"A ngai ang khan thu leh mai ang u aw" Pa Ro-an atih leh vang chuan motor awmna lam pan in kan kal chho leh a, ka bag chu Remzualan ah sak min tum lai chuan kan hnung lam atanga "Ka lo ak ang" tih ri lo chhuah vang chuan kan hawi a, U Nunpui-a chuan kan pahnih chuan minlo en tawn dun reng a, "Ka ak thei alawm" ka tih lai chuan kan lam lo pan in alo kal a, midang an awm ve vang chuan nuamlo ka ti ang reng, "Khawi le" tiin ka ah lai chu la in a ak a, min kal pelh hnu chuan Remzuala chu a thaw hak a, "Kal ila" ka tih chuan minlo thlek vut in a bu zeuh a, kan kal chhunzawm ve nghal a, kal lam ai chuan haw lam a hathlak ve deuh zawk ani.
Motor awmna kan chhuah chhoh chuan bungrua te dah lut in kan chuangna tur theuh ah kan thu lut a, Feli pawh a chau deuh aniang a tawng hlei peih tawh meuhlo
"I mut a chhuak mi" tia ka sir a Feli thle leh buk buk thin chu ka bia a, alo bu zeuh a,"Minlo nghen rawh" tiin a lu chu ka dar ah ka dah a, U Nunpui-a pawh lo thu lut in Lawmzuala leh Remzuala anlo thut luh leh hnu chuan motor ti nung in kan in khalh chhuak a, kal lam ang khan hla kan play tawhlo, kan chau hlawm aniang kan tawng tlem khawp mai.
Kawng chanve pawh kan tlan hma chuan ka mut a chhuak tan der a, ka meng lui hram hram, kawng chhia a kan in sawh leh zeuh thin chuan ka harh leh thut zel "Minlo nghen rawh" U Nunpui-an atih chuan ka lo thle nasa tih ka hre chiah ka mut chhuah em vang chuan zah pawh sawi lovin a dar ah chuan ka nghen a, "An va chau awm ve" tia Lawmzuala tawng chu ka hriat hnuhnung ber ani.
"Kan thleng tawh ania" U Nunpui-an ka lu lo khawih zeuh pah a, a tih chuan ka thu tha thuai a, "Ee ka lo mu tui reuh lutuk alawm" ka ti nghal a, alo nui mai.
Midang ho chuan bungrua ho an la chhuak a, Feli chu kai tho in motor atang kan chhuak ve a, Nu Awmteii te ka hmuh chuan "Faki te kha an haw tlang ami" ka lo ti vat a, "Aw nia kan thlah pah anih kha" alo ti a, bu zeuh in Bag ho chu ka khai lut ve a, "Thingpui te lo in lut ula" Nu Awmteiin Remzuala leh U Nunpui-a hnen a a sawm chuan "In tawhlo mai ang kohhran committee thut khawm zan ani sia" U Nunpui-a chuan alo ti vat a, "Eee ni dawn e I chau awm mange" Pa Ro-a chuan alo ti ve a, a chauh lem loh thu in alo chhang a, Remzuala an han sawm ve chuan ani pawn alo hnial a, inchhung ah inzui lut leh hmasa in reilo te an thut kawi hnu chuan an haw tur chu kawt lai thleng ka zui chhuak a, "In chau awm sia tui deuh in in mu dawn nia" tiin ka ding a, an ding ve a U Nunpui-a chu sang hret zawk mahse Remzuala hi a pa lian deuh zawk a, an mi uap pawh ana hle "Nangpawh Muttui le kan kal phawt ange" tiin U Nunpui-a chuan ka dar hmer zeuh in a kal a, "Anih aw" ka tih zui chhuan lo hawi let in a bu zeuh a, a kal liam chu Remzuala nen chuan kan thlir liam dun a.
U Nunpui-a kal liam ta maw tih ah chuan "A awmdan hi hriathiam a har iti ve em" tiin Remzuala chuan min bia a, a lam hawi in hriat thiam loh hmel zet in "Enge awmzia?" Ka ti a, min melh reng pah hian a khi suk a, "Eng nilo e, i hmeltha reuh ka tihna" atih chuan ka nui a "I mi fak der na vangin ka lawm e" ka tih chuan a nui ve hauh lo min melh leh run tawh "Ngatinge i bulah hian him ang tlat a in hriatna ka neih le" atih chuan hrethiam lo zet in ka melh let a, "Maw?" Ka tih chuan "Ka hahdam thin" ati leh sup a, "Buaina/Harsatna i nei em ni?" Ka tih chuan ding tha in hma lam en hian a thaw hak a, a che zia chu ka lo en reng "Mihring nih chuan nei ve e chingfel dan pawh ka hrelo, ka thiamlo bawk" ati thum leh dut a, "I sawi hreh loh chuan engtik lai pawn ka ngaihthlak sak thei che ania, mahni a tuar a pai reng hi a tha vek lo" ka lo ti a, "Ka chhungte ber hnen ah pawh ka sawi theilo ania sawi pawh ka sawi thiam lo" ati leh a, a hma ai in a àw a chang deuh "In chhungkua buaina chu ka hre miahlo mai mahse thatna in mi kan hneh thei tih hi i ring em?" Tia ka zawh chuan minlo en chhuk ran a, "Ka hrelo ka la tawng lo" ati a, hma lam chu ka en a "Tawng kher a ngai hleinem keini ngei pawh hian kan thlen tir thei alawm" ka ti a, "Chu thatna in mi hneh rawh min ti tihna mi?" Atih leh chuan a lam hawi in buk zeuh zeuh pah hian "Tunah ti rawh chu ka tilo mahse muang changin tum la" ka tih chuan a nui suk ka tawng tawp hmak thung, "Ka chhungte hi chungtiang a tih chi pawh an nilo sum an hmangaih lutuk tawh tlat" atih leh chuan "Nangin sum i hmangaih em anih" ka tih chuan min melh ran mai, "Ka hua" ati sup a ka nui seih.
"Beidawng lo a beiseina nen a hmalam hun thlir tlat tute hian, A tawpah rah chhuah duhawm tak sum engzat mahin a lei phak loh nun hlimna an beisei chhuak thin.
Beiseina nen i nunkhua chu thlir la, beidawng mai lo in tang fan fan la.
Harsatna leh beidawnna chauh hi itan a ruat ani biklo tih hria la aw" ka tih chuan a ngawi reng, a hnu deuh ah chuan "Ka lo in ngaihtuah ang kan kal ange nangpawh i chauh kha lut tawh rawh" atih chuan "Awle engtik lai pawn ka ngaihthlak sak peih reng che nia, kal rawh ka lo en liam ang che" ka tih chuan lut hmasa turin min ti tlat a, hnial zui lo in inchhung ah chuan ka luhsan a.
Midang ho pawh anlo inrem fel zo tawh a, "Mu hma ang u ka chau reuh lutuk" Nu Awmteiin atih chuan Lawmzualan "Nu tling pui khati vak vak a tui cheng a ngai em ni" alo ti leh nghal zat a, "I chhe zet zawt khua lum em hi ka cheng ve loh in" Nu Awmteii chuan ati leh a, "Pangchangna tur nei loh chuan kawlh hraw tur" Lawmzuala chuan ati a, "Hmangaih tu dik i tawn ve hun ah chuan i hlim ve mai ang tunah chuan mu phawt rawh" Nu Awmteii chuan tho pah hian ati a, Lawmzuala lawm lo hmel mawlh chu! "Nupui ka neih hun chu aww" atih chuan "Ka lawm viau ang" Nu Awmteii chuan alo ti vat a, ka lo nui "Ka Ning ah" tiin Lawmzuala chu pindan ah a lut tau a, "Mu hahdam ru nangni pawh naktuk sunday te ni sia thawh hma in duh ang" Nu Awmteiin atih chuan Feli nen chuan pindan ah kan in zui lut a, "Dar 7 chiah ala nia" Felin atih chuan khum a, a thu chu ka melh vat a "I mut a chhuak lo mi" ka tih chuan alo bu zeuh, a mut a chhuak hle khan ka hre sia a harh lak lawh aniang.
"Book chhiar la" tiin naupang thawnthu bu chu ka pe a, la in khum a mut pah hian a chhiar a, keipawh lui kal lo kan ni bawk nen ka inbual hmasa leh te te a, ka inbual zawh chuan inthlak zo in mu mai lo in camera a thlalak ho chu phone ah ka inthawn a.
Ka inthawn zawh chuan ka en let a, nalh hlawm phian zui a, kan thleng tirh a an tui cheng lai thla ka lak chu ka status a, pangpar leh thingkung pic 2 ka status bawk a, thlalak ka en phei zel chuan U Nunpui-a thla ka lak sak hnung lam a hawi lai chu ka hmu a, a nalh reuh in a hmel a lang lo tho tiin ka status a, a caption ah "Pipu" tiin ka up a, Faki nen nui sang a kan in selfie na "
" caption chung in ka up leh a, camera hi old camera mah nise a hmun in a zir bawk nen ala fiah a kan lang tha ve hle."Wow move kan va siam chak ve" tih hi thlalak ka en lai chuan Eli nen atang ka dawng a, alo view leh diam tawh anih hmel.
Gallery atang out in Eli message chu ka open a, "Nuam reuh lutuk" ka tih chuan lo seen vat in "Ka chak ve eeee a hmun te kha nuam hmel si, enge in tih dun a" a rawn ti leh nghal a, "Kan kal kual mai mai" ti a ka reply hnu chuan Remzuala message alo thleng vang in out in Remzuala message chu ka open a, "Min ti buai" tih te hi niin hepa hi a message a mak thei riau mai, "Tu in" tia ka reply chuan a seen nghal a "Nangmah khan" atih leh lek phei chuan ka bo tulh tulh "Eng ti zawng in" ka ti leh chuan a seen a min reply tawhlo thung.
Out in Eli message chu ka hawng leh a, "Enge i caption awmzia kha" tih hi alo ni a, ka hrilh fiah chuan nui pherh duai lem emoji hi alo thawn teuh a, "A zeilo ve eee khatiang chut deuh kha chu an ven thawng awm lo deuh ang chu" atih chuan nui lem leh tap lem emoji
hi ka thawn a, Fakin ka status chu lo reply in "Ava nalh tak minlo thawn ve rawh" atih chuan a lang ve na pic ho chu ka thawn a, an nufa thlalak ka thawn tel chu a hmuh chuan "Thla kan lak dun loh na chin pawh ka hre tawhlo kan dp nghal ange" tiin a dp nghal a, a sawi tak ah chuan nikum a kan family pic kan lak tir na a, mimal ka. lak leh a, ka thlalak black and white kha ka dp ania ka la thlak leh miah lo thung, midang chuan "I sual hmel" an ti a, a awm tho ka nui lo miau a.Phone chu dah in Bible ka chhiar a, fian rial hun te hi hmang a tha! Lei ah hian khualzin mai kan ti si a. Bible ka chhiar zawh a ka tawngtai leh hnu chuan light off in ka mu a, dar 8:30pm chiah ala ni thung U Nunpui-a a bang tawh angem tih ka ngaihtuah lai chuan ka phone message ringtone a rawn ri a, ka en chuan U Nunpui-a hming ka hmu a ka nui sak! Ka open thuai a, ka status a a thlalak chu lo reply in "Keimah law" alo ti a, "Anih hi a mawi sin" ka tih chuan ka chats ah a awm reng bawk nen a seen nghal a, "Kha ai mawi ka nei" atih chuan "Eng maw?" Ka ti a, a seen hnu ah thlalak Pakhat hi alo thawn a, ka hmuh chuan ka nui ver ver mai, pangpar thla ka lak sak lai ka nui ver ver lai niin, a nalh phian a phone atang alo la ve ngei niin a lang.
"I lak lai ka hrelo re re" ka tih chuan "Pangpar hlir i en alawm" ati a, a hnuai ah chuan "A mawi tiraw iti ve em" atih chuan "Ka hrethiam lo mahni thlalak tak hi chu, mahse i la thiam khawp mai" ka ti a "Keichuan nalh ka ti" a rawn tih chuan chhan dan tur ka hre mailo min fak ve mahse phone chhan atang pawn ka lai hlum lo chauh ani.
"Ka lawm e" tiin ka reply a, a seen leh vat a typing... Hnu chuan "I chau sia mu hil tawh rawh" tih hi a rawn thawn a, "Chau ve tho mai, nangpawh mu tawh ta che" ka tih chuan "Ka mu mek alawm" alo ti a, min fiam ve ngei niin a lang, zing thawh hma a ngai bawk nen "Kan mu ange" ka ti a, "Muttui le" a rawn tih chuan "Nangpawh Muttui le" tiin ka reply a, out in phone chu ka dah a, inchung lam chu ka en reng kan inbiak dan leh vawiin kan inhmuh dan vel chu ka ngaihtuah a, Beiseina diklo ka pu duhlo viau na chu min ngaina lo hran lo tih ka hriatna chuan min ti hlim ani, taksa chau ve bawk aniang ka mu hil thuai a.
Zingah chuan dar 6:30 velah ka harh a, ka tawngtai zawh a phone ka en chuan "Morning i inkhawm dawn em" tih hi U Nunpui-a hnen atang ka dawng a, harh chiah e tilo chuan ka meng kawk ka hmu sual em ni le tiin ka phone chu ka off a ka on leh a, mahse ka hmu sual lo "Morning, inkhawm ang" tiin ka reply a, a online loh avang in a hmu lo thung, zing thawh a nuam duh hle mai!! Tho chhuak in tukverh ka hawng a, ni chhuak tawh chuan Kan pindan alo chhun a boruak a thiang in a reh ruih a he khua hi chuan ka thinlung a nei Chiang alawm.
Feli ala mut vangin thawm dim chungin ka in phih harh a, pindan atang ka chhuak zui a.
Nu Awmteii leh Pa Ro-a anlo tho tawh a, an pahnih chuan Kawt lai ah nilum ai pah hian anlo titi a, minlo hmuh chuan ka mut tui leh tui loh te min zawt a, ka Muttui thu in ka lo chhang thuai a "Eirawng bawl em em a ngai lovang chaw chhum ani mai" Nu Awmteiin atih chuan "Lo thu chhuak ve la" Pa Ro-a chuan alo ti ve a "Hmun kan hawl phawt ange" tiin hmun phiah ka la a, midang lo harh hma chuan pindan atang ka hawl chhuak vek a, chaw ka chhum leh hnu chuan naupang ho pawh lo harh in Nu Awmteii chuan alo bual a, inkhawm kan ngaih avangin in kei in hmarcha rawt ka lo siam a, chaw ei ka siam lai chuan Lawmzuala lo harh in pindan atanga alo chhuak min hmuh chuan a nui thaw a, "Iva mu tui awm ve" ka tih chuan "Nimin nuam ti fal kan awm em aw" ati a, chaw khawrh pah chuan ka melh zeuh a, ala nui reng "Enge" ka tih chuan "An hrelo der vel ah, i status chu a nalh hle mai" atih leh tak ah chuan hre chhuak in ka nui a, "Ee naa" ka tih chuan "A fuh chho tan riau mai nangni hi" ati a, "Engmaw fuh a" tiin Nu Awmteii chu alo phei a, minlo pui ve nghal a, "Eng nilo e pipu mawle" alo ti a, "Chaw ei theih ei ang u insiam chhung nen kan tlai hlauh ange" Nu Awmteii chuan ati a, tawngtaina kan hmang leh hnu chuan chaw te ei in chaw eikham chuan kan tifel leh a.
Inkhawm turin kan insiam zui a, kawr purple tak leh Puan cream rawng deuh chu bih in heels ka bun leh a, Sunday ah hi chuan makeup ka hmang ve thin ka sam roll in ka insiam zo meuh chuan dar hmasa a ri der.
Naupang ho chu Estherin alo sawm a an kal tawh a, Faki nghah pah a thutkhawmna a ka thut lai chuan U Nunpui-a pawh insiam sa diam in alo lut a, coat purple a ha a, smart leh pek teh e "Lo thu rawh Lawmzuala pawh hman tep ang" ka lo ti thuai a, "I inkhawm dawn a iva fel ve" alo ti ve sup a, "Fel vang pawh ni hleinem tihve reng tur anih hi" ka lo ti a, Lawmzuala lo chhuak chuan chutia keini pahnih lo Inbia kawr rawng in ang ha min hmuh chuan a nui leh thaw tawh a, "An han in matching nghal ringawt a, inva hmanhmawh ve" atih chuan U Nunpui-a chuan a hrethiam lo niang minlo en a, nui pah in ka dar ka lo kan zeuh "I hman chuan Kal ila" tia U Nunpui-a tho chu "Ee eeh lawkk" tiin ka bulah a rawn nam thu leh a, a phone phawrh in thla a la ta mai nihchu! "Lawmzual" ka tih chuan U Nunpui-a pawh a ding a, "Kal ang nalh lutuk" tiin Lawmzuala chuan a thianpa chu a kuah chhuak a, an kal chhuak chu ka thlir dun reng.
An chhuak chiah tih ah Faki pawh alo thleng a, a nalh khawp mai "I chhelo ngang" ka tih chuan lawm hmel zet in a nui a, "Nangma zarah nih hi" atih chuan "Chutin an ti ngailo" ka lo ti a, Nu Awmteii leh Pa Ro-a pawh anlo inzui chhuak a, "In nupa chu in mawi hle mai" Fakin atih chuan lawmthu anlo sawi ve luam a, a hma tawhlo vang in in zui chhuak in kawngka kan kalh a, biakin lam kan pan zui a.
Inkhawm kan thahnem ve thei zel khua mipui tam lo mah ila, heihi ni a nuam na dang leh pakhat chu! "Inva nalh hlawm ve" tiin Alexa leh a thianpa Pakhat hi inkhawm ban kan haw kawng ah chuan kan bul a lo kal pah hian an ti a, "Nang alawm ve teh mial a" Nu Awmteii chuan alo ti a, "Nimin lam te kan hmang nuam em ka tel silo a kim theilo" atih chuan kan lo nui a, "Nuam e hman la chu nuam iti viau ang thingpui lo in ta che" ka tih chuan lu lo thing in "Hei ka thianpa hi sawtah kal pui angai a nidang ah ni rawh se" atih leh hnu chuan in vei liam in an kal a, keini pawh kan haw tlang a.
U-Nunpui-a leh Lawmzuala chu chawhnu an tiang dawn vangin anlo haw lo a, Faki te nufa leh keini ho chu chhungthil te ei khawm in chawhnu kan inkhawm leh thap a, chawhnu inkhawm ban chuan Faki te pawn min haw san a, keipawh inthlak in school piah thingkung lian tak tak awmna ah chuan kal ka tum a, he mi khua ka thleng tirh a Nu Awmteii min hrilhna ah ngei khan.
Ka inthlak zawh chuan book,pen leh phone nen ka chhuak a, Nu Awmteii te hnen ah ka kalna tur ka hrilh tawh bawk nen school awmna lam ka pan a, thalai in ngaizawng te erawh chu tlang lamah an liam Fua Fua thung.
Thui pawh ka thleng hma chuan U Nunpui-a nen hian kan in tawk a, a inthlak ve tawh ani pawh "Khawnge i kal dawn" tih pahin ka thil keng chu a melh zeuh a, ka kalna tur ka hrilh chuan "Tikhan lo ding lawk" tiin a in lamah a let leh a, ka lo nghak reng rei pawh rial lo in alo let leh a "Kal ang le" atih chuan "Ilo kal ve dawn maw" ka ti a, alo bu zeuh "I phal lo mi" a tih chuan lu lo thing vat in "Phal e Kal ila nih" tiin mak ti ang reng tak chuan ka kal a, minlo zui ve thuai a, kan inbia vak lo sawitur ka haihchham deuh mak ka ti ve em a.
A hmun hi a hla vaklo nen kan thleng thuai a, thingkung hnuai ah chuan thing thuthleng hi alo awma a, a piah ah chuan pipu alo awm bawk ka kawk zeuh a, nui pah hian "Pipu" ka tih chuan ka kawhna lam chu a hawi ve thuai a, a hre chhuak ve aniang a nui suk a, pipu lam chu ka pan a, thut ka tum lai chuan "Hey" atih vang chuan thu mailo in ka en a, "A chhia leh nge" atih chuan ka nui hak, ka thut chuan a chhia miahlo a "A chhe lo" ka tih chuan a thaw hak, a lian ve bawk nen ka sir chu ka beng thak a, alo thu ve mai a, kan awmna chu thingkung a tam in Hnim hring in a hual vel a, a nuam tak zet ani.
He tia kan pahnih a pipu a kan thut dun hi ka beisei lo in ka mang ram ah tak nial pawn ka la hmulo ani.
"A nuam e" ka ti sep a, "Hetia awm Hi maw" atih chuan Lu buk zeuh pah hian "A nuam vel vek" ka ti a, "Nia, i bula awm a nuam ang chiah hian" atih chuan ka melh vut a, ani erawh hma lam a en reng thung a tarmit chu a khawih che zeuh a, tunlai chu a awm dan hian mak min tih tir reng anih hi.
- NIKHAT DAH LO PAWH A INTHLAHRUNG AWM VIAU! MISTAKE AWM CHUAN SAWI LEH ULA AW
LIKE/SHARE/COMMENTS LAM AH TANG ILAA 🩵 ALA NUAM CHHO DAWN CHAUH ANIA.