna vanga lai chhe zo vek anga ka lang hreh bawk si chuan, "I mi pangngai ve tawh lutuk, fiamthu thawh na changte i hre ve tawh a" ka ti bah deuh niai, ka chhanna vang chuan a lo nui che leh dawt a, a hmui hnuai a seh zauh chu rei en duh lo in ka hawi sawn nghal daih bawk.




Tun lawka a chet dan kha chu Jenny bulah a sawi dan tur inzir nan min hman vang aniang, "Ka lo haw chhan ka sawi chu i awi leh vak na si nge" zawi ruih a a lo tih leh chuan rum zet in ka melh a, Zoramchhana pawh chuan hriatthiam harsa fe hian min lo en chhuk run a, ka lungphu chu a pangngai hleithei hlawl lo.




"Hetah christmas i hmang dawn em?" tiin a kawih kur ka mal zawhna kung chu a thlah a.




"Aih.. ih, kan haw ang" ka beisei loh zet a min biak hmasak vangin ka chhang buh leh nuaih tawh.




" kan" ti chang deuh sup a min rawn melh chuan ka lo ip deuh chawi a. Zawite hian "Umm, Dinpuia nen" ka tia. A hmel lan dan chu ka sawifiah thiam lo. "Ni dawn tak e" tih leh Behliang kung a kawih kur leh mek chu a thlah leh nghal a, hrethiam lo deuh a ka en chhoh hà laiin a kut chu a lo bengfai thuk thuk a.




"Kung dang a mi mal tawh zawk ang" a tih tak nghut ah chuan ka zui nghal vat.




Tukin chu ka beisei loh dan lutukin kan inkawm thei ta phian a, ka behliang mal dan fiamthu thawh nan hmang a min nuih leh ruh ruh țhin erawh ka melh kha kha pha zel, engah phei chuan a ngai lem hlei lo va.




Nakin deuh ah chuan tim deuh taka, “Police i ni țhin a mi?" tia ka zawh chuan kan boruak a rawn thlak hlawk in ka hria.




A hma a ka ding chu chiang zetin min lo chhuk en a. A hmel rum nghal ul ațang chuan a huat zawng tak ka sawi ta mai amaw ka ti hman rum rum a. Zawhna ka zawt ringawt bawk sia. Rei fe a ngawih deuh vang vang hnu ah, "Umm" a ti mawlh tawp. A hmel chu a lang nelawm lo leh vek tawh.





"Ngati nge tun ah i nih tawh loh a, ka sawi awmzia chu... engati nge? i bang a mi?" ka ti leh hram a, ka hrechiang chak em a ni.




Zoramchhana chuan ka ipte pui ken chu lo en in a nui lui suk a. Chutah ka zawhna pawh min chhang lo in, "in hmeh khawp a tling tawh ang" a ti a, min inher san nghal daih a. An in pan a a kal nul nul chu thaw chhuak hak hian ka thlir ta reng a.



Police hna a chawlhsan chhan sawi chhuah chu a duh lo viau a maw ni le, ka lo zawt ta kher kher chu ka inthiam lo hnuhnawh em em a, a rilru ka ti thar leh a ni ringawt a hria in Țawkte lo a Lalat-i lo la buai ve em em chu ka au a. A lo tlan nghal thuai bawk.




An inchhung a kan luh leh chuan Zoramchhana hmel hmuh tur a lo awm tawh lo a. Lawmthu te sawiin kan chhuak nghal a. Ka zawhna zawh vang khan a mood țha zet a chhe nghal vek mai khan ka hria.




An kawtkai ațang kawngpui chhuk thlakna step a kan chhuk hma chuan an in lam chu ka va thlir leh hram a, a pindan tukverh biang ngheng a dingin Zoramchhana chuan min lo en vung vung mai.





"Chaw eitui aw" ka va ti hram a. Ngawi ngul in lu a lo bu ringawt a.




Kan boruak hrethiam lo zet a Lalat-i'n "apa Ramchhan, chaw eitui aw" ti a kut a vai lap lap chuan nui lui tih hriat tak a lo nuiin Lalat-i chu a rawn chhang let a. A hriat zui duh loh zawng tak police a a țan lai chuan a tawng a nih te chu ka ring a, zawhna ka zawt ta kher kher kha ka inhuat pha ti tih zo vek.





Hun chu a kal ngaiin a kal ve zel a. Mahni hna țual ah theuh buaiin ni chu kan hmang liam a. Eng emaw ri deuh dawt leh nghing lawih ah chuan ka harh zawk mai. A thim ruai bawk nen ka awmna chu ka hre mai lo. Mit ka nuai a, ka hmai bul chet ah Dinpuia a rawn lang zui a, rang deuh ka țhu ngil tum chu a ri nghal chawrh a. Ka rak țhat a, Dinpuia pawh a thaw hawk tho. Chal ka dawm rual chuan lo kun hniam leh in ka kut a rawn vawn hnan a.





"A na em?" a tiin min zawt nghal zat bawk.





"Aih.. ih, kan awmna hi.. khawi maw, ka tauh na che em?" ka tih tak ruai ah chuan nui hawkin a chal chu a tuai thuak a.




"A pawng ngei ngei ang" a lo tia, inthiam lo zetin ka nur țùau mai.




"I mutui reuh lutuk a, khaw chhung kan inkhalh luh lai pawh i hrelo" a lo tih zawm a. A chal en sak paha, "Chu chu alawm, ka tho â țhelh leh nghal" ka ti chu a lo nuih pui hawk hawk a.






Kan khaw țhenawm, subcenter tlawh in chawhnu khan kan chhuak a. Khaw kar kawng a hla lem lo nain an khua ațang kan chhuak tlai ang reng a, khaw thim ah khawchhuang kan thlen phah ta a ni.





Dinpuia nen chuan infiam dun bawk bawk chungin Car ațang kan chhuak a, boruak vawt hik lutuk vangin ka kut chu jacket ipte ah ka thun nghal sawk sawk a. Ka pa te'n rawng min lo bawl kep a, Dinpuia pawn haw tlang lo in ka pa te in ah a ei ve dawn a. Ka pa te kawt zawl kan thlen chhoh rual a Leihkapuia ka mihring va hmuh vang chuan ka ding deuh dat a. Dinpuia paw’n a hmu ve tih hriat tak hian "Val Lunglenga chu Jenny te in lam ah bawk em ni?" tiin a zuk au a. Zo zial hip lut ham ham pahin Zoramchhana chu a lo nuih ro hak a, a mimal thil lutuk zawt zui lo tur a duh in Dinpuia kawrlum ban ah chuan ka pawt dat a.





"Ka ril a țam tawh teh mai, lut vat ang" ka ti sap bawk, min nuih sak in ka kut a lo hum a, Zoramchhana nen chuan hman ni Behliang kan lawh țum a kan inhmuh bak kha kan inhmu leh tawh lo kha ania. Jenny nen an inkar pawh a țha zel tur ah ka ngai.





Khua a vawt zual in Christmas pawh a hnai chho ta hle a, "Ramhma, i hman tawh em?" kawmchhak a Jenny aw ri ka hriat rualin ka pa (u Ngaihsaka pa) paikawng min tah sak leh hnam chu ka ban a, In ațang ka chhuak nghal chu, "Vawiin chu rit deuh in i phur ka thawn dawn nia" Min lo ti a. Amah pawn a hnam a lo suih țha ve mek a.




"Ka phur hnem ve thei tawh teh a nia" ka ti let a, kawngkhar chu tahla a kalh in Chahbi chu ka hnathawh kekawr ipte ah ka thun a, zipper ka zip phui nghal hmak bawk.




Buh seng an zo tlang tawh a, chhung rual deuh phei chuan in lam ah a chhek zo thawthang tawh. Zoramchhana lo zawh ni ah u Ngaihsaka te nupa leh Jenny te nen buh kan sengpui ve a. Jenny pawh Zoramchhana chhungte chuan mo chei in an chei deuh tawh in ka hria. Buh seng zawh ni ah erawh buh kung me ka huat vangin engmah ka ti ve hleithei lo. Thlam ah eirawng ka lo bawl a. Chawfak dawn ah u Ngaihsaka leh Zoramchhana ten an lo thlang Tuivai ah bomb an zuk vawm a, Nghatun nguntang chen chen an rawn man țeuh mai a. Hmarcha hnah te nen chhum pawlh hluah in chaw chhun kan han ei mai kha chu, khatiang khawp khan chaw ka ei thei tih ka hre chhuak chiah.




U Ngaihsaka te leihkapui kan rah rual chiah in nghal zet hian "Jenny, inpa zial pai tur hi lo zial sak teh. Anih loh zawngin ka zial min țawm leh reng mai ang" u Ngaihsaka'n a lo ti zuk pek a. Hmai sen țan țan chungin Jenny paw’n Zoramchhana zial pai tur chu a zial sak nghal a. Zeilo zet in ka lo țawnpui ve nuap nuap bawk.





"Kan kalna tur a hla em?" ka ti lang lang a. Christmas leh kumthar vuakvet a kawtzawl a meipui chhen tur thing lak an rawt a.



"Hla vak lo, i kal thleng pha em em ang"



"I nghal lutuk" u Ngaihsaka chu ka melh khai khai a. Thingpui hang no dawm in Leihkapui ah chuan a lo chhuak phei ve a.



"Dinpuia chu chhawktu awm se, lo tel ve thei se țha tur" a han ti leh a.



"Nichiah, nang leh u Dtei, Jenny leh Zoramchhana.. ka riang dawn bik lutuk a" ka ti hluai erawh min ei loh hmel deuh hian "Eehh.. ehhh.. ehh, Ramhmangaih, zak teh" a lo ti hluk. Zoramchhana a lo thlen hnu chuan dai hnai a thing fawm turin kan inzui chhuak ta diah diah a.




Thingkung a țangțîal ril inzam Ni in a lo chhun tle siar siar te, thli a thawt rual a thingkung hnah țîl chem chem te chuan kan ur lawk hut hut hunpui a lo thlen teuh tawh zia a ti chiang zual hle hian ka hria.



"Hetah hian Jenny nen lo awm ula, thing kan fawm khawm zung zung a nga, kan haw leh thuai dawn nia" Zoramchhana chu ka melh deuh hu mai. Zawl pharh diai ah chuan em te nghat in kan țhu chawl a.




"Jenny, i hria tiraw? Ramhmai nen hetah hian lo awm ula, lo kal sawn ve lo ang che u" Zoramchhana bawk chuan a ti bul bul a. Thu awi hmei deuh in Jenny chu a bu nghat a. Zoramchhana chu Over ka ti tlat, Jenny hah a hlauh vang mai a kei thleng a amah lo awmpui tur a thu min pe chu ka ngei ru tet tet bawk.




"Thing kan fawm ve dawn lo mi?" Ka lo tih ha chuan khi suk in a tho vut a.



"I lo lum khawlo palh ang, kan rei dawn lo" a ti mai leh nghal. Ka melh rangna chu ngaih pawimawh loh hmel deuh in ramngaw chhung panin a kal daih a. Ka ner nang nang chu uDtei paw’n ‘ heta lo awm turin’ min chah a. An nupa pawh chu Zoramchhana kalna ah chuan an liam nghal daih.




"An va han sual mai mai ber" ti nui nui in Jenny chu ka melh a.



"Kan Valseniora-pui hian a ngaihtuah ngawt mai che" nui tawi tak pah a lo tih chuan ka awih lo lutuk chu ka kâ hau.



"Zoramchhana khan kei hi min ngaihtuah ang maw?" Ka ti a. Ka aw chu a ring lam hret bawk. Nui lui tih hriat zet a nui chunga lu a bu ka hmuh chuan chil ka hak lo chauh. "A awmin a anglo lutuk, hna i thawh hah a hlauh vang a nih hi kei thleng thleng a thu min pek ni" ka han ti a, mit ti kang ak in "Chu chu i ngaihdan a ni tak tak em?" a lo la ti țalh a.



"Chulo ngaihtuah tur dang awm hek lo, a bialnu hah hlau in a awm awl tir che a, chutakarah a țhianpa nau hi i hlauh hlauin nangmah awmpui tur che in min dah thlap bawk" ka ti let a, Jenny hmel pawh chu hmuh a nuam leh ta deuh.



"I star ve lo mi... ughh, u Ramchhana hi u angin i en tak tak em?" a tih chuan chhan tumin ka ang deuh ziau a. Mahse, Jenny vek chuan, "Ka tih awmzia chu, Dr Dinpuia nen in inkar ka hre vek tho nangin.. aaaa... ih" a ti niah niah a. A thil sawi chu ka dawnsawn fuh loh hlauh hmel deuh in min melh tim dai bawk. Chu chuan ka awm a ti nuam lo ve leh chhawng a, rang tak hian, " ka u a lawm" ka ti phawng. "Ih, U Ngaihsaka nen an inkawm tlat vangin keipawn ka u țhianpa angin ka en.." ka ti leh a. Dawt ka sawi erawh nuam ka ti chiah lo.





Zoramchhana hi Ka û angin ka en lo lutuk. Diktak chuan ka hmusit chu ka tilo. Kan inhriat țan dan a fuh lo a, a mizia ngawi chawi deuh te, a țawng tlem lutuk leh rammi ang mai a a landan rorum zet te vang hian han vin chiam mai ka ching a. Țhian ang takngial pawh in ka lo la ngaihtuah chhin ngailo tih chu ka hre thar rawih rawih…




Jenny hmel ah 'veng huai' ka hmuh rual erawh in ka thil sawi kha ka inchhir lo. U ang a ka en theih loh pawh in țhian atan chuan ka pawm nghet hmak tawh bawk.




"Dik tak chuan kan inkar hi ka hrethiam lo" a tih leh zet chu ka melh phawk kher mai.



"A lo rim țhin che a ni lawm'ni?" ka ti ang hêhâw a.



"Aaaa.. thingtlang-ah te chuan duh tak tak loh te in ah pawh zan tumtawi nan an leng lut fo a lawm" hnual deuh rai hian a ti a. Ka ngaihdan a ni ve chiah lo.




"Mahse, Zoramchhana te chu nula dangin ah a leng ngai silo a" ka lo ti let ve vat. "Nia... ka hrethiam lo, a lo leng a, kan inkawm a.. chu zawng chu a ni mai.. i hrethiam mai em?" ti a zalo zet a a nui chu ka lainat ru takzet. Zoramchhana hian a ngaihven ve viau emaw ka lo ti a.



Jenny hnem tum tak chuan, "Naaaa... kei aiin i hrechiang ang chu. A zeilo in a țawng tlem si, a nui khat bawk si, nelawm loh ropui bawk si" uar deuh in ka ti chiam a, uluk deuh hian min lo melh reng a.



“A mizia leh nula han lem vel in rem loh tur zia chu a… chuvang chuan ngaihțha deuh khan awm rawh" ka ti leh duah.




"In inhriatchian hmel e" a la ti hram. Kei in an inhriatchian hmel ka ti fe zawk sia. Ka bulah vawi khatmah a nuih ngailoh laiin hman zan ah pawh kut a vai zeuh vangin a lo nui suk a, ka lawmthu sawi a min chhan let a harsat hmek hmuk laiin, a sawhchiar ei tur te a tih daih sak vel a nia.




"A.. khulai thing khu Ţhîl aniin ka hria, kawngah hnuk chho ila" tih paha a Paikawng ațang Chempui a lak chhuah tak ah chuan rang zet hian ka ding ve a. Kawngthlang ah chuan thingro tlawn țha zet in hnim pik chung ah a lo tlu reng mai.




"Tan sa vek in lo chhep khawm ila, an ngaih ang ngawt a nawi kan nih bik loh zia hre rawh se" ti rilru rauh rauh in hruizam in a lo bawh deuh tawh, Jenny'n a lo pawh laih laih chu ka zuk pawh pui a. A tan ngheh reuh em vang chuan kawngko ațang kan zuk ban phak hruizam te chu kan han chhat ve ngial a.




"Pawt leh deuh teh, a dawk chhuak thei ţep" a ti a. Tha tawp a ka pawh leh chuan sak deuh hian a rawn che țúal țual a. Mahse, vawi lehkhat ah Jenny rak țhat ka hriat rual deuh thaw in ka per nghal dawrh.




Ka hriat leh hmasak ber chu bawkkhup zawng a lungchar zet a ka tla thum țawk leh Zoramchhana aw ri in ring zet a "Ramhmangaih?" a rawn ti fiak fur chu a ni mai.




"Hrep a! Ramhmangaih?" tih aw ri chu ka hre rei ruai. Ka che dawn a, ka khup ruh na ut ut leh ka awm chhung a na inhnawh up up vang chuan ka chet chu sawi loh, thawk pawh ka thaw chhuak thei lo




"Jenny, i țha em?" ti a Jenny tlu sawp niai bula Zoramchhana țhu chu ka han hmu phe ruai a. Ka hnang nge maw ni, thawm reng reng ka chhuah thei lo.



"Keichu ka na lo, Ramhmai khu.." Jenny chuan a ti a. Ka awmna pan a chak fe a thawm lo awm thla nghal buan buan chu, ka na in min tur ut ut leh beng chhung ri mum mum kar ațang ka lo hre vuai vuai a. Zoramchhana kutphah lian zet in ka darah a lo hmer meuh chuan ka thawk a chham lek lek tawh.



"Mambawih... i țha em?" a ti mawlh mawlh a, a aw thum leh lian zet chu a mangan hmel viau bawk.




Min tihnat belh hlau tak in min kuai zangthal ta a, ka thaw chhuak ta hawk hawk a. "I țha em?" A kutphah thap hrup a ka biang a lo dawm chuan chil lem dawk in ka buk khum ringawt.


"Hrep a! Khawimah lo kal sawn ve lo turin ka chah chian viau che a?” tia min vin khawl chu hlau zet in ka melh kawk a. A hmel rum ul leh mitmeng thip sen khui chuan hriatthiam harsa lutuk a min lo melh let ngur in a insehruh țawlh țawlh bawk.



"Zawl a lo awm kha a harsa viau em?" vin zet a a lo tih fiak fur chuan ka ip chawi mai. Zoramchhana erawh in a la duhtawk lo nasa.



"Ram ah i che zeilo tih kan hriat vangin a lawm a him chin ah kan awm tir che..." chhum zet a tih leh laia u Ngaihsaka lo thleng thla ve chuan "Țhianpa" rawn ti sup in Zoramchhana darah kut a rawn nghat a. Zoramchhana erawh a khabe ruh kual hrawl zet che țawlh țawlh khawp in a insehruh khur dur dur mai.



"Mate, i na em?" U Ngaihsaka chuan a rawn ti dam thlup.
Zoramchhana min vin tuar tuarna kha ka hlauh luat vang nge ni, ka taksa na reng ka lo hrechang tawh lo.




"A khup hliam ațang hian thisen a lo chhuak duh khawp mai" chhum zet a Zoramchhana'n a lo ti leh hrawk rualin zo fe hian min pawm kang zui lawp a, min tihnat mai hlau in ka tawm nghal chawi! Ka hlauh zia chu a hrethiam a ni mahna, rum chhuak hawk a vanvadak in a kâ ațang chuan a lo thaw chhuak hawk hawk a. Ka tha khur nasa lutuk chu keipawn a rapthlak ka ti a, tunlawk kha dimlo zet in kut min thlak zawm tawh mai dawn emaw ka ti hman tak tak.



Zawl min chhuah chhoh pui chuan u Dtei leh Jenny te’n min lo buaipui thuai a, Jenny hmel lo tim dai ka hmuh chuan ka khawngaih in Zoramchhana chu ka haw thar hluah hluah.



"Mate, a na viau em," u Dtei'n min lo biakna pawh chu ka chhang let lo.




Zoramchhana chuan min pen pui pawk pawk a, kopang nghen theihna rem lai a min han nghat fel chiah chu, ka khup hliam bih a Jenny lo țhu thuai chu amelh rum nangang mai. A mitmeng rapthlak lutuk chuan ka tiril țham in luang hnah chu ka hum vak ringawt.





U Ngaihsaka'n a hnung ah ben sak dawt paha amah pawh a lo țhut ve tak ah chuan Zoramchhana chu ngawi reng in a kal sawn daih a. Midang chuan ngaihtuah fe hian ka na em tih min zawt awl lo bawk



"A nuam lo e, keimah vang vek" Jenny'n a tih sep chuan ka lo ner nak a.



"I thiam loh a nilo, khulai hrui zam fei lutuk vang vek khu alawm" ka kut a thlang lam kawk vu pahin ka ti a. Ka nui hak nangin ka khup na lutuk chu ka țhen pui nghal sak.





"U Ramchhana thinrim dan em em kha a hlauhawm e" Jenny bawk in a tih lai a U Ngaihsaka leh U Dtei te inmelh ralh chu ka hmu reng.




"A thinrim hleinem, in intina palh emaw a ti a, a hlauthawng a nih kha" u Ngaihsaka chuan a ti vat a.




"Mahse... a hmel lan dan kha... min huat hmel.. aaa... Ramhma, ka tihpalh lutuk aw, keimah vang vek" nuam lo ti lutuk hian a ti nawn tet tet a. U Dtei'n a lo hnem ve mawlh mawlh bawk




Reilote hnuah Zoramchhana chu a kuta Zapanhlo hum in a rawn let leh hlawl lo a. Tuman ka lo be lo. Zapanhlo hnah chu a nuai sawk sawk a, ka hmaah chuan ngawi ngul hian a rawn țhu ve leh a, ka kekawr khup țet tawh sa chu lo pawhthler belh kawk in a khup lo pilh duai ah chuan, Zapanhlo tui hring duk kuk chu a rawn far tir tehreng mai a!




A thip leh na inchawlhpawlh vang chuan ka mittui a tla phung thei.




"A na lutuk, ka duh tawh lo" Zoramchhana kut nawr sawn paha ka ti dek dek chu, ani lungawi lo puah chhuahna mamawh tawh bawk si chuan rum zet hian min melh hrawk a, ka beng tikiu rum rum theih khawp a thu huatthlala lutuk a rawn phuh chhuak hluk bawk.




"Engmaw i sawi kha?" ka ti let ve tuar.




Ngeiawm zet a nui lui suk pah hian "sawi nawn leh kher a ngai em ni?" a rawn ti chang bawng a.




"Hmela, kal sawn rawh" ka ti let nghek. Ani thin in a lo tuar leh tawh bawk silo.



"Engti tur in nge khutiang lai ah te i lo zuk kal ve a, thingtlang a seilian pawh nilo, ram chinchang pakhatmah hriat nei bawk silo .. buaina chiah a nih hi i thlen!" ti chhuak khawlha a din chhuah vut chuan, ka thinrim lutuk nge, midang hmaah țawngkam na taka min vin tuar tuar vang ka hrethiam lo. Ka sa hut hut a, ka țah a chhuak țeuh bawk.





"Țhianpa, hahdam te, eng em a thlen loh hi" u Ngaihsaka'n a tih thuai laiin Zoramchhana pui roh chuan "Aw... a khup ah hliam a tuar teh hrep hi!" Ban phar hluai hian a ti fiak leh fur.




"A bialpa tehhrep in a hriat hun ah phei chuan..." sawi zawm lo in a ngawi hmuk a. Thinrimna leh zahna te nen mittui tling khat piau in rum tak in ka melh ngawt ngawt ringawt. Zawl ah chuan a vei thuak thuak a, a khat tawk a hriatthiam harsa zet a min lo melh leh run țhin te chu ka haw hlur tawh.



A palian in a thawm a na bawk si. Rammi, helpawl member ang a ka lo ngai țhin kha a diklohna pakhatmah ka hre tawh lo. Kut thawh ngat se u Ngaihsaka ho pawh hian kan hneh dawn lo nasa lutuk.




Rei fe hnuah chuan a thawl deuh tawh aniang, "Țhianpa, lo in ngaihsak mai ru aw" a rawn ti chhuak phawng. U Ngaihsaka bu nghut chu hrethiam lo zet in ka en a.




"Ka pua ang che" tih leh ka hma a lo țhut a rual a, thinur deuh hian " thlawkbo rawh" ka lo tih khum nghal tuar. Rawn thle buk in a rum chhuak hawk thung. Mi zingah leh nghal min vin tuar tuar kha ka tuar thiam lo takzet.



Rum deuh a ka lo melh kha kha laiin bung nghut hian "damdawi in thleng vat teh ang, i hliam kha a nat zual zel hma in" a lo ti zawi ruih a. A aw rik dan chu ka sawifiah thiam lo, tlawm deuh ang mai hian a chuai ruih in ka hre mai.




"Nie, Mate, i kal thei dawn lo tih a chiang, in puak tir la, kan thing fawm sa ho hi kan lo hawn ang" u Dteite nupa in an tih tak tlat ah chuan thinrim țung in Zoramchhana taksa lian zet ah chuan ka lawn kai ta a. Ka bawp ka tihkau rual te chuan ka khup chu a na ut ut mai.




Kawchhung pan a ngawi reng a min kal pui mawp mawp lai te chuan ramhnuai a chet dan pawisak neilo lutuk kha ngaihtuah let in ka hnuk a ulh tlat a. Ka tette ațanga țawngkam vin ri hre miah lo a seilian ka ni a, midangte tan a hnawksak leh harsatna thlen tu nih hi ka thil hlauh ber a ni bawk. Chuvang tak rengin ka awmna hmun a lo awm tawhte khawsak dan ang zel a inherrem ka tum hram hram țhin.



Mahse, an Buh seng zawh ni a buh me vanga ka vual chiam te kha nep min tih phah nan hmangin vawiin thlengin a lo la theihnghilh lo a, khawpui nula nawi tak ang a min vin ta chiam chiam khan min lo hmuh țhîn dan dik tak chu a tichiang viau tawh.




Kan ngawih tlawk tlawk lai chuan "Ka kal chakpui che hian a na viau em?" tiin dam dup hian min lo zawt a. Ka mittui tla tur dan kir tum chuan ngawi reng in ka lo in petruh fan fan thung. Ka taksa na ai daih a min țawng khum dan in ka thin-hnun a chhun tlat chu ka in- hrethiam tawh biklo!




"Mambawih?" a aia dam deuh zawk a a rawn tih leh zet chu, insum hman leklo in ka insut chhuak ta hlap hlap a. Zoramchhana taksa lianpui chu a rawn țang nghal țawlh ţawlh bawk




"I sual lutuk, engati nge mi zingah min vin vak vak a?" insut hlap hlap chungin ka tih khum țîau a, naupang ţap ang maiin ka mittui a tla zung zung bawk.




Rilruna leh thin tawt țeuh chunga, "Min nuihzat vek tawh ang..." ka han tih leh chuan min din pui chut a. A rum pah hawk bawk. Chutah ri hrawih khawp hian "Tuman an nuihzat hauh lo ang che" a lo ti khawlh, keilah chuan rilru na fe hian "Aih, I duh tawk a min vin chiam chiam lai kha an hmu a..ka... engati nge kha tianga min vin vak vak a, ka duh vang a lum pawh ka nilo" ka ti leh hliam hliam a. Khawpui nula nawi deuh ang mai a min vin chiam lai a midangte hmel awm dan tur chu ka mitthla kual a, ka zak lutuk leh an hmel hmuh leh ka hreh luat vang a ni ber ang, ka lungdam thei hlawh loh.




Zoramchhana chuan "Ka tihpalh..." zawi lutuk hian a rawn ti hniam ruih. Ka lungchhiat a tizual tulh tulh thung.



"Ka tihpalh aw Mambawih, I intihnat palh ka hlau lutuk kha ka mangang em a ni!" a ti chuai leh ruih a; a tukhum in ka bek a rawn nawr dat chuan ka beisei loh lutuk a lo sawi chhuah vangin a kawr-awmah ka țham vak a.



Thaw huai in amah vek chuan " hei ai hian lo na palh phei la chu ka inngaidam thei ngailo ang" harsa ti hmel fahran hian a lo ti leh khawl a. Ka chhang lo a, amah paw’n engmah a sawi belh tawh lo. Ngawi rengin min kalpui leh ta a, ka rilru erawh a buai nuaih mai, a thusawi awmzia kha eng nge nita ang?



Damdawi in tualzawl kan thlen rual in ka thawhpui te'n min lo hmu nghal thuai a. Rang zet a Dinpuia rawn tlan chhuak chuan "ngati nge?" a rawn ti nghal thawr bawk.



"A lum palh a" Zoramchhana chuan a ti hluk a.



Duty room ah zawk min paw lut turin an hrilh a, khum lo inhung ah min nghah thlak meuh chuan Dinpuia pawh a chiai hmel khawp mai. "Babe, i țha em? A na viau em?" ti mawlh mawlh in ka biang a rawn khuap a. Rilru ipik hmel fe a a kut phah lian pui pahnih a tukhum dawm in Zoramchhana paw’n min lo melh ngut ngut a.


"Ka țha.." ti sep in Dinpuia chu ka nuih lui a.



"Good, ka enkawl dam thuai ang che" midang awm ve te veng thawng lo zet a ka chal ah a lo fawh rualin Zoramchhana rum hawk ri ka hria a. Dinpuia ban rek ah ka hmer chawih mai.



"A hliam silfaina tur lo la rawh u" tia a a inlak hran leh laiin Duty room ațanga ngawi reng a Zoramchhana kal chhuak chu ka va hmu hman hram....

[Abbra Reo Ririni]

Kutphah lian leh lum thup in ka biang a lo khuap lai chu ka hre ririai a, a thaw chhuak ham ham thawm ka hriat leh rualin pangtilum nuam deuh hian min lo ur zui ham ham bawk. Ka chauh em vang leh ka taksa na ut ut vang erawhin ka chiang lo nuaih thung. Rei ngial ka chal ah hmui lumin a lo nawr sik vang vang laite chuan natna vanga ka tiril țang țûk mai chu a reh tial tial a. "Dam vat rawh aw" ti tu mipa aw thum sup chuan engtin maw tak hian min thlamuan hluah hluah.





A kut lum nuam tak chuan ka bek sam a lo chul hluau hluau a. A thawk la ri te, a taksa ațanga lumna lo chhuak te, ka kiang hnaiah a awm tih ka hriatna mai chauh paw’n min thlamuan hneh lutuk mai chu han tehkhin tur ka hre miah lo.



Thir tla ri bawl thawm ah chuan ka harh chhuak hlawl a, ka lungphu a ri nghal dawt dawt mai. Ka dang lo ro deuh huam tih reh nan chil lem khalh paha ka han hawi kual chu, duty room khumah ka la mu reng tih chu ka hre zawm nghal a. Vawt in min țham mur nghal sung sung bawk nen rang takin puan chuan ka inkhuh țha nghal a.



Ka harh tih a rawn hriat rualin "Awi! Ka ti harh che em ni?" Damdawi in ti fai tu chuan a lo ti thuai, chhuat a inzaina chemte leh bakcheh tla hnawk rum chu a chhar nghal mawlh mawlh bawk.


"I va buai hmel ve?" ka ti a, ka khup na ut ut chu ka hre zawm nghal zat.


"Hei, ka tifai dawn e ka tia, ka thlauh dar ta vek si a nih hi" nui hak hak paha lo tiin a thil chhar khawm sa chu sil hmun lam a panpui leh nghal a.





Puan lum a intuam țha suah suah paha tukverh lam ka han hawi chuan thlasik ni tla tur no nghul chu tlang kar ațang a lo la eng sawr sawr a, naupang tual chai thawm ri nak nak te, ram ațanga Bawng tla lo haw thawm leh an dar awrh inkhak ri leh ruk ruk țhin te pawh a hriatchian theih viau mai.




"I khawsiak chu a ziaawm deuh tawh em?" lo ti ri ah chuan ka phu deuh zuk. A lam ka hawi chu Damdawi in tifai tu chuan nui sangin min lo dinchilh reng tawh a. “Aah, aw.. ka zia tawh lutuk" ka pang dek paha ka chhan chuan hahdam huai hmel a pu. Ka khup pahnih in min tur ut utna erawh ka sawi lang ta lem lo. "A tihzia lutuk e, nang meuh i han damlo chu kan phek buai titih der a lawm" tiin a nui zui hak hak a.





Thil thlengte kha ka ngaihtuah let a, damdawi in min thlen pui hnu khan ka hliamte min sil fai sak a. Ka khup ruh kha na ka tih em vangin Xray te kan nei ta chuk chuk kha a nia, ka khua a sik ta hluah bawk a, vanneih thlak lutuk in ruh ka sawh pawi lo hlauh. Mahse, inhliam hlim ka nih vang erawhin a vung nasa hle thung. Tichuan, Dinpuia'n min jection a, puan lum te min sin tir hnuah chau lutukin ka lo muhil tlang ta a lo nih dawn hi a…



"Sleeping beauty chu a lo harh tawh maw?" ti riah chuan Duty room kawngkhar lam chu ka hawi phei a, hmelh hmuh hahdam thlak deuh a Dinpuia lo lut mek chu ka lo nuih nghal sen sen. Ka pang a rawn dek a, ngawi deuh vung vung in a tawpah chuan "Good, no fever" a ti sup.



"Ka va mu rei em em" ka lo ti daih, ka khum tlang ah lo țhu ve pahin ka kut a rawn hum nghal a " Damdawi khan a chhawk hneh deuh che a, zan ah khawsik awm leh hma in ka chiu leh ang che" lo tiin a chal in ka chal a lo nawr si a, a kut lehlam in ka biang a rawn khuap leh a.


"Hetiang a i awm lai, hmuh che hrehawm ka tih zia i hria em?" ti sup in a hnarin ka hnar a lo nul thuak a. Chumi rual chiah chuan thil hriatchhuah ka nei. Ka harhchhuah hma lawk khan kutphah lum nuam lutuk in dimdawi lutukin ka biang ah min khuap a, 'dam vat' turin ngenngawl zetin min hrilh a nih kha. Chuan, ka chal ah fawp in thawk a la ham ham bawk.



"Din?" zawite hian ka tia.




"Yeap" ti vat in a awm hrang a nghal a, ka kut a hum lum chu a lo hmer nghet zual sauh bawk."ka mutthilh lai khan lo kal an awm em?" tia ka zawh chuan ngaihtuah let niawm takin a ngawi deuh a, a hnuah chuan "i mutthilh hnu lawk khan i u te nupa leh Jenny te chu an lo kal a, an ngaihtuah hmel khawp che. Nang lah i khawsik a sang ang reng a, ti harh lo che in an let leh ta a nih kha, i uDteii'n chaw a lo keng ang" ti in ka biang a sam lo uai thla chu a rawn hui sawn pah a.




Ka u te lo kal lai chu ka hre ve hauh lo. Mahse, chianglo riai a ka kiang a awm mipa chet vel ka hriat kha tunge ni ta ang?




Dinpuia a nih ring ru deuh in ka en chhik viau a. Mahse, ka kut a hum na kut chu ka han thlek ngial țhin, kha pangtilum nen khan a inang lo tih lah hrilh nawn ka ngailo.


"Nihleh, ka harh hma khan..." ka ti leh hram chu "An awm awm ka hre miah lo, ka round daih a.." ti in ka mitah tak min rawn melh a. "Tinge, tlawh tur che a beisei i ni em ni?" a tih leh tak ah chuan lu thing nghat in "Aih... chutiang pawh a nilo, ka mumang a niang" ka ti ta niah niah. Mumang mai nitur erawh chuan a tak a ang viau lawi bawk si!



Dinpuia chuan ka puan sin chu keu in ka khup pahnih lo in tuam var luk chu a thlek vung vung a, pawi tih hmel tak hian a thaw ham ham reng bawk. A hnu deuh ah phei chuan lungawi lo ni awm tak hian "Ramah kal ve tawh suh ang che" lo ti deuh hluk pahin puan chuan min khuh țha leh nghal a. Ka lo nui hak nangin Dinpui hmel erawh a thutak ta kher mai.




"Thingtlang mi nilo in khawpui mi i ni tih hria la, an nun dan ang a nun ve kher i mamawh lo, nurse i ni a, damdawi in leh a chheh vel a khawsa tur i ni bawk" lo ti leh charh charh pahin thupe tak hian min en ta ran a. Ka hliam tuar hi pawi a ti tih chu ka hria mah se a thil ngaihtuah dan leh sawi chhuah duh dan chuan min țhawng lutuk a, sawi mai tur hrelo deuhin ka melh let reng ringawt.




"Ram ah i kal ve loh pawhin tumah in an sawisel dawn lo che. He khua ah hian ram hna thawk tur a awm pawh i nilo" chhum bung deuh a a tih leh lai chuan "Dinpui!" ka lo ti deuh halh.




"Ka sawi diklo em ni?" a hma ai a rum zawk a tiin khum ațang chuan a tho chhuak nghal a, "an kawsak ang a khawsak ve i duh vanga i danglam ta lutuk pawh hi nang chu i hrethiam kher nang" nelawm lo deuh a min tih khum leh hluk hluk chungin tukverh lam a pan daih a, pawn lam chu thlirin a ding ngawi ta ngal bawk.





"Ka lakah thinrimna leh lungawi lohna i neih chuan țha deuh in sawi rawh, khawchhung a mi chengte hmer tel kher lo hian" ka ti ve ta ngat.




A lo inher vat a, "Babe, an ni ka hmer tel a nilo mah se i danglam tih i inhria em? Hunawl i neih chang pawhin ka kiangah awm lovin an ni kiang ah hlir i tal a, ram kal... Hrep a! I ram kal ve țhin te hian eng rah țha nge a thlen che" a lo tih leh chuan ka sa ve phat mai. Mahse, ka inthunun hram hram a, "Ka tluk sual palh vang mai mai a nih hi" țha tak hian ka ti ta zawk.




"Kha Zoramchhana te kiang ah tehhrep khan kal lo la chuan i na hauh lo ang" vin țhak a lo ti let ve leh in rum tak hian min rawn melh a.


"An kiang ah ka kal vang kher a inhliam ka nilo..."



" A ni maw? Khatiang ramhnuai ngaina lutuk mipa kha ram ah zui lo la chuan khawchhung ah hian i inhliam tawp nang" a ti let nghut. Zoramchhana ngawt a thlur bing deuh tlat chu ka duh lo hle, ka inhliam vanga mawhphur tu ang hrim a a puh deuh tlat pawh chu a atthlak deuh mah mah. Hnial let ve hrep tum a ka ang ziau tawh chu ka thawm hriat vangin ka țhulh leh a. Kar loah Damdawi in tualzawl lamah chuan Lalati te nufa thawm a lo awm ta reng a. Ka ngawih chuh leh ta zawk chu chiang deuh a min rawn melh leh pahin,"Hrereng rawh, thingtlang mi i nilo, khawpui nula, ka nupui tur i nih hi, an nun dan ang a nun ve i mamawh hlek lo" zawi seh chilh zet hian min tih khum leh a. Engmah sawi belhna chi a ni tawh lo tih chu hria in a ngawi zui ve hmak bawk.





He khua a chengte nun dan phung ang a ka nung ve chu a huat tak em em chhan pawh chu ka hrethiam hrep lo. Kan hna vangin an khua ah kan chen (g) ve a ngai a, khawchhung mi leh sa te lo khawsak dan nilo in, khawpui nun chhawm lut tel ila an hna kan thawhsak mipui te nen hian kan inpawh thei ngai lovang. Tun ang a khaw mipui te nen indaidanna awm miah lova inpawh tak a kan awm hi ka hlim ve na ber a ni a, amah ka ngaihsak loh phah bawk lo.



Khawpui ațang thingtlang ah hnathawk a an sawn; khawpui nun an chhawm luh tel tlat vang a mipui rawngbawl sak tu ni si a khua leh tuiin an nel theih miah loh leh an mamawh chang pawh a an pan ngam loh te nun ang neih chu ka duh ve hauh lo bawk.



"A harh tawh em?" Duty room pawn a u Dtei leh damdawi in hnathawk te inbe thawm ah chuan ka hmel landan te siam țha in thawk ka la ham ham a. Kan inhnialna thu hla kha thawktu dangte tak paw’n an lo hriat a hlauhawm viau.



Ka u te nufa lo lut tur ngaichang paha kawngka lam ka melh rual chuan, khum ah min nghahthlak lai a tihtheih nei ve bawk silo, mahni inthiam lohna a khat a Zoramchhana'n min melh ngawih ngawih lai ka mitthla ah a lo lang nghal iarh iarh a. A rilru hrehawm hmel zia lah kha aw…



"Anite...." ti lang lang a Lalat-i te unau lo tlan lut chuan a der nimiah lovin min nuih tir hawk hawk.



"Kan nula te pahnih chuan min lo kan dawn a ni maw?" ka lo ti a, khum ah tlan lawn an lo tum nghal chu u Dteii lo lut ve mek chuan a rawn khap nghal a. Thuawi takin an unau chu khum bulah an ding dun ta rial a, ka ké na te chu ner nang nang chung hian an thlek ve ngial a. An cute dun lutuk chu hmuhnawm ti deuh hian ka lo thlir reng thung.


"Mate, engnge i an tawh?"



"Ka țha tawh lutuk, ka khuate a sik vel a a zahthlak zawk e" ka tih nai nai lai chuan uDteii chu a lo nui nasa ngang mai. Keimah vang a rilru nuam lo deuh a an kha ka duh lo. Dinpuia paw’n thil thleng awm lo ang mai in u Dtei chu a lo dawngsawng a.




"E, Dinpui, nangpawh bai ka rawn suah chho nghal che a, hnathawk kiangah khan ka dah a, Matei kan awmpui theih lai hian zuk in eipuar rawh" tiin u Dtei chuan Dinpuia chu a melh zauh a; Ni a tlak fel tawh vangin khua pawh a thim a ni thawthang ta mai.



Lawmthute sawi luamin Dinpuia pawh a haw thla a, nichin a kan inhnialna erawh ka sawi nawnpui leh ang. Ka hliam tawrh ah hian tumah mawhphurtu an awm lo. U Ditei chuan Thaichhawni nu sa-rep leh dawlrep bai pawlh thak tui deuh min lo ken sak a, ka ei hnem khawp mai. Maipawl tlak rim hmui tui lutuk a lo keng tel bawk a, kuhva siam sawr sawr paha pawn ah u Dtei a kal chhuah hlan chuan Lalati chu khum ah a lo lawn kai that that a. Ka chaw ei lai tihbuak palh hlau deuha a che ve țham țham chu a hmuhnawm zek bawk.




Țhu rem sauh sauh pahin "Anite" a han ti a.




"Umm, chaw i ei tawh em?" tia ka zawh let chuan "Aw, tam deuh ka ei" uar deuh hian a ti a, a nau erawh in tlemte chiah a ei thu a sawi zui zat bawk.



"Ihmaw, Anite, anu in i tiffin tur a siam lai khan apa Ramchhana a lo lut a, kan inchhung ah khan a vei kual vak vak a maw, a chang leh ring deuh deuh te khan a thaw chhuak a, anu bualah khan 'han kal vat teh u, a chanchin ka hre duh' a ti chhen a maw.. anu leh apa te khan an nuih vak vak a..." a ti niap niap



"Apa Ramchhana'n maw?" mak tideuh in ka en ta reng ringawt. Ka mitthla ah ka pa te inchhunga a vei kual thuak thuak tur chu a lo lang a. Vawiin ang chiah khan a pa lian in a chheh vel a awm ho a dip bet run ang chu.




Lalati lah chuan "Aw.. a palian si, anu kha damdawi in ah kal tur khan a hrilh vak vak a, amah lo kal ve mai awm tiraw... naaa, Mahse, doctor ten an jection a hlau a niang" nui hek hek chungin a lo ti leh zel a, ka ngaihtuahna vak kual thui hman lutuk vangin ka chaw ei a tawp vek.



'... I intihnat palh ka hlau lutuk kha ka mangang em a ni' ramhnuai ah ding chung a Zoramchhana'n a tih chhuah tawk lai kha ka mitthla let a, a hmel lan dan ka ngaihruat thiam lo naa mipa rorum lutuk leh natna a hreve thei ang tih pawh rinawm loh khawp a mize tawrhhlehawm khan 'mangang' tih thumal a hmang kha mak erawh ka ti thlawt!




Nge ni a, Jenny sawi ang deuh khan Zoramchhana hian min ngaihtuah tak zet anga, kei hian ka hmu thiam lo zawk.




Ka thil ngaihtuah chu duh lo zetin lu ka thing nak a. Lalati bualah chuan "Nia, doctor in a jection a hlau a niang" tiin ka nui lui ve hak bawk.




"Keichu inchiu ka hlau tawh maih lo, apa Ramchhana chuan a hlau chiang lutuk..." a titi zawm barh barh a, mumal in ka chhang pawh in ka hrelo, u Dtei lo luh lai pawh chu ka lo hre lo a, "Anitei khum ah a lo lawn ve hman hram e... Lalat, chhuk rawh le, Anitei kê kha i tlawh nat sak palh ang" a tih ri ah chuan harhchhuak thut in ka chaw ei bang chu ka chhin țha zui a.



"Anu, Anitei tiffin i siamsak laia Apa Zoramchhana'n damdawi in ah kal tawh ru a tih vak vak kha Aniteii ka hrilh a" a ti a, a nui tel hek hek bawk. Chuta u Ditei nui rah rah chu chiang deuh hian ka melh lui ve tlat.



Ka en tak deuh tlat avang chuan "Engnge khatia min en vak vak" lo tiin a la nui reng tho.



"Engnge khatia mi â ang mai a i nuih ruh ruh a" ka tih let chuan a nui uar zual sauh a.



"A sawi mai mai a nih kha, damdawi in ah kan kal a nih chuan i harh țhat leh țhat loh hriat ve a duh mai a lawm.." a ti tak nain a la nui țha tho.


"Humm" ka ti hmak.


"I la haw reng em ni? Chhun ah kha chuan in insual mai dawn maw ka ti hman a" a’n ti zui a. A va nghal thiam thei tak aw.



"I chhe lutuk, min vin vak vak vel a nih kha" ka ti ta hlar chu min nui hawk hawk a. Ka tiffin vel chu a khung leh vek a.


"Kan Ramchhana hnenah chuan engtin maw i chanchin chu ka sawi dawn a?" nghal zet hian a ti leh hram, a nuih dan chu ka run tawk a tling leh em em tawh.



"A hrechak viau a nih chuan lo kal ve mai rawh se" ka ti nghat a, hnehtu chanchang intife hian ka melh bawk.



"Oh, tu emaw mutthilh hlan khan tu emaw chu a lo kal tawh reng mai thei a sin" u Dteii'n awmze nei fahran a min melh paha a lo tileh chiah chu, ka thin zawn a lo so bulh a. A phu rang nghal dawt dawt mai.




U Dtei nui rah rah chu dang ro hulh hian ka melh ta reng a. Ani lah chuan engmah a sawi zawm duh tawh der bawk silo. Ka mumang nge a tak ram zawk tia ka thliar hran thiam loh a mipa kha Zoramchhana maw a lo nih a?


A hmui a min fawhna ka chal chu ka khawih ringawt a, ka beng ah chuan thum tak ruih a 'dam vat rawh aw' a ti ri kha a rawn ri nawn mawlh mawlh bawk.



"U Dte"


"Humm?"


"Zoramchhana chu a lo kal tak tak em?" tiin ka melh reng nangin amah chu ka hmu pawhin ka hrelo, kha mipa, min thlamuan hneh lutuk tu kha Zoramchhana nitur chuan ka ring ngam chiah lo te pawh aniang..



"Ka hre miah lo" a ti a. "I u te nen kan lo kal a, Ramchhana chu hmuh tur a lo awm ve tawh lo. I muhil nghet sia, kan haw san leh che a, in ah ka buai zui ta char char a, nilengin Ramchhana ka hmu awm pawh ka hrelo" a ti tak nangin a nui leh țhin chuan a thusawi chu awih tur a ni em pawh ka hrethiam tawh lo.




Dinpuia a lo thlen chhoh hnuah u Dtei te nufa pawh an haw thla a, zanin chu Dinpuia’n a hmuh phakah awm tur a min duh tlat vangin Duty room ah ka riah mai a ngaih hmel. Ka phone a rawn ri a, screen ah ka nu hming lo lang chu en in ka thaw hak a.




"Nu?"



"Mambawih, engnge i an tawh? Khawsik te i la nei em?" a rawn ti dam diai a, chanchin Dinpuia’n a lo hrilh a nih hmel.



"Nei tawh lo e, chaw pawh ka ei țeuh" rang deuh a ka tih let chuan alo nui hak hak a. "A tihzia hlauh e, a pun loh nan in enkawl uluk la aw, thlasik a hliam neih chu a pun duh a nia" tiin ka hliam chu ngaihthah lo turin min chah uluk hle a. A hna chungchang te kan sawi dun nual hnu ah thutak zawk hian ka nu chuan "Ram ah i kal ve ţhin em ni?" a lo ti ta khauh.




"Ummm, enteh nu, Buh sengna ah pawh ka kal ve a, me vangin ka thak chhuak vek tih loh ah chuan a nuam ka ti tawp.." phur zet in ka hrilh nghal mawlh mawlh a. Ka mitthla ah Buh seng ni kha a lo lang pah iar iar bawk.




Kumpui linglet a a hnathawh rah seng khawm theih a a awm vanga Zoramchhana hmel a phurna lo lang chhuak te, hnehsawh zet a buh kung a at chhum hmawk hmawk lai te, Buh kung lian fahran a țawn khawm fasur awmna lamah a thiar sauh sauh mai te kha hahthlak angin lang mah se a hmel a phurna lang chhuakte vang khan lo hmutu nih a nuam tak zet.



"Chu, Buh te chu i seng thiam ve em ni?" lo tiin ka nu chu zavak lo in a han nui a. Chutiang thil chu min zawh ngailoh lam zel a nih vangin mak erawh ka ti deuh.




"Thiam ve chiah lo... eirawng te ka lo bawl a" ka tih laiin ka nu nuih chu a lo za kher mai. Thlam chhung ah eirawngbawl a keima buai buai a ka lo buai em em lai a Zoramchhana lo lut in, ka mei chhem nung thei lo lutuk min rawn chhem țhat sak lai te kha ka mitthla let rauh rauh bawk.




"Ummm.... i thawk țha lutuk e. Mahse, Mambawih, tun hnuah chuan ram ah kal ve tawh suh aw" dam zet a ka nu'n a lo tih chuan Dinpuia lam chu ka en thuai a, A phone a lo khawih ve a, min lo en ve lem lo.



"Nu..."



"Ka hria, ram kal te hi a nuam a. Mahse, mipui rawngbawl sak turin kha khua ah khan i awm tih hria la, an mahni enkawl tu tur ber enkawl ngai a i awm te kha a diklo a lawm" a rawn ti dam dap tak naa thupek a ang mah zawk.



Chaw ei a Dinpuia haw thla khan ka nu a bia anih ka ring thiam nghal mai. Dinpuia angin min khap nan thu hriat nuam lo tak tak a sawi chhuak ve lo erawh hriat a nuam deuh.






Zan dang ang bawk in dar8 vel ah chuan khaw chhung chu a reh leh ruih tawh. Current a awm lo bawk nen christmas hla play thawm hriat tur pawh a awm lo a, Duty room ah pawh inverter chian loh avangin Bati kan chhi a, damlo riak lah pathum chiah an ni a, ngaihsak ngai khawp an nilo bawk nen thawktu tlemte chu Duty room ah awm khawm in kan titi khawm lat lat a.



U Dtei te haw hnuah pawh Zoramchhana chu a lo lang ve ta miah lo kha a ni a. Ka chanchin u Dtei sawi a hriat rual in ngaihţha takin nula a rim nghal daih te pawh a ni ang.



"Khawsik i nei leh țan a nih hi" lo tiin Dinpuia chuan ka beng a khawih neuh neuh chu a tawp a, ka chal leh beng hnuai vel a dap kual thuak thuak bawk.




"Nia, a vawt țan viau" ka ti ve mai bawk. Midang an awm ve leh tawh si a, tlai a kan thil sawi kha sawi chhuah lehna hun a awm tawh rih lo. Sawi dun leh erawh ka duh viau mai




"Ka jection leh che nga, mutthilh tum ta che" a ti a, min mut rem tir in damdawi a siam nghal mawlh mawlh a, kan inbawisawm fel hnu chuan puan lum sin in ka mu ta hle hel a.



Khawchhung boruak chu a vawt hîk takzet. Lengtleng tlang kan hnaih em vangin khaw dang aiin thlasik boruak a vawt zual an ti fo a, a dik hle pawhin ka hria. Khua a thim tawh dek dek chuan chet hlek ngawt pawh a peihawm loh hlur zel. Khawtual mite sawi dan tak phei chuan, kum 10 vel a liam awrh chauh ang, zanah thlenga tui an dah hi a tuk zingah chuan vur ah a lo chang vek zel an ti țhin.



Pa Tluanga Gate kalh zo lo let leh chuan, "Gate pawn a mipakhat țhu reng khu tunge maw a nih le?" a rawn ti lut lung lung a.


Ka thinlung chuan beisei a nei nghal. Gate pawn a mihring chu ka hmu thei dawn lo tih hrereng chungin tukverh ah chuan ka dak chhuak a. Rin ang ngeiin ai mit thlawn ang der in a thim muai a, phe zeuh tak ngial pawh a hmuh theih lo.



"Inngaizawng inhmu fal tur innghak mai mai an niang" nu Țhapui chuan uang zet in a ti a. Atthlak lutuk in ka thinlung thung chuan Zoramchhana anih zuk ring ringawt a mawle!




"I lo harh tawh maw?" mit ka men rual a Jenny ka hmu thut chu ka buai deuh nuaih a. Mahse, nui sen sen paha ka puan sin a lo siam țhat chuan mitchhing leh in thawk ka la a. Duty room ah nizan khan ka riak ngawt alawm.



"I lo kal a law, i va fel ve" ka han ti a, tukverh bul ah hmel tak ngul a mipa lo ding run ka hmuh tel leh si chu ka insanmar phah viau. "In.." ka ti deuh niah niah chuan Zoramchhana chuan min lo nuih suk a. Thawh hlim hlawl a hmuh a tan chuan a mak danglam mah mah.



"Nimin tlai khan lo kal ka tum a. Mahse, buh ka her a, ka țhap leh nen khua a lo tlai tawh lutuk a" Jenny chuan a ti siam siam a, Zoramchhana erawh in engmah a sawi be lo, ngawi rengin duty tukverh bulah a ding a, a hmel rum ul ațang chuan engnge a ngaihtuah a hriat theih loh.




"In fel hrim hrim, in lo kal a" tia an pahnih en pahin ka nui lui a.


"I mu țha thei maw?" jenny chuan a ti leh a.



"Mu țha khawp mai, in lo kal duh kher a, in buai dawn nen" tiin han țhut chhuah ve mai ka tum a, mah se ka khup na ut ut vang chuan țhen sak in ka nui lui hak a, rang em em in Jenny vek chuan "Tho chhuak duh suh, hei, u Ramchhana hi ka lo sawm a, kan lo kal lawk a nih hi, chet i la harsat dawn si" tiin ka mu thla leh chu min pui thuai a. Ngawi run a tukverh bul a mipa ding chuan min dip deuh tlat bawk nen thawh chhuah loh law law chu a fin thlak zawk.



"Hei, zo Artui kan lo ken che" an thil min lo ken sak dawhkan chung a mi chu a kawk zeuh a. Ka nui leh mai ringawt.




An pahnih chuan an awm ve deuh reng a, Jenny nen chuan kan ti ti melh melh a. Zoramchhana pawh chair ah a țhu tawh a, țawng tum hmel a pu lem lo nen biak hmasak ka tum bik lo. Dinpuia zing round zo a lo luh hnu reilo te ah Jenny leh Zoramchhana te pawh chu an haw ve ta a. Damdawi in tualzawl an pel dawn laia, Jenny'n Zoramchhana darah a vuan lai chu rei en duh loin Dinpuia bulah ka zun chhuah thu ka sawi daih a. Nimin ah thinrimna nei ang mai a rum zet a Jenny a melh ngawt ngawt kha chu ka hmuh sual a nih ka ring rum rum ta bawk.






Ka inhliam tih chuan khawchhung a deng chhuak thuai a, nu leh pa vengva zual tam tak min kan turin an lo kal a, zo artui ka dawng hnem ngang bawk. A țhenin kurtai te an lo khai a, serthlum lo khai lut țawk tawk lah bang lo, chet ka harsat deuh chhung chu ka pa te ka fin a, min lo kan tute nen chuan kan hlim tlang dar dar țhin viau.




Ka inhliam ațang kar khat a liam leh meuh chuan, tiang hawl in mahniin ka kal thei tawh a. Chet zung zung a la har deuh tih loh ah chuan na em em sawi tur ka nei ta lo. December 20 -15 January thleng chawlh ka la a, kar leh lam hian Aizawl ah kan haw thla tawh ang.





Ka hliam a dam tak deuh hnu chuan tiang hawl kher lo in ka kal ve sawl sawl thei tawh a, Christmas tur a Aizawl ka chhuk san hmain ka vahte awh zawng leih sak chu ka duh a. Ka u te nupa chuan min khap viau mah se Lalati chu ka hruai chhuak a. Nuam a ti reuh ngang leh nghal.



An Toys lo zawrh zing a mi kawk va pah chuan "Anite hi hi ka duh" a ti lauh lauh a.



"Hei kan lo la a nge" dawr nghaktu hnen ah chuan ka ti nghal a. "Mate, nanau ta tur thlan sak ve la" ka tih leh chuan Barbie set a thlang tharh a, keipawh in an lawm zawng tur dang deuh te melh sak in Rambo palstic bag lian khat vek chuan kan inkhai bawr ta luk a.




"An kawr mawi zawrh hi i duh tel em?" tiin Kawrfual sen vat mai, Disney zet a puk laih si chu ka kawhhmuh bawk. Lalati chuan lu a bu rang hle a. Dawr neitu paw’n phur takin a kawrgual zawrh lai chu a la thla thuai a. “Lalati chu i vannei e. Aniteii’n thil thar a lei hnem tawh si che a” a han ti fiam zui a.



Kan Lalati pek chuan, “Anitei chu a fel em alawm” a ti let ngei a. Duhsak man a awm thei ania.



Kal paha phur deuh a Lalati zuang leuh leuh chu ka nuih leh țhin a. Christmas a hnai tawh bawk a, kumtluan a toys awm ngai reng reng lo pawh khawpui a mi chahin Kawtchhuah leh thler lun lai deuh ah an pho chhuak ter tuar a. Naupang te'n nuam an ti ngang bawk. Lei dawn lo mah se an toys zawrh en tur tal in an kal khawm tiau tiau zel.




"Ramhma..." tiri ah chuan ka ding chawl dat a, chawhmeh zawrhna Bazar aţang u Zotei a lo chhuak hlawl a, "min lo nghak ru, kal rual ang u" a rawn tia. Ka thil khai lai a lo hmuh chuan mak tih hmel deuh hian Lalat-i chu a melh a. "Tu emaw chuan thil thar a va ngah dawn ve a.. min sem ve dawn em?" a ti zui a. Lalati hmel lang buai nak mai chu kan thil lei thar awh ve hmel tak in a melh lui tlat bawk.




Lalati'n "Aaaa.. Anu Zote, naupang toys hlir a lawm kan lei, toys khalh rual pawh i nih tawh loh kha" a tih tak reuh ah chuan u Zotei pawh a nui ve hawk hawk.


"Fing ve tawh reuh lutuk" ti hliai in Lalati sam ah a tuai sak a.




In lam panin kan pathum chuan kan inzui ta hnak hnak a, ka ké vang erawhin kan kal sawt lo hle thung. Dawr kawt a an toys zawrh en a Lalati țhiante lo awm khawm in Lalati chu an lo au ve chhen reuh a, Bawihtei pawh toys en in a ding kawi leh rih țhin. Nuam kan ti tlang ngang mai.





"I pawn chhuak leh thei chu a lawmawm tak tak ani" thutak zawk a u Zotei'n a tih tak ah chuan ka chhang let ve luam a.




"Mama a inthiam lo lutuk a, a nguai bur reng mai" a lo ti leh erawh mak ti tak hian ka en a, "I inhliam tlai phei kha chuan a inthiam lo lutuk bawk nen chaw a ei pawh in ka hrelo, ka pa pawn a khap hial a" za vak lo a nui chung hian a lo ti leh zel a.



"Aaaahh, a thiam lohna a awm hleinem, ka fimkhur loh vang a lawm" ka ti tak nanga chutiang leh lutuk a Zoramchhana'n min ngaihtuah tih han hriat chu a mak viau.




"chutiang chuan ngai ve thei se ka ti" zawi tak raih hian a ti leh a, ka en thuai a, ngaihtuahna kal thui hmel tak hian kawng lam a lo bih ngar thung.




An in a hnai zawk vangin U Zotei chu an peng hmasa a. Thui pawh kan la kal hma in Lalati chu hnunglam hawi in a khek raih a, "Apa Ramchhan" ti tung chung a a tlan let leh chu ka en zui a. An in panna step ațang Zoramchhana lo chhuk thla chuan Lalati chu a lo pawm nghal nawlh bawk.



"Khawnge in kal a?" zo taka Lalati pawm chungin ka dinna lam chu an lo pan a. "Aniteii'n toys min lei sak țeuh a" Lalati chuan a ti let a. Ka bul an lo thlen rualin Zoramchhana chuan ka lan dan chu min en chhuak vek a, ngawi run a a kut lehlam lo lek chhuak in kan thil khai lai chu min laksak nghal daih bawk. Lo hnial nachang pawh ka hrelo. A khabe ti kang nghutin kal turin min hrilh leh a, thuawi tak chuan ka kal ve leh mai bawk.



Lalati chuan a toys thar leh a thuamhnaw thar mawi zia te chu a hrilh uar ngang ngang hle, a hrilhpa ber erawh in a nuih suk suk ringawt.




"Apa Ramchhan" ti a Apa Ramchhana hmai bul chet ah a en tak ah chuan Zoramchhana pawh in, "Ummm?" tiin Lalati chu a en a. Chutah le!! "Ihmaw, anu in Aniteii tiffin tur a siam sak lai a 'damdawi in ah kal thuai thuai ru' i tih vak vak kha Anitei ka hrilh a sin!" beisei loh lutuk in Lalati chuan a ti ta mai a. Phawk deuh a Zoramchhana chu ka en chuan Zoramchhana pawh in min lo en ve chiah bawk. Sawi tur a vang teh a sin.




"Kan inchhung ah khan i vei kual vak vak a" pakhat lah chuan a la tita deuh deuh lehnghal. Zoramchhana meuh pawh a hamhaih ve ngang a niang; hrawk a thian khurh ringawt. Kei pawh rang lutukin ka hawi sawn nghal daih a. Ka hmai a lo sa hat hat a, sawi mai tur haihchham taka Zoramchhana thaw chhuak leh hawk thawm te nen chuan ka dang a ti ro vek thei nia…




Lalati bawk chuan, "Tinge damdawi in ah khan i lo kal ve mai loh a, Doctor te'n an chiu che i hlau a mi?" tiin a pa Ramchhana chu a zawt leh mauh mai. Kan Lalati zet chu aww!



Zoramchhana ka en leh chuan naupang in a awm dan a puan fai vek chu a lo hrilhhai hme hle a. Ngawi deuh vung vung chungin a naupang pawm lai chu lei ah a dah thla deuh ringawt a. A ke bula Lalati ding teu chu chhuk melh run run pahin, "Nangte hi i nu ang mai, nghal reuh lutuk" a tih khum hluk a. An kianga lai ru deuh a ka lo ding zum zat chu min rawn melh ve leh thuak a. Engmah sawi belh tawh lovin Lalati nen chuan min kal san ta daih a. Ka ni deuh huai mai.



Mahse, Lalati pek chuan, "Apa Ramchhana chuan Doctor chiu a hlau a" tiin ring fa hian a au zui leh a.



Rang lutukin a ban ah man in "ngawi tawh rawh" ka ti chul a. Ani lah in Pa ang mai a a en, palian leh țawng duh lo ve tak han chhaih kual vel chu nuam a ti ve tlat nge maw ni leh nghal, a nui khek raih raih a.



Ding meuh a Zoramchhana’n "Lalremruat, pen kawrh i duh loh chuan ngawi rawh" a lo tih bul hluk chuan ka phen ah a han tlan lut a.


"Aniteii'n min chhan mai ang" nghal fe hian a ti let leh a. A tih ngaihna tak pawh ka hre tawh lo. Zoramchhana chuan min lo en vung vung a, chutah engmah sawi lo in a kal leh nghal daih a. Lalremruati bawk chuan "Apa Ramchhana'n Aniteii a ngamlo" ring fahran in a han ti leh ta mai a. Ka pa te in chhohna a Zoramchhana chho tawh tur pawh chu lo hawi let in a meng tur deuh khui a. Tihngaihna hrelo lutuk a ka nuih tak ah chuan amah pawh a nui ve ta tawp





Inchhung kan han luh ve chuan inleng dang an lo awm nual a. Ka thil lei sak te chu Lalati chuan intithei tak hian a phawrh a, a nau ta tur leh a ta tur chu a sawi phah zat zat bawk. Inleng te țin hnu ah u Ngaihsaka’n, "Naktuk chu chhang funna tur hnah la in kan ram chhuak dawn em ni?" tiin a lawmpa chu a sawm a.




"A pawi lo ang, kawmthlang te chhung pawh lak kep an ngai tak e" Zoramchhana paw’n a ti ve bul bul a. Nelawm loh deuh angin ka hmu tlat nangin hmeithai leh pachhia te tan chuan thlamuanpui awm tak a ni zia erawh phat ngaihna ka hre lo. Rawtuai a khawrh lahin ‘man a lei tir lovin a thlawn in a pe a.’ Hunpui Christmas a lo thlen dawn lahin chhang funna tur hnah leh a hrui a lak kep zel a. Thingtuah tur lah feh haw pahin a put haw sak thul.




"Matei chu ram ah kan hruai ve tawh lo ang" uang zet a u Ngaihsaka'n a tih chuan tum bar hian ka melh vak a, a lo nui duh der lo leh nghal.




Ka phone a lo ri a, ka nu a lo nia, phone chu chhangin Leihkapui ah ka chhuah phei pui daih a. Khawlai dung a naupang infiam nak nak te thlir kual pahin Ni lum hnung puak zawngin ka țhu a, Lunglei a ka u te chhungkua pawh Mas hmang turin Inpui lamah an awm tawh a, an fate thawm ri nak nak pawh chu ka hre thei.




"Mate, hei, kawlbahra hi țam hnem ah ei rawh" khuhhriangah kawlbahra chhum, thur chhuah hlim hlawl tih hriat tak mai chu u Dteii'n a lo chawi chhuak a.




A hnung ah ngawi rengin Zoramchhana'n a lo zui chhuak bawk. A haw tawh dawn emaw ka tih laiin Leihkapui ah chuan a lo chho ve nulh a. Ka piah deuh ah ngawi ngul hian țhut hmun a rem a. U Dtei lah a lut leh mai bawk nen ka insangmar leh țeuh tawh.




Zoramchhana chu awm ve lo ang a ngai luiin ka nu chu ka biak zawm a. Ka mit sir chuan Kawlbahra chu a ban tih ka hmu thei.




"Mate, i vahte ho hi an bengchheng emai, zan ah kan inbe leh mai dawn em ni?" ka nu in a lo tih tak ah chuan ka hnial bik lo. An thawm a țha bawk em a ni.



Mahse, ka nu nen kan inbe zo chu ka awm dan a lai vek a, awm mai dan tur hrelo fe in phone chu ka khawih zawm ta vel a. Zoramchhana chet phung erawh mit sirin ka thlithlai ru reng tho. Kawlbahra chu a kheh mual mual a. Ram hna a thawh nasa in a kutphah lian zet chu a thap deuh hruih a. Mahse, a kutțang leh kuttin te chu bal leh dum hmuh tur awm lo in a invawng fai leh em em lawi a.



"Ei rawh" tih leh Kawlbahra kheh sa chu ka lam a lo lek a rual a. Mahse, tum lawk hauh loin thil țul lo tawp ka sawi chhuak a. "Jenny pawh ka ni bawk lo, i kheh sak ka ngailo" ka lo ti vin hlar a. Ka sawi zawh rual erawh in ka inngei kher mai. Ka hlauh ang ngeiin Pakhat pui chuan, "Jenny" tih sup pahin chiang fahran hian min rawn melh ta a. Ka inngei zual tulh tulh. Jenny eitur a tihdaih sak lai kha ka lo hmu vek tih chu a hriat ka duh lo a sin le…




Ka tih ngaihna hrelo chuan " I ninawm, keimahin ka kheh ve thei reng" ka ti leh chiam ringawt, rang deuh in kawlbahra chu ka ban a. Mahse, a lo sa lutuk ringawt. Ka kut chu la let zawkin ka thing nghal nawk nawk a. Zoramchhana chuan phun hluk chungin ka ban rekah a rawn man chawt a, hamhaih deuh a ka en laiin ani thung chuan ka kutțang hmawr sen țal chu a lo thlek vung vung a.



"Fimkhur lo thei reuh lutuk" a ti hluk bawk. Ka kut pawh let ka tum rualin a kawlbahra kheh sa chu min pe a. Chiang taka ka mitah tak min en tlat chunga "Jenny i nilo tih ka hria, chuvang chuan ei rawh" a tih tak sup ah chuan ka la ve ta hram, hnuai lam ka melh nghal zal zal bawk. A kheh lai khan engtin nge sa a tih miah loh le? tih ngaihtuah in kawlbahra chu ka ei a, a thlum tui hrep lehnghal.




Kan ngawih dun vang vang lai chuan "Hman ni a thil thleng vang khan min la haw reng em ni?" a lo ti leh ta a, Rang deuh in ka en nghal vat, amah pawh chuan a khup pahnih ah kiu nghat a țhu kun deuh chhal chungin chiang lutuk hian min lo en run a.



"Aih.." za lo zet hian a lo țhen suk a.



"Min haw lo maw?" lo ti nawn leh ngatin ka mitah tak min melh tlat a. A mitmeng chu ka hrethiam lo, a thim khup a mah se ka biang ti sa hat hat thei khawpin keimah ah nghawng a nei lawi bawk si, ka chhungril thleng hian laih luat avangin ka sa pup pup a ni ber mai




"Huatna chhan tur che a awm hleinem?" ti a mit ka laksawn laiin a lo nui hawk a. Ka en leh nghal a. A mitmeng mawlh mai chu aw… Melh let harsa ka tih rualin melh loh harsa ka ti tho bawk si. Ka lungphu thleng a min nghawng danglam vek chu hrehawm viau mah se a nuam ru riau lawi a! Ka eng hi nge maw dik lo ta mai le?



Nuihza hmai sen deuh țeuh chung hian Zoramchhana vek chuan, "Hmeichhe pakhat; mahni tawk a kawlhrawng ve takin țap chung a sual min tih thu a sawi lai kha chuan min haw hle tur ah ka lo ngai mai a sin" a ti dut dut a. 'Kawlhrawng ve zet' min tih kher vanga ka mitmeng ling nghal hlar chu a lawm zawng tak a ni leh nghal em maw ni. A mitmeng de sawt sawt chuan min melh lui tlat a.



"Khami ni kha chuan sual ka ti che a lawm.. " ka han ti hliai a. A mitko lo kan uk a ka lamah a lo thlek hnai deuh chuan sawi mai tur ka hre leh tawh bawk silo. A darah nam sak pahin "I ninawm, min lo kheh sak leh teh" ka tih ta ringawt, a lo nui ta ruh ruh a.



"Eng nge, a sat vangin ka kheh ngam lo tih i hre reng" ka ti leh pawng pawng, a hmui hnuai seh in lu a thing nghut nghut a, ngawi reng chuan kawlbahra chu min kheh sak ve leh mai bawk.




Nakin deuh ah chuan keima hriat tur chauh in a sawi tih haitheih loh khawp a aw zawi leh thutak bawk si hian "Jenny chu engtin maw?" a lo ti nawn leh a.




Thawk chelh tlat chung hian ka melh da da a, ani erawh in
a thil kheh lai chu alo melh run a, ka lungphu inthum rawn dup dup ri chu a hre pha hialin ka ring.




"I sawi awmzia ka hrelo" zawite a ka tih chuan a lo hawi chhuak thut a. Kan mit a intawn siah rual a a thu sawi vang chuan ka thawk lak a buai vek! "Keipawn nichin lawk a Jenny chungchang i sawi chhuah ngawt chhan kha ka hre lo? Engvang a lo sawi chhuak nge i nih?" ti deuh khawlh in min melh ta tlat a. Chhan let ngaihna ka hre bawk silo chu ka chiai vek. "I thik em ni?" chhan ngaihna hrelo a ka hamhaih em em lai chuan a rawn tithut a. Ka nghing lawih.




"Zoramchhan!" vin leh nghek ka tum viau laiin ka aw chu zuk khur a mawle!!




Eng emaw hi ka han sawi leh dawn a, keimah ațang eng emaw a beisei tih hriat taka min lo melh tlatna te vang chuan sawi tur ka haihchham zo a. "Ka.. ka lut tawh dawn" ka ti bah nawk nawk. Ka țhutna ațang rang deuh a ka tho chhuak chu nghet lutuk a ka ban rek ah lo man in min phih țhu leh hmiah a. Ka tih ngaihna hrelo chuan "Eng nge?" ka tih khum chiam ringawt.



Ani lah chuan mahni inringtawk tak hian "Ka zawhna che kha min la chhang lo" a ti khauh. Ka tal aih aih lai; tha hmang miah lo ang a lang si a min chelh beh zual sauh chuan ka mangang takzet tawh




"Min thlah rawh" ka han ti ngang ngang a, Zoramchhana lah chuan bung zet hian "ka zawhna che kha min chhang phawt rawh" a lo ti tlat si. Vin fahran a, ‘Jenny kha engvang ngawt in nge ka thik ang?’ tih khum tuar tur ka ni maw le. Mahse, ka sawi chhuak thei tlat lo. Ring lutuk in au khum nghek mah ila... ka... ka aw ri ațangin engkim a hrethiam vek tho dawn.




"Min thlah rawh ka tih chu..." chuai raiah a ka tih lai mekin thawk lehkhat ah a lam ah min pawt hnai thut a. A awmah ka intauh mai loh nan indangin ka kut lehlam chu kan taksa inkarah ah ka tawm a, kan hmai chu a insilo chauh bawk. "Min chhang rawh, Jenny kha i thik? A dik em?" tiin ngenngawl tak hian min zawt nawn leh a. A mitmeng te, a thusawi leh a aw ri ngenngawl lutuk te chuan ka thisen a ti lum a. Ka tha a khur dar dar. Kan chal insi lo chauh a hnai a min melh tupa mit meng ah chuan MIPA nihna zawng zawng ka hmu vek a. Chuthil ka hmu thiam ta erawh ka inhuat phah em em lawi si!




Chutih lai takchuan Leihkapui hnuai ațang "Mate?" rawn ti ri a lo chhuak thut a. Ka awm hrang zui hlawl bawk, rum deuh hawk pahin Zoramchhana paw’n ka kut a man beh chu a thlah ruai ruai a. Leihkapui hnuai ațang u Nathan-a lo chhuak chho hlawl ka han hmu zui leh phei chu mak tiin ka meng kawk kawk a.



"U?" ka ti deuh chiam. Ahnung ah a nupui U Lateii a lo lang ve leh chiah bawk nen at hmel deuh hian ka nui chhuak hak a.



"Surprise!!!" An nupa chu hlawhtling inti lutuk in ban an phar a, kei erawh in rin harsa ka la ti! Ngopa ah! Ka u te nupa maw...




Leihkapui ah chuan an lo lawn chho a. Phur lutuk a u Lateii'n min kuah tak chung chungah chuan mumang a nilo tih ka ring ngam ve chiah. "A van mak ve!" kan han tih chuan "Zep harsa ka tih zia i hria em? Khawimaw, i va thu em em ve, haw thla vat inla intuaihnum deuh i ngai a nih hi" u Latei chuan a ti nghal bawrh bawrh a.




Harsa tiru deuh hian ka ding chhuak a, min chhang chiah tu u Nathan-a chu ka kuah chawt a, a ban pahnih a nghet takaa min kuah bet in ani pawn thawk a la ham ham mai, uang thuang deuh a"Ngaihawm ve nilnelnu" a lo tih takah chuan nui hak pahin a hnungzang ah ka țham sak vak a, a 'Aiah' țhat a. Mahse, a nui zui hawk hawk tho.




"Engtin nge in lo kal theih zawk a?" ka tih laia kawt zawl ah car chahbi vai vir chung a kan lam pan a Dinpuia lo kal ve mek chu ka nur khum ta nawng nawng a. "Misual lutuk, engkim i hre lawk vek maw?" Ka lo ti chuan nui hawk hawk in min lo fin a.




"Enge in lo tih dawn? Oh, engtik khan nge in lo kal.. naaa, tukin ah in lo chuak leh si ang chu" ka ti bah nawk nawk mai. Kumtir khan ka nu ho in min thlah a, hna an neih ve tawh vang leh, u Latei a hrisel vak bik loh avangin hmunpui lam ah chawlh an neih chuan an liam thla nghal zel a. Kei lahin chawlh ka nei thei bik silo a. Unau pianghmun pawh kan inhmu mumal thei ngailo.




Chutia ka u te ngawt ngaihven a ka hlim em em lai chuan a țhutna ațang Zoramchhana tho chhuak chu ka hmu thut a. A awm ve tih hrelo lek a kan ri chiam mai kha nuamlo a ti ngawt ang.




"U.. hei, ka.. ka ţhianpa Zoramchhana anih hi, Chuan, Ramchhan hei ka u te nupa, u Nathan-a leh u Lateii" ka ti a. Ka țhian ang a Zoramchhana ka sawi chhuah vawi khat na a ni hial bawk ang.



"Kan pasalțha a chu kan hmu ve thei hram a lawm, i sa kah te kan lo ei ve thei a, kan lawm teh a sin" ti hluai in u Nathana chuan Zoramchhana chu a chibai thuai a, u Latei pawn chibai ve in lawmthu an hrilh mawlh mawlh.




Zoramchhana hmel a nuam tih lohna ka hmuh chuan ka lo khawngaih ve em em ringawt a, "Tikhan lo inkawm rawh u, ka va haw phei tawh ang e" tiin a kal sawn zet tawh chu Dinpuia'n "Ramchhan" tiin a au leh rih a.




Chutia Ramchhana a chelh khaw muang ngawt chu hrethiam lo takin Dinpuia chu ka en ran a, Ka kawngah nghet tak hian a rawn kuah a. Muangchang a Zoramchhana lo inher let leh chu en let ve ngam lo in u Latei chu ka be daih.




"Naktuk hian min ramchhuahpui peih angngem? Țhianpa bulah hian i chanchin ka sawi nasa a, i rual a ramvah a chak teh a nia, silaimu nen meuh a sin a rawn thawhchhuah" a thil sawi maksak zet avang chuan Dinpuia chu ka en leh lo thei lo. Zoramchhana te nen a ramvah ho maw?





"Thla ngawt a che u, Ramchhana hman leh hman loh pawh inhre lo" ka țawng chhuah lai pawh ka hrelo. Min en deuh țhap a. A hmelhriat țha pawh nihlei lo te nen a ramchhuah chu a duh bik ngawt lo ang.




"Aih, ka hman mai ang, zan ah kan rel țha leh dawn nia" Zoramchhana aw nghet zet avang chuan ka va en phawk deuh kawk a, a inher leh hma chuan ka kawng a Dinpuia min kuahna chu chiang taka lo en in a nui lui suk a. Biak hman loh in a chhuk nghal daih bawk.




Ka pa te in ah chuan kan ri nak nak a, ka nu leh pa paw’n ka u te nupa lo kal tur chu an lo hrelawk reng tih chaw ei dawn ah ka hre chiah bawk. U Latei leh U Dtei te chu an inkawm thei fu a, ka chhungte chanchin an sawi lai te chuan rilru khingbai hu hian ka ngaithla ve a. Zoramchhana ka ngaihtuah tel tlat vangin ka ipik hluah hluah. Dinpuia lah in hman ni lawk khan hriat nuam lo zetin a chanchin a sawi a, tun ah lem.. ram chhuahpui ah a sawm leh ang lawi a! Hepa pawh hian engthil nge maw tih a tum chiah le?




"I u te lo kal chu i lawm vak nange?" tih ri avang chuan ka inher a, kawngka khar phui in Dinpuia pawh a lo chhuak ve mek.



"Aih.. thil dang ka lo ngaihtuah a" ka tih laiin hnung lam ațangin min lo kuah a, zanriah ei hun lai anih avangin veivak hmuh tur an vang hle bawk.




Ka darah khabe lo nghat chunga "A țhawng che em?" a tih chuan "Tehreng mai, ka mumang amaw ka ti hman a lawm" ka ti vat. Dinpuia chu a lo nui che dat a.




"Ih, ngati nge Zoramchhana kha ramvah pui ah i sawm kher a?" nuam ti bik chiah lo a ka zawh chuan "I u in a chak em a lawm" a lo ti mai a. Ka hmin zan lo chu a hrethiam kher em ka hrelo. A sa kah chang a țhian sa beng u Ngaihsaka a lo pek hi a chang chuan 'kei ni chuan kan ei ngun a lawm' tiin a repin ka chhungte an thawn țhin a, chuta țang bak ka u hian Zoramchhana a hre dawn lo. Ram lam aia khawpui nun nuam ti zawk ani tih lah ka hrechiang thawkhat viau bawk.



"Ka u in engtin teh daih nge Ramchhana chanchin a hriat a?" tiin ka zawt leh ngat.




"Babe?" Lungawi loh hmel fe hian a lo ti ta reng, min kuahna chu thlah in amah en turin min kuai her a. "Thingtlang tlangval sa kap thei zet mai kan ramvah pui tur chu a pawina a awm em?" a rawn ti ve ta salh salh a. Zoramchhana a tham loh zia chu thup buai ngai ah pawh a ruat tawh lo.





"Zoramchhana hi thingtlang tlangval satliah ngawt a nilo. Chu chu kan hre ve ve, khatiangin a chanchin sawi tawh suh" ka ti a, ka aw chang leh insehruh nasa lutuk chu keipawn mak ka inti.




Ngeiawm deuh in Dinpuia chuan " POLICE SI a ni țhin tak e" min tih khum kher a "Dinpui, i kâ kha veng țha rawh" din hnaih paha ka tih chan hrak chuan, “Wow!" ngeiawm fe a min tih khum in Dinpuia chu a nui ro hak bawk. "Tun ah khan Zoramchhana lam ah țangin kei hi min khak.. a dik em?" a lo tih leh chuan ka inthunun ta deuh.




"I duh dan dan in i ngai thei ang" ka ti let hmak. Lungawi loh hmel tak a Dinpuia insehruh țalh țalh chu ka melh lui ve tlat bawk. Chutah min han kawk deuh sak pahin "Hei hi a lawm i danglam ka tih kha" min tih khum leh a, ngeiawm fe a nui chungin a tawlh hnung hrat bawk.




"Huh, police SI hlui, thingtlang ah ram hnathawk a eizawng ta si i țan avangin tun ah hian kan inhnial mek tih hi rin a va harsa deuh ve!" a han ti leh kher a, Zoramchhana chanchin a sawi danin min tithinur hluah hluah mai chu kei ngei pawh in mak ka ti letling hial tawh.




Chhan let tum a ka ang ziau tawh chu, ka hnung lam va en chunga Dinpuia nui sak ka hmuh rualin ka tawp leh rih a. Ka hawi let chuan zial zu chungin step ah chuan Zoramchhana chu a lo chhuak chho ve chiah chu niin.




"A lo thleng rang khawp mai. Kan ram chhuah tur vang nge thil dang vang zawk tih lah tu hriat va ni suh" hmuhsit hmel takin Dinpuia chuan ka beng bul ah a rawn ti leh a. Chumi hnu chuan engmah thleng lo ang maiin "E, i va hman hma ve?" tiin zoramchhana chu a lo be leh nghal thei.





"Mambawihi u te kha an rawn tlan chau awm sia, mut vat an duh ka ring a" Zoramchhana chuan Dinpuia rilru put hmang hrethiam pha lo tih lah a lang reng.





"Nang nge nge, i ngaihtuah kim țhin e, lut ila, țhianpa phur lutuk in in in a kal a rawt hma in" Dinpuia chuan a han ti vel a, ka kawngah a lo kuah leh chuan ka tim deuh chawi a mahse, engahmah ngaih loh hmel tak a Zoramchhana'n min kal pel chuan ka thaw deuh huai mai.




Lalati te unau chu u Dteiin a mutpui daih a, Dinpuia khawsak phungin ka ngaih a tițha thei miah lo chuan ka chhungril ah hlauhthawnna a siam tlat a! Ka u in ka pa ulhbun a lo keng tel tih ka hriat leh lek phei chuan ka ngaihtuahna a kal dik hleithei tawh lo.




Zoramchhana leh u Ngaihsaka te lahin ka u meuh in ram chhuah a chak chuan ramvah pui chu an tih tur ah an ngai nghet hmak mai si. Ram chinchang leh sa tlatna mual țha an hriat te chu sawi dun in ka pa silai, ka u in a lo ken chu Zoramchhana chuan a thlek kual thuak thuak reng a.




Ka pa silai dawt ngil țha lutuk chu a fak ve luam bawk. Mupui leh mu-sep vel ka u rawn ken tel chu stool ah an dah rum a, ka u chu ka en țhin a, ramchhuah a chak ve tak tak vang nge Dinpuia nen hian thil tum ruk an neih vang zawk? tih te ka ngaihtuah kual a.





Ka u leh Dinpuia te hi tette aţang a inkawm chho an ni a, thil engpawh a atthlak lam emaw a țha lam emaw pawh nise an ti dun vek zel. Insual an hrat ve lai paw’n an inchhan em em a, pakhat in insual a chak tawh chuan hnialna nei hauhin insualpui tur zawngin a che chhuak mai țhin.




"Ramvah kher chu a țul viau em mawni le?" ka ti sep a, mipa ho chuan min lo en țhup a, ka ngaihtuahna a awm ka sawi chhuak tih ka hriat rual chuan ka u chu ka nuih tlawn a.





"I ram chhuak ngai der silo, silai hman pawh i thiam a mi?" ka ti chu a lawm loh hmel kher mai.





"USA ah ka zin țum pawn Sazuk ka kap tih kha i hre tawh lo em ni?" tiin min nuih a. Engmah ka sawi belh tawh lo.





Ka pa nau hi US ah Doctor hna thawkin chhungkua in an awm a. Ka patea chuan kan unau-ah U Nathan-a a duat fal hle a. Kein’n vawi khat chiah USA ram kan la hmuh laiin u Nathan-a erawh a ticket man te a lo tum sak țhin a, chawlh a zuk hman changin ka pa te a nen chuan sawrkar ah phalna la in an ramvak țhin. Mi ram ah chuan a hman hman an ramvak ve tawp lo a, sawrkar ah dilna an theh lut a, sawrkar lamin an sa kah theih zat leh an sakah tur te bithliah sakin phalna an lo pe chhuak leh mai țhin.






"Eng sa emaw ber kan kah hlauh chuan a repin inhawn thla ang a, i nu leh pa pawn an ei chak ang" u Ngaihsaka'n a tih chuan hmin kim lo zetin ka bu ta vel mai mai a. Dinpuia mitmeng erawh ka hrethiam hauh lo thung.






Ka zan mu lai chu ka mumang rapthlak lutuk ațang chuan țhang harh chhuak a, ka țhu chhuak zui hlawl bawk. Thlan in min lo bual huh vek a, ka lungphu a chu a rik hian a lo ri dawt dawt bawk. Ka hmai huh hliam mai ka tuai tawk rual chuan ka ţap tih ka inhrechiah.





Ka mittui chu hru hul tawk tawk in thawk ka la ham ham a. Current a lo awm silo nen pindan chhung chu a thim vek. Ka kiang ah tui zet a uLateii mu chu tukverh ațang thla eng lo lut in a chhun thei a, ka thlek thuai a, ka thawm ah a harh loh tih chu hria in ka thaw deuh huai a.






Mahse, Ka mumang vang chuan ka awm a nuam lo zui țun a,
Ramhnuai ah sa chang a, Thingkunga Zoramchhana țhu lai kha khawi lam ațang nge tih pawh hria loh silai-mu lo thlawk fua in a awm ah tak a fuh siah a. A awma silai mu luh ruala a thisen per sawk leh a kâ ațanga thisen lo baw chhuak puat kha chiang takin ka hmu bawk.

[Abbra Reo Ririni]

Zingkar ah chuan rilru nuam lo zetin ka u ram kal tur a insiam chu ka thlir reng a, zan-khat riah an la tum ta deuh deuh bawk si. Ka mumang țhalo lutuk kha ka ngaihtuah chhuah apiangin ka luak a chhuak nghul a. Zing thingpui takngial pawh ka in hleithei lo.




Zoramchhana awm a Silai mu lut sawk lai te, a kâ chhung ațang thisen lo baw chhuak nghal puat lai te kha mumang mah nise a tak ang maiin ka hmu chiang a. Chutiang lam la mang ngai reng reng lo tan chuan ngaihțha a awm a har a, ngaihtuah loh loh tur ngaihtuah in rilru a vak kual ruai a. Hlauthawnna in min țham er er bawk.





"A vawt si, ngati nge maw ram chhuah chu i chak tlat le?” ka ti hap, bag lian lo tak a mamawh khung a ka u che vel chu a tawp chut a. Ka in luah zim te ah min lo fin a, u Latei erawh in pindan lam ah phone a hmang thung.




Ka u chuan, "Min ngaihtuah lutuk suh, mipa kan nih hi" a ti mai a. Ka melh ngai melh veng veng lai chu min nuih pahin Puan lum a khung tel pah a.





An ni mipa rual thil tum chu kei a lo țhulh tir theih rual an ni lo tih chu ka hrethiam a,"Va fimkhur hle ang che u, sa ani ngei tih in chian phawt loh chuan kap ngawt lo ula" ka ti leh a. Ka ngaih an ti țha thei thlawt lo.



ka u chu a nui hawk a, "Ka hria e.. ka hria e" tiin ka malpui ah a lo beng a, a la nui tho.



"Dinpuia phei chu ram kal ngai miah lo a nia, inzui tlat ang cheu" ngenngawl deuh in ka melh a. Ka u chuan ka thusawi chu a bengkhawn tawh em em silo a, keimah ipik pik in ka ipik em em a, ka hah hluah hluah. A chang leh u Ngaihsaka a awm ve dawn tho, Zoramchhana chungah chuan eng thil țhalo mah a thleng lo ang tih te in ka han inhnem leh ringawt thul. Awmzia erawh a awm lem lo khawp mai.





Ka pa te in ah tuk țhuan kan ei chho leh a, u Ngaihsaka chu a lo insiam peih fel vek tawh. Dinpuia pawh a duty thuamhnaw ngawt lo deuh inbel in a lo chhuk thla ve a. Silai a pu ve lo chu ka lawm ru kher mai.




"Mambawihi te reuh hian min ngaihtuah leh lutuk, awm a ti nuam lo mai dawn" ka u in a tih laia Dinpuia'n min rawn melh kher chu ka haw leh hlur tawh.




"Ramvachal pahnih kar ah kan chhuak dawn a, kan ngaihtuah awm hleihnem" Dinpuia chuan a ti ve a. Nang kha ka ngaihtuah reng reng lo che tih khum mai chu ka'n chak khawp a. Tih erawh ka ti ta em lo.




Tukverh a ka dah rualin an in ațanga Zoramchhana lo chhuak ve chiah chu ka va hmu zui a, ngawi rengin pawn ah ka chhuak nghal a. Ka ngaihtuah lutuk vangin ka muhil thei lo tih hreta se engtin tak ngai ang maw?




Leihkapui piah a step tawp ah chuan ka lo nghak a, Zoramchhana pawh chu a lo hnai zel a. A silai enkawl uluk em em, hnum tle hlurh leh rucksack dum puar ang reng tak hi a ak a. Ni lum ai a pawn a patling lo țhu khawm ho chuan " i ramvak dawn em ni?" An lo ti luam hlawm a. Pasalțha leh sa la thei ngang ani a, a rual a ram chhuah chak hi an kuh țûn zel.



Patling nilum ai te a lo kal pel hnu chuan a lo hawi chho a, step chhuah chhoh na a ka lo ding chu min rawn hmu in a chawl deuh dat a, rei erawh a nilo. Ka lo dinna step ah chuan inthawzo tak hian a rawn chho thauh thauh a. Tun țum chu ram chhuak ve lo tur a lo hrilh tawl mai tur em niang; hmeichhe thusawi a zawm duh awm der silo.




"An inpeih tawh hlawm em?" ti sup in a lo chho zel a. Sipai uniform hlui a inbel a, a hma kha chuan a thuamhnaw inbel țhin vangin helpawl zing a mi a ang zual in ka hre țhin. Tun țum ah erawh ka hmuh dan a dang vek tawh.




"Peih tawh" ti a ka chhan let chuan a bu nghut a. Min kal pelh mai a tum chu tum lawk lo deuh in a ban rekah ka man chat a. Ka chet dan chu a beisei lawk bik loh tih hriat takin Zoramchhana chu a thaw deuh hawk a. Muangchang a lo hawi letin chiang fe hian min rawn melh a.




"Enge nita Ramhmangaih" Min koh dan tehhrep pawh chu..



"Engati nge riah kher in tum a?" ka ti deuh phawng a, "Riak kher lovin dai velah ram chhuah pui mai mai zawk ula" ngenngawl tak hian ka melh pah a.



"Riah kha i u khan a chak a lawm.." a lo ti sam then.



"Mahse..." han ti hap pahin ka din hnaih sauh bawk. Ramchhana erawh in a ban rek ka chelh behna chu a melh ngur ngur a. Hrechhuak thut in ka thlah thuai a, chutah chiang fahran hian ka mitah tak min rawn melh leh a. Ka sawi duh nei, sawi chhuak hreh bawk si chu ka hah țeuh a.




"Min chah duh i nei em ni? Nge.. i bialpa kha a inhliam palh loh nan a veng țha turin min chah dawn zawk" zawi zeta a lo tih hrawih chuan lu ka thin khum nawk nawk. A ngaihtuahna chu a buai hmel ta hle a.




A mitah tak en let ve pahin zawite hian, "fimkhur ang che aw" ka ti a, chu ka țawngkam vanga Zoramchhana men buai deuh nak chhung chu a reilo, țawngka a min chhang let lo in min buk khum a.



Min kal san leh nghal mai a tum chu a kawr-tlangah ka pawt leh tlat a. Ka chet dan chuan a rilru a chawh buai hmel hle a, a rum deuh hawk a. Chutah ka hma ah lo ding vut pahin a kutphah lianpui chuan ka dar tawn tawn ah a rawn dawm zui a. Chiang leh uluk fahran a min melh chung a lo kun hiam in, “I sawi duh i sawi hauh lo. A dik em?” a ti zawi ruih.





Keipawn zep buai chu țulin ka hre tawh lo, "Nizan ka mumang ah Silai mu in a lo fuh che a" ka ti tlang hap a, mit tizim sûn hian min en ngut ngut a, "ka mumangah ka hmu che a lawm" ka han ti leh laia a lo kiai deuh suk chuan "Dik tak chuan ka ngaihtuah che" ka ti khum phawng a.




Ka țawngkam vang chuan a nui hawk dawn emaw ka ti deuh a mahse, muk zet a min en chungin ka dar a vawnna chu a thlah ta zawk a.




"Zoramchhan, ka ti tak tak, ka mumang ah silai mu in a lo fuh che a, i thisen chhuak lai pawh ka hmu.. khawngaih takin tun țum tal chu ram chhuak lo mai ula" ngenngawl deuh hian ka ti ta ngang ngang a, zah ah pawh ka la thei tawh lo.




Zoramchhana chuan "Min ngaihtuah" min melh vung vung chungin a lo ti chhuak sup. Ka mumang rapthlak zet chu ngaihțhat loh pui awm pawh in a lang lo.




" Aw, ka ngaihtuah che. Ka u leh Dinpuia te lah Silai chelek khat lutuk ve ve, a zei loh luat ah in inhliam palh mawlh ka hlau, chuvangin riak lo in lehlang mai zawk ula” ngenngawl taka tia ka chho melh ngawih ngawih chu min lo nuih suk a. A nuih chhan tur awm ka hriat loh em avangin ka hrilhhai khawp mai.



Chutah, "Mang țha i mang a nih chu" a lo ti mauh mai a, mak ti lutuk hian "Maw... " ka ti hu a.



"Sa ka kap dawn tih i lo hmu lawk a nih chu" tia a nui suk chu hrethiam lo zet hian ka thlek vak vak ta ngawt.



"Min ngaihtuah suh, ka chungah engthil țha lo mah a thleng hauh lo ang. Sa ka lo hawn dawn che alawm" ti a mit min siai chuan ka lai leh ringawt tawh. Lungawi hmel zet a kiai suk in min kal san ta daih a. Ka lungphu ri dawt dawt zawn ah chuan kut ka nghat a. Engati nge Zoramchhana bul hnai ah ka awm hian intlansiakna ah hah deuh a tlan ang mai a a inthum rawn vak vak zel le.




Dinpuia car in motor tlan theihna thleng an kal dawn a, car chhung ah an inhlan luh mawlh mawlh lai te chuan Zoramchhana chu ka lo thlir leh ngawih ngawih ţhin, keiin ka mumang kha ka hlauhthawn pui em em laiin ani thung chuan vanneihna ang riak ah a ruat a; sa a kah phah dawn in a ngai bawk. Kan rilru put dan in ang lo lutuk chuan ngaihdan mumal pawh min neih tir thei lo. Marawh chu, Zoramchhana ber in ka mumanga a lo thi kha a ngaih țhat loh phah ve lo a, ‘mang țha’ ang riaka a ngai erawh chhan țha a awm ngei ka ring. Pasalțha te hian serh leh sang an nei hrang bik tlat a.





Zoramchhana chuan Car hnung lam kawngka chu a pawt hawng a. A luh hma chuan, leihkapui țhutthleng nghenchhan ah khabe nghat meuh a ka lo thlir reng chu min rawn thlek chho vung vung a.



Kal ve lo mai se ti zet hian beisei nei deuh in ka lo la melh tlat tih a lo hmuh chuan a nuihzat hmel viau. Chutah ngaihthat hmel em em a min lo en in "Eng sa nge i duh?" a rawn ti thut a, ka phu deuh zawk. "Ih.. Sakhi lo kap rawh" ka ti let vat a. A kekawr ipte ah a kut pahnih zen lut pahin a bu nghut nghut a.




"Sakhi... A chek hawp turin lo inring la" ti sup in nghal zet hian mit a lo siai leh roh a, Ka lai pheng chuan hmui hnuai pet pahin ka zuk melh rum deuh vak a. A lungawi hmel lutuk chu a kiam phah chuang lo, kiai suk suk chungin a țhu lut ve ta a. Lalati te unau pawn apa chu an bye bye lap lap a, keipawn an liam thleng chuan ka thlir a, an hmuh theih tawh loh tak ah chuan ka ruak nghal vawng vawng mai.





“Inhliam miah lo ang che, Sakhi kap a i lo haw leh loh vaih chuan.." ka ti sep sep a. Sawi leh mai tur hrelo in ka thaw chhuak hliai bawk.



Khawchhung chu Zoramchhana a awm loh tak vang nge ni a reh tlawk tlawk hian ka hria. Patling nilum ai te pawh an lo kal darh tawh a. Khawlai dung te chu a lo ruak hiai a, ral hla deuh taka naupang țap ri ngawt lo chu thawm dang avang em em a. A reh tlawk tlawk lutuk chuan ka lung a ti leng thut a, lung a chhe dawn dawn ta mai.




Intih harh tumin ka țhutna ațang chuan ka tho chhuak a, ka inher chiah erawh chu ka au țhawt lo chauh,"Min tihlau a lawm!" ti vak in u Dtei chu ka en deuh tlawk tlawk a. Thawm nei miah loin ka hnung ah a lo ding reng a. Ka hmu thut bawk nen ka thinphu chen in a rang hlawp hlawp mai.



Ani lah chuan nghal lutuk hian "ka ti hlau che maw?" ti pahin mit min siai kher a.



Zoramchhana nen kan inbe lai kha a lo hmu vek tih ka hriat rual chuan ka zak hle a, ka hmai chu a lo sa pap pap a, u Dtei lah chuan nghal fahran in hmun leh hmun ah mit min siai chhen a.



"I va han nghal ber, fa pahnih i neih tawh kha" ka'n ti deuh ringawt a. Ani nuih chu a za tulh tulh a, “ka nghal maw” tiin mit min han siai leh a, ka tih ngaihna hre lo lai lutuk bawk si chuan inchhungah ka luh tauh san nghawng nghawng a.



Hna kal hma in Aizawl a ken tur thuamhnaw ka inkhung khawm țan a, u Latei erawh u Dtei te in ah a awm thung. WhatsApp ațangin u Nathan-a ka be deuh reng a,. Signal a țha em em silo nen min chhang har thei ropui bawk si.




"Hahdam rawh, pasalțha ani a, a sawi ang khan a chungah engmah a thleng dawn lo" ti hap in ka'n thaw chhuak leh hliai țhin a. Ka hahdam thei tak tak chuang lo.




Ka hna kal tur ka pa te in a ka lut kawi chu u Dtei chuan min lo chhaih leh chat tawh, "Apa Ramchhana'n Sakhi a lo kap ang a, a chek kan hawp nghek ang" a ti vel a. Ka melh rumna lah chu a ngai pawimawh duh mang silo.




Ka duty chu U Lateii’n min zui ve a, damlo an tam lo a, chaw hnu her ah chuan damdawi in leh a chheh vel chu ka fan kual pui a, damdawi in tlang sang lai ațang chuan u Ngaihsaka'n an ram vahna hmun tur nia a sawi, Sathar-kham ram chu a lang hlim duk a, ka hriat loh karin chulam ngawt chu ka lo thlir leh veng veng zel.




"I peih zawk e. Heti hian khawchhung a reh tlawk tlawk a, i khua a har ngai lo em ni?" tia u Lateii’n min zawh chuan ka nuih let ringawt. Tun hma zawng khan hetiang reng reng hian khaw chhung hi a reh tih ka lo hrethiam ngailo. Tukin zet erawh roh san tawh khua ang maiin a reh tlawk tlawk a. Khua a har vawng vawng mai.




"Kum thar lam ah chuan Dinpuia pawh Aizawl ah an sawn dawn kha" a ti leh chu ka en phawk hle a. U Latei lah chuan, "A la hrilh lo che em ni? Ka pa a lo bia a, a insawn a hnai tawh tho a, Aizawl ah sawn turin a dil a lawm" a ti leh zel a. Vawi khatmah insawn chungchang kan sawi dun hauh lo.




"Aaa... min hrilh tawh tho a lawm, a la hla ang reng sia, ka lo ngaihtuah leh tawh vak lo" ka ti ta ringawt a.



"Khawpui ah hna thawk la nuam pawh i ti daih zawk ang..." Ka chhang let tawh lo, chiang tak erawh in he khua chhuah san hian ka insawn ve dawn lo tih zawng ka hria.




Khua a thim a, zan a lo thlen meuh chuan ka mang nelawm loh zet kha hrechhuak in ngaih a țha lo ruai a, u Latei bulah ka u call turin ka hrilh sek sek a. A call tlang thei bik silo. U Ngaihsaka number ah te chuan ka call a, ani pawh chu a tlang thei chuang lo.




"Inkhua hi signal a chhe si, ramhnuai ah phei chuan signal an nei tawp lo ang" a ti hlak hlak a. Chu chu ka ring deuh tho nangin ngaihțhat lohna ka nei tut tut zel a, chu ngaih țhat lohna chu an chanchin ka hriat hma chuan a kiam dawn lo tih ka hre bawk.




U Lateii'n "Mate..." a lo tih hliai chuan ka en thuai a.



"Dinpuia nen in inkar hi a țha meuh em?" a tih leh takah chuan "Aw, engati nge?" a ti var a, ngun deuh a min melh deuh veng veng chung hian, “Ka hre lo. A hma i ang tawh lo” a ti deuh niah niah a. Za lo deuh hian ka nuih let a. “I sawi awmzia ka hrethiam lo” ka ti a.




U Latei lah chuan "Dinpuia lakah hian rilru i pe tawh miah lo" a lo ti leh chheu mai. Nuam lo ti ru deuh hian "a awihawm loh e" ka ti a, Dinpuia nen kan chungchang min zawh belh chiam hlauin phone ka khawih san daih bawk.



"Nia.. thingtlang ah chuan inngaihzawnna lanchhuah tir lutuk chi a ni lo tak ang. Mahse, kan inhmuh hnuhnun ber țum ang khan i en tawh lo" a ti leh niah niah a. Ka nuih luih khum hak hak ringawt.




Ka u te nupa inneihna hi a rei tawh a. Mahse, fa erawh an nei thei hauh lo. Doctor pan in phai ah an kal fo a. Țhat lohna an neilo ve ve an lo ti zel a, fa an awt ru țhin hle tih ka hre bawk.




"E, i u te ramvahpui pakhat kha... hmuh tawhna ka nei tlat a ni" a phone khawih lai dah meuh hian a ti leh a, ka ngaihven zawng tak a lo ni bawk nen ka en rang kher a sin.



"Zoramchhana kha i tihna em ni?”



"Aw, Zoramchhana. Mahse, ka hriat Zoramchhana kha chu Police SI ani sia” hriatthiam loh hmel zet a tih leh chuan ka lum deuh pup a.


"In khua a Zoramchhana erawh kut hnathawk a eizawng daih a nia.. mahse, an pian phung leh aw ri chu a in ang chiah chiah" a ti leh laiin "U, Zoramchhana hi police SI ani țhin a lawm" ka lo ti a, mak tihna vangin a meng phar deuh awk hial a.



"A ni khan ka hre deuh reng a ni..." a han ti deuh halh a,
" i hre ngai maw?" ka lo ti ve thung




"Tehreng mai. Ka cousin nen an inngaizawng reng țhin a lawm" a ti chiah chu min țhawn (g) lutuk vang nge ni ka zawi hnawk thei mai.



"Tu... tu i cousin maw?" ka ti chhuak thei țawk.



"Sawi nuam chu a ni chiah lo. Amah khan min la hreve angem le..." a ti a, a thil sawi leh tur chu ka hriat chak rual rual in ngaihthlak hrehawm ka ti hle dawn tih erawh ka hria.



"Tu i cousin nen nge an inngaihzawn a?" chang lam hret a ka tih chuan min melh zeuh in "Andria nen khan" lo ti ta a, inrin hmanna awm lolek a țekin thingkung a deng tliak hmawk ang maiin ka chhungril chu a in thlep hnawp a. Ka inseh ruh ngat ngat a, zawite a "Andria” ka ti ve chuan, "Aw... Ramchhana hian palai pawh a lo tir hman hial kha a nia" a lo ti thuai a.




Andria!



Kum 17 chho vel ka nih lai a kan veng nula chhelo leh lar zet, Vai sumdawng hausa a um tak vang hmingchhe ta hrep leh Zoramchhana hi an lo inzui țhin reng a maw? Aih, inzui satliah nilo in palai hial a tir tawh bawk.



Hmeichhe lam reng reng ngaihtuah lo a Zoramchhana’n nun a hman mawl tak ngawt chhan hi Kan Andria vang chu a ni mai ang em, Zawhna chi hrang hrang in min luh tup tup a, a chhanna te chu hriat ka chak tluk zet in ka awm nawm phah dawn lo tih ka hre bawk.




"A hunlai kha chuan Zoramchhana pawh hi a lar a lawm. Zarkawt station kha a awp bawk sia, a chhiat loh bak ah hmeichhia a hip hneh bawk nen zar buaitu a ngah țhin a sin" a ti a. Mizoram mipui hriat ațanga Zoramchhana a pilbo tak hmiah lai bawr vel tur chu ka ngaihtuah let a. Police station hi kan in ațangin a hla lo, Andria.... Nie, u Latei leh uNathan-a an innei tawh bawk. Andria pawh a cousin tlawh in kan in ah a lo leng fo a, min duat ve țhin hle, khang hun lai khan Zoramchhana nen inhnaih tak siin kan lo awm daih tawh.




"U, ngati nge Andria chuan vai a um leh sia, Zoramchhana hi a duh leh lo tihna em ni?" Ka tih lai chuan ka țah a chhuak lek lek. Palai meuh a tirh tawhna hmeichhia in pasal dang a um san vanga Zoramchhana rilru na lutuk tur ka ngaihtuah thlenpui vang te pawh aniang, ka hnim ruih a.




Zantin lunglen hmel taka C Sanga hla 'van a duai chuang e' a sa țhin te, thil nung satliah ang mai a hmeichhia a en liam tawp țhin te kha, a chhan zarkawt nula chhelo Andria vang vek a lo ni mai chu dawnsawn ngaihna ka hre lo a. Ka ta ni ngai hauh lo mipa nun hlui chuan min ti mgui riai lawi bawk si.




U Lateii bawk chuan, "Ka nau in Vai a um san mai chhan chu ka hrechiang bik chiah lo... Gold bar țhahnem zet police in an man kha i la hria em?" a ti teh daih a.



Chiang lo riai in chanchin thar ah leh chanchinbu phek hma ah an chhuah chuai chuai lai kha chu ka la chhui let thei, "Aw..." ti a ka chhan chuan, "Khang Gold Bar vaibelchhe tel man mantu kha Zoramchhana hi a lawm" a lo tih chuan ka thawk a tawp dawn in ka hria...



"A hna thawh țhat vanga a lar tawh tehlul nen, khathil thleng khan a hming țhatna abelh chhah a. Andria nen pawn an hlim vanglai tak ani" a ti vang vang a



U Ngaihsaka min hrilh fo, 'a thuruk pai' a tih chu hei ngei hi a lo nih dawn hi.




"Chuan, sawrkar lam khan CID kut ah Gold bar chu hlan turin police te an hrilh a. An hlan ațang thla reilo te ah chhui zui tur awm miah lovin rangkachak țhahnem lutuk chu a bo pil hmak a. Mipui lam lahin CID kut ațanga a bo tih kha an hre ve tawh silo a, Police dept insawifiahna lah tuman an bengkhawn sak duh silp. Zoramchhana hming pawh a chhe ta hle a, a hming țhatna neih let leh tum in gold bo ngawt theih dan kha a chhui zui ta ngat ngat a. Chutia hna ah a buai chhoh lai tak leh a hmingchhiat vanglai tak chuan kan nau Andria lah business man hausa pui pui in an lo hel ve reng a.. pasal a um tirh pawn pa Puia phei chuan a tuithlar renrawn a. Mahse, mahni ril a rah te tuithlar reng chu a harsa ania nge, tun ah chuan an in zinpawh leh fo tawh"





Zing dar 3 dawn ah pawh muhil thei lovin ka inlet tawn sek a. Kawvawt lutuk te chu ka hre theilo hial in ka hria. Zoramchhana leh a tun hma nun lungchhiat thlak zet mai ka ngaihtuah chianpui poh leh; Zoramchhana ka lainatna a zual tulh tulh a. Chutih rual erawhin hmeichhe dang ngaihsak thei miah lova siam theitu hmeichhia chu, tudang nilo a kan Andria lek a lo nihna chuan engtin maw tak hian min vîl a, ka thik lo tih ka sawi a nih chuan ka daw chiang viau ang.




Chutia ngaihtuahna kawma ka inleh tawn sek lai chuan ka Message Tone a lo ri kauh a. Rang zet in phone chu ka ban nghal thuai bawk.



* eng nge ka sawi kha?* tih chu number hlang tawp hnen ațangin ka dawng a. Zoramchhana a nih ka ring nghal bur bawk.



*Sakhi chek hawp turin lo inring rawh i ti* ka ti let ve thawr a.



*i hmel en aiin i hriatna a țhat reuh phian hi* a lo tih let chuan chunglam melh ru lem pathum ngawt ka thawn let.


*Sakhi chek chu i hawp chak em?* a lo ti let ta thung.



*chak e, mahse, hetia zing dar 3 pelh hnu ah text a inzawh ngawt chuan hawp a harsa awm e* tih thawn in sticker lungawi loh hmel deuh ka dah tel bawk.




A seen a, min lo text teh nawlh chu mak ka ti a, engtin nge ka number a neih theih tih chu ka ngaihtuah leh hnuhnawh a.


Zoramchhana chuan thlalak a lo thawn ta a, ka download zawh rual deuh thaw a khek rai pahin ka tho nghal hlawl. Sakhi thau mam zet, nunna nei tawh lo tih hriat tak a let zan thlalak chu ka en nawn leh a.



*i kap a maw* ti a ka han text let chuan *min chah uluk sia* a lo ti let kher a, a va han nghal tak.



*kan lo haw dawn* Zoramchhana message lo thleng leh nghal zat vang chuan engtin nge ka awm pawh ka hrethiam tawh lo. A hmel hmu ka chak ngawih ngawih tih erawh ka hria.



An lo zan haw leh nghal dawn tih chu ka pa te chhung pawh in an hre ve tih chu an thawm ațangin ka hre nghal thuai a, u Lateii ka kai tho a. Phak zet a a lo thawh chuan
"Sa an kap a, an lo zan haw dawn" ka ti sawk sawk a. A hawi buai nasa mai, “Zan haw a. An va peih mai mai ve" te a tia, helam nun phung a hrethiam lo ve lutuk chu ka nuih pui hak hak a.




Ka pa te in ah kan chho nghal a, zingdar 4 vel ni mahse thingtlang ah chuan sa kap an awm chuan phur takin an lo thlen hun kan lo nghak țhap zel. Kar loah Ramchhana nu leh pa te pawh an lo phei ve a.



"Ramchhana bawk in a kap leh a nih kha" ka pa in chhuang zet a tih chuan u Dteii chuan nghal a chhuah leh tlat pek a.



"A chahtu in a chah uluk bawk a, zan riah bo a hlau hle anih dawn hi" a ti a. Ka pa te chuan Jenny a sawina emaw tiin an nuihpui hak hak, kei erawh chuan ka melh no lo hle thung.




Zing dar 5 rik dawn ah an lo thleng a, Sakhi chu a pum in an lo hawn a. Car hnung ațang Zoramchhana'n zo zet a a pu nawlh chu leihkapui ațangin ka lo thlir reng a, a dara Sakhi pum pu chung chuan zawn nei niawm tak hian a lo hawi kual thuak a, Leihkapui a ka țhu min lo hmuh chuan a nui ta suk. Ner zeuh in ka ding chhuak ve nghal a. Motor chhung ațanga Dinpuia lo chhuak vut pawh chu ka ngaihven lo.




"A va lian em em?" step ah a lo chhuah choh rual chuan ka lo din chilh a.


"Engtik khan nge i kah a?" ka tih zawm leh nghal a.



"Dar 3 rik hma deuh khan, buk ka thlenpui a, ka lo hrilh nghal che. A pum a hmuh ve i chak hmel sia" a ti sup a, hah hmel pu miah lova min nuih suk suk thei chu mak ti zet hian ka en a.


"Lut ang le, khua a vawt si, i damlo palh mai ang" a tih tak sup ah chuan a kalna tur dip in a hma ah tak ka dinchilh tlat tih ka hrechiah. "Oh" ti pah a ka tawlh sawn tharh chuan nui suk in ka darah a lo beng dat a. Min kal pel a inchhung ah sakhi lian zet a pu lut chu nui sen sen in ka thlir reng mai.



"I unaupa pawh ka lo haw tel ve tho a nia" u Nathan-a aw ri ah chuan ka inher leh a, hah hmel zet hian step ah chuan a rawn chho hnu hnu a.



"US ah pawh sa zuk kap ngat tawh i nih kha, i chau tih sawi miah suh" ka ti hlak, a lo nui hawk a, u Ngaihsaka nen min lo kal pel in inchhung ah an inzui lut a, Dinpuia lo chhuak chho in ngeiawm ru zet a min melhna chu hmuh hmaih a harsa kher mai.



"Min hmu tel ve chu i lawm vak nange?"



"Hlim lai lai in inhnialna tur zawng nghal lo teh" ti sep a kal mai ka tum chu ka kut ah a rawn man thut a.



"I u, i u Ngaihsaka... keimah tiam in.. khati zo zai a tam min i lo call chhan kha ka chanchin i ngaihven vang nge Zoramchhana vang" sehchilh zetin ka bengbul ah a rawn ti sup.



"Dinpui..."



"Vawiin khan Inneih kan tum thu kha mipa ho kiang ah ka sawi ta mai... " rang zet a ka en vat chuan a lo nui a.



"Mihrang lo vek kan ni tho a. Nakin ah țhawn thut ai chuan tiin rem min ruat lawkpui turin ka hrilh ta hlawm a... I țhianpa Zoramchhana pawn min phurpui hmel khawp mai" a ti a. Engmah ka sawi ve hma in ka kut chu thlah in min kal san nghal daih bawk.




Inneih... hrep a! Ka u te a hrilh vek tawh a maw?




Zoramchhan chu a kap tu a nia, a kahna hmun ațangin buk thlengin amah chiah in a pu let bawk. Hah hmel pu hauh lova sasah chem a Sakhi sa sat hrang hlawk hlawk tu lak ațang chuan mit ka la sawn thei thlawt lo.



Sa sat ri hre pha țhenawm hnaivai te pawh an lo kal khawm țak țak a, sakhi lu chu patling țhenkhat in an kuai thle tawn chhen bawk. Kan inchin fel meuh chuan khua a var titih tawh a. Zoramchhana chu a kap tu mah nise ka pa te in ah sa a luhpui tlat chu ka hrethiam lo viau hman a. Mahse, “Ramhmai u te tan a lawm ka kah" a tih tak ah chuan a chhan tur ang ka hrethiam ta deuh.




Ka pa te in ah tukțhuan ei khawm an rawt a, sa chek pawh an chhum nghal hluah a, țhenawm khawveng pawh sa hleh lo in chaw ei turin an sawm ta zawk a. A ti țha lai lai chu Zoramchhana'n rep turin a siam leh zung zung a. Kan hawn tur a rep a ni tih ka hriat chuan nuam ka ti chiah lo.




Kan inpeih fel meuh chuan khua a var det det tawh. Dinpuia leh ka u te chu inbual turin an kal a, u Lateii'n ka u chu a zui thla a. Zoramchhana haw ve tur chu sa dahna thisen kai vel sil fai a pah chuan ka thlek leh dek dek țhin a. Sil hmunah a lo phei a, a kut thisen kai hnuang a rawn silfai te chu țum dang nise ngei zetin ka melh leh rawm rawm tawh ang.



Mahse, zanin erawh ka thlahleh em em a, ka kiang hnai ah a awm phawt chuan ka famkim a, amah hmu phak lo a ka awm rual in hmuh ka thlahlel nghal ngawih ngawih bawk. A bungrua leh a sa chan ve tur chu la khawm in a ding vut a.Kawngkapui-a a chhuah hma chuan lo inher let leh in min rawn au dut.




"I buai viau loh chuan min lo pui lawk ta che" a ti a,U Dteiin ka sil bang chu a sil zawm tur thu a sawi tak avangin ka pan phei vat.



"Enge" tia a hma ah ka va din chuan "Min lo zui rawh" ti sup in a chhuak vut a, ngawi rengin ka zui chhuak dat dat a, varţian a ni bawk nen boruak chu a vawt zual tak zet. Leihkapui hnuai kan thlen rualin Zoramchhana chu a ding ta hram a.



A bul chet ah ding ve pahin "Enge kan tih dawn?" ti sep in ka en chho hâ a. Min lo en uluk lutuk chu ka lai deuh lek lek a. Chutah zawi leh thutak fe mai hian, "Pasal i nei dawn tih ka hria a... ka lawmpui a che" a lo ti zawi ruih a, varțían enga a hmel lan dan ni deuh ruih chu ka melh ta ngawt ngawt ringawt.



Zoramchhana vek chuan "Pasal i nei dawn tih hre hauh lova ka zawhna zawh che kha chu theihnghilh vek rawh" harsa tih hmel zet in a lo ti leh hrawih. A chhan ka hrethiam bik lo, ka mittui a lo hnam țiam țiam a



Jenny ka thik leh thik loh min zawt anih kha? Chu chu theihnghilh turin min hrilh bawk.


Thaw huai pahin a ipte pui chu a ak țha a, kei chu "Lut tawh rawh, i damlo palh ang" min lo ti in min hnungchhawn zui hmiah a.



Chumi rual a chhungril ațang a min rawn tur tu nasa zet vang chuan inthunun hman lekloin "Zoramchhan" ka ti ta țiau a, lo hawi let tawh loin a ding deuh chawt a.



Ka sawi ang tih pawh ka lo rin ngai reng reng loh chu a kiangah chuan ka sawi chhuak ta a.. "Ka.. ka thik. Jenny kha ka thik. Tlaivar zan ah a eitur i tih daih sak lai kha ka hmu che. Ka bulah i nel awm loh em em zel a mahse, a bulah chuan i nelawm in i ngaihsak bik em em a. Ka thik, i hria em? Ka thik" ka ti chhuak ta mawlh mawlh a. Ka mittui lo luang thla lum pap leh ka hrawk chhung lo na ut ut vang chuan ka țah chhuah mai hlau in hmui ka pet zui fan fan bawk.




Chutah Zoramchhana chu muang ruih in a lo inher a. Mittui tling pam a lo melh chungin "Jenny kha ka thik" ka ti chiah chu atthlak taka che lo tur a insum ni awm takin a inhum ruh ngat ngat a. A kâ ațang a lo thaw chhuak hawk pahin ka mitah tak chiang lutuk hian in min melh a " Keipawn Dinpuia kha ka thik a lawm" a rawn ti zawi ta ruih.


If you want to be ORIGINAL,
be ready to be COPIED