ETERNITY LOVE CHAPTER -3

Episode kal lai dah luhna

Moderator: writers

Zaikawii Budelh
Posts: 170
Joined: October 22nd, 2021, 7:23 am

ETERNITY LOVE CHAPTER -3

Unread post by Zaikawii Budelh » October 2nd, 2023, 10:16 pm

ETERNITY LOVE




STORY



OF


ZAIKAWII BUDELH 💚






CHAPTER-3















U Bawihbawiha te in ah kual leh phawt in handpump kan dah kawi a, chi lei tur kan zawn kual leh fe hnu ah huan lam ah kan let thei ta chauh.U Sangpuia chu a ngawi ngul a, min fiam emaw, min chhaih emaw pawh a tum lo.Kan tlan nghawr zawng chuan ka kut chu a rawn na leh deuh zawk thin a,


" Tlan muang deuh la!"


Ka tih chuan a tlan muang ve mai a, a kawng ah nghet zet in ka kuah ran tawh.Kawng tluan in kan inbe tawh lo a,kal lam aiin let leh lam kawng chu a thui riau in ka hre bawk.Huan kan thlen phei meuh chuan sangha pawh an lo man tan tawh a, dil pakhat zawk ami phei chu an lo man zo der tawh.U Sangpuia chuan thlam thleng min thlah chho a,Pa Ben-a tih loh chu thlam ah chuan midang tumah an awm lo a, sangha man turun an lo chhuk thla vek chu niin , thlam atang pawh an thawm a tha ngang mai.Nunhlimj leh Ngaihawmi te chel chul thawm ka hriat phei chuan ka za cheng a, ka man ve chak teh a sin.




Thlam namthlak ah chuan thu in an sangha man lai vel chu ka thlir dauh dauh a, U Sangpuia pawh chuan chhuk ta nge pawh a ti lem hlei lova.Thutthleng ah chuan thu in phone a khawih mual mual a, keimah vang a chhuk lo anih te ka ring leh hnu hnawh!



" U Sangpui?"


Ka tih chuan rang zet in ka lam a rawn hawi a, engmah phei chu a sawi chuang lo.


" I chhuk ve dawn lo mi?"


Ka tih chuan


" Dawn e!"


A lo ti mai a, a phone bawk chu a en leh nghal daih.Rei lo te ah midang ho pawh chu an rawn chho dual a, kan accident dan vel te min zawt in min khawngaih ang reng viau a, a bik tak in Nu Nipuii chuan min ngaihtuah leh zual.



" Sangpuian kan accident a tih khan kan lo hlauthawng hman lutuk a, na lutuk I neoh loh chuan a that hlauh chu"


U Bawihbawiha chuan a lo ti ve a, min ngaihtuah na awka ka hriat ringawt pawh in ka dam nghal sawng sawng thei in ka hria.


" Tak a, nichin deuh lawk khan I putean a rawn call a, damdawiin ah an admitted ani awm e.... An chhuah hma chu kan inlam ah i rawn awm rih mai dawn nia!"


Nu Nipuii chuan a ti a,


" Nga tinge an admitted a?"


Ka lo ti ha...


"I pitei hb a hniam lutuk a, a typhoid bawk ani awm e.... mahse ngaihtuah awm ani lo e, ni hnih thum vel an awm anga a zia chho mai ang"



Nu Nipuii chuan a ti leh mawlh mawlh a,keipawh rilru nuam tak chuan ka awm ve leh mai bawk a.Ka thiante pathum chuan min khawngaih ngang mai, ka ban vei lam ani hlauh a, a zia deuh.Mi dang ho chu an chhuk thla leh tawh a, U Sangpuia pawh U Zorinin chhuk ve tur a a tih tlat vang in a chhuk ve a,ka thian te ho erawh in chhuk an tum tawh lo nge ka bul ah an awm ve ta reng a, chhuk tur a ka tih pawh in an duh tlat lo.Ka eitur lei te chu bawl in kan ei a, thlam namthlak tang chuan U Bawihbawiha te ho che tla lai chu ka thlir reng a, thian ho tih tak ah phai bial chhung ah chuan an in fiam nasa ve hle a, mipa infiam duh dan hi chu a dang bik teh e.




U Sangpuia leh U Bawihbawiha chuan U Ruatsang a chu an zawn a, pa ho chuan an bawl thiam bawk nen dil chirh dum zet ah chuan an theh thla leh lawp thin a, an thawm pawh a tha ngang mai.U Sangpuia pawh a nui a nui leh thei tawh a,U Ruatsanga nen chuan a in chai leh thuak thuak thin a, kil khat a U Zorini leh U Bawihbawiha awm tlang leh thin chuan ka mit an ti kham deuh tlat thung.U Sangpuia sangha man ka thlir reng lai chuan a rawn hawi chho thut a, ka phu chiang teh a sin! Ka en tih pawh ka inhre miah lo lehnghal!




Tlai lam dar 3 rik dawn ah an man zo thei hram a, phai bial a len bak a, dil pathum ami lai an man a, sangha pawh thahnem tak ani.Pa ho rawngbawl vek kan ei a, Vawksa ,bawngsa leh Sangha a awm a,duh ai a tam ei a awl ngang mai.Zan lam a inkhawm tur te kan la nih fur vang in muang chang lo in zanriah eikham velah kan haw a,U Sangpuia te ho erawh zanriah eikham hnu ah ka hmu leh tawh miah lo a, khawiah nge ang tih pawh ka ring thiam lo.Kan in ah kawiin ka thawmhnaw kan la kawi a,ka thiante ho phur lutuk chu nuih a za zawk.Ngaihawmi leh Muanawma riah ve talhan tum a, an tum ruh bawk nen Nunhlimi te in ah chua riahkhawm min phalsak ta ringawt.



Zan inkhawm ban ah Max-a pu pu Mawia, vawiin a kan exident chhan ber ui lian pui nei tupa kha a rawn leng a,phai chhung a rul lut a umna lamah kei ni nen khan kan lo in tawk fuh ani awm a, a mah la chu a inthiam lo em em mai leh nghal a,thupha a chawi mawlh mawlh reng a, pawisa min pek te a tum thul! Pa uang ve thei tak mai ani a,keini pawh in kan ngaina viau bawk a, anihna tak ah chuan a Ui pa Max-a pawh hi ui kawlh leh sual ani hran lo a, a à ve deuh tih mai loh chu han sawi sel na tur a awm hran lo.



" Harsatna i neih chuan min hrilh dawn nia, a zia lo e mai! Lo na palh ta ula , ngaihtuah pawh ka ngaihtuah thui ngam lo!"



A ti mawlh mawlh a, pa upa lam tawh ani bawk nen a inthiam lo lutuk chu ka lo inthiam lo let zawk.Rei ngial a len hnu ah a haw ta hran a, keini thian ho riahkhawm tum tih tak ah kan muhil hlei thei lo a, kan inchhiah nui uarh urah rengmai.A ban na ber a sir ah ka mu a, a ngaj te bawk in Nunhlimi leh Ngaihawmin a kil a mut an in chuh leh a, a tawp ah kan mipa neih chhun a lai ah a mut phah ta kuk a, a sawi buai lem hlei lova.




Ka ban na deuh vung vung chuan min ti harh a, ka harh chian tak ah chuan ka ban na lam chu ka lo delh reng chu niin,harsa deuh chuan ka tho tuah tuah a, ka thiante ho mang chhiat zia ka hmuh chuan ka nui leh rih a, ka zun a chhuak deuh bawn nen thawm dim zet a thho chhuak in bathroom lam chu ka pan a, sitting room chhuat a mu kan nih vang in bathroom hi a va hla ve deuh a, Nunhlimi te in hi a zau ve hrim hrim bawk a.




Bathroom atang a ka chhuah leh rual chuan Pawn lam ah chuan inbe thawm niawm tak hi ka hria a, a tir ah chuan ka hlau deuh a, ka ngaihthlak chian deuh hnu ah U Sangpuia aw ani tih ka hre leh hnu hnawh a, hlauh chu khawi lam ani ringawt.Kawngka pui lam chu pan pheiin tawng chu ka ngaithla chiang deuh a.... Phone ah mi a bia tih ka hre thei bawk...Kawngka bul turverh parda inzar chu ka keu dek dek a, U Sangpuia hnunglam chu chiang lutuk in ka hmu thei a,



" Eng tik laiin nge maw a inthlak hman le?"



Ka ti deuh sap a,chiang lehzual a ka en chuan zial a zu tih ka hmu thei.




"Ka lo inngaihtuah tha leh dawn nia!"


A ti deuh nghut a..a sawi zawh rual chuan a phone chu a off a, a zial ken lai chu atui tih hmel zet in a fawp leh nghal vang vang bawk.Van lam chu thlirin ngaihtuah tam hmek zet in a thaw chhuak ham ham a,ka rilru ah sual a lo lut a,tih thaih ka chak ta tlat.Kawngka chu kan la kalh loh vang in dimte in ka hawng a,kawngka inhawng ah chuan thawm dim thei ang ber a chhuak them them in muang chang in U Sangpuia dinna lam chu ka pan phei a, a hnung lam atang a barakhaih tum a ka intih tuah vel mek lai chuan a mah zawk chu a rawn in hre thut a




" Awi Setan !"


Ka ti chhuak that!Ka thinphu dat dat chu ka dawm vang vang a, ani erawh a awm dan ngaiin a awm reng a, phut pawh a phu eih lo hrim hrim.Min hmuh rual chuan a kiai deuh suk a, mak deuh in chu chuan ka thin a ti phur rang tlat.


" Eng tin nge i phut miah loh theih zawk?"


Ka awm la dawm reng chung chuan ka ti a.. thawk ka la pah halh halh bawk.Tawng ka a min chhang ta mai lo chuan a hnung a scooty chu a kawk a, Side glass atang min lo hmu thei vek chu niin ....


" Han phut der ve tal awm!"


Ka ti deuh hlak a, a lo nui ri deuh suk.


" A hrim rimin tinge I va rawn haw tlai ve !"


Ka tih zawm leh zat a


" A pawi a mi?"


A lo ti deuh hluk.


" Aw pawi!"



Ka lo ti vat.A hmel chu ka en chiang a,a mitmeng chu a sen deuh run a, chuan zu rim ka hre thei bawk!


" ZuIin ani maw?"



Ka ti leh a...


" A pawi a mi?"


A lo ti leh a, a tawng leh tak ah chuan a rui tih hai rual ani tawh lo...



" Pawl 12 pawh ila pass loh kha, tinge zu te i in a, Pa Ben-an hre tase engtin nge i tih ang...? I tawh miah suh! Bak ah hrisel...!"



Ka tih leh mek lai chuan min din hnaihthut a, a sang bawk nen a thinzawn ah chuan ka mit a awm a, a mah en tur chuan ka dak chhuk nghal ha a, ani pawh in min lo melh chhuk ve run a.Tum dang ang lo tak in ka thin a phu dawt dawt a, ka zam ani ber.Tawlh hnu ka tum lai tak in ka kawng ah a rawn chelh thut a,a taksa si chet in min pawt hnai nghal bawk...



" Hey, eng nge i hriat a?!"


Tih pah in nam sawn ka tum a, ka kut chu a kut lehlam chuan a rawn man hmak a, ka kut pakhat chiah ka hman theih vang in ka tan awm sawn ngaihna a awm tawh lo.Ka kut na lo lam chu ka kawng a a kuahna kut chuan a rawn man bet a, eng emaw hian min mawlhna, tal chhuah na chang pawh ka hre lo.Ka mit a min en reng chung chuan ka sam uai thla chu ka beng ah muang chang in a rawn zep a, ka chil ka lo lem khawlh!


"U Sangpui!"


Ka ti sap a, a kut chu sawn in ka khabe ah chuan a dawm leh a,a kut zungpui chuan ka khabe chu a nul hauh hauh a,rawn kun hniam ruai ruai in ka hmui zawn ah chuan a tawp chat a, ka thin phu chu rang tih piah lam ani.Ka tal deuh aih a, ka kalsawn hlau niawm tak in min kuah nghet sauh a,min fawh tum niawm tak a a rawn awm hnaih chuan na deuh in ka mit ka chhing ringawt a, ka khup tha te chu a zawi nghal vek!


Ka rin loh lutuk in ka dar ah chuan a chal a rawn nghal a... Hahdam huai nuiawm takin a thaw chhuak nghal ham ham a,


" Che suh , ka lu a vir a nia"


A ti deuh hluk a, nghet lutuk in min kuah nghal hlu hlu!Rei ngial min khuah hnu chuan a mah zawk chu a in la hrang a,min khuahna chu phelh in ngun zet in min en leh a...



" Ka rui tih hi ka pa hrilh suh aw"


Ti sup in ka biang ah chuan na lutuk in a piai vak a..


" Muttui!"


Ti sup in inchhung ah chuan a lut nghal vut a,kei erawh ka ding khawng reng ringawt!Ka thin a phu dawt dawt a, ka biang a sat bak ah ka khup tha te chu a khur dar dar a, a chhan ber pawh ka hrethiam lo.Eng tia rei nge pawn ah chuan ka din ka hre lo....


" Tah khan i ding reng dawn mi?"


Rawn ti tu aw chuan ka ngaihtuahna atang chuan min ti harh zawk a, ka hawi let nak chuan U Sangpuia chu Kawngka bul ah chuan ding in min lo nuih vur vur a...


" Fawh kher lha i duh tihna mi?"



Min fiam pah a a tih chuan


" Ngawi hmak rawh!"


Ka lo ti deuh hlak a, pa lutuk in a kiai leh suk! Lawk! Tun ah khan hepa hi pa ka ti a maw? Ani thei dawn em ni?Ka ngaihtuah na chu duh lo in ka lu ka thing nawk nawk a


" Tenawm lutuk!"


Ka ti nghal hlak!Rum zet a U Sangpuia chu melh deuh ram ram in ka kal pel hmak a,a phun deuh hluk ri chu hre mah ila ka kal ngaiin ka kal zawm a,ka mutna ah chuan mu thla in ka puan sin lai chuan ka in khuh hmak a, U Sangpuia ka star loh nan ka tawngtai nghal mawlh mawlh bawk.







( To be continued)


(Naktuk zan ah kan zawm leh nghal dawn em? Chuan,kumin Christmas khawiah nge in hman dawn!?)




Adds click kha aw....



Link:
BBcode:
HTML:
Hide post links
Show post links

Zaikawii Budelh
Posts: 170
Joined: October 22nd, 2021, 7:23 am

Unread post by Zaikawii Budelh » October 3rd, 2023, 10:40 pm

(ZAWMNA)







Cooker phit ri sar sar leh thleng in khawng ri rak rak chuan min ti harh a,ka puan sin chu hlim in ka hawi kual a, ka mit chu ka nuai nghal chat chat bawk.Ka pindan a ka harh loh vang chuan ka bo dawn dawn a,ka harh chian deuh tak ah chuan ka awmna hmun chu ka hre chhuak thei ta a, ka kiang a ka thiante ho mu chu ka en vat a,an la mutui hle tih a lang reng.Tukverh parda inzar phui deuh mup vang chuan ni a chhuah tawh leh tawh lo a hmuh theih lohva,choka lam a ei rel thawm ka hriat vang chuan a hma vak tawh lo anih ka ring ve tawp.Ka mutna atang chuan tho chhuak in choka lam ah chuan ka phei a,nu Nipuiin min hmuh rual chuan nui var var chung a min lo bia in thingpui ka duh leh duh loh min lo zawt a, ka duh loh thu in ka lo chhang vat.



" I kut chu eng nge a an a?"


Chawtani tur chan mawlh mawlh pah chuan a ti a


" A zia tawh lutuk,khawih fuh loh phei chuan a na tih pawh a hriat tawh loh!"


Tiin ka lo chhang vat.Puih duh viau mah ila engmah ka tih a phal lo a, phal pawh nise eng vak mah tih theih ka nei rih tlat lo.Dawhkan kil chuan ka thu ve ta reng a,Nu Nipuii rawng bawl lai chu hmuhnawm tizet in ka thlir reng ringawt.Nu Nipuii sawi dan chuan pitei te chu nilaini vel ah chauh an rawn chhuak thei dawn a,chawhnu lam ah pute a thawmhnaw la turin a rawn haw zuaih dawn bawk.Pitei chu ka ngaihtuah ang reng viau mai a,tun tum a dam lo chu tum dang a ang tlat lo ani.



" Zualte kum engzah nge i nih tawh?"


Nu Nipuii chuan min zawt deuh thut a...


" 15 ...kuminah ka pum chiah!"


Ban deuh charh chuan ka lo ti a, a zawhna min zawh teh deih chu ka beisei loh lam lutuk anih vang te pawh ani mahna.


" Kum 15 lai ilo ni ve tawh a nia...I nula ve teuh tawh mang nge!"


Nu Nipuii chuan a ti deuh hluai a.


" Ka nula tawh a lawm!"


Ka lo tih deuh hlak chuan


" Nie nie"


Tiin a nui chhuak hak hak.


" I nu kha la damse chuan aw.... a duat che awm mang nge"




A ti vang vang a,a aw a lunglenna niawm.tak ri chhuak tel chuan chhung ril ah hian min fan raih raih thei.Nu Nipuii leh ka nu kha an inkawm nasa thei hle a, ka nu naupan lai leh sikul kal lai thlalak vel en phei chuan an inkawm nasat zia a hriat hliah hliah.Nursery atang College thleng an zir dun a,Nursing zir dun leh in Nu Nipuii zawk hian pasal neih a tum tak vang in nursing kha a zir zo thei ta lo a,a pasal neih tum ,a neih leh tak loh pa pawh kha kan khaw mi tho hi a ni a,an hausa hle bawk.An inneih leh tak loh chhan kha hrechiang lutuk lo mah ila, kan khaw mi thenkhat te sawi dan hmang ah chuan a pasal tur chhungte kha mi hausa chhungkua an ni a,phai lam ah hnathawk turin a awm bo reng thin bawk.Nu Nipuii nen an inneih hma ni in a pasal tur chuan hmeichhe dang lak ah fa a nei tih an hrechhuak leh si a, a sawn thlak na nu chu a inpuang ani awm e, chumi vang a innei leh lo chu an ni tiin an sawi a mahse, kan pianna a la rei lo em a,chupa chu khua ah a awm ngai lo bawk nen kei phei chuan hmuh pawh ka la hmu lo.




" I kut a na sia i inkhawm thei lo ang a"




Tia min biakna chuan ka ngaihtuahna atang min kai harh zawk a




" Àaaaaa ka la kal kim ve sia, inkhawm hram ka duh!"


Ka tih chuan a nui var var a ....


"A that hlauh chu,,, I pa Ben-a hi lo haw se, chaw kan ei vat dawn nia!"



Nu nipuii chuan a ti leh a..



" Aw le!"


Tiin in phihfai turin bualin lam pan in ka phei a,U Zorini dawr kal pawh a rawn thleng ve chiah.


"U Tluangi a tho har lutuk a, ka rei phah vek a lawm"

Bualin a ka luh hma deuh chuan a tawng ri chu ka la hre pha ruai ruai a,


"ka kal leh nghal mai dawn sin, rawngbawl pui te an ngaih tak in"


U zorini bawk chuan a ti leh a



" Aw le... Inthlakna te kha keng nghal la, rawn haw lwh ai chuan"


Nu Nipuii chuan a lo ti vat a,


" Nia, a tichi ohian ang"


U Zorini chuan a lo ti ve leh a, kalsawn thawm niawm tak ka hre zawm nghal zat.Bualin atang a ka chhuah chuan ka thiante ho pawh an lo tho tawh a, Nunhlimi mutkham lo hmel chu tha lo ve tak ani.Nu Nipuiin Ngaihawmi leh Muanawm a chaw ei nghal tur a a tih chuan



" Min sawm lo mah la ei kan tum sa hrim hrim a!"


Muanawma chuan a lo ti khauhva... Nu Nipuii pawh a nui tawp.Muanawma hi thian ho a kan awm chang tih loh ah chuan a tawng tam lo hle a, mi biang biak a thiam loh bak ah a tawng chhun ah a tawngkam hi a na thei hle a, tawng tlem viau e ti lo chuan tawngkam bungrua erawh a neitha thei viau thung.Chaw ei kan siam fel vek tawh hnu ah U Sangpuia pawh in thophang tih hriat zet in dawhkan a rawn kil ve a,Nu Nipuii chuan a lo be sawm vat a, U Sangpuia pawh in zangkhai deuh deuh chuan a lo chhang a, Nu Nipuii leh U Sangpuia hi thisen ah inzawmna an nei lo tih hresa lo phei ila chuan,U Sangpuia nuhrawn ani tih hi rinngaihna ka hre hauh lo ang.



" Zorini chu Bawihbawiha te in ah chuan chaw chu a ei ta mi?"


U Sangpuia chuan an tui hang suah pah chuan a ti a, a thusawi chuan ka beng a verh teh a sin.


" Aw , Mafeli khan nizan atang a sawm tawh a,kel sa kan siam dawn ati in ka hria"


Nu Nipuiin a tih chuan


" Kel sa an siam maw?"


U Sangpuia chuan a ti deuh ha a, mak ti hmel a put bak ah lungawi lo hmel a pu tel deuh bawk.


" Kel sa an siam a Zorini chiah an sawm a maw?"


A ti deuh hluk a,hepa pui hi a thinrim tak tak a mawni le?


" Anih hmel! Zopuii te chu mi biang biak a thiam a,taka Bawihbawiha nen hian an inngaizawng ve deuh em ni? An inzui nasa riau in ka hria!"



Nu Nipuiin a tih chuan ka thil ei lai chu ka hak bawrh bawrh a....


" Va thing reuh tak!"


Tih deuh hluk pah in U Sangpuia chuan tui intur min rawn pe a...Rang lutuk in ka lo ban nghal vat.


" U Zorini te chu I bialnu ani lawm ni U Sangpui?"


Ngaihawmi chuan U Sangpuia chaw bar mawlh mawlh chu a zawt ha a, kan hriat dan kha chuan U Zorini chu U Sangpuia bialnu ani miau ani...


"In rin dan dan khan lo ring mai mai teh u, bak ah nang ni thian ho hi, ngaihzawng ngaihsak rual pawh in la ni lo, naupang in la nih kha naupang"



A mal te te a min kawh den den pah chuan a ti a....



" Nang pawh!"



Ka lo ti hlak.Min ngai naupang chhia thei lutuk hi ka ngei thin, mahni lo mah a inlak nulat ve tawh nak lai in.



" Ngaihzawng neih te chu a pawi hlei nem.. mahse,Pathian hriatpuina ni thung se la ..... "



Nu Niouii chuan a lo ti vat a...



" I hria maw chu!"


Tih pah in U Sangpuia lei ka chhuah khum zeuh a, Pa Ben-a leh Nu Nipuii an nui nasa ngang mai.


" Chaw hnu lam ah I putean thawmhnaw a rawn lak dawn kha I hria em?"



Pa Ben-an atih chuan ka hriat thu in ka lo chhang thuai a...


" I kal ve lawk duh em, zan inkhawm hman in kan haw leh dawn nia"



A tih chuan rang zet in ka lo aw a, pitei ka hmuh chak tawh bak ah ka lung a leng deuh a,ka thiante inah chuan riak fo mah ila tun tum chu a dang tlat a, kan in ah tumah an awm lo ani tih ka hriatna ringawt pawh hian min ti khingbai hu ani ber.Chaw kan ei kham a,Che tur kan awm nual vang in Nunhlimin min inthlak puia, thawmhnaw hak harsa lutuk ber hi ka buaina ber ani a, thil dang erawh han harsa lua a awm lo thung.Pindan atang a kan chhuah rual chiah chuan U Bawihbawiha te pawh U Sangpuia sawm tum niawm tak in an rawn inzui lut a,U Bawihbawiha chu a chhe lo ka ti thlawt.




Kamiz dum dak zet a nawh mar a ha a,a ban chu a kiu thleng vel in a thlep chhona, kekawr lei rawng ha in smart shoes dum a bun bawk a, chhe lo tih tawngkam hian a sawifiah zo lo hial zawk in ka ring.A lu buk lam deuh mah chu mumal vak lo in a tlu siau a,a mah a sang bawk nen ka mit ka la sawn thei meuh lo chu ani e..A hnung ah chuan U Zorini a ding ve reng a, U Ruatsanga nen chuan an inbe mawlh mawlh bawk.U Zorini pawh nidang ang tho in a chhe lo leh hle a, ani zawng makeup pawh inhnawih miah lo mahse a hmel hi chu a tha em em reng tho mai.





Mi tla lek lek a ka en reng lai chuan U Bawihbawiha chu a rawn hawi thut a,min hmuh rual chuan nelawm zet a nuiin ...


" In va chhe lo ve kha! Ka hai dawn che u a lawm!"



A ti deuh hluai a, chu ringawt pawh chu nileng awm nawmna tham a tling leh der tawh.Lai deuh chuan Nunhlimi hnung ah ka kal a, U Bawihbawiha te zawn kan thlen phei lai chuan a rimtui zet chu ka hrethei a, ka à lo chauh ani ber e.




" Sangpui i hman tawh em?"



U Bawihbawiha chuan a ti lang lang a,


" Aw!"


Rawn ti lauh in U Sangpuia chu inchung atang chuan a rawn chhuk thla a,Ani pawh a thawmhnaw hak chu ainhmeh lehpek hle! U Sangpuia hi chu ngei viau mah ila hmelchhia tia han sawi mai theih chi chu ani hauh lo.Pa Ben-an Motor a keng a, U Sangpuia leh U Ruatsanga an inphur a, U Zorini erawh U Bawihbawihan a phur thung.Inkhawm dawn ah Nu Nipuiin nachhawkna min ei tir a, min chhawk deuh nge chawhma inkhawm chhung chu ka muthlu tluan thak a, inkhawm pawh engmah ka hre lo.





Champhai kal ve lawk ka tum vang in ka thian te ho chuan tuicheng turin lui lam ah min liam san a,ka kal ve chak dan chu pui tak ani.Kan in ah Pa Ben-an min thlah kawi a, ani erawh Committee turin a let leh nghal.Ka inthlak laiin putea a rawn thleng a,ka kutna a hmuh chuan min ngaihtuah ngang mai.Ka rinaiin a hmel hmuh a nuam a, pitei a dam loh chuan putea hi a dam lo ve nghal tluk ani a, a buai pui nasat thei em vang ani pakhat!






"Nilai ni hi kan chhuah theih hun tura an sawi kha chu a nia, a ai a rei pawh kan cham maithei bawk a...."



Thawmhnaw khung mawlh mawlh pah chuan putea chuan a ti a


" Pitei chu a na viau ami?"


Ka lo ti vat.


" Na viau lo e, amah tak phei chu aharh tha khawp mai, en tawp phei chuan dam lo pawh a ang lo, mahse doctor khan min admitted miau sia...... I hmu ang nga i hre mai ang... A sawi reng che a...."



Putean a tih lai mek chuan kan in kawt ah chuan motor a rawn pit oit vak a,





"U Ben-a a rawn thleng tawh aniang a"


Pitea chuan a ti deuh sup a,


"Ka bag ka la ang nga ka lo chhuak ang"


Tih pah in ka pindan ah ka lut a


" Rei lo la"


Tiin putea chu a chhuak hmasa a...


" Aw le.."


Ka lo ti vat.Ka pindan ah chuan lut leh in ka bag ah lian vak lo chu ka la a, ka sam chu chul mam leh thuak thuak in pindan chu ka chhuah san a, pawn ka chhuah rual a Pa Ben-a bolero var driver seat a chuang pa ka hmuh rual chuan ka ner nghal nang nang....U Sangpuia chuan min rawn thlek vht a,ka ner deuh nang nang hmel a rawn hmuh chuan a nui deuh suk a...Putea chu en leh in eng emaw an sawi dun mawlh mawlh a, a thil sawi tak erawh ka hre pha lo.



" Khawnge pa Ben-a?"


Tih pah in Motor lam chu ka pan a,



" An committee an rei deuh dawn a, Sangpuia hian min hruai zawk dawn anih chu!"


Putea zawk chuan a lo ti vat a...U Sangpuia ka en chuan a nui tih ka hmu thei a, eng vang te chaiin nge maw hepa nen hian kan intawn fuh theih em em mai le?


" Lo chuang vat ta che a tlai tawh a nia"


Rawn titu chu rum zet in ka melh a...






End of chapter -3



WhatsApp group link aw👇👇👇👇👇👇


https://chat.whatsapp.com/JsYT93BYvpSGrYzsv5SgFJ


(Naktukzan ka awl ang aw,infel chuan awllo maithei tho bawk a🤭🤭)


Adds click kha ,,,,,, chuan min lo comment sak ve ula ....

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)