Pitartei Zûn chapter - 10 By Betsy lalngaihsaki

[Bethsy lalngaihsaki]

Pitartei Zûn
Chapter - 10
By Betsy lalngaihsaki






" Mikhual room khi a lian tho a , hmeichhe ho zawng kha in len vek ka ring , chhuatah a thenin puan inphah mai dawn nia .. mipa ho chu hetah hian kan mu mai ang a " Remruata'n ati a , thut khawmna pindan a sofa te chu an hung sawn a. An mutna tur , puan chu Hriatkima leh Elijah in an phah mek bawk a. Bena erawh ka hmu lo , khawnge maw a kal daih ni.









" Rica tiin an koh che mi kha , lo kal r'u mikhual roomah inthianho mutna tur siam ang u " Remruata nu nu Zari chuan ati a. Kan thlen tirh atang khan min la be bawrh bawrh reng. Remruata hian farnu pahnih anei a. Anni chu Aizawl lamah an awm thung.









" Nu Zar kan tibuai viau che u ang a....kan thianho kan thahnem bawk si.." Nupuii chuan ati a. Mikhual room lamah kan inzui phei hnak hnak. " Nia..zanin chiah kan riak anga naktuk zanah chuan kan thianhoin puan in kan kaih anga, kan party dawn a. Kan tibuai tawh em lo ang che u" nui hak hak chung hian u Jessi'n ati ve bawk a. " Awi... inthlahrung reng reng suh u .. I pa Mapuia nen chauh kan awm a.....awmpui nula nei ve bawk mah ila ... kan lung a leng ve thin tho a.. in lo kal a nuam kan tih tehreng nen " ati ve siam siam . A tawng peih dan atang chuan nu nelawm tak tur ani in ka hria.









Remruata te hi Champhai ah chuan hausa pawl tak an ni a. Pa Mapuia hi pa zaidam tak ani in ka hria , nu Zari lah chuti bawk. An fate , Rz-i leh Sangtei lah an fel bawk . An chhungkua hi an awhawm ka ti .









Kan mutna tur chu min tihfel pui a. Kei , Nupuii leh Linda-i chhuatah kan mu anga a bak zawng khumah an mu dawn ani. Mipa ho erawh an in rel relin han inrel teh se.








Naktuk zing chaw ei kham velah luia kal an rawt avangin kan thuamhnaw hak tur te chu kan siamfel nghal a. A chhan pawh mut hma kan duh vang ani . Tunah lah dar 12 a pel tawh bawk si.









Kan insil fai zawh hnu chuan mu Turin kan intintuah tawh a. Ka thiante ho chu an mu vek tawh a. Kei erawh skincare te ka la hmang leh hnuhnawh a. Public figure ka ni ka tih tawh kha , online shopping neitu pakhatin a instagram page min shoutout sak turin min rawn ti leh a. Buai viau mah ila , ka tihsak ve leh hram , hlawh pawh min pe ve nghe nghe.









Mu chungin phone ka khawih leh zuai zuai a , Bena message **muhil tawh ani maw** a rawn tihna pawh chu , **muhil lo ve ka mu deuh chiah ** ti in ka chhang a. Rei a rial lo , min rawn reply leh a ** mu tawh rawh naktuk thawh hma angaih kha** a rawn ti leh a. Ka mut hma tur thu hrilh in phone chu lukham hnuaiah ka rawlh lut a.









Zing ka harh chuan tumah room ah an lo awm tawh lo a , ka tho nghal at mai. Ka thawh rual chuan Nupuii room ah a rawn lut chiah a. " In tho vek tawh ami a, tinge min kaihthawh ve mai loh " ka ti nang nang a. Ka phone Sana ka en chuan khai aa !!.... dar 8 alo pel thuak tawh.










" I mu tui em a, bakah hmeichhia kan tam em a , tihtur ang ang kan ti zo tawh. In phih fai la kan chhuk thla rual dawn nia " ati a. Ka mutna tih fel ka tum pawh chu a phal lo a. In phih fai hmasa vat zawk turin min ti a. Keipawh chuan ka hnial ta lem lo.









In hnuaia Nupuii nen kan chhuk chuan chaw ei an lo siam chu ani der tawh a. Bena'n min hmuh chu min lo pan nghal zat a. Nupuii erawh chaw ei an siamna lamah chuan a phei a. "Ibva mu rei ve Pitarte...." Atih chuan ka ngei tawk a tling khawp a. " Ti nge ka la thawh loh tih i hriat reng te chuan min kaithawh ve mai loh a " ka ti a.









" A ho lutuk Josi te'n an puih tho lawm i u Jessi te'n nang chu naute i nih kha " ati ve nung nung rauh a. " Chupawh ni se, nula mikhualnaa han thawh tlai.. zahthlak ee" ka ti leh tho a. Ani erawhin ho a tih hmel viau thung.









Elijah chuan chaw a ei theih thu sawiin a au lang lang a. Choka lamah chuan an nui hak hak a. Mi zawng zawng chu choka lamah an awm vek tawh. " Phei ve ila , ka ril a tam ania " ati a, ka hmui a rawn khawih zauh a. " Hei tê hi ka ei chak lutuk " min siai zauh pah hian ati zawm zat a. Ka hmui a rawn tuai leh thuak chuan a kut ka lo vawn sak thak a. Ka lo seh sak vak. Kawlh tih hmel zet hian min en a, "Nge i hriat a" ati sup. "Zing kar kar a i lerh vang anih kha " ka tih Chuan ho atih hmel tak zet.









"Chaw hi mahni theuha khawrh a, in chawi mai tur ani e" Pa Mapuia'n ati a. Kei pawh ka in khawrh ve mawlh mawlh. " Rica i mutui maw " Nu Zari'n alo tih ve chuan , " mutui lutuk ringawt thawh ka la hai zui , " nui lui sâng pah hian ka ti a. " A ho e mai , nizan in chau dawn tehreng nen in tho hma hlawm zawk ngawt alawm , Hriatkima phei chu a arsa siam hi a tui ngawt ang" ati zawm zat a. Hriatkima lam ka va hawi phei Chuan " ka arsa siam ngat anih kha aw Rica, Bena ai pawn ka thiam zawk ang , " khi thaw pah hian ati a. A bula Bena thu chunga chaw ei pawh chu a nui vei suk.









Chaw kan ei kham chuan kan insiam mawlh mawlh chu a ni der a. Mipa ho phei chu an insiam fel tawh hmeichhe ho erawh tih tet tet kan ngah avangin room ah kan la awm thap.









"Nupui.. heihi min lo zip sak lawk please" Josi chuan ati a. Nupuii pawh chuan a tihsak ve mai bawk. Lindai leh Tlankimi chhuak tawh chu room ah an rawn lut leh a. " Tlankimi zawk chuan in hman tep tawh em, mipa ho khi an hmanhmawh deuh a" a tih Chuan U Jessi chuan kan hman tep tawh thu in a chhhang ve mai bawk.










Tlankimi leh Linda hi Bena te thianho zingah mi an ni ve a, an nui sang peihin kei phei chu min kawm deuh chawt tawh a. A bik takin Bena nena kan inkawp atang hian a hma zawnga thian lawm vak ngai lo khan ka beisei phak bakin thian ka ngah phah a. Ka tan an fel em em bawk si. An hlu takzet.










Ka hman avangin Nupuii insiam chu ka nghak a, a hman veleh kan thian dangte chu kan lo va chhuah tur thu hrilhin room atang chuan kan chhuak a.










Pawn ah chuan kan thian ho chu an lo thu thap a. Bena'n min lo hmuh rual chuan , " i va nalh ve.. Pitarte" alo tih chuan midang ho chu an khêk dual a. Hriatkima leh Remruata an over fal leh tawh.










" Vawiin chu Tlani nen kan lo in partner ang, Rica leh Bena an over lutuk a single bik te chu nuam lo tiraw Tlani" Hriatkima'n atih chuan Tlani chu alo nui ve hak hak a. " I nghal e..tinge kei kher , Nupuii te pawh an awm reng hi.." ati ve a. A lai deuh emaw ni.










" Nupuii te chu beisei ngam chi loh, Hyderabad ah a awm reng alawm " Remruata chuan ati ve bawk a. Nupuii chu an fiam luam a. An nui hak hak lai chuan sir khatah Bena nen kan ding dun a, "I hmeltha lutuk ania, mahse i kawr awm kha a zau mah mah thosi an awm dawn ania" ka awm bawr rawn melh zauh pah a a tih Chuan, kawr chung ka ken tel thuin ka chhang a. Engmah pawh chu a sawi tawh lem lo.










" Nangni pahnih kha, in inngaizawng bik lutuk.. Elijah leh Linda pawh ti em em kha an ni lo " Hriatkima chuan ner nawng pah hian alo ti leh a. Bena chuan" Hriatkima ngaihzawng nei chak hmu zo si lo hi chu aw....." Ati fiam vang vang a. Midang ho chu an nui hak a, Hriatkima erawh a duhlo nasa ngang mai.










Kan thianho an rawn thlen tawh takah chuan motorah chuan kan thu lut leh sap sap a. Kan lui kalna tur hi ram pil ril anih dawn avangin , motor luh theihna chinah motor in kan kal anga , a bak zawng chu ke in kan kal dawn ani.










Bena motor ah chuan Bena motor ah chuan mi pa5 kan chuanga, Elijah in a bike a kenga Linda nen an inphur leh a. A bak zawng chu Hriatkima Motor ah an inhnawh ani.










Kawng sir dawrah kan thil eitur vel kan lei kawi leh a. Hla play in kan zai lauh lauh a. Nuam tak ani. Josi nen pawh inmil lo over kan ni tawh lo a. In ngeih tak tia sawi tur erawh kan ni lem lo thung. Kan thian kawm a inang na na na chuan kan pahnih pawh kan inpawh sawt hle a. Bena nen pawh an inkawm nasa hle a, a ngai ang bawkin an chhuak dun reng a. Thik deuh thin mahila ka bialpa ve hi a ngaih a sam em em a, ka zawh chang te hian " a hma atangin kan inkawm tawh thin a, a pangchang thin alawm, hrethiam rawh ati mai zel a" engmah ka sawi zawm tawh ngai lem lo. A chhan chu sawi nawi neih reng min tih ka hlau ani.










Motor luh theih chin chu kan thleng a. A thleng hnuhnung ber pawl kan ni, midang ho chuan an bag an la chhuak sap sap a. Keipawh motor atang chuan ka chhuk thak a. Kan thian dangte chu kan zuk pawh a.











Elijah in " Hnehna puang hmasa lawk ila.. a then ramhnuaia vawikhat mah la luh ngai loh te kan awm hlawm a " atih chuan Remruata'n , " Hnehna puan em em a ngai lo , keiman tawngtai na ka hmang anga kan kal dawn nia " atih chuan kan pawm tlang a.









Urhsun zet hian , " Hei , kan thianho PATHIAN in hei leh chen dam te in min la enkawl a, vawiin ni ah champhaiah ramvak thei tura min hruai thlen avangin a lawmawm hle a, " atih chuan midang ho chu kan ngawi thap a. A sawi zawm leh a" chutih rual rual chuan , Pathian hnenah min awmpui tlat tura ngen ka duh a, tunah Pathian hnenah kunin kan tawngtai dawn............" Atih chuan kan maimit chhing thap tawh in ka hria.









Remruata chu a ngawi vang vang a, a hnu ah " Pathian hnenah tawngtai chu ka duh zet Naa , keimahni theuh hi rilru tawngtai na nei theuh zawk ta ila a tha angeee" ati daih a. Kan lo thutak tawh tehreng nen , an nui chhuak hawk hawk hlawm a. Kei phei chu ka lo maimitchhing hman tawh asin le..









" Atih kha ka ring renga .." Bena'n ati a. Remruata pawh chu a khi sawnga . Ramhnuia lam chu a pan zat bawk a , kan zui dat dat.










Ramhnuaiah chuan kan kal zel a, Minute 30 vel chu kan kal tawh ang. Keimahni thian ho tawng lang lang thawm tih loh chu a reh ruih a. Ka vawikhat kalna anih vang nge ni ka ngaih a ngam zan lo a. Bena ruala kal ka chak a. Ani lah pek chu a hnung lamah Elijah te nen an awm a, Hriatkima hoin a hma ah kan kal thung.









" Nupui, ka ke a kham tawh e.. keichu " ka ti nang nang a, " lui kan pawh tep tawh ang, keipawh ka ke a kham tawh lutuk , kal hram hram rawh " atih chuan tui intur ka dil a. Ka ke chu kham tawh viau mahse, reilo tea han chawlh ka rawt rikngawt chuan , Nep min tih ka hlau ani. Bena lah chu Josi te nen a hnungah an awm daih bawk si. Ka beng chak eeeee..











" Hriata kan thleng tep tawh em? " Tlankim in a zawh chuan " 5 mins vel chiah ani tawh ang tiraw Remruat.." ati zat a. Remruata'n , " in ke a kham tawh ami, in chawl lawk duh em?" Atih chuan duh viau mah ila midangin thlen vat vat an duh zawk thu an sawi a. Ka zui ve dat dat tho.











Rei vak lo kan kal hnu chuan , "kan thleng e.. " Hriatkima chu a au lauh lauh a. Lui ani a, lung lian vak lo a awm rem rum a. Lui tui chu a fim hle a. Mahse ka hraitthiam miah loh chu hetah hian eng nge kan tih dawn tih hi ani.










" Heta kal tur ringawt hian mi, kan lo kal vang vang " ka ti nang nang a. " Erica mawl chawl lo nû, lui tui hi kan zawh phei zel anga.. lung te hi kan khawk anga, chakâi kan chhit ang." Remruata chuan ati a. Mawl min tih hmel takzet.









Midang ho pawh an lo thleng chiah a mahse Bena ka hmu tlat lo. " Khawnge Josi hi " mak tih hmel zet hian Lindai chuan ati a. Ni dawn tak Josephinei pawh a awm lo tak. " A zun a chhuak a, Bena a in nghah tir lawk anih kha an lo thleng ve tep ang " u Jessi chuan alo chhang a. An vaia lo nghah mai awm ania. Bena ber kher a innghah tir kha ka lawm lo. Bakah Bena pawh chuan enge alo dh reng reng ni. Elijah te pawh an awm reng tho a.











Tui chu ka khawih chhin a a vawt reuh khawp mai. Hriatkima chuan " Bena te nghak lawk ila, lui dung kan zawh dawn nia u aw " atih chuan kan pawm tlang khawp mai. Kei leh lek phei Chuan ka bialpa leh midang mal tlat tir ka duh teuh lo. Ramhnuaiah leh nghal.










Fiamthu te thawh in kan nui dar dar a. Rei nghah an ngai lo Bena te pawh chu an lo thleng a. Josi chuan , " guyss min lo nghak rei em, ka kal chak thei bakwas si lo a" ati nang nang a. Bena erawhin min rawn en zawk a. Ka melh rei duh lem lo thung.










" Kal nghal ila, ti ru.. zan lamah spot kan duh bawk si " hmeichhe ho chuan an ti ve a. Kan kal mai. Bena chu ka bul chetah alo kal reng a. Ka hah em min zawt reng bawk. Ka hah lo thuin ka chhang let zel a, ka tawng peih vak lo .










Josi chuan Bena chu a be sauh sauh reng a. A te leh that thin . Josi pawh a vawikhat kalna ve tho anih hmel , a zeilo em mai. Sava hram ri chiah chiah hriat tur a awm reng a, thla te kan la nasa a. Instagram a post tur thla te kei pawhin ka la a. Mahse signal a awm lo thung. Ramhnuai pil ril anih vang te pawh ani ang.










YouTube a dah tur Nupuii pawhin a vlog a. Nupuii hian youtube channel a nei ve a, Pathian zarah a video te hi hluttu a nei ve nual a. Amah vang liau liau te pawh kan ti thei ang chu kei pawhin mipui hmelhriat ka ni ve a. Mahse public figure han nih chuan haters te kan ngah ve a. An tawngkam an duh Uluk lo si , zinga mi pakhat lek ina thalo zawnga comments te a lo hnutchhiah hian ka nileng hun hman ati nuam lo phah thin .Ka la naupang bawk si a. Instagram velah hian ka duhtawk , youtube ah hi Chuan ka hma hun chu ka hrelo a, tunah hrih chuan tih ka tum lem lo.










Lung nal nge enge ka rah palh ka hrelo leiah chuan ka invaw hnawk a. Ka mal ka sawh a, midang ho an au that. Bena chuan min lo buaipui vat a, " i kalna en ta che " ati that a. A aw chu a vin lam mah mah ani , ka lo beisei ai chuan. Midang pawh chuan ka that leh that loh thu te min lo zawt luam a. Ka that thu ka sawi chuan an kal chhunzawm mai bawk.









" Mate i tha tak tak maw? Chawlh zawk i duh lo ami " Nupuii chuan min ngaihtuah hmel zet hian ati a. " A ngailo ka tha lutuk a nal deuh hlek a" ka ti zawi sap a. Josi pawh chuan min kalsan lo a. Min lo thlek ve bawk.











" Ka pua ang che aw.. Pitarte , aih ti Suh " Bena chuan ati nung nung a. " Ka kal thei alawm ka ngaihtuah awm loh, i hah ang " ka ti ve bawk a. " I tha tak tak ang maw? " atih leh pawh chuan nui sangin ka buk khum nghat nghat . " Anih i ke a kham hunah sawi la ka lo pua ang che " atih leh chuan , midang ho chuan nghal min ti hlawm leh pek hle a. Kei pawh chu ka Zak ve det.










Midang ho chu kan zuk pawh a, Remruata chuan
"Hetah hian hmeichhe ho lo awm ula, mipa hoin chakai kan zuk chhit anga, nangni eitur lo siam ru " atih chuan , U Jessi chuan a kal ve châk thu a sawi a, Josi pawh chuan a zawm ve zat.











" Alo kal duh kha chu lo kal Ula, ei siam tur kha lo awm ula aw mahse" Hriatkima'n atih leh chuan Josi, u Jessi leh Nupuii chu kal an tum a. Kal turin min ti mahse ka ke a nat deuh avangin ka hnial thung. Bena chuan min ngaihtuah hlawm deuh ani ang mipa pakhat tello a kan awm tur chu, " tu emaw tal kha maw ve ula, an mahni chauh a dah ringawt chu" atih chuan " nia , an lo hlau palh vel ang , ka lo awm mai dawn em ni " Elijah chuan ati a. Midang ho pawh chu an pawm tlang ani ang.










Elijah , Linda leh Tlankimi hoin kan lo awm a. Kan awmna chu a thim mup a, ka thau ah min man deuh tlat . Elijah awm lo phei se chuan ka ngaih a ngam lo tawp ang. A fel ka ti takzet , dik tak chuan a kal châk ve dawn tho a mahse min ngaihtuah a, bakah a inngaitlawm ka ti hrim hrim.









Mei kan ti alh a, chaw hmeh tomato vel kan chan a, noodles kan siam dawn ani. A awlsam ber a , a tha takzet . " Linda signal a awm tawh em " Elijah in a tih chuan Linda chuan a phone a en vat a. " Ala awm lo.. kan awmna hi a pilril bawk em alawm, " ati nang nang.










Reife kan awm tawh a , eitur kan siam zo tawh a. Elijah chuan " tih tur ang kan ti zo tawh bawk a, kan thiante kan zuk pawh dawn em ni..nang ni pawhin Sangha man lai te chu inla hmu lo ang chu.." atih chuan , kan yes a. Keipawhin kal ve ka duh.










" Ka zun a chhuak eee... mahse zun phawt ka duh " Tlankimi chuan ati a. " Saw lai ah sawn zuk zung la kal hlat vak pawh a ngai lo" Elijah chuan ati a. " Rica min va kalpui lawk peih em " Tlani bawk in atih leh chuan ka kalpui tur thuin ka chhang mai a.











" Linda lo va kal ru , kan rawn um ang che u " a tih leh chuan , " in lo kal thei dawn em ni, in pahnih chauh te chuan " Linda in ati a. " Kal thei tehreng mai, lui dung kan rawn zawh mai dawn lawm " Tlani'n ati leh a. Kei pawh chuan " nia.. kan rei dawn hleinem " ka ti ve bawk.










Ngaih ngam zan lo chuan an kal a. Kei ni pawh ramhnuai lamah chuan kan lut a. " Saw laiah sawn ka zung mai ang , awii a chhuak tawh lutuk " ati a. A tlan awn awn a ka nuih ati za reuh tawp.










" Ngawi teh helai hi chu a hnim em mai saw lai lawkah sawn kal leh ila " Tlankimi chuan ati leh a. A hnim viau tak tak a. keipawh ni ila ka zung ngam tawp lovang, ramhnuaiah chuan kan lut zel a. A hnu ah chuan zunna tur rem deuh a hmu a , a zung ve mai bawk. A zung zawh chuan alo nui var var phei a, " I zung ve dawn lo mi, ka thaw huaiin ka hria ka ip nasa tawh lutuk a" ati a. Ka zun a chhuak ve tho bawk nen, nakinah remchang a awm tawh loh takin zung ve mai tha a ka hriat vangin " nia , ka'n ti nghal law law mai ang min lo nghak lawks aw," ka tih Chuan hmanhmawh lo turin min hrilh a. Keipawh chu a zunna hmunah chuan ka kal ve mai bawk.









Ka zun zawh chuan Tlankimi awmna lamah chuan ka kal a, " I zung tha thei maw?" Nui var var hian alo ti a. Buk khum nghat nghat in ," kal ila tiraw, min lo ngaihtuah ang , kan kal hla reuh si" ka ti a. Hma a hruai chhunzawm zat.










Tlankimi chu ka zui ve zel a, " ngawiteh helai hi ka theihngilh khawi lam zawk hi nge kan lo kalna kha" Tlankimi chuan ati a. Ka en chuan kawng peng pahnih hi alo awm a, keipawhin ka hre tawh miah lo kan lo chhuahna zawk. " Awii..ka hre tawh miah lo tlan..engtin nge ni ang " ka ti a. Vawikhat mah ramhnuaia la kal ngailo tih takah ho teah pawh ka Phu deuh suih suih reng kha ania. Ka hlauthawng chu ani leh der tawh.










" Lungngai suh , helam hi niin ka hria kal ang " atih chuan keipawhin kan lo kalna lam kha ang in ka hria a. Ka zui ve mai bawk. Kan kal zel a, engtin nge ti em em hi kan lo thlen theih zawk ni. " Tlan...a dik meuh ang maw , kei chu engmah ka hre tawh lo ania, ka zui mawl tawp che " a khat tawk in ka ti reng a. Ani lah chuan lungngai lo Turin min chhang reng thung.









" Ahhhh!!! a van mak em em heihi kan kalkawng kha ani tawh miah lo " atih chuan " engaaaaaa..." Ka ti that a. " A mak ee, helai thingkung hi kan lo kal khan kan hmu lo hrim hrim " ati leh a keichu sawi ve tur pawh ka hre tawh lo. " Kal zel phawt teh " ka ti ringawt a. Ani pawhin hma a hruai leh mai bawk.










Reife kan kal pawh chuan khawia kan thiante thawm mah hriat tur a awm lo a. Kan bo tak tak tawh anih ka ring. " Tlankim keichu ka hlau ee.. a reh si a thim si " ka ti a, amah si chetah chuan ka kal a. Hlau lo Turin min ti ve bawk mahse amah ngei pawh chu a hlau tih ka hrethei a hawi hrek hrek zel a. Ka thinphu chu rang zaih zaih tawh tak ani.









Ka phone bagah ka dah bawk si , Sana ka bun hlauh a a tihzia zawk a. " Dar engzat nge Rica" atih chuan , " dar hnih leh a chanve a pel tawh " ka ti mai a. Ka thiante'n kan bo tih an hria angem le. Bena chu ka rilru in ka koh mawlh mawlh a. Vawikhat te mah ramah ka kal leh ngai tawh lovang.









" Tlankim tah hian thu chawl lawk ang ka ti thei tawh ngang lo " a ngen in ka ngen tawh, ka tah lah chu a chhuak em em leh nghal a. " Saw lai thing hnuaiah sawn kan thu dawn nia, tah hi chuan thosi an tam emai" atih chuan ka zui ve mai bawk.