Hnuchhuina _PSYCHIC _Volume- 3

[April Hmar Liverpool]

PSYCHIC Volume-III (Complete)

Story from_ Laltanpuia Hmar

Pro version extended:

#A pastor was found dead in a hotel. Vanlalsailova, who saw the body, is suspected. Inspector Remruata and Officer Rinpuia's opinion was not the same. Officer Rinpuia believes that Vanlalsailova killed the pastor. The inspector, however, did not believe that Vanlalsailova was the pastor's killer. which one is right?
officer Rinpuia's opinion and inspector Remruata's opinio.....;

The victim's wife, Pi Vanhmingi, said that her husband was not murdered but a witch. The victim's wife, Pi Vanhmingi, was suspected of being the perpetrator. But they couldn't get what they wanted from Pi Vanhmingi. Their investigations and underground activities could not bring the case to an end. But things happened in an unexpected way.#

Bung Khatna

Inspector Remruata chu amah rawn kan tu te hmel a lo hmuh chuan a lo thaw huai a. A lam pana a nu leh a pa lokal mek te chu nui sang chung chuan a lo chhawn vat a.

"Ka pa, ka nu, in lo kal a ni maw? a lo ti a. A pa Frederick Rindika chuan a fapa chu ngun tak chuan a han en a, "Mama, ilo tha zel ang chu maw? A nu Pi Mapuii pawh chuan, "Ruata, nangmah ngaihtuah hian mutmu pawh kan tuah meuh lo asin, hma lo sawn zel la ava duhawm dawn em! a lo ti ve bawk a.

Remruata chuan a en ngai chu a en reng a, chutah muangchang hian a nu leh a pa chu a han en leh a. "Ka pa, ka nu, ka tha tawh viau ania, min ngaihtuah hah duh anih kha, ka zia chho zel alawm, ka dam that ve leh ka lo chhuak ve leh tawh mai dawn a, hei kar khat bakin min dang tawh hleinem" a han ti a.

A pa Pu Rindika chuan, "Mama, heti taka rilru lama harsatna i nei chunga kei leh i nuin engmah kan lo hre lo hi a pawi ka ti a ni. I hna te hian a tuar zel lovang chu maw? "Ka pa, chu lam zawng tun atan nilo ve, tunah zawng hei mi han en ula in fapa hi ka tha tawh khawp ania. Enge Mami chu a an tawh? A nu pi Mapuii chuan, "Mami pawh a tha zel e. A ke ruh a tliak lo hlauh a, a tlukna lamah a lu a sawh na deuh a, thisen a hlauh nual nen a chau deuh mai alawm, tunah chuan a tha tawh lutuk ania" a lo ti vat a.

Remruata chuan van lam chu a han dak a. "ka va lawm em! Ka nau chu lo dam tha zel teh se" a ti sap a. Chutah, a nu chuan, "Ni e, kha amah su tu motor neitu pu Auva lah khan hei tun thleng hian a khat tawk hian min rawn tlawh awl lova, Mami dinhmun a that leh a that loh thu te a rawn ngaihven reng a, a inthiam thei meuh lo mai a, a driver pawh a ban hial thu te a sawi a" a han ti leh a.

Remruata chuan a hun tawn mek chu a ngaihtuah uluk hle a, a nu leh a pa te pawh chuan an fapa chu thlamuang tak leh hahdam taka awm tura chahin an tinsan veleh ta a.

Nakin deuhah chuan Nancy-i leh Rinpuia, Freddy-a te chu an rawn lang ve leh ta a. Rinpuia chuan enge maw ni hi polythene ah hian a rawn khai bawr taih mai. Inspector a han hmuh veleh chuan, "kha sir chu, lung te pawh a leng duh hle dawn a ni maw? ilo tha zel ang chu maw? tiin a rawn nuih sang a. Remruata chuan Rinpuia leh Nancy-i, Freddy-a te a lo hmuh ve leh chuan, "E khai, nang ni ve teh khiah chu, mi te in rawn tlawh ve vang vang a, in va ti lawmawm ve" a lo ti a.

Nancy-i chuan Remruata chu a thlek vang vang reng a, Rinpuia ngei pawh chuan a pu chu a chik ru hle a ni tih a hmelah chuan a lang reng si a. "Ruata, a hreawm em? Nancy-i lam chu a hawi thuai a. "Aih, hreawm lo, thian mak sak tak tak leh danglam tak tak te an awm a, ka awmna tur chi tak a lo nih zawk hi" tiin Remruata chu a han nui lui sang a, chumi rual chuan, "Nancy, i chhungte an tha zel em? Enge kan an? a han ti a. Nancy-i chuan, "Mukesh-a chu a hna lamah a buai rih hle a, bawihtea chu In ah a pu leh a pi te nen an awm. He laiah han hruaina chi niin ka hre lova" a lo ti a.

Chumi lai chuan Freddy-a chuan, "Thian kan inhmu sakhi mai dawn alawm, a pawi ka ti Ruata, ka thusawi awmzia kha i hrethiam lo a ni. I nau chungchang lam ai mah chuan ruahman lawk thil leh tih luih thil anga i ngai kha ka hriatthiam loh vang zawk a nia" a lo ti ve mek bawk a. Remruata chuan, "A ho lutuk, i theihnghilh daih ang, i chungah hian ka lawm zawk Freddy, harsatna ka neih laia ka bula awm reng thin i ni a" Rinpuia chuan a lo pawtchat ve leh a, "Sir, kan case buaipui lai chu a hmawr bawk a ni tawh asin"

Remruata chuan, "imm, ka ring lawk deuh rêng a. Misual chu kha pa Vanlalsailova kha a ni ang a tiraw? Rinpuia chuan, "Aw ni e, case buaipui tu khan voice recorded kha evidence atan a tling tawkah a ngai a ni ang? Tin, a behbawma Vanlalsailova rinhlelh theihna tur awm te kha evidence atan a hmang bawk a ni awm e. Chanchin chipchiar ka hre lem lova, mahse Vanlalsailova man anih thu erawh chiang taka ka hriat a ni"

Inspector Remruata chuan lei lam chu a han bih vang vang a, chutah Nancy-i lam chu a thlek leh a, "Nancy, pawi ka ti" Nancy-i chuan a lo hrethiam mai a. "Hrereng duh chuang suh, Mukesh-a pawh a rilru a dam thlap tawh alawm, a theihnghilh leh daih tawh zawk hial ang" A lo ti a.

"Ka inthiam lo a ni. Khatia Mukesh-a hming ka han hmu ta mai kha rinhlelhna nen ka buai zo ta a ni" Nancy-i chuan, "Thu mu hnu mai an ni tawh e, i dam tha leh vat ang a engkim hi a dik leh vek mai ang" a lo ti a.

Titi thu khawchang te han vawrhin rilru lama harsatna tawk mek Inspector Remruata chu a thian te pawh chuan a rilru tih hlima kawm hlim tumin fiamthu nen te chuan an han ri leh deuh hak thin a. Chawhnu her a lo anih takah chuan Nancy-i leh Rinpuia, Freddy-a te pawh chuan Inspector Remruata chu an tinsan ve leh ta a ni.

Remruata chu a mut hmunah chuan hun kal tawh chhuiin a thaw leh ham ham thin a, chuti taka rilru lam harsatna nei te enkawlna hmuna hun a han hman takna chhan leh buaina a tawh zui dan te, a case buaipui chungchang te chu chhuikirin a mit chu a chhing ta vang vang a.

A office-a a naute nen Pastor k.Lalngaihawma thihna chungchang sawia hun an hman lai mek a ni a. Rinpuia chuan a thusawi lai mek chu a sawi chipchiarin a thusawi danah chuan a ulukin tihsual leh tih hmaih palh a awm ang tih a hlau hle mai a.

"Sir, Pu k.Lalngaihawma chu a ruang hlawm a ni tawh a, postmortem a ni ang" a han ti a. Inspector chuan uluk tak hian Rinpuia thusawi te chu a ngaithla a, chutah Rinpuia hnenah chuan, "Tichuan Rina, Pu k. Lalngaihawma thihna chu tualthahna a ni em? a lo ti a.

Rinpuia chuan, "Aw sir, anih ngei hmel e, ruang hmuhna hi Hotel room number 08 third corridor a awm a ni a, ruang chu a thin zawnah chem tê a bur ngur mai a, tin a nghawngah chuan na taka rehna hnu hma a awm bawk. A hnar chu na taka kut thlakna tih hriat tak hian a ruh a tliak a, thisen a chhuak bawk. A ruang chu a saisir zawngin a lo mu ani. Tualthattu ni ngeia lang mi pakhat a awm a, chu pa chu ruang hmu hmasa ber tu, Police hnena report pe tu a hming chu Vanlalsailova a ni.

Inspector chuan, "Chu tualthattu a ni ngei ani tih evidence a awm em ni? Nge ni a rinhlelh a kai ringawt tihna em ni?

"Sir, ka sawi zel dawn. Pu.k Lalngaihawma chuan amah Vanlalsailova chu a awmna hmuna kal turin a bia a ni awm a, tin phone atang chuan thu inhmu lova an han inhnial thinrim ve deuh thu pawh a sawi a ni. Chumi avanga rinhlelh chu a ni pakhat awm e, midang chutianga Pu k.Lalngaihawma han that duh mai âwm tur midang an awm hnai vai lo bawk nen"

Inspector chuan, "Tichuan, Kan Pastor chu? Rinpuia chuan, "Aw sir, Pastor ni lai mek a ni. Nupui fanau nei lai a ni bawk e" Inspector chuan, "Crime scene-ah chuan ruang chauh nilo thil dang hmuh in nei em? Entirnan mitthi ta bungrua, a cellphone emaw, a wallet a ni emaw a thil neih eng ang chi pawh hmuh tur a awm em?

Rinpuia chuan, "Sir, Pastor hoin an ak fo thin, ip pakhat Bible leh lehkhabu vel dahna ang chi kha a awm a, dawhkan chungah Pu.K Lalngaihawma tarmit ni ngei tur a awm bawk a, chhuatah chuan rumol pakhat hmuh tur a awm bawk. Tin, a cellphone pawh a bag-ah chuan a awm tel bawk.

"Chuan sir, Bag-ah chuan lehkhathem a awm tel a, lehkhathemah chuan he thu hi a inziak a ni" tiin lahkhathem a thu inziak chu a han hmuh a.

lehkhathemah chuan heti hian a lo inziak a. 'He thil hi ka tih ngei a tul a ni. Ka nunna hi a ralmuang lova a mangang a ni. Ka inven a tul a, keimah min ti na duh tu lakah hian rorelna dik a thlen ngei theih nan he lehkha hi ka hnutchhiah a tul a ni' tih hi a lo inziak a.

Rinpuia chuan, "Chuan sir, he thil hi a ni a mak ka tih leh hriatthiam har ka tih lehzual chu ni, ngaihruatna leh zeldin thil mai lo chuan hmuh fiah thiam pawh a har" tiin cellphone a mi voice recorded chu a han ngaihthlak tir leh a.

Mi pakhat, mangang tak leh hlauhthawn hmel tak mai aw hian, "Nilo, nilo, Pu Ngaihawm, engti zia nge? Eng thil nge thleng ta mai? tu thil tih nge? a ti a, a aw atang chuan tualthattu a rinhlelh Vanlalsailova aw a ni. Chutah, chau tih hriat tak leh a theih tawp a chuah a ni tih hriat tak mai aw hian, "Engvang nge? engvang nge Saite? Hetiang thil hi engtin nge i tih theih zawk Saite? Engvang nge? Tih hi a ni ve leh a, chu aw ve thung chu mitthi ta Pastor K.Lalngaihawma aw a ni ve thung.

Inspector chuan "imm, anih chuan he lehkhathem leh voice recorded hi evidence te chu an niang maw?

"Sir, thil awmzia ni a lang ta chu Pu K.Lalngaihawm hian a thi dawn a ni tih hi a hre lawk a ang a ni. A chhan chu lehkha a hnutchhiah a, tin voice recorder a kam ru a. Tichuan, Vanlalsailova hian a that zui ta mai niin a lang. Mahse, rin ang ngeiin amah Vanlalsailova chuan a thil tih anih loh thu a pha tlat thung a"

"Engvangin nge Vanlalsailova khan khati khan a tih kher? 'Enge awmzia? Enge thleng hi? Tu thil tih nge? Ama thil tih chu engvanga khatia hre lo ang maia tawngkam chhakchhuak nge anih?

Inspector chuan, "Ruih an nei a nilo maw? Damdawi hnu hma emaw ruihhlo dang pawh an rui em tih te in hria em? Rinpuia chuan, "Sir, ruihhlo hnu hma kan hmu lova, tin an pahnih ve ve hian an rui lo tih kan chian vek bawk e. Nangmah ngeiin Vanlalsailova chu han kawm chiang la, a dawp dan hmang pawh i hre zawk ngeiin ka ring a ni" Inspector chu a thutna atang chuan a tho chhuak ta a. Chutah, "imm, hei hi chu keima kutah awm rawh se, Vanlalsailova chu ka va buaipui a nge" a ti ve ta a.

"Sailo" Sailova chu ngun tak hian a en a. Sailova chuan, "Aw ka pu, thil awmzia leh thil thlen dan kim chang chu ka sawi vek tawh a ni lawm ni? engvanga keimah hi tualthattu anga min ngai tlat mai nge maw in nih le? A lo ti nghal bawrh bawrh a. Inspector chuan, "A chhan chu hei vang hi a ni ngei ang" tiin lehkha a thuziak chu hmuhin voice recorded chu a han ngaithak tir bawk a.

Sailova chuan mak a ti hle a. "Lalpa leh! Keima thil tih a nilo sir. Pu Ngaihawma hi huatna pawh ka nei hleinem, a chunga hetiang thil em han tih duhna chhan tur ka nei lo hrim hrim.

Sailova chuan, "sir, ka han sawi ange, khami zan khan a tul bik thil avangin ka hnathawhna hmun atangin ka haw tlai hle a, tichuan Pu Ngaihawma khan min rawn bia a, mahse Pu Ngaihawma kha a thinur hmelin a lungawi lo hle"

Inspector chuan, "Engvanga lungawi lo nge anih? A lo ti a. Sailova chuan, "Sir, Pu Ngaihawma nen hian inlaichinna hran chu kan nei lem lo, mahse a fanu nen hian kan inzui ve thin a, amaherawhchu harsatna leh buaina kan neih avangin kan inthen zui leh mai a. Khami hnu atang khan Pu Ngaihawma hian kei hi mi rawn be ta fo mai a, ka lakah a lungawi lovin a thin ur hle a ni. Mahse, amah han huat let emaw ka tum ngai lo hrim hrim"

Inspector chuan, "Tichuan, khami zanah khan a rawn be leh che a, a lungawi lovin i lakah pawh a la thinrim reng a"

"Aw sir, a aw ki atang khan chu chu ka chiang. Han palzam mai mai chi niin ka hre lo a ni. A pawimawhin ngaihven ngei tha in ka hria a, tichuan min kohna hmunah chuan ka va kal ta a ni"

Inspector chuan, "chumi lai, a rawn biak lai che chuan dar engzat nge? Sailova chuan, "Dar kua leh minute sawm li leh panga vel ni tain ka hria"

"Tichuan, Pu Ngaihawma lo nghahna hmun che chu engtikah nge, dar engzatah nge i va thlen?

"Sir, dar sawm bawr chu a ni tawh ngei ang" Inspector chuan Rinpuia hnenah chuan Vanlalsailova'n tualthihna a rawn report lai chuan dar engzat nge anih a han zawt a. Rinpuia chuan, "zan dar sawm leh a chanve ah a ni e sir" a lo ti a.

Inspector chuan sailova hnenah chuan, "Sailo, han sawi zel teh" a han ti a. Vanalalsailova chuan, "Sir, min lo nghahna hmun ka thlen khan Pu Ngaihawma nen khan kan inhnial thinrim a, kei khan ka rilru tihfim tumin pawnah ka chhuahsan a, tichuan ka va luh leh chuan khatia rapthlak taka a lo awm lai kha ka va hmu ta ngawt mai a ni. Mangang takin ka au a, tu thil tih nge tih ka zawt a, ka chhuah bo lawk hlan khan tu emaw chuan kha thil kha a ti a ni. Mahse, ka hrilh ti hai em em tu leh min ti na em em tu chu"

Inspector chuan, "Pu Ngaiha'n nangmah emaw a lo ti che kha tiraw? A lo ti a. Sailova chuan, "aw ka pu, Pu Ngaihawma khan khatia ka va bawihsawm kha 'engvang nge hetiang thil hi ka chungah i tih? min lo ti ta mai a ni. Kei chuan ka hrethiam loin ka hrilhhai hle a. Ka awm loh hlan khan hmai tuam tu emaw thil tih a nih chu ka ring a, keimah ka va lan leh khan keima thil tih emaw a lo ti ta mai a ni ang. Mahse, ka thil tih a ni silo a"

Inspector chuan rinpuia hnenah, "Rina, misual ni a rinhlelh tur midang kan dap a tul a ni. Tin, thil pakhat, chhuata rumol kha tu ta nge? kha khan enge awmzia a neih? kan hre thei a ngem? Rinpuia chuan, "kha zawng enge a awmzia a chiang reng alawm sir, tualthattu pa hian chemtê ah khan a fingerprint hnutchhiah a duh lo tihna a ni mai a, ngun tak leh uluk taka han en chian chuan rumol kha a khâwr a, a tawm im dan atang te, a chuar dan atang te khan chemtê chu hum hnan niin fingerprint hnutchhiah anih loh nan a hmang a ni tih a hriat theih a ni.

"Mahse, a hmanhmawhna lamah emaw a chi ai ve deuhna lamah chhuatah khan a theihnghilh tihna a ni thei" Inspector chuan, "Chuti anih chuan Sailova hi misual a ni thei dawn em ni? Engvang in nge chhuatah chuan rumol chu a theihnghilh theih ang? Tin, chhan leh vang tha tak awm lovin tualthattu in police te a call lo tawp ang, a tlanchhe nghal ngeiin ka ring a ni. Tin, a hnu thup a tum ngei bawk ang a"

Rinpuia chuan, "Sir, thil chu a chiang viau niin a lang si a. He voice recorded a Pu Ngaihawma tawngka atang ngei hian misual chu tunge anih kan hre thei a ni. Vanlalsailova hian dawt a phuahchawp zel zawk lovang tih a sawi theih loh"

Inspector chuan, "Mahse Rina, Engvanga Pu Ngaihawma laka lemchang kher nge anih ang? A that duh anih chuan tawngkam tenawm tak leh a huatna tawngkam, a thinrimna tawngkam te chhahchhuah zawk awm tak a ni a. Mahse, engvanga khatia a vih lai reng pawha khatiang ang tawngkam kha hmang tlat nge anih ang?

Rinpuia chuan, "sir, chu zawng tih elna emaw runluihna emaw pawh a ni thei asin, tualthattu te hi an in ang vek silo.

Inspector chuan, "Tin, amah Sailova sawi kha thu dik zawk pawh a ni maithei asin. khatianga pawn lama a chhuah bo hlan khan mi tu emaw thil tih a ni ang a, sailova a va lan leh khan amah vit tu hmaituam chu Sailova emaw a lo ti pawh a ni maithei. Amah vit tu hmaituam khan a hnarah khan a hnek a, a nghawngah khan a rek bawk a, tichuan rumol-a chemtê hum hnanin a vit zui bawk a. Sailova emaw a lo tih nachhan kha chu an inhau thinrim zo chauh a, sailova pawh lungawi lo takin pawnah a chhuak a ni si a"

Rinpuia chuan, "Chuti anih chuan Sailova kha pawna a chhuah lawk chhung kha engtia rei nge? Engtianga rei nge pawnah khan hun a hman?

Sailova chu a hmel a ngui hle mai a, a lungngaiin a hrilhhai hle a ni tih a hmuh theih. "Sir, misual ka ni lo asin, kha voice recorder kha engvanga khatia kam kha nge anih ang? Lehkha a thuziak pawh kha. Engmah hi ka hrethiam lo a ni.

Inspector chuan, "khatia pawna i chhuah tak hnu khan pawnah khan engtia rei nge hun i hman? Sailova chuan, "Sir, ka awm rei lo, minute hnih khat bak pawnah khan ka awm lo. Kan han inhnial kha ka thinrimin ka lungawi lo hle mai a, thawk te la in boruak te chu ka hip lut hrawih hrawih a, tichuan ka let leh nghal mai a ni"

Inspector chuan ngun fe hian, "Sailo, a pawimawh dawn a nia i tawngkam tin hi, i hrechiang chiah a maw?

Sailova chuan, "Sir, ka hrechiang"

Chuveleh Rinpuia chuan, "Chuti anih chuan i awm bo hlana misual lo chet hman ngaihna a awm lo tihna anih chu. Minute hnih khat chhung lek chuan misual chu i va nang ching hman lo anih pawhin kawngkharah tal chuan in intawk hman ngei ang. Tin, khatih lai khan midang awm ve emaw hmuh emaw i nei bawk silo leh zel a? A lo ti a.

Sailova chuan, "Aw, mi tumah ka hmu lo, midang thawm pawh ka hre lo, mak ka ti a ni" Inspector chuan, "Misual che rang tak leh tuan tha tak tan pawh tual han thah hman ngaihna a awm lo hrim hrim anih chu" a lo ti ve bawk a.

"Ni e sir, keima ngaihdan leh ka han chhui dawn dan thil mai a nia, a chhan chu keima thil tih a ni silo a, a ngaihna ka hrethiam lo a ni"

Inspector chuan, "A fanu nen inlaichinna in neih dan atang te, i lakah a thinurin a lungawi lo thin a, tin zanah pawh khan a rawn bia che a in inhnial thinrim leh a. Chutah, lungawi lo takin pawnah i chhuak tau a. Tichuan le, lehkhathem leh voice recorder hian tualthattu i nih thu chu a rawn tarlang ta tihna a ni mai lo em ni? Pawnah minute hnih khat hun hmangin i chhuak a, chumi chhung lek chuan Pu Ngaihawma chu nghaisak a lo ni a, vih a lo ni a, thil awih awm loh tak a ni. Nangma tih nilo tu tih nge ni thei ang"

Sailova chuan, "Ka pu, thu dik tak chu zawng chhuak lul rawh u. Keimah ngei hi ka ni anih si chuan engvanga hetiang anga evidence tha lutuk a awm reng chung pawha inpuang duh silo nge ka nih ang? Engvangin nge ka thil tih anih loh thu chu ka la phat tlat si ang ni?

Inspector chuan ngun tak chuan Sailova chu a han en a, Sailova hmelah chuan lemchanna emaw dawt sawi hmel reng a hmu lo. Inspector pawh chu a ngaihtuahna a buai ru hle mai a.

PSYCHIC Volume_3

Bung Hnihna

Rinpuia chuan Inspector Remruata hnenah chuan, "Sir, case chu chai zui vak ngailo in a fel nghal a ni mai alawm" a han ti a. Inspector chuan, "Rina, hei chauh, he pa hi misual ngei ni a a lanna phenah hian thil dang a awm ngeiin ka ring tlat" Rinpuia chuan, "Nilo sir, thil dang a awm anih chuan Sailova hian a puang mai tur a ni tawh zawk.

Inspector chuan, "Ni e Rina, evidence a chian tluk zet hian he pa Sailova pawh hi inpha lovin inpuang ve mai ta se chu case chu solve a ni mai tur hi a ni a" a han ti a.

Rinpuia chuan, "Sir, han hlap deuh zawt zawt ila, han chhir deuh zawt zawt ila a inpuang em em ang" a lo ti a, inspector chu a ngawi reng a. "Nilo Rina, he pa hmelah hian thil tisual hmel ka hmu ve tlat lo atin ni" Rinpuia chuan thawk a han la halh a. "Nia, lie detector te hi awm ve se tha tur, hei vang hi alawm ram changkang zawk pawhin lie detector te hial an siamchhuah tak ni. Misual te hi inpuang awlsam tak an awm lai hian a tawp thleng pawha inpuang duh lo hi an awm ve bawk asin.

Inspector chuan, "khang thil, lehkha a thuziak leh voice recorded ah ringawt kha chuan kan innghat thei lovang, court-ah hruai a ni ang a, a sawi dan pangngaiin an inhnial thinrim thu leh pawnah a chhuah thu a sawi ang a, a va lut leh chuan Pu Ngaihawma hliam tuar mek chu va hmu in, voice recorder-a a landan ang khan thil awmzia a sawi ang a, chutah chuan Pu Ngaihawma thusawi zawk hian evidence tha tawk tak min pharhchhuah sak lo zawk a ni"

Rinpuia chuan, "Sir, enge i thusawi awmzia chu ni a? Inspector chuan, "Engvang in nge hetiang thil hi i tih? tih ringawt chuan Sailova thil tih kha eng tiang taka fiah nge anih a tarlang zo lo tlat lo a ni. 'Sailo, engvanga min thah tum nge i nih? emaw han ti tal se chu Sailova hi a him zo lo ngei ang. Court hma-ah hnehna kan chang zo leh silo anih chuan tih thil a nia, evidence hi a chian hmel viau a, mahse suspect ber hian a pha tlat a, a tang tlat a, evidence hi a fiah tawk lo ani ti zawnga a tan tlat duh chuan kawng hmu ve thei a ni tih thil anih chu.

"Tin, Pu Ngaihawma ber khan a thih tur thu te, a nunna a derthawng ani tih te kha a hre lawk anih tak tak a, misual chu Sailova ngei anih si chuan hei aia chiang lehzual evidence hi a hnutchhiah ngei tur ani" tiin Rinpuia chu a chhuahsan ta a.

Sailova pawh chu an chhuah leh ta rih a, tin postmortem result pawh chu a lo chhuak zui ve thuai bawk a. Amaherawhchu, postmortem titu te thusawi chuan inspector chu a thawng hle mai a. Doctor te sawi dan chuan Pu Ngaihawma nghawnga rehna hnu hma ni a lang chu mihring kuta rehna hnu hma a ni tih an finfiah thei lova, mahse hrui emaw puan emaw hmanga rehna a ang zawk mah niin an sawi tlat mai. Tin, a hnar ruha kutthlakna hnu hma pawh mihring kuta kutthlakna emaw hnekna hnu hma emaw a ni tih chu finfiah theih a ni lo a, mahse a hnar ruk tliah dan leh hliam awm dan atang chuan thil sakhat, thir emaw, thing emaw na tak a a tauhna avanga tliak anih ngei chu an ring zawk tlat mai.

Inspector chuan ngun tak chuan a han ngaihtuah a. Rinpuia bawk chuan inspector Remruata ngaihtuahna hmang mek chu a lo tibuai leh a. "Sir, a chiang reng alawm, Pu Ngaihawma chu kut a hnek nilo mahse, na taka dawhkanah emaw bangah emaw intauh tir a ni tihna a ni mai alawm. Tin, a nghawng pawh chu kuta rehna a nih loh chuan hrui emaw puanin emaw an rek tihna a ni leh mai, nghaisak a tuar hmasa zet tihna anih chu" a lo ti a.

Inspector chuan, "Rina, ti teh chu mi lamah ringawt lo deuh chuan chang dang kan kan a tul a ni. Sailova hi thu zawhfiah leh ka duh a ni, a insawi awk theihna tur leh a thu inkalh a awm leh awm loh ka hrechiang lehzual duh a ni. Misual anih chuan thu inkalh a thusawi hun a la nei em em ang"

Rinpuia chuan, "Sir, a thu sawi inkalh zia chu kan hriat kha, pawna a chhuah hlan khan misual hmai tuamin Pu Ngaihawma chu a lo that anih a ring a, mahse ama sawi dan zelah pawnah khan minute hnih khat bak a awm silo a, midang lo inrawlh hman ngaihna a awm lo tih kan hriat kha. khami atang reng pawh khan he pa hian dawt a sawi a ni tih a lang sa reng tawh a ni"

"Sailova khan dar sawm velah Pu Ngaihawma lo nghahna hmun kha a thleng ni khan a sawi a, tin tualthihna a thlen thu a rawn report khan dar sawm leh a chanve a ni a, ngun taka ngaihtuah chuan khami darkar chanve chhung kha tualthahna hun atan chuan thil awm ang tak a ni. An inhnial hmasa zet a, tin Pu Ngaihawma kut a thlak hmasa zet bawk a, thil inhne rem thlap zel a ni. Dar sawmah vek emaw khan rawn report chu nise ngaihdan pawh a dang deuh mahna, mahse he pa hian dawt sawi a thiam lutuk lo a, a insawi awkna zel niin ka ngai a ni"

Inspector chuan, "imm, ti teh, khawnge thingpui te i han in ila, ril te pawh a tam mai dawn, chet kan la leh zawk dawn nia" tiin thingpui in tur chuan chet an la ta a.

Zan a ni a, Inspector Remruata chuan a mobile phone lo ri chu a han en a, number hlang a lo ni. A han pick up a, "Hello" lehlam atang chuan hmeichhe pakhat hian vawt raih mai hian, "Pu Inspector, ka pasal thihna hi dawithiam thil tih a ni" a rawn ti a, inspector chuan han chhan mai dan tur chu a haihchham lek lek mai.

"Engtin a ni? A han ti a, lehlam atang chuan, "Ngaihawma nupui ka ni aw, ka pasal thihna hi dawi a ni ka ti anih chu" a rawn ti leh a. Inspector chuan, "Pi Vanhmingi maw? a han ti a, lehlam atang chuan, "Aw, a thihdan i chhui mek Pastor K.Lalngaihawma nupui Vanhmingi ka ni e" a rawn ti leh a.

Inspector chuan, "Ka pi, i pasal chu thah a nilo i tihna em ni? Lehlam atang chuan, "Inspector, thah anih leh anih loh chungchang ka sawi lo. Dawithiam thil tih a ni" Inspector chuan uluk tak chuan a han ngaihtuah a.

Lehlam atang bawk chuan, "He thilah hian dawi leh ramhuai thil a tel a ni" a rawn ti leh a. Inspector chuan, "Nilo Pi Vanhming, i hresual a ni ngei ang, i pasal a ni asin. Engtin nge chutianga i sawi mai theih a?" A han ti leh a. Lehlam atang chuan, "Pu Inspector, chiang takin ka hria a ni, keimahah hian chiang taka hriatna a awm a ni" tiin phone chu a dah ta daih mai a. Inspector chu a han nui deuh hak a, "Haha, eng kan ti zo ta nge ni le? tiin a Mobile phone chu a melh vang vang ringawt mai.

A tuk a lo nih chuan mitthi ta Pu K.Lalngaihawma chhung te kawm tur chuan Rinpuia leh Joela te chu an thangchhuak ta a, Inspector chu office-a a awm lai a ni a, chumi lai tak chuan phone call hi a dawng a, number hlang a lo ni.

Chutah le, Inspector Remruata chuan phone chu a han la a, lehlam atang chuan, "Hello, Inspector Remruata a ni em? A rawn ti a. Inspector chuan, "Aw ni e, tunge ni ta? eng thil nge ni ta a? A han ti a. Lehlam atang chuan tlangval aw ni ngei tur chuan, "Ka pu, thil pawimawh tak mai hrilh duh che ka nei. Nizan hmasa thawhlehni zanah khan zarkawt pheia kawngpui bula dawr pakhat bulah, kawngpui kamah mi pakhat ka hmu a, chu pa chu tu dang a nilo, khami zan thawhlehni zan veka Hotel pakhata mitthi ruang an chhar tak kha a ni"

Inspector chuan, "Engtin maw? Tlangval, i thusawi awmzia ka man hauh lo mai" a han ti a. Lehlam atang chuan, "Aw le sir, Police station ah ka rawn kal vat a tul a ni. Ka thusawi tur hi a pawimawh takzet a ni" a rawn ti leh a, Inspector chuan, "Awle lokal vat teh khai" a lo ti ve vat a.

Hmel tung lam deuh, sam sei lek lek, a hmela mak tihna leh hrilhhaina hmuh hmaih theih hauh loha lo lang chhuak chu han en in, "Tichuan tlangval, eng thil chiah maw thawhlehni zanah chuan i tawn a? A han ti a. Chu tlangval chuan, "Sir, ka hming chu Andrew-a a ni e. Khami zan thawhlehni zan khan thil engemaw tul thilah ka chhuak a, kawngpui kianga footpath-ah ka kal a, ka camera chuan thla te ka la kual vel a, thlalak hi ka uar ve hrim hrim bawk a. Tichuan, khatih lai khan zan dar sawm leh minute sawmhnih inkar chho vel a ni tih ka chiang. Tichuan, ka haw tur chu news hrang hrangah Hotel pakhatah mitthi ruang chhar anih thu ka hre ta a. Tichuan, chu mitthi chu tunge anih tih te ka hre ve ta zel a, amah pawh Pastor a ni nghe nghe a ni"

"Tun mai, dar sawm atanga dar sawm leh a chanve inkara thil thleng niin report thenkhat chuan an tarlang nghe nghe. Chumi awmzia chu kha lai, kawngpuia ka kal mek lai leh In lam pana ka thang mek lai vela thil thleng tihna anih chu. Tichuan, ruang an chhar chu a thlalak te ka lo hmu ve ta zel a, mahse sir, mak ka tiin ka hrilhhai kher asin. Hei, han en ve mah teh" tiin thlalak chu a han hmuh a. Thlalakah chuan amah Andrew-a nilo midang pahnih chu a bulah chuan an lang ve a, chumi te pahnih zinga mipa zawk hmel a han hmuh chuan inspector chu a phu teuh kher mai! "E heu! Hei chuh! a han ti a.

Andrew-a chuan, "Sir, keimah ang thovin mak i ti ve tho a ni maw? Inspector chuan, "Kha ai Chiang khan han sawifiah teh" Andrew-a chuan, "kha tia thla ka lak vel pah khan ka bula mi pahnih kha chiang takin ka camera-ah khan an lo lang ve a ni. Mipa zawk hi chanchinthar ka hriat zawh chauha mitthi ruang an chhar tak a kha a ni tih ka han hria chu ka mangang teh asin. Pastor anih thu te, tin a thlalak nen lam an thehdarh nghal a. kha thlalak ka lo hmuh veleh khan nichin maia kawng pui kianga ka thlalaka mipa zawk lo lang ve kha ka hrechhuak zawk mai a, tichuan Pastor ruang an chhar tak a chu a ruang an chhar hun lai vel bawrah chuan ka bul maiah a lo awm ve reng tihna anih tak ber chu"

Inspector chuan uluk tak chuan Andrew-a chu a han en a. "Chuan" a han ti a. Andrew-a chuan, "Sir, enge thil awmzia ni ta ang? Ka hrethiam ta lo a ni. Ka chhung te pawh ka hrilh a, ka thian te pawh ka hrilh a, mahse an lo ngaihven tehchiam lo, Police ho hriattir turin min râwn a" a han ti leh a. Inspector chuan, "imm, a thih lai vela a thlarau vak vel chu ilo tawng fuh tihna a nih tak ber chu" a lo ti ta a.

Andrew-a chuan, "Sir, thil mak ve tak chu a ni. Han hriattir ve hrim hrim che u ka duh a, ka rawn hrilh ta che anih hi. Pastor Ngaihawma thihna case hi i chhui mek a ni tih ka lo hria a" a ti ta a.

Chawhnu her a ni a. Rinpuia'n a pu thu hrilh chu a awih lo hle. "Sir, a thlalak nen lam a nei thlap si a maw? A han ti a, a aw ki ah chuan tih elna a tel lek lek mai. Inspector chuan, "imm, nei thlap e, Pu Ngaihawma thlarau anih theih mai te pawh chu i ringhlel ve lo em ni? Rinpuia chuan, "Awih har ka ti" a lo ti a.

Inspector chuan, "imm, Pu Ngaihawma hian phir pui emaw amah ang tak unau a nei a ni thei bawk. Chuan in va thangna chanchin te chu enge? a han ti a. Rinpuia chuan, "Sir, Sailova thusawi te kha thu dik tak vek an ni e. Pu Ngaihawma fanu nen hian an inngaizawng thin ngei a, mahse an inthen fel tawh a ni. Amaherawhchu, Pu Ngaihawma leh Sailova te inkara inhuatna awm leh innghirngho chungchang thu hla erawh an chhungte chuan an hriatpui lo niin a lang.

"Tin, khami zana midang han inrawlh theihna turin Pu Ngaiha'n a mi biak te leh sailova mi biak te thlengin kan chhui zui zel a, tu mahin khami zan khan Pu Ngaihawma hmu tur emaw Sailova hmu tur emaw in khalai Hotelah khan an kal loh thu an sawi vek bawk a ni"

Inspector chuan, "imm, mahse thil mak dang leh bawk a la awm cheu a nia" a han ti a. Rinpuia chuan, "Eng thil nge ni a sir? a lo ti a. Inspector chuan, "Pu Ngaihawma nupui Pi Vanhmingi kha, a ni kha thu inzawt fiah ve em? A pasal chungchang te" Rinpuia chuan, "Sir, kan lo rin loh lam takin Pi Vanhmingi chu rilru leh taksa lama harsatna nei a lo ni a"

Inspector chuan a lu chu a han dawn vang vang a. "Thil awm lo pawh va ni suh. Nizana mi rawn biak ngawt dan leh a thu min hrilh pawm har tak avang khan ka hrilh kha a ti hai angreng viau reng a ni" tiin zan lama Pu Ngaihawma nupui Pi Vanhmingi'n a rawn biak thu leh a pasal thihna chungchanga ngaihdan mak tak a rawn neih thu te chu a han hrilh ve a.

"A va mak bawk lah tak ve sir, Pi Vanhmingi chuan a pasal thihna chu dawi anih a ring a maw? Thlarau leh ramhuai kaihhnawih thil a awm a ring tihna a niang maw? Inspector chuan, "I sawi tak ang khan rilru leh taksa lama harsatna nei a lo nih vang a ni ngei ang" A han ti a. Rinpuia chuan, "Nia, a fate min lo hrilh dan a ni a, tin amah Pi Vanhmingi ngei pawh kha a hmel leh landanah reng pawh khan a fate min hrilh dan chu a dik ni ngeiin ka ringhlel hran lo.

Inspector chuan, "He thihna-ah hian kha thil, evidence tha tak ni a lang voice recorder kha awm lo zawk se ka ti hnuhnawh ta khawp mai" a han ti leh a.

Rinpuia chuan mak a tiin hriatthiam loh a nei tih a hmelah chuan a lang a. Inspector chuan, "A chhan chu kha voice record kha awm lo se thil kal dan hi a felfaiin Sailova pawh hi man mah ila a sual tam lo zawk ang.

"Voice recorder-a a tawngkam hman dan avang khan ngaihtuahna a buai ru ve tlat si a. Pu Ngaihawma tawngkam nen khan a tawngkam kha a inpersan viau mai si a, ka sawi tak angin tualthattu ngei ani tih kha a chiang chuang tlat silo a ni. Tualthattu nise engvangin nge khati khan a tih kher ang, tin sailova thil tih tak kha Pu Ngaihawma khan a sawi lang Chiang tlat bawk silo a, lehkha ah lah khan misual hming a thailang tlat silo nen"

Rinpuia chuan, "Sir, chu zawng hun a la duh deuh mai niin ka hria, a inpuang har tawh lo tawp ang, amah hi chhui zui zel ila, evidence dang dang pawh kan hmuh belh zel mahna" Inspector chuan, "Engvangin nge khati khan a tih kher? Pu ngaihawm enge thil awmzia? Tu thil tih nge? A awmzia hi a mak riau a ni. A mi thah tum hnena khatia han awm vel kher kha enge a awmzia ni ang?

Chhun ni tlang san vanglai a ni a, Police station lamah chuan call pawimawh tak mai an dawng leh ta. Chuveleh, police lam chuan an mahni rawn be tu chu sation lamah chuan rang takin an ko nghal vat a. An mahni rawn be tu chuan thil mak tak a tawn thu te, tin Pastor Ngaihawma thihna chungchang a lo hriat ve dan te leh Pastor Ngaihawma chu a thih lai ni a sawi zan dar sawm leh minute sawmhnih inkar velah hmun dangah a hmuh thu te chu a sawi a ni awm a. Inspector chuan heti hian a han ti a. "Thil mak dang leh bawk maw? Kan Pastor thla chu a hrang nasa hle mai maw" tiin chu pa thu hretu ni a insawi thu zawtfiah tur chuan a inbuatsaih nghal thuai a.

Inspector chuan chu pa Zorema inti chu ngun zet chuan a han thlek a. Chu pa chuan mangan hmel tak leh hrilhhai hmel tak mai chuan, "Sir, thil awmzia chu hetiang deuh hi a ni. Kei hi Dawrpui Vengthar a awm ka ni a. Khami zanah khan kan veng chhungah ka khaw lai leng haw chu Motor pakhat hi Kan In lam panna kawn atanga pen thlakna taxi stand awmna bulah hian a lo ding a, a chhung atang chuan mi pakhat hi a rawn chhuak a, a lo dinna hmun chu street light hnuaiah anih avangin chiang takin an hmel a hmuh theih a ni" Inspector chuan, "An i tih chu mi pahnih i tihna em ni? A lo ti a. Zorema chuan, "ka chiang chiah lo, mi pahnih an nih ngei chu ka ring a, pakhat zawk khan ka lam chu a rawn hawi a, chiang takin a hmel kha ka hmu a ni.

"Tichuan, kei chu In-ah haw-in ka mu zui mai a, mahse a tuk zingah chuan mak tih deuh ka nei ta. Hotel pakhata mitthi ruang an chhar thu ka hria a, chu mitthi chu Pastor a ni nghe nghe. Tichuan, chu mitthi ruang an chhar pa hmel te chu an post bawk a, chu pa hmel ka hmu chiah mai chu mak tiin ka meng zau kawk kawk mai a ni. Chutah, uluk zawk chuan ka han ngaihtuah kir leh a, zan lama ka mi hmuh pa ngei kha a ni. Kawngpui kianga motor bula lo ding min lo en tu kha, kha Pastor ruang an chhar zui tak ngei kha a ni.

"Khatia kha pa kawngpui kianga min lo en tu ka hmuh hun lai kha zan dar sawm leh minute sawm thum inkar vel a ni tih ka chiang. ka phone pawh ka en a, In lam pana haw mek ka ni a, dar zat kha ka en ngei a ni. Mahse sir, kha Pastor ruang an chhar hun lai ni a an tarlan kha zan dar sawm leh minute sawm thum inkar vel bawr tho a lo ni ve si a, a thihna Hotel lah chu veng dang daih a ni a, Aizawl khaw laili laia awm a ni a, ka hmuhna location nen khan a inhlat hle a ni. kha pastor kha a rualin hmun hnihah a awm tihna nge ni ta ang? A thlarau ka hmu tihna em ni? Mahse a chuanna car te kha a tak ngei a nisi a, ka mit ngeiin a hmu si a. Tin, a bula mi dang awm ve te kha enge a awmzia ka hrethiam ta lo a ni. Tichuan, ka thil tawn chu midang ka hrilh ve a, Police hriattir turin min lo ti a, nang hi Pastor thih dan chhui tu i nih thu ka hre ve ta a, ka rawn be ta che a ni"

Thingpui in tur te chu an han chhawp sak a, Inspector chuan, "Tlangval, chu i thil tawn chu i tawng ngei a ni tih fiahna tur i nei a ngem? Entirnan chu pa thla te chu ilo la fuh mial lo maw? Zorema chuan, "Chu em em zawng a nachang ka lo hre hauh lo. Tin, kha tia kawngpui kianga ka hmuh lai khan Pastor thi ta ruang an hmuh chu a la ni ang tih ka hre lawk bik silo a" a lo ti a.

PSYCHIC Volume _3

Bung Thumna

"Imm, thil mak ve tak chu a ni. Kan Pastor thla chu kan chhui zui dawn tihna em ni ang?

Rinpuia chuan, "Sir, ngaihdan pakhat ka nei, heng Pastor thlarau ni awm tak hmu te hi an rui anih loh vek pawhin an hmuh sual emaw an mahni lam hi rilru lam buaina nei te pawh an ni maithei" a han ti a. Inspector chuan, "Rina, a thlalak nen lama neitu pawh a awm tih kha theihnghilh lo ila" a lo ti a. Rinpuia chuan, "ka hria alawm, mahse heng mi te hian intihlar an duh vang mai mai niin ka hria, a thlalak neitu ni a insawi pawh khan a thlalak neih kha amah Pastor niloin midang Pastor nena in ang ve tak thlalak zawk pawh a ni thei asin. Tin, thlalak kha edit a nilo ang tih a sawi theih hauh loh bawk" a han ti leh a. inspector chuan, "imm, chuti anih a hnu kan finfiah thei alawm" a lo ti a. Rinpuia chuan, "Ni e, kan finfiah phawt anih loh chuan rin mai chi niin ka hre ve lo" a lo ti ve leh bawk a.

Chutianga a thihna an chhui zui mek Pastor k.Lalngaihawma thlarau ni âwm tak hmu ni a insawi te avanga an ngaihtuahna ngun taka an sen mek lai chuan mi pakhat dang a rawn lang veleh hlawl mai bawk a. A hmaa mite sawi dan ang thovin Pastor k.Lalngaihawma ni ngei tur chu a thih zan, zan dar sawm leh minute sawm thum inkarah an awmna vengah a hmuh thu a rawn sawi veleh ta tlat mai.

Chu pa sawi dan chuan Pastor chu bawngkawn hmar veng biak In pan chhohna kawngpui tlang chho zel a khaw hmawr lam dep a kawng lo kual hmasa ber bula street light bulah a hmu a. Tin, a bulah chuan midang an awm ve niin a sawi bawk. Mahse, a tukah chuan midang ang bawkin chanchintharah chuan Pastor pakhat chu Hotel pakhatah thi a chhar anih thu chu an rawn puang ta a, mitthi an chhar ni a an rawn tarlan hmel a han hmuh zet chuan nizan maia a mi hmuh pa ngei kha a ni tih a hria a. Mahse, thil mak tak a awm. khatia kha pa zan dar sawm leh minute sawm thum inkara a hmuh lai ngei mai khan Pator pawh chu zan dar sawm vel bawrah bawk thiin an lo chhar reng anih chu. Chu thil chuan mangang tak leh hrilhhai takin a awm tir a, mitthi chuan phir pui emaw unaupa emaw a nei anih te chu a han ring a, a ngaihtuahna chu a buaiin a mangang takzet a ni.

Police lam pawh chuan an thu dawn te chu an bawhzui nghal thuai a, Pu k.Lalngaihawma chhung te hnenah chuan Pu Ngaihawma chuan phir pui a lo nei reng em tih te, unau pianpui, ama hmel hmai nena in ang tak midang an awm em tih te chu an han chhui zui leh ta a. Mahse, Pu Ngaihawma chuan phir pui a lo nei hauh lova, unau amah nena in ang tak pawh chu a lo nei hauh lo lehzel a.

Khami zana Pastor thla ni awm tak hmu tu ni a insawi te kha an kawm chiang leh hlawm a, mahse an ni chuan an thil hmuh chu hmuhsual emaw ruih vang emaw a nilo a, an mit ngeiin an hmu a, dar zat pawh chiang taka an hriat thu an sawi ve tlat mai si a ni.

Tin, an zinga a fiahna pawh nei tu, Pastor thlalak nen lama neitu pawh chu a thlalak neih te chu uluk taka en dik sak a ni ta a, khami zana mi ngei kha a ni em tih te, siamchawp a ni em tih te, tin thlalak a mi Pastor ni ngeia lang chu midang, Pastor hmel hmai ang tak an lo ni zawk lo maw tih te chu an han chhui chiang leh dap a. Mahsela, chung mi te thil tawn leh an thil hmuh chu an fiamthu hauh lo a ni tih chu Police te hmuhchhuah a ni leh ta tlat mai.

An thawmhnaw hak in ang chiah chiah te chuan thu dik ngei an sawi niin a lantir si a. Thlalak chu a tak ngei ni chuan a lang a ni.

Inspector chuan a lu chu a dawm vang vang reng a. "Rinpui, Crime scene thlalak ho kha rawn la teh" a han ti a, Rinpuia chuan hmanhmawh tak chung chuan Crime scene thlalak ho chu a han la nghal thuai a. Inspector chuan uluk fe hian Pastor ruang thisen nena inchiahpiah nuai mai chu a han thlek vang vang a.

Pastor thih zana Pastor thalak lo la fuh tu thlalak chu ngun tak chuan a han en veleh bawk a, Inspector hmelah chuan engemaw thil fel hlel deuh a awm ni ngei tur a ni.

Inspector chuan, "Rina, hei thlalak pahnih hi ngun deuhin en rawh, Pastor thuamhnaw hi han en teh, coat suit dum ve ve an ha a, hei a ruang a a landan leh thlalak pakhat zawka a landan te hi an in an lohna hmuh tur a awm meuh lo chu a ni. Tarmit a bun hi a thihna hotel rooma dawhkan chunga tarmit ngei kha niin a lang lehzel a"

Rinpuia chuan, "Sir, thil dik lo a awm tihna em ni? A lo ti hu mai. Inspector chuan, "Nilo Rinpui, a dik mah mah zawk a ni. Mit ngeiin thlarau thlalak kan hmu ve ah in ngai mai ang" Rinpuia chuan, "chu, thil a diklo tawp tihna anih chu Sir, thlarau hmuh hi thil pangngai lo tak a ni"

Inspector chuan, "Nilo Rina, Pi Vanhmingi thu min hrilh kha ila hria em? Hei, min rawn biakna pawh text hmangin a ni, call pawhin min rawn bia alawm. kan Pastor nupui Pi Vanhmingi hi a fate leh chhung ten rilru lama damlo tiin sawi mahse, ka hnena a thusawi tak te kha a dik ngei niin a lang tan dawn tlat niin ka hria.

"A pasal, Pastor thihna hi dawi thil leh thlarau nena inkungkaih thil niin a lang dawn tan a ni mai lo maw? A lo sawi dik ngei pawh a ni zawk maithei asin" Rinpuia chuan mak a ti hle a. "Sir" a han ti a. Inspector chuan, "Enge thil dik lo a awm em ni? Rinpuia chuan, "Sir, tuna i awmdan kha, mi ang lo leh rilru lam buaina nei i ang lutuk. Sir ti teh, heng thil mak lam ringawt hi i buaipui lo ila, misual hi i man vat zawk teh ang"

"Sailova hi misual a ni. Pastor Ngaihawma thattu a ni. Dawt a sawi a, inphat mar dan a dap a ni. Hetianga kan awm zawngin rilru lam buai ho awmna lamah tirh liam kan ni hlauh a nge. Sir, ngaihtuah ve mah teh, kha, hman kum tawhah hmeichhe pakhat Christina-i thih dan chungchang kan chhui chiam tawh kha.

"Khami tum khan Christina-i thlarau bia anga i insawi avang leh a thih dan chu mahni intihlum ni lova a pasalin a that ni a i sawi avang khan rilru lam buai awmna ah thawn liam kan ni lo chauh tawh anih kha. Khatiang thil khan tunah min tihbuai leh a tum mek a ni. Nilo, khatiang thil kha a thleng tawh tur a nilo"

Inspector chuan zuai zet hian, "imm, kha thu i rawn sawichhuah takah chuan ka la hrereng mai. Christina-i kha amah a intihlum anih kha ka ring thei lo a ni" Rinpuia chuan, "Sir, a thlarau pawh i bia a. Sir, i be tak tak em? Christina-i thlarau kha i hmu tak tak em?

Inspector chuan, "Rina, nangpawh Victor-a thlarau boruaka a thamral lai kha i hmu tak tak em? An han ngawi dun ren rawn a. Chutah, Inspector bawk chuan, "He thil hi thlarau hnathawh emaw dawithiam thil tih emaw anih theihna lai a awmin ka hria"

Rinpuia chuan, "Lalpa leh! Sir, rilru buai nih i duh tak tak em ni? Inspector chuan, "Rina, he case avang hian kan buai ru mek chu anih hi maw. Misual kan la man thei lo a, Pastor thih dan hi kan la chiang thei hek lo. Tin, khang voice recorder-a tualthattu ni a ngaih leh victim inbiakna inpersan lutuk mai te kha thil pangngai a ni lo a ni. khatianga tualthattu leh a mi thah tur inbiakna inpersan deuh kha i hre tawh ngai em? Khang te, hei tunah mi hrang hrang mi pa thum ngawtin Pastor thlarau ni a ngaih theih tur an hmu a ni a, pakhat phei chuan a thlalak nen lam, a finfiahna nen lam a nei thlap nghe nghe a ni a"

Rinpuia chuan, "Sir, rilru buai ang leh thluak buai anga awm chu ka duh hauh lo a nia. Victor-a thlarau kha a lo kir leh a ni. Christina-i kha thah ani tih kan han hrechhuak a, mahse kha thil kan buaipui avang khan rilru buai awmna ah kan luh phah thelh a. Tin, a hnu lehah keini Police te chauh nilo, Doctor Freddy-a leh Doctor Hriatpuia te nen kan buai leh tak zia te kha"

File hlui te chu haiin sulhnu hlui leh chanchin hlui an thlek let leh chu a tul ni ngeiin a lang ta. Christina-i pasal, a nupui thattu a ngaih Victor Vanlalpianga kha a chanchin an chhui zui zelna ah amah kha khawchhak lam unau kan tih burma mizo kan tih ang hi a lo ni a. He lai Mizoramah chhung leh khat a nei lem lo ni a hriat a ni.

Tichuan, Christina-i nen khan an innei a, an nupa karah chanchin neuh neuh sawi tur a thleng ve fo thin bawk a ni awm e. Tichuan, Christina-i kha khaw pawna building ruak pakhatah inawkhlum a hmuh a ni a. Mahse, Inspector Remruata hian Christina-i chu inawkhlum ni lovin thah anih thu a sawi tlat thung, a thattu pawh a pasal Victor-a ngei chu niin a ngai a ni.

Hun a kal zel a, Victor-a pawh chu zawn a ni a, mahse a awmna hmun leh a hnu an chhui tawpna ah zel chuan Victor-a chuan Identity hran a lo nei zel a, nupui a lo nei zel bawk. Mahse, a awmna hmun a piangah chuan a awm nghet ngai lo a, hmun hrang hrangah a insawn kual zel a ni.

Tin, a nupui te chu mahni intihlum emaw thih dan pangngai lo deuhin an thi zel a, nupui pathum a nei a ni. A tawp a tawpah Victor-a awmna chu va nang ching ngei dawnin Police te chuan an inhria a, mahse Victor Vanlalpianga chu a thih tawh thu an lo hrilh ta tlat mai. Tichuan, Victor-a thlan ngei pawh chu Inspector Remruata leh Rinpuia te chuan an va tlawh ta nghe nghe a ni.

Mahse, hun rei tak a liam leh hnuah rilru lama damlohna nei ni a insawi, thil rapthlak tak leh tihbaiawm tak tawng thin ni a insawi putar Kum uai thla tan ni tur hi a rawn lang hlawl mai a. Inspector Remruata bawk chuan chu pa leh a kaihhnawih thila hriatthiam har tak tak chungchang te chu a chhui leh ta a, mahse a tawp a tawpah chuan chu pa, putar, rilru lam harsatna nei ni a insawi chu kum tam tak liam tawha mi a nupui thattu ni a ngaih leh thi tawh ni a an lo ngaih Victor-a ngei kha a lo ni reng tih an hrechhuak leh ta a ni.

Mahse, chumiah chuan a la tawp mai lo. Victor-a chu Rinpuia mit hmuh lai ngeiin boruakah a thamral mauh mai si a. Chuti anih chuan Victor-a thlarau chu a rawn kir leh tihna em ni ang? Victor-a kaihhnawih thil reng reng mai chu hriatthiam a harin dawi leh thlarau lam nena inkungkaih tlat niin a lang a, chiang tak leh fiah taka thil awm zia hmuh theih a ni mai ngai lo a ni. An rin dan leh chhui dawn dan te, an zeldin thu hmanga an ngaihdan te chu an thil rem khawm leh hriat te an ni mai awm e.

Inspector chuan Rinpuia hnenah chuan, "Rina, Pi Vanhmingi kha rilru lama dam lohna nei ni khan sawi mahse kawm chian ka duh ta hle mai. keimah ngei hian hmaichhanah ngei kawm ka duh a ni". A ti ta a.

Rinpuia thung chuan inspector ngaihdan chu tawmpui har a ti hle a. "Sir, heti hian khaikhawm ila rilru pawh a hahdam berin ka hria a ni" a han ti a.

"A hmasa berah chuan Pastor chu thah niin a lang a, Crime scene-a a landan te, tin postmortem result-a a landan te kan hriat vek tawh kha. Tichuan, keini in investigation kan tan ta a, tualthattu ni a rinhlelh chu tu dang an nilo, Police hnena thlen tu vanlalsailova ngei hi a ni. Sailova chu rinhlelh anih theihna lai evidence kan nei a, Pu Ngaihawma fanu nen an inlaichinna pawh kan hria a, tin Pu Ngaihawma nen inkar tha lo tak an neih thu te, tin a lakah Pu Ngaihawma a thinur in a lungawi lo thin hle tih te, tin khami zan khan Pu Ngaihawma chuan a awmna hmunah a koh thu te.

"Tichuan, Pu Ngaihawma awmna hmun a va thlen chuan zan dar sawm bawr vel anih thu a sawi a, Pu Ngaihawma thih thu a rawn report khan zan dar sawm leh a chanve a ni. Chumi dar sawm leh minute sawm thum inkarah chuan kha laiah khan midang awm an awm ve lova.

"Chuti anih chuan Pu Ngaihawma thattu ni ngeia lang chu Sailova chu a ni ta a ni. Tichuan, tualthattu chu sailova chu ani tih a lanna dang a awm leh ta zel a. Sailova ngeiin an inhnial thinrim chiam thu a sawi a, tichuan pawnah minute hnih khat chauh a va chhuak a, mahse a va lut leh chu Pu Ngaihawma chu hliam pui tuara a lo awm thu a sawi a. Han ngaihtuah ve mah teh sir, tualthat tu hi hum hram hram tum kan ang ka ti ber tawh. Lehkha leh Voice recorded a awm bawk a"

Inspector chuan, "I han khaikhawm dawn chu a tira mi pangngai tan pawha hmuh thelh theih hauh loh tur an ni alawm. Mahse, voice recorded a thil awm khan 'mak' tih tawngkam leh 'dawi' tih tawngkam te, 'thlarau' tih tawngkam mai nilo mit ngeia hmu ni a insawi te leh a finfiahna thlalak te chu a rawn pian chhuah tir ta zel anih hi.

"I khaikhawm dan zul zui chuan case hi a hmawr kan bawk thei ngei mai. Mahse, heng thil mak leh thlarau lam te hi kan thai bo a tul dawn tihna a ni a. Kha voice recorded kha kan tichhe bawk tur a ni. kha thil kha he case-a thil mak hmasa ber a ni si a. Tichuan, misual chu Sailova hi a ni tihna a ni ang a. Tin, Sailova hi inpuang duh lo mahse Court chuan Sailova ngei chu misual anih an ringhlel bik hauh lovang.

Rinpuia chuan, "Sir, lehkha leh Voice recorded kha chu a pawimawh Takzet zawk asin" a lo ti thung a.

Inspector chuan, "Rina, khang Voice recorder chungchang kha chu tualthattu Sailova Ukil hian a fiah lohna a hmuh thelh bik hauh lovang" a han ti a, a ngawi leh vang vang a.

Rinpuia chuan, "Sir, kha mi chungchang kha chu sawi chhuah nachang a hre lo tawp ang, Sailova hi tualthattu fing tak a ni emaw kan lo ti a, a fing vak lo a ni tih a thusawi dan zawng zawngah khan a chiang a ni. Mi fing tak chu nise a thusawi dan zawng zawng ah khan amah hi tualthattu ni ngei ni a lang chu a ni tih a inhrethiam ngei ang. Dawt sawi a thiam lova, a mah rinhlelhna atang hian a insawi fihlim thiam hauh lo zawk a ni" Inspector chuan, "chumi tak chu a ni he pa Sailova hi misual anih ka rin lohna chhan chu ni. Thu dik a sawi a ni mai a, a tih a nilo a ti bawk a" a lo ti leh a.

Inspector bawk chuan, "Imm, heng thil mak te hian mi run riau mai" a han ti a. Rinpuia chuan, "Sir, thang a ni. Kha pa, victor vanlalpianga thlarau khan thang a valh mek zel a ni. Ngaihtuah ta che, thlarau thil tih hi mihring pangngai hian engtikah mah a finfiah ngai lo ang.

"Chuvang chuan keini hi kan buai zel zawk a nga, nakinah chuan a duh ang ngeiin keini chu rilru lam buai leh thluak buai anga ngaih kan la ni dawn a ni. Chumi hunah chuan rilru Doctor te hnenah thawn liam kan ni ang. Hman kum, Christina-i thihna kan chhui tuma a hmawr kan bawk dan chiah kha a thil tum a ni. Mahse, khami tum kha chuan engtin tin emaw rilru buai awmna kha kan pumpelh ta kha a ni a, kha thil a puitlin theih tak loh kha tun tumah a rawn tharthawh leh a ni" Rinpuia aw ka chu a chiangin a fiah kalh kalh thin hle mai a.

Inspector chuan, "Rinpui, khami tum, Christina-i case kan buaipui tum khan a dik anih avangin nge a dik loh avanga khatia rilru buai awmna a thawn liam kha kan nih? A han ti a. Rinpuia chuan, "Sir, ka hmuh dan chuan thu dik leh thu dik lo a hriat theih tawh loh, mahse hei erawh ka rindan a ni ve tho, thlarau tihbuai in kan awm a ni tih hi.

"Thlarau hnathawh a ni miau a, mihring pangngai tan hi chuan a nihna tak hmuh a har anih hi. Kan dikna avanga rilru buai ni a ngaih kan nihna lai a awm thei ang a, kan dik tawk lohna avanga rilru buai ni a ngaih theih kan nihna lai pawh a awm tho bawk awm e. Kei ngei pawh khan Victor-a thlarau boruaka thamral ta ka hmuh khan ka thluak chu a buai zo ta emaw ka ti ve tho asin. Mahse, ka thil tawn leh ka hmuh kha a dik lo ka ti phal bik lo a, mahse keimah ngei pawh hi ka inringhlel deuh tho bawk si a" a ti ta ta.

Rinpuia bawk chuan, "Sir, ka hmuh dan che chuan he case-ah hian ila buai deuh niin ka hria, thutlukna mumal tak ila siam thei tlat lo a ni tiraw? Victor-a'n min tihbuai leh hma ngei hian kan inthiarfihlim a tul a ni. Vanlalsailova hi misual chu a ni. Vanlalsailova hi hum hram kan tum a ang ka ti a ni" a han ti leh a.

Inspector chuan, "Rina, khami tum, Christina-i thihna kan buaipui tum khan Victor-a kha thiam loh chan tir a ni ta lova, tin amah ber kha a lo thi tawh si a. Christina-i kha a pasal khan lo that tak tak ta se, amaha inawkhlum kha lo nilo tak tak ta se thu dik chu kawtthlerah a tlu reng dawn tihna a ni asin. Tunah pawh hei Pu Lalngaihawma thattu hi Sailova hi lo nilo ta se, pawikhawihtu nilo chu man a ni dawn tihna asin" a ti ta a.

PSYCHIC Volume _3

Bung Lina

Inspector hmalakna chuan hnuchhui hna chu an thawk ta zel a. Misual chu tunge anih tih chu hriatchhuah a la nilo tihna a ni. Inspector chuan Pu Ngaihawma thlarau hmu tu ni a insawi Andrew-a chu thu zawtfiah leh tur chuan a han ko leh a, a ni hi Pu Ngaihawma thlalak pawh nei thlap tu kha a ni.

Inspector chuan Andrew-a hnenah chuan, "Andrew, kha thil i tawn zan khan enge maw thil tulah i chhuah lawk thu i sawi a" a han ti a. Andrew-a chuan, "Aw sir" a lo ti a. Inspector chuan, "Engvanga Pu Ngaihawma ni ngeia lang kha hmu nge i nih? A zawhna awmzia chu a hrethiam lo niin a lang. "Sir, ka tum reng vang a hmu ka nilo" Inspector chuan, "Andrew, dawt hi chu thuhruk rei theih a ni ngai lo asin" a han ti a.

Andrew-a chu a phawk hle a. "Sir, dawt ka sawi i tihna em ni? A han ti a. "Aw, dawt ni a ngaih theih tur emaw thu thup nei ni a ngaih theih tur chein i thil tawn dan chungchang min hrilh a ni" Andrew chuan, "Enge dawt ka sawi chu? a han ti a. Inspector chuan, "Thlarau hmu ni a i insawi hi dawt chu a ni, a chhan chu thlarau a ni silo atin ni" a ti ta a.

Andrew-a chu a hamhaih hle a. "Chu sir, khami zana Pu Ngaihawma ka hmuh kha thlarau a nih siloh chuan enge anih tak ang? Inspector Chuan, "imm, thlarau nilo ve, heng thil mak leh thlarau lam chungchang ringawt hi chu awih a harsat ang bawk hian thu dik tawk lo an ni tlat a ni. Khami zan khan zan tir lamah Pu Ngaihawma chu i hmu ngei mai, a thla te pawh i la a. Mahse, Pu Ngaihawma a thih lai kha chuan khati lai, Pu Ngaihawma i hmuhna hmunah kha chuan i awm tawh lo. Tin, zan dar sawm leh minute sawm thum inkara hmu ni a i insawi mai kha dawt a ni bawk" a ti ta a. Andrew-a chuan mak a ti hle a. "Chu chu i finfiah thei em ni? A han ti a. Inspector chuan, "Aw thei e" a ti ta tlat mai a.

Rinpuia pawh chuan a thuthmun chu a han siam rem sauh sauh a, Inspector thusawi leh tur chu a beng dawh ha chung chuan a lo ngaithla a. Inspector chuan, "ka han finfiah nghal a nge aw" a han ti a. Andrew-a hmelah chuan zamna a hmuh tel theih ta tlat mai a. Chuveleh, Inspector chuan, "ka ngaihdan zawng zawng hi min tawmpui ve kher turin ka phut lo che, mahse dawt erawh a tlo lo.

"khami zan, Pu Ngaihawma i hmuh hun ni a i sawi kha zan dar sawm leh minute sawm thum bawr anih chuan Pu Ngaihawma chu a thi mek tihna a ni tiraw? a han ti a. Andrew-a chuan, "Aw, chu tak chu alawm mak ka tih ni, a thlarau anih theihna chhan chu" a lo ti vat a. Inspector chuan, "Chuti anih chuan khatia Pu Ngaihawma a ruang chhar a ni tih thu kha amah Pu Ngaihawma thlarau i hmuh zawh rual maia i hre zui nghal thei kha thil theih a ni tlat lo a ni.

"A chhan chu Pu Ngaihawma thlarau i hmu a, hun rei a inrial hmain Pu Ngaihawma ruang chhar anih thu i hre zui mai a, chu chu engtin nge anih theih? engtin nge i hriat theih? khawi lai news ah mah i hre lo. Hriatna dang i nei, news-ah ruang chhar anih thu tarlan hman ngaihna a awm lo hrim hrim, ruang chharna bulah i awm lo a, tu chanchinbu phek mahin ruang chhar anih thu an chhuah hman lo hrim hrim. Tin, Pu Ngaihawma hi i mi hriat zawng a nilo a, a laina hnai emaw i ni hek lo, mahse khati khan rang takin a ruang chhar anih thu i hre nghal thei tlat si a ni"

Andrew-a chu engemaw sawi tum chuan a han ang zuau a, chutah Rinpuia chuan, "Kha chu sir, kha lai ruang chharna hmuna lo awm ve midang tu emaw ten an post emaw a lo hmuh vang a ni maithei asin" a lo ti a. Inspector chuan, "Nilo, he pa hian chutiang a hmu lo. Rang taka Pu Ngaihawma ruang chhar anih thu a hriat nghal theihna awm chhun chu hei chauh hi a ni. Pu Ngaihawma nen hian an inhre ngai lo a nilo a, an inhre hnai vai tihna a ni mai, chhung te tawhsual tawk chu kan hre har bik lo tawp ang" a ti ta tlat mai a.

Andrew-a chuan, "Sir" a han ti a. Inspector chuan, "i sawi hmang kha chuan Pu Ngaihawma hi i hre ngai lo tihna a ni a, news atanga ilo hriat ve chauh thu i sawi a" a han ti leh a.

Chutah, Andrew-a chuan, "Aw le Sir, Pu Ngaihawma thih thu ka hriatna chu ka han sawi a nge" a ti ta nge nge a. Inspector chuan, "Dawt sawi tum reng reng suh ang che, kan chhui zui nghal zel dawn a, kan finfiah nghal zel dawn. Tin, i mobile phone kha khaw maw lo la teh" a han ti leh ta mai a, Andrew-a chuan, "Sir" a lo ti leh ringawt a. Rinpuia chuan, "Inspector thusawi chu i hria em? a lo ti vin thawt mai.

Inspector chuan, "Nilo Rina, he pa hi misual a lo ni reng thei a, mahse kan la finfiah lo. Tin, misual nena inthurual an lo ni thei bawk" Andrew-a chuan, "Sir, ka sawi a nge. Thu dik tak chu hei hi a ni. Pu Ngaihawma fate nen hian kan inkawm ve thin ngei a, mahse kan inkawm tam lo thung. Pu Ngaihawma ngei pawh hi ka hria alawm, mahse khatia a chanchin ka hriat nghal mai theih dan kha chu thil dang deuh a ni. Ni e, news emaw atanga hria chu ka nilo ngei mai, Pu Ngaihawma fanu WhatsApp status atanga hria ka ni.

"Ka sawi tak ang khan an ni chhungkua nen hian kan la intlawhpawh ve tho a, an chhungkua mimal tin number te pawh ka la nei vek a ni" Inspector chuan chik zet hian, "Thil thup lai ila nei, chu pawh chu sawi nghal rawh" a han ti leh a. "Sir, eng thil mah thup ka neilo asin" Inspector chuan, "Chuti si engatinge khatia Pu Ngaihawma, kha lai kawngpui kianga i hmuha a thla te nen lam i lak hnua hmelhriat ngai loh ang maia i ngaihven zui loh?

"I thiante pa chu i hmu a, a thlalak te pawh kha tihpalh thil niloin i tum lui hrim hrim zawk pawh a ni ang. Tin, i thlalak te chu i han en a, Pu Ngaihawma chu i bul maiah a lo awm ve reng a ni tih chu i han hre ta a, mahse i ngaihven zui miah lo, hmelhriat ngai loh ang maiin i en liam mai nge, chutia thian te pa han hmuh fuh chuan tute pawh hian an ko ding emaw tawngkam hnih khat tal chuan an be ngei ngei ang. Nge ni a in inbe luam zawk a nga, mahse thlarau ni a lantir phet i tumna lamah i hmelhriat loh chhuah ta mai zawk ni? Rinpuia chuan, "Intih lar i tumna mai mai a lo ni maw mawla, i thiante pa a ni asin" a lo ti a.

Inspector chuan, "khami zan a thil thlen dan kha kimchang takin dawt tel miah loin min hrilh rawh" a ti leh a. Andrew-a chuan a heh chu a han pet fan fan a. "Awle Sir, ka sawi hreh viau mai. Pu Ngaihawma te chhungkua nen hian kan inhnim hnai viau tawh lo a. Mahse, a fate nen chuan kan la inkawm ve zauh zauh. Mahse, khatia Pu Ngaihawma ka han hmuh khan a thla te chu ka la lui ngei alawm, ka tihpalh a nilo ngei e.

Inspector chuan, "Enge a chhan? A lo ti a. Andrew-a chuan a heh chu a han pet a. "Sir nilo. Ka sawi thei lo" a han ti a. Inspector chuan, "Khaw maw, i cellphone chu" a han ti a. Andrew-a chu a mangan hmelin a phawk hle mai a.

Inspector chuan Andrew-a cellphone chu a han check sak ta a, a thil hmuh avang chuan mak a ti hle mai a. "Andrew, hei i chat list-ah hian i mi biak te hi han en teh, hei hi Pu Ngaihawma nupui Pi Vanhmingi a nih hi? a han ti a. Andrew-a chuan, "Aw sir" a lo ti zuai raih a. Inspector chuan, "Imm, mahse engatinge in inbiakna hi i clear kher a? A han ti leh a. Andrew-a chuan, "Sir, Pi Vanhmingi khan thu mak deuh mai min rawn hrilh a" a han ti a.

Andrew-a bawk chuan, "Sir, Pi Vanhmingi hian ka tanpuina min ngen a ni. Sum thahnem tak min pek a tiam a ni" Rapthlak ti zet hian Rinpuia chu a lo meng rang kaw kaw mai. "Eng a ni? a lo ti vin thawt mai a. Inspector chuan, "Chu, eng chungchang nge ni? A han ti a. Andrew-a chuan, "Nilo, nilo, a atthlak inti maithei, kei ngei pawh khan atthlak ka ti asin, a pasal chu zui ru reng tur leh en thla reng turin min ti a ni"

Inspector chuan a ngaihna hriat loh hmel fe hian, "Ngaihzawng chungchang em ni? Rinpuia chuan, "Zana i hmuh kha chuan midang pakhat nen an nih tak kha" a lo ti a. Andrew-a chuan, "kha hmeichhia kha chu a ngaihzawng a ni thei lo. Motor-a a luha a tlan liam leh thleng khan ka enthla reng alawm, hmeichhia kha a chuang ve lo. Pu Ngaihawma chauh kha a chuang a ni" Inspector chuan, "Mahse, engvanga a pasal Pastor meuh nisi chu enthlak duh tlat nge anih tak ang?

"Sir, Pi Vanhmingi kha rilru lam harsatna nei a ni a, a tirah chuan ka hnena min ngenna te pawh kha âtthlak ka tiin a rilru buai vang maiah ka ngai a ni. Mahse maw sir, kan pi hian thu rapthlak tak mai min hrilh ta tlat mai a ni. A pasal chu a thih thuai tur thu min hrilh a ni. Chu thu zet chu han ngaihthah mai mai kha ka thei tawh tlat lo. Tin, Pi Vanhmingi chuan a ruahman anga ka awm anih chuan sum thahnem tak chu min offer reng bawk si a.

"Chutah le, Pi Vanhmingi leh a pasal inkar chu eng chiah nge anih hriat tum chuan Pi Vanhmingi thu chu ka awih ta a ni. Pi Vanhmingi chu zawhna tam tak ka zawt a, mahse a ni chuan zawhna min zawt lo turin min ti a, a duh anga ka awm chuan sum thahnem tak min tiam a, tin hlauhthawn tur emaw manganna tur emaw a awm loh thu min hrilh bawk a ni.

"Chutah chiah chuan he thu hi min hrilh leh ta a ni. A pasal chu dawi ât a ni a, a thi thuai dawn a ni tih min hrilh a, thlarau lam kaihnawih thil te, dawi chungchang thu te min hrilh leh ta mai a. Kei chuan awih har ka ti a, a ni hi 'a rilru buai vang mai mai a ni' ka ti leh a, mahse sum chu ka duh nghal anih chuan a zatve min pek nghal tur thu min hrilh leh a, a thusawi te ka awih loh avang chuan a thusawi te a dik ngei a ni tih fiah nan sum chu min pek nghal a duh a ni.

"kei pawh chu uluk takin ka inngaihtuah a, sum ka lo mamawh lai tak a lo ni nen ka fiah ve hrim hrim duh ta a ni. Tichuan, sum thahnem tak mai chu pek ka ni zui ta a. A ruahman ang chuan ka awm ta a, a thusawi te chu awih lo mah ila sum ber ka hmu tawh si a, a duh anga ka awm mai chu a tul tawh a ni. Tichuan, a sawi angin a pasal chu ka zui ru ta a ni.

"Khami zan khan ka hmu anih chuan a hmel chiang taka a lan theihna turin a thla la turin min duh a, a sawi dan anga chet la mai chauh kha ka ni. Tichuan, a pasal thlalak ka thawn hnu ah chuan kan inbiakna zawng zawng chu delete turin min ti leh a, mahse ka lo clear ringawt anih hi. Tichuan, In lama haw turin min ti a, chanchin ngaichang reng turin min ti ta a ni, a thusawi dikna chu chumi zan chuan a thleng dawn niin min hrilh bawk"

Rinpuia chuan, "Chumi awmzia chu a pasal chu chumi zan chuan a thi dawn tih a hre lawk tihna a ni maw? a lo ti a. Andrew-a chuan, "Aw, kha thil kha ka beisei hauh lo, mahse a sawi ang zelin eng chungchang nge anih ka hriat loh chanchin ngaichang chuan ka awm ta a, a fanu status chu ka han en a, zan dar sawm leh a chanve a pel awrh chauh a ni. A pa ruang chu Hotel pakhatah chhar anih thu leh a pa chuan a kalsan ta mai chu a tuar thu te, mak a tih thu leh a thawn thu te, rapthlak a tih thu te chu ka hmu ta a ni"

Inspector chuan, "Tichuan" a lo ti a. Andrew-a chuan, "Pi Vanhmingi bawk chuan min rawn be leh a, kei chuan mangang zet hian eng thil nge i tih tak mai, i pasal nunna chu i la ta mai em ni? Ka lo ti a. Mahse, Pi Vanhmingi chuan a thil tih anih loh thu min hrilh leh tlat ang lawi a, a sawi lawk ang ngeiin a pasal chu thlarau sualin a tibuai a, a pasal thihna chu dawithiam thil tih anih a rin thu te chu min rawn hrilh leh a.

Chutah zet zawng Pi Vanhmingi chu a fiamthu lo a ni tih ka hrethiam ta. Mahse, a rilru erawh a buai deuh ni ah ka la ngai ta fan a ni. Dawi leh thlarau sual tih lai taka chu ka pawm hleithei meuh lo, mahse a thi dawn a ni tih a hre lawk kher erawh mak ka tiin ka ngaih a tha lo takzet a ni.

Inspector chuan, "Tichuan, nang chuan a thu i la awih zel a tul si a? a lo ti a. Andrew-a chuan, "Sir, engtin nge chu chu i hriat ka hre lo, aw ka la awih zel. Pi Vanhmingi chuan ka tih tur min tuk sak leh thlap mai pek a, a tukah chuan Police hnena kal turin min ti a, a pasal chu zan hmasa lamah ka hmuh thu leh ka hmuh hun darkar chu a pasal thih hun dar sawm leh minute sawm thum inkar vel anih thu te, Khang zawng zawng, Pastor thlarau ni a ngaihbel theih tur thil ka tawn dan te, a thlalak nen lama ka neih thu te, in hnena ka lokal laia ka thusawi dan ang zawng zawng khan felfai tak leh uluk takin rem min ruat sak a ni. ka sawi tur chin leh ka sawi dan tur te, khang zawng zawng kha Pi Vanhmingi min phuahchawp sak vek a ni" a ti ta a.

Inspector leh Rinpuia te chuan uluk tak chuan thil awmzia ni a lang ta chu an han ngaihruat leh ta dauh dauh mai a. A landan ni ta ah chuan Pi Vanhmingi chuan a pasal thi tur chu a hre lawk vek a, tichuan a pasal thih chhan leh a thih dan chu mak tak maia lantir a tum ta a, a pasal thih hun tur a hriat lawk miau avangin a ni tan chuan dawi leh thlarau sual hnathawh ni a ngaih bel theih tur khan ruahmanna siam a harsa ta lo a ni.

Inspector chuan, "Pi Vanhmingi hian Plan a nei a ni tih chu chiang takin a lang a ni. Thil pakhatah chauh plan a nei lo a, heng zawng zawng hi dawi leh thlarau sual hnathawh a ni tih hi min hmuh tir a, min rin tir a, tarlan hi a thil ruahman chu niin a lang ta a ni. Thu hre tu dang a nei leh zel a, nang chauh nilo a pasal thla hmu tu ni a insawi mi pahnih dang pawh kha nangmah ang chiah tho hian sum hmangin thu hretu derah a hmang tihna a ni mai" Rinpuia chuan, "Sir, Pi Vanhmingi hi tualthattu ni a rinhlelh theih turin chance a tha ta viau mai, a pasal chu thatin dawi a ni tih min rin tir a tum chu a ni a, a ti mak ve ngawt mai" a lo ti a.

Rinpuia bawk chuan, "Sir, Vanlalsailova kha, kha pa ngei kha tualthattu chu a ni. A bul thut ber erawh Pi Vanhmingi hi a ni tihna a ni mai a. A ni remruat ang zel hian heng a mi rawih ho hian chet an la kual ta tihna a ni ang. Mahse heng ho hian Pi Vanhmingi thil tum hi an hriatpui ve vek kher lo maithei. Sum an hmu a an duhtawk mai a niang. Tin, he thil a ruahman atthlak zet mai leh awih awm loh zet mai, dawi anih chungchanga plan hi a lo hlawhtling ta lo anih chuan Vanlalsailova hi a dawt leha a tal awh tir tum chu a lo ni reng maithei asin.

"Plan hi pahnih a rualin a nei a ni. Vanlalsailova hi a bum anih hi. Heng ho hian Pi Vanhmingi hi an hrechiang lo tawp a ni. Vanlalsailova hi thiam takin a rilru a hmin a ni ngei ang, tun thleng pawha a la inpuan duh loh ni. Kha Voice recorder-a thu inpersan lutuk mai pawh kha Pi Vanhmingi ruahmanna mai a ni. A makna lam leh hnuchhui tu te min ti hrilhhai tur zawng ringawta chet lak hi a thil tum leh a duhdan ni ngeiin a lang a ni" a han ti leh a.

Inspector pawh chuan thawk te chu a han la halh halh reng a. "Imm, thu dik chu a lan belh zel e" a han ti a. Rinpuia chuan, "Tichuan Sir, Sailova chu misual anih ila ring lo cheu em? A han ti a. Inspector chuan han rum nghat pah chuan, "Chu zawng, amah hi kawm leh phawt ka la duh a ni" a ti ta a.

Pu Lalngaihawma thla hmu tu ni a insawi mi pahnih pawh chu thu zawhfiah veleh an ni ta a. Inspector chuan a beisei ang chhanna a hmuh tak mai lohah chuan an Mobile phone chu check sak a duh ta a. Tichuan an ni pawh chu an Mobile phone atanga a lan dan chuan Pi Vanhmingi hnen atangin sum tha hnem tak an hmu ve ve tih chu an hre leh ta a. Chutia Pi Vanhmingi ruahmanna te hriatchhuah a han nih takah chuan Pu Ngaihawma thla hmu tu ni a insawi mi pahnih pawh chuan khami zana thil thlen dan chu an han sawi ve ta a.

Pakhat zawk chuan khami zan khan eng thil danglam mah a thlen loh thu a sawi a. Pi Vanhmingi hnen atanga message a dawn thu a sawi a, tichuan Andrew-a ang bawk khan Pi Vanhmingi chuan pawisa pein Pu Ngaihawma thla hmu angin a insawi ta a. A hmuh hun darkar te, a hmuhna hmun te, tin Pu Ngaihawma bulah chuan mi tu emaw midang an awm ngei ni a ngaih theih turin midang awm ve ni a an hriat thu te chu a phuahchawp tir ta a lo ni.

Police hnenah bawk chuan a thlen tir leh a, tin midang leh pawh chu chutiang deuh a thil thlen dan phuahchawp tir lehin sum pawh a inseng hnem viau a ni.

Inspector chuan Pi Vanhmingi ngei chu kawm chian a duh ta a, amah ngei chuan hmachhawn a duh a ni. Chumi hma chuan Inspector chuan ruahmanna a nei a, a ruahmanna ah chuan Pi Vanhmingi'n a mi rawih te zinga mi Andrew-a kha Pi Vanhmingi veh let nana hman a tum ta a.

Rinpuia chuan a pu ruahmanna te chu a han ngaihtuah chiang a, chetsual palh awl dawn riau hian a hria a, tin an beisei ang chhanna an nei theiin a ring lo bawk a ni. Mahse, Inspector chuan a ruahmanna chu a hlawhtlin ngei erawh a beisei tlat thung a.

Andrew-a hnenah chuan Inspector chuan, "Andrew, heti zawng hian min pui let ve tur a ni. A hmasa in Pi Vanhmingi hnenah i kal ang" a han ti a. Andrew-a chuan, "chuan enge ka tih ang?" a lo ti a. Inspector chuan, "Tichuan, a hnenah chuan thil pawimawh tak sawi dun i duh thu i hrilh tur a ni. Sawi dun loh theih loh tur khawpa i hmin thiam a tul ang, kan lak a i lemchan thiam ang bawk khan i theihtawp i chhuah tur a ni" Andrew-a chuan a lu chu a bu nghat a. "Sir, a dik tak chuan kei ngei pawh hian thu dik hriat ka duh asin. Pu Ngaihawma hi a nupui hian a that reng em tih zawhna hi ka inzawt fo mai"

Inspector chuan, "Pi Vanhmingi hnen atang hian a pasal thih dan dik tak chhanna kan duh tlâng a. Aw le, heti hian i ti ang, a ni nen chuan titi dunna hun remchang i zawng ang a, hun remchang chu i hmuh veleh i phone-a Voice recorder kha i on ang. Tichuan, Pi Vanhmingi chu thiam takin i dawp dawn a ni. Thil thlen dan engkim chu a hrilh theih nan che i kar dawn a ni.

"Keini police lam pawhin tualthattu chu tunge anih kan hriat tawh thu te i hrilh ang. A ni chu a bul tum tu anih ngei thu te, Sailova pawh a inpuan vek tawh thu te i hrilh ang, i hrethiam em? Mahse, Sailova pawh a inpuan vek tawh thu chu engmah a sawi that duh loh hunah chauh i hrilh thung dawn nia. A tan tirah chuan thil awmzia hrilh nghal mai lovin i veh thlem hmasa phawt dawn tihna anih chu?

Andrew-a chuan, "Aw Sir, ka hrethiam e. Mahse, Pi Vanhmingi hi rilru a harsatna nei a ni si a, a chhungte pawh hian an duatin an ngaihtuah em em a, keh thei dawmin an dawm asin.

Inspector chuan, "Pi Vanhmingi hi rilru lama dam lo anih hi i ring reng reng em ni? A fingin a ngaihtuahna a harhfim takzet zawk. A buai lo tawp tihna anih chu, mahse i hlauhthawna i inhuam loh chuan nangmah ngei hi chhui zui i ni ang a, lung In-ah engtia rei nge i tan ang tih hriat a ni hauh lo ania. Tualthattu tanpui anga ngaih i ni ang a, tualthahna a inhnamhnawih anga ngaih i ni bawk ang"

Andrew-a chuan hreh hmel zet chuan, "Sir, ka huphurh tih chu ka zep hauh lo, a chhan chu a fate lakah zawk hian lem ka chang thiam a ngem tih zawk hi a ni. A fate nen hian kan inkawm ve fo si a, ka lemchanna chu kar lovah an hrethiam thuaiin ka ring a ni" Rinpuia chuan, "A fate chu tihbuai an tul anih chuan keini in kan rawn cover dawn che alawm" a lo ti a.

Chutah, Andrew-a pawh chuan, "Aw le ka ti ang, mahse kei leh ka chhung te chungah eng thil tha lo mah a thleng zui lovang tih min tiam ru" a han ti a. Inspector chuan, "Chu zawng kan tiam thei lo che tih i hria e, mihring nun hi kum khuain a him reng thei hleinem, kan la thi vek dawn alawm" a lo ti a.

PSYCHIC Volume _3

Bung Ngana

An ruahmanna te thawhchhuah pui tura Andrew-a an han tih takah chuan an ni Police lam pawh chuan Sailova chu station lamah chuan an han ko veleh ta a. Inspector chuan sailova chu a en ngun hle mai a, minute khat dawn chu engmah sawi lovin uluk tak hian Sailova mitah tak mai chuan a han en reng a, sailova pawh chu a zam kher mai, a hrilhhaiin a mangang hle a ni tih a hriat theih.

Inspector pawh chuan a mit chu la la sawn chuang reng reng lo chung chuan, "Sailo, thil pakhat min tih sak turin ka duh che a ni". A han ti a. Sailova chuan phawk fe hian, "Eng, eng thil maw sir? a lo ti a. Inspector chuan, "Thil ho te mai mawle, Pi Vanhmingi ka call ang a, Pi Vanhmingi hnenah chuan Police ten an hriatchhuah tawh thu hi i hrilh ang. Tichuan, a ruahmanna te pawh an hrechhuak vek tawh a ni tih i hrilh ang" a han ti a.

Sailova chuan phawk fe hian, "Eng ruahmanna maw sir? a han ti a. Inspector chuan, "Thu tui tam vak a tul lo, ka sawi angin ti mai la a tha a ni mai" a han ti leh a. Chumi rual chuan Inspector chuan lehkha phek a thu inziak tlar duah chu a han phawrh a, Sailova hnenah chuan, "Hei hi i thusawi tur chu a ni. Pi Vanhmingi'n phone a lo pick up veleh ah he thu hi i sawi tan nghal ang. A tha em?

Sailova chuan, "Sir, enge thil awmzia hi? a han ti a. Inspector chuan, "kha, ngun takin chhiar rawh, i hrethiam mai ang" a lo ti a. Sailova chuan ngun tak chuan lehkha a thuziak chu a han chhiar a, mak tiin a meng kaw kaw thei hial a. Chumi lai chu Inspector pawh chuan uluk tak chuan a lo en ve ran reng a.

Sailova chuan, "Mahse sir, hei hi chu, hei hi i phuahchawp tihna em ni? a han ti a. Thuziakah chuan Sailova chu tualthattu anih thu te a lo inziak a. Sailova bawk chuan, "Sir, kei hi tualthattu ka nih thu te, tin Pi Vanhmingi mi rawih ang te a min ngai mai leh min chhuah mai duh hi enge a awmzia? a han ti leh a. Chutah, uluk taka Sailova en chung chuan, "Sailo, heng hi ka phuahchawp i ti a maw? Inspector ngaihtuahna chu a buai lek lek thei hial mai. Chutah, uluk tak hian a han inngaihtuah leh a, Sailova fin khalh chu tha in a hre ta a. "Imm, a tha e,ka phuahchawp pawh chu lo fahmiang, tualthattu i ni tak tak lo anih pawhin enge buaina tur awm? min tanpui dawn a ni mai a.

"Sailo, Pi Vanhmingi hnen atang hian eng thil emaw hriat duh kan nei a ni. Hetianga thu kan phuah hi a ngai. Tichuan, kan hriat duh tak chu kan hria ang. Misual i nih loh phawt a hnu, keini min tanpui nana lem i han chang tur chu a pawi viau dawn em ni? Sailova chuan, "Mahse Sir, Pi Vanhmingi hi a lo hrilhhaiin a lo mangang dawn lutuk asin, chu chu enge in tan hlawkna? a han ti leh a, a lungawi lo hle mai a.

Inspector chuan, "imm, thu tui tam vakin awmzia a neilo ka tih kha. khai le, ka call dawn a nia, khawngaihin i theihtawp min chhuah sak rawh" tiin Sailova chu ngen ngawl deuh chuan a han en a. Sailova pawh chuan mangang hrilhhai tak chung chuan, "Awle ka ti ang. Police ten ti tura min duh tlat si chuan" a lo ti ve ta bawk a. Chuveleh, Inspector chuan Pi Vanhmingi chu a han call ta a, lehlam atang chuan, "Hello" a rawn ti a. Inspector chuan Sailova chu han enin a lu chu a han bu nghat a. Chuveleh, Sailova chuan a aw chu a han thian a.

"Aw, Pi Vanhming, keimah ka nia Saitea" thawm chu a reh diak reng a, Sailova bawk chuan, "Pi Vanhming, kan thil tih zawng zawng an hre vek tawh, i ruahmanna zawng zawng nen. Kei hi i pasal that tura min rawih thu te, tin midang pathum chu thu hretu lema i hman thu te, i pasal thih danah evidence lem kan siam thu te, i pasal thihna chu dawi leh thlarau kaihhawih thil ni a lantir i tum thu te engkim hriatchhuah a ni tawh. Chuan Pi Vanhming, hei hi thu dik a ni em? i ruahmanna pakhat zawk a hlawhtlin loh chuan kei hi min tal awh tir i tum a ni tih hi?

"Police te hnenah chuan a kaw tawpah kan tang tih hria in kei ngei pawh ka inpuang vek tawh a ni. I pasal chu dawhkanah a hnar ka tauh tir thu te" Sailova chu a han then deuh chak chak a, a thu sawi leh zel tur chu harsa a ti hle.

"Tichuan, a nghawngah chuan puanin ka rek leh a, tichuan a thin zawnah chemtê a ka vih leh thu te, lehkha ka hnutchhiah a, voice recorder chu ka on a, tichuan kei chuan i ruahman dan ang zelin mangang taka 'tu thil tih nge' ti a i pasal hnena ka zawh thu te, tichuan i pasal min chhanna nen chuan kan thusawi chu a inpersan thu te, chu thil chuan Police te lu a tih hai thu te, engkim a lang vek tawh, ka puang ta vek mai a ni.

"Ka tihpalh lutuk, i rilru lama harsatna nei anga i landan chungchang te thlengin. Tin, hei hi ka hrilh duh che a ni. I fate leh i chhungkua thleng pawh khan Police te chuan an ringhlel zel tawh a. I fate pawhin an tuar mai ang, chuvang chuan i fate erawh kha chu eng thilah mah an inhnamhnawih ve lo a ni tih hi Police te i hrilh ngei a tul a ni. Chuti lo zawng Police ho hian i chhungkua zawng zawng nen lam an khawrh ruak vek duh mai dawn"

Chuveleh Inspector chuan vin zet hian, "A tawk! A rawn ti tuarh a, chumi pah chuan Sailova kut ata phone chu a phih tlak sak lawp mai a. Phone chu dahin chuveleh Inspector chu a han nui sang a. "Awle, i ti tha lutuk e, Sailo ka lawm lutuk e" a han ti a. Sailova chu a tah a chhuah hmel hle mai a. "ka pu, eng in ti zo ta nge? in â zo ta em ni? A han ti a.

"Inspector, i thil tih hi a âtthlak lutuk. Pi Vanhmingi leh kei hi dawtin min puh a ni. fiamthuna chi pawh a nilo asin. Kha kha enge a awmzia? Chuan Pi Vanhmingi hnen atanga chhanna engemaw i beisei ruk chu i hre duh leh chuang silo tihna em ni? Engtin mah min rawn chhan let ve hma hauhin khati khan" a lu chu a han dawm vang vang a. "Sir, nang ni hian infiam nan min hmang em ni? Thawm chu a reh tlawk tlawk mai a.

A Mobile phone-a Voice recorded chu han hmuh in, "kha le Rinpui, evidence tha lutuk mai chu" a han ti a. Rinpuia chuan, "Eng, eng evidence maw? a lo ti a. Inspector chuan, "Aw, tualthattu ni a rinhlelh Sailova inpuanna chu maw le" a han ti a. Rinpuia chuan, "sir" a lo ti ringawt a. Sailova leh Pi Vanhmingi inbiakna a ruka a lo record chu a han ngaihthlak tir a, Rinpuia chuan mak a ti hle a.

Inspector chuan, "Sailova hi 'a inpuang duh lo' ti khan i buai i buai si a, hei a inpuanna tha tak chu anih hi" a han ti a. Rinpuia pawh chu a lawm ve hle mai a.

"Mahse Rina, Sailova hmelah leh awmdanah khan thil danglam ka hmu tel tlat a ni. Chuvang chuan Pi Vanhmingi tak tak biak tir chu tha in ka hre lova, Pi Vanhmingi nilo midang ka ruahman lawk sa a ni. Sailova hi misual anih kei chuan ka la ring thei Chuang lo a ni" Inspector chuan a ti leh ta tho a.

Andrew-a chuan hun remchang hmasa ber ni a ngaiin Pi Vanhmingi titi pui tur chuan Pi Vanhmingi te awmna lam pan tur chuan a insiam ta a.

Chutia hun rei tak chhung a hmel an hmuh tawh loh, an chhungkaw thian ang hiala an lo ngaih Andrew-a hmel a rawn lan ve tak hlawlah chuan Pi Vanhmingi fapa Isaka chuan a lo lawm thiam hle mai a. Chumi lai chuan Isaka farnu Tetei pawh chu choka lamah chuan a rawn lang ve bawk a.

Isaka te unau leh Andrew-a te pawh chuan titi ho tê te nen hun chu an hmang ve mek a.

An han titi tawngkam atang leh an landan atang rêng pawh chuan Andrew-a te unau chuan Pi Vanhmingi thil tih zawng zawng chu a fate chuan an hriat pui ve hauh lo anih chu a ring ta a. Chumi lai tak chuan Inspector Remruata leh Rinpuia te pawh chu an rawn lang ve ta bawk a. Andrewa'n Inspector te a lo hmuh veleh chuan a lo thaw huai thei hial a.

Chutia an pa thihna chungchanga Police ten thu zawhfiah an han duh takah chuan Tetei te unau pawh chuan thu zawhfiah tur chuan an thut hmun chu an han siam rem ve ta poh a. Inspector chuan chu Chu remchangah chuhin Andrew-a chu a han mitsir zauh a. Chuveleh, Andrew-a chuan, "Tete, i nu chu ka lo han kawm hlim a nge" a lo ti vat a. Tetei pawh chuan a lo e aw ve ta bawk a.

In chung zawlah chuan Pi Vanhmingi chu lunglen hmel tak mai leh khawhar hmel tak mai hian ral lehlam thlir hian a lo thu a. Andrew-a chuan a aw chu a han thian a, Inspector in a hrilh kha a hre ran mai. Chutia Voice recorder nen lama Pi Vanhmingi a han vehthlem tur chu a huphurh hle a. A ni hnen atang hian sum tha hnem tak a lo dawng tawh a, tunah erawh a ruk a ralin a veh let thung dawn ta si a.

Inspector chuan Tetei te unau chu ngun tak chuan a han en a, chutah muangchang a a rumol-a a hnar han hruk pah chuan, "Imm, Tetei maw i nih? a han ti a. Tetei chuan, "Aw ka pu, hei hi ka nau Isaka" a lo ti a. Isaka pawh chuan, "Sir, ka pa thihna hi inchhui zui zel thei a ngem? Tualthattu hi man ngeia a phu ang hremna pek ngei kan duh a ni" a lo ti ve bawk a.

In chung lamah chuan Pi Vanhmingi chuan, "Drew-a, ka thusawi chu awih mai rawh, pawisa pawh ka pek vek tawh che kha" Pi Vanhmingi hmelah chuan thuruk a awm ni a ngaih theih tur thil rêng hmuh tur a awm lo. "Pi Vanhming, engvanga khatiang nilo, engvangin nge hetiang thil hi i tih?

Pi Vanhmingi chuan, "Drew bawiha, i Pu Ngaihawma kha thah a ni i tihna em ni? A lo ti daih mai a, Andrew-a chu a hamhaih lek lek hman a. "Ka Pi Vanhming, hetianga game khelh kual reng hi i duhtawk tawh ang, thil engkim hriatchhuah a ni tawh. Kei ngei pawh hian Police te hnenah i ruahmanna zawng zawng leh i pasal thla hmu anga min ngaih theihna tura ka chet lak dan zawng zawng te kha ka puang vek tawh asin"

Pi Vanhmingi chu ngun tak in a en a, Pi Vanhmingi chuan, "Drew bawiha, thil awmzia hi i la man thiam dawn lo cheu tihna a ni maw? Chu, ka ruahmanna te, chet ka lak tir dan che kha i sawichhuak vek mai a maw? Ka ruahmanna te khan chhan a nei asin" Pi Vanhmingi hmelah chuan lungawi lohna a hmuh theih a.

In hnuai lamah chuan Isaka chuan a kut chu a han hum ruh ngat ngat thin a, chutah thawk hak pah chuan, "Pu Inspector, ka pa thihna ah hian plan a awm i ti em ni? A han ti a. Inspector chuan, "Aw, ruahman lawk vek thil niin a lang, Sailova hi i hmelhriat a ni em?

Isaka chuan, "Ni tehreng mai, ka nau nen hian an in" chumi lai chuan Tetei chuan, "A tawk Isak, duh tawk ang. Sailova chungchang sawi ka duh tawh lo" a lo ti a. Chuveleh Rinpuia chuan, "Ee, ni mai love thianu, i pa thattu hi he pa i bialpa hlui Sailova hi a ni maithei asin, a rinhlelawm ber a ni" a lo ti a. Tetei chuan, "Ka pu, Sailova hi tualthat duh tur chi a nilo. ka hrechiang, chutiangin a sual hranpa em em lo asin"

In chung lamah chuan Pi Vanhmingi chuan, "Andrew, i thusawi awmzia chu ka pasal hi dawi anih thu leh thlarau sual hnathawh anih ka rin thu hi a darh vek tawh i tihna em ni? Andrew-a chuan, "Ka Pi Vanhming, uluk deuhin ngaithla rawh, Inspector khan engkim a hrechhuak vek tawh. Ka inpuang mai bik lo asin. ka dawt sawi leh ka thil phuahchawp te thlengin engkim a hria"

In hnuai lamah chuan Inspector chuan Tetei hnenah chuan, "Chu, i bialpa hlui chu misual anih i ring lo a ni maw? Tetei chuan, "Sir, Sailova hi misual anih ka ring lo mai ni lovin misual a nilo tih hi ka chiang a ni. A thil tih a ni thei lovang" Rinpuia chuan, "Chu chu a finfiahna i nei em? A lo ti a. Isaka chu a lo inrawlh ve vat bawk. "Ka pu, ka nau hi ka hrechiang, Police te hmaah ama pa thihna chungchangah dawt emaw a rin thu mai emaw chu a sawi lo tawp ang" a lo ti a. A thusawiah chuan a inrintawk hmel cherh chawrh viau mai bawk. Inspector chuan, "Mahse thiante u, Vanlalsailova hi hun inlumleh kual dan leh evidence kan hmuhchhuah tak te atanga misual ni ngeia lang a ni tlat si a ni" a han ti ve bawk a.

In chung lamah chuan Pi Vanhmingi chuan uluk tak chuan thil awmzia chu a han ngaihtuah a. "Drew bawiha, i thusawi awmzia chu kei hi, keimah hi misual ka nih min ringhlel tihna a ni maw? Khatianga nang ka rawih avang che leh Inspector ngei pawh kha ka pasal thihna hi dawi anih thu kha ka hrilh a. Mahse, keimah zawk hi min ringhlel tih ka hrethiam ta mai" a han ti a. Andrew-a pawh chuan, "Pi Vanhming, i pasal thihna hi dawi anih leh thlarau sual hnathawh anih i ring hi i fiamthu hauh lo tihna a ni maw? chuan" a ngawi leh vat a, Pi Vanhmingi chuan, "chuan engtin?" A lo ti a, Andrew-a chu a en kal mai a.

Tetei chuan, "ka pu, Sailova nena kan inkar hi chiang zawka in hriat ve a tul niin ka hria" a han ti ve ta a. Inspector leh Rinpuia te pawh chuan Tetei thusawi tur chu an lo bengkhawn ngang mai.

Pi vanhmingi pawh chuan, "Drew bawiha, ka fanu leh Sailova te inkar chungchang hi chiang zawka i hriat ve phawt a tulin ka hria" a lo ti ve mek bawk a. Andrew-a chuan, "ka Pi Vanhming, chung te chu ka hria alawm" a lo ti a.

Rinpuia chuan, "Tete, Sailova nen in inkar chungchang te chu kan hria alawm" a lo ti a. Inspector chuan, "Sailova nen in inkar emaw Sailova chungchang hrim hrim sawi lan kha i duh tawh lo ni khan ka hre zo ch.auh si a" a lo ti ve bawk a.

In chung lamah chuan Andrewa chuan, "Ka Pi Vanhming, Sailova leh Tetei te inkar chungchang chu sawichhuah duh lo tu ber i ni thin si a" a lo ti a, Andrew-a vek chuan, "Mahse, nangmah ang lo takin Pu Ngaihawma kha chuan Tetei te inkar chungchang hi a ngaihven tlat a, a buaipui tlat thung" a han ti a. Pi Vanhmingi chuan, "Drew bawiha, kei hi ka rilru hi a dam lo tak takin i ring em? Andrew-a chuan, "Aw ring e" a lo ti a.

Pi Vanhmingi chuan, "Drew bawiha, i Pu Ngaihawma kha ka beidawn san tawh a ni. A ni lakah khan ka beidawng a ni. Dawiin a tibuai a, ramhuaiin a zar buai a ni. ka thu leh hla a ngaipawimawh duh lo a, kei khan ka ngaihtuahin ka mangan pui thin ngawt asin. Mahse, keimah ngei pawh hian na ka ti, ka ngaihdan âtthlak tak leh ka hlauhthawnna âtthlak tak tak te chu nuihzatin kei chu rilru buai ang hialah min chhuah ta zawk si a.

"Ni e, he tia rilru lama damlohna nei ni anga ka lan tak nachhan pawh hi i Pu Ngaihawma vang kha a ni asin. Mahse a hre lo, a chunga thlarau sual hnathawh leh dawi hnathawh kha a hmu thei tlat lo, mahse kei chuan ka hmu tlat si a ni.

"Tichuan, ka beidawn thlengin i Pu Ngaihawma kha ka buaipui a, mahse a ni chuan min bengkhawn duh lo. Tichuan, kha mi ni ka rawn biak ni che hma deuh khan ka pasal hi a thi thuai dawn a ni tih hi ka hria a ni" tiin Pi Vanhmingi chu a ngawi leh vat a, chutah Pi Vanhmingi bawk chuan, "Mahse ka tlawm tawh, ka beidawng tawh. keiin engmah tih theih ka nei tawh lo, ka pasal thih hun tur chu ka nghak ta mai a ni.

"Kha dawi leh thlarau hnathawh kha dan theih a nilo a ni. Tichuan, nang kha i tanpuina ka rawn dil ta che anih kha. ka pasal hi ramhuai tihbuai ngei a ni tih a lanna turin. A tan tirah kha chuan ka pasal nunna kha chhan theih ka la beisei fan a, mahse ka pasal khan ka warning na te chu a hre duh reng reng lo. Tichuan, khami zan khan a thi ta ngei a, nangmah kha ka pasal thihna a ka ngaihdan hi a dik ngei a ni tih lantirna atan ka hmang ta che anih kha.

"Tin, nangmah chauh nilo, midang pawh ka pasal thihna chu dawi thil leh thlarau sual hnathawh ngei a ni tih lantirna atan hian lemchang turin ka ruai bawk alawm. Nang ni khan ka ruahman dan anga lem inchan khan ka pasal chu dawi leh thlarau sual hnathawh avanga thi ni a ka sawi hi an awih dawn a ni. Mahse, chumi bak eng thil dang mah a awm lo. Ka pasal hi tu thah mah a nilo. Dawi leh thlarau sual tihbuai avanga thi a ni"

Andrew-a chuan, "ka Pi Vanhming, enge i thusawi awmzia chu ni ngai? Sailova chungchang te pawh an hre vek asin. Tin, nang chauh nilo i fate thleng hian i pasal thihna-ah hian an inhnamhnawih ni-ah ngaiin Police ho chuan hma lak zel an tum asin. Chuan Sailova ngei pawh kha a inpuang vek tawh alawm" tiin Pi Vanhmingi mar chu a han dek leh hram a

Pi Vanhmingi chuan, "Nilo Drew bawiha, Sailova leh Tetei chungchang hi sawi chhuah ka duh viau lo, mahse inhrechiang tawk lo a ni. Pawn lama an landan ang ngawt kha an ni hleinem. Tin, i Pu Ngaihawma thihna hi ramhuai tihbuai leh thlarau sual hnathawh a ni ngei ani tih hi ka Chiang a, ka hresual thei lo bawk"

Tetei chuan, "Ka pu, Sailova nen khan kan inhmangaih em em zawk asin. Engvanga inthen nge kan nih maw? kan inkarah hian do lung a awm reng a, kan inhmangaiha kan inzui kha duh lo tu an awm a ni. Chu chu chiang takin ka hria. Kan inthen chhan chu loh theih loh thil, kan hriatthiam theih bawk si loh thilin min karcheh tlat vang a ni zawk asin" tiin mittui tla zawih zawih chung chuan a inhnit nghal hlawp hlawp a.

Inspector chuan ngun tak chuan a han ngaihtuah a. "Mahse Tete, Sailova ngei pawhin i pa kha a chungah a thinurin a lungawi lo thin hle niin a sawi a, a chhan ni a lang chu sailova hian nang hi a chhan awm lovin a ti na che a, a then che a, chumi avang chuan a fanu thlavang a hauhna lamah i pa khan Sailova kha a haw hle niin a insawi asin"

"Nilo ka pu, ka pa-ah hian engemaw buai ru hi a awm a ni zawk. Tlang taka sawi chuan ka pa hi kan inkara tlazep chu niin ka hria. A tan tirah chuan ka hrethiam bik lo, mahse a rei telh telh a thil awmzia ka hrethiam chho telh telh a ni. Kan inthen kha a duh zawk a ni ka pa khan. Mahse, hmuh theihah chuan kan inthen ta kha Sailova lakah lungawi lo angin a lang ta zawk pawh a ni ngei ang"

Rinpuia chuan, "Sir, thil inpersan deuh deuh hi a va tam ve maw le" a lo ti a. Inspector chuan, "imm, thil inpersan, a awmzia chu inbumna thil a tam tihna a ni. Ni a lang, lo ni leh silo, i hrethiam mai em Rinpui.

"Tunah Tetei leh Sailova inkar chungchang kan lo hriat dan chu a lo dik lo leh a. Pu Ngaihawma kha chuan a fanu Sailova'n a ti na leh a then tak avang khan a lungawi lovin Sailova kha a haw ta hle niin a lang a, chu chu keini lo hriat dan pawh a ni. Mahse, tunah Tetei ber chuan an inhmangaih thu leh an inthlakhlelh thu a sawi veleh tlat thung a, an inthen chhan pawh an inthen duh lo em em tu ni a kan lo ngaih Pu Ngaihawma ber chu niin a sawi leh ta mai si a, engkim hi inbumna vek a ni" Tiin inspector hmel chu a dur hle mai a.

Andrew-a chuan, "Pi Vanhming, an ni inkar chungchang chuan Pu Ngaihawma thihna ah hian enge awmzia a neih tak ang? Pi vanhmingi chuan, "Drew bawiha, a chhan chu maw, i Pu Ngaihawma khan a fanu leh Sailova inzui kha a ngaithei lo alawm, ama pawh then ngei hi anih ka ring nghe nghe a ni" a lo ti ve mek bawk a.

PSYCHIC Volume -3

Bung rukna

"Drew bawiha, i Pu Ngaihawma khan Sailova leh Tetei te inzui kha a ngaithei lo alawm. An inthen kha a duh dan zawk a ni. Tin, i Pu Ngaihawma kha a chhungrilah tibuai tu a nei a ni ka tih kha, nitin mai hian lehkhabu pakhat bihin hun a hmang thin asin. Kha lehkhabu ah Khan dawi thu rapthlak tak tak a tial bei buai a ni. Mahse, kha lehkhabu ka han en kha rang takin min chhuhsak a ka hmuh phak lohah a dah bo ta a ni. Tin, amah ngaihtuaha ngaihven em em tu kha min ngaithei lo zui zel a, amah ka ngaihtuahna leh ka hmangaihna te chu khatia mi ang lo leh rilru buai ang maia min chhuah letna te kha min chhan let duh dan a ni asin.

"Ka na-in ka hliam tak meuh meuh a ni. I Pu Ngaihawma khan thinlung a nei tawh lo, ama mihring nihna kha a hlauh zo tawh a ni. A thluak erawh a tha si a, midang chauh nilo, a fate ngei pawhin a thusawi te leh a ngaihdan te kha an tawm pui thei tlat si a.

"keimah, a nupui khan ka rilru lamah harsatna ka nei a ni tih thu kha midang a rin tir thei tlat si a ni. Khang te kha min ti na zual tu an ni a, beidawnga min siam tu chu an ni. I pu Ngaihawma kha dawi avangin a â zo tawh anih kha ka ringhlel lo thei lo a ni. A thinlung kha mihring thinlung a ni tawh lo.

"Mahse, engmah tih theih ka nei lo, kha dawi hnathawh kha ka titawp thei dawn chuang lo tih ka hria. Tanpui tu a mamawh asin i pu khan, mahse khawnge tanpui tu chu? Tumah an awm lo. I pu Ngaihawma khan Sailova a huatna kha a ruihchilh nasa asin, hmangaihna kha a hua a ni.

Andrew-a chuan, "Mahse, chu chuan ka pu Ngaihawma thihna ah chuan enge a finfiah chuang? Pi Vanhmingi chuan, "Tunah chuan engmah awmzia a awm tawh lo, heng zawng zawng hi thil âtthlak mai an ni, a zavai hian"

Inspector chuan an thil ngaihthlak mek chu titawp tur chuan a han ti a. "Rina, ti tawp lawk ta che. Engvangin nge Pi Vanhmingi ngaihdan hi ka tawmpui tlat mai le? Tiin a khabe chu a dawm vang vang a. Rinpuia chuan, "Andrew, in inbiakna hi i record a ni tih a hre lo tak tak em? a han ti a. Andrew-a chuan, "ka pu, a hre lo hrim hrim" a lo ti a. Inspector chuan, "Awle han play leh tawh teh" a lo ti a.

Rinpuia chuan Voice recorder chu a han play leh ta a, Pi Vanhmingi aw bawk chuan, "Sailova hian tual a that lo. Thil hriat sual an nei a ni. I pu Ngaihawma zawk hian Sailova a huatna hi a ruihchilh a ni.

Inspector bawk chuan, "Rina, khami laiah tak khan titawp leh lawk teh. Awle, khami lai Pi Vanhmingi thusawi awmzia kha enge ni ta ang? Rinpuia chuan, "Sir, ngaihdan ka nei hauh lo mai" a lo ti a.

Inspector chuan, "Imm, Pi Vanhmingi berin a ringhlel lo mai ni loin 'Sailova thil tih a nilo' a ti tlat si a. Awle, ti khan Pu Ngaihawma thusawi Voice recorder-a mi kha han play leh chiah teh le" Rinpuia chuan Pu Ngaihawma thih dawna a thuswi chu a han play leh ta a. 'Engvang nge? engvang nge hetiang thil hi i tih Saite, engvang nge ka chungah hetiang thil hi i tih?

Thawm chu a reh thiap mai. Inspector chuan, "Sailo, engvangin nge min vih? engvangin nge min nghaisak? engvanga min thah tum nge i nih? Chutiang chuan ti se chu Sailova hi a Chiang nghal mai tur hi a ni a. Mahse, 'engvang nge hetiang hi i tih? ka chungah engvang nge hetiang hi i tih? chumi ringawt chuan Sailova thil tih kha a tarlang Chiang tlat lo a ni.

"Tin, ama nupui Pi Vanhmingi hian a pasal chu tibuai tu mihring pangngai lo deuh a awm niin a sawi a, tin hmangaihna hrim hrim chu a pasal hian a hua niin a sawi bawk a.

Rinpuia chuan, "Mahse Sir, hetiang thil dawi tih mai mai hi chu Court lam hian an pawm ve dawn em ni? A finfiahna a tha silo, ama nupui rilru lama harsatna nei lehnghalin a sawi dan a ni mai si a. Kei chuan Vanlalsailova tho hi misual niin ka ringhlel lo. Vanlalsailova anih loh chuan tu chu nge ni ang?" A lo ti a.

Inspector chuan, "Rilru lama harsatna nei ni a kan lo ngaih Pi Vanhmingi chu thluak lo fim zia te, remruatna te leh ruahmanna te pawh a lo siam thiam si zia te kan han hailang chho zel a. Heti anih hi chuan Pi Vanhmingi hi a rilru a buai lo tawp a, a fim ru hle zawk tih a chiang ta reng mai.

"Misual ber ang leh a pasal thihna ah a bultum tu ber ang thawthangah kan ngai chho ta mai rêng a. Chuti anih chuan a bultum tu berin tumah venthawn tur nei lova a duhtawka inpuanna a neih tluka hnuchhui tu te tana thil pawimawh leh tangkai chu a awm kher dawn em ni? Hei kan mi rinhlelh ber chuan inpuanna a nei a ni a, mahse a inpuanna zawng zawng chu kan han hre fai ta kelh a, kan lung a la awi thei chuang lo fo a ni maw?

Rinpuia chuan, "Aa, ni e Sir, Andrew-a ber zawk hian Pi Vanhmingi hnenah kan plan zang zawng hi a lo hrilh ve thei tlat a ni tih thil zawk a nia" a han ti a.

Inspector chuan, "Imm, chuti anih a hnu engah nge keimahni ngeiin a tirah khan kan tih mai loh, Andrew-a lakah hian rinna kan nghat a ni lawm ni? Keimah ni hi indem tur kan ni ang"

"Nilo Sir, keimahni kan nih chuan Pi Vanhmingi hian thu dik a sawi duh ngai lo ang" Inspector chuan, "Aw hei, keimahni chu kan nilo a, thu dik chu a puang rêng lo em ni?

Rinpuia chuan, "Sir, amah Vanlalsailova ngei hi tunah rih chuan kan hman tangkai a hun tawh a ni.

Inspector chuan a mit chu a han chhing a. "Rinpui, hun khawh ralna mai a ni dawn a ni tih hi ka chiang" a lo ti a. Inspector bawk chuan, "Mahse, ruahmanna i nei anih chuan i ruahmanna ang chuan kan kal ang" a ti ta tho a.

A tuk khua a var a, Rinpuia ruahmanna ang chuan chet la turin Vanlalsailova hruai chuan Pi Vanhmingi awmna lam panin chet an la ve leh ta a. In an va thlen chuan dan ngai bawkin Isaka te unau chuan an inleng te chu an lo dawngsawng tha leh viau mai.

Chutia Vanlalsailova hmel ngei an lo hmuh tel ve takah chuan mak pawh an lo ti a, an hrilh a haiin a ngaihna an hriat loh hmel hle a. Inspector Remruata chuan Pi Vanhmingi biak an duh thu te chu a han hrilh a, Isaka te unau hmelah chuan mak tihna a tel a.

Rinpuia chuan Pi Vanhmingi chu ava pawh ve lo va, an bul maiah chuan an inbiakna te chu a lo ngaithla ang a, a lo bihthla dawn a ni. Sailova chuan Pi Vanhmingi chu a titi pui ve thung ang. Hetianga an tih kherna chhan hi chu Rinpuia hian Sailova hi a ring zo lo a, chuvang chuan an inbiak dan leh an awmdan, an che zia engkim lo zirchian a duh a ni.

A duhtawka Sailova leh Pi Vanhmingi te inkawm lai a lo ngaihthlaka a lo zirchian hnuah chuan an hmun lam pan a let leh tur chuan an inbuatsaih ta a.

Kawng lakah chuan Inspector chuan Rinpuia hnenah chuan a duh ang chhanna a hmuh leh a hmuh loh te chu a han zawt ve a. Rinpuia chuan, "Sir, ka hmuh dan chuan Pi Vanhmingi hi a rilru a damlo tak tak a ni" a ti ta tlat mai a.

Rinpuia vek chuan, "Mahse Sir, a damlo ka tih avang khan ka beisei loh char char chhanna erawh kan hmu bik lo, a nihna takah chuan i rindan leh i beisei ang chhanna an ni zawk mah awm e" A ti ta a.

Sailova te inbiakna Voice recorded chu a han ngaihthlak tir ve a. Inspector Remruata pawh chuan a lo beisei ang ngei a ni tih chu a hria. "Imm, ni e Rinpui, hun khawhralna mai a ni ang ka tih kha maw, a dik a dik chuan keini pahnih ngei pawh hi rilru buai leh harsatna nei kan nih lohna chhan tur bik hi a awm hauh lo asin, keiin thlarau ka bia a, nangin boruaka a thamral lai i hmu bawk a" Tiin a nui ta var var a.

Vanlalsailova chuan a theihtawpin Pi Vanhmingi chu a ruahmanna chungchang te, lem chang tura mi a rawih thu te, amah ngei pawh chu Police hoin man tura an vehthlem mek thu te chu a hrilh a. Mahse, Pi Vanhmingi chuan a pasal thihna chu tualthahna ni loin dawi leh thlarau sual hnathawh anih thu te, tin a pasal chuan a thusawi a ngaihpawimawh duh ngai loh thu te bawk chu a lo hrilh leh a, chumi bak hnuchhuina atana thil tangkai engmah sawi a nei chuang lo a ni.

Inspector chuan dawhkana file awm chu uluk hmanhmawh rilru tak chuan a han bih thuak thuak hlawm a, chutah a mit chu a han chhing leh vang vang a. "Imm, tunah chuan a hmawr bawk a hnaih ta. Tunah chuan he case-a inhnamhnawih zawng zawng Sailova, Andrew-a leh mi dang pahnih, Tin pi vanhmingi pawh. An ni hi an thusawi tak te kha an sawi dik ngei a ni tih hi kan fiah let vek dawn a ni.

Rinpuia chuan, "Aw le Sir, a hmawr hi kan bawk fuh em ang chu maw" a lo ti a. Inspector chuan, "Fuh dawn tehreng e a, plan anga thil a kal lo va a khaw baw zo ta anih erawh chuan he case hi ho lam tak pawhin a tawp thei ve tlat a ni" tiin lehkha chu a bih pah malh malh reng a.

Inspector Remruata leh a naute mi engemaw zat chu Pastor k.Lalngaihawma thihna Hotel (a hming thup)-ah chuan awmin Inspector thu pek chu an ngaichang thap reng a.

Inspector chuan, "Awle, hei hi Pastor Mobile phone a ni a, khami zana a hman kha a ni. Tunah hian zan dar sawm bawr vel ang lo ni ta se" tiin an record bu-a an thil lo chhinchhiah tawh te chu a han keu let pah zel a. "Kei, he laiah ka awm ang" tiin a phone chu a han la a. "Aw Joel, nang i awmna hmun turah i awm em?" Tiin Durtlang Leitan-a awm Joela chu a han bia a. Lehlam atang chuan, "Aw Sir, Durtlang Leitanah ka awm mek e"

Chumi lai chuan an bulah chuan hun an hman ral zel dan lo chhinchhiah turin Rinpuia chu pen leh lehkha nen a lo inring ran mai bawk. Inspector chuan, "Rina, minute engzat nge ti khan" a han ti a. Rinpuia chuan, "Sir, tikhan minut thum chiah" "Awle a tawk e Joel, tikhan i awmna atang khan kan awmna hmun hi rawn pan tawh rawh le" Lehlam atang chuan, "aw le sir"

Khami zana thil thlen dan ang khan an awm a ni. Inspector chu Pastor kha a ni a, Joela chu Sailova kha a ni.

Nakin deuhah chuan Joela chuan amah lo nghak tute awmna Hotel chu a rawn thleng thla ta a. Chuveleh, Rinpuia chuan Joela hun rawn hman zat chu a lo chhinchhiah a. Sailova'n a sawi dan nen khan a inrem em tih an han en let leh a. Joela'n Durtlang Leitan atanga an lo nghahna Hotel a rawn thlen thlak nan chuan minute sawm leh pali a hmang a ni tih an hre thei ta. Durtlang Leitan atanga a chhuah hun dar kua leh minute sawm li leh panga atanga chhutin Hotel a thlen hun chu dar sawm vel chiah chiah a ni ta a ni. Chu chu Sailova'n Hotel a thlen thlak a dar zat a sawi nen khan thu hmun chiah a ni ta a ni.

Sailova chuan dawt a sawi lo ta phawt mai. Tichuan le, Sailova sawi dan zul zui zel chuan khami zana thil thlen dan ang khan chet chu an han la ta zel a. Joela chuan third floor room number 08, inspector awmna chu a ban tlang nghal a. Tichuan, Inspector awmna a va thlen chuan Joela leh Inspector chuan sana chu an han ngaichang leh ta a.

Rinpuia chuan, "Awle Sir, tikhan a tawk e, minute nga dawn a ni tawh e. Tichuan, Pastor leh Sailova chuan an pahnih inkar chungchang chu an sawi chho tan tawh a ni. Minute nga dang leh bawk chutiang bawr vel chu a ni ang" Tiin minute nga dang leh chu an han nghak leh ta a.

Tichuan le, dar sawm atang chuan room chhunga an hun hman zat ni ta chu minute sawm dawn a ni ta. Chuveleh Rinpuia bawk chuan, "Awle, ti khan Sir, minute nga emaw a aia tam emaw dawn chu an inhnial chho ta a, an innghirngho chho tan ta a ni" a han ti leh a. Inspector pawh chuan dawhthei tak chuan, "Awle, i nghak leh zel ang" a han ti a.

Inspector chu Pastor thutna chair-ah te chuan thuin uluk tak leh ngun tak chuan khami zana Pastor awmdan tur ni a a ngaih ang chuan han awmin a rilru leh ngaihtuahna chu a luhkhung tluk tluk reng mai. Dar sawm atanga chhutin minute sawm leh pasarih dawn chu hun an hman tak hnuah chuan Rinpuia bawk chuan, "Awle, tikhan Sailova chu a thinur chu pawnah a chhuak ta a ni"

Chuveleh, Inspector chuan, "Joel pawnah chhuak rawh le, hmanhmawh takin, a timing kha kan hlauh a nge aw" a han ti a. Joela'n pawn ava chhuah chuan Rinpuia chuan, "Aw Joel, khalaiah khan awm rawh. Thinrimna, insum tum taka rilru tih thawl tumin thawk te kha han la la. Tichuan khatia pawna hun i hman lai khan midang, Pastor thattu ni thei tur an lo kal em tih chu i hre ta lo a ni. Tin, midang tumah hmuh i nei lo bawk a"

Chuveleh Inspector chuan, "Hruaia, nang kha lo lut chiah rawh le" Chuveleh Hruaia chu hmanhmawh tak hian a hmai tuam chungin Inspector awmna ah chuan a tlan lut a. Chuveleh Inspector thutthleng a lo thu chu kut ava thlak ta nghal a.

Inspector chuan, "Ngawi lawk ru, ka ngaihdanah chuan khami zan khan Pastor khan misual hmai tuam kha lo hmu ngat se zawng, a aw rawl a chhuah ngeiin ka ring tlat mai" A ti ta a.

Chutia a fiah fai zawk beiseia thil awmzia zirchianga chet an la mek lai chu tualthattu a ngaih Vanlalsailova ngei pawh chuan uluk takin a lo thlir ve ran reng a. Tin, hetia Vanlalsailova hruai a chet an la lai mit ngeia hmuh tir an duh nachhan hi chu Sailova hian mak ti hmel a pu em? Hlauhthawnna a nei em? A rinhlelhawm zual em tih te hriat an duh vang a ni pakhat a. Amah Sailova mar deh nan a ti an ni pakhat bawk. Mahse, Sailova chu hlauthawng angin a awm hauh lova, a hmel a chi ai lova, a inrintawk hmel em em thung a.

Rinpuia chuan, "Chuti anih chuan Sir, misual hmai tuam an awm lo tihna a ni maw? a lo ti a. Chhuahchhal aw a kai lek lek mai. Inspector chuan, "Aw awm lo. Mahse, Pastor khan a rawl a chhuah lo a ni mai, kan kal ngaiin kal zel ang" a han ti a.

Inspector chu Hruaia chuan kut a thlak a, a thin zawna chemtê a vih hnu chuan hmanhmawh takin rumol chu chhuatah chuan a han dah a. Chumi lai chuan pawn lamah chuan Rinpuia chuan, "Awle, minute thum lai chu a ni leh ta, i phei leh thei chiah e Joel" a lo ti ve leh mek bawk a. Joela, room chhunga a lut tur leh Hruaia, hmai tuam chunga a chhuak leh tur chiah chu an in nang fuh hman mai ni loin Hruaia, a insaseng hma hauh a Hruaia'n inspector a naka chemtê-a a vih hnu-a rumol chhuata a dah leh lai chiah chu a va hmu hman ta tlat mai.

Chuveleh Inspector chuan, "A tawk e. Rinpui, hun kha ilo vawng dik zel em? a han ti a. Rinpuia chuan, "Aw Sir. Joela kha pawnah khan minute thum lai ka awm tir zawk. Minute khat ka belh zawk tihna anih chu" a rawn ti a. Chuveleh, Inspector chuan, "Imm, Sailo, i sawi dan kha chuan pawnah minute hnih vel hun i hmang ang khan i insawi a" a han ti a. Sailova chuan, "Ni e, mahse heti anih hi chuan misual chu ka va man hman ngei tur niin a lang si a" tiin Vanlalsailova ngei pawh chu a hrilh a haiin a ngaihna a hriat loh hmel hle a.

Chutah, Sailova vek chuan, "khatia ka va lut lehin Pu Ngaihawma hliam pui tuar ka va hmu ta thut mai kha, ka rilru chuan 'misual' ka ti a, 'enge thil awmzia' tih te, tu thil tih nge' tih te ka zawt nghal a. khatih lai khan Pu Ngaihawma nen kan inhnial chiam a, ka thinrim leh lungawi lo kha rilru fim pawh ka pu meuh lo.

"Mahse, ka va luh leh khan ka rilru chu a inthlak hlawk a, thinrim rilru chu manganna leh Pu Ngaihawma ngaihtuah avang khan a inthlak thleng hlawk a ni? Mahse, Pu Ngaihawma ber khan 'engvang nge Saite hetiang hi i tih? Min lo ti a, mahse ka rilru a fim hnuah Police ka call nghal thuai a. Ni e, hetianga tun hnua thil awmzia ngun taka ka han ngaihtuah let leh hnu hian kha zana thil thleng kha 'a mak' tih mai loh chu a ngaihna ka hrethiam ta bik lo a ni. Ka thil tih ni ngeia lang, mahse ka thil tih a nilo tih hre tur khawpa rilru fim pu lo erawh ka ni bik silo.

"Pu Inspector, a tir atang khan dawt ka sawi lo tih i hrethiam a ni tiraw? Chuan tualthattu ka nih hi i ring lo a ni tih pawh kha ka hrethiam reng. Ka thusawi te i ring a, misual ka nilo tih kha i ring tiraw? Ni e, dawt engmah ka sawi lo, tual ka that hek lo. Mahse, kutkawl ka bun a tul anih chuan ka inpe e. Amaherawhchu, he thil thlen dan dik tak leh a awmzia dik tak hi hrechhuak ngei ang che u. Heti tak maia Chianga ka tal awk mai thei hi kei ngei pawh hian mak ka tiin ka hrethiam bik lo. Ka tal awhna tura tu emaw ruahmanna anih ngawt loh chuan dawi leh thlarau hnathawh pawh chu a lo ni zawk maithei a ni. Mihring, Mi tu emaw ruahmanna atan chuan thil theih loh a ni" tiin beidawn hmel tak chuan a indawm kun ngawih ngawih mai a.

A ngaihna an hre lo tlang hle a. Engtia chet han lak leh tur nge tih chu an hre mai lo.

Chutah, Inspector Remruata chu a thutna atang chuan muang chang hian a rawn thochhuak a. "Imm, i sawi dik khawp mai Sailo. Nangmah i nih loh theihna lai reng reng hmuh tur leh hriat tur a awm lova, tan chhan tur chhe tê tak tak pawh i neilo niin a lang. Mahse, hetia chiang taka i tal awhna atana ruahmanna duhthusam siam thei tu tur chu mi pakhat chu a awm. Amah chauh chu a ni hetiang ang ruahmanna duhthusam siam thei tu tur chu ni" a rawn ti ta a.

PSYCHIC Volume _3

Bung Sarihna

Inspector leh a nau te, chu lai Hotel, Pastor k.Lalngaihawma thihna hmuna chutia an chetna leh enchhinna mak sak tak tak an neih te chu kar lovah vantlang zingah a darh chak ta hle mai a. Mi thenkhat chuan Inspector Remruata chu a rilru a buai anih an ring a, Pastor meuh chutia mahni intihlum anga a han chhuah duh ta mai chu a rilru nat thlak an tiin ama hmingthatna leh a hna ngei pawh chuan a tuar ngeiin an ring a ni.

Inspector in Pastor thihna case a hmawr a bawk dan chu hetiang deuh hi a ni a: Pastor chu thlarau sualin a luhkhung a, thinurna leh huatna, thiknain a khat ta a. Chu pa, a mi huat em em mai leh a thik em em chu ama fanu ngaizawng tu Vanlalsailova a ni. A fanu te pahnih inkara hmangaihna chu a hua a, a itsik a ni. Tichuan, Pastor chu a buai telh telh a, a tawpah phei chuan thlarau sual chuan thunun zelin Pastor chu a mihring nihna chu a hlauh tir zo ta a.

Pastor chuan Vanlalsailova nun chu tihchhiat a tum ta a, chumi atana tha ber ni a a hriat ang chuan chet a la ta a ni. Vanlalsailova chu tualthattu anga lantira a damchhung tan In a hman tir a duh ta a. Tichuan, amah leh amah chu a intina a, a nghawnga rehna hnu hma chuan a thihna chu tualthahna niin a lantir dawn a ni. Tin, a hnar ruh chu bang charah chuan a tauh tliak bawk a, chu pawh a thihna chu tualthahna ngei ni a a lanna tur evidence dang leh bawk a ni.

Tichuan, Voice recorder on mai theih turin a dah a, lehkha te pawh a hnutchhiah a, chung te chu evidence a siamchawp vek an ni. Ruahmanna leh remruatna uluk tak a nei a, chu chu a hunah chiah zel a tih a ngai ta a ni.

A target ber Vanlalsailova chu rinhlelh ti zual turin a inhnial thinrim pui ta chiam mai bawk a. Pawna Sailova a chhuah chhung lek khan a taksa chu a intina ta a, a thin zawnah chuan amah leh amah chu a invit ta a. Sailova chu a lo kir leh thuaiin a ring a, a chhan chu he pa Vanlalsailova hi a hrechiang tlat si a. Tichuan, Sailova chu a rawn kir leh vat ta ngei a, Pastor chuan Voice recorder chu a on ta a ni. Tichuan, Voice recorder-ah chuan thu inpersan tak mai hriat tur a lo awm ta a.

Chutiang deuh chu Inspector Remruata'n a hnuchhui a hmawr a bawk dan chu a ni ta a ni. Mahse, hetih lai hian Inspector hian Pastor chu amah leh amah a intihhlumna evidence dang a la beisei tho va. Thlarau sual tihbuai tih te, dawi tih te chu miin an ring kher lovang tih a hre tho a. Mahse, huaisen takin thu dik ni a a hmuh chu a tarlang mai zawk a ni. Tin, Pastor thihna chungchangah ama nupui Pi Vanhmingi ngei pawhin Inspector ngaihdan chu a ngaihdan chiah a lo ni tawh thin bawk a.

Pastor k.Lalngaihawma chhungte atang chuan Inspector hnuchhuina leh a thutlukna chungchangah chuan thuchhuah emaw ngaihdan an neih âwm hriattur a awm hauh lova. Mi thenkhat sawi dan leh tlangkam atanga hriattur awm ang ang chu thu thar lakhawm tute hnen atang pawha hriattur awm chu a ni deuh ta mai a ni. Pastor chhungte, a nupui leh a fate chu an reh hmak mai a, pawn lamah an hmel hmuh tur pawh a awm tam lo hle.

Inspector Remruata chuan tibuaitu a nei zui ta nghe nghe a, tunge anih a hriat loh Facebook profile pakhat hian friend request a rawn thawn a. Tin, chu account atang chuan Private message a dawng awl ta lo bawk.

A message dawn chu hetiang deuh hi a ni. "To, Pu Inspector, ka message hi ilo hmuh veleh min lo chhang let vat dawn nia, chuti anih loh zawngin i nunna hi hremhmunah a liam dawn a ni" tih hi a lo ni a. Inspector chuan a bengkhawn tehchiam lo. Mahse, a thian thar chuan message a rawn thawn zui tak tluk tluk rengah chuan thlamuang takin a awm thei ta bik lo a ni.

Hetih lai reng pawh hian Inspector Remruata'n Pastor k.Lalngaihawma thih dan a chhuina chanchin chuan boruak a nei lian hle reng mai a. Mi thenkhat phei chuan tualthattu hum tum angah Inspector chu an puh hial a. vanlalsailova chu tualthattu ni ngeia ngai an awm a, mi thenkhat erawh in Pastor chu mahni intihlum anih an ringhlel hran lo thung.

Inspector Remruata pawh chuan a hnuchhuina chungchanga ngaihdan hrang hrang awm te chu a haider lui thei bik lo. mahni intihlum ngei a ni tih evidence tha tawk tak chu a zawn belh leh tulin a hre ve bawk a. Search warrant chu Court-ah chuan a han dil hmasa leh tê tê a, chung a chet lak leh tur te hlei hlei chuan boruak a nei lian chho kher mai. Tichuan le, Pi Vanhmingi te In dap phalna a han neih takah chuan a nau te nen chuan Pi Vanhmingi te In chu dap turin chet an han la leh ta rup rup mai a.

Inspector rindan chuan mi tu emaw in ruahmanna a siamin uluk tak leh felfai zawka thil a kal theih nan a ruahmanna te chu ziakin emaw dah that a ni thin a. Thlalak tam tak banga intar tlep tuar te, map ni awm tak tak in tlar dul te, engemaw lai chhinchhiah bik awm te, tihfel tawh chhinchhiah lai bik te, hma bak la awm chhinchhiah bik te, heng zawng zawng hi ruahmanna neitu in a vawn that ngei thil a ni a, chu thil chu Pastor pawh hian khawilaiah emaw tak chuan a dah tha ngeiin a ring tlat a ni. Tin, Pi Vanhmingi khan Pastor in lehkhabu (note) pakhat a buaipui nasat thu kha a sawi tlat bawk a. Chu lehkhabu (note) chu ama nupui Pi Vanhmingi ngei hian a lo kawl reng maithei bawk. Pastor-in Vanlalsailova a thihna a tal awh tira a dam chhung lung In-a tan tira a nun tihchhiat vek a tum dan leh amah leh amah a i tihhlum dan tur zawng zawng te, a ruahmanna engkim chu a nupui Pi Vanhmingi khan a hre vek tihna a ni mai.

Pi Vanhmingi khan a pasal kha dan a tum thin a, mahse a pasal fin chu a khalh thei lo. A kawng dal tum, a nupui chu rilru lam harsatna nei angah a chhuah let ta daih mai a, a fate leh mi zawng zawngin Pi Vanhmingi chu a rilru ah harsatna a nei ni ah an ngai ta hlauh a ni.

Pi Vanhmingi chuan kawng hrang hrangin a pasal ruahmanna âtthlak tak mai chu dan a tum zel tho a, mahse a pasal a fin a khalh thei lo. Tichuan, a beidawng ta a, tih theih a nei lo ni ah inngaiin a pasal ruahmanna chu dan theih nilo dawi hnathawhah a ngai ta ngawt mai a ni. Rilru na tak chungin a pasal thih hun chu a nghak ta a. Mahse, Pi Vanhmingi chu a la beidawng duh bik Chuang lo a, a pasal thihna chu ramhuai hnathawh leh dawi hnathawh a ni tih lantir let ve a tum ta ngawt mai a. A pasalin a remruatna leh a ruahmanna a vawn thatna note bu chu Pi Vanhmingi khan a haichhuah vek tawh avangin a pasalin a intihhlum zan tur a chhinchhiah te chu a hre daih tawh a ni.

Pastor khan khatia Vanlalsailova tualthattu ni a rinhlelh anih theih nan khan a chet lak dan tur te, evidence a siamchawp dan tur te, a âwm ang tur bera Sailova tal awh tir a tum dan te leh a intihhlum dan tur ziak thlapa a chhinchhiah ho a dah that te chu Inspector Remruata pawh chuan zawnchhuah ngei a tum ta tihna a ni ta a. A beisei ang chhanna a va hmu zo ta lo anih erawh chuan a hmingchhiat phahin harsatna a tawk zui lovang tih a sawi lawk theih loh a ni.

Hemi lai hian facebook-a a thian thar khan a rawn warning ve reng a, a thil chhui lai chu anchhia leh dawi hnathawh nena inzawm thil anih avangin tawp san a eng evidence mah zawng tawh lo tur chuan a rawn hrilh thin a, a thu hrilh chu a ngaipawimawh duh lo anih chuan a chungah ngei pawh chuan anchhia thleng thei anih thu te chu a rawn hrilh thin a ni. Mahse, he a thian thar hian a tawngkam hman dan atang te, a vaukhanna tawngkam atang te, a thil hrilh dan atang te chuan mi pakhat, mi tu emaw a hriatchhuah tir tlat mai a, chu chu tudang an nilo. A thih chhan a chhui zawh tak Pastor nupui Pi Vanhmingi ngei ni tlata hriatna a nei a ni.

Inspector chuan chu vaukhanna tawngkam chu ngaipawimawh duh lovin Pi Vanhmingi te In chu Police te chuan an han dap ta a ni a. Pa ber boral ta Pastor k.Lalngaihawma leh a nupui, an nupa room te chu uluk taka an dap te zing a mi a ni. Amaherawhchu, Police te chuan eng thil mah hmuhchhuah an neih loh thu sawiin thuchhuah an Siam ta daih thung a. Inspector Remruata chuan eng thil nge a tih tak mai tih te, Pi Vanhmingi, rilru lama harsatna nei laka a chet lak duh dan te chuan dem a hlawh zui em em mai a, mi tam takin khawhar chhungte an lainat a, Police ho chet lak dan chu an dem takzet a ni.

Tumkhat chu, Inspector Remruata chuan message duhawm lo zet mai hi a dawng leh ta a, a farnu thlalak chu rawn thawnin heti hian a rawn ti a. "Pu Inspector, hei hi i farnu a ni tiraw? ka thusawi te, ka warning na te i ngaipawimawh duh lova, a man chu i hmu dawn ta e, ka thu kha awih lang chuan i farnu duh tak chungah hian hetiang chhiatna rapthlak leh vanduaina hi a thleng lo tur. Amaherawhchu, he thil hi tu thil tih mah a nilo tih hria ang che, i luhlul avang leh ka warning na che i ngaihpawimawh loh avanga thleng a ni tih i hre dawn nia. Kei hian i nun hi chhanhim ka tum zawk a ni" tih hi a lo ni a.

Inspector Remruata chu thinrim avang chuan a inseh ruh nghal awl awl thei hial a. "Mai mai, zawng phiangsen! Tunge maw i nih le? Pi Vanhming, nangmah ngei ini tih ka hria" tiin thinrim avang chuan a te that that reng a. Chutianga a unau pa lo phun ri bul bul leh te that that ri te a hriat chuan a farnu pawh chuan a u awmdan chu a rawn ngaihven thuai a, thil awmzia te han zawtin a u rilru chu a buai deuh tak tak ni ah a ngai deuh ta nghe nghe. Ni e, mipui lungawi lo mi thehnem tak chuan an dem a, a thluak leh rilru a buai ta ang thawthangah an puh mek a ni si a.

A nu bulah leh a pa bulah chuan a unaupa awmdan ngaihthat thlak loh tak chungchang te chu a hrilh ve ta a. A nu leh a pate pawh chuan an fapa nungchang danglam chho ta em em mai chu an ngaihtuah ta hle mai a.

Inspector remruata lah chuan chutia a rilru leh taksa nen lam hahchawl hman a nilo chunga a chhung ten chutia a chungchanga ngaihdan fahrah tê tê an lo siam ve reng mai pawh chu hahthlak a ti thin kher mai. "Ka nu, ka pa, ka tha, engtin mah ka awm hleinem, ka dam tha alawm" a ti mai thin a ni.

Facebook a mi bawk khan a rawn be leh a. Inspector chu a hnuchhuina atana evidence zawng tawh lo tur leh Pastor thihna a a rilru pe tawh lo tur chuan a rawn ti leh a. Mahse a chhang let lo.

Inrinni zan a ni a, Remruata chuan alo beisei ruk ang ngei chuan message chu a dawng leh ta ngei a, a nin tawh em avang leh chu mihring chu tunge anih mit ngeia hmuh chian a chak ve tak deuh avang chuan message pawh chu rang takin a han chhang let ve thuai a.

Chutah le, lehlam atang chuan a farnu thalak bawk chu a rawn thawn leh a. "I nun hi chhanhim ka tum a ni. I farnu chungah hian thil tha lo a thleng thung ang. Mahse, tu thil tih mah a nilo" a rawn ti leh a. Chuveleh Remruata chu thinrim avang chuan a tho thut a, a phone chu chhuatah chuan a vawm teuh kher mai. "Hrep tak chuan! Tu phiangsen nge maw i nih le! Pi Vanhmingi mi rawih mi tu emaw anih te chu a han ring a.

A tuk khua a var a, hna lamah an chawlh lai a lo ni nen, In lamah a awm a. Pastor thihna case chungchang te chu a en let leh mek a, a duhthusam ang takin a hmawr bawk a tum mek a ni. kha mi tum, Pi Vanhmingi te In an dap tum khan note bu chhah tha tak pakhat hi a hmu fuh a, chu thil chu a thil zawn leh a duh tak evidence chu a ni tih a hria. Note chu a rukin a kawl tha ta kha a ni a.

Pastor thuruk te chu eng chiah nge anih en a tum lai chuan a Mobile phone chu a lo ri a, a han en a, a nu a lo ni. mangang fe a insut hlawp hlawp chung chuan, "Mama, Ruata, khawiah nge i awm? hei i nau hi!" Remruata chuan, "ka nu, eng thil nge thleng a? Min han hrilh teh" Lehlam atang chuan, "Ruata, i nau hian accident a tawk a nia, damdawi In-ah kan kal nghal a ngai ang, biak pawh a biak theih loh" a rawn ti ta mai a. Chumi rual chiah chuan Facebook-a mi khan message a rawn thawn a, 'i luhlul man chu i hnu ta nge nge a ni maw? A rawn ti a, Remruata thinrim leh inthunun hman lo chuan a Mobile phone chu chhuatah chuan a vawm ri nghal bur mai a.

"Ka nu, ka nau su tu chu a number in chhinchhiah hman lo em ni a? A nu chuan, "Mama, Zuia khan kha motor kha a um zui ve nghal alawm. Hei, tun thleng chuan chanchin min la rawn hrilh lo chu a ni a, ka han phone chhin dawn em ni? A nu chuan a fanu su tu motor um zui tu Zuia chu a han call ta nghal a.

"Ka pa, thil pawimawh tak mai hrilh tur che ka nei a ni. Hetiang thil ti tu hi ka hria a ni. Kei hi min dan a tum a ni" a pa chuan mak a ti hle a. "Eng chungchang nge i sawi Ruata, tu in maw dan tum che?" a hmelah chuan a ngaihna a hre lo hle a.

"Ka pa, he thil titu hi ka man ngei dawn a ni, a thil tih man chu ka pe ngei dawn a ni. ka laka chhan engemaw avanga lungawi lo a ni maithei" a pa chuan, "Ruata, i thusawi te chu thu dik anih ngai chuan han ngaihthah mai mai chi a nilo anih chu" a ti ve ta bawk a.

Inspector Remruata chuan amah rawn be thin tu hnenah chuan, "Tunge i nih ka hria che a ni. I pasal thihna ka chhuichhuak ta chu lawm a hnekin engvang nge? I pasal note bu ka lak bo avang hi a ni em? i pasal note bu ka kawl avang hi em ni? He evidence ka tlangzarh hi i duh lo a ni maw? Engvang a min dan tum nge i nih?

Lehlam atang chuan, "Inspector, i ngaihtuahna ramah i cheng nasa lutuk anih kha" a rawn ti daih a.

"Pi vanhming? I thusawi dan atang te hian ka hai hleinem che" tiin a Mobile phone a hmai a vawm khik thawt tawh chu a thlek vang vang mai a.

Chumi tum la la chuan In-ah haw in Pi Vanhmingi hmu tur chuan chet a la ta nghal a. chumi lai chuan a Mobile phone chu a lo ri a, a han en a, a nu Phone call a lo ni. "Aw ka nu, kan tha zel em? Lehlam atang chuan, "Ruata, i nau pawh ngaihtuah awm lutuk a ni tawh lo ve, hei Zuia'n min rawn bia a, i nau su tu motor chu a zui zel a, a awmna a hre tawh e. Mahse, motor chu kawngpui sir hmun reh laiah an lo dah a, a bulah chuan mi tumah an awm lo, tu motor nge anih hriatchian tumin hma a la mek zel e"

Remruata chuan, "Ka nu, chutiangin amah chauhin um zui zel lo se ka va ti em, thil tha lo a tawng ve palh hlauh a nge. ka nu, tha deuhin hrilh rawh, a number te chu chhinchhiah se, motor chu a thla te la se In lamah rawn haw vat se ka va ti ve" Lehlam atang chuan, "Mama, thil pawi em a thleng lo turah ngai ang, ka lo hrilh dawn nia"

Inspector Remruata chu a thin a ur bawk a, Pi Vanhmingi te In lam pan chuan hmanhmawh tak chuan a tleh phei nghal thuai a. Pi Vanhmingi te In a va thlen chuan a lo reh thiap mai a. kawngkhar chu a han kik dat dat a, chumi rual chuan thinrim engphiar hian, "Pi Vanhming, lo hawng teh u, lo hawng vat teh u" tiin a han au zui nghal bawk a.

Kawngkhar chu a hawn in hawng a, Isaka a lo ni. Isaka chuan, "Pu Inspector, enge ni ta? a lo ti thuai a. Inspector chuan eng khaw sawi set set lo chuan, "khawiah nge i nu hi Isak? a han ti nghal tawng a. Isaka chuan, "ka nu maw? a room lamah a awm ang, enge ni ta? i hmu duh em ni? Inspector chuan, "Aw tunah" a han ti a. Isaka chuan, "lo kal rawh Sir, ka hruai ang che" tiin Inspector chu a nu awmna lamah chuan a hruai ta a.

Pi Vanhmingi chu a hmel a lo tla tawhin hmuh a nuam lo hle mai a, a pasal a sunna avang te pawh chu a ni ngei ang. Inspector a lo hmuh chuan mak a lo ti hle mai a. Inspector chuan, "Pi Vanhming, i duh chu i hmu ta e, engvang nge? Engvanga khatiang thil kha ti nge i nih? A han ti a.

Pi Vanhmingi chuan, "Inspector, eng chungchang nge i sawi? a lo ti a. Remruata chuan, "Pi Vanhming, i thil tih ngei pawh i haider lui zel dawn a ni maw? a va mak ngai ve, hetiang mihring hi ilo ni a ni maw? Tunge i rawih leh tak? Min hrilh vat rawh" a han ti khur khur a.

Chuveleh, Isaka chuan, "khai a, enge thil awmzia hi ni ta ngai ka pu? ka nu hian eng thil maw a tih a? a lo ti ve ta bawk a. Remruata chuan, "i nu thil tih hi i hre duh anih chuan a Mobile phone hi check sak rawh" a lo ti a. Chuveleh, Isaka chuan, "khai leh! eng thil nge ni a ka nu? i Mobile phone chu enge awmzia?

Pi Vanhmingi chuan a fapa hrilhhai chu hrethiam in, "Isak, i nu hian eng thil mah ka tilo, ka taksa leh rilru lam hriselna hi a tla hniam zel zawk anih hi. He Inspector hian thil a hre sual anih hi, a ngaihtuahna ramah a cheng nasa lutuk a nih hi" Remruata chu a insum thei lo. "Takzet chuan! Chuti chuan i ti maw ka pi, ka nau chu thi chhawngin damdawi In-ah a awm mek asin. Hetiang thil hi engvanga ti nge i nih? A aw chu a ring tha thin hle a.

Chutia anmahni In chhung ngeia ama nu ngei Inspector-in a han rum khum tak chiam chiamah chuan Isaka chuan, "Awle ka nu, khaw maw i Mobile phone chu, inspector ngaih that nan hian ka lo en ang chu, engmah i tisual lo a ni tih a hmuh a ngai a ni" a han ti a. Pi Vanhmingi pawh chuan a Mobile phone chu a fapa chu a lo pe ve mai bawk a.

Inspector chu mak tiin a meng phar awn awn mai. Isaka chuan, "Sir, ka nu hi misual a ni hleinem. I thusawi te chu a awmzia pawh a hre lo hrim hrim ang. Hei, tun lai phei chu a hriselna hi a tlahniam zel zawk asin. Duat tak leh keh thei dawma kan dawm a ni ve asin. Thil i hresual der a ni. ka nu cellphone-ah hian eng chu nge hmu a i inbeisei reng reng a? Tiin a nu cellphone chu a han en tir a.

Remruata chuan a ngaihna a hre lo hle a. "Imm, nangmah i ni silo anih chuan tu chu nge ni ta ang? Tiin cellphone chu uluk tak chuan a han en a. Pi Vanhmingi Facebook-ah chuan lutin amah rawn be tu account kha a hmuh mai kha a inring a ni a, mahse a hmu hauh lo. Facebook profile chu pakhat chauh a lo awm a, a lo delete hman anih te chu a han ring dawn dawn a.

Chutah, WhatsApp lama midang nen an inbiakna te chu a han en leh a, a ngaihna a hre lo tulh tulh zawk mai. Chutah Isaka hnenah chuan, "Isak, i nu ni ngeia lang mi pakhat hian min rawn be thin a, a duh anga ka awm lo anih leh i pa thihna case hi ka tawp san lo anih chuan ka chungah thil tha lo tak a thlen tur thu te min rawn hrilh thin a ni, chu chu tun mai vawiin ni chawhma lam khan a thleng ta a ni. ka nau chu tu tih hriat lohin motor-in a su a, a tlan bo zui daih mai a, ka nau chu damdawi In-ah a awm mek a ni"

Isaka pawh chuan Inspector chu a lainat ve hle a. "Sir, a va pawi ve, ka nu anga lem rawn chang tu chu tunge anih hriatchhuah ngei a ngai anih chu" a lo ti ve vat bawk a. Inspector chuan, "Aa, i nu angin lem a chang chu ka ti chiah thei lo, hei en rawh" tiin Facebook a tunge a hriat loh nena an inbiakna te chu a han en tir dawn a. Mahse le, eng inbiakna mah hmuh tur a lo awm lo. Remruata chuan a chal chu a dawn vawng vawng a. "Hrep tak chuan! Kan inbiakna Engkim a lo delete anih hi" a han ti a, a thin chu a ur nasa tawh hle a.

Isaka chu Inspector chuan Facebook profile chu a han en chian tir a. Chu Facebook profile chu a in lock tlat avangin a profile picture chu hmuh tur awm a ni mai a. Mahse, Isaka chuan facebook profile picture chu uluk tak chuan a han en chiang a, hming ni ngei tur chu a zu hmu fuh ta hlauh mai.

Chuveleh Isaka chuan, "Sir, han en chiang ve teh, khu pangpar lem chunga thuziak khu i hmu em? hming a ni" a han ti a. Inspector chuan chu thil a han en chian nak chuan a phu teuh kher mai! Profile picture a hming chu 'Mukesh' tih hi a lo ni a, a hawrawp chu lobster hawrawp a nih avangin ngun taka en loh chuan enge a awmzia tih hriat a har hle a.

Nancy-i pasal Mukesh-a a hrechhuak zawk a. Chuveleh, thinrim avanga ha chang thial bawp bawp chung chuan, "Zawng phiangsen! Nangmah vek maw lo ni" tiin Isaka leh a nu chu a chhuahsan nghal thuai a. Thinrim engphiar chuan Mukesh-a te awmna lam pan chuan a inkhalhchhuak leh ta a.

PSYCHIC Volume_3

Last chapter

"Mukesh, misual pa! ring zet zeta a pasal hming rawn lam tu chu tunge anih hriat tum chuan choka lam chu a pan thuai a. "Lalpa leh! Remruat, enge ni ta? Engatinge khati vak vaka Mukesh-a chu i auh tak mai, In-ah a awm hleinem" Nancy-i chuan a lo ti thuai a.

Thinrim avanga meng sen awm awm chung chuan, "Nancy, i pasal hi ka hmuh ngei a ngai a ni. ka chungah thil pawi tak a ti a ni. ka nau chunga a thil tih tenawm tak avang hian ka ngaidam ngai lo ang, hrep tak chuan! khawiah nge tunah a awm?

Nancy-i chuan chuti taka thil pawimawh a awm takah chuan a pasal chu a call nghal thuai a. Chumi lai chuan thenawm te pawh chu Inspector Remruata thinrim te thawm avang Chuan enge thil awmzia hriat tumin an rawn in hawr khawm nghal laih laih a.

Mukesh-a pawh chu a nupuiin hmanhmawh taka In lama haw tura a rawn tur tak thutah chuan ngaih tha lovin In lam panin a rawn tleh haw ve nghal mai a, a hnathawhna hmuna hun a hman lai a lo ni nen, mahse a nupui chuan thil pawimawh tak a awm thu a rawn hrilh avangin ban hun pangngai ni loah chuan chhuanlam siamin a rawn thang haw nghal chung chung a ni.

An inkawt a va thlen chuan thenawm te chu eng engemaw sawi hian an lo inhawr khawm laih laih reng a. Mukesh-a an lo hmuh veleh chuan thil awmzia hriat tumin Mukesh-a lam chu an rawn pan nghal thuai a. "Mukesh, enge thil awmzia? eng thil rapthlak nge i tih tak mai? a nupui Nancy-i chuan a rawn ti nghal vat a.

Mukesh-a chuan, "Nancy, enge thil awmzia hi? a lo ti let ha mai. Chutah le, Inspector Remruata chuan thinrim avanga mit meng sen ram chung chuan Mukesh-a chu a rawn pan hnai zel a, chutah Mukesh-a chuan a ngaihna hriat loh hmel fe hian, "Ruata" a han ti dek dek chu Inspector Remruata kuttum chu a hmai chuan a dawng nghal siah mai! A khaw hmuh chu a buai nghal vek a, a khabe chu na tiin a dawm nghal vawng vawng mai.

Chuveleh, hmeichhe ho chu mangangin an lo te nghal chul a. Remruata chuan dimna tel map lo chuan Mukesh-a chu a han hnek leh bur mai a, Mukesh-a chu a petek kawi nawk nawk mai. Chu chu a tlawh zui nghal dawt dawt a, lei a tlu Mukesh-a chu a chhir zui nghal nawk nawk mai a.

"Duhtawk rawh Ruata, duhtawk rawh" tiin pa ho chuan Remruata chu an han bawr nghal laih laih a. Mahse, Inspector thin chu a rim thlu ngang a niang. "Zawnga! Zawng phiangsen!

Theihtawp chhuaha Inspector an han chelh leh hnu chuan Inspector chu an pawt hrang thei ta hram a. Mukesh-a pawh chu a biang vung ul chung chuan a rawn thochhuak ve tuah tuah a. Nancy-i chuan a pasal chu a lo kuah nghal vat a.

Chutiang ang boruak anih chhoh tak le lu ah chuan Police lam chu tu tih hriat loh hian a lo va hrilh ni ngei tur a ni. Remruata leh Mukesh-a chu Police te chuan an rawn la ta nghal a.

"Sir, i chungah hian eng thil nge thleng ta mai hi le? Inspector meuh thil tih atan chuan a âtthlak tak zet a ni. Miin Inspector Remruata chu a ât tawh thu leh a rilru a buai thu hi an sawi tui ber a ni dawn a nia. Sir, i rilru hi a harh fim meuh maw?

Remruata chuan a melh ngai chu a melh reng a, chu pa biakna pawh chu hria ang in a lang lo. Han tih vak ngaihna an hriat tak lohah chuan Inspector leh Mukesh-a te chu an chhuah leh ta ngawt mai a. Tin, zu an rui lo a, an ni pahnih Mukesh-a leh Inspector te pawh chu inhre ngai lo tawp an nilo a, thian inkara buaina thilah an ngaihsak ta ngawt mai a ni.

A kut te chu a khem nen nuan a, a thawmhnaw hak chu a pawrin a bal hle bawk. A ngaihna hriat loh hmel tak chuan, "Mama, enge thil awmzia hi? Hetiang hian i awm ngai silo a. Mama, i thianpa Freddy-a i hmuh a ngai a ni. Freddy-a pawh ka be vek tawh. Thil awmzia leh i harsatna te pawh ka hrilh vek tawh"

Remruata chuan, "ka pa, ka nu, ka harsatna chu inhre dik lo. Ka harsatna chu rilru lam a nilo" a han ti a.

Remruata chuan thil awmzia chu a nu leh a pate hnenah chuan a han hrilhfiah ve ta a. Mi tu tih a hriat lohin a rawn biak thin thu te, a thusawi ang leh a duh dan anga a awm lo anih a Pastor case chu a tawp san lo anih chuan a chungah thil tha lo tak a thlen tur thu te, tin a nau chu motor chuan a su zui ta mai bawk a. Tin, Pi Vanhmingi anih a rin thu te, an chenna In-a thinrim taka chet a va lak dan te, tunah Mukesh-a a ni leh a, na takin kut a thlak zui leh mai a nisi a.

Ngun tak leh uluk tak chuan an fapa buaina chu an han ngaihtuah a, an fapa chu rilru lam buaina nei ni ah an ngai ta a, stess emaw depression lam te hi a lo nei ve reng ni ah an ngai ta a ni. A thian pa, rilru lam Doctor Freddy-a chu hmu ngei turin leh treatment la turin an fapa chu an ti ta tlat mai a.

A pa chuan a fapa en ran chung chuan, "Ruata, motor kha tu ta nge anih kan hre tawh a, a neitu pa hian engmah a lo hre ve hauh lo mai a, a driver hi zu rui thin a lo ni a, rui chungin motor a khalh fo thin a ni awm e. Tum dangah pawh a ruih avangin a lo chesual ve fo tawh thin a ni awm e, a inthiam loin hreawm a ti hle mai a, khatia a driver-in i nau a sut hnu khan mangang takin a driver chu a hnenah a va zualko a ni awm a.

"Mi a sut thu te, a ruih thu te, a tihpalh anih thu te a hrilh a, a hlauthawng hle a ni awm e. Tichuan, motor neitu pa chuan a driver-in a sut chu tunge anih hriat vat a duh ta a, a driver hnenah chuan mi a sutna hnuna hruai vat turin a lo ti a. Motor chu driver chuan kawngpui kiangah a dah mai a, chu mi pawh chu ngaihsak tawh loin keimahni hnen lam an rawn pan vat a, ngaihdam dil tur leh thupha chawi turin min rawn zawngchhuak let ta zawk a ni.

"Motor neitu nen pawh kan titi dun tawh a, hreawm a tiin a inthiam lo hle. keini pawhin kan ngaidam zui ta a ni. Mahse, nuam a ti thei ngang chuang lo a, i nau a dam that thlenga enkawlna sen so zawng zawng tum turin thu kan titlu ta a ni. Tih luih a nilo va, ruahman lawk sa a ni hek lo. Thil thleng palh liau liau a ni e, driver ruih vang a ni e"

Mak a tiin a hrilh a hai hle mai a. "Chu ka pa, chuti anih chuan kei hian thil ka hresual i tihna em ni? A nu chuan, "Mama, Mukesh-a kha engvanga khatia bei vak mai nge maw i nih le? A lo ti a. Remruata pawh chuan thil awmzia chu a han hrilhfiah veleh ta a. Facebook atanga Mukesh-a a rinhlelh thu te, tin tun hma pawha Mukesh-a nena chanchin sawi tur an lo neih ve tawh dan te a ngaihtuahin Mukesh-a hian tihbuai a tumna leh a laka phuba lak a tumna ni a a ngaih thu te a han sawifiah ve leh ta a.

A nu chuan, "Mama, nangmah hi i chau tawngkhawng a ni. In enkawl that i ngai a ni. Hman ni deuh tawh atang khan i buai ru tlat tawh, hetianga i awm hi kan la hre ngai lo. Mami ngei pawhin min hrilh thin. I phun mawlh mawlh thin te, i te leh thut thut thin a, tin tunah lah kha i phone hmai te kha enge a awmzia? chu, pitar pakhat pawh an chenna In-ah ngei i va tawng chiam mai a, tin Mukesh-a a ni leh a, a ni phei chu kut hial i thlak a, Nancy-i'n enge min hrilh hi i hre duh em? A pasal kha thah i tum ta emaw a ti hman hial asin.

"Nangmah i inhriat ang leh i inhmuh ang hi i nilo, pawn lam atanga lo hmu a lo hre tu che kan ni a, i buai a ni, i pangngai lo, chuvang chuan thil pawi dang a thlen leh hma ngeiin i thianpa Freddy-a hmu vat ang che, i pa in a va hruai dawn che nia, min hnial hauh tawh suh ang che. Chuan kha mi, tu tih hriat loh chungchang pawh kha i ngaihtuahna mai mai a ni. Engmah inbiakna hmuh tur leh hriat tur a awm silo"

A nu leh a pate rawtna chu a khauh tak em avang chuan a thian pa Freddy-a hmu tur chuan a pa rual chuan a liam ve ta nge nge a.

Freddya'n a lo hmuh chuan a lo lawm thiam hle a. "Ruata, in hmuh a khat hle mai. Pu Rindik, kha lo thu rawh, thingpui te kha lo in rawh" tiin a lo chhawn nghal thuai a.

Freddy-a thusawi duhdan avang chuan Remruata chu a lawm lo hle mai a. "Engtin maw i tih Freddy? ka nau chungchang chu engtin maw i tih? Ka nau chu thih sualin damdawi In-ah a awm mek asin" a aw ka chu a vin leh tawh hle.

Freddy-a chuan mak ti zet chung chuan, "Ruata, ka thusawi awmzia i man lo a ni, tawh sual a tawk a ni tihna a ni mai. Chutiangin mi tumah in an ti lui duh lovang" Remruata chuan, "Freddy, i tawngkam cheh duhdanah kei hi eng ang chiahah nge maw min ngaih ni, ka farnu ni mai lovin nakinah chuan ka nu leh ka pa te chungah ngei pawh hian eng thil nge thleng dawn tih hi i hria em ni?

Freddy-a chuan, "Nilo Ruata, ka thian tha i ni a, i farnu chungchang chu i zeldin thil leh i ngaihruatna mai niin ka hria" a han ti a. Chuveleh, Remruata chu a tho thut a, Freddy-a âwm a han tham sauh sauh pah chuan, "Freddy, chutin tawng fo suh, tunah hian eng harsatna nge ka tawh tih hi engmah i hre lo, he misual hi ka man dawn a ni" tiin thinrim zet hian Freddy-a chu a chhuahsan nghal a. Pawn a a chhuak tur chiah chu a pa, an thawm avanga anmahni rawn ngaihven tum mek tu nen chuan an in tawk a.

A nu chuan, "Mama, i thianpa ngawih ngawih a ni asin. kut thlak i tum a maw? hei Freddya'n engkim min rawn hrilh leh vek alawm. Heti anih chuan i bulah hian mi tumah hi an him ta hauh lo mai"

"Ka nu, engvanga chutiang thu ringawt chu min fah nge maw in nih le? ka buai lo, ka tha, ngaihtuah ka ngai hek lo. Misual hi ka man duh a ni" Tiin thinrim zet hian dawhkana bottle chu a kut chuan a vai kiang thuai a, thawm avang chuan a pa chu an awmna pindan lamah chuan a rawn petek phei nghal thuai a.

An pathum, a pa leh a nu, amah nen chuan ngawi reng hian an inen thap hlawm a, sawi tur ber pawh hre loin an ding ngawi reng hlawm a. Chutah, Remruata chuan thawk chu a han la a. "Lalpa leh! Ka tihpalh ka nu, ka pa min ngaidam rawh u, ka chau ve deuh a niang e. Ni e, in sawi dik. In thusawi ka awih ang, ka buai deuh a ni. khatiang khan ka awm leh tawh ngai lo ang tih ka tiam e, ka thin ur em avang leh ka chi ai ve deuh vang a ni e" Tiin thutthleng ah chuan a thu nghal hnawk a.

"Awle, hei hi ka thutlukna ni rawh se, Ruata, naktuk hian rilru lama harsatna neite awmna hmun Mental Hospital lamah thla khat chhung hun hmang turin kan kal ang. Thla khat hnuah i dam that hnu ah i chhuak leh chauh ang, heti ringawt hi chuan i bulah mi tumah an awm ve a tha lo, thinurna in i khat rih a ni.

"I buai a ni. Tin, mahni chauha thlah fal ngam lah i ni hek lo, eng thil nge i tih ang tih hi nangmah ngei pawh khan i chiang hauh lo tlat a ni" a pa chuan a ti ta a. Uluk zawk chuan a pa thusawi chu a han ngaihtuah a, amah ngei pawh chuan dik a ti ta hle. Pastor ang chauh kha a la ni ve mai ang tih chu a hlau ru ve ta deuh a. A inthununna a hlauh zawh a, a chhia leh tha hriatna a hlauh vaih zawngin mahni a intihlum ve kher lo anih pawhin thinurna leh huatna avanga pawi a khawih ve mai te pawh chu a hlau ru ta a ni. A chhungrilah chuan hlauhna in a man a, a ngaihtuahna leh rilru te chu a mang zo ta niin a hria a.

Engti kawng zawng pawhin a chak lo a ni. A chak lohna chu pawm mai tha in a hre ta a. A en ngai chu a en reng a, chutah zawi sap hian, "Imm, ka tlawm ta e, ka chak lo Victor, min hre thei em? Tunah chuan i duh ang ngeiin rilru buai ho awmna ah ka kal dawn ta e, i chak ta e" a ti chhuak sap a.

Pastor k.Lalngaihawma thihna chhui tu Inspector Remruata chanchin chu a darh chak hle mai a, mi pakhat kut a thlak chiam thu te chu titi tui berah an nei mek zel a ni. Tin, Pastor thihna chungchangah pawh chuan investigation tih nawn leh a ni dawn ta a, Pastor thihna chungchang chu chiang zawka tarlan theih anih an beisei vang a ni.

Tin, Inspector Remruata, Mental Hospital lama thla khat chhung a awm tur chungchang te chu mite chuan an lo hre kai leh ta zel a, chu thil avang ngawt te chuan case chu uluk zawka en let leh ngei nise tih chu mipui te au hla ah a chang chho ta a ni. Inspector Remruata pawh chuan thil awm zia chu a lo hriatin investigation tih nawn leh anih chuan Sailova chu man anih ngei a ring a, a lo rinna pawh chu a dik ngei dawn niin a lang ta bawk.

Nimahsela, Pastor chu amah intihlum ngei a ni tih finfiahna tha tawk tak a ni chuan a nei ve thung a, chu chu Pastor note bu kha a ni. Chutah chuan Pastor chuan a thuruk tam tak a dah a. Mahni intihhlumna lam hawi ruahmanna hrang hrang a duang a ni. Chutah chuan Sailova tal awh tir dan tur te, evidence Siam chawp dan tur te, Voice recorder chungchang te kha a awm vek a ni. Pastor chuan chet a lak dan tur ruahmanna te chu uluk takin note bu ah chuan a chhinchhiah vek tlat a.

Tin, tu tih hriat loh, amah rawn bia a a case buaipui lai tawp san tura rawn vau tu pawh kha Pi Vanhmingi ngei anih chu a ring zel tho a. Chu erawh a finfiahna a nei lo thung. Mental hospital lama hun a han hman dawn takah khan amah vaukhan tu khan thu hnuhnung a rawn hrilh leh a, engkim a tawp tawh thu te, an ni pahnih inkar pawh chu chinfel anih thu te, amah Remruata nunna pawh chu anchhia leh dawiin a zui loh hram a beisei thu te a rawn hrilh a, tin amah pawh chuan a rawn tihbuai tawh loh tur thu te hrilhin a tih tur a hlen thu te a rawn hrilh a, a rawn mangtha ta a ni. Chumi hnu lawkah chuan Pi Vanhmingi chu an chenna In chung atanga a chetsual thu leh ka pawh chhawn lova a thih zui tak thu te chu a thil hriat a ni zui ta a ni.

Kar thum chhung lai mai chu Mental Hospital lamah chuan hun a hmang ve tawh a, amah rawn kan tu a nu leh a pa, Rinpuia leh Nancy-i, Freddy-a te chu a ngaihtuah zui dauh dauh reng a. Chutianga a han awm ta mai chu pawi a tiin hreawm a ti ve hle a ni. A rin ang ngeiin Pastor thihna ah chuan Vanlalsailova chu man a ni ta tho a, Court pawhin case investigating officer-in a hnuchhui dan leh evidence a neih te chu a lo pawm niin a lang ta bawk. A tan tir lama Rinpuia'n an hnuchhui a han khaikhawm dan ang deuh khan Pastor thihna case chu a hmawr bawk a ni ta a ni.

Thil tam tak a ngaihtuah a, hma lamah chuan eng thilin nge lo hmuak leh ang? Tunah chuan a rilru leh taksa lama hahchawlhna a neih mek lai a nisi a, kar khat dang a liam leh a nga chumi hunah chuan a hma huna amah lo hmuak mek tute chu hmachhawn leh turin a thawhchhuah a tul leh ngei awm si a.