Chapter-14
By Ziki nu
"Engtinnge maw a tih ni? A hma zawnga ngaina ngai reng renglo khan amah bak chu midang min duh tawh tlat silo a" tia ka nu tawng ri lang lang chu ka hre reng a, ka malchunga muhil mek hmeichhe naupang chu ka en vang vang bawk.
Damdawiin atanga an chhuah dawn khan keimah bak midang a duh lo a, a pa pawm takngial pawh duh lovin min kuah bet tlat a nih kha.
Hun eng emaw chen atang khan min enna mitmeng hi a danglam riauin ka hre thin a, min han duh thar ta ringawt pawh hi mak ka tih rualin ka ti lutuk lo.
Engpawh chu nise damdawiin chhunga Elina-i meng rang vel kha chu a hmuhnawm khawp mai, Martha-i hian vawiin chu min chhanhim a ni ringawt alawm.
Kan Shane pathlawia lah chuan ka laka a lungawi lohna sawi duh silo in min melh rum khui ringawt a, hetianga chhan pawh awm lo va a duh duh huna min haw leh ringawt zel hi chu a ngeiawm ve ngawt mai.
"Zanin chu hetah riak mai ta cheu, pindan ruak pawh a awm tho a" tia ka pa'n Shane a zawh chuan lu a lo thing nghut a, "A muhil tawh tho bawka kan haw zawk ange, a thuhrimah Zotei pawh nula te a la ni ve a, inleng te pawh a nei ve duh ang" a ti kher chu ka ngei khawp mai, a tawngkamah chuan han huat tur a awm hauhlo naa, a awri khan ngeiawm lam a pawl zawk tlat a tinni.
A fanu chu a hma lamah pawm betin puanin kan suih hman a, motor a khalh pui dawn chu a ni si a, an tlan chak lo tawp ang.
An kal liam hnu chuan thleng pawh Bawihtei'n a lo sil zo vek tawh a, ka chau tawngkhawng tawh bawka ka khumah ka bawk nghal thlawp a ni ber.
John ka hrechhuak leh a, ka phone ka dap zui rawk rawk bawk.
Vawiin ni ang te chu kan lawm dun theih khât tawh tehreng nen, a nilo lamah hlir ka pensan a, a lungawi lo ru viau a nih pawhin ka dem miahlo ang.
Phone ka en chuan a message a lo awm va va tawh a, "Chaw I ei tawh em?" tih te mai hi a lo ni.
"Lo leng phei la, ei tur te kan siam dawn em ni" ka tih chuan a seen rang khawp mai a, "Phei tawhlo zawk ang, I chau dawn sia, mu hma ve rawh" a rawn ti mai a, hetiang ringawt chuan ka awm a nuam thei dawn chuanglo in ka hria.
Khum atang chuan tho chhuak in banga ka kawrlum inkhai chu ka ban a, inhnuaia ka tlan thla dawt dawt chu ka nu leh paten min lo en chik khawp mai.
"Thenawm ah birthday kan lawm dawn ania" ka tih chuan min chhang lem lo a, John-a nen a nih chuan engmah phalloh an nei ngailo, an ring tawk thin a, keimah hi khawlo viau thin mah ila John-a bula ka awm chuan an ngaih hi a tha hle thin.
Pawn ka chhuah chuan a lo vawt deuh vur a, ruah tla sek chuan boruak a ti danglam chak khawp mai.
John-a nu in min lo hmuh rual chuan a lo phul hlut a, "I thianpa chu a inbual lawk anih kha, lo nghak rawh, vawiin lamah lah I awm dawn loh vang nge ni, picnic pawh a thulh leh ta daih a" a lo tih chuan ka huat tura sawi nilo mah se nuamlo ka ti ru ang reng hle a, ka chhang nawi khawp mai.
Mipa na na na chu ka nghak rei lo, "Pawn lamah kan ei chhuak dawn em ni?" a lo ti var a, a chhungte ka hmaizah deuh na in a nu leh pate ber chuan "Va leng chhuak ve rawh u, in inhmuh khat tawh tehreng nen" an lo tih avangin kan inphur chhuak ta nge nge a. Tunlai ka awmdan chu a tough ngar ngar thin khawp mai, han mut hahdam mai mai na hun hi ka nei meuh lo tak tak a, mahse zanin erawh ka thianpa John-a tan liau liau hun kan hmang ve dawn a, a pawi ka ti hranlo.
Ka hna lam te min zawtin a tawng bawrh bawrh reng a, boruak a vawh deuh avangin kan tlan chaklo khawp mai.
"I boss khan nupui a lo nei tawh a ni maw?" a tih chuan ka bu nghat a, min hmu theilo tih hria in aw te chu ka han ti leh hnuhnawh a, "A nupui chu sap ania, a boral hnuah helamah an pafa in an rawn let leh a" a tih chuan a khawngaih thu a lo sawi ve luam a, nupui tel lo va fa han enkawl ringawt chu a harsat hle a rin thu te thlengin a sawi kai chho a, chulam chu ka la ngaihtuah ngai hauhlo thil a ni.
"Ka la nei ve lo na in fa enkawl hi thil sawlsam a nih ka ring lo va, fa te kan han neih ve chuan a hmingin pa kan ni ve tawh anga, mawhphurhna a sang dawn khawpin ka hria" a ti charh charh a, "I sawi takah chuan a harsa ve ngawt ang" ka lo ti ve sap a, han sawi thui pui viau tur pawh ka hrelo.
Kawngsira street food an zawrhna bulah chuan bike a tiding a, ka chhuk rualin a helmet a lo phelh zui ve zat bawk.
A hmel hmuh nuam zeta min rawn nuih sang pahin "Engnge i ei duh?" a ti a, kan chaw ei na a la reilo bawk nen ka ril pawh a la tam vaklo.
"I duh duh a ni mai, keichu ka ril a la tam vaklo a" ka tih chuan a ngawi deuh vung vung a, ar bawp an lo hem mek chu pahnih a la a, a la lum vang vang mai.
"Hetiang hi chu puar lai pawhin a tui tho" a tih chuan kan nui dun hak hak a, a tui viau naa damdawiina Shane rawn ken kha chu a la tluk chuang lovin ka hria.
Ka thil ngaihtuah chu duh lo zetin lu ka thing nak a, hnathawh loh lai pawha kha mihring ngaihtuah chhuah reng kha ka duh miahlo.
Kan ei zawha kal kan tum leh lai tak chuan kan dinna ral lehlama Kima ni awm tak chu ka va hmu a, amah chauh a nih avangin a kalpui tur awm ang hmuh tumin ka hawi kual zui thuak bawk.
"Kan va kal dawn em?" ti tu chu ka en vat a, John chuan min lo en ve reng tawh, "A... A ngai chuang hleinem, mi pasal a nih tawh saw" nui chungin ka han ti ve ngial a, mahse ka va en leh chuan amah ah diklo a awm tih ka hria..
Ka awmdan chu a hrethiam a ni chek ang John chuan ka banrekah min kai lawkin kawng chu min kan pui a, Kima bul kan va thlen chuan zu leh weed rim a nam zui hak mai.
Kawngsirah thu in a ruih hmel hle a, nupui a neih tawh hnua hetianga ka han hmu leh si chu ka rilru a na dawn dawn mai.
A mah ka la duh vang a nilo, a nupui chu tupawh lo ni se tunah chuan pasal dinhmun a luah tawh a, reilo te ah pa a ni thuai dawn. A nupui leh fa tan mawhphurhna sang tak a nei tawh a, hetiang taka rui chhiaa a awm han hmuh meuh chuan rilru a na lo thei lo a ni.
"I tha maw thianpa?" tia ka bul ami in a biak chian thei leh theilo hian a rawn dak chho a, min hmu chu a hamhaih ve deuh in ka hria.
A hmai chu tuai pawkin rawn dinchhuah ve mai a tum a, John-an lo pui lo se chuan metal charah a tlu leh dawpin ka ring.
Ka hmaa a rawn din tak ah chuan a thuamhnaw te chu a beng fai thuak thuak a, chumi hnuah a kut pahnih chu bengfai lehin min chibai tum ni awm tak hian a kut a rawn phar chhuak a, a rui hle tawh a nih hmel.
"I van in nasa awm ve, zan a nih tawh hi I nupuiin a ngaihtuah lutuk ang che" ti mawlh mawlhin ka chibai ve mai a, a mitmeng sen rum leh a taksa tla dawk dawk te chu hmuh a hrehawm lam mah a ni.
"Kan tei harh ve lawk a ni hi" a ti ve tak nain a harh tha zan tawhlo tih chu a hriat reng, John-a chu a en vung vung a, a hre chiah lo aniang min rawn en lehin "I bialpa thar em ni?" a ti mauh mai a, "Ka thianpa a nih hi, kan thenawma awm John-a kha" ka tih chuan a han ri deuh hluai a, hre tak tak hmel phei chu a pu chuanglo.
"Zan a tlai hma in va haw tawh rawh thianpa, in nu pawhin a lo ngai tawh ang che" nui chunga tiin John chuan a darah a ben sak thak thak a, eng emaw sawi duh nei hmel a pu deuhin ka hria a, mahse John-a awm ve vang chu nge engmah a sawi ta biklo.
Pai khut khut chungin footpath ah chuan a kal zel a, a tlu lek lek thin chu ka awmhmun atangin ka lo tang leh teuh zel, a landan leh nundan khan min ti Hrehawm lo ka tih chuan dawt a ni ang, kha chen ka lo zui tawh mipa, ka thianghlimna hial ka lo hlan tawh mipa khatiang taka a tlachhia han hmuh mai chu mahni ah hrehawm tihna a awm ve lo thei lo a, a nupui leh a pum chhunga naute ka ngaihtuah tel phei chuan tihtheih nei si lovin pawi ka lo ti ve hle ringawt.
"Zopui.. "
Ka dar a rawn dawm rual chuan ka phu zawk a, John chuan zawhna mitmengin min lo en reng tawh.
"Min bia em?" ka tih chuan "I rilru ah engnge awm?" a lo ti let vat a, ka mitah tak min en vang nge rei pawh en duh lovin ka hawisawn leh thuai a.
"Eng teh vak mah, a nupui leh fate an khawngaihthlak reuh em a" ka ti zawi sap a, nuamlo a tih hlauin han sawi thui vak ka tum hranlo.
Kan tlan chhuah leh hnu chuan millennium Centre ah te kan lut kawi leh a, han lenkual vakna tur dang kan hriat loh vang a ni pakhat. Game khelin kan tum aia rei fe kan awm a, soft toys pawh pathum lai ka hawn nghe nghe.
In kan thlen leh meuh chuan dar 10 a lo ri der tawh a, John pawh lo lut kawi tawh lovin kawtzawlah kan in mangtha a, a kal hun a hnaih leh tawh avangin a phur lo hle tih ka hre ve kar bawk nen, a la awm ve chhung hi chuan kawm hlim ve hram hram a tha in ka hria.
Ka nu leh pa te pawh TV enin an lo la meng a, Bawihtei pindanah kalin ka thil hawn te chu ka pe a, nautelem leh hmeichhe thil lam hi ka lawm lutuk ngailo a, ka nau hian a ngaina hle thung a, ka thil pek pawh chu a lo lawm thiam khawp mai.
Kima kan hmuh thu ka sawi chuan a lo ngaihven rang ve khawp mai a, tawngkaa engmah a sawi ve theih miau loh avangin a phone a khawih zui neuh neuh bawk.
Kan hmuh dan leh a landan khawngaihthlak zet te ka han hrilh ve chuan a ni pawhin a khawngaih ve thu a phone ah a lo type a, rei deuh chu Kima chanchin ngawt sawiin kan titi nghe nghe.
Bawihtei hi a nula ve tawh a, a hmeltha in a fel bawk a, duh ngat se chuan ngaihzawng pawh nei rual a ni ve tawh. Mahse tawng lama harsatna a neih avang hian a ngaihsak ngai lo va, thian a kawm tamlo in mipa phei chu thenawma Mesaka bak tumah a kawm awm ka hre ngai lo. Thuruk engkim, ka rilru hahna leh harsatna ka tawh te, ka hlim ber lai te pawhin ka nau hi engkim hretu a ni thin a, Tu hnenah mah a sawi chhuak ngai lo tlat a ni.
Ka chau tawngkhawng tawh bawka khuma ka mut rual deuh thaw in ka muhil nghal a, zingkara ka alarm ri pawh chu meng hauh lo hian ka off leh mai zel a, vawi thum lai chu ka off tawh in ka hria.
"Bawihi.. Hei Martha-i te an lo kal ania" tih ri ah chuan chiang lutuk in ka meng kawk a, thawm chu ka ngaithla zui ran bawk.
Rei lo te ah ka oindan kawngkhar chu a rawn inhawng a, ka nu leh Martha-i an rawn in pawm lut nghal zat bawk.
Ka lo tho chhuak ve tur chu Martha-i te reuh chuan min lo ban nghal chuk chuk a, engamah hma in kan in pawm fel leh der tawh.
"A pa in I hming a lam reng a tia, a rawn kalpui leh ringawt anih hi, engtizia nge mawni kan naute lah chuan a ngaina thar tlat bawk si che a, tha deuh in lo awmpui mai teh, Shane-a tana nuamlo turin tawng phawng phawng tawh lo la, naupang lahin a ngaina che a nih chuan tha deuhin lo ngaihsak ringawt rawh"
Ka nu chuan thu min pe nge min ngen pawh ka hre lo, tap zo hlim tih hriat zet hian Martha-i chu a meng sen deuh riai a, a sam pawh la khuih mam loh tih hriat takin a ther sung bawk.
"Min lo ngai em ni a?" ka tih chuan a bu nghat nghat reuh a, mizo tawng chu a hrethiam vek tho si a, a pa hian a zirtir nasa hle a ni tih a chiang reng. Hmanni lawkah Mizoram ah an rawn let a, naupang tawng pawh la tawng fiahlo ina mizo tawng leh sap tawng a han hrethiam ve ve ringawt maite chu a enkawltu a fakawm ka ti lo thei lo.
Sana ka en chuan zing dar 8 pawh a lo la ri lo a, Martha-i awmdan chuan a pa mai ni lovin keimah tak pawh min ti hrilhhai ang reng khawp mai, eng dawi mah ka hmang bawk silo a, vawi leh khata hetiang taka min ngai ta mai hi chu a ngaihna chai ka hrelo.
Ka khum te chu muangchangin ka thlep fel a, Martha-i lah chuan fel deuh hian min lo en leh dauh dauh thin a, a mitmeng fim leh fiah kala min lo en reng hi chuan naupang mah nise ka zam lek lek lo chauh thin.
Inhnuai lama kan chhuk thlak hmain a sam te chu ka khuih mam sak vek a, han chhawnchhaih leh biak vel dan ka thiam lo lutuk chu ka inhaw ru takzet.
Kailawna kan in kaih thlak lai chuan sitting room atangin ka pa leh Shane chuan min lo en ve reng a, a ni pawh a thawhna a la rei biklo aniang a awmhmun kawr nen a rawn kal a, a mitmeng erawh a fiah tha leh kal kal khawp mai.
Ka pa chuan a lo chhiah nghal chul a, a ni pawh naupang chhaih thiamlo si tih taka han chhaih nuih viau a tum pawhin kan Martha-i chu a nui tha duh der lo a, keimah zawk chu ka nuih a za ru lek lek.
"Chaw ei ve mai rawh u" tia ka pa'n a sawm laiin pakhat chuan a lo hnial ve thung a, "Vawiin chu chhuah kan ngai a, Martha-i pawh check up a ngai" a lo ti bul deuh hmuk a, min rawn melh kher chu ka lo chhiat khum hman pek. Nimin tlaia min tihdan vang khan ka la lungawi bik miau lo a ni.
Martha-i chanchin chu sawi zelin U Hriatpuia chungchangte chu an sawi chhuak leh a, keini erawh choka lamah ka nu eirawngbawl kan pui thung.
"A ni Zotei kha i lo ngai tawh em ni a?" tia ka nu'n a zawh chuan "Mommy" a lo ti leh reuh a, a hma pawhin hetiang chiah hian min sawi tawh.
Chiang deuhin Martha-i chu ka en a, a nu anga min ngai ringawt chu a chhan ka hre miah lo, ka hrelo takzet. Elina-i kha a ngainat loh lutuk avangin kei hi min ngaina der mai mai zawk nge ni a.. a... engmah hi ka hrethiam tawh biklo.
Ka nu pawh chuan mak a ti deuh nge keimah chu min rawn en haw a, ka hriat bik loh thu sawi nan dar ka lo chhin ak ringawt.
Shane-an haw pui mai a tum chu duh lovin a nuar leh ta vak a, hmeichhe naupang kum 4 mi lek nuar dan atan chuan a ti mah mah deuhin ka hria.
Chhuatah mu in nasa lutuk hian a tal vak vak a, a tap pur bawk a, sap tawngin a pa chu a huat thu te pawh fiah vak lo hian a sawi tel nuai mai.
Beidawn hmel lutuka a pa in a en lai chuan ka lo beidawn pui ve khawp a, thlem a tum ngial pawha a tah zel avangin a pa thin chuan a tuar ta vaklo a ni ang, Martha-i chu pawm kang lawpin a tal nawk nawk chung chuan a pawm bet lui ngar ngar a, "A bang ve mai ang, kan va haw ange" a tih ri pawh chu hriat a har lam mah a ni, a fanu han tah rin theih zia chu...
"Chaw ei ve mai rawh u... " tia ka nu in chelh a lo tum leh lai chuan "Ka lo pawm ve chhin ang" tih leh ban ka rual a, kan pathlawia chuan min lo dan ka rin tehlul nen min dang bik miah lo.
"Tap tawh suh le.. In la haw dawn hleinem" tia ka pawm takah chuan a tap chu a bang leh hmak lawi a, thereng vuak thlak an sawi ang tak tak hi a ni mai, inchhung khawk rum rum chu thawk leh khatah a bo duak a, a hahdam thlak huai huai lutuk.
Ka awma a hmai phum chung chuan a la insût faih faih reng tho a, a pa chu a haw ta tlat ni berin ka hria, tawngkam nema han thlem leh a tum ngial pawhin a pawm chu sawi loh, melh pawh a melh duh lo va, a kut tereuhte chuan ka nghawngah min kuah bet ve tai bawk nen, chuti taka min ngaitu chu ka tan lo hnar emaw, lo ngaihsak duhloh ngawt a theih bik loh.
Chaw chu an ei ve leh ta nge nge a, chhun lamah pawh chuan clinic lama kalpui mai tur in ka pa in min ti a, inrinni anih avangin office kan chawl tho bawk nen, Martha-i kal duhna tur a nih chuan zui ve mai pawh ka hnial hranlo.
Dar 11 velah kan in atangin kan inzui chhuak a, chawhnu lam dar 2 daih an appointment a nih avangin an in lamah kan kawi hmasa leh a, a la hma tho tiin Martha-i ei tur te chu ka siamsak leh rih bawk a, kan pathlawia chuan min be tamlo khawp mai. Remchang awm se chuan nimin tlaia a thinrim ringawt chhan te kha zawh fiah ka duh tehlul nen.
Door bell ri ral ral chu hawng turin ka kal vat a, kawngkhar ka hawn rualin Elina-i nen kan inhmachhawn nghal siah bawk.
Min hmuh a inring vak lo aniang min en phawk khawp mai a, choka lam atanga Martha-in 'nu' tia min rawn ko ri a hriat leh phei chuan min melh thip hle tawh.
"Tawlh sawn teh" tih paha min nek sawkin min kalpel zui a, choka lam a pan zui nghal zat bawk.
Martha-i a ko ri te chu ka hre reng a, kei erawh chechang lovin ka dinna ngaiah ka la ding reng. Ka rin ang ngeiin kan naute chuan keimah zawk min rawn pan leh a, ka pawm duh ni awm takin min rawn ban nghal zat bawk.
Ka pawm kan rualin Elina-i chu a rawn lang zui leh zat a, bathroom lam atangin Shane a rawn chhuah ve chiah bawk.
Keini pathum lo indinchilh ran chu min en kual ralh ralh hnuah "Martha-i kha thuamhnaw dang lo va hak tir rawh" tiin keimah ah tak chuan a mit a fu a, sawi buai lovin pindan lam ka pan pui nghal bawk.
Kawngka ka khar hmaa Elina-i tawng ri chu ka la hre pha a, "In pindanah i luhtir amaw? Kei takngial pawh ka luh i phalloh laiin" a ti a, a aw ri chu a vui aw ka hle tih ka hai lo.
Shane chhanna chu ka hre pha tawh lova, a hminga a bialnu ni ve tan chuan ka ngeiawm viau ta ve ang. Mahse naupang rilru thianghlim tak pawhina a ngainat theih hauhloh mihring chuan rilru tha tak a put ka ring lo a, chuvangin Martha-i ka lama a tan chhung chuan khanu kha chu ngatan mah ka ti lo, min hmusit thei a ni miau lo a.
Martha-i ka siam lai chuan pindan kawngkhar a rawn ri rak a, Shane chu zawi muangin a rawn lut a, "Elina-i kha a haw tawh em ni?" tia ka zawh chuan a bu nghut ringawt a, ka awm a nuam bik chiahlo.
"I bialnu thin ka ti ur viau in ka hria" ka ti leh sap a, ka tawng ring lo khawp mai.
"Ka fanu aia pawimawh an awm lo" a tih chuan min chhang tawi tek tawk viau mah se a sawi tum chu ka hrethiam tho in ka hria.
Chawhnu dar 1 velah kan chhuak a, motor ah Martha-i a mutthilh daih avangin kan han ngawi dun rauh rauh a, boruak chu a uap churh ni berin ka hria.
Ka biak dawn chuan ka aw ka thian hmasa kharh kharh a, "Nimin tlai khan i thinrim chhan ka hrelo" ka ti chhuak phawng chu min rawn melh ve zawk a, mahse a hawisawn leh vat thung.
"Engahmah ngai suh" a ti tak nain hriat ka chak zual sauh a, "Sawi la, engnge tihsual ka neih?" ka tih leh chuan min chhang duh tawh miahlo a, hmalam ngawt a en avangin ka be lui zel duh ta biklo.
Martha-i kan check up zawh chuan an in lamah bawk kan haw hmasa leh a, min bawh deuh chawt reng avangin ka haw San thei angem pawh ka hre lo.
In kan thlen chuan kan thu thlan dai hmasa te te a, Shane chuan engnge maw a tih ni choka lamah a va ri rawk rawk reng a, a rawn let leh chuan thei tui no hnih hi a rawn chawi phei a, ve ngei hian.
Min pek hnuah ka bulah chuan a rawn thu ve a, Martha-i erawh a toys kan leithar chu khalhin a mah chauh pawhin a tlei tawk rih khawp mai.
"Ka beisei aiin ka fanu hian a ngaina che a" a tih chuan ka la na deuh a, a beisei aia min ngainat chuan min ngainat a lo ring vaklo chu a ni phawt ang a, kan intawn tirh te ka han ngaihtuah let chuan a awmlo hranlo chu ka ti ve tho.
"Ka hre biklo, ka dawi lo ania aw" insawi fihlim tum taka ka tih chuan a lo nui hawk a, chiang lutukin a hmel chu ka en bawk.
A mitbul vun chuar deuh leh a ha var rual nalh em em te chu chiang takin ka hmu a, a nui ve tak takin ka hria, hetianga a nui hmel hmuh tur hi a vang a, chutiang tawi te a nui ringawt pawh chu ka lo hlimpui ve hle ringawt.
"I dawi ka ti hleinem, engpawh ni se i hriat angin nu a nei tawh lo a, tunah hi chuan.. "
A ngawi leh dat a, a fanu chu en vang vangin "A nu ang maiin a ngai rih che a nih hi" a ti zawi deuh sup a, a inthlahrung ve deuh em mawni.
"A pawi lo, naupangte chuan nakinah an la hrethiam ve mai dawn alawm" ka tih laiin chiang deuh hian min rawn en a, "A nu tak tak nih chu i duh em?" tiin min zawt khawl mai!
"Eng.. Engmaw?"
Ka dang awk lutuk chu ka haw ru khawp mai, chil ka lem dawk a, a fanu chu a en leh zawk hnuah min rawn en in ka hmui chu a en leh ngur tawh a, min hnaih tial tial tih hre mah ila chet sawn nachang ka hre hauhlo thung!
Kan hmui chu a insi lek lek tawh tih ka hre reng a, dang tur ka nih laiin ka dang hauh bawk silo..
Mahse thil chu a thlen kim hmain a kekawr iptea phone chu a rawn ri a, chutah chiah chuan ka inla hrang ve ta chauh!
Cont..
Karkhat zen zawn ka chawlh hnuah test te kan zo fel thei ta bawk a, theih ang tawka regular kan tum leh tawh ang aw🤍
