Behind the mask Chapter 10

[Catnip Quill]

Behind the Mask



Chapter 10



Andrew an nupui anei tih ka hriat atang thla 3 a liam leh der tawh tunah chuan rilru nat aia nep intih na hlir in ka khat tawh.Ka pi hi tar a hnu lamah a chetsual avangin keiman thla 7 dawn chu ka buaipui ta vek a,ka zirchhuah atanga Kum 1 leh a chanve a tling der tawh,ka pa leh Lalawmpuii thawt thawt hian ka hriat miah lo in hospital pakhat ah nurse hna ruak awm ah chuan dilna form an lo va thehlut tih interview tura min hrilhna call ka dawnin ka hre ve chiah.

Chaw kan ei lai chuan call ka dawn thu chu ka sawichhuak a

Chaw bar thulh meuh chuan ka pa chuan "A va tihzia ve i tlin ngei hi ka ring tlat i zirna hmun pawh a zahpuiawm lo bawk nen" a rawn ti duah a.


"Ei vat vat la han in buaisaih nghal rawh,thil dang engmah ngaihtuah tawh suh" ka nu chuan a ti zui hlak hlak a.


Ka pi pawh rin ai takin a zia bawk nen pawi ka ti em em hran tawh chuang lo,ka interview na tur hi Devine healing hospital niin,Aizawl a private hospital kan neih ah chuan changtlung ber niin,mi tam tak chuan North East ah pawh a tha ber ani ang an ti hial bawk,hlawh ni se sawrkar a thawh aia tam daih zawk bawk mahse an hah viau ang em tih ngawt chu ka lo ngaihtuah leh hmanhmawh a.


"I pi pawh ngaihtuahawm ani tawh lova,i hna tur lam a rilru sawrbing hi a hun tawh viau ani" ka pa bawk chuan a rawn ti leh a,ka pa in hetianga thuthlukna a siam tawh hi chuan hnial theih ani tawh lo hrim hrim.


"I u te pawh karleh ah chuan an lo haw ve thei tawh ang a, i hna tur chiah hi buaipui tawh ang che" ka nu chuan a lo tuihnih leh zawm zat a.


Chaw ei kham chuan ka nun hmun senghawi pawh phal lo chuan ka room lamah chho a in buaisaih tur in min nawr tawt tawt zui a.


A tukah chuan interview turin ka kal a,Opi rawn haw lai ani bawk nen phur tak chuan min kal pui a, hospital chu ka rin phak bak in a lo changtlung viau.Room chhung ka luh hma hauh atang chuan ka zam nghal em em ringawt,room ah chuan mi pathum lo thu in,an Head nurse ber chuan min lo dawngsawng a,a nelawm takzet.


"Welcome Vanlalrinawmi,kan hmu thei che chu kan lawm hle mai,khawngaihin thutna ah khan thu ta che"nelawm tak hian a nui sang bawk a.Thawk la hak chung chuan ka bula thutna awm ah chuan ka thu a,room chhung pawh a landan ai daih in a zau in a mawi viau bawk.


Head nurse bawk chuan saptawng chuan "Vanlalrinawmi we're impressed by your education,you studied nursing at AIIMS,one of the best medical schools in India.
Ka bio data thlek zeuh pah chuan

"How did your education at AIIMS shape your skills and qualifications for this position"? A rawn ti leh a.Khirh hmel deuh deuh hmel senior hlir,tarmit kar atang min rawn melh hrek hrek duh lek tura ka lo beisei ruk ang hmel tuman an pu miah lo an nelawm lutuk chuan ka zam na zawng zawng an ti reh chawpchilh nghal vek,AIIMS atanga zir chhuak ka nihna leh ka mark a lo zahpuiawm bik lem lo bawk nen confi tak a nui sang chung chuan,

"AIIMS taught me the skills and compassion needed to be a great nurse. I've always wanted to care for others and I'm excited to bring my skills and passion to this role" in ring tawk tak chuan bahlah miah lo in ka sawi chhuak ve parh thei.

HR representative Dr.Patel chuan "engvang in nge kan hospital ah hian i thawh duhna chhan"? Tia min zawhna pawh chu tha tak in ka chhang a,an hmel hmuh a hahdam in lu an lo bu nghut nghut reng bawk a,zawhna an ngah hran lo ,phone call lo ngaichang tura min hrilhin ngaihtha zet chuan ka chhuak a.


Hmanhmawh deuh tak chuan hospital chu chhuahsan in Lalawmpuii min lo nghahna lam pan chuan ka kal zui a,bazar ah te kal khawmuang in Peter te inah bawk kan lut zui leh a.Peter room ah awm khawm in,guitar a perh a kan zai vel mai mai.

"Tak a higher a kan senior Kimkimi pawh kha divine ah sawn a thawk a sin" Petera'n guitar dah thlak pah hian a rawn ti a, Lalawmpui in rang zet in,

"Ebenezer anih kha" a lo ti vat a.

"Kan nih lai khan divine ah a insawn a lawm" Petera bawk chuan a lo ti leh a.


"I lo nihpui leh hman a" Lalawmpuii nen chuan inthurual ang maiin kan sawi rual.Hepa hi ngaihna thlawt a awm lo.

" A number ka rawn thawn ang che" a la ti deuh deuh zui.


"Tling dawn em tih pawh hriat loh" ka lo ti vat a.Synod a kan luh tirh khan Kimkimi te hi kan chung chiah ah an awm a,kan class ah a cousin thingtlang lam mi kan kawm thin vang hian u Kimkimi te nen pawh hian kan in pawh phah viau thin,lo tlin ve hlauh chuan hmelhriat neih nghal chu a tihzia dawn viau.


Movie a kan hmuh thin a bikin k-drama ah phei hi chuan a changtunu ten Sam an tan tawi tawh hi chuan an chan hi a tha chho ngei ngei,chutiang deuh chuan keipawh ka nunhlui zawng zawng kalsan a nun thar a bul tan turin ka in peih fel tawh. Hlua style&go dawr ah ka sam englai pawh a sei hnap thin chu ka tan tawi tir a.


Lalawmpuiin min thlek vang vang a "mi áng lo i ang" a ti hluk,henu mit ah hi chuan ka hmeltha ngai lo hrim hrim.Ka sam tan kher hi tul lo ti viau mahse min kalpui ta tho a,a u bike hlui ri bengcheng zet a rawn kengchhuak hi a tul lo fe zawk!

"Ka inhmeh lo viau ami" ka ti ta nge nge,min ti confi lo zo vek.



Nui var var chung hian
"Ka ti mai mai a nih kha i mawi lutuk ka darla"tih pah chuan ka chalsam chu a siam tha mawlh mawlh a.

Kan result chhuah ni a rawn her chuan Lalawmpuii nen chuan khum ah mu dun in Lalruatsanga chungchang kan sawi dun a.Lalruatsanga hian hmeichhe dang vawi tam tak a biaksan zing lutuk, tichung hian a thlah thei lo,a tang laklawh lutuk hi ka khawngaih thin.Ka dinhmun nen ka khaikhin a keichu a lo berah hmeichhe dang vangin min kalsan lo tal a lawm le,tunah nupui nei tawh mahse khang hun chhung zawng khan min hmangaih alawm!huh tul lo deuh in Andrew bawk ka ngaihtuah chhuak leh tawh.

Phone call arawn lut ka dah meuh chuan Lalawmpuii nen inkuah in kan zuang tawr tawr.Ni e tunah chuan intern ni lovin nurse tak tak ni turin Divine Healing Hospital a ka thawk dawn ta.


Ka nu in ka rizai a rawn pawt hlim thuai ah chuan Ka mumang a tlangval hmeltha deuh chu bo hmakin ka nu hmel dur khup in a rawn thlak ve thung a,a la hma ti hluk a in lukhup mai ka tum chu ka mal ah min rawn beng thuai.

"I ni hmasa ber atang tlai i tum ngawt mi?" Vin zet a atih chuan ka hrechhuak ve chiah!vawiin hi hospital ka join ni ani tawh tak e.A ang zui mawlh mawlh pawh chu ngaihsak hman lo in bathroom lamah hmanhmawh zet chuan inbual turin ka tlan luh san a.Tunhnai hi thawh ka harsat reng reng.Ka inbual zawh chuan hmai te chu simple deuh siin ka chei ve thuak thuak a,tops var leh smart pants ha in flats ka bun leh tawp a, hospital thlen veleh uniform hak a ngaih leh dawn tho avangin han inchei chiam pawh kha awmzia a nei lem lo.Hmanmawh deuh a helmet laka kal mai ka tum chu ka pa in bawnghnute leh chhangthawp butter toast min ei luih tir leh hram ,ka ei chhung zawng ka nu'n ka sam min lo chhem ro sak bawk a.Nu leh Pa min hmangaih tu Pathian in min pe hi a hlu a ni,engthil nen mah hian ka thleng phal loh tur a ni.Ni e Andrew nen kan inthen chhoh lai khan zu nen nun beidawng takin hun ka hmang a.Pathian hnenah pawh tawngtai duh lo khawp khan dil tur ka hre lo ka ti thin,mahse "he ka lei taksa hi a thawk ve tek tek chhung chu beidawnna ruam ah pawh ni se lawmthu sawi reng tur ka ni " tiin Lalawmpuii hian min hrilh thin.



Hospital chu a hun takah ka thleng hman chiah chiah.
Receptionist bula in report in,2nd floor a Nurse's station ah in report turin min hrilh leh a.Elevator la in Kimkimi'n min lo chiauau vat a,Nurse's station lamah chuan min hruai a.Kan Head nurse Lalrinmawii chuan briefing min neih pui nghalin keimah bik pawh ka duty na hmun tur leh ka routine min pek zawh chuan scrub min hak tir zui a.

"I inhmeh hle mai,vawiin chu hospital fan kual pah in staff thenkhat leh doctor kan hmuh remchan ang ang ka hmelhriat tir dawn che nia,ICU atang tan phawt ang aw" nelawm zeta tiin min hui zeuh a pawnah min lo nghak reng tawh,a thothâng tha lutuk chu ka duh nghal em em ringawt tawp.


ICU hi hospital chung berah a awm avangin elevator ah bawk chuan kan chuang leh a, an sawi ang tak tak in he hospital ah hian gym thlengin a awm,a changtlung viau lai hian private hospital dang ang lo takin cabin luah man te a to leh chuang miah lo.He hospital nei tute hi chuan business ang mai mai chuan an run lo tih ka hmuchiang viau.

Doctor leh nurse thenkhat kan hmuh remchan ang ang te min inhmelhriat tir zel a,ICU kawt a doctor 2 lo ding awmna lam ah chuan min hruai a.

"Dr Sangpuia leh Dr Jonathan an nih hi" a tihna lam chu ka hawi a.

"Tlangval kan la ni ve ve bawk" Dr Sangpuia chuan khi suk a min chibai pah chuan a ti a.

"Dr Sangpuia hi chu hmeltha deuh tan chuan hnaih vak lo tur" Dr Jonathana chuan lo ti vatin min chibai ve bawk a.


"Kan department ah rawn dah nghal la sir" khawng tak hian salute pek pah in Dr Sangpuia bawk chuan kan Head Nurse chu a fiam zui hlak a.

"In va han over dun tak" chek tlak tlak hian head nurse chuan a ti a.Helai hmun a thawk ho reng reng hi biak nuam tak leh nelawm tak vek hlir an la ni, ICU atang Doctor lo chhuak mek chuan chu ka ngaihdan chu a dik loh zia a rawn ti lang chiang viau.


Dr Sangpuia chuan chu Doctor lo chhuak chu a lo kuah nghal thuak a.

"Kan doctor neih zing a mch naupang ber Dr Amos a nih hi,Dr Amos heihi Awmawmi" tiin Head nurse chuan min inhmelhriat tir ta mai!


A File bih lai atang chuan ka mit ah tak Chiang zet in min melh zawk a, min hria ang phei chuan a awm lo.Khawdang hawi nachang hre lek lo in mi á ang maiin ka en ngawt ngawt tawp.


"Welcome" a ti nghut a.A file ken lai ah bawk chuan a mit a bur leh chat "Lalrindika saw ward ah a sawn theih tawh" Dr Sangpuia bulah chuan a ti hmuk a.


Doctor coat nen phei chuan amah a sang ropui sia a zahawm bik ngawih ngawih.Min hre lo ang a a áwm pawh kha pawi ka ti lo zawk,a mizia ngaihtuah phei chuan a bulah khan ka che chhe thin bawk nen ka ngaihtuah chian hian ka zak thar lutuk hi khuk ral daih ka chak.

Xray room lamah Head Nurse chuan min kalpui zui a ,kan kalsawn takah chuan ka thawveng huai huai thei.

"Dr Amos kha kan neuro department lam ami a nihkha,nang aiin Kum 6 vel bak in a upa lo ang.Naupang ber mahse Doctor thiam tak a nia.A hna ah hian a serious a a thin pawh a chhe ve hlak hlak a nia,ani pui rauh hi a hmel te a keu bawk nen tar ho chen hian an star a" tiin Head nurse chuan Amos chungchang chu min hrilh zui mawlh mawlh a.kan training lai ka ngaihtuah chhuak a,a sual thiam zia lo tem tawh tu ka ni a,an department ah tak duty dawn lo mah ila emergency department ah ka duty dawn vang hian kan in hmu fo tho dawn tih ka hria, engamah hmain pumpelh dan ngawt chu ka ngaihtuah nghal char char.Khang hunlai ai daih khan a hmel a lo pa lehzual tawh zawk,a pian in fit zaih mai te,a tawng zawng a a ha var sar mai leh a rim zet kha! ka thian Ritu leh Sumbul átchilh em em tu te hnenah sawi hlan ngawt chu ka nghakhlel tawh.Ka ni hmasa ber a ni bawk nen hriat tur pawimawh ang te leh thil tul dang pawimawh in hrilhhriat nan vawiin chu hun min hmanpui chawt a.
Night duty anih loh chuan zing dar 8 atang tang tlai dar 2 hi ka duty hun niin, tlai dar 2 atang dar 5 thleng duty tum pawh a awm.Zan duty hun ah erawh zan dar 8 atang zing dar 8 thleng a ni veleh thung.

Kar hnih zet ka thawh hnu chuan hospital pawh ka bel tawh viau mai, ka thawhpui nurse te nen kan innel nghal em em ringawt,Kimkimi nen kan in kawm nasa fal zual a.Amos leh a Doctor thian 2 te chanchin chu kan hriat tam ani bawk.Amos ngat phei chu Head nurse sawi ang tak takin hospital a thawk bakah damlote ah pawh a tla na viau,a hranpa tak a inhmuh leh erawh kan la nei miah lo thung chu ka lawm ru phian.Mahse vanduai thlak takin vawiin hian Amos in kan department ah damlo rawn tlawh tur a nei a,ka lo assist angai bawk.


Dar 9 a rik chuan hospital corridor ah chuan kan inzui phei a,a hnung ah chuan ka um ve det det.Ft 5 pel ve awrh leh a ni ft 6 boruak hip pha chin chu kan in san hleih lutuk tlat.

General ward ah lutin damlote leh a lo awmpuitute mit chu Amos ah a fu thap.

"A hmelthat zia saw"

"Ala naupan hmel si a engtin nge tiang em em sawn mihring hi a perfect theih le"

"Movie star ami te pawh a ang zawk lawm"


Ti a inhrilh ru sur sur thawm tehi hre ve lo ang mai chuan khum number 5 na chu a pan ding nghal chat a.


"Awmi enge dam lo dinhmun hi" min melh zawk pah chuan a rawn ti dam dap.

"Ahh a tha sir" ka ti bah nak,hetiang a zaidam hian vawi khat mah min la be ngai lo chu ka hrilhhai ani ber.


Mawl min tih hmel zet hian a thaw hawk a "A Detail in sawi ta che mawle" a rawn ti ram hmak,ti kha chuan amah tak tak ani leh ta.


"A BP 120/80, temperature 98.6" ka lo ti vat a


"OR kha lo buaipui la,dar 10 ah ka zai dawn nia,kan department lamah sawn chhoh bawk tur" a tih chuan lo bu nghut nghutin ka ziak thla a.


Hmun dangah kal kual zelin Doctor dang te ang lo takin a tawng hmuk hmuk te chu ka lo ip chawih chawih mahse hmeltha an tihna hian a hliahkhuh vel vek aniang.


Pitar pakhat in "Mama i van hmeltha em em" chibai meuh a a tih chuan Amos pawh a nui ve suk mai.Doctor pawh ti lem lo a mama a ti kher chu ka file ken lai chuan inkhuh in ka nui khur cher cher.A pen ken lai chuan ka lu ah min khawng chawrh a ka hawi chhuah chuan min lo melh rum lutuk chu lei ka chhuah khum ringawt!


Hmui phun hian "i mawl lutuk"tiin mawi zet hian a rawn nui zui a nih chu! Ka dinna ngai a ding reng chung chuan a kal liam chu mi á ang maiin ka thlir liam tawp! Tun a ka thin rawn phu dup dup hi a vawi khat na a ni lo tih ka hrechhuak chiah. AIIMS atang tawh khan anuih apiang hetiang hian ka lungphu a rang thin tih ka hrethiam chiah. Hrep tak hian!