LET's LOVE AGAIN by Ziki_nu_chapter-12

[Ziki_nu]

LET's LOVE AGAIN




By Ziki nu



Chapter-12



Rinfeli thil sawiin ngaihtuahna a tih buai ve tlat avangin ka insum zolo chuan Rintea ka va be ta ringawt a, 'Rinfeli'n i bulah sawi a nei em?' ka tih chuan 'Neih pawh ka hrelo, ngatinge?' tiin min lo zawt let khauh a, tullo puia an lo inhrilh kual leh ka hlauh avangin han chhan dan tur pawh ka hre chuanglo.



Rei fe reply tuma ka ngaihtuah hnu chuan 'Be tawhlo tur che in min duh a' ka va ti leh tawl a, ka message chu a hmu reng tak na in min chhang tawh hauhlo.



Zing karah ka nu in min kaitho a, nu te an awm chuan alarm pawh set a ngailo tawp mai ka ti rilru a, a hahdamthlak khawp mai.



Tukthuan pawh ka ei ve thlap a, ka hna kaldawnah a khawhar lutuk loh nan U Mazari te ina lo han leng chho mai tur in ka chah bawk a, inchungah an awm reng bawka a ngaihtuahawm vaklo turah ka ngai.



School ka thlen chuan Riny pawhin min lo thlen khalh ve khauh a, Ramdina nena an chungchang a lo sawi nghal mawlh mawlh mai.



"Hman deuha Zarkawt a kal zing lutuk ka rinhleh kha a lo dik tak tak a" tiin a hmui chu a tikawh luau a, midang hriat ve duhlo in tawng zawi ve thoah se a hmel landan atang chuan an hrethiam ve vek tho ang.



"Sawi chiang rawh, a kawp che tihna maw?" ka lo ti ve vat a, ner nang chungin "A.. Kawp chu a ni ber ang, nizana a rawn len khan a phone khawih a phal tlat lo a, ka thinrimin ka laksak lui a" a ti a, tap tur hmel a pu nghal ringawt chu a sawi tum ka hrethiam ve nghalin ka hria.



"Nakinah kan sawi tha leh dawn nia, ka class neih a hun dawn tlat" tia a darah beng thakin ka thawhsan zui a, a sawi zel chuan a insum thei dawnloa ka hriat vang a ni pakhat bawk.



"Miss Riny chu a bialpa in a then a ni maw?" ka chhuah dawna Aruata'n a ti ri chu ka hre hman a, an in melh rum leh khawp ang.


Mahni class ah ve ve kan buai tak avangin chhun chawlh ah bak titi na hun kan nei leh tawh lo va, kan thil ei naah lah chuan Aruata a awm ve tlat bawk si a, duh ang pawh a sawi theih chuang loh.



"Tunlai hi in inbe tha vak tawhlo a ni maw Malsawm, a ngui thei ber bur emai" Aruata'n a tih chuan Tu a sawina nge ka hrechiang khawp mai.


Chhang lova ngawihsan mai ka tum laiin ka thiannu zawk chuan "Footballer pa kha ami in sawi a, in inbe tawhlo maw?" tiin min lo zawt ve leh a, "Thian ringawt alawm kan nih, a tirah pawh ka sawi vek kha" ka ti deuh hlar a, an pahnih chuan in melh ralh ralhin ka thil sawi chu awih lo hmel fe hian an ner khum zui a, an ngeiawm dun tak tak.



"Tuk in ah pawh zingkarah a rawn kal zawk a, I rilru hriatchian a chak thu bawk anih kha a rawn sawi leh, i hming lam lo hian a awm thei hlawllo, nangpawh hian lo duh ve mai mai tur che ania, ka induh e i ti kual vel a" tiin Aruata chuan min chhuahchhal titih a, ringawt chuan aw...



"Duhzawng te ka nei ve alawm" nui sak chunga ka lo tih chuan ei lo hmel lutukin min melh khai khai a, a tiffin box kengin a dawhkan lamah min pheisan ta daih bawk.




Aruata kalsawn rualin Riny chuan min lo thuthnaih rawk rawk a, ka chanchin ka sawipui ngai vak loh avang hian engmah a hre ve lem lo a, a hriatchian chak hmel ngang mai.




"A thianpa kha inkhel thiam kha tiraw, eng nge a hming kha?" a lo ti nghal sek sek a, a hmingte em em chu hre ve tur chu a ni maw le.

"Nunpuia" ka tih chuan hre chhuak thut ni awm takin "A ni tak e.. In inngaizawng miahlo tak tak ami? In khuaah te khan a lo kal ve sia" a ti leh a, "Thian alawm kan nih, sawpa sawn min hmehbel tlat a tum mai mai alawm" tiin Aruata dawhkan lam chu ka melh zawk a, min lo hmu fuh ve chiah bawk nen min rawn chhiatkhum nghek a, hepa mizia hi chu hmeichhe mizia ang chauh tak tak a ni.




"Diktak chuan keipawn in inngaizawng emaw ka tia, engmah min hrilh loh vangin ka lo vui ru lek lek a" nui chung deuha a tih chuan keipawh ka nui ve hak a, "Eng emaw awm se chuan ka hrilh em em ang che, tunah rih chuan a tla na vaklo" ka ti a, ka sawi tum chu a hrethiam rang kher mai.



"A ni aia tla na zawk an awm a ni maw?" a lo ti vat a, Rintea nena kan inkar chu sawi tur la tam rihlo viau mah se kan inbiak that leh deuh thute ka hrilh ve a, min lawmpui thiam ngang mai.



Ramdina nen an intihthiam loh avangin banah pawh Aruata rualin a haw a, eng eng emaw sawiin an inhnial leh tho ka ring.


Keipawh ka nu ka ngaihtuah vangin ka tlan haw nghal a, U Mazari te in atanga an tawng ri nak nak ka hriat avangin ka lut kawi a, ka nu bakah U Aldrina nu a lo awm ve bawk a, ka hmu hreh deuh riau chu a chhan ka hre bik lo.



"In bang der a ni maw Sawmte?" tiin min lo be nghal var a, "Aw.. Ban velah ka lo haw nghal anih hi" tiin ka nu bulah chuan ka thu thla ve a, U Mazari'n thingpui min lo thlitsak nghal sawk sawk bawk.



"Vawiin tlai chu chaw ei ve rawh u aw... Inkhawm zan ni chuanglo bawk a, a hmanhmawhthlak hleinem" thingpui no min pe pah chuan a ti a, ka hnial lem lo.



Nunpuia nu chu ka thlen hnu rei vak lo ah a haw a, a haw dawn chuan ka nu hnenah "I fanu hi a fel si a, mo atan kan ît hlawm teh ania" tiin a fiamthu zui hlut bawk a, ka lo zak ru chem chem mai.




A kal liam rualin U Mazari chuan "Tikhan a fapa nen kan inzui tih a hre reng a, amah te hian a rawn leng fo a, upa tawh mah ila nula kan la ni ve a, a zahthlak ve thin khawp mai" tiin a nui kar kar a, zai hmel phei chu a pu hran chuanglo.



"A fel khawp kha.. " ka nu pawhin a lo ti ve mai a, "Aldrina pawhin palai tirh te a sawi a sawi ve tawh a, a âwm lo hranlo tiraw Nu Lawm" tiin ka nu chu a zawt leh sek sek a, "Awmlo hranlo e.. Tihtak êm ah chuan pasal i neih loh mawlh ania kan hlauh tawh ni, i nau pawh a inzir chhuak ve leh tawh a, naute buaipui reng renga i lentar mai kan lo hlau zawk khawp asin" ka nu chuan tiin kan nui ho dar dar a, chaw kan ei dawn avangin ka nu chu inbual turin ka chhuksan leh rih a, ka che hmanhmawh lemlo khawp mai.



Zan lamah chet vak ngailo turin naupang test paper thenkhat chu ka en nghal bawk a, chaw ei dawnah chauh ka chho leh tawh.



Zanriah ei khamah U Mazari chuan inleng a neih zui mai avangin kan haw San a, ka nu thutna bulah ka paper en zawh loh thenkhat chu ka inchhawp darh nuai a, titi paha chet chuan tih sâwt a har khawp mai.



Ka nu chuan ka pa chanchin te sawiin Nunpuia nu thilsawi kha a sawi kai zauh bawk a, "Fiamthu mai mai mah ni sela miin mo atana an ît fanu ka han nei che churilrur a hlim ru veng veng mai, fel takin I awm zel anga, pasal a chhia a tha te i la nei ve anga" a tih lai chuan a hnuk a ulh deuhin ka hria, a han ngawi leh vang vang a,
"I pasal neih hun ka hmuh hman ve loh mawlh a ni ka hlauh ni" a tih chuan "Nu" ka lo ti deuh hliai a, a thilsawi duh dan chu aw...



"Ka pasal neih ni ah te chuan mawi deuhin i inchei ang chu, thil i ngaihtuah vak vak zel a" ka tih chuan a lo nui ve sak a, "Kan kum te pawh a naupangchhe zawk zawk tawh lova, tihian Pathian zarah hna te i nei ve tawh a, mi ngaihah chuan hna ropui ni hauhlo mah sela rilru nei takin i awm anga, pawisa hman kawngah te pawh fimkhur em em tur, pasal neih hunah pawh hna neih chuan an zahawm ru bik riau thin tih hriatreng tur ania" a ti dap dap a, ka nu min fuihna thu engkim mai hi ama tawnhriat atang anih thin vang anih ka ring, a tak bik tlatin ka hre thin.




"Tunah te chuan pasal neih pawh ka la ngaihtuah lo, ka enkawl rih phawt dawn cheu alawm" ka ti a, ngaihtuahna a kal ding riau tawh a, a nuam vaklo.



"Vawiin chu ka thu nileng deuh a, ka kawng a kham riau mai ka lo va mu ange, nangpawh mengrei lutuk lo la" tiin min thawhsan zui a, ka pa a ngai tih ka hriat vangin ka chelh buai duh lem lo. Amah chauh a awm duh zawk ka ring a ni.





Rintea hnen atangin message ka dawng ve hlawl a, "Lalrinfeli'n i bulah eng nge a sawi?" tih zawng a ni, "Ngatinge?" tiin ka zawt let a, "Sawi a nei em?" a tih nawn leh ngat vang chuan "Be tawhlo tur che in min ti ka tih kha" ka va ti ve hmak a, "Amah kha lo be tawh suh" a rawn ti let mauh mai.



Chhan ngaihna hre lova ka reh deuh vang vang takah chuan amah bawkin "Thil hriatsual a nei a, ka lo hrilhfiah ang" a rawn ti leh a, "Aw le" tih bakin ka chhang tawh lo.



Ka paper check ho ka remfel mawlh mawlh laiin Aruata leh Nunpuia an rawn lang hlawl a, phawk deuha ka en lai chuan "Kan lo rim dawn che" Lalaruata chuan a ti a, Nunpuia erawh a la ngawi reng.



"Lo thu ru, in va rawn lang tlai ve" ka tih chuan ka sawi chhan hrethiam lo luiin "Min lo nghakhlel viau tawh a ni maw?" kan thianpa tumtawia chuan a lo ti leh hmanhmawh a, ka ngei ang reng khawp mai.



"I va buai âwm ve?" Nunpuia zawk chuan ka paper ken lai thlek zauh pahin a lo ti ve a, "Nia.. Ka enfel zo chiah anih hi, lo thu ru thingpui te kan in dawn nia" tiin pindan lamah ka luhsan a, an lo leng tlai ang reng si a, hunlo ka ti khawp mai.




Ka nu chuan "Inleng i nei em ni?" a lo ti var a, "Aw.. Kan khuaa min lo zuitute kha an nia" tiin ka hrilh a, a lo tho peih tawh lemlo aniang a puansin lai chuan a invur tha sauh sauh mai.




Thingpui luma ka kalsan hlana an tawng ri bul bul reng chu hriat loh tum pawhin a theih loh, Aruata chuan ring ang reng tak hian "I duh miaute chuan rim tlut tlut mai tur alawm, midang theihngilh theihloh a nei tih mai maite chu i tla na tawklo tihna ania, hèl tlut tlut la a rilru chu i neihsak vat mai ang" tiin a thianpa chu a fuih sauh sauh a, amah ber pawhin nula a chhai thluk theihloh laia midang a han fuih ve leh chhawng chuan nuih a tiza dawn dawn mai.




Nunpuia chhanna ka ngaihchan ruk deuh lai chuan a reh vang vang si a, thingpui no chawia ka phei leh chuan min en chîk riauin ka hria.




"Lalriny phurh hi chu ka hne tlat, kawi tinah 'kan tlu ange' tiin a lo rak chul zel a, min rin loh te chuan taxi lak mai tur ania, lo hau ve ang che, driver zawk pawh min ti confi lo zo vek zel" Aruata chuan a lo ti leh nghal bawrh bawrh tawh a, hepa hi tuai ni miah silo hian a rilru hi chu hmeichhe rilru ang chauh tak tak hi ania, a lawmlohna te hi a han tilang nasa thei em em khawp a, a mah a tê reuh bawk nen nuih a tiza thei viau a ni.




"I phurh lohte chuan a titau anga, i buai leh chung tho ang" tia ka fiamchu a duhlo ngang mai a, lungawi lo deuha thingpui a dawt ri hrawih chu a tum aiin a lo sa leh si aniang mit chhing sawkin a tep zui chap chap a, kan nui kan nui ringawt.




"I nu a lo zin tiraw?" Tia Nunpuia'n min zawh takah chuan bu ve nghat nghatin a mut chiah thu ka hrilh a, kan thiana chuan eng nge maw a hriat leh tawh ni "Pawnah zial ka va zu lawk teh ang" tiin a thingpui no keng chung chuan a chhuak zu nghal daih a, Nunpuia nen chauha han awm chu ka duh vakloh tehlul nen.




Aruata chhuah hnu chuan tawng mai lovin za lo deuh hian kan innuih leh ringawt zel a, hre chhuak thutin "Rinfeli i hria em? Ainawn veng ami?" ka ti a, a ngaihtuah vung vung hnuah "Hre lo" tiin min chhang a, ka awih vak lo.



Rinfeli khan Nunpuia nena kan chungchang hre viau angin a insawi a, amah Nunpuia hian a hrelo anih pawhin a laichin hnai Tu emaw tal chuan a hriat ka ring tlat.



"I hrelo tak tak maw?" tiin ka zawt nawn leh ngat a, a lu a la thing nak nak tho.


"A va mak ve" ka ti halh chu a chhan min lo zawt let thuai a, ka hrilh duh lem lo.



Rei ngial a ngawih vang vang hnua "Ka lo nghak ang che aw Sawmi?" a tih leh chuan ka melh deuh hrak a, "Min nghak suh" nem vakloa ka tih chuan tawi te hian a lo nui a, "In inbe leh tih chu ka hria alawm, mahse ka lo nghak tho ang che, khapa khan beidawnga a siam nawn leh hunah che chuan ka hnen i lo pan ve tawh ang tiraw" a ti sup sup a, engtinnge maw chutiangte a han sawi ngam chu le...


"Khatiang lam kha sawipui che ka duh tawhlo ka tih kha, min beisei lo la, min nghak bawk suh" ka ti leh nghat a, ka tawng ring ngam bik silo a, ka sehchilh nawk nawk a ni ber.



"Min haw viau a ni maw?" tia za lo hmel zeta a nui hak chu ka melh deuh tlawk tlawk a, diktak chuan a ni nena inzawmna neih hrim hrim hi ka duhlo a ni ber mai, engkim pangngai taka a la awm lai kha chuan ka ngaina ve hman viau a, thian tha tak pawh kan ni hmanin ka hria, mahse ka rin ang lo hlira a khawsa tih ka hriat hian ami hîp ve tawhna te kha an bo leh duak a ni ber mai, ka duhzawng a ni lova, duhthlang thei tur khawpa tha famkim chu ni bik hauhlo mah ila ka mipa duhloh zawng hnawl tur chuan zalenna ka nei ve tlat.





Aruata rawn luh leh rualin ka bul ami chu a thutna atang a tho ve nghal vut a, phawk deuha a thianpa a en lai chuan "Haw tawh ang" a lo ti deuh nghut a, a hmel en mai pawhin a lungawi vaklo tih a hriat reng mai.



An haw tur pawh chu ka zui chhuak peih ta lova, an chhuah rualin kawngkhar chu ka kalh tha sawk sawk a, hmun chu tifel zung zungin ka mu ve nghal a, phone ka en chuan dar 10 a lo pel thui leh tawh.



Ka nu chu a muhil tui tawh viau a, whatsApp ka hawn chuan Rintea hnen atangin "Muttui aw.. Hun awl I neih hun lo sawi la, hruai duhna che ka nei ka tih tawh kha" tih message ka dawng a, a message ringawt pawhin ka lungphu a la ti rang zaih zaih thin te chuan mipa dang laka a danglam bikzia a tichiang ting mai hian ka hria...










Cont....