RIZO'S CHAPTER-10

[Krystal Vanchhawng]

RIZO'S

CHAPTER-10
☆☆☆☆☆☆☆


ZOSANGLIANA POV:

Ka hmaa ding Elizabeth-i thusawi chu ka ngaithla uluk hle a. Ka thinrimzia a lanchhuah loh nan kut ka hum ruh hle. Malsawmi hian dawt engzat fa ko nge min hrilh ala tum cheu.

"Motor ah ka phone kha engvanga lo pick nge inih. Khawnge i thiante ho zawng zawng kha?" A mit taka melh paha ka tih chuan a meng buai deuh nak a.
"Ahhh,ihhh...i lu ana iti sia,an hmanhmawh a,scooty ah an bet haw a. Chuan,i phone kha chu a ri zing lutuk a,ka la ve tawp" ati bah deuh niah a. He nu tereuh vang hian Malsawmi kha ka lakah a thinrim em em a. A unaupa der vangin ka thin a rim zawk daih kha ania. A rilru na hmel leh thinrim hmel ka hmuh khan hrehawm ka ti leh hle si a. He Malsawmi zunah hian ka uai takzet tawh a ni.


"Ka ti tak tak. Abak ka hre tawhlo,ka sawi ang kha  a nimai" ka hma ami tawng laklawh lai takin malsawmi kan lama a lokal chu ka hmu ta a. Enge ka hriat tehreng ni,ka tum lawk ni miahlovin Elizabeth-i tawnglai chu ka fawp ringawt a,in laksawn leh ka tum rual rualin malsawmi chuan min rawn pawn then ta zawk a..

A mita natna nasa tak lo lang kha ka hmuh hmaih miahlo. Mahse,fiah ka duh tlat si. Ka ti laklawh tawh a,in sawifiah ka tum lova,phat buai ka tum heklo.

Kha Inspector ve hrep khan eng maw a sawi kha. A hnute veilamah khuavang chhinchhiah a nei amaw,ava hrechiang si em. Khatiang Inspector tenghneng lutuk,physical ah pawh tihpuitu neih vanga tling tih hriat reng reng khan ka nupui taksa awmdan min hrilh let zawk amaw.

A sawilai kha chuan thi khawp hiala sawisak mai kha ka duh a. Ka hria,malsawmi pi ruang thlak ni a ni. Mahse,ka kalna hmun apiang maia ka nupui nunhluiin min deng dawt dawt reng mai hi chu tawrh thiam a har deuh chu a ni. Engtin nge ka chhungten ka bulah an sawi kha
'In vawikhat inhmuhnaa i chetsual pui theih chu hmeichhe fel leh tha anilo tawp ang. Nau pawh lo keng mah se i fa ani tak tak lovang. Enliam mai mai rawh,neih a tullo' anti anih kha. Mahse,khatih hunlai khan khâ zan hun kan hman duna a zun khan min phuar a. Ka u leh ka pa te remti vaklo chungin palai ka sawm a,an khuaah kan kal rawih anih kha.

Tun thleng hian ka chhungte kalha ka hruai haw kha inchhirna ka la neilo a. Mahse,keima lamah zawk hian,a nunhlui chu nunhlui a ni,keipawhin tlangval fa ka nei ve tho. Mahse,thikloh ka tum poh leh thinrim a sosang a,ka insum theilo thin a ni.

Ka hmaah mittui tling pama a nat thu te a sawi chuan hrehawm ka ti hle a. A thinrim tak maia inthen a sawi kai chinah erawh he ka lung zawnah hian bomp puak tur ang maiin a awm a,ka insum theihna zawng zawng rawn puak chhuakin hmeichhe hmaah ka kehchhe zo ta a ni. Ti tak hian min kalsan ka hlau ang tih rin ngaihna ka hrelo. Amah vangin ka insum theilo lutuk te chu ka inhua a,ka chetdan zawng zawng avang khan nasa takin ka inchhir a,he mipa,mipa azawnga pa inti ve tawk tak hi ka dinna leilung,ka ke phah ngeia ka lo hnuaichhiah thin chungah ngei hian mittui far in ka tlusawp rawk rawk mai chu a ni.


RITA-I POV:

"Tho tawh rawh,chho ang" lei bih ngur chunga a thu chu ka sawi a.
"Zosanglian,tiang hian awm suh,Minister lai inih kha" ka tih chuan rawn hawichhuak chuang miahlo hian
"Ka tihpalh" ati thawp sulh a.
"Engvangin?" Tih pahin ka tho hluai a.
"Ka thikthu chhiat vangin" atih chuan a aw-ki pawh a pangngai veleh deuh tawh.
"Tho la,chho ang. Ka nu te khan min lo zawng leh tawh ang" tha deuha ka tih chuan
"Aih min then ang" ati hmuk anih chu. 

"Zosanglian,naupangchhia inihloh kha. Tho rawh" tih vak pahin a darah chuan ka pawt a.
"Min then i tum em sawi phawt rawh" ati leh a. Awiii,ka thi dawn. Nichin lawka,mipa beidawng ka hmuh ang kha amah ah hian hmuh tur a awm leh tawhlo.

"Tho phawt teh" tih pahin a banah chuan ka pawt lawp a,a lo theh phar duh lek chauh.
"I sawi phawtloh chuan ka chho lo ang" ati bur mai.
"Aw ti ta ila" ka tih chuan min rawn melh chho zawk a,chutah,kham chu en in
"Sawtah sawn ka zuang thla ang" atih chuan ani pawh a nui a za deuh nge a tawplam chu a ri deuh hawk a. Kei pawh chu insum theilovin kawng dawm meuh chuan ka nui nghek a.


"Iva thing tak. I duh leh tikhan thu nileng la,ka chho dawn" tiin nuih insum deuh chuan ka inher hmak a. Thui pawh ka la kallo ang tihah chuan hnunglam atang bawkin
"Min then dawn em sawi rawh" tiin a rawn au leh a. A au ri chu miin an hria ang tih ka hlau ru takzet.
"Malsawm" dawhtheih loh hmel zeta a rawn tih leh chuan
"Rawn chho rawh,chubak ka sawi peihlo" tiin ka kalsan hmawk hmawk a. A chhanna duh ang a hmu nge ka hnunglama min zui thawmin a chhunzawm ta a.

Rin ang ngeiin ka chhungteho chuan zawhna anlo ngah leh hle a. An zawhna te chu hrelo derin thildang ka sawikual ta vel mai mai a. A pawimawh ber ka nu in a hriat chuan a tawk ka ti mai. A hrim hrimin,Eli Chabet-i tawngthei zit zet lutuk hi chu,ala chawh dawn alawm. Zosangliana hi alo ngaih melh deuh lehnghal. Thui,mi pa melh taih ching,ka ten lutuk,ka dinhmun chhiat ber lai pawhin ka ti ngailo.

Inchhunga kan thut thap laiin Zosangliana chu hmanhmawh zetin a rawn lut a.
"Aizawl lama ka let angai,hna hmanhmawhthlak a awm a" atih chuan a hmelah a hlauhthawn ve hmel sia,min ti hlau zo vek.
"Englam nge,ka lo haw ve nghal dawn em?" Ka lo ti thuai a.
"Aih,tihian la awm rawh,inu leh ipu khua  a har ang. Ka buaipui zawh veleh ka rawn hruai ang che" ati zung zung a. Chumi kan inbiak hun chhung ringawt pawh chuan a phone alo ri sek a,phun hluk in a titawp ve zel bawk a.


A sawi ang chuan hmanhmawh deuhin Aizawl lam pan chuan an haw ta nghal a,kei erawh ka pu te khawhar hnem turin hetah ka la awm thung. Zan lamah khawhar inkhawm hun a awm a,kan zai ve tlek tlek a,an haw darh hnu mut hun hma thleng chu inleng te pawh anla awm ve nak nak a.

Kei erawh ka pum a puar tawh em vangin ka pindan hlui lamah chuan ka lut ta daih a. Zosangliana haw khan vawikhat mah min la rawn be lova,Aizawl an thleng tluang em pawh ka hrelo. An kalna a rei ve tawh angreng nen ka hlauthawng chuan Pi Zaii ka call ta ringawt a
"Kan pa te anlo thleng tawh em,an tluang em?" Ka tih chuan
"Aaa,inpa te chu Champhaiah an kal alawm,Aizawl anlo haw reng renglo" alo ti ta mai.
"Eeee,ni dawn tak maw. Ka lo theihnghilh leh tawh alawm,ka va bia ange" tiin phone chu ka dah ta daih a.

Enge awmzia ni ang,tinge Aizawl lama haw tur angin ka bulah khan a sawi le. Champhaiah kal angai ti ve mai se,eng tak nge maw an buaipui le.

Rilru buai deuha ka thut reng laiin ka thianteho chu an rawn ri lut hlut a.
"Wow wowww,iva thu ngui ber bur ve,nang leh nanglo a?" An rawn ti tliar tliar a.
"Ka chau deuh aniang" tiin ka chhang mai a. Khumah chuan rawn zuangkai ve nghal hlawmin
"Kan nei asin,i duh ve em?" Antih chuan Zu an sawi naah ka ngai hmiah a.
"Duhlo mai,naute ka nei tep tawh sia" tiin ka hnial a.
"Enteh,i hria em,pasal i neih hnu hian i inthlak takzet ania aw,ahma Rita-i kha ini tawh miahlo. I pasal kha a kut a ram hmel sia,kut te hi alo thlak thin che a nilo maw,anih vaih chuan,kan rawn hruai haw nghal dawn che nia" tiin thinrim hmel tak chuan thutha te min hrilh a.

Lalhruaii ber chuan
"Kan Rita-i hi khawiah mah kut a thlak awmlo emai. A thlak hma in vawi3 vel a thlak let hman ang" alo ti fiamthu a
"Nia,i ro thap zia kan lo theihnghilh palh a ni" tiin an han nui leh rih a.

Ka pindanah chuan an thli kerh kerh a,an duh zawng zawng an sawi a,bengchheng ngam silovin an ri ve leh hluai zel a.

Ka phone chu ka bih deuh reng a. Chutia ka khawih kual lai chuan kan thianho zinga ze zawi ber Lalnuni hian Instagram ami video pakhat hi min lo thawn a
"Kan va inthawn hnai thin" ka sawi zawh hmain message ah bawk
"Engmah sawi suh,ngawi rengin en rawh" a rawn ti leh a.
"Eng tak ni maw?" Tia ka en chuan Zalen news tih ho video post hi alo nia. Damdawi zuar pakhat an man niawm tak a ni. Mahse,a hnuaia thu inziak ka en nak chuan ka sa zak mai. Nomaleki kha lo niin.
'Champhai police te chuan rinhleh nia rin.........he thilah hian Minister hi a inrawlh nge,a thian hlui anih vangin a dikna hai lan sak a tum zawk. Thuchiang awm thuai turah ngai ang' tiin an ziak a.

Champhai police ten damdawi vawrhtu tlangval pahnih hi an man a,chumi te inpuanna ah chuan an boss ber chu NoMaleki kha ani anti anih chu. Chu chu ka la hrethiam. Engvanga Zosangliana khan a motor ah phur a,thil tisualtu chu VIP ang maia buaipui nge anih. Ani hi alo inrawlh ve thin anih zawngin ka rapthlak viau ang,khawvelah damdawi ti thin te khi ka khawngaih ber anni a,a zuartute hi ka huat ber anni thung.

Ka thiante chu a ruk tak chuan haw har ka ti tawh hle a. Lalnuni chuan ka rilru tur a hrethiam nge haw a rawt ta a. An inzui chhuak dam dam a. Lalnuni leh lalhruaii chu an rawn lut leh a.
"Enge awmzia,nuthlawi kha nilo mi,tinge a phurh vel a,anlo la inzui a nilo maw?" Lalhruaii chuan a rawn ti nghal zawt zawt a. Nuni chu melhin
"Tinge a hriat ve a?" Tiin ka thaw halh a.
"I zak em. Ka hmuh hmasak zawk anih kha. Min chhang teh" tih pahin ka darah chuan a nem deuh sawk a.
"Ka hre biklo,hria ni ila tihian ka thu mai mai nang" tiin ka lo vin hlar a. Engvanga vin chiam nge ka nih pawh ka hrelo. Ani pawh chuan mak ati deuh aniang ang pam hian min en a,mahse,insiamtha leh thuaiin
"I hriat hunah min hrilh ve ang che. Hawh,La'n haw daih ang,thinchhe emai" tiin an chhuak ta daih a.

Thinrim insum zetin Zosangliana chu ka call a. A ring kuit dawn emaw tih hnuah a rawn la ve hram a.
"Khawnge?" Ka sawi zawm hmanlo
"Ka buai lutuk,ka lo call ang che. Chumi hma chu tu thusawi mah kha lo awih suh" a rawn ti nghal ngawt a,a awmna chu a bengchheng em em a,a ri nuaih nuaih mai. A dah zui nghal bawk.
"Hrep chuan" tiin phone chu khumah ka paih pawp a. Zanah pawh chuan chhin khat mah ka chhinglo.

Khaw var hun chu ka nghak deuh tawp a,khua a var tan tihah chuan Uduha pindan lamah ka chhuk ta a. A khum bulah chuan ka thu ren rawn a. Ka rilru hahna te leh ka hriatthiam siloh thilte chu sawi ka chak takzet a,mahse,engtia han sawi tan tur nge ka hrelo a ni.

A hmel chu ka en a,ka rilru hahna te min hriatpui ve ang mai hian a meng kuau a. A rawn men atang khan a khap ngailo a,a men ve chang chuan tihian a meng kuau reng a,a hnuah a chhing veleh mai thin. Keimah te hi lungngai taka min rawn en ve ang maiin ka hria a.
"Englo ania. Ka pasal hian kan inneih hma khan nuthlawi a kawp thin a" tiin NoMaleki chanchin vel te chu ka sawi ve a. Engtin mah phei chuan min chhang thei pawh a nilo,hmana ka tih thin dan thovin ka unau neihchhun ani a,ka harsatna ka thlen ve a nimai.

Ka sawi zawh chuan a kutah ka chelh zeuh a. Ka chho tur chiah chu ka nu hi alo chhuk ve chiah a.
"I muhil theilo ami?" Tih pahin ka bulah chuan a rawn thu ve a. Engtin mah pawhin ka chhanglo.
"Nupa inkara harsatna in neih reng rengin in pahnihin sawi dun ula,chingfel hmasa phawt thin rawh u. Nupa nih tawh chuan inhmuhthiamlohna te hi a awm thin a. I hria a,inpa phei chu Mizoramah pawh a langsar pawl ani a,hmeichhe tamtakin an rawn zem ang. Mahse,i dinhmuna i chian a,in inkar vawn nun reng i tum tlat chuan inpa pawhin a tum ve ang. Ri buan buan lo la,engkim uluk takin ti thin ang che" ati ve melh melh a.

Heihi ania,ka nu hi ka duh em em nachhan chu,min hringtu diktak nilo mah se min hringtuin a tihtheih aia tam hi ka tan ati tawh a ni.

Khua a var chiang a. Aizawl lam pana haw mai chu ka duh tawh a. Ka pu ka rawn chuan
"A tha alawm,keini chu min rawn ngaihtuah suh. In enkawl uluk la" tiin min thlah ve ta a. Kan kawmthlang te fapa hi Aizawl lama hnathawk a awm a,a motor alo remchang hlauh a,a rual chuan ka haw ve thei nghal dawn anih hmel.

Motor chuan kan inkawtah min lo lam a. Ka chhungte nen kan inthlah liam liam a. Inleng awm ve te pawhin min thlah ve bawk a. Motor lam pana ka kal chu Lal Doctor-a kha motor atangin a awn dak hlawl a.
"Ehe" tih pahin phawk fe chuan ka melh a.
"Ka Aizawl ve dawn a" atih chuan lehlam hawiin ka ner sak a. Zosangliana'n a thik tehreng nen,a tel ve dawn tih hria ila ka chuanglo tawp ang.

A seat hmalamah luh mai ka tum chu bag eng eng emaw hi alo awm nual a.
"U Rita,a hnungah khan in thu mai dawn mi,a hrehawm angem?" A khalhtu tur Valan atih chuan a pawiloh thu hrilhin a hnungah chuan ka lut ve mai a. Lal Doctor-a pawh alo in siamrem ve zung zung bawk.

Kan tlanchhuak a. An pahnih chuan ka pi boral a zialo antih thute an sawi luam a. A vuina ah anlo lan hmanloh vangin thupha te an chawi bawk. Ka zawi em vangin mit ka chhin san ta daih a,reilovah ka muhil zui bawk. Aizawl luh hma tepin chawhmeh an lei kawi a,tah chuan ka harh chiah a,ka lo mutthilh dan lah chu. Lal Doctor-a dat ngheng ar ar hian lo zuk muhil a.
"Ava zialo,a hrehawm em,ka lo mutui lutuk a" tiin ka tawlh hla sawk sawk a.
"Hrehawm lohve,keipawh ka lo muhil a,ka harh chiah" tiin a nui vur vur a. A hmel hi chu a tha a ni. Hett,enge maw ka ngaihtuah lehpek tawh le.

Raipuar ka nih vangin min ngaihtuah a,kan tlan muang hle a. Kan in thlenga thlah min tum chuan ka duhlo hle a
"Driver ka call mai ang" tih paha phone ka tum pawhin an hnial tlat a
"Minister in te pawh hmuh a chakawm alawm" tiin kan veng lo lamah chuan kal an tuma. Chuti na na na chu tiin
"Minister Bangla ah kan awmlo a,kan pa te inah zawk" tiin kan awmna lai vel chu ka hrilh a. An hmelah chuan zawhna a tam tih ka hria. Mahse,contract vanga innei kan nih leh kan inthup a,bangla ah kan chenglo tih hi mi zawng zawng hriat a tul kherlovin ka hria.

In ka thlen meuh chuan alo chawhnu her ruih tawh a. Pawnah Pi Zaii leh zawhte anlo awm a. Mimii lah chuan min lo hmuak ve niawm takin ka ke vel chu alo nul thuak thuak a. Engmah pawh tihzawm lovin pindanah ka lut tlang a,ka bawk thlawp a. Ka phone lo ri ka en chuan Zosangliana alo ni. Lak loh ka tum zet a,ka nu thu min rawnte ka ngaihtuah a,phurlo zet chuan ka la a.


"In i thleng tawh em?" Atih chuan Umm titawp in ka chhang a.
"Tinge i haw tur thu i sawiloh" atih chuan ka rilru te te in zawk zamah chuan a ka lo ti hmanhmawh a.
"A rem ema ka haw thut" ka tih chuan hahthlak min tih hmel zet hian a thaw hawlh a. Rei pawh kan inbe lo,a tawng ka hre theilo der a,ka dah ta daih a.

Zanah pawh chuan alo haw lehpek lova,khawiah ber nge a awm pawh ka hre bawk heklo. Politician nupui nih hi alo namailo khawp tih hi ka hrechhuak ta a ni.

Khuma ka tluk zal mai mai laiin Zawhte hi a rawn kal them them a,min tihnat a tum emaw tiin a kalna tur lam chu ka en reng a,khumah te chuan ala rawn lawn ta deuh deuh a. Chutah,ka bulah chuan rawn thu in a inliak vak vak a,min melh zeuh zeuh pah hian a rawn mu ringawt anih chu. A awmdan chu ka en reng a,zawhte ah chuan a hmeltha pawl tak a ni ang,a hmul a buk a,a hnar leh ka vel a sen chek bawk sia,tunlai tawng takin a cute tawp.

"Khawnge ka zawhte" tiin ka pi chuan kawngka a rawn nem hawng thuai a. Ka bula a zawhte mu a hmuh rualin a bulah chuan a rawn mu ve nghal a.
"I zawhte nen khan i pindanah zu mu rawh u aw" ka tih chuan
"Aih,tah ka mu dawn" ati tlat a,ka mutchhuak tawh bawk nen kan 3 chuan kan muho ta a. An han mangchhiatzia lah chu,ka pi ai mahin zawhte chu a mangchhia a,a chang leh a kham phei zawngin alo mu thul. Zung tura ka thawh pawhin an mangchhe lutuk chu thla te ka laksak ta tawp a.

Zingah chuan pawna motor horn ri vak vak vangin ka harh a,ka meng chiah ka thil hmuh vang chuan ka inperh tho zawk a.
"Ka pi,enge itih kha" tiin ka pi chhuata mu reng chu ka en a. Naute chuanna tura kan leiah chuan leng leh lenglovin alo chuang a,ala accident zui. A zawhte lah chuan asir atangin ngawi rengin alo melh reng ringawt a.
"Tho rawh,ana em?" Tih paha kaihthawh ka tum laiin pawnah bawk chuan horn a ri leh tuarh tuarh a. Parda chu keuin ka en a,Zosangliana alo haw a ni ngei ang. Kawngka pawh hawnsak tum lovin ka pi bawk chu ka buaipui zui a. Ka tung tho a,a chuanna atang chuan ka lachhuak a.

Kan in buaipui fel vel ang tihah kawngkhar hi a rawn in theh hawng thuai a. Zosangliana chu thinrim hmel zet hian a rawn lut a. Ka pi lo ner nai nai a hmuh chuan
"Pi zai" tiin a au tuarh a,ka phu nasa lutuk. Pi zaii a rawn lan mai takloh ah chuan
"Kima" tiin a aia ring chuan a au leh tuarh a,chutah,Kima chu a rawn chho nghal a.
"Ka pi hi a pindanah hruai rawh" atih chuan ka pi leh Kima chu an in kaichhuak ta a.

"Ilo va haw hma ve" ka sawi fel hman awrh ang tihah
"Heihi enge awmzia?" Tiin motor chhunga Doctor-a nghenga ka mulai hi min hmuh a.
"Ka muhil" ka tih chuan
"Malsawm. Ka thikthu a chhia tih i hriat kha,engvanga a ruala rawn haw nge inih. Engvangin nge a dar nghenga i mutthilh?" Atih chuan dam zet hian
"Dar nghen tur pasal ka neilo miau a ni. Nuthlawi damdawi zuar buaipuiin Champhai awh nilo Aizawl lem lemah a phe buai lutuk a" ka tih chuan sawitur a hre tawhlo nge,thinrim hmel zet chuan a phone chu a hum ruh hle a.

"Lalhriatrengi kha apa hawtuten dawtin alo puh a,ka inrawlh loh chuan an man mai dawn a,apa in ka puihna a rawn ngen a,ka pui mai a ni" hriat nuam deuh zawka atih chuan
"Aho. Duh leh man se,duh leh man lo se. I department chan meuha an man chu hmingchhiat huamin i pui ania. Minister ropui tak chu ilo ni" tihel pahin ka kalpel hmak a.

"Hmingchhiat huamin vawikhat min tan pui tawh a,tikhan kan in rul tawk chiah" tih pahin ka lam bawk chu a rawn pan a.
"Aho,ka buaina nilo,ka buai peihlo" tih pahin khumah chuan ka thu hmak a.
"I buai ang,i buai tur a ni. Ka nupui inia,i buaina a ni. Mahse,heihi hre rawh,min dawi a,min hrai rui te a nihloh chuan ka phatsan ngailo ang che. Ka hria,sex hi enga tan mah ka ngailo,hmeichhe tamtak ka mutpui tawh. Mahse,ka tawn zan che atang khan tu hmeichhia mah hi ka la tawk lehlo. I awm chhung chu tumah ka tawk ngailo ang. Ummm,chuvangin mipa dang hnaiah awm tawhlo hram rawh" tiin ka hmaah chuan a rawn thuhniam a. A sawi dan vel chu a khawngaihthlak ve hmelin a thutak hmel takzet.

"Ka hre bik hleinem,ka rawn haw na turah alo chuang ve ringawt anih kha" ka tih chuan alo bu nghut nghut a.

Enge kan awmzia pawh hi ka hrelo,second reilote liamta khan kan thinrim dun em em a,a hnu lawkah kan lungawi leh em em a. Heihi em ni ka nu in nupa buaina chu sawidun zel tur alo tih chhan,sawidun zel hian lungawi pawh a awl aniang.

Atuk atang chuan nundan phung pangngai in kan nung leh tan a. Keipawh naute neih a hnai tawh vangin naute thil tur kan la leiloh te ka lei nual a,ka lei ti ila ka chah a ni zawk mah ang chu. Ka vlog na atangin thil hi ka hriat hnem tawh phah hle a,naute pianghlim mamawh pawh tamtak ka hriat belh a,hmangchang thlengin ka hriat belh hnem hle.

An ngenna ang ngeiin naute thil ka chah thar leh ahma amiho te chu ka vlog ah chuan ka tilang a,kan in puahchah dante chu ka tilang vek a. Kawmthlang dawrkai Zomuansangi fapa duat sual te nen kan buai atang khan a tam zawk chuan Zosangliana nupui ka ni tih anlo hre tawh a,entu pawh ahma zawng aiin ka ngah a,nuam ka ti ve hle a. Video pawh a tam thei ang ber siam ka duh a,cake siam vel ka zir pawh ka la chhunzawm thei meuhlo a ni.

Vawiin pawh kuttin siamthattir turin dawrah ka kal a,Chanmari kawn thlen hma deuhah a ni. Zosangliana driver pakhat zawkin min hruai a. Ka kuttin siamtir lai te chu vlog ah ka tel vek a. Chumai nilo,ka la hriat ngai reng rengloh hmai tih mawi lehzualna ka timai,chutiang chi hrang hrang chu ka ti bawk a. Ka thil la tawn ngailoh anih vangin nuam ka ti hle a.

Chutia nuamsa taka ka hmai an chiah laia ka lo mut er er lai chuan
"Ava nuam awm ve" tih ri ka hre ta a. Phawk zetin ka meng a.
"Ehe,i buailo mi. Engtin nge i lokal theih zawk a?" Ka ti hliai a. Dawr chhunga awm ve dangte chu anlo hawi duh nasa mai.

"Ka nupui rai kawh luah tawh hi amah chauha a vah kual ka phal hleinem" tih pahin ka biangah chuan a rawn fawp zauh a. Lai zetin ka lo nem sawn a. Camera chu kawk zauhin
"Video in ka la asin" ka ti sep a.
"Ka nupui ini tih an hre vek tawh tho alawm" tih pahin camera lam chu ava hawi deuh kher a.

Kan thiltih lai chu ala zawh mailoh avangin darkar khat dawn chu ngawi rengin alo thu ve run a. Chuvang emaw ni tehreng,hnathawk leh a che apiang mai chu an khawr tut a,an chesual deuh rum rum a. Pakhat phei chu step ah a rawn lum thlak ringawt kha.

"I ning tawh em. Ti ve la,mipa tih chi pawh a awm ania" tia ka mutna atanga ka va biak chuan a lehkhabu chhiarlai chu khupin
"Hmeichhe dangin min sawngbawl vel kha ilo thik leh si ang" ati anih chu.
"Awiii,kal teh" tihpahin ka bag chuan ka vawm pawp a. Alo dawng chat a,ala nui vur vur lehnghal. Midang pawh chu laih hmel deuh hian anlo nui vur vur hlawm a.

Kan zo fel a,dar 1 a ri thuak tawh a. Ka riltam thu ka sawi vangin a thlang lawka restaurant ah chuan kan kal leh a,ahma kan kalna kha a niin ka hria.
"Heihi lawm,ahma kan kalna kha tiraw. An siam tui eee" tih pahin ka hawikual vel a.
"Tui itih vang alawm ka kalpui che" atih chuan
"I hrelo" ka lo ti vat a. Kan eitur chu alo ziak pah mual mual bawk.
"Hriatloh ka neilo" tih paha min rawn melh zeuh chuan khabe dawn meuh hian ka en a.
"Vawiin hi enge i hriat a,thil tihsual i nei chiang" ka ti ta tawp a.

Chutah,za fe hian a rawn nuichhuak hawk hawk a.
"I nei em sawi rawh. NoMaleki lam ami?" Ka ti leh hram a.
"A teuhlo lutuk tlat. Ani nen buaipui tur kan neilo" ati deuh hmuk a.
"Anih anih. Ka sawi mai mai anih kha" tiin a kut chu ka chul a.


Nileng deuhthaw chuan kan chhuak vak a. Tlereuh zawrhna dawrah te min luhpuiin zungbun te chu min thlan tir a,a mawi hlawm lutuk a thlan tur ber pawh ka hrelo. A tawpah chuan min enpuiloh Țhi lam zawk chu ka duh ta tlat a. Rangkakchak thi sei over lo,lunghlu hringa chei tle nalh zet hi min leisak ta a. Kan lei zo ka lawma ka lawm zia mai chu,ka nuihna lamah ka ha hmaite hi a ro vek tawhin ka hria.


Ina kan haw pawh chuan ka lawm lutuk chuan ka en ning theilo a. Ka nghawnga ka awrh tawh pawh chu la thla lehin ka han enkual leh vel a. A mawi lutuk chu ni thei hian ka hrelo. A bawm chu lachhuak in uluk tak hian ka dah a.

"Tinge i phelh leh taka?" Tiin ka nghawng chu a rawn fawp zeuh a.
"A mawi lutuk a,ka awrh ui alawm. Bakah,miin anlo hmu anga,min suam an tum phah ang" ka ti chuan a dul alo chul zeuh a.
"Awrh rawh. Khati khawpa i lawmpui anih chuan i dahthat tur hrim hrim pawh a dang kan lei leh mai ang. Tin,ka nupui duhlai hi tuman an suam ngam tur a nilo,anla nung ve reng duh anih chuan" ati vei duah a.
"Duah a che,iti rapthlak e a" ka tih chuan nui deuh hawk hian
"Ania lawm. Tak taka,zanriah min lo eisan dawn nia,Governor in a inah zanriah a buatsaih dawn a. Hruai che ka chak viau na chu kan fapa nen ina lo awm hahdam zawk ula ka duh" ati mawlh mawlh a. Ka lo bu nghat nghat a. Bathroom lam panin inbual tur chuan a kal ta a.

A sawi ang ngeiin chaw chu a eichhuak a. Keini Zorema te nupa an mutthilh vangin Pi Zaii nen chauh chaw kan ei a. Chawei a tui lemlo khawp mai.

"Enge chawhmeh ni a?" Tih pahin Usangi chu choka ah alo lut a. Ka hmuh tirh ai chuan a thau ve deuh tawh a,a natna a zia deuhah ka ngai.
"Lo thu rawh. Rita-i hian bawngsa Roast a eichak sia,ka siam a" tiin chawhmeh dang awm ang angte chu a hrilh a. Bawngsa roast a sawi laia Usangi hmel awmdan chu,tilang ngam chiah silo,hmuhnawm reuh tak a ni.

Ngawi rengin a thutna hmunah a rawn thu thla hmak a. A thut fel rualin ka nghawng chu a en chat a,ka rangkachak thi chuan a mit ala nghal zar tih a awmdan atangin a hriat mai.

"Thil thar i dawng alaw?" Ati ta nge nge a.
"Nia hei,i nau in min lei a. Ka ngen pawh anilo,vawiin chu a mood a fuh lutuk a,min lei ve ringawt anih hi. Zungbun pawh a order a,inneih zingbun tur aniang" ka tihlaia a hmel awmdan chu,awihlo lutuk hmel hi a pu a.
"Mama hian tlereuh a ngaina lo asin. Hmeichhe tlereuh inbel teuhte hi a ten a. Keipawhin ka inbel a phal ngailo" atih chuan ka enkual a,Zorema zungbun pek niawm tak a bun tihloh chu sana bak a bunlo tak tak a. Mahse, 'Ten' tih tawngkam han hman kher.
"Nimaw,avan mak. Awrh lova dahthat ka tum pawn aman min awrh luihtir zawk a. Min ten ve kherlo aniang" ka tih chuan eng emaw sawi tumin a ang zuai a
"Keichu inhmeh min ti niang" ka ti leh zat a. A sawi tum pawh sawi ta lo chuan a ngawi ta daih a.

Chawei kham veleh pindan lamah ka lut leh daih a. Ei thleng vel Pi Zaii sengpui ka tum pawhin
"In pa in min hauh i duhloh chuan awm mai mai rawh" ati miau sia,chutia mi awm hle hle hmu thei viau te chu tiin ka awm ta hle hle reng mai ni.

Tihtur a awmlo ema tiin chhun vela ka video lak te chu ka edit ta a. Ka edit laite chuan keimah zawk ka lai leh vel a. Hmai ka khawihtir laia a rawn lang deuh hlawl mak ka ti hmel te. Camera lam hawia alo nui suk ka hmuhte chuan ka tuiral zawih zawih nimai hian ka hria.

A zan a zan chuan YouTube lamah chuan ka dahchhuak nghal a. Ka vil chhung ringawt pawhin rawn comments tu an tam lehpek hle a.
'Vawiinah khan ka hmu che u'
'Thla lakpui cheu ka tum a,ka zak a'
'In inhmeh tawp'
'I pasal khan a duh hmel che ' tih vel a ni. Chutiang fakna chhete te chuan min tilawm ve em em mai ni.

Mahnia ka khik vur vur laiin kan khaw lama ka thianten min lo call a. Eng eng emaw sawiin an ri leh vak vak a. Chutah
"Lal Doctor-a kha an transfer daih asin" anti ta mai.
"A thawk rei tawh a,kan khua te chu an khua ang maiin a ngai tawh a. Inhmun te pawh a lei hial tawh kha nia. Tunah an rawn sawn leh thut sia,ka khawngaih reuh tak tak" antih zawm mawlh mawlh a. Ani lah tak a,an sawi ah chuan dawt pakhat mah a tel hauhlo.

An sawi zawm zel a. Kei erawh chuan ngaihtuahna hran daih ka lo nei a. He thilah hian Zosangliana a inrawlh ka ring bur,a thiltih nilo se sawn chhan tur an neilo.

Kan inbiak zawh hnuah message in ka va zawt a.
'Doctor kha i sawn tir a nimaw?' Ka tih chuan sticker a ngaihna hrelo deuh hmel hi alo thawn let a. Kan hmela mai mai chu,vawiin a mood a fuh ka ti reng a. Ama tawka hna pawimawh atih tak alo thawh vang anih chiah dawn hi.

A ruk tak chuan zialo ka ti hle a. Doctor-a te kha an unau an rual a. A farnu te 2 a awmpui nghe nghe a. Anni phei chu kan khaw lama school kal laklawh lai anni lehnghal.

Ka ngaihtuah lai mek mekin number hlang atang hian
'I pasal chuan thil a tithei hle mai' tih hi ka dawng hlawl a. Tudang nilovin Doctor-a ngei kha ani. Inthiamlohna chuan ka khat a,ka fimkhurloh vanga ani in alo tuar daih chu hrehawm ka ti hle.
"A zialo khawp mai" tih te chuan ka chhanglet a. Thupha chawi vak khan engmah a siamtha tawh dawn lova,a rilru ka tina zual ang tih ka hlau bawk. Ani pawh chuan min rawn chhang zui tawh lemlo a.



A ni telin ka naute neih ni tur a hnai ve zel a. Zosangliana pawh hna lamah a buai thei hle a. Zanlai pelh thak thaka thingtlang lamah langa zin chang an ngah a. Damdawi vawrh lar lai alo ni bawk nen an buai zual hle a. Tunah pawh Champhai lamah damdawi lam vang bawkin an zin leh a,chawhnu lama lo thleng tur anni.

Ka zing tho tur chu ka ni deuh huih mai hian ka hria a. Ka ek lah chu a chhuak riai riai reng a. Ka inbeng kang a,ehe,ngawi teh,zun ka cheh a nih hi.
"Ava thing tak. Ka zunlai ka hre miahlo" tiin ka dap kual a. Alo huh vek tak tak. Ka tho vat a,ka kekawr te chu thlak in ka inphih fai a. Ka nu in min lo call chuan zun ka cheh thu chu ka hrilh ve a.
"I tui bawm a keh a nilo maw?" Atih chuan
"Khumah tui ka mutpui ngailo. Tui bottle pawh khum sir daiha alawm a awm. Ka tlawh baw lovang" ka ti mai a.
"Awii,ila mawl ve sia,engtia tih chi nge maw inih" ati sep sep a. A chutia mangchhe lutuk tura han in ngaih.

"Ka dah dawn,sawi tur i neihloh chuan,ka ek a chhuak. Ka naute pai hi ek chhuah theih mai tur ang hian a awm" ka tih chuan a thutna atangin a tho zawt a.

"Malsawm. I â emai,nau i vei tan a nih chu,i tuibawm pawh a keh a nih chiah kha" ati hluai a.
"Amak,khumah tui ka mutpui lo" ka ti hlar a. Beidawn hmel takin a chal chu a dawm ngawih ngawih a
"Inah awm an awm em?" Ati leh a
"Ka hrelo. Usangi te inentir ni ania. Pi zaii chu a bazar ni ania,a zing bazar ngei anga. Ka pi leh a zawhte an awm ang,i be duh ami?" Ka tih chuan
"Enga tan nge ipi leh a zawhte chu ka tih anga" alo ti bak hlar a. Be duh silo enge min zawh ve chhen.

"I pasal bia la,a ranglamin damdawiinah kal rawh u. I neih hmasak ber tur ania,inah a chiloh,hmanhmawh ang che. Naute mamawh te in dahkhawm kim em" ati zung zung a.
"Enge,ina neih chu,aho e. Pi ziri pawn a fapa inah a nei tho lawm. Naupang zawng zawng aiin a thang duh leh nghal" ka ti zawt zawt a. Ek chhuak nen,thil ho tak tak a rawn sawi reng chu ka kham takzet.

"I han at dan em em hi maw" tiin a kun tlawk tlawk a.
"Aw,ka hria. Hei,ka e dawn ania. I hmuh ve duhloh chuan dah" ka sawi zo hmanlo zun bawk chu ka cheh leh a
"Zun ka cheh leh ringawt tawhhh,inrin na hman reng reng awmlo" ka ti chul a.
"Awi maww...ka hlauhthawn ang nge nge in,i pasal chu ka lo be mai ang. Tu emaw ko la,damdawiinah kal vat rawh u" a tihlai chuan ka pum chu a rawn na zual thut a
"Ka pum ana tawh lutuk,ek pawh ka cheh dawnin ka hria" ka ti chul a.
"Sang reng reng suh,i naute in a tuar ang. Tu emaw ko rawh. Hmanhmawh la,phone hi dah suh ang che" atih chuan
"Ka sanglo thei hleinem,ka serh chung lawkah hian a awm tawh ania" ka ti leh vak a.

"Awiii,min ti a zo dawn. Nau i vei leh veiloh te chu hre ta che. I mawl hrim hrim,tiang te chu mahni chhia leh tha hriatna pawn hriat tur" ati teh zek a.


"Enge min hauh vak kher. Nau i chhar apiangin min entir duhlo a,parda in zar zel anih kha. Pi ziri nau neilai kan rawn bih thlak bak kha a hring a hranin ka la hmu hleinem. Kha pawh a kap a hmul nasa lutuk a ka hmu chiang theilo" ka tih zuah zuah lai chuan
"Daw daw suh,nau neih dawnin an in ziat vai vek zel" ati leh a.
"Ehe,a nimaw?" Mak tih hmel deuha ka tih chuan chhuatah a thal tawp lo chauh.
"I in ziat failo tih sawi hlek suh. Teuhlo,an ziat ang che,doctor pawn" atih chuan
"Ka Doctor chu mipa ania. Zosangliana hian inphelh a phal ngailo" ka tih chuan phone chu nilo se min kek hrep duh tawh ang.

"Tak taka. Ka uang anih kha,ka fai vek,a fai kâng mai. Awii,ana lutuk" tih pahin thawmhnaw bawm lam chu ka pan kak tuang tuang a.
"Nau vei lai pawhin zahmawh sawi banglo. Ti vat vat rawh" ati hlar a.


Ka makeup dahna hmaa ka thut chuan enge ka tih dawn tih min zawt he haw a.
"Ka inchei dawn" ka tih chuan phone a dah hmak. A hnu deuhah chuan a rawn call leh a
"I pasal ka hrilh tawh,driver alo kal ang" ati ta a.

Driver nghakin ka ding reng a. Chutia ka nghah lai chuan Usangi te zawk anlo thleng hmasa a.
"Khawnge i kal dawn?" Min ti heu mai,ka inchei viau em ni.
"Nau ka nei dawn" ka tih chuan an nupa in an in melh he haw a.
"Nau i vei tawh ami,i tuibawm a keh tawh maw?" Phur ve hmel zeta atih chuan
"Tuibawm chu ka tikehlo,mahse,zun chu tlem ka cheh. Awiii,ana leh tawh,ka sang tawh mai dawn,a rawn pawng ut ut mai" tiin ka phar ruai a. Usangi chuan min rawn man in
"La sang suh,tuibawm keh pawh hrethiamlo khan inah puitu neilovin i nei theilo. He naute hi kan tan a pawimawh lutuk. Zorem,motor kha va tinung rawh" ati zung zung a.

An nupa nen chuan damdawiin lam pan in kan kal a. Kawng lakah te chuan ka te chel chul a. Engtin chiah nge ka awm pawh ka hre tawhlo,Usangi banah te chuan ka hmer a. Zorema samah te chuan ka va tham ta bawrh bawrhin ka hria.

Damdawiin kan thleng a,nau neihna lamah min hruailut nghal a. Rei fe san ka pek hnuah pawh chuan rin aiin a rawn chhuak duhlo a.
"Ka san tum lai khan min santir se chuan ka nei daih tawh ang" ti zuah zuah pahin ka sang vak vak a. Ka tanna lamah thlan te chu atla a,thaw a sa phung thei.

Chutiang ngawt chuan nilengin ka sang a. Ka la nei thei chuanglo. Ana lutuk chu sawi ngaihna pawh a awmlo. Engtin nge naute te kha kan lo siam peih zawk le. Hetiang anih dawn ai chuan neihloh pawh ka thlang zawk.

Thim dawnah Zosangliana leh ka nu an rawn thleng a. An hlauthawng hmel lutuk chuan ka tah an tichhuak. Zosangliana chuan
"Hlau suh aw,i bulah ka awm reng ania,engmah a thleng dawnlo" a rawn ti deuh sek a.
"Thi tur ang maia i rawn tawng le" tiin a sam chu san pek nan tak chuan ka lo hmang a. Hrehawm a tuar ve tur a ni ringawt,a nuamlai chin chiah a tawng bik tur a nilo.

Doctor te sawidan chuan ka chhul kawngka a inhawng theilo a ni awm a. Damdawi min pek hnu pawh khan ala zia thei chuanglo.

Pindan chhungah lah chuan nurse leh doctor tiamin lo lut tha ngam pawh an awn tawhlo,san pek nan ka lo hmang hlawm a,ka nu phei chu ka ham pilh a ni awm e.

Ka rilru chuan
"Hetia nau ka har chhan hi ka naupan laia kel nau vei harsa deuha nei ka en vang kha aniang" ka ti mawlh mawlh a.

Zankhua in ka vei a,khawvar lamah pawh ka san chhuah theihloh avangin keimah pawh chu ka chau hle a. Ka khaw hmuh te chu a fiahlo tan.
"Tiang chuan a nei theilo ang,zai chhuah mai angai dawn anih hi. Ka pu,duhlo viau mah ula zai angai" Doctor in atih ri leh ka nu in
"Amah hi a pian khan zai chhuah ania,anu khan a nunna a chan phah a" atih ri chu ka ri hriat hnuhnun ber a ni.


"Kha chen kan nghak a. Chhungte zawng zawng do khawpa i thlan chu heihi maw?. Kan thlahte ah tiang hi an awm ngailo,duh pawh kan duhlo. Zu in a hrat inti em khah,chuvang anih chiah chu"

"Ka sawi ka sawi kha. Rai laiin kuang hnaiha awm a thalo"

"Kan thu a nilo,kan chanloh tur a nimai" tihte chu ka bengah chuan a ri nuk a. Harsa ti zetin ka meng diar diar a. Ka khum bulah ka nu hi alo thu ngui bam a.
"Nu" ka tih chuan a rawn hawichhuak vat a.
"Ilo harh tawh elaw" tihpahin a muttui chu a hru zeuh a.

"Tinge i tah a. Khawnge ka naute chu?" tiin ka hawikual a.
"Khawnge Zosangliana" ka tih leh laitakin kawngkhar a rawn inhawng a. Zosangliana leh usangi teho chu an rawn lut tham tham a,ka la hmuh ngailoh mipa pakhat hi a tel ve bawk.

"I harh tawh maw,na i nei em?" Titu chu Zosangliana ani. Mahse,a din ngaiin a ding reng a,ka lam panin a rawn pen miahlo. A hmel ka enchiang a,a mithmul leh a chhehvel chu a hnawm deuh chap a,tap zo hlim hmel hi a pu a. Usangi pawh chuti tho.

"Tinge,in bui vek hlawm a. Khawnge ka naute?" Ka tih chuan an zinga ding ve pa pakhat chuan min ngei hmel zet hian alo hawikual vel a.

"Zosanglian. Khawnge kan fapa ka tih chu?" Ka tih vak chuan ka nu zawk chu a tlanchhuak ta daih a.

Enge an awmzia hi,khawnge ka naute. Ka naute chu ka chan amaw.

"Fapa i nei a. Kg 3 ania" titu Usangi chu ka en a.
"Tunah khawnge a awm. A tha em,a kut leh ke te a kim em?" Ka tih chuan
"NICU ah a awm. Thla 8 leh tlema a pian avangin a thalo deuh a,a hlauhthawnawm loh" ati leh a.
"Ka zawhna ila chhang lo. A kut leh ke a kim em?" Chiang fek fawk chuan ka zawt nawn leh a.

"Kim e,a kim vek. Mahse" tiin a thaw halh a,a tawp zui daih. Midang nen chuan an inmelh kual ralh a. A sawi zawm  nghakin uluk takin ka lo en thung a.

☆♤☆♤☆♤☆


(Tikha chuan Monday zanah a ni leh deuh dawrh tawh ang aw...tunlai chu dawr kan hawng leh tan,buai namemlohvin kan buai a,nilengin kan ding a,hna kan thawk a,kan haw tlai thei si. Dar 9 velah inah kan haw thleng chauh a,inbual chawej tih vel nen storu type na hun pawh ka nei meuhlo....mahse,ka mimal harsatna vangin kha chen ka chawl a,ka promise tawh hnuah cheu ka chawlh leh si chuan min ngei ang tih ka hlau a,chau chung²in ka lo type hram hram a ni. Mut te hi ka thlahlel ve thei lutuk. Mahse,ka hna a ni ve tho bawk si. Vawiin phei chu ka p8 ka tai ana lutuk a,ka then tlawk² reng mai ni...chuti chung chuan story ka lo type ve hram² a,min lo hlutsak in,comments te kha inlo pe suau² dawn nia aw....

Zanrei tak² thlengin min lo nghak thin a,a lawmawm thin hle a ni. Mangtha vek ule)