BEISEINA (chapter-6) by Mara_Djm

[Mara_Djm]

A tukah school bus-ah ka thiante lam pana ka kal lai chuan an kâ an lo âng zauh chu ka kut phar hluaiin ka khap thuai,"Tunah nih lo" tiin ka thutna thinah thu chuan mit ka chhing hmak. Min fiam leh nasa dawn ti ka hriatna chuan ka hun hman tur ati khaih lak vek.



Ka rin law ang ngeiin school kan thleng a, bus atanga kan chhuk chu,"Nimin bus kan chuan puite zinga pahnih chuan khawvel tukverh an lo hawng thin ani chu! Keini kan mut pindan atanga chhuah chu sawi loh a kawng khar takngial pawh hawn kan harsat laiin...." kan building lam pana kan kal lai chuan Jane-i alo tawng chhuak ta nghe nghe.



" I chhuah dawnah khan eng nge a hrilh ruk che? I thiante hi tukverh hawng ngai loh an ang ati loh hram ka beisei" Hlu-i chu ka va en phâwng! Chutah ka nui chhuak hak. A ngaituah mak ve lutuk chu!



"Vanduaithlak takin, chutiangin a sawi loh. Mahse khatia bus-ah inla mut chhunzawm zel chuan engtikah emaw Apu Kima hian kai tho tawh loh che in school-ah ala let pui ngei che u a rin thu a sawi." an mahni chauh mi fiam thiam an awm loh ti ka'n hmuh tir ang e.




Jane-i'n "Engtin â nih?" a tih laiin Hlu-i chuan"a mut thei loh vangin min thik ani chu" alo ti ve thung. Nuih insum taka ka kun run chu ka hnung zâng a ri thlawp!
Ka fiamthu mai mai ani tih an hrechhuak nghal.







Last period-ah kan sport teacher lo lutin, House members list classroom pawnah, notice board-ah tar ani ti alo sawi a, dàr a lo rik chuan inkhung felin kan chhuak a. Notice board hmaah chuan an va ding khawm ta sup sup mai.



Va inzep buai ai chuan tiin a sir lamah kan thian dun chuan lo nghakin a en ho awm dan chu kan lo en mawl tawp. A then "Naaa...house khatah kan awm loh" an ti laiin "Awiii... Red-ah kher!" lo ti an awm ve bawk. Chutia an sawi nuai nuai zinga ka beng verh ber tu chu "OMG! James-a leader atan maw? Hmuh nawm dawn e" ti chu a ni.




A tam zawk an kalsawn hnu chuan Notice board lam kan va pan hnai ve ta chauh a. "Blue house list atang hian en dun hmasa ang u" Jane-i sawi chu pawm takin Blue house list chu kan en vang vang. Kan hming a lang loh. A dawt chiaha Red House list-ah kan insawn leh chuan 'Jane Romawii' ti ngei chu kan hmuh ta. A awmna house leh amah hi an inhmeh ka lo ti rilru a mahse amah hming chauh a lan vang erawh ka hnual ruai nghal.




Ngawi chuh rih chuan a hnuai lamah insawn in Yellow House-ah chuan kei leh Hlu-i tal tiin kan en leh. Mahse Hlu-i chauh alo inziak. Ka phur zo lo vek! "Ka awmna tur chu a chiang mai kha!" tiin a tawpna ber House pawh ka en peih tawh lo. Green house bak a awm tawh loh.




"Khuanu hi fiamthu a thiam kan ti dawn nge mihringin kan hriat thiam phâk bakin thil a kalpui thin kan tih dawn? Duhi-haihawtnu lo en teh hei!" Jane-i thu phuh chhuah dan vang chuan Green house member list a en mek chu ka va pan hnai deuh a.




En tura ka va kun deuh tur chu a kut phah pahnih chu list-ah a nghat nghal hmia nih chu! Zawhna zeta amah ka en chuan "Heti lai hi chhiar hmasa phawt la..." tiin a kut phah ding lam a la sawn a, Mipa hming intlar na chungah chuan 'Leader= James Rohlua' ti inziak ka hmuh chuan ka thaw hal! "A mak thin ani e! Khuanu duan dan hi" tia ka phun sap chu Jane chuan a kut vei lam la thla in,"Chuan hei hi en leh rawh" alo ti leh chuan hmeichhe hming inziahna chung berah chuan "Asst. Leader = Lalduhawmi" ti alo inziak kul mai.




Sawi tur ka hre loh chu lu ka thing ngar ngar.
"Ni e. Khuanu hi fiamthu pawh alo thawh thiam ani hi" Hlu-i'n alo ti ve pawhin lu ka la thing ngar ngar.








Step chhuk thlâknaa lo ding run tu ka hmuh chuan ka lu ka thing leh ngur! "A tawk tawh. I thluak a hman tlâk loh lehzual ang" ka ding lama kal Jane-i'n alo ti chuan "i thluak kha a lâk tlak loh a ti nia" Hlu-i'n alo ti ve thuai!



James-a chu awm loh ang maiin kan kal pelh hmia! Bus lamah chuan kan kal phei hlawk hlawk. Bus kan chuang a, kan thutna ah kan thu chiah tiin James-a chu bus chhungah alo lut ve chia. He pa hi a Pa bulah a haw ziah sia! "Apu Kim, i sawi kha a dik. Ka zawng chhang" nuih suka ti chung chuan hnung lamah lo kal zelin ka bulah alo thu leh chat. Phun ri sep sep in a zui leh.




"Eng nge i lo tih?" ngaituah hmasa loh chuan ka zawt phâwng!"In tih ang tho. He bus hmang hian ka haw ve dawn" alo ti duh lek chauh! "Nih chu" ka ti ringawt.




"Harsatna a awm em?" a zawhna tawngkam vang chuan ka va en tha leh ngat, mahse thinrim hmel a pu loh. "Ai, a mak deuh mai nia. Kum dangah ilo chuang ve ngai si lova." ka ti chuan "Tun kum chu kum dang ang loh taka tihdanglam ka duh tawh a" tiin min en run mai. "Nih chu" ka ti leh ringawt.



Rei deuh fe kan ngawih hnu chuan "Eng nge ti min zawt dawn loh ami?" alo ti leh a.



"Ahh...mimal thil chu kan inzawt vak vak ngai hleinem. Bakah min hrilh duh tak tak dawn chuang em ni le" fiam zeuh pah chuan ka chhang let.


"Aw" a ti chuan mit ko ka sàn khum ak." Aw, ka hrilh ang che." a ti chuan a ngaihna hre loh zetin" Tak tak?" ka ti tha leh.


"Aw"


"Midang bulah hetiang lam sawi vak vak chi i ni loh khan ka hre sia"



"Midang i nih ve hleinem" ka thawk a tawp chat!



Ril ruih a,"I nih ngai loh bawk ang" ati leh chuan lu ka thing leh ringawt tawh. Sawi tur ka hre loh. Eng emaw sawi tum ni awm taka a kâ lo âng zeuh chu ka chhuk a ngai tawh ti Apu Kima lo au lang lang atang a hriat avang chuan a chip leh daih." Muttui aw, Duhi" a lo ti zawi sup. Muttui tia chhang chuan ka ding chhuak ve bawk.




'Engmah ani lo. A sawi ve mai mai nih kha' tiin inhrilh mah ila In ka thlen thleng pawhin ka lungphu ala pangngai thei loh!



————


Ka nu bai chu a tui bawk a, ka hawp ring khawp mai.


"Awi, insum ve deuh teh! Thenawmte pawhin an hre thei hial ang che" ka nu chuan alo ti hlak. "A tui ve em alawm" ka ti chuan a nuih ringawt. Ka pa shift a inthlak a, zing atang tlai lam nilengin hospital lamah a awm a, tlai dar 5-ah alo haw tawh avangin chhungkua zanriah pawh kan kil dun thei ta a.



"umm insum buai suh. Hawp teuh rawh" ka Pa in alo ti chuan ka hawp uar leh zual sauh. "A nula ve tawh hi" ka nu in alo ti chuan,"Tunge kan chei naute kumkhua dawn ti tu kha" ka pa in ka Nu mit ko a san khum zat chuan ka nu chu a ngawi chiang teh e.
Keipawh chu awm mawl ban san chuan pangngai deuh chuan ka hawp tan ta zawk a. A chang hi chuan âtthlak deuha chet te hi a nuam ve a.


"Tun Inrinni chu..." ti chunga ka Pa in mit alo siai chuan, "Aw, kan hman ang. Sport hi Class 12 board ho avangin ni khatah zawh kan tum a, chuan a tuk welcome night kha chu tlai lam dar 3pm -ah kan school bus-in min lo hruai ang a, school-ah zanriah kan kil nghal ang" Inrin ni hi ka Piancham. A awmzia chu phone min leisak ve tawh dawn!


"A tha alawm. Chuti ani chuan ka rualin zingah i chhuah a ngai dawn nih chu. Zing chaw ei lovin." alo ti pawh chuan "A pawi loh. Kan leih zawh veleh Thingpui dawrah ka lut nghal mai ang" ka lo ti ve vat.


"Nih le, ei khamah ka phone hmang la, i duh ang tur chi i enkual hmasa dawn nia. A hmunah hun kan khaw ral loh nan" tiin a phone awmna a kawk zeuh bawk. Ka duh ang tur chu ka hre sa tho na in "aw" ka ti ta zawk a.



————


Last period dâr alo rik chuan kan house awmna room tur lam pan chuan kan inzui chhuak a."Mangtha" tap dêr ang tur maia Jane-i hmel lo siam zeuh chu lei kan chhuah khum vak! A hmel thlák hlawkin min melh ram ramin,"In hmel hlui tawh tak kha Gate-ah ka la hmuh leh mawlh ang che u" tiin Red house room tur, class 12 Arts, kan room dawttu ah chuan a lut hmak. Hlu-i nen erawh corridor lehlam science section lamah kan kal a ngai thung.

Class 11 science room kan thlen chuan,"Asst. Leader i nih ti kha ila theinghilh loh hram ka beisei. Hawi sâng vâ rawh tihna ani chu" Hlu-i'n alo ti chuan lu thing nghutin, "Lut vat mai teh" ka lo ti hmia.


Class 12 science room ka va thlen chuan James-a, kawngkhar ngheng a, a kekawr ipte pahnihah a kut zen lut chunga alo ding run ka hmuh chuan ka ding dat. A lang chhelo takzet. Ai, a chhelo tak tak.


Alo hawi chhuak a, ka ding run alo hmuh chuan tawi tê hian a nui suk. "I lo thleng ve thei ta maw!" alo ti chuan, "Ti nge pawnah i la din a?" tiin ka lo zawt thung. "Ka lo nghak che" a ti chuan ring chia loh hian chal ka tichuar tap. Chutah ding ngil vutin,"A nih lawm. Leader hi assistant tel loh chuan a lead(kaihruai) thei hleinem" alo ti zawm zat. Lut turin min hui nghal bawk.



Room kan luh rual chuan lo awm sa ho chu lo hawi nghal vatin an tawng lai an tawp chat. Hei tak hi ani he school-a kal a nawmna pakhat. Zirtirtu te thu awih leh zah chauh nih lovin Zirlaite inkarah inzah tawnna leh inrual pawhna te hi he school hian a ngai pawimawh hle. Chutah thil ka hrechhuak thut! Class 9 laia zah loh taka min awm khum tu higher mipa ho kha, Vice Principal-in a hrem a, Highschool building toilet a tifai tir. Tu in nge hrilh tun thlengin kan thian pathumin kan la hre thei loh. Khati laia awm ve kha chu kan tui min in saktu leh keini thian pathum leh James.... A dik! James pawh. Mahse ka ring phal chia silo. Chutiang thleng tih tur chuan kan inhre tha lova, a mizia a niin ka hre loh bawk.


"Good evening, friends" James chu a tawng chhuak hmasa tu a ni." English academic he school hian system-ah hmang mahse Mizo kan nih angin Mizo tawng bawk ka hmang ang" a aw chu ring em em si loh hian a fiah tha khawp a. Kaihruaitu tur aw dik tak! A thusawi chu an pawmpui kher mai, an lu an bu lawp lawp alawm.


"A hmasa in, he room-ah in awm hi ka lawm a, ka theitawp chhuahin loh thlawn loh tir ka tum ang. Naktuk hi welcome sport ani tawh a, kan house pawh kan inbuatsaih a tul tawh. Item list hi pakhat tê tê in participant tur kan zawn a ngai a, a thiam leh chhuak thei tur kha chu khawngaihin in bân in lo phar dawn nia. Mitin-in item neih vek tur ti kha theinghilh loh ila. Chuan...." tawp zâwkin min lo en hian "Pen leh paper kan mamawh dawn. Lo thawh lawk la" alo ti sup chuan ka bag ka hawng nghal vat. "....tunah ti tan mai ila. A hmasa berin 100m race-ah tlan thei tur...Hmeichhia atang ti hmasa ang aw"



James-a'n chutia a lam laiin lehkha phekah a tel thei turte hming ka lo ziak lut mawlh mawlh a, midang pawh an lo ri veleh sup sup mai. Hmeichhia kan zo a, mipa lam kan ti veleh a. Basketball-ah chuan an inchuh nasa hle a, an hming an lo sawi sup sup a, Jame-a buai map lova alo sawi mawlh mawlh laiin kei erawh ka lo ziak hmanhmawh thei loh. Football-ah ngat phei chuan tu hming mah ka hre tha thei loh, ka tih ngaihna hre lo,"Pakhat tê tê in sawi ang u. Ka lo hre hman thin loh ania" ka ti ta tawp. A hnung lam atang chuan "Assistant nih ava tlâk dawn lo ve" ti chu ka hre thei.



Chhan let tuma ká ka âng zauh chu James-a aw avangin ka tawp chat. "Tunge chu chu?" a aw ah chuan a lungawi loh hle ti a lang, a aw a chang tha takzet." i sawi zawh chia kha! Hma lamah lo dingin lo sawi tha leh teh" a ti chang hrawi. A sawitu chu a ngawi ngul ani ang engmah hriattur a awm loh.


James-a hi a Pa zirtirtu ani vang chauh nih lovin amah nungchang zahawm rui vang hian zah a hlawh thei em em thin reng a ni. Thawk la hrâwih in," Kha kha he school-in min zirtir dan ani lo. Inzah tawnna. Chu chu min zirtir. He room-a i awmpuite i zah thei dawn loh ani chuan khawngaih....min chhuahsan rawh u" tumah ding chhuak an awm lo."Kan tling loh ani mai thei. Mahse kan tih tur hlen turin kan thawk chhuak thei reng. Engtiklai pawhin. Chu chu kan thil tum ani bawk." ti sup in,"Chhunzawm ang u" a ti leh.



Lehkha phekah hming hrang hrang ziak mah ila, ka thinlung erawh chuan hming pakhat, tikim hluah hluahtu ang maiin a lam nawn mawlh mawlh.



James.... Beiseina thar min siam sak suh...a thlawn leh chuan ka tuar thiam lovang!




*Ka story ilo chhiar avangin ka lawm e*