Behind the mask Chapter 9

[Catnip Quill]

Behind the mask



Chapter 9



"Babe saw zawhte sawn mit pakhat chiah a nei" tihna lam chu ka hawi vat a,zawhte dum hmeltha deuh thau deuh mai hian min lo melh ràn a ,man tuma ka hnaih lai chuan kawngpui lamah atlansawn daih,um zui mai ka tum chu Andrew chuan min pawt let dawrhin min kuah hnawk a,


"Fimkhur ta che motor in a sut tep che kha" ti sup hian ka hnung ah dim deuh tak hian min chul hliau hliau a.

"Babe ka tui in a hal lutuk,dawrah khian tui han lei ang" tiin kawng chhak lam chu ka kawk a


Kawng chhak a dawr lamah chuan kan in zui phei a,dawr chhungah chuan mi an lo thahnem phian,tui vawt lak ka tum chu ka hawn theih miah loh avangin Andrew chu min pui tura hrilh ka tum chuan ka bulah a lo awm awzawng lo,ka hawi kual nghal ruai a,cash counter ah chuan hmeichhe pakhat sa pan lam nen chuan in pawh tih hriat tak hian an lo nui dun hawk hawk ka hmu chu rilru na tak chuan ka melh reng ringawt a,an mahni pan hnaih ka tum a ka che sawn thei miah lo,beidawng taka ka kohna ri pawh chu hre lo ang mai hian chu nu nen chuan an inkai chhuak zui daih chu mittui nen ka thlir liam tawp.

Mittui nen ka harhchhuak zawk a,mumang bawk maw tiin ka phun sap a.
Sana ka en a zing dar 4:30 chauh a la ni.Dawhkàn a ka tui bottle chu ban nghal rawk rawkin tui chu ka in khawlh khawlh.Ka lu a la hai churh bawk nen ka awmdan chu a nuam lo takzet,khum atang chuan tho chhuak ta mai lo chuan ka mumang chu ka ngaituah zui a,ka mumang ah lehzel pawn min ti na anihi! In thing nawk nawkin nizana ka awmdan ka ngaituah lui zawk a,hostel ah hian ka let leh lai reng reng ka hre miah lo.Ka rim teh hrep chu! in ti harh lui in bathroom lam ka pan a,thlaksik lai e ti lo chuan tui vawt ngatin shower hnuaiah chuan ka ding reng a,mihring fanu hi engtin nge hetiang em em a tlawm hian ka awm theih ni,engkim mai hian amah kha min hriatchhuah tir lo thei silo,ka kawchhung atang hian min delh tu hi a rit lutuk a thâwk ngaihna pawh ka hre lo ani ber.Nizana ka thawmhnaw hak zawng zawng nen lam ka su fai nghal vek a.


Bathroom atanga ka chhuah chuan Ritu pawh sam thur zet hian a rawn thu chhuak ve hlawl,


"I va tho hma ve" ham bai bai chung chuan a rawn ti a.


Ka thawhna a la rei bik loh thu sawi in,darthlalang hma ah chuan ka thu a,mut that loh nen ka cher bakah ka hmai rawn bawl mek ah chuan salicylic acid minimalist product chu ka hnawih a,he thil ka hnawih hian mak tak mai in ka hmai bawl a reh hmak zel.Chemistry subject kha ka nuam tihna subject ber ani bawk nen skincare hman dan turah ka tangkai pui phah ta phian a.

Nizan chungchang engmah sawi lo chuan bathroom lam pan chuan a kal ve nghal vut tho,tha takin ka haw ve mai aniang chu tiin ngaihtha deuh tak chuan thawmhnaw te ka in bel zui sawk sawk a.


"Nizan ang kha chuan awm tawh miah suh aw"Bathroom atang a rawn chhuak chu ka bula rawn thut pah chuan chiang zetin min rawn melh kalh a.A rawn luh leh lai reng reng ka hre miah lo.



"Min rawn hruai ami?" nuih tlawn titih chuan ka ti a.

"I phone i off daih bawk sia Sumbul nen kan zawng che a,kan hmu zo bawk si lo che a,beidawng deuhvin room ah kan let leh chuan bathroom ah i lo luak vak vak,engmah i hre tawh lo maw" min rawn nghawk zawk pah chuan ati a.

Hnam dang mahnise unau pianghmun ang mai a min en tu ani,thu tha tinreng chuan min fuih ve mawlh mawlh,che naupangchhia viau thin mahse tunah tak hi chuan kei ai daih a upa ang maiin a khawsa leh tawh.

"I rilru a nat a zu hmang a inbunruah i duh pawn kan in ho ang,nangmah chiah in tiang khan awm tawh ngai suh,Sumbul pawn kan in ho mai tur ani ati" a tih chuan ka lo nui tawp,a puitling rei thei lo.Sumbul hi muslim kulmuk lutuk tak mai hi ani ve a,kan hruai da zo vek ani ber,kan training zawh hunah a first cousin nena innei zui mai tur an ni,arrange marriage mah nise an in neih hma phat atang a hmangaih nghal em em bawk

Sumbul chu ngui bar a rawn in kan bula chuan a rawn thu tum bur a.

"Tinge" ka lo ti vat.


"Amos a chhuak tawh" a ti sup a,a ngui bar mai.


"Maw Amos a chhuak tawh maw?" Ritu chuan a lo ti va.



"Nizan khan thenkhat chuan an chhuahsan a lawm kan zawn lai che khan an inthiar chhuak sap sap" Sumbul chuan a rawn ti chuai raih a.

Nizan khan ka hmu tak e,lawkin, kei hian an star thu te ka hrilh vel zawt zawt,an pahnih melh zawk zawk dun chuan ka ká ka hup tawp.


"Eng nge" ti hluk pah chuan Ritu in ka hnungah min beng thlawrh.Henu kut ram zia hi chu aw.


"Engnge min kaihthawh ve loh a?" Ritu chuan Sumbul a chhuahchhal zui nghal zat a.


"Kaitho hman che pawn ka khawsa lo,ka thawhin parda ka keu a, a tlan liam lai ka hmu hman ve tawk tho" Sumbul chuan a lo zui vat.



"Aiims kan awm chhung zawng a ka mipa duh awmchhun ani sin le" Sumbul bawk chuan a ti leh a,kei erawh ka lo ngawi reng thung.Ritu hi chuan star a nei teuh,Sumbul erawh star a neih ka hre ngai miah lo.

"Mizoram ah thawhna tur zawng mai ila"thutak deuh hian Ritu chuan a rawn ti a,ka lo nui huk.


Amos chungchang bawk chu tuk pumin kan ngaithla leh reng a,titi kar laklawh ah min hau dun zeuh zeuh bawk,hemi te pahnih hi thawveng viau mahse ka la ngai dawn takzet.


Internship hi thla ruk chhung kan nei dawn a, tun thla ah hian medical ward ah kan awm a,nurse leh damlo awm te kan pui a, an BP( blood pressure) check leh damdawi pek chu kan hna ani ber.

A thla hnihnaah surgical ward ah kan duty zui leh a,doctor leh nurse thawh hona a ropui ka ti,dam lote enkawlin an information theuh ka la kual a,kan team ah ka submit zui bawk a,buai reng rengin hun ka hmang a,chhungril erawh a rum vawng vawng thung.

Thla thum naah pediatric ward ah duty leh in ahnuah ICU ah kan in sawn leh a,ICU a khawl hrang hrang te kan zirchiang leh a, a tawp berah emergency department ah kan duty leh a, emergency tih takah emergency deuh a chet pawh ka thiam phah viau,thuthlukna siam zung zung a ngaihna hmun a lo ni bawk nen rilru fim tak hman a ngai nasa bik zual.


Internship kan neih hun thla ruk chhung tawp hian vawi khat pawh Andrew theihnghilh hi ka nei lo,mahse ka inchhuang tak zet,buaina engmah nei lo in AIIMS,New Delhi atang internship chu ka zo fel thei a.Keima mimal bakah professional tak pawn hma ka sawn phah nasa,tunah chuan nurse tak tak ni tur in ka in peih fel ve ta.Andrew hian hre ve ngat se chu min van chhuang leh dawn tak em! Kum 4 chhung tawp ka lo khawsakna AIIMS chu ka mangtha ve a tul ta reng mai,ka batchmate te ho nen pawh inkuah vawng vawng inbkum khatah vawi khat tal inhmuhkhawm thin kan rel a,Ritu leh Sumbul te nen phei chuan mittui tla zawih zawih in kan in mangtha a,mahni awmna hmun theuh kan pan angai ta si a.

Ka nu leh pa in min lo hruai a,khawhar leh mal riau a ka inhriat na pawh an hmel ka hmuh chuan a reh ve chawpchilh a ni ber.Kum 4 ka lo awm tawh na,Andrew nen a sulhnu kan lo neih thin na Delhi chu chhuahsan in kan ram lam pan in kan thlawk haw ta a.

Airport ah Lalawmpuii leh Peter hmel ka hmu chiah chu ka ngaih dun zia ka hrechhuak ve chiah,hria se an lawm lo teh ang chu!


Peter motor tharah chuan Opi nen kan Chuang a, ka nu leh pa leh ka u bawk chu kan hnungah an rawn tlan a.

Lalawmpuii te school chawlh lai ani bawk nen a rawn petek haw rang lutuk chu Peter nen chuan kan chhaih deuh reng a.


"Ngawi mai mai ru,a lo ber ah hna ka nei tal a lawm,nangni ve ex te vangin in buai em em a" a rawn ti tan tan,ni tak Peter pawh hian a bialnu te zing a a
hmangaih ber a chan tak.


Peter chu nui hawk hawk pah chuan "kei te chu no hnih khat lem in a reh vek thei lawm,kan Lalawmawmi hmel hi en ta che"Opi mit a siai khum zui a.


"Tak takin rilru na te chu dam hun a la awm ve mai ,kan awm alawm don't worry,khatiang mipa vang mai mai khan rilru na viau mahla,a thar tha deuh authentic kan zawng ang" tih pah chuan Opi chuan min kuah a.


"In hneawm ve chiang e" ka ti ta ringawt,an tawngthei si ka hnial hneh leh dawn Chuang lo.


"I tah duh pawn tissue paper nen i kiang ah kan awm reng ang" Peter an a lo tuihnih zui zat a.



"Hrilh lawk lo che pawh ka ni lo a,tih inziah na banner lian tawk nen a sir ah ka lo ding ve bawk ang a" Opi chuan arawn ti zawm leh zat.


"I survived dating a trash boyfriend,tih inziahna T-shirt i ha bawk anga" mit ti che kual ralh ralhbchung chuan Petera'n a lo ti leh a,an phur tulh tulh hi ni ringawt.


"Aw a tawk Petera angin kar hnih dan a min then thei tu tur ngaihzawng ka zawng ve nghal char char ang , rilru na hman lek lo in" ka tih chuan



"Va smooth tawh thin ve" tiin Lalawmpuii chu lo nui dir tlawk tlawk a.

"Ka pawn lam mawina ni lova ka chhungril lam mawina chen a hmu tu hmeichhia ka la tawng fuh lo mai mai anih hi, rilru nat lai lai hian Olivia Rodrigo hla kan ngaithla dawn mi niang" Peter chuan a lo ti zawm zat.
Lalawmpuii dang nal lutuk hi chu thuhran Peter Lawmsangzuala phei hi chu a tawng rang tel bawk sia,fiah fel fai deuh si hian rang deuhin a sawi zo vek hman, Zosangkima leh a bialnu spot naah Peter hi ava tel ve a,darkar khat a liam meuh chuan zosangkima bialnu kha third wheel ang char char zawk a nih thu lungawi lo deuhin zosangkima bialnu in min hrilh,engtin chiah nge ava khawsak chu ngaituah pawh ka ngaituah zui peih lo.


Kan in fiam chho bawrh bawrh a,kar lo ah in kan thleng nghal der,hemi te pahnih bulah hi chuan khawharna hman a awm lo.


INC ah in register in kumin erawh hahdam rih ka duh thu ka sawi a,ka chhungte chuan min hnial lem lova,kum naupangtea hna vang a buai nghal chawng hi ka chak rih lo piah lamah hna thawk tur in ka la inpeih lo hle bawk.



Hun a liam a Andrew erawh a reh vawng vawng,zu in ruk zeuh zeuh ka ching chho a,Lalawmpuii hna lamah a let leh tawh a,Peter nen pawh duh angin kan in kawm tam thei lo,thian dang ka kawm nasa in chhuah ruk ka ching viau bawk.Ka zawhte doctor nen khan kan in zui ve ren rawn a ka nghet thei thlawt lo mipa dang dang ka kawm kual ta thluah a.Chaw ei dawn ah tih loh hi chuan ka hmel an hmu ngai meuh lo,chhungte mit pawh ka ti kham tan viau mahse ka chhungril a khawharna hian min delh rit ani ber.



Andrewa'n a tawp na atan a he hla hi i lo ngaithla dawn nia ti a min lo thawn, Lewis Capaldi sak *Forever* chu van lam hawi chung chuan ka ngaithla vang vang a ,"Hun hian mi a thawi dam thin e an ti a,ka va dam silove" tiin ka phun sap a,Lalruatkima call ka dawng zui a,

"I hman tawh em?,in in piah ah ka nghak che" a rawn ti su su a.

"Mininute hnih min lo nghak rawh" phone ka hang up zui a.


Ka room tukverh atanga chhuak ru zal zal in,Mikhual room awmna balcony ah ka lawn phei a,chuta tang chuan a chhuah ruk theih,tun thleng hian min la man chhuak lo bawk.


Lalruatkima hi tunlai ka kawp deuh chawt a,kan veng tleirawl hmeltha ve ber ani,la naupang viau mahse min care thiam phian bawk,weed a zuk bak thil dang a ti duh miah lo.



"Awmi kan veng ah chuan ka star ve ber i nia,hetiang hian awm lo la chu min kawm duh dawn chuang miah lo mahla hetiang a hmuh che hi hreawm ka ti"min en vung vung a.



Nui suk chung chuan Dispo no khat chu eng sawi set set lo chuan ka tlak pawp,ka thin a sa nghal hut hut,tui min lo pe vat a.


Hepa hi la naupang viau mahse ka kawm thei phian,a rilru a tha ka ti.


"Vanlalrinawm eng nge hetah i tih" rawn ti vin that tu chu Peter-a a ni,engtin nge Durtlang ah daih daih a lo awm ve ni,a spot ve a ni chiang mai.


Rawn kal hnai hlawk hlawk in phone flashlight chuan Ruatkima hmai ah tak chuan a la chhun zui.


Thaw hak pah chuan Ruatkima chu a hrilhru su su zui a,chutah min kaitho nawk chungin a motor awmna lamah min hruai a haw ka duh lo thu ka sawi pawn min thlah duh miah lo,thinrim tak chuan a motor ah ka thu tum bur ringawt tawh.



Ka rin loh deuhin world bank road lamah min hruai a, tawng duh deuh kha ká nei lo ang maiin a hmui a chip tawt chu mak ti deuhin ka thlir leh ringawt thin.Zanin chu keipawh ka tawng peih lo ruih pawh ruih mumal hmain mood a chhe vel vek.


Kawng sirah motor ti ding chu ngaihsak lo deuh chuan hma lam ka melh ran a,min rawn en zawk a,motor atang chuan a chhuak daih.

Motor hnung lam a hawng a, Jack Daniels nen a rawn lut a.

"Engtin nge ka awm ve reng lai a khatiang mihrang daih bulah i chhuah,zu i la in zui bawk a" a ti ram hmak chu chhan pawh ka chhang peih lo.


"Min chhang rawh" a ti vin thawt


"Sorry Peter" ka mittui a tla ringawt.Period tur mood swing nen zanin chu mahni inkhawngaihna hlir in ka khat.A hmuh hlau zet chuan ka mittui tla chu ka hru vat a,no ah Jack Daniels chu thli chhuak in min pek pah chuan,

"Mipa dang bulah vawi khat mah khatiang kha in tawh suh,i thianpa ka awm hi" za lo deuh chuan a khi suk bawk.
"Lehkha te i zir duh nga tih buai reng che ka duh lo lawm" pangngai tak chuan ka ti a.


Ka chal ah min nam sawk pah chuan "chhuanlam" a ti hmuk


"I inthlahrung der ve ami?" hnai set sawt a mi bih pah chuan a ti leh a.


Nam sawn pah chuan ka tlak pawp chu "engmah ka la pawlh lo sin" a ti zui nang nang a,ka pum a rawn sa thla nghal pawp pawp.

"I rilru natna chu sirah hnawl in rui chhum hmawk phawt ang aw" no ah chuan a thlit belh leh in,


"Engpawh nise cheers to bad decisions and good whiskey" nui sang hian no chu a rawn keng kang a.

"Cheers" ka lo ti ve vat a.

Hla ngaithla pah chuan kan in dun ker ker a,kan tawng zui lem lo,mahni rilru ve ve kan kawm a ni mahna,


"Whiskey in hi chuan engkim hi a mawi vel vek,nangmah thleng hian Awmi" a rawn ti chhuak a.


"Lawmsangzual" ka lo ti vin thak thung.


Fiamthu eng eng emaw a sawi zui a, lunglen lam reng reng a lang leh tawh lo.

A hnuah chuan thutak deuh hian,



"Awmi tupawh mai hian kan hmangaih ber te hi kan lo nei thei lo deuh vek a ni.A nei thei chu mi vannei ber ber te anni a,chung mite chu za zelah pakhat ang chauh an ni.Tute mai hian theihnghilh theih loh thinglung a cham reng kan nei a,kan thinlung a kan lakluh rualin an chhuak leh tawh ngai lo.Kan lei taksa leh thlarau a inthen hma chuan chhungrilah hian mit lo in a de reng thin a ni" ka mit a en reng chung chuan chung zawng zawng chu a sawi a.


A thusawi chuan ka tah a ti chhuak tlat,ka mittui tling pam chu a hmuh hmaih bik lo.


"Khawmaw lo kal teh" tih pah chuan a ban a phar a.

Hrethiam lo zet hian ka lo en ha thung,chek hlak chung chuan min rawn kuah a "i duh chuan tap rawh tap bawrh bawrh rawh,duh ber neih theih loh chu hetiang hian a hreawm dawn tih ka hriat vang ania,ka duh ber hnenah pawh ka duh thu ka sawi ve ngam loh,hmelhriat loh ang a awmzui leh ai chuan a tan thian tha nih reng ka thlang zawk"thaw ham ham chung hian a ti a.Hetiang reng reng a Peter lawmsangzuala thutak hi ka hmu ngai lo.