TRUTH OR DARE BY AMY CCK (Completed)

[Ngaia]

TRUTH OR DARE by Amy Cck






CHAPTER - 7







Rilru pe lo zet in exam chu kan zo ve thei hram a. Afelin nen kan in be ngai lo a. A call ka chhang duh lo a ni mah zawk ang chu. Kan in hauh buai leh chuan ka exam tur in a tuar ka hlau bawk nen. Ka chhungte nen chuana khat mawi tawk in kan in be ve thin a. Ka nu in Afeli call ka chhan ngai loh chhan min zawh chuan exam tur ka in buatsaih avanga ka buai thu in ka chhang mai zel bawk.







Kan exam zawh ni chuan ka rilru tawt lutuk a zia awm ring in Afeli ka call leh ta nge nge a. Mahse a phone a la thei miah lo. A tawp nan tiin ka call nawn leh a mahse a la chuang lo

Exam kan zo ta bawk a, Christmas chawlh hmang tur chuan ka let a, ka rilru erawh a phur teh chiam lo. Ka haw dawn thu ka nu leh pa te ka hrilh thlap a. Lalrinfeli hrilh ve ka tum rilru deuh a mahse ka rilru thlang in ka call duh ta lo. A mah pawh a reh hmak avang in ka biak hmasa reng chhan tur a awm lo ka ti ve tlat.







Airport atang in kan hostel a awm, Christmas hmang tur a hawa ve te ho nen motor kan in hman tawm theih avang in ka nu in driver rawn tirh a tum chuan a ngaih loh thu in ka chhang mai a. Kan vengah kan tlan lut a, Lalrinfeli te in kan tlan pel tur chu enge ka hriat ni! Motor chu ding tur a tiin ka chhuk a, zin chau chung leh in ti thiam lo chung pawh in hmuh ka la chak tho chu kei mah pawh ka in haw hlur hial.







Kawngka bulah chuan ka ding run a. Ka lut ang nge lut lo ang tih ka in ngaihtuah a ni ber. A tawpah chuan doorbell chu ka hmet ri nghal ral a. Ka din vang vang hnu pawh chuan tu man an rawn hawng lo. Kawngka chu zawi muang in ka pawt hawng a. Ka pen luh rual in Mama a room atang a rawn chhuak hlawl a, min hmu thut chu a ham hai nge room kawngka vuan chuan a ding chawt a ka nuih suk thung.







" U Hriatpui i lo haw a law? " A ti leh vat a. A aw atang pawh chuan mak a ti hmel viau leh nghal. Ka kut a ka bag khai chu a en leh thin bawk. Ka bag nen a ka tlawh rup rup chu mak a ti zawk a ni mai thei.







" Mak i va ti awm ve? Ka rawn thleng chiah a, i U rawn hmuh hmasak ka tum a. Khaw nge? A muhil a mi? " Ka ti nghal zat a. A lu hiat nuap nuap in ka lam a rawn pan a. A hmel chu eng emaw sawi hreh a nei deuh in ka hre bawk.







" Ka u maw? Eng lo a nia.... Damdawiinah a nia... " A rawn ti ban chat chu a thu sawi ka hriat thiam loh avang chuan ka melh zui run tho.









" A damlo char char a. Damdawiin lamah ka nu in a awm pui a! " Dawhkan bul a rawn ding chuan a ti leh a, enge a sawi awm zia chu? Lalrinfeli a damlo maw?







" Enge i sawi awm zia chu? Admit ngai khawp in enge a damlohna? " Ka ti let vat a. Mama hmel chu a ngui bam a, eng thil nge thleng tih chu sawi hreh hmel viau mahse midang zawh tur an awm tlat loh avang in ka zawt lui ta tho.







" Englo a nia.,.. O Mami chu a lo cancer a! Ka nu in damdawiinah a riah pui char char a lawm! " Mama chuan a rawn ti a. A thu sawi chuan min thawng lutuk chu chet mai ngaihna pawh ka hre lo. Ka bag khai lai chu ka thloh nghal hmuk.







" Engmaw i sawi kha? " Mama en chuan ka ti chang bal. Mit ka chhing chawt a, ka hriat sual te a nih ka ring rum rum. Mahse Maman a rawn sawi nawn leh takah chuan ka hre sual lo tih ka chiang ngam chiah.







" Eng tin nge a nih theih? " Ka ti ro hawk. Ka hmai chu ka thai nghal phawk a. Ka ngaihtuahna te chu an tawp dut vek in ka hre hial.







Hman hmawh zet in kan in lamah ka haw a, in ka luh rual in ka nu in min lo lawm vat a. Mahse engmah chutiang ka ngaihtuah tawh lo. Ka nu bulah Afeli chung chang a dik leh dik loh ka zawt nghal tawp a. Ka nu pawh chuan hreawm tih hmel hmel zet in a dik thu min hrilh a nih chu.







" Engtin nge ka bulah chutiang thil lian tham in zep theih zawk! " In sum hman lo lek a ti chhuak hrawk in ka bul a thuthleng chu ka chhuih nghal tawk. Ka thawk te chu an sak talh thei hial.







" Afelin hrilh che a phal lo a lawm. Kan hriat chhuahna a la rei loh bakah i exam mai tawh dawn a, i rilru a ti hah ang tih a hlau tlat a. " Ka nu chuan a rawn ti chhuak halh a. Ka in seh ruh ngawt ngawt thung.







" A eng lai nge? " Ka nu chu en in rilru na lutuk chuan ka ti sup.







" Thisen cancer ! A pawi tak tak a ni. Thla tam pawh kan hriat atang in a la ral lo mahse... " A tawng tawp dat a. A lung chhe lutuk chu a mittui a hru nghal fap. Kei rawh thaw chhuak hawk in ka bul a thuthlengah chuan a thu thla hnawk a ka hmai ka hup nghal vang vang.







" Bawiha a pawi e mai! " Ka nu chuan ka dar a min rawn vuan in a ti sap a. Engmah ka sawi ve thei tawh lo. Mipa mah ni ila ka mittui chu a rawn far nghal fup fup a. Pik lutuk a thaw chhuak hawk in ka hmai chu ka tuai leh phawk a. Ka ding chhuak nghal vut.







" Nu khaw nge ka bike chahbi? " Ding run chuan ka ti chhuak hmuk a. Ka nu chuan min en vang vang hnu in an room lam a pan a, rei lo teah rawn chhuak leh in ka kutah chuan ka chahbi chu min rawn pe a, engdang mah sawi tawh lo chuan ka chhuak zui nghal a, Afeli awmna damdawiin lam pan chuan chak zet in ka in khalh chhuak a. Ka ngaihtuah bing mup ah chuan Lalrinfeli bak an awm thei tawh lo.









Damdawiin kawtah ka bike chu ka hung a, hman hmawh zet in damdawiin chhung lam chu ka pan zui nghal pawk pawk a. Hman hmawh tawh nen tu emaw hi ka su leng deuh nawk a, ka en nghal vat chu mipa naupang pakhat ka lo su thlu reng a nih chu.







" Bawiha i na em? Sorry lutuk aw! " Tih leh kaih thawh ka rual a, min chhang lo chuan a kekawr mawng chu a beng nghal thek thek a, ka nui suk.







" Amos... Amos... A tawpah chuan,.... Huiiss... Min ti hah lutuk i hria em? " Ka bulah a nu ni ngei tur hi a rawn tlan thleng ve vat a, thaw halh halh in ka hma a mipa naupang banah chuan a rawn vuan nghal chat.







" Amaa... Ka tlu a ... Mahse ka tap miah lo maw lee... Ka fel ti raw? " Ka hma a mipa naupang chuan a ti nghal reuh a nih chu. A nu ni ngei tur chu thaw hak in a sam buang sei zet chu a hui chho pap a, a nu lian lo a mahse a ngo reuh viau leh nghal.







" Fel chiang lutuk... Mahse min bihruk san leh chuan Papa bulah Amos chu naupang sual a nia damdawiinah hruai tawh suh ka ti ang! " A nu chuan a ti nghal vat a, ka hma a mipa naupang chu a ding tum bar a, a nu lam hawiin a hmui a ti pawrh nghal tar a nih chu.







" Amaa chu... " A ti bai bai a, nuih zal in sum zet a en in ka ding chhuak nghal ruai ruai .







" Kan lawm lutuk aw, a harh reuh lutuk a! " Naupang te nu chuan a rawn ti vat a. Mahse keu mah zawk in ka kalna ka en loh vang a nih thu sawiin thu pha ka chawi let ta zawk.







" Amos... " Mipa aw hian a rawn ti ri kan hriat avang chuan kan hawi nghal thap a. Kan lam pan a mipa pian tha zet, doctor coat ha rawn pen phei pawk pawk chu kan hmu zui nghal vat.







" Papa... " Naupang chuan ti chul in a pa lam chu a pan vat a. Doctor pa chuan a lo pawm kang nghal nawlh bawk.







" Papa.... Chinah Amosa kha a tlu a mahse ka tap miah lo. Ka fel I ti ti raw? " Kan bul lam rawn pan chuan a pa nghawng a kuah tai in a ti nghal lang lang a, ka bul a naupangte nu chu nui hak in lu a thing zui nak.







" Naute... In rawn thlen na a rei tawh em? Hei... Tu nge ni? " Doctor chuan kan bul a rawn thlen rual in a ti sup a. A nupui chuan an lo nghah reng tawh thu sawiin kei pawh chu min hmel hriat tir ve nghal thuai a.







" Dr Reubena ka nia! " Ti sup in a kut chu a rawn lek chhuak, ka lo ban ve nghal mai a. Kal na tur hman hmawh thlak ka neih thu sawiin an chhungkua chuan ka kal san a.







" My boy... Amaa hi tlan hah tir vak loh tur ka tih kha. Amaa hi a hah chuan a pum chhung a naute hi a lo chhuak har dawn a nia! " Dr Reubena chuan a fapa chu en in a ti sup a. A aw chhuak a khauh ang aiin a fapa a enna mit meng chu a dam dup leh nghal.







Amosa te reuh chuan ngaidam dil pah in a pa chu eng emaw a hrilh niap niap a. An mahni ka kal hlat san zel vang chuan an tawng erawh ka hre pha tawh lo thung.







Khatiang a chhungkaw duhawm kha kei leh Afeli hian din ve i la ka duh tak zet. Chuvang chuan thisen cancer pawh ni se ka beidawng ngai lo ang. Engtikah mah Lalrinfeli hian min kal san ka phal ngai lo ang.

[Ngaia]

TRUTH OR DARE by Amy Cck






LAST CHAPTER - 8







" Hriata chu... I nu in min rawn bia a, lo nghah che ka tum chiah a! " Afeli nu nen kan in tawk hlawl a, min hmuh chuan hahdam huai hmel pu hian a rawn ti a, Afeli cabin lam pan chuan ka zui ve nghal a. In hmuh loh kar in Afeli nu pawh a lo cher dawk hman.







Cabin chhungah kan in zui lut a, khum a hmeichhe mu ka hmuh rual in ka ding chawt a, in hum ruh ngawt ngawt in rilru na lutuk chuan ka thaw chhuak hawk.







" Hetiang a I hmuh hi a duh lo viau mai thei a ni! " Afeli nu chuan Lalrinfeli bul a ding in a ti sap a. A fanu chu duat zet in a biangah a chul sak nghal hliau hliau bawk. Hmeichhe pian nalh leh chhelo tak, a ma tawkah taksa nalh leh khal mawi ve tak thin kha tunah chuan mi dang hlak ang maiin a taksa te chu an chher riak a. Sawi mai tur pawh ka hre lo. Ngawi reng chuan ka pan hnai a, a kut cher riak leh zawi ngiaiah chuan ka vawn sak ta ngawt.







" Engtin nge hetiang hian i damloh theih? " Ka ti sup. Ka rilru na lutuk chu sawi mai tur pawh ka hre lo hial. Afeli nu chuan pawn lamah a chhuah lawk tur thu a sawi a, min chhuah san a kei erawh in Lalrinfeli kut chu nghet zet a hum in ka ka hmui zawnah ka la kang a ka hmuiin ka nawr sak vang vang thung.







" Heiii... " A mit chu rawn meng dul raih in a rawn ti sap a, a lam ka hawi nghal vat. Min hmuh rual chuan a nui nghal sen sen bawk, mahse a lan dan chu a chau ngawih ngawih tih ka hre thung. A lan dan lainat awm lutuk vang chuan ka mittui a rawn chhuak mai dawn a ka hriat avang in thaw hawk in chung lam ka hawi a, mit ka chhing ta ngawt.







" I lo haw tur hi ka hre ve miah lo! " A rawn ti zawi sap a, a hmel ka en chu a tum deuh bar bawk.







" Rawn surprise che ka tum a mahse nangmah zawk in min surprise ta daih a! " Ka ti sup chu a rawn nui leh sak.







" Ka phone pawh i la duh ngai lo a. " A rawn ti chhuak leh tiau chu thaw hawk in ka in seh ruh vak. Ka in thiam loh zia hi ka sawi thiam lo hial zawk. Hetiang thil a thleng ang tih reng ka ngaihtuah pha lo a ni.







" Ka tihpalh! Duati! " Ti sup in ka in beng kang a a chalah chuan ka hmui in ka nawr vang vang. Kan in kar sawifel pui a, a lakah ka lawm lohna lan tir ka tum teh lul nen chutiang chuan ka ti thei thak lo. Tunah tak chuan a phone call ka lak sak duh loh avang te, kei mah zawk in a that leh that lo ka lo zawh hmasak loh avang in ka in thiam lo hul hual.







" Ka ngai thei lutuk che a! " Tah chhuak aw zet chuan a rawn ti chhuak tiau a, ka in seh ruh ngawt ngawt.







" Kei pawn ka ngai che! " Ka ti ve sup. Nurse in a damdawiin a rawn pe a, kei erawh Afeli lak ata ka mit ka la sawn thei lo. A che zia chu chik zet in ka en reng ringawt. A mit hnuai a val kalh a, a lan dan atang pawh hian that lam aiin zual lam a pan zel tih a hria. Ka ngaihtuah na vang chuan ka thawk a sak leh talh tawh.







" Ka sawi kha i lo ngaithla miah lo! " Ti tau aw zet a rawn ti tu chu en in engthil nge a sawi tih zawh nan ka mit hmul ka san uk a, lawm loh hmel lutuk in s ner nghal nang bawk.







" Thian pakhat mawl tawk ka nei a. Kan hming pawh a in ang chiah maw le. Nakinah ka hmel hriat tir ang che! " Nui ver ver chuan a ti a, ka khi ve suk. Damlo chung pawn a hmel a la hlim sang a, a tuarchhel ka ti tak zet.







" Mipa maw? I phone rawn chhangtu kha a nih chuan vawi khat tak chu ka khawih ang! " Nui duh miah lo chuan ka ti hmuk a . Lalrinfeli ka ho a min en takah chuan a hnar piai zeuh in ka fiamthu a nih thu ka hrilh leh sup.







" Ihmaww... Kha tih lai khan damdawiinah ka awm a. Ka mutthilh laiin ka phone a lo chhang a nih kha. Ka bialpa i ni tih pawh a hre vek a lawm. Ka harh ve leh min hrilh a, ka rawn call let che a min lo hau vak ringawt a. " Tum bar chuan a ti niap niap a. A aw rawl rin theih nen tunah chuan a tawng thleng in a thawp sep sep chauh tawh.







" Eng emaw zep nei ang khan ka hria che a, i sawi duh si lo a mipa dang i lo ngaih zawn daih te ka ring rum rum a, ka rilru a vak kual nasa lutuk . Chuvang chuan i call pawh ka chhang duh lo a nih kha. Ka exam sawn laiin min rawn then thut i tum ka hlau a, ngaihtuah na tha lo tak tak ka neih phah bawk a. Exam zawhni khan ka rawn call che a i la thei leh si lo a! " Ka ti ve sup. Ka tawng lai chuan chik zet in min en a, kei pawh in a kut ka vawn chu ka thlah phal lo a ni ber.







" Eng lo ka phone a chhe daih a. Bathroom ah ka tlu a, tuiah ka thloh daih a. Maman siam tur in a la in ka hria. Tihpalh lutuk, dik tak chuan hrilh fek che ka chak lutuk a, mahse exam mai tur i nei tih ka hre ve reng si a, i zirlai tih buai ka duh lo a ni! " A rawn ti ve vat a. Kan ti ti lai chuan kawngka lam a rawn ri a, mipa pakhat a rawn pen lut nghal zat.







" Ka my name-i chu i va tho harh awm ve! " Nui sang hian a rawn ti a. Afelin ka thianpa a tih kha a nih ka ring ve ta ringawt. Damlo kan hun a zawh dawn takah chuan hreh zet leh Lalrinfeli bul a awm la kham lo zet in kan chhuah san a. Zanah ka kal leh tur thu ka hrilh a, Rinfela nen chuan kan chhuak rual a.







In ka thleng chu ka pa pawh office a lo bang tawh a . Damdawiin lam chanchin min lo zawt ve luam a. Chauh pawh ka hre lo, ka room ah lut in shower ka nei a. Zan riah kan ei zawh ve leh thut pawh thu khawmuang lo in ka chhuak zui nghal a. Ka chhungte pawn ka zirna chung chang pawh an hre ve chak ang tih ka ring, mahse tunah tak chuan k ngaihtuahnaah Lalrinfeli bak a lang thei lo.







Rei lo teah Chrismas chu kan chuangkai ta der a. Mahse kum in chrismas chu ka thiante leh ka chhungte bul aiin damdawiin ah ka tal tam zawk. Henry leh Afeli thiante ho pawn an rawn kan ve reng a. Engtik lai pawh a a bul a awm ka duh a ni ber.





*





" I lo har ve a law? " Cabin ka luh rual in khum a hmeichhe lo thu awm diai chu ka en a, nui suk in ka ti nghal. Mahse min nuih let lo in a thu tum deuh hmak a nih chu.







" Ka lo kal har vang a I ti tau a nih chuan tihpalh aw! " Ka ti sup a. A khum sir a ka thut thlak hnu pawh chuan min la en duh chuang lo.







" I zirna chhun zawm in kal i tum tawh lo tih an sawi a! " A ngawih vang vang hnu chuan a rawn ti sap. Kei erawh in chhang lo in ka nui suk a, a apple ei tur ka zei lep sak mawlh mawlh thung.







" Ka hriat sual a ni ti raw? " Ka chhan loh avang chuan a rawn ti leh sap.







" Hre sual lo e. Hetah i bulah hian awm rih ka duh a lawm. Nang pawh tha i ti daih zawk ang chu... Nitin kan in hmu ziah thei a nga, kei chuan tha ka ti viau sin! " Tih leh apple chu a hmui zawnah lek kan ka rual a. Rum zet a min melh in ka kut chu a rawn beng sawn nghal hlak.







" Kei chuan tha ka ti ve lo. Chuvang chuan zir zawm tur in kal leh rawh! " A rawn ti hmak a. Ka thaw hawk ringawt.







" Ticket pawh ka la tawh lo chu ang chuan..." Ka ti chuan min rawn pawt chat vat.







" Chung te chu awlsam tak in a la tih fel theih chuvang chuan a tlai hma hian ticket chu la la kal rawh. " A rawn ti leh nghal vat.







" Ka duh tawh lo! " Ti hmuk in ka thut na atang chuan ka ding nghal vut a. Afeli chuan min en nghal haw.







" Engmaw? Kei mah vang a hetiang a I awm hi ka duh lo a nia. Chuvang chuan khawngaih in min ngaihtuah lo in i zirlai zir chhun zawm rawh... " A rawn ti leh halh.







" Nakinah... I dam that var hunah ka zir tha leh mai ang. " Awlsam zet a ka ti hmuk chu min ngei hmel zet in min en nghal nghek.







" A nih lo thi ta i la? " A rawn ti zawi sap chu ka in seh ruh nghal vak.







" I dam dawn a lawm! " Tih zawng in ka chhang. Mahse Lalrinfeli chuan a awi ve vak lo nge a rawn nui ro hak.







" Hniam lam ka pan zel tih i hriat kha. Chuvang chuan kei mah vang in i hma lam hun tih chhiat ohah suh. Phone in ka in be thei reng dawn a lawm. In hmuh pawh kan ti thei vek... Video call nitin kan nei thei a.... "







" A nih chuan engtikah nge ka khawih leh thei ang che? " Ka ti hmuk chu a tawng tawp chat.







" Min chhang ta che... Call maw... Min bum tum suh a hma a kan awm hran lai pawh khan kan in be tha thei meuh lo chu a nih kha. Chuvang chuan ka kal dawn lo! " Ti hmuk in khum bul a chairah chuan ka thu thla hmuk a, ka phone ka hmet nghal mual mual.







Engtin nge awlsam tak a kal tur a min tih theih zawk ni. Ka ngaih ang leh ka thlak hlelh ang hian min thlahlel ve lo a nih te ka ring rum rum. Call te chuan kan in be thei mai thei mahse rei lo te bak a ni dawn lo tih ka hre chiang a.







A taksa a chak tawh lo a, tunah pawh a tam zawk chu mut thilh nan hun a hmang a. Shillong a ka kal leh chuan kei pawh ka zirlai vang in ka buai leh viau dawn tih ka hria a. Chuvang chuan heta awm hi ka duh ta zawk. Ka nu leh pa te pawh ka hrilh vek tawh.







Heta ka awm chuan rei tak ka ngaihtuah zual chang leh ka ngaih chang a piang in a bulah ka kal thei a. In bia in ti ti duh lo mah i la, a muhil lai thlir ringawt pawh in nileng in a bulah ka awm thei a. Ka kut in ka la khawih thei a, ka ti nui a, ka ti thinrim thei bawk a. Chubakah tih duh leh mamawh ka nei chuang hek lo.





*



Ni a liam zel a, Afeli erawh that lam ai chuan zual lam a pan zel a. Doctor te pawh in a chhe ber thleng tur a in puah chhah tur in min hrilh a, mahse kei ni lam erawh chuan beiseina kan la nei awl lo thung.







Lalrinfeli duh ang in in lamah in enkawl chhun zawm tur in kan hruai haw a. Kei leh Afeli nu chuan damdawiin lam a awm kha kan la duh pui fan a. Mahse Afeli a pa hnenah haw a ngen tlat a. A din hmun a hre ve tawh bawk nen damdawiin lam a awm reng a duh loh thu a sawi ve tlat bawk nen, lung dam lo deuh chuan in lamah kan hruai haw a ni ber.









A room a ka lut chu rawn hawi chhuak in min nui sen sen a. A lehkhabu chhiar lai chu a khumbul dawhkanah chuan a dah nghal vat.







" Vawin lam te enge kan an! " Tih leh a bul a thut thlak ka rual a, nui sen sen in a thawh harh thu in min chhang a. Maman nizan a mut theih loh thu room ka luh hma in min hrilh a mahse he nu te reuh hian ka lakah a zep leh tlat tawh!







" Ni tin hetiang a awm chu a ninawm e! Game kan khel dawn a mi? " A rawn ti sap a. Eng game tih leh mit san uk ka rual nghal.







" Awlsam lutuk....Truth or dare! " Tih leh a lehkhabu chu la in kan in karah chuan a rawn dah a. A sir a tui bottle chu la in tui la awm zawng chu a in khalh khalh a. A chetdan duhawm zet chu ka thlir ning thei lo.







" A lian mah mah a nih hi! Dawhkan chung a pen kha lo ban lawk? " A tih chuan sawi buai lo in ka ban ve nghal mai bawk.







Pen chu lehkha bu chungah chuan a ti vir a, kei mah a chhin lam chuan min kawk tlat mai.







" Truth or dare! " Phur zet chuan a rawn ti a.







" Truth! " Ka tih chuan a phur lutuk chu ka lo hlim ve ringawt bawk.







" Vaai khat tal dawt min hrilh tawh em? " A rawn ti a, ka nui suk.







" Hrilh lo tlat! ' ka tih chuan lawm tih hriat zet in a nui nghal ver ver. Pen chu ka tuai vir a, a mah a kawk ve ta thung.







"Truth or dare! " Ka tih chuan dare a thlang ve hlauh a, ka nui suk.







" I damlo bawk a, Awlsam deuh ka tih tir ang che! Min fawp rawh le! " Ka tih chuan a hmui ti pawrh tar in a ner nang.







" Phakar reuh e! Lo hnai rawh! " A tih chuan then suk in ka awm hnaih a, a kut venflow la in vuah vek chuan ka biang a rawn vuan a, ka hmuiah a rawn fawp zeu a, in lak hran leh mai a tum chu kei mah zawk in hnaih in uar zet in ka fawp a, ka awm hran rual in a nui hak.







Pen chu a tuai vir leh a, kei mah min kawh avang chuan truth bawk ka thlang leh nghal.







" Enge ka zawh ang che aw? " A ti vang vang a, a ngaihtuah vang vang a, eng emaw hre chhuak thut in min rawn melh nghal vat.







" Ka awm tawh loh hunah hmeichhe dang i lo hmangaih a ngem? " A rawn ti sap .







" Zawhna tul lo tak a ni! I awm reng dawn a, khawiah mah I kal dawn lo chuvang chuan khatiang khan thu sawi tawh suh ang che! " Ka ti hmuk chu a ngawi ve hmak.







"A ninawm tawh... Duh tawk ang! " Ka ti zui zat chu a ner nghal nang a. Pen leh lehkhabu chu ka dah sak nghal hmak bawk.







" Sual thei si! " Ti hlak in a mu tha vat a. A bul a mu tur a min tih chuan then suk in ka thu thla a, khum lu lam ngheng in ka thu a, ka taksa sir chet in ka ku ah bet nghal hmak bawk.







" I thinrim nan a zawt che ka ni lo a nia aw. I hriat kha kei chu rei ka daih tawh dawn lo a. Ka awm loh hunah chuan I zir lai chhun zawm la, hmeichhe fel leh hmeltha deuh lo ngai zawng bawk a. Kei mah ang a mawl chu ngaizawng tawh miah suh aw! " A rawn ti sap a. A sawi zawh rual in a nui tel hak bawk. Kei erawh ka nui ve thei lo. A taksa ka kuahna chu ka ti nghet vak ringawt.







" Khawiah mah I kal dawn lo ka tih kha! " Ka ti sup. Ka awm zawn atang chuan a rawn dak chho ha a, a mit meng dulh raih chu ka melh lui ve run bawk.







" Dawt sawi I thiam lo si! Eng thu pawh sawi mah la Kei chu a ni tel in ka ral riai riai reng tih kan hre tlang vek a. Chuvang chuan dawt min hrilh in beiseina min siam sak tum suh! " A rawn ti sap a, ka taksa chu a tang nghal tawlh tawlh. Chhan ngaihna ka hre lo... Doctor te pawh an beidawng tawh si a, ti hian a kal hun tur kan nghak a ni ringawt a, mahse min kal san tur ang in ka la ngaihtuah ve thei lo.







" Ka rilru hi a na tak zet! Ka natna ai mah chuan nang leh ka chhungte bul a hun ka hmang tam thei tawh lo tur hian min ti na leh zual. Nang nen a hun tam tak hman ka la duh a, in ngaizawng dang te ang tho a len chhuah dun a, hlim tak a awm dun ve te ka la duh a. I bul a rei tak la awm ka duh a, pasal a neih che a, fa pawh tam tak neih ka duh ve a sin!







Mahse chung ka lo mitthla leh suangtuah ve thin zawng zawng chu engmah a thleng ve thei tawh dawn si lo a. A chhang chuan ka awm loh hun ah hmeichhe dang tu nge I bulah awm ang tih ka ngaihtuah a, ka suangtuahna a ka din hmeichhia chu thing in kei mah leh kei mah ka in ti na fo a. Mahse engmah ka ti thei chuang si lo! " A rawn ti sap a, a nui ro nghal hak bawk.







" Tumah an awm ngai lo ang. " Ka ti sup. A kut cher leh thisen nei lo tih hriat zet a dang var pap chu vuan in ka awm zawnah ka nghat vang vang a. " Hetah hian Lalrinfeli lo hmeichhe dang in hmun an chang lo. Chuvang chuan thil at thlak dang chu ngaihtuah tawh suh! " Ka ti sup.







" Ni e... Hma lam hun chu ngaihtuah ka duh tawh lo. Tunah ka bulah i awm a, chu chu ka tan chuan a tawk lutuk! " A rawn ti tham chel. A aw lawi rat leh tah in sum zet a a hmui a pet fan fan te chu ka hmuh hmaih hauh lo.







" Ka hmangaih che ... Tunah leh hun lo la awm zel turah pawh! Chu vang chuan ka phal na la lo chuan khawiah mah kal bol suh ang che. " Ti sup in a chhipah chuan ka hmuiin ka nawr nghal vang vang.

Ka taksa rin chhan chuan muhil in a thaw sak sak a. Kei in mit khap lek lo in a muhil lai chu ka thlir thung. Engtin nge min kal san ta se kei hi ka awm ang?



*



*



Zan riah kan ei lai chuan tu emaw hian hman hmawh hmel deuh hian kan doorbell a rawn hmet a, ka nu chu a tho nghal vat a, kawngka a va hawn rual in Mama hmel chi ai tih hriat zet chuan a rawn lang a. Ka chaw ei pawh ka tawp ve chawt.







" U Hriatpui... Omami... Omami a zual thut a. I hming a lam reng a... Ka... Ka pa in ko tur che in min rawn tir a. " Hlauthawng aw zet hian a rawn ti a, tlangval ve uai tawh mahse a a rawn tap ti tih bawk. A awm dan vang chuan kei pawh ka hlauthawng ve nghal vek. Ka chawi ei pawh chu ka kham nghal a, Maman damdawiin lam an pan a tih avang in ka chahbi la in Mama nen chuan kan in khalh chhuak nghal a.







" Lalrinfel.... I kal thei lo... Ka phalna lo chuan min kal san thei lo. Lo tuar fan fan rawh... Ka lo thleng tep a nia! " Chhak zet a bike a tlan chung chuan ka ngaihtuah chuan a ti mawlh mawlh a. Ka thin phu rang dawt dawt chu chiang tak in ka hlauhthawn vang a ni tih ka hria. Damdawiin kan thleng a, ka thil hmuh vang chuan ka bul a bang chu ngheng in chhuatah chuan ka thu hnawk.







" Ka phalna la lo in min kal san thei lo ka ti kha! Engvang in nge ka thu sawi i awi duh miah loh! " Ka ti chhuak thawt! Damdawiin in chuatah chuan ka thu sawp nghal hnawk bawk.







* A TAWP TA *

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/